Chapter 27

śrīnārāyaṇa uvāca |
athāpi śrūyatāṃ lakṣmi  mūrtayaste sanātanāḥ |
sanātanasvarūpe me sadā'bhinnā madātmikāḥ || 1 ||
[Analyze grammar]

mahālakṣmīśca lakṣmīśca ramā rādhā satī tathā |
vṛndā ca mātaraścaiva gaṃgādyāḥ kanyakāstathā || 2 ||
[Analyze grammar]

mayā madaṃgabhūtāstāḥ pṛthakkṛtvā svayaṃ dhṛtāḥ |
sarvadaitā madabhinnā madvanmokṣapradā matāḥ || 3 ||
[Analyze grammar]

manmūrtau cākṣare dhāmni śrīharau santi ṛddhayaḥ |
mahālakṣmīsvarūpāstā mayaiva prakaṭīkṛtāḥ || 4 ||
[Analyze grammar]

tathā tatraiva manmūrtau santi yāḥ smṛddhayaḥ parāḥ |
lakṣmīrūpā mayā tā vai sarvaśaḥ prakaṭī kṛtāḥ || 5 ||
[Analyze grammar]

tathā tatraiva manmūrtāvasti yā ramaṇīyatā |
mayaiva sā pṛthakkṛtvā ramāstāḥ prakaṭīkṛtāḥ || 6 ||
[Analyze grammar]

tathā tatra ca mūrtau me siddhecchāśca bhavanti yāḥ |
tāstu mayaiva manmūrteḥ rādhāstāḥ prakaṭīkṛtāḥ || 7 ||
[Analyze grammar]

tathā tatra ca manmūrtau sattā yā sārvabhaumikā |
satīrūpā mayaivetāḥ sarvāstāḥ prakaṭīkṛtāḥ || 8 ||
[Analyze grammar]

tathā mūrtau ca me tatra sāmarthyaṃ varadānakam |
tatsāmarthyaṃ pṛthakkṛtya vṛndāḥ sarvāḥ prakāśitāḥ || 9 ||
[Analyze grammar]

tathā tatra ca manmūrtau poṣikāḥ śaktayastu yāḥ |
tāḥ pṛthakkṛtya sarvā vai mātaraḥ prakaṭīkṛtāḥ || 10 ||
[Analyze grammar]

tathā mūrtau ca me tatra dravyaḥ premarasātmikāḥ |
tāḥ pṛthakkṛtya sarvā vai gaṃgādyāḥ prakaṭīkṛtāḥ || 11 ||
[Analyze grammar]

sarvā apyarajaskāstāḥ sarvāścā'kṣatamadhyamāḥ |
sarvāḥ śāśvatatanavaḥ sarvā manmūrtayaḥ smṛtāḥ || 12 ||
[Analyze grammar]

mamākṣare pare dhāmni santi muktānya eva tāḥ |
īśasṛṣṭau ca sarvatra santīśvarāṇya eva tāḥ || 13 ||
[Analyze grammar]

jīvaloke pare satye santi devyastu tāḥ striyaḥ |
tathā kāryasvarūpāstā nivasanti stare stare || 14 ||
[Analyze grammar]

mahālakṣmīḥ smṛddhirūpā lakṣmīḥ svarṇādirūpiṇī |
ramā sampatsvarūpā ca rādhā siddhistu kāryajā || 15 ||
[Analyze grammar]

vṛndā''śīrvādasāphalyaṃ tulasīrūpiṇī tathā |
satī sādhvyāḥ satsāmarthyaṃ mātaraḥ puṣṭiśaktayaḥ || 16 ||
[Analyze grammar]

gaṃgā dravajalakhyātā muktidāstā harermatāḥ |
sarāṃsi puṣkarādīni tatpremarasabindavaḥ || 17 ||
[Analyze grammar]

kṣetrāṇi tu haridvāranaimiṣāraṇyakāni ca |
harerakṣaradhāmāṃ'śaprabhavāṇi bhavanti hi || 18 ||
[Analyze grammar]

teṣu kṣetreṣu puṇyeṣu sādhvyo divyā vasanti hi |
pūryo hyakṣaradhāmasthabrahmapūryaṃśajā matāḥ || 19 ||
[Analyze grammar]

tatra sarvatra lakṣmyādyāḥ kumāryaḥ pravasanti vai |
divyadṛṣṭayā tu dṛśyante divyamuktipradāstu tāḥ || 20 ||
[Analyze grammar]

nārījanma gṛhītvā tu mahālakṣmyādayaḥ kvacit |
śreyaḥkartryaḥ kumāryastā jāyante gṛhamedhiṣu || 21 ||
[Analyze grammar]

sādhvyo bhavanti cā''bālyātkumāryo'kṣatayonayaḥ |
dīkṣitāstu bhavantyetā yoginyo yogasādhikāḥ || 22 ||
[Analyze grammar]

kāścitsanyāsamālambya sanyāsinyo bhavanti hi |
kāścidrāgavināśena vītarāgiṇya ityapi || 23 ||
[Analyze grammar]

kāścit sāṃkhyavicāreṇa brahmayogena caiva hi |
bhavanti sāṃkhyayoginyo brahmacaryaparāḥ sadā || 24 ||
[Analyze grammar]

naiṣṭhikabrahmacāriṇyaḥ sṛṣṭau bhavanti mokṣadāḥ |
śuddhāścāgnisvarūpāstā brahmāṇyastārayanti nṝn || 25 ||
[Analyze grammar]

śīlavratadharāḥ sādhvyaḥ sūryavarcasvakāntayaḥ |
candraśāntimayā''syāstāstāpatraividhyanāśikāḥ || 26 ||
[Analyze grammar]

darśanād duḥkhanāśinyaḥ sevanātsukhakārikāḥ |
vandanādviṣahāriṇyaḥ śravaṇācchuddhatāpradāḥ || 27 ||
[Analyze grammar]

kīrtanātkāmyaphaladāḥ smaraṇāt smarahārikāḥ |
arcanādarcimārgaṃ tu nayantyo muktidāśca tāḥ || 28 ||
[Analyze grammar]

dāsyād dāsatvadātryastāḥ sakhyātsakhitvalaṃbhikāḥ |
ātmanivedanād bhaktaṃ haryātmani niveśikāḥ || 29 ||
[Analyze grammar]

bhojanācchādanavastravastusāmagrikārcitāḥ |
śrīharerakṣaraṃ dhāma prāpayanti harerbalāt || 30 ||
[Analyze grammar]

pādagātrādisaṃvāhādvāhayanti hareḥ padam |
tattadiṣṭavidhānādvai bhaktaḥ sveṣṭaṃ labheta vai || 31 ||
[Analyze grammar]

kāṣāyāmbaradhāriṇyo haryarthaṃ prītibandhanāḥ |
brahmārthaṃ brahmacāriṇyo naiṣṭhikyo hariniṣṭhayā || 32 ||
[Analyze grammar]

muktānyo muktinidhanād brahmāṇyo brahmasaṃbhavāt |
mokṣāṇyo mokṣamūrtitvād brāhmo brahmasamarpaṇāt || 33 ||
[Analyze grammar]

satyaḥ satītvasaṃtatyā sādhvyaḥ sādhuguṇāśrayāt |
devyo divyadaśāprāptergurvyo jñānopadeśanāt || 34 ||
[Analyze grammar]

dāsyo dāsīsadācārāt brahmadāsyastu tā matāḥ |
īśvarāṇyastu tā bodhyā parameśvarasaṃśrayāt || 35 ||
[Analyze grammar]

patnyastāstu hareḥ pāturlābhād bodhyāḥ pativratāḥ |
patitasya paraṃ dhāma nāyanāt patnya ityapi || 36 ||
[Analyze grammar]

striyaḥ saṃtrāṇanād bodhyā nāryo nṛhariprāpaṇāt |
samrājñyo rājarājādhirājaharyaṃkaveśanāt || 37 ||
[Analyze grammar]

tyāginyastyajanātproktāḥ svāminyaḥ svīyatā'rpaṇāt |
muṇḍinyo brahmakeśānāṃ haryarthe muṇḍanāditi || 38 ||
[Analyze grammar]

ācāryāṇyaśca tāḥ proktā ācārāṇāṃ pravartanāt |
āravālyaśca tāḥ proktā hareḥ śabdasya lāpanāt || 39 ||
[Analyze grammar]

liṅginyaścāpi tāḥ proktā līnārthaharigāmanāt |
avadhūtyaśca tāḥ proktā māyāyā avadhūnanāt || 40 ||
[Analyze grammar]

bhagavatyaśca tāḥ proktāḥ ṣaḍbhagaiśvaryalaṃbhanāt |
mātaraścāpi tāḥ proktā muktermānapradāpanāt || 41 ||
[Analyze grammar]

dīkṣitāṇyaśca tāḥ proktā jñānadānā'ghasaṃkṣayāt |
abalā api tā bodhyā asya viṣṇorbalāśrayāt || 42 ||
[Analyze grammar]

ārṣyastāstu sadā bodhyāḥ ṛṣivedādisaṃśrayāt |
āryāstāstu parā bodhyā harerārāttu yāpanāt || 43 ||
[Analyze grammar]

nārāyaṇyaśca tā bodhyā nṝn nārāyaṇayāpanāt |
hariṇyaścāpi tā bodhyā hariṃ nayati cāśritān || 44 ||
[Analyze grammar]

śriyaścāpi tathaiva syuḥ śrīhareḥ śrayaṇāditi |
sāvyastāstu sadā divyāḥ prasaṃgād divyatāpradāḥ || 45 ||
[Analyze grammar]

mūrtistāsāṃ parā divyā nārāyaṇanivāsanāt |
harerdīkṣāṃ samāpannā haryaṅkakṛnniṣādanāḥ || 46 ||
[Analyze grammar]

hareḥ pratīkṣāṃ kurvantyo harerdhāma prayānti tāḥ |
nayanti sahamān jīvanāśritān bhaktimārgagān || 47 ||
[Analyze grammar]

tāstu sādhvyaḥ sadā sevyā naradeveśvarādibhiḥ |
nārībhistu sadā sevyāḥ pūjyā vandyāśca bhaktitaḥ || 48 ||
[Analyze grammar]

bhagavān śrīharirdevo rājate tanmayaḥ sadā |
sādhvīṣu tatra saṃrāje sadā'haṃ divyamūrtikaḥ || 49 ||
[Analyze grammar]

sādhvyāḥ rūpaṃ ca bhāvaṃ ca dharmaṃ cā''kṛtimeva ca |
gṛhītvā'haṃ sadā rāje sādhvīṣu mūrtimān svayam || 50 ||
[Analyze grammar]

sādhvyo matto na vai bhinnā na me nyūnā na bhūtajāḥ |
māṇikyo na ca vijñeyā mama rūpāstu tā yataḥ || 51 ||
[Analyze grammar]

aṇumātramapi tāsāṃ gātraṃ na māyikaṃ smṛtam |
tāsāṃ gātraṃ tu madgātraṃ mama mūrtaya eva tāḥ || 52 ||
[Analyze grammar]

rūpalāvaṇyasaundaryākarṣaṇāmṛtamiṣṭatāḥ |
mādhuryadṛśyatāsaumyasāntvanāśītatādayaḥ || 53 ||
[Analyze grammar]

namratā'dhīnatāsevāpraśrayāśrayatṛptatāḥ |
dainyasāralyasaujanyavātsalyamṛdutādayaḥ || 54 ||
[Analyze grammar]

ārāmasnehakauśalyasahiṣṇutvā'nugāmitāḥ |
śraddhāviśvāsasatyārthamamatārakṣaṇādayaḥ || 55 ||
[Analyze grammar]

dānapoṣaṇasarvasvārpaṇālambanamitratāḥ |
dhṛtyādhānasuhṛdvṛttisukhaduḥkhasamānatāḥ || 56 ||
[Analyze grammar]

sahanadravatābhaktisevānuvṛttikīrtayaḥ |
praśaṃsāguptigāṃbhīryaudāryalajjādayo guṇāḥ || 57 ||
[Analyze grammar]

sarve madīyā manmūrtau mayā tābhyaḥ samarpitāḥ |
ahaṃ sarvān guṇān datvā sādhvīṣveva vasāmi yat || 58 ||
[Analyze grammar]

tāsāṃ prasannatā yābhirlabdhā sā māmakī matā |
sāṃkhyayoginya evaitāḥ sādhvyaḥ sādhuguṇālayāḥ || 59 ||
[Analyze grammar]

ajñānapāpanāśinyaḥ pradāyinyo'mṛtasya ca |
śrīhareradhikāriṇyo mānyā madvat tvayā priye || 60 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne nārāyaṇamūrtyātmakamahālakṣmyādisādhvīnāṃ bahuvidhanāmaniruktyādinirūpaṇanāmā saptaviṃśo'dhyāyaḥ || 27 ||
[Analyze grammar]