Chapter 19

śrīnārāyaṇa uvāca |
śṛṇu lakṣmi pravakṣyāmi sādhūnāṃ śreṣṭhatā yataḥ |
santo diśanti cakṣūṃṣi santaste hṛdayaṃ mama || 1 ||
[Analyze grammar]

muktimārgo'navaratastādṛśaiḥ sādhubhirmama |
uddhāritaḥ pravṛttaśca mucyante tena jantavaḥ || 2 ||
[Analyze grammar]

vedajñānaṃ janācāro daivaṃ paitryaṃ ca karma yat |
pravartate sadā tebhyo modante tena jantavaḥ || 3 ||
[Analyze grammar]

bhakterbalaṃ ca vairāgyaṃ kalyāṇaṃ vividhaṃ ca taiḥ |
jāyaṃte'tha viraktāstu muktiṃ saṃyānti tena vai || 4 ||
[Analyze grammar]

sādhuvaṃśā ārṣavaṃśā brahmacāripraṇālikāḥ |
pravartante sadā taistu tena mokṣo dhruvo bhavet || 5 ||
[Analyze grammar]

sanakādisamā divyā ābālyād brahmacāriṇaḥ |
santo brahma svayaṃ bodhyāsta eva parameśvarāḥ || 6 ||
[Analyze grammar]

satāmāśīrvacobhistu nvahaṃ nārāyaṇo'bhavam |
satāmāśīrvacobhistvaṃ lakṣmīrabhava ārthikī || 7 ||
[Analyze grammar]

santo yadi prayāceyurlakṣmīrasmabhya āvaha |
tadā sadbhyo'pyahaṃ lakṣmīstvāṃ priyāṃ nu samarpaye || 8 ||
[Analyze grammar]

badā'nyat kinna deyaṃ me satāmarthe bhavetparam |
sarvādhikapriyāṃ tvāṃ yad dadāmi tebhya ādarāt || 9 ||
[Analyze grammar]

dāsā dāsyaśca vaikuṇṭhaṃ bhogyasādhanasampadaḥ |
lakṣmīścāhaṃ ca sarvaṃ me satāṃ bhogyaṃ na saṃśayaḥ || 10 ||
[Analyze grammar]

bahujanmakṛtaṃ puṇyaṃ yadā bhavati sāmpratam |
tadā santaḥ svagehaṃ vai samāgacchanti bhāgyataḥ || 11 ||
[Analyze grammar]

yadi santoṣitā vṛddhā bahubhirjanmabhistadā |
āgaccheyuḥ samāḥ santo gṛhaṃ tu gṛhiṇāṃ mudā || 12 ||
[Analyze grammar]

santo vāñcchanti yadyanme gṛhadārādhanādikam |
niḥsaṃśayaṃ tu tatpremṇā sadbhyaḥ sarvaṃ samarpaye || 12 ||
[Analyze grammar]

brahmaloko na goloko vaikuṃṭho'pyākṛto na ca |
na lakṣmīrna ramā rādhā sadbhyo nāstyadhikaṃ hi me || 14 ||
[Analyze grammar]

lakṣmi santaḥ sadā sevyāstanvā ca manasā'nvaham |
santo mama pratīkā vai santastu mama mūrtayaḥ || 15 ||
[Analyze grammar]

sanno nakhaśikhāyāvaddehadivyā bhavanti hi |
caraṇānāṃ jalaṃ teṣāṃ prapunāti bhuvastalam || 16 ||
[Analyze grammar]

caraṇānāṃ rajasteṣāṃ punāti śirasā dhṛtam |
caraṇānāṃ talaṃ teṣāṃ punāti vakṣasi dhṛtam || 17 ||
[Analyze grammar]

caraṇānāṃ sparśanaṃ vai punāti bhuvanatrayam |
pādasaṃvāhanaṃ teṣāṃ prārabdhaṃ sukaroti hi || 18 ||
[Analyze grammar]

sādhūnāṃ pādayoḥ svasya mastake dhāraṇe kṛte |
pavitraṃ jāyate sarvaṃ śarīraṃ mokṣabhājanam || 19 ||
[Analyze grammar]

pādayorlehane teṣāmātmā śuddhyati kilbiṣāt |
jaṃghāsaṃvāhane teṣāṃ samrāḍ bhavati sevakaḥ || 20 ||
[Analyze grammar]

sakthisaṃvāhane teṣāṃ sārvabhāmo nṛpo bhavet |
kaṭisaṃvāhane teṣāṃ trilokīśo bhaved dhruvam || 21 ||
[Analyze grammar]

pṛṣṭhasaṃvāhane teṣāṃ parameṣṭhipadaṃ labhet |
hastasaṃvāhane teṣāṃ vairājaṃ padamālabhet || 22 ||
[Analyze grammar]

aṃgānāṃ mardane teṣāṃ viṣṇurājyaṃ paraṃ labhet |
satāṃ saṃkalpapūrtyā svaṃ sarvaṃ prapūritaṃ bhavet || 23 ||
[Analyze grammar]

satāṃ śarīre bhagavaccharīraṃ satāṃ vicāre bhagavadvicāraḥ |
satāṃ prayatne bhagavatprayatnastataḥ susantaḥ khalu toṣaṇīyāḥ || 24 ||
[Analyze grammar]

satāṃ pade śrīharipādaśaktiḥ satāṃ kare śrīharihastaśaktiḥ |
satāṃ hṛdi śrīharivāsaśaktiḥ satāṃ vihāre harigamyaśaktiḥ || 25 ||
[Analyze grammar]

satāṃ manaḥ śrīharimānasaṃ mata |
jñānaṃ satāṃ jñānamamuṣya sammatam |
icchā satāṃ śrīharivāñcchanaṃ mata |
kārye satāṃ śrīhariṇā kṛtaṃ matam || 26 ||
[Analyze grammar]

satāṃ tu nāḍyaḥ parameśanāḍyo raktaṃ satāṃ śrīparameśaraktam |
dhātuḥ satāṃ śrīparameśadhātuḥ śvāsaḥ satāṃ śrīparameśavāyuḥ || 27 ||
[Analyze grammar]

cakṣuḥ satāṃ śrīparameśacakṣuḥ karṇaḥ satāṃ śrīparameśakarṇaḥ |
mukhaṃ satāṃ śrīparameśvarāsyaṃ jihvā satāṃ śrīparameśajihvā || 28 ||
[Analyze grammar]

bhojyaṃ satāṃ śrīparameśabhojyaṃ grāhyaṃ satāṃ śrīparameśalabhyam |
bhogyaṃ satāṃ śrīparameśabhogyaṃ divyaṃ bhavedvastu satāṃ prasaṃgāt || 29 ||
[Analyze grammar]

santaḥ sadā śrībhagavatsamānā mokṣapradāste śaraṇāgatebhyaḥ |
pāpāni sadyaḥ khalu mārjayanti puṇyānyanantāni samarpayanti || 30 ||
[Analyze grammar]

satāṃ tvaco hyakṣaradivyatulyā'' |
nandapradāḥ sparśakṛtāṃ bhaveyuḥ |
satāṃ samastendriyayogalābho |
muktipradaḥ puṣyan eva bodhyaḥ || 31 ||
[Analyze grammar]

satāṃ sakāśāt khalu yena putro |
labdhaḥ suputraḥ kulapāvanaḥ saḥ |
harestu gātrānnanu so'pi jātaḥ |
satā samo vai hariṇā samaḥ saḥ || 32 ||
[Analyze grammar]

satāṃ prasādo mukhapaṃkajasya labdhastu yenā'tra sa muktipātram |
satāṃ samastaṃ śarīrantu yena sammarditaṃ tasya samastasaukhyam || 33 ||
[Analyze grammar]

janāḥ satāṃ bhojanadānamagrataḥ |
kṛtvā tu gṛhṇanti satāṃ prasannatām |
jihvandri'yā'rpyā'rthyasumiṣṭamaśnatāṃ |
svīkurvatāṃ śiṣyasudattasūpadāḥ || 34 ||
[Analyze grammar]

rasastu sarvo madhurādirūpaḥ satsvīkṛto nirguṇabhāvamīyāt |
rūpaṃ tathā śuklasurūpasaumyākṛti pradṛṣṭaṃ hyaguṇatvamīyāt || 35 ||
[Analyze grammar]

śabdastu sadbhiḥ khalu saṃśruto yaḥ |
sa divyatāṃ yāti satāṃ prasaṃgāt |
sparśastathā satpuruṣaiḥ kṛto yaḥ |
sa muktidaḥ syāddhi satāṃ prasaṃgāt || 36 ||
[Analyze grammar]

gandhastu sadbhirgrahaṇe dhṛto yaḥ sa nirguṇo vai bhavati pradivyaḥ |
saṃkalpamātraṃ tu satāṃ vibodhyaṃ mokṣapradaṃ puṇyasudaṃ samarddham || 37 ||
[Analyze grammar]

yadāsanaṃ sadbhiradhiṣṭhitaṃ ca yad yānaṃ śarīraṃ paśupakṣiṇāṃ tathā |
yaccā'pyadhiṣṭhāya sukhasya mātrāṃ gacchanti santastadu mokṣagāmi || 38 ||
[Analyze grammar]

yadyujjaḍānāmatha cetanānāṃ deheṣu santaḥ sukhamāmananti |
tattajjaḍaṃ cetanamasya yogād divyaṃ sumuktiṃ gatamityavehi || 39 ||
[Analyze grammar]

yasmin gṛhe pādatalasya labdhiḥ satāṃ bhavettadgṛhamiṣṭadivyam |
yasminpadārthe karayoḥ satāṃ tu sparśo bhavedvastu tadeva divyam || 40 ||
[Analyze grammar]

satāṃ stave yena tu vāk prayuktā sā divyatāṃ yāti na bandhanāya |
āsyaṃ prajanyaṃ ca satāṃ prasaṃgāt sadā pavitraṃ bhavatīha divyam || 41 ||
[Analyze grammar]

śārīrakaṃ yatkaraṇaṃ ca kāryaṃ pratyekamaṃgaṃ ca samastadehaḥ |
yadyatsatāṃ syādupayogalabhyaṃ tattadbhavenmokṣakaraṃ tu divyam || 42 ||
[Analyze grammar]

dehasya bhogyāni supauraṭāṇi vā rājatādīni subhūṣaṇāni |
kauśeyakārpāsakṛtāni yāni vastrāṇi yāvatprakarāṇi tāni || 43 ||
[Analyze grammar]

tailāni mṛdyāni sugandhitāni |
lepyāni cā'rcyāni tu candanāni |
puṣpāṇi ramyāṇi sugandhibhāñji |
sadbhyo'rpitānyāpnuyuratrigauṇam || 44 ||
[Analyze grammar]

aho viśeṣāt kimahaṃ bravīmi |
santastu sarvānnu pavitrayanti |
pāpān suduṣṭānmalinān śaṭhāṃśca |
tamaḥ pradhānānadhamāṃśca jīvān || 45 ||
[Analyze grammar]

prajāpatīn manūn devānṛṣīn pitṝn pṛthaksthitān |
gandharvāṃścāraṇān siddhān yakṣān vidyādharā'surān || 46 ||
[Analyze grammar]

kiṃpuruṣāṃścā'psarasaḥ kinnarānuragāṃstathā |
mātṛḥ piśācān rakṣāṃsi bhūtān pretān vināyakān || 47 ||
[Analyze grammar]

vetālonmādakūṣmāṇḍān vṛddhabālagrahāṃstathā |
paśūnmṛgānkhagānvṛkṣānparvatāṃśca sarīsṛpān || 48 ||
[Analyze grammar]

sthāvarān jaṃgamān sarvān bhūvārigaganaukasaḥ |
śuddhasattvānmiśrasattvānrājasāṃstāmasāṃstathā || 49 ||
[Analyze grammar]

sarvān śubhā'śubhāñjīvān puṇyā'puṇyapariplutān |
santaḥ punanti saṃkalpānmokṣaṃ nayanti darśanāt || 50 ||
[Analyze grammar]

divyān kurvanti saṃsargāt smṛddhānkurvanti sevanāt |
īśān kurvanti vacanāt śāntānkurvanti saṃgamāt || 51 ||
[Analyze grammar]

teṣāṃ śraiṣṭhyaṃ kramād bodhyaṃ kramastu jñānamātrayā |
bhaktyā cāpi kramo bodhyo vadāmi śṛṇu padmaje || 52 ||
[Analyze grammar]

asmādibhyo'tra jīvebhyaḥ śreṣṭhāḥ santi tṛṇādayaḥ |
annauṣadhyādayastebhyastataḥ śreṣṭhāśca vīrudhaḥ || 53 ||
[Analyze grammar]

tata āmrādayo vṛkṣāḥ śreṣṭhā devadrumāstataḥ |
sthāsnubhyastu carāḥ śreṣṭhāḥ sūkṣmā ye jantavaḥ khalu || 54 ||
[Analyze grammar]

tebhyaḥ pipīlikāḥ śreṣṭhāstebhyastu śalabhādayaḥ |
bhramarādyāstatastebhyaścaṭakāpramukhā matāḥ || 55 ||
[Analyze grammar]

śaśādayastato'jādyāstebhyaḥ śreṣṭhā gavādayaḥ |
tato manujāsteṣu varṇāścatvāro saduttamāḥ || 56 ||
[Analyze grammar]

brāhmaṇāsteṣu teṣāṃ ca dharmaniṣṭhā varā matāḥ |
jñānino'tha varāstebhyo jñānibhyo devakoṭayaḥ || 57 ||
[Analyze grammar]

devebhyaḥ pitaraḥ śreṣṭhāstebhya ṛṣaya uttamāḥ |
ṛṣibhyo'pi paraṃśreṣṭho ya ekāntikabhaktimān || 58 ||
[Analyze grammar]

aikāntikeṣu bhakteṣu śreṣṭhaḥ sādhuguṇālayaḥ |
sarvasvātmanivedī yo bhagavattvāya kalpitaḥ || 59 ||
[Analyze grammar]

śrīhareraṃkajaḥ putraḥ sādhuḥ sadguṇabhājanam |
śrīhareraṃśajaḥ śiṣyaḥ satpuruṣo hi dāyabhāg || 60 ||
[Analyze grammar]

dāyo muktistasya bhāg yaḥ sa sādhurharireva saḥ |
harervaṃśo harergotraṃ harermūrtiḥ sa sammataḥ || 61 ||
[Analyze grammar]

nā'lpo nyūno hareḥ sākṣāddharistasmānna ricyate |
tasmācchreṣṭho na ko'pya'sti sadā''ste tatra yaddhariḥ || 62 ||
[Analyze grammar]

tāratamyaṃ viditvaivaṃ bahumānyā hariśritāḥ |
hareḥ samāśritāḥ sākṣāddharestu hṛdayātmakāḥ || 63 ||
[Analyze grammar]

harau santastu te saumyāstiṣṭhantyabhedavṛttitaḥ |
yatayaḥ sādhavo divyā sākṣācchrīharimūrtayaḥ || 64 ||
[Analyze grammar]

janalokasamā bhūtvā toṣayanti janān sadā |
āsane śayane khādye bhojane pātralepane || 65 ||
[Analyze grammar]

ramaṇe gamane hāsye khelane sahavāsane |
śleṣaṇe darśane śreṣṭhe utsave yānavāhane || 66 ||
[Analyze grammar]

manoraṃjanake kārye toṣayanti janāṃstu ye |
tān prasādya sadā lakṣmi saukhyaṃ bhavati śāśvatam || 67 ||
[Analyze grammar]

paropakāraśīlāste parakāryaśarīrakāḥ |
parārthasādhakā mokṣadāyino jīvatārakāḥ || 68 ||
[Analyze grammar]

sādhavāste harerbhaktā jīvamātrahitāvahāḥ |
sarvasahāḥ sadā pūjyā mānyāḥ sveṣṭādhikatvataḥ || 69 ||
[Analyze grammar]

sādhūnāṃ saṃśrayātpāpā bhavanti puṇyaśālinaḥ |
satāṃ saṃsevanānnāryo narā yānti parāṃ gatim || 70 ||
[Analyze grammar]

dehadhanamanastyāgātsādhūnāmagrataḥ sadā |
svasarvasvā'rpaṇādvāpi muktirbhavatyasaṃśayā || 71 ||
[Analyze grammar]

ye vai sādhuvaśe jātāḥ sādhavastadvaśaṃgatāḥ |
bhūtvā prāpyaṃ paraṃ mokṣaṃ nayanti svapratāpataḥ || 72 ||
[Analyze grammar]

yannetre mama darśane praṇihite yanmānasaṃ manmatam |
yatkarṇau mama divyakāryacaritānāṃ saṃśrave susthitau |
yannāsā mama mūrtiyogasubhavāmodagrahe sammatā |
yajihvā mama kīrtane ca rasanā me rāsane vartate || 73 ||
[Analyze grammar]

oṣṭhau vai mama mūrticūmbanavidhau saukhyaṃ dadhāte paraṃ |
yeṣāṃ tvak spṛśati prakṛṣṭamamalaṃ bimbaṃ madīyaṃ sadā |
yeṣāṃ śleṣaṇameva me tanukṛtaṃ nānyatparaṃ sammataṃ |
teṣāṃ tveva satāṃ sadā'hamavanaṃ kurve madīyā yataḥ || 74 ||
[Analyze grammar]

sevāṃ teṣāṃ sadā kurve bhaktiṃ cāpi sadā tvaham |
tena samṛddhaḥ sadā cāsmi tvayā saha pativrate || 75 ||
[Analyze grammar]

ahaṃ yathā tathā tvaṃ vai sevāṃ teṣāṃ sadā kuru |
tena vai sevitaḥ syāṃ yat pātivratyādapi trayāt || 76 ||
[Analyze grammar]

mānasād daihikād vāco yathā vai sevito'smyaham |
tathā te sādhavaḥ sevyāḥ sadā śaṃ te bhaviṣyati || 77 ||
[Analyze grammar]

teṣāmāśīrvacobhyaste me viśleṣo na vai bhavet |
kadācittvapi kamale tasmātsevyāśca te tvayā || 78 ||
[Analyze grammar]

sadā pūjyān sadā mānyān sadā matparicāyakān |
madarthe kṛtasaṃtyāgān praṇamāmi hi tānmuhuḥ || 79 ||
[Analyze grammar]

satāṃ kāmo na ratyarthaṃ lobhaḥ svārthāya naiva ca |
krodho nodvegaphalako moho'pi bandhanāya na || 80 ||
[Analyze grammar]

mado garvāya naiva syādāśā tṛṣṇākarī nahi |
spardhā sadguṇalābhāya dayā duḥkhaharāya ca || 81 ||
[Analyze grammar]

ityevaṃ tu pareṣāṃ vai hyupakārāya sarvathā |
satāṃ santi svabhāvāste sukhamokṣakarāḥ sadā || 82 ||
[Analyze grammar]

tasmāt santo'nvahaṃ divyāḥ paropakaraṇāstathā |
paropakāre bhagavān vasāmīti vadāmyaham || 83 ||
[Analyze grammar]

iti śrīlakṣmīnārāyaṇāyasaṃhitāyāṃ prathame kṛtayugasantāne sanakādisatpuruṣamāhātmyakathananāmaikonaviṃśo'dhyāyaḥ || 19 ||
[Analyze grammar]