Chapter 18

śrīnārāyaṇa uvāca |
brahmaṇā yogamāsthāya samādhimadhigamya ca |
ātmānaṃ śrīharau sākṣāt pare dhāmni tadā prabhau || 1 ||
[Analyze grammar]

tādātmyena prayatnena samaikīkṛtya cārthitam |
śāntipradā yathā sṛṣṭirbhavecchāntāśca pūruṣāḥ || 2 ||
[Analyze grammar]

mokṣadāśca tathā'nyeṣāṃ brahmabhānapariplutāḥ |
sarveṣāṃ bodhakartāro nirlepā sāttvikottarāḥ || 3 ||
[Analyze grammar]

brahmarūpāḥ sadā brahmabhāvanāparisaṃbhṛtāḥ |
brahmānandaparisnātā brahmamūrtivicintakāḥ || 4 ||
[Analyze grammar]

guravo lokasṛṣṭīnāṃ dharmasampatsamāśrayāḥ |
daiveśvarasamakakṣā ābrahmā'hata sarpaṇāḥ || 5 ||
[Analyze grammar]

putrā bhaveyurme nātha yairlokā sukhinaḥ sadā |
ityabhyarthanamājñāya pareṇa brahmaṇā tadā || 6 ||
[Analyze grammar]

muktāścatvāra ājñaptāḥ putrārthaṃ parameṣṭhinaḥ |
saṃkalpajñāścaturmuktā akṣarabrahmadhāmataḥ || 7 ||
[Analyze grammar]

lokānatītya caiśāṃśca satyalokamupāgatāḥ |
brahmā'pi vyutthito yogād dṛṣṭvā muktāṃścatuḥsamān || 8 ||
[Analyze grammar]

ime me mānasāḥ putrā bhavantu mokṣahetavaḥ |
iti saṃkalpya muktāṃstān surūpān pañcahāyanān || 9 ||
[Analyze grammar]

jātamātrān brahmarūpān brahmānandamayān parān |
tejomaṇḍalakṛcchubhravastrān sthalābjasatprabhān || 10 ||
[Analyze grammar]

divyān sadaikamārnauṃścā''brahmāṇḍasthitijīvanān |
labdhvā putrāṃstu caturo bahutoṣamavāpa ha || 11 ||
[Analyze grammar]

nāmnā te mānasāḥ putrā lokakalyāṇahetavaḥ |
sanakaśca sanandaśca sanataśca sanātanaḥ || 12 ||
[Analyze grammar]

sādhavaste sādhudharmāḥ puṇyāḥ puṇyamayāḥ sadā |
darśanād doṣahartāro duḥkhaśokalayaṃkarāḥ || 13 ||
[Analyze grammar]

dayālavaḥ kṣamāśīlāḥ sarvasṛṣṭihitecchavaḥ |
titikṣavaśvā'nasūyāḥ śāntā anuditā'rayaḥ || 14 ||
[Analyze grammar]

anīrṣyavaśca nirvairā nimānāśca vimatsarāḥ |
mānyāśca mānadāḥ sarvapriyasatyagiraḥ sadā || 15 ||
[Analyze grammar]

nirmadāḥ krodhalobhādidoṣahīnā nirañjanāḥ |
ahantāgamatāśūnyā jitakāmapravartanāḥ || 16 ||
[Analyze grammar]

nirdaṃbhāḥ śucayo dāntāḥ ṛjavo mitabhāṣiṇaḥ |
nirdvandvāścā'pramattāśca dhīrāścaiva jitendriyāḥ || 17 ||
[Analyze grammar]

bodhapūrṇā ātmaniṣṭhā aparigrahaśālinaḥ |
sarvopakāriṇaḥ śraddhā''stikyabhaktiguṇāśrayāḥ || 18 ||
[Analyze grammar]

udārāśca taponiṣṭhā nirapekṣaparigrahāḥ |
paiśunyastainyarahitāḥ paraguptā'prakāśakāḥ || 19 ||
[Analyze grammar]

jitaśārīrabhāvāśca santuṣṭāḥ sthirabuddhayaḥ |
sukhaduḥkhasamāstṛṣṇārahitāstoṣaṇānvitāḥ || 20 ||
[Analyze grammar]

paranindādirahitā ātmavṛttisamāśritāḥ |
daivīsampatsamāyuktā dharmavaṃśanivāsinaḥ || 21 ||
[Analyze grammar]

harijñānamahāpūranidhayo brahmasadṛśāḥ |
harerbhaktiṃ vinā yeṣāṃ kṣaṇo yāti na niṣphalaḥ || 22 ||
[Analyze grammar]

śravaṇamanana nididhyāsanādisamāśrayāḥ |
evaṃlakṣaṇasampannāḥ santaste sanakādayaḥ || 23 ||
[Analyze grammar]

karmaṇā manasā vācā viśuddhenā'ntarātmanā |
ananyamanaso bhaktiṃ nityaṃ kurvanti vai hareḥ || 24 ||
[Analyze grammar]

prapadya parayā bhaktyā jñānayuktena tejasā |
virājanmūrtayo divyāḥ saumyabhāvasudarśanāḥ || 25 ||
[Analyze grammar]

ṛddhisiddhinidhiyogān tṛṇavad gaṇayanti te |
ātmānandamahāmagnā brahmarūpāśca mokṣadāḥ || 26 ||
[Analyze grammar]

saṃsāradāvadagdhānāṃ darśanāmṛtavarṣaṇāḥ |
bhāvijīvasamūhānāṃ guravo muktidāyakāḥ || 27 ||
[Analyze grammar]

pūrvajāḥ sādhuvaṃśānāṃ tārakā brahmaghātinām |
sṛtayo vipathagānāṃ dṛṣṭāntā brahmacāriṇām || 28 ||
[Analyze grammar]

āśrayāḥ sarvavidyānāṃ bījāni śreyasāṃ tathā |
nidhayaḥ sarvaśāstrāṇāṃ rūpāṇi sāttvanātmanām || 29 ||
[Analyze grammar]

āśrayāḥ sarvasiddhīnāṃ praśrayāḥ śaraṇārthinām |
mokṣadāstu mumukṣūṇāṃ phaladāḥ sarvakarmiṇām || 30 ||
[Analyze grammar]

sadāśiṣāṃ prerakāśca maṇḍanaṃ brahmavarcasām |
tapaḥ sākṣāt tapovatāṃ saṃyamā yamināṃ tathā || 31 ||
[Analyze grammar]

sadā divyāḥ pañcavarṣā mūrtayaḥ komalāntarāḥ |
yauvanodbhedarahitā jarāmaraṇavarjitāḥ || 32 ||
[Analyze grammar]

catvāro dehato bālā vṛddhāstu jñānato matāḥ |
pitaraṃ svamajaṃ natvā procuḥ ki karavāma śam || 33 ||
[Analyze grammar]

tadā tu brahmaṇā te vai saṃskṛtā brahmavāribhiḥ |
upanītāḥ kṛtāścātha naiṣṭhikā brahmacāriṇaḥ || 34 ||
[Analyze grammar]

sthāpitā brahmaloke te satye vyomni sumaṇḍale |
puṇye saṃkalpaje ramye vimāne kāmage pare || 35 ||
[Analyze grammar]

mahārudrapurī yatra stare vyomni suvartate |
tatra stare same teṣāṃ kṛte dhāma sukalpitam || 36 ||
[Analyze grammar]

divya sarvarddhisampannaṃ sveṣṭasaṃlabdhyupakṛtim |
saṃkalpotthaphalapuṣpamañjarīśālivṛkṣakam || 37 ||
[Analyze grammar]

puṇyatattvasamutpannasamīhāmātralabdhikam |
bhogyabhogopakaraṇakhānapānādivastukam || 38 ||
[Analyze grammar]

puṇyaṃ prakāśaṃ bhavanaṃ vanādhiṣṭhitasaurabham |
udyānopavana kṣetroṣadhirasāyanānvitam || 39 ||
[Analyze grammar]

sauvarṇastu rasastatra pāvanastṛptikārakaḥ |
rājataṃ tu jalaṃ kalpanadījanyaṃ sukhāvaham || 40 ||
[Analyze grammar]

brahmakuṇḍāḥ śītakuṇḍā vahnikuṇḍāḥ svabhāvajāḥ |
sarvadā vyayanāśādirahitā vāḍavārthadā || 41 ||
[Analyze grammar]

brahmavṛkṣamahāparṇakuṭirāṇi mahānti ca |
yogivāsasamarhāṇi tāpasārthakṛtāni ca || 42 ||
[Analyze grammar]

tatra saṃkalpajā'nantāḥ sanakādisamāḥ śubhāḥ |
jñānabhaktidhanāḍhyā vai vartante bālavigrahāḥ || 43 ||
[Analyze grammar]

tādṛśaṃ tadvimānantu dhāmodyānamayaṃ kṛtam |
vaihāyasaṃ yathākāmagatikaṃ satyasaṃgraham || 44 ||
[Analyze grammar]

śātakaumbhaṃ śatabhaumaṃ viśālaṃ lakṣayojanam |
sabhāśālāvihārāgnihomādibhinnabhūmikam || 45 ||
[Analyze grammar]

etādṛśaṃ nivāsārhaṃ dhāma nirmāya brahmaṇā |
kumārebhyaścaturbhyastadarpitaṃ vāsalipsayā || 46 ||
[Analyze grammar]

atha jñānaṃ pradātuṃ vai brahmaṇā tu vicāritam |
dhyāto hariḥ paraṃbrahma tattvajñānāya sa prabhuḥ || 47 ||
[Analyze grammar]

tāvacchrīhariṇā tatra preritā vedapūruṣāḥ |
brahmadhāmnaḥ samāgatya brahmāgre samupasthitāḥ || 48 ||
[Analyze grammar]

mūrtimantaḥ svayaṃ divyā jñānavijñānasaṃbhṛtāḥ |
pitāmahe layaṃ prāptā vidyārūpāḥ prakāśakāḥ || 49 ||
[Analyze grammar]

yatra jñānāni sarvāṇi sarvasṛṣṭikṛtāni vai |
sarvamokṣapradānyatra paratra sukhadāni ca || 50 ||
[Analyze grammar]

dharmārthakāmamokṣākhyāścatvāraḥ puruṣārthakāḥ |
santi yatra sadā varṇyāstānvedān vividhānajaḥ || 51 ||
[Analyze grammar]

tebhyo dātuṃ manaścakre vidhivatsamapāṭhayat |
catvāro brahma putrāste vedānadhītya kṛtsnaśaḥ || 52 ||
[Analyze grammar]

nityaṃ rakṣanti vijñānaṃ vaidikaṃ pāṭhayanti ca |
tattatpaṭhanayogyāṃśca koṭiśo naiṣṭhikānpunaḥ || 53 ||
[Analyze grammar]

śiṣyāṃśca mānasān cakre pañcavarṣāna sanātanān |
sanakādisamaprajñarūpatejobalādikān || 54 ||
[Analyze grammar]

sanakādisamavāsabhogyaiśvaryarddhivigrahān |
brahmacaryavrataparān divyān puṇyamayān parān || 55 ||
[Analyze grammar]

sanātanān suputrāṃśca vedavijñānavāridhīn |
tānsarvāṃstatra satye vai dhāmni sanakasaṃśrite || 56 ||
[Analyze grammar]

sataḥ sādhuguṇān sarvān vāsayāmāsa sāttvikān |
mānasānaparāmeyāṃstān sanātanavigrahān || 57 ||
[Analyze grammar]

samāvasthaguṇarūpānāśīrbhiḥ samayojayat |
ādisargādāpralayādetasyā'ṇḍasya te'ntare || 58 ||
[Analyze grammar]

vedavijñānanidhayastiṣṭhanti vedarakṣakāḥ |
iti kāryaṃ paraṃ kṛtvā brahmā toṣamagātpunaḥ || 59 ||
[Analyze grammar]

kṣaṇaṃ brahmaparaṃ dhyātvā''tmānamāśritya saṃsthitaḥ |
sṛṣṭiṃ vilokya sukhadāṃ janmasāphalyamāsthitaḥ || 60 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne sanakādimānasasṛṣṭitadguṇanivāsādivedaprākaṭyādinirūpaṇanāmā'ṣṭādaśo'dhyāyaḥ || 18 ||
[Analyze grammar]