Chapter 16

śrīnārāyaṇa uvāca |
śṛṇu lakṣmi pravakṣyāmi tato vai brahmaṇā svayam |
kṛtaṃ lokanivāsārtha yadyat tuṣṭyarthameva ca || 1 ||
[Analyze grammar]

tatastu sāttvikīṃ sṛṣṭiṃ brahmā kartuṃ mano dadhe |
sakalpaṃ kṛtavān sarvaṃ sāttvikāḥ saṃbhavantviti || 2 ||
[Analyze grammar]

tāvadrudrātsamutpannā rudrā vai sāttvikāḥ śivāḥ |
śuddhāḥ śuddhatamāḥ sarve vidvāṃso ghanamūrtayaḥ || 3 ||
[Analyze grammar]

sarve sūkṣmaśarīrāste sthiralokasthitāḥ sadā |
prakāśāḥ śuddhabuddhisthāḥ siddhāśca yogadharmiṇaḥ || 4 ||
[Analyze grammar]

sarve te brahmaṇā sārdhaṃ samaiśvaryāvasāyinaḥ |
śāntāḥ sukhadatanavaḥ sarve te bhāvanāmayam || 5 ||
[Analyze grammar]

ānandaṃ brahmaṇaḥ prāpya cā'mṛtatvāya te gatāḥ |
sarve vai sukhadātmāno buddhaśuddhatayā matāḥ || 6 ||
[Analyze grammar]

ānandaṃ brahmaṇaḥ prāpyā'mṛtā''nandaṃ bhajantyuta |
dvandvaistairnābhibhūyante bhāvaduḥkhavivarjitāḥ || 7 ||
[Analyze grammar]

ādhipatyaṃ vinā tulyā brahmaṇaste mahaujasaḥ |
prabhāvavijayaiśvaryasthitivairāgyadarśanaiḥ || 8 ||
[Analyze grammar]

te brāhmalaukikāḥ sarve brāhmīṃ prāpya gatiṃ śubhām |
vītarāgā jitakrodhā nirmohāḥ satyavādinaḥ || 9 ||
[Analyze grammar]

svasmin praṇihitātmāno dayāvanto jitendriyāḥ |
niḥsaṃgā śucayaścaiva brahmasāyujyagāḥ smṛtāḥ || 10 ||
[Analyze grammar]

akāmayuktairye vīrāstapobhirdagdhakilbiṣāḥ |
teṣāmabhraṃśino lokā aprameyasukhāḥ smṛtāḥ || 11 ||
[Analyze grammar]

etadbrahmapadaṃ divyaṃ paramaṃ vyomni bhāsvaram |
yatra gatvā na śocanti hyamarā brahmaṇā saha || 12 ||
[Analyze grammar]

cyavante na yato bhūyo brahmāṇaṃ ta upāsate |
apunarmārakāmānāṃ brahmalokaḥ sa ucyate || 13 ||
[Analyze grammar]

purastād brahmalokasya tvaṇḍādarvāk ca vedhasaḥ |
madhye divyaṃ puraṃ ramyaṃ sthānaṃ rudramanomayam || 14 ||
[Analyze grammar]

tadvigrahavataḥ sthānamīśvarasyā'mitaujasaḥ |
śivaṃ nāma puraṃ tatra śaraṇaṃ brahmavāsinām || 15 ||
[Analyze grammar]

sahasrāṇāṃ śataṃ pūrṇaṃ yojanānāṃ suvistaram |
ābhyantare viśālaṃ tad vyāsamaṃḍalasaṃsthitam || 16 ||
[Analyze grammar]

bahumadhyāhnasūryādiparatejo'timardinā |
śātakauṃbhena mahatā prākāreṇā'rkavarcasā || 17 ||
[Analyze grammar]

maṇḍitaṃ cātha sauvarṇairmuktādāmavibhūṣitaiḥ |
caturdvāraiḥ śubhairgamyaṃ divyaṃ sukṛtarūpakam || 18 ||
[Analyze grammar]

taccākāśe mahadvyomni satye loke sthitaṃ puram |
na tatra kramate mṛtyurna tāpo na jarā śramaḥ || 19 ||
[Analyze grammar]

na taccānyaiḥ puraiḥ kvāpi rūpamāptuṃ hi śakyate |
tādṛśaṃ tattu nagaraṃ govṛṣāṃkasya taijasam || 20 ||
[Analyze grammar]

bhāvena mānasī bhūmirvinyastā kanakātmikā |
ratnavālukayā pūrṇā tejasā vyāpya vartate || 21 ||
[Analyze grammar]

śāradenduprakāśāni vālasūryanibhāni ca |
ardhaśvetā'rdharaktāni sauvarṇāni tathaiva ca || 22 ||
[Analyze grammar]

rathacakrapramāṇāni nālairmarakataprabhaiḥ |
sukumāreṇa rūpeṇa gandhinā'pratimena ca || 23 ||
[Analyze grammar]

tatra divyāni padmāni vaneṣūpavaneṣu ca |
bhṛṃgapatranikāśāni tapanīyāni yāni ca || 24 ||
[Analyze grammar]

ardhakṛṣṇā'rdharaktāni sukumārāntarāṇi hi |
ātapatrapramāṇāni paṃkajāni bhavanti vai || 25 ||
[Analyze grammar]

puṇyā'mṛtapravāhāśca nadyo divyā vahanti ca |
padmotpaladalonmiśraṃ phenādyavarttavigraham || 26 ||
[Analyze grammar]

jalaṃ maṇidalaprakhyamāvahanti saridvarāḥ |
tadvai ye dhyānamavyagrā suyuktā vijitendriyāḥ || 27 ||
[Analyze grammar]

paśyantīha mahātmānaḥ puraṃ tadgovṛṣātmanaḥ |
madhye puravarendrasya divyo bhadraśriyā vṛtaḥ || 28 ||
[Analyze grammar]

sahasrapādaḥ prāsādastapanīyamayo mahān |
anupamaiśca ratnaiśca sarvataḥ sa vibhūṣitaḥ |
sphaṭikaiścandrasaṃkāśairvaidūryaiḥ somasaṃprabhaiḥ || 29 ||
[Analyze grammar]

bālasūryaprabhaiścaiva sauvarṇaiścāgnisannibhaiḥ |
rājataiścāpi śuśubhe hīndranīlamayaiḥ śubhaiḥ || 30 ||
[Analyze grammar]

dṛḍhairvajramayaiścaiva nirmitaḥ sumahattaraiḥ |
jalaiśca vividhākārairdīpyadbhiradhivāsitam || 31 ||
[Analyze grammar]

puraṃ candraprakāśābhiḥ patākābhiralaṃkṛtam |
rukmaghaṃṭādinādaiśca nityamutsavasaṃśritam || 32 ||
[Analyze grammar]

rudradāsāstu gāndharvāḥ kinnarāḥ sutamāgadhāḥ |
stuvantīśaṃ mahārudraṃ parivārasametakam || 33 ||
[Analyze grammar]

rudraprāsādarājo'sau śatabhūmivirājate |
vāsantīpratimā yatra tryambakasya niveśane || 34 ||
[Analyze grammar]

rudrāṇī śāmbhavī śaktirdevī rūpaguṇānvitā |
sugandhitaśarīrā sā rudraṃ devaṃ hi sevate || 35 ||
[Analyze grammar]

śrīśca lakṣmīśca māyā ca kīrtiḥ śobhā sarasvatī |
devyā vai sahitā etā rūpagandhasamanvitāḥ || 36 ||
[Analyze grammar]

nityāścā'parisaṃkhyātāḥ parasparaguṇādhikāḥ |
bhūṣā vai sarvaratnānāṃ devyaḥ kāntivilāsayoḥ || 37 ||
[Analyze grammar]

koṭīśataṃ mahābhāgyā vibhajyā''tmānamātmanā |
bhagavantaṃ mahārudraṃ pratimodantyatandritāḥ || 38 ||
[Analyze grammar]

tāsāṃ sahasraṃ cānyāstatpṛṣṭhataḥ paricārikāḥ |
rūpiṇyaśca śriyāyuktāḥ sarvāḥ kamalalocanāḥ || 39 ||
[Analyze grammar]

līlāvilāsasaṃyuktabhāvairatimanoharaiḥ |
rudraistāḥ saha modante yuvabhiḥ pāvakottamaiḥ || 40 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne sāttvikarudrarudrāṇībhavanādinirūpaṇanāmā ṣoḍaśo'dhyāyaḥ || 16 ||
[Analyze grammar]