Chapter 9

śrīnārāyaṇa uvāca |
viṣṇuḥ sarvaguṇopetaḥ sarvapoṣaṇaśaktimān |
sarvāścaryanidhiḥ śrīmān kundanābhimahojjvalaḥ || 1 ||
[Analyze grammar]

prāntabhugnapiśaṃgābhasnigdhakeśāktamastakaḥ |
naikaratnamaṇiprotasauvarṇamukuṭāvahaḥ || 2 ||
[Analyze grammar]

śaṣkulyākṛtisatkarṇadhṛtasauvarṇakuṇḍalaḥ |
viśālojjvalarekhātrayayugbhālasthacandrakaḥ || 3 ||
[Analyze grammar]

kaisaraṃ tilakaṃ bibhrat lalāṭe'gurucandanaḥ |
kāmabāṇaprarohā'rhavakrabhrūkuṭibhaṃguraḥ || 4 ||
[Analyze grammar]

aravindadalā''śubhraprāntaraktā''bhanetrakaḥ |
kajjalā'ñjanasaṃsiktā''karṇāntā'kṣiprakoṇakaḥ || 5 ||
[Analyze grammar]

tilapuṣpapraphullābhanāsiko dīrghagaṇḍakaḥ |
suvartulasamākāraraktadvayakapolakaḥ || 6 ||
[Analyze grammar]

sugandhapadmakeyūro divyapuṣpāvataṃsakaḥ |
śuddhacāmīkarakarṇapūrakarṇaṭibhūṣaṇaḥ || 7 ||
[Analyze grammar]

sūkṣmanīlahiraṇyāgrodbhavacchmaśruprasundaraḥ |
raktabimbā''bhasaddhāsyasamāśritasamauṣṭhakaḥ || 8 ||
[Analyze grammar]

kambukaṇṭhaḥ sucibukastejomaṇḍalakaṃdharaḥ |
dedīpyamānavapuṣā hṛttimirapraṇāśakaḥ || 9 ||
[Analyze grammar]

pauṣpān hārāṃśca sauvarṇān gale bibhratsukaustubham |
supuṣṭāṃsaḥ supralambabhogapūvārdhabāhukaḥ || 10 ||
[Analyze grammar]

ājānulambahastaśca suprakoṣṭhaścaturbhujaḥ |
vidyotaccandrasadṛśanakharaktakaradvayaḥ || 11 ||
[Analyze grammar]

svarṇāṃgulīyasattejoratnanaddhasupadmakaḥ |
dhanuścakradhvajasvastikenamīnāṃkahastakaḥ || 12 ||
[Analyze grammar]

śaṃkhacakragadāpadmahetirhāradharaḥ prabhuḥ |
śrīvatsāṃkaḥ suraśanaḥ kundadantaḥ supṛṣṭhakaḥ || 13 ||
[Analyze grammar]

viśālonnatasadvakṣāḥ puṣṭakaṭisuliṅgakaḥ |
karihastoruyugalaḥ samavartulajānukaḥ || 14 ||
[Analyze grammar]

kramavṛttā''puṣṭajaghaḥ samanimnasupattalaḥ |
madhyanimnonnataraktacārudṛśyapadāmbujaḥ || 15 ||
[Analyze grammar]

sarvatīrthāśrayapuṇyaprapadaḥ pāṇḍuracchaviḥ |
aṅgulyuparisatsūkṣmaromarājivirājitaḥ || 16 ||
[Analyze grammar]

sūkṣmaromāvalirājattattadvīryasukukṣikaḥ |
trigulphacaraṇaḥ śrīmān sarvābharaṇabhūṣaṇaḥ || 17 ||
[Analyze grammar]

amlānamadhusatsaurabhā''rdravividhapuṣpayā |
virājito vaijayantyā divyayā vanamālayā || 18 ||
[Analyze grammar]

padmaketvaṃkuśavajrasvastikajavajambavaḥ |
aṣṭakoṇordhvarekhe'ṅkāni pade dakṣiṇe nava || 19 ||
[Analyze grammar]

mīnā'rdhacandrakalaśatrikoṇavyomagoṣpadam |
dhanuśceti pade vāme sapta cihnāni saṃdadhat || 20 ||
[Analyze grammar]

āprāntadvayasaṃlagnavistīrṇabhālarekhayā |
ṣaḍvidhaṃ bhagamaiśvaryaṃ vyañjayan sāttvikīṃ janim || 21 ||
[Analyze grammar]

vāme sakthini sattejaḥpāṇḍurāṃ'kaṃ tu sundaram |
sahajāyāstu lakṣmyāstaccandrābhaṃ cihnamudvahan || 22 ||
[Analyze grammar]

etādṛśo'bhavadviṣṇurbahurūpaguṇāśrayaḥ |
dṛṣṭvā brahmā svayaṃbhūstaṃ sṛṣṭinetrabhimānavān || 23 ||
[Analyze grammar]

ko'yamanyo'bhavadrūpaguṇavīryabalādhikaḥ |
itikṛtvā'pṛcchadenaṃ viṣṇuṃ lokaprapoṣakam || 24 ||
[Analyze grammar]

kastvametādṛśo vidvan matpratidvandvarūpakaḥ |
sṛṣṭeḥ kartā'hameko'smi sarvaiśvaryavibhūtimān || 25 ||
[Analyze grammar]

sarvadhātā sarvapoṣṭā sarvanetṛtvamāvahan |
matto nā'nyo'sti kaścidvai sṛṣṭeḥ saṃhārapoṣakaḥ || 26 ||
[Analyze grammar]

ko vai hetustavotpattau kiṃkartā kiṃvidhāyakaḥ |
madvirodhaṃ prakurvan vai na kaścitsukhabhāgbhavet || 27 ||
[Analyze grammar]

bhūtvā prahasya viṣṇustaṃ brahmāṇaṃ pratyuvāca ha |
sṛṣṭirmayi tvaha sṛṣṭau cāhaṃ sṛṣṭimayo vibhuḥ || 28 ||
[Analyze grammar]

tvādṛśāḥ padmajā naike mayi līnāḥ samāsate |
ahamanādinidhano dhātā'haṃ viśvatomukhaḥ || 29 ||
[Analyze grammar]

vyāpyavyāpakabhāvena viśvamāvṛtya yaḥ sthitaḥ |
sarvasṛṣṭimayo devo'nantabrahmādisaṃstutaḥ || 30 ||
[Analyze grammar]

so'haṃ nārāyaṇo viṣṇurnā'nyaḥ kaścitparaḥ samaḥ |
gaccha dūramito no cedvināśaṃ yāsyasi dhruvam || 31 ||
[Analyze grammar]

iti viṣṇuvacaḥ śrutvā brahmā lokapitāmahaḥ |
prāha viṣṇuṃ ca mā garva kuru darśanabāliśaḥ || 32 ||
[Analyze grammar]

mā'vamaṃsthāśca māṃ deva eṣa tvāṃ nāśayāmyaham |
ityuccārya tu saṃrabdhau parasparajighāṃsayā || 33 ||
[Analyze grammar]

ahameva varo natvamahamekaḥ paraḥ prabhuḥ |
itibruvau hantukāmau cakraturyuddharaṃbhaṇam || 34 ||
[Analyze grammar]

yuyudhāte parau vīrau mānavyājau mahāyudhau |
ahaṃkāraniveśādvai yuddhaṃ tayorbabhūva ha || 25 ||
[Analyze grammar]

īśvarāstatsamakakṣāḥ samājagmurdidṛkṣavaḥ |
kṣipantaḥ puṣpavarṣāṇi paśyanto yuddhavartinau || 36 ||
[Analyze grammar]

tāvat kruddho haristatra bāṇānmumoca duḥsahān |
astrāṇi vividhān kṣepān brahmavakṣasi pāragān || 37 ||
[Analyze grammar]

atha brahmā paraṃ kruddhau viṣṇorvakṣasi duḥsahān |
bāṇān vidyutsatejaskānastrāṇi vividhāni ca || 38 ||
[Analyze grammar]

mumoceti tayoryuddhaṃ drāgāścaryakaraṃ hyabhūt |
prasamīkṣyeśvarāḥ sarve praśaśaṃsuḥ samākulāḥ || 39 ||
[Analyze grammar]

viṣṇurvegavaśo bhūtvā'gnyastraṃ mumoca vedhase |
parjanyāstreṇa vidhinā tadastraṃ sannivāritam || 40 ||
[Analyze grammar]

viṣṇunā preritaṃ tatra vidyudastraṃ sameghakam |
brahmaṇā nāśitaṃ tadvai vāyvastreṇa mahāmbare || 41 ||
[Analyze grammar]

viṣṇuryuyoja giryastraṃ ko vajrāstraṃ mumoca ha |
harirnāgāstramasṛjad brahmā cikṣepa gāruḍam || 42 ||
[Analyze grammar]

hariṇā prahitaṃ bhāraṃ laghimnā brāhmaṇā hṛtam |
viyogaśaktimudyamya viṣṇurjaghāna korasi || 43 ||
[Analyze grammar]

brahmā śūlena tāṃ chitvā jṛmbhaṇāstraṃ mumoca ha |
viṣṇurnidrāpramantreṇa jṛmbhaṇaṃ pravilayya ca || 44 ||
[Analyze grammar]

jagrāha yāvadbrahmāstraṃ brahmā cāpi ca tad dadhe |
dvayorbrahmāstrayoryuddhaṃ praghoraṃ cā'mbare'bhavan || 45 ||
[Analyze grammar]

mahānalāstato jātā īśasṛṣṭipradāhakāḥ |
viṣṇustvāvat svakaṃ cakraṃ saṃjagrāha sudarśanam || 46 ||
[Analyze grammar]

koṭisūryasamānograṃ tīkṣṇadhāraṃ vināśakam |
īśāstāvattu santrastā hāhākāraṃ pracakrire || 47 ||
[Analyze grammar]

brahmaṇastu vināśāya yāvatprerayati prabhuḥ |
tāvad brahmā viṣṇunāmabhaktyākhyaṃ kavacaṃ dadhau || 48 ||
[Analyze grammar]

viṣṇurnārāyaṇo devo mayyāvasatu duḥkhahāḥ |
paraṃbrahma śiraḥ pātu brahma pātu galaṃ mama || 49 ||
[Analyze grammar]

vāsudeva uraḥ pātu kaṭiṃ pātvaniruddhakaḥ |
pradyumna udaraṃ pātu saṃkarṣaṇastu pṛṣṭhakam || 50 ||
[Analyze grammar]

bhūmā śiśnaṃ tu me pātu mahāviṣṇustu sakthinī |
hiraṇyagarbho me jānū jaṃghe vairājapūruṣaḥ || 51 ||
[Analyze grammar]

gulphau pradhānapuruṣaḥ pādau prakṛtipūruṣaḥ |
kṛṣṇaḥ pūrvaṃ hariḥ paścād vaikuṇṭhaścottare'vatu || 52 ||
[Analyze grammar]

nārāyaṇastu paścānme'ntaryāmī sarvato'vatu |
viṣṇustvaṃ mayi sarvāṃge praviśyā'vatu māṃ vibho || 53 ||
[Analyze grammar]

sattvāśrayastu me sattvaṃ pātu nārāyaṇaḥ svayam |
raktāśrayastu me raktaṃ pātu śrībhagavān svayam || 54 ||
[Analyze grammar]

bhayāśrayaṃ tu māṃ pātu cakrī cā'bhayadānadaḥ |
nālasthitaṃ tu māṃ pātu nālodbhavakaraḥ prabhuḥ || 55 ||
[Analyze grammar]

ākasmikamahāduḥkhātpāhi māṃ śaraṇāgatam |
brahmāstre śāntaya cakraṃ saṃharā'dya dyāṃ kuru || 56 ||
[Analyze grammar]

stutvetthaṃ paramaṃ devaṃ brahmā tūṣṇīṃ babhūva ha |
brahmabhaktiṃ samajñāya viṣṇuścakraṃ mumoca na || 57 ||
[Analyze grammar]

paraṃ brahmāstrayostejaḥ saṃhārārthaṃ mano dadhe |
saṃkarṣaṇasvarūpo yaḥ paraṃbrahma janārdanaḥ || 58 ||
[Analyze grammar]

mahājyotirmayastambho dvayormadhye babhūva saḥ |
brahmāstre cāpi te tāvatsarvasaṃhārasakṣame || 99 ||
[Analyze grammar]

nililyāte kṣaṇenaiva mahājyotirmaye'nale |
astraśāntikaraṃ tejaḥ paraṃ dṛṣṭvā tadadbhutam || 60 ||
[Analyze grammar]

brahmā viṣṇustatheśā ye tatra santi samāgatāḥ |
lebhire vismayaṃ mugdhāḥ kimetajjyotirityaho || 61 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne brahmaviṣṇvorvivādabhaktikavacādinirūpaṇanāmā navamo'dhyāyaḥ || 9 ||
[Analyze grammar]