Chapter 1

paraṃbrahmāṃḍaparaṃbrahma śriyaṃ nārāyaṇaṃ harim |
sarvā'ntaryāmiṇaṃ vande devaṃ sarvā'vatāriṇam || 1 ||
[Analyze grammar]

śrīśca lakṣmīśca yatpatnyau viprāgnī yanmukhaṃ matam |
santo yaddhṛdayaṃ śaśvat tasmai cā'nvayine namaḥ || 2 ||
[Analyze grammar]

diviṣadbarhiṣat triṣat pitṛsadbhūtasacca yaḥ |
dhyānalabhyasvarūpāya tasmai śaṃvarṣiṃṇe namaḥ || 3 ||
[Analyze grammar]

himavacchikhare ramye svāśrame parvatottame |
nārāyaṇena vai lakṣmyai yā proktā nijasaṃhitā || 4 ||
[Analyze grammar]

badrikāśramatīrthe tāṃ tato labdhvā''dirūpadhṛk |
śvetavyāso divyadṛṣṭiścatuḥśiṣyānuvāca ha || 5 ||
[Analyze grammar]

śvaitiṃ ca suśikhaṃ cāpi śvetāśvaṃ śvetalohitam |
catvāraste mahātmāno brahmiṣṭhā brahmapāragāḥ || 6 ||
[Analyze grammar]

bhūtvā dhāma hareḥ prāpuḥ punarāvṛttivarjitam |
anādiśrīkṛṣṇanārāyaṇapatnyastu tāḥ kathāḥ || 7 ||
[Analyze grammar]

patiṃ nārāyaṇaṃ premṇā papracchurlomaśā''śrame |
saurāṣṭre kuṃkumavāpīkṣetre'śvapaṭṭasārase || 8 ||
[Analyze grammar]

nārāyaṇaśca tābhyo vai jagādemāṃ hi saṃhitām |
lakṣmīnārāyaṇasaṃhitākhyāṃ sarvārthasaṃbhṛtām || 9 ||
[Analyze grammar]

pañcaviṃśatisāhasrā'dhikalakṣaṃ hi vartate |
ślokānāṃ yatra saṃkhyānaṃ mokṣadaṃ pāṭhamātrataḥ || 10 ||
[Analyze grammar]

ekadā nāradaḥ prāyāt kartuṃ vaikuṇṭhidarśanam |
sabhā tena samāsīnā dṛṣṭā śrīviṣṇvadhiṣṭhitā || 11 ||
[Analyze grammar]

divyā muktāstvakṣarākhyā golokasthāstathā'pare |
vaikuṇṭhavāsino muktāḥ śvetadvīpanivāsinaḥ || 12 ||
[Analyze grammar]

avyākṛtā'mṛtavāsāḥ śrīlakṣmīdhāmavāsinaḥ |
badrīkṣīrā'bdhimāścāpi tadanyaddhāmavartinaḥ || 13 ||
[Analyze grammar]

ṛṣayaḥ pitaro devāḥ siddhā gāndharvacāraṇāḥ |
lokapālāśca manavastāpasāḥ sādhavaśca ye || 14 ||
[Analyze grammar]

munayo divyagatayo divyā'hatasuvigrahāḥ |
āsan sarve tatra yoge nārāyaṇaparāyaṇāḥ || 15 ||
[Analyze grammar]

lakṣayojanavistīrṇā''prāntasaṃkulitā sabhā |
nāradena tu saṃdṛṣṭā hyardhā puṃbhiḥ prakāśitā || 16 ||
[Analyze grammar]

vāmabhāge yatra lakṣmīstatra devyastu saṃsthitāḥ |
muktānyo vāsudevānyo gopyaḥ sakhyastathā parāḥ || 17 ||
[Analyze grammar]

īśvariṇyo bhagavatyaḥ pārṣadāṇyaśca sevikāḥ |
brahmāṇyo mātaro devyo mānavyaḥ siddhavigrahāḥ || 18 ||
[Analyze grammar]

nāradena sabhā dṛṣṭā hyardhā nārīprakāśitā |
kṛṣṇanārāyaṇaṃ devaṃ hariṃ viṣṇuṃ sanātanam || 19 ||
[Analyze grammar]

śriyaṃ lakṣmīṃ mahāmāyāṃ nāradaḥ prāṇaman mudā |
sarvāṃ sabhāṃ praṇamyā'tha viṣṇudatte suviṣṭare || 20 ||
[Analyze grammar]

nyaṣīdannāraṭastatra taiḥ sarveḥ satkṛtaḥ ṛṣiḥ |
vyāso'haṃ śvetasaṃjño vai sūtaḥ suśikhanāmakaḥ || 21 ||
[Analyze grammar]

vyākhyātārastathā cānye bṛhaspatipurogamāḥ |
divyarūpāstu te sarvai nārāyaṇasamīhayā || 22 ||
[Analyze grammar]

kathāstu vividhāstatra cakrurbhaktivivardhanāḥ |
tatra nārāyaṇenoktaṃ nārado'yaṃ mahāmuniḥ || 23 ||
[Analyze grammar]

bahuśruto bahujñātā samākhyānanidhirmahān |
lokavṛttāntakuśalaḥ praṣṭavyo vṛttavittaye || 24 ||
[Analyze grammar]

lakṣmīruvāca |
bho tapasvin mahāyogin viṣṇoraṃśa mahāmune |
kutastādāgamyate kiṃ vartate viṣṇusṛṣṭiṣu || 25 ||
[Analyze grammar]

kathaṃvratā janā bhūmau samayaścāpi kīdṛśaḥ |
tīrthānāṃ susatāṃ pṛthvyāṃ bhūsurāṇāṃ gavāṃ tathā || 26 ||
[Analyze grammar]

dīnānāṃ sukṛtasyāpi sādhvīnāṃ nyāsināṃ sthitiḥ |
kīdṛśī sāmprataṃ cāsti mokṣādhvā kaccidakṣataḥ || 27 ||
[Analyze grammar]

jñānaṃ vijñānasahakṛt kaccidvipreṣu rājate |
nārāyaṇasya sadbhaktirlokaṣu vartate nviti || 28 ||
[Analyze grammar]

śrīnārada uvāca |
pitarau sarvadā vande kṛpālū muktidāyakau |
svalpaṃ nā'viditaṃ cāpi pitroḥ sarvajñayoḥ kila || 29 ||
[Analyze grammar]

tathāpi śiṣyadharmatvāt kathayāmi yathākramam |
paryaṭan subahūn lokān dṛṣṭvā kṛtayugasthitim || 30 ||
[Analyze grammar]

vilokya viṣṇusṛṣṭau vai viṣṇubhaktiyutān janān |
hṛṣyāmi ca muhurmātaḥ pātivratyaparāḥ prajāḥ || 31 ||
[Analyze grammar]

dhanyo'yaṃ bhagavān vipṇurdhanyā mā parameśvarī |
yatpratāpād dhruvā muktirlabhyate mānavaiḥ kila || 32 ||
[Analyze grammar]

śravaṇātkīrtanādviṣṇoḥ smaraṇātpādasevanāt |
arcanādvandanāt sakhyāddāsyādvā''tmānivedanāt || 33 ||
[Analyze grammar]

jñānā'jñānakṛtādvāpi saṃsāramalavarjanāt |
sadyaḥ saṃprāpyate mokṣastasmādbhāgyaṃ nu kiṃ param || 34 ||
[Analyze grammar]

sakṛjjapanti ye jāpyaṃ gṛṇanti nāma vā hareḥ |
divyabhāvanayā mātarmuktiṃ yānti tu te dhruvām || 35 ||
[Analyze grammar]

sāmānyāmathavā mukhyāṃ viṣṇordīkṣāṃ hi ye janāḥ |
gṛhṇantyābālavṛddhādyāste syurvaikuṇṭhavāsinaḥ || 36 ||
[Analyze grammar]

ānukūlyaṃ sadā viṣṇoḥ prātikūlyavivarjanam |
viṣṇau pūrṇo hi viśvāsastavā'smītivareṣaṇā || 37 ||
[Analyze grammar]

dehendriyamanaḥ prāṇā'bhimatidhīṣaṇātmanām |
nyāso viṣṇau tathā dīnā'dhīnatā ca hareḥ sadā || 38 ||
[Analyze grammar]

sarvasvaṃ me hariḥ sākṣānnānyaśceti matiḥ sthirā |
ityevaṃ ṣaḍvidhā viṣṇau prapantiḥ śaraṇāgatiḥ || 39 ||
[Analyze grammar]

tadekaṃ vā samāsādya nārāyaṇaparāyaṇaḥ |
bhāvaikyaṃ vā kriyaikyaṃ vā hyātmaikyaṃ vā prasādhayet || 40 ||
[Analyze grammar]

tathā tu śrīhareraikyaṃ yathā yāvatprajāyate |
tāvattathā svayaṃ nārāyaṇānandaṃ samaśnute || 41 ||
[Analyze grammar]

prematattvaṃ dravarūpaṃ cātmāpi dravatāṃ bhajet |
dravadvayaṃ samāsādya svayaṃ viṣṇurdravo bhavet || 42 ||
[Analyze grammar]

ānandaghanacidghanavijñānaghanamiṣṭatāḥ |
nityatṛptanityaśaityanityasukhasupuṣṭatāḥ || 43 ||
[Analyze grammar]

nārāyaṇaikyamāpannaḥ sarvān kāmān samaśnute |
kvacitpārśve kvacinmūrtau kvacittasmin pralīyate || 44 ||
[Analyze grammar]

kvacinmuktaḥ kvacillakṣmīḥ kvaciddāsaḥ pravartate |
śarīravaccendriyavanmanovattasya jāyate || 45 ||
[Analyze grammar]

ahaṃ tu nārado mātarviṣṇormana itīritaḥ |
tvaṃ tu lakṣmīstasya cā'rdhaṃ śarīrātmeti kathyase || 46 ||
[Analyze grammar]

sanpadārthaṃ hariḥ sākṣāccidardhastvaṃ nu sammatā |
tayordrave mahānandaḥ saccidānanda ucyate || 47 ||
[Analyze grammar]

yena kenāpi bhāvena tvātmā vai dravatāṃ vrajet |
tadbhāvadravamāsādya muktiṃ viṣṇumayī vrajet || 48 ||
[Analyze grammar]

śrīśvetavyāsa uvāca |
ityuktvā dravarūpeṇa nārado līnatāṃ gataḥ |
viṣṇau premaparākāṣṭhāsukhānubhavavāridhau || 49 ||
[Analyze grammar]

paśyatāṃ tu sabhāsthānāṃ sarveṣāmidamadbhutam |
camatkṛtikaraṃ jātam aho bhaktasya bhaktatā || 50 ||
[Analyze grammar]

lakṣmīrjijñāsamānā vai nārāyaṇaparāyaṇā |
papraccha paramātmānaṃ lokopakārasattaye || 51 ||
[Analyze grammar]

śrīlakṣmīruvāca |
aho bhaktāstu bahavā dṛṣṭāste paramātmanaḥ |
na kaścidīdṛśo dṛṣṭo yo'yaṃ tvayi gato dravam || 52 ||
[Analyze grammar]

manye tu kāraṇaṃ tatra karuṇā śrīmatastava |
yasyopari bhaved deva niḥsīmānugrahastava || 53 ||
[Analyze grammar]

tasyaiva nātha no bhinno bhavasīti matirmama |
etādṛśātmalābhārthe yathā yad bhavato matam || 54 ||
[Analyze grammar]

yadvā'nugrahalabdhyarthaṃ kiṃ kartavyaṃ tvayeṣyate |
śrīśvetavyāsa uvāca |
nārāyaṇastu tacchrutvā sarveṣāṃ hitakāmyayā || 55 ||
[Analyze grammar]

uvāca paramaprītyā svalpamapyatulārthabhṛt |
yena sādhāraṇā jīvā api yāntīdṛśīṃ gatim || 56 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vaikuṇṭhe lakṣmīnārāyaṇīyasabhāyāṃ nāradīyadravībhāvabhakticamatkṛtinirūpaṇātmakaḥ |
prathamo'dhyāyaḥ || 1 ||
[Analyze grammar]