Chapter 39

ekonacatvāriṃśo'dhyāyaḥ - 39
śrīḥ---
śṛṇu bhogān sureśāna dattaistuṣyāmi yairaham|
yeṣu me vitatā śaktirbhogyabhogāya tiṣṭhate || 1 ||
1. tiṣṭhate; svāśayaṃ prakāśayantī tiṣṭhatītyarthaḥ| prakāśanārthe taṅ|
yathāśaktyanurūpeṇa tattadbhogopakalpane|
divyaśaktiprabhedaistairvicitraiḥ styānatāṃ gataiḥ || 2 ||
2. - - - - - - - - - - - -
saṃpūrṇamīsvarārhaṃ tadbhāvanīyamaśeṣataḥ|
mṛdvāstaraṇasaṃstīrṇamādāvāsanamuttamam || 3 ||
3. bhogaviśeṣā ucyante---mṛdvityādinā| bhagavadārādhane ṣaḍāsanāni; yathā---mantrāsanam, snānāsanam, alaṃkārāsanam, bhojyāsanam, punarmantrāsanam, paryahkāsanaṃ ceti| tatra prathamaṃ mantrāsanamatrocyate|
arghyaṃ pādyaṃ madhūparkastathaivācamanīyakam|
praṇāmapūrvakaṃ paścādātmātmīyanivedanam || 4 ||
4. tasminnāsane samarpaṇīyānāha---arghyamityādinā| ātmātmīyanivedanaprakāramāha pādme (4-3-140)---"dāso'haṃ te jagannātha saputrādiparigrahaḥ| preṣyaṃ praśādhi kartavye māṃ niyuṅ‌kṣva hite sadā||" iti|
anujñāpya tataḥ paścāt snānāsanamanuttamam|
pādapīṭhamathārghyaṃ ca tataḥ pādyapratigrahaḥ || 5 ||
5. dvitīyaṃ snānāsanamatra| atra mantraḥ sāttvate (6-26)---"sphuṭīkṛtaṃ mayā deva tvidaṃ snānapare tvayi| sapādapīṭhaṃ paramaṃ śubhaṃ snānāsanaṃ mahat| āsādayāśu snānārthaṃ madanugrahakāmyayā||" iti|
pādyāmbu pāduke snānaśāṭī mātrā ca śālikā|
darpaṇaṃ gandhatoyaṃ ca pāṇiprakṣālanārthakam || 6 ||
6. mātrā ca śāliketi| akṣatāgraśubhravarṇaśālitaṇḍulapūrṇapātramatra mātrāpadārthaḥ| tathā ca pādme (4-6-36)---"śālitaṇḍulamātrayā" iti| etacca mātrādānamārādhanamadhyāpatitavaikalyaparihārāya|
dantakāṣṭhaṃ ca vadanaprakṣālācamanāmbunī|
gandhatailaṃ ca cūrṇaṃ ca śāligodhūmasaṃbhavam || 7 ||
7. - - - - - - - - - - - -
haridrācūrṇasaṃmiśramīṣatpadmakabhāvitam|
udvartanārthaṃ tadanu snānārthaṃ khalisaṃyutam || 8 ||
8. khaliḥ mṛgamadādivāsanāvāsitaṃ ghanībhūtagandhatailakiṭṭakam|
uṣṇāmbu candanaṃ candramiśritaṃ lepanārthakam|
kṣīraṃ dadhi ghṛtaṃ gavyaṃ madhvaikṣavarasaṃ tathā || 9 ||
9. candraḥ ghanasāraḥ|
sugandhāmalakābhiśca lodhratoyaṃ tataḥ param|
raktacandanatoyaṃ ca rajanīvāri cottamam || 10 ||
10. - - - - - - - - - - - -
granthiparṇīpayaḥ paścāt tataśca tagarodakam|
priyaṅgujaṭilāsiddhārthakasarvauṣadhījalam || 11 ||
11. - - - - - - - - - - - -
puṣpapatraphalāmbhāṃsi bījagandhodake tathā|
hemaratnasarittīrthakevalāmbūni ca kramāt || 12 ||
12. - - - - - - - - - - - -
snānīyāṃmbusametāni deyānyambūnyamūni tu|
arghyapātrāttathaivārghyaṃ snānānāmantarāntarā || 13 ||
13. - - - - - - - - - - - -
dadyāt sapuṣpatoyena kṣālanaṃ cāntarāntarā|
snānaśiṣṭāmbusaṃpūrṇaṃ {1}haridrāśālisaṃbhṛtam || 14 ||
14. snapanānantaraṃ nīrājanamucyate---snānaśiṣṭeti|
{1. haridrāgranthi B. }
sragādisaṃyutaṃ kumbhaṃ haste kṛtvāparatra tu|
siddhārthairdhūpavat pātraṃ bhrāmayitvā tu mūrdhani || 15 ||
15. haste; vāmahaste| aparatra; dakṣiṇahaste|
bahiḥ kṣipettato dadyāt sudhaute cāṅgaśāṭike|
keśodakāpakarṣārthamambaraṃ dehavārihṛt || 16 ||
16. - - - - - - - - - - -
antarīyottarīye dve sudhaute vāsasī śubhe|
bhāvite gandhadhūpena dadyād bhadrāsanaṃ tataḥ || 17 ||
17. bhadrāsanam; snānāsanam|
śodhayet pūrṇakumbhaistu khaplutaṃ bhāvayeddharim|
alaṃkārāsanaṃ paścāddeyaṃ mṛdvāstarolbaṇam || 18 ||
18. khaplutam; dvādasāntasthitam| tṛtīyamalaṃkārāsanamāha--alaṃkāreti|
tatra sarvaṃ pradātavyamarghyapādyādi pūrvavat|
{2}vivecanaṃ ca keśānāṃ kaṅkatena praśodhanam || 19 ||
19. kaṅkataṃ keśaprasādhanī|
{2. niveśanaṃ A. }
śīrṣaṇyāstāḥ sumanasastataścūḍopakalpanam|
{3}candanādyāḥ sugandhāśca vyajanaṃ śoṣaṇārthakam || 20 ||
20. - - - - - - - - - - - - - -
{3. candanādyāstu A. B. }
makuṭādyā alaṃkārāḥ pradeyāḥ paramādbhutāḥ|
srajo nānāvidhākārāḥ sāttvikaiḥ kusumaiścitāḥ || 21 ||
21. - - - - - - - - - - - - - -
puṣpāñjaliḥ padadvandve prākāraḥ sumanaścayaiḥ|
gandhadravyasuśītena hyañjanenāñjanaṃ dṛśoḥ || 22 ||
22. - - - - - - - - - - - -
tathaivālambhanaṃ cāpi lalāṭatilakaṃ tathā|
ādarśo vimalo mṛṣṭaḥ paritaśca samīkṣaṇam || 23 ||
23. - - - - - - - - - - - - - -
pradīpaśca pradhūpaśca vāhanaṃ cetanetarat|
stutimaṅgalagītāni nṛttavāditradarśanam || 24 ||
24. cetanetarat vāhanamiti| suvarṇādinirmitaṃ hastyaśvādi|
mātrāśca ratnasaṃpūrṇā bhogacchidraprapūraṇāḥ|
buddhyā viracitāstāstā rājarājocitāḥ kriyāḥ || 25 ||
25. - - - - - - - - - - - - - -
alaṃkārāsanasthāya tvete bhogā hi manmayāḥ|
atha bhojyāsanaṃ deyamargyapādyādikaṃ tathā || 26 ||
26. manmayā ityanenādhyāyādāvukto viṣayaḥ smāryate| turīyaṃ bhojyāsanamupavarṇyate---atheti|
yajeta madhuparkeṇa {4}yathā tadavadhāraya|
payaso madhuno dadhnaḥ saṃyogo madhuparkakaḥ || 27 ||
27. madhuparkamāha--payasa iti|
{4. yathāvat B. F. }
pātraṃ puraḥ pratiṣṭhāpya madhuparkeṇa pūritam|
arhaṇaṃ tarpaṇaṃ cārghyāt pṛthak pātradvaye bhavet || 28 ||
28. - - - - - - - - - - - - -
{5}arhaṇenārcanaṃ pūrvaṃ tataśca madhuparkakam|
tarpaṇaṃ tarpaṇīyābhistato niṣpuṃsanaṃ kare || 29 ||
29. arhaṇamāpośanam| tarpaṇam; pānīyatīrtham| niṣpuṃsanam; hastodvartanam|
{5. arhaṇaṃ cārcanaṃ B. }
deyamācamanaṃ paścānmātrā gaurmādhuparkikī|
yaṣṭavyamannayajñena sāṅgena madhuparkavat || 30 ||
30. punaḥ madhuparkadānasaṃbhāvitavaikalyaparihārāya gavā mātrādānamatrocyate|
{6}pradeyā annayajñārthā mātrāḥ śālyannanirmitāḥ|
sakarpūraṃ ca tāmbūlaṃ pradeyamanuvāsanam || 31 ||
31. pañcame mantrāsane samarpaṇīyāni tāmbūlādīni|
{6. B. C. F. omit four lines from here. }
tataśca viśramārthāya vimānaṃ paramādbhutam|
pradeyaṃ tatra dātavyaṃ sarvamarghyādi pūrvavat || 32 ||
32. ṣaṣṭhaṃ paryahkāsanamucyate---tataśceti|
japaṃ samācaret paścādalakṣyamitarairjanaiḥ|
mantrasaṃskṛtayā samyak śubhayā hyakṣamālayā || 33 ||
33. japasaṃkhyāgaṇanopakaraṇeṣvakṣamālā praśastā|
prākṛtastvaṅgulībhistu parvabhistu daśottaraḥ|
śatottarādisaṃkhyastu vijñeyo hyakṣamālayā || 34 ||
34. - - - - - - - - - - - -
vācikaḥ kṣudrakarmārthamupāṃśu siddhikarmaṇi|
mānaso mokṣalakṣmīdo dhyānātmā sarvasiddhikṛt || 35 ||
35. japaviśeṣo vācikādiḥ|
akṣamālā tathā kāryā na dṛśyā prākṛtairyathā|
akṣāsthimātrā maṇya uttamāḥ parikīrtitāḥ || 36 ||
36. - - - - - - - - - - - -
dhātrīphalāsthisadṛśā madhyamāḥ parikīrtitāḥ|
{7}adhamā badarāsthyābhāḥ śreṣṭhamaṣṭaśatātmakam || 37 ||
37. - - - - - - - - - - - - - -
{7. athavā A. }
tadardhaṃ madhyamaṃ proktaṃ tadardhamadhamaṃ smṛtam|
sauvarṇaṃ dravyasiddhyarthe puṣṭyarthe pitṛkarmaṇi || 38 ||
38. akṣamālāmaṇiviśeṣānāha---sauvarṇamityādinā|
rājataṃ tāmrarūpaṃ tu medhāvīryajayāptaye|
trāpuṣaṃ yakṣiṇīsiddhau saisaṃ rakṣaḥpiśācayoḥ || 39 ||
39. - - - - - - - - - - - -
vetālasādhanārthaṃ tu rītijaṃ kāṃsyajaṃ tu tat|
akṣasūtraṃ parijñeyaṃ nāgapannagasādhane || 40 ||
40. rītiḥ pittalalohaviśeṣaḥ|
āyasaṃ kṣudrakarmārthamiti dhātumayo maṇiḥ|
āyurārogyabhūtyarthaḥ{8} sarvo maṇimayo maṇiḥ || 41 ||
41. - - - - - - - - - - - - -
{8. vṛddhyarthaḥ C. }
mokṣāya śāntaye caiva sphāṭiko maṇirucyate|
saubhāgye vaidrumaḥ kāryaḥ sautraḥ kāryastu muktaye || 42 ||
42. saitraḥ; tantunirmitaḥ|
śāntaye muktaye puṣṭyai tulasīmūlajo maṇiḥ|
sarvasiddhipradaḥ pādmo maṇiḥ śāṅkhaḥ śriyai mataḥ || 43 ||
43. - - - - - - - - - - - - - -
āyuḥprajāyaśodaḥ syānmauktiko maṇiruttamaḥ|
ādadyādekameteṣāṃ śubhakāle guṇādhike || 44 ||
44. - - - - - - - - - - -
asreṇa gandhatoyena kṣālayettadanantaram|
{9}śāṇakārpāsajorṇānāṃ kṛtvā sūtraṃ navaṃ dṛḍham || 45 ||
45. - - - - - - - - - - - - -
{9. B. omits four lines from here. }
triguṇaṃ triguṇīkṛtya caturdhā vā yathā dṛḍham|
kṣālayitvāsratoyena tenaiva grathayenmaṇīn || 46 ||
46. - - - - - - - - - - -
anūnānadhikāṃstulyānacalān grathitāntarān|
iṣṭasaṃkhyāmaṇiprotasūtrāntadvitayopamam||
maṇiṃ prakalpayenmerumakṣamālāvidhistvayam || 47 ||
47. meruḥ japasūtrapradhānagranthistho bṛhanmaṇiviśeṣaḥ|
iti {10}śrīpāñcarātrasāre lakṣmītantre bahiryāgaprakāśo{11} nāmaikonacatvāriṃśo'dhyāyaḥ
{10. śrīpañcarātra A.; śrīpāñcarātre B. }
{11. bahiryāgo A. }
********ityekonacatvāriṃśo'dhyāyaḥ********