Chapter 16

ṣoḍaśo'dhyāyaḥ - 16
śrīḥ---
vyākhyānaṃ mahataḥ śakra śṛṇuṣvāvahito mama|
vaiṣamyasya samunmeṣo guṇānāṃ prathamo hi yaḥ || 1 ||
1. anena guṇatrayasya sāmyāvasthāyāṃ prakṛtiriti, vaiṣamyāvasthāyāṃ mahāniti ca vyavahāra ityuktaṃ bhavati|
sa mahānnāma tasyāpi vidhāstisraḥ prakīrtitāḥ|
sāttviko buddhirityukto rājasaḥ prāṇa eva hi{1} || 2 ||
2. - - - - - - - - - - - - - - -
{1. ucyate E. }
tāmasaḥ kāla ityuktasteṣāṃ vyākhyāmimāṃ śṛṇu|
buddhiradhyavasāyasya prāṇaḥ prayatanasya ca || 3 ||
3. kālasya tāmasatvamatrocyate| aupaniṣadaprakriyā kālasyāprākṛtatvameveti vadanti|
kālaḥ {2}kalanarūpasya pariṇāmasya kāraṇam|
mahato'pi vikurvāṇādahaṃkāro vyajāyata{3} || 4 ||
4. kalanaṃ vipariṇatiḥ| āmrādiśalāṭoḥ tatphalātmanā, yuvadehasya valibhavṛddhadehātmanā ca yā pariṇatiḥ setyarthaḥ|
{2. kālana D. }
{3. asya jāyate A. B. C. D. }
sa cāpi trividho jñeyo guṇavaiṣamyasaṃbhavāt|
tāmasādviyadādistu tanmātragaṇa ujjvalaḥ || 5 ||
5. - - - - - - - - - - - -
jātaḥ sattvasamudriktādbuddhīndriyagaṇo mahān|
karmendriyagaṇaścāpi {4}rājasādubhayātmakam || 6 ||
6. karmendriyāṇāṃ rājasatvaṃ, manasaḥ sāttvikarājasatvamiti vibhāgastantrikaikadeśināṃ matena| vastutastu ekādaśāpīndriyāṇi sāttvikānītyeva bahūnāṃ pāñcarātrikāṇāṃ matam| "devā vaikārikā daśa| ekādaśaṃ manasca" iti viṣṇupurāṇe coktam|
{4. rājasāttūbhayāo A. B. }
ubhayasmāt samudbhūtamitīyaṃ tattvapaddhatiḥ|
atra prakṛtirekaiva mūlabhūtā sanātanī || 7 ||
7. tattvapaddhatiḥ| acittattvapaddhatirityarthaḥ| itthamatra vibhāgaḥ---tattvaṃ dvividham, acittattvaṃ cittattvaṃ ceti| tatrācittattvaṃ caturviṃśatidhā---prakṛtimahadahaṃkārāsrayaḥ, tanmātrāṇi pañca, mahābhūtāni pañca, ekādaśendriyāṇīti| cittattvaṃ dvedhā---jīva īśvaraśceti| āhatya ṣaḍ‌viṃśatistattvāni|
mahadādyāstu saptānye kāryakāraṇarūpiṇaḥ|
tanmātrebhyaḥ samudbhūtā viśeṣā viyadādayaḥ || 8 ||
8. - - - - - - - - - - - -
buddhikarmendriyagaṇau pañcakau mana eva ca|
vikārā eva vijñeyā ete ṣoḍaśa cintakaiḥ || 9 ||
9. - - - - - - - - - - - -
caturviṃśatiretāni tattvāni kathitāni te|
yāvānyaścātra vaktavyo viśeṣo yādṛśastviha || 10 ||
10. - - - - - - - - - - - -
sa sarvaḥ kathitaḥ pūrvaṃ tava vṛtraniṣūdana|
viṃśatyā ca tribhiścaiva vikāraiḥ svaiḥ samanvitā || 11 ||
11. - - - - - - - - - - - - - -
iyaṃ prakṛtiravyaktā kathitā te surādhipa|
vyaktāvyaktamayī saiṣā nityaṃ prasavadharmiṇī || 12 ||
12. prakṛtyavasthāyāmavyaktā, pariṇatyavasthāyāṃ vyaktā| kāryakāraṇayorabhedādevamuktiḥ|
vilakṣaṇā sā vijñeyā cicchaktiravinaśvarā{5}|
sa jīvaḥ kathitaḥ sadbhistattvaśāstraviśāradaiḥ || 13 ||
13. - - - - - - - - - - - - -
{5. avinaśvarī B. }
ayaṃ svarasataḥ śuddha- pariṇāmavivarjitaḥ|
kūṭasthaściddhano {6}nityo hyananto'pratisaṃkramaḥ || 14 ||
14. svarasataḥ svabhāvataḥ| anantaḥ; saṃkhyayā jñānādiguṇaiścāparicchinna ityarthaḥ|
{6. nityamantaḥstho A. D. F. }
imau svarasato'saktau saktātmānāviva sthitau{7}|
prakṛtiḥ puruṣaścaiva mahadbhyaśca mahattarau || 15 ||
15. - - - - - - - - - - - -
{7. sattātmānau vyavasthitau B. }
liṅgagrāhyāvubhau nityāvaliṅgau cāpyubhāvapi|
sādharmyamevamādyevamanayorunnayedbudhaḥ || 16 ||
16. - - - - - - - - - - -
vaidharmyamanayoḥ śakra kathyamānaṃ nibodha me|
prakṛtistriguṇā nityaṃ satataṃ pariṇāminī || 17 ||
17. - - - - - - - - - - - -
avivekāpyaśuddhā ca sarvajīvasamā sadā|
viṣayo'cetanā{8} caiva sukhaduḥkhavimohinī || 18 ||
18. - - - - - - - - - - - -
{8. avedanā G. }
madhyasthaḥ puruṣo nityaḥ kriyāvānapyavihvalaḥ|
sākṣī dṛśistathā draṣṭā śuddho'nanto guṇātmakaḥ || 19 ||
19. - - - - - - - - - - - - - -
vaidharmyamanayoretat prakṛtiṃ cānayoḥ śṛṇu|
yā sā sadasadākhyādivikalpavikalā{9} dhruvā || 20 ||
20. vikalpavikaleti| vividhapariṇatyabhāginītyarthaḥ|
{9. vipulā C. D. }
nityoditā sadānandā pūrṇaṣāḍ‌guṇyavigrahā|
ahaṃ nārāyaṇī śaktirviṣṇoḥ śrīrapāyinī || 21 ||
21. - - - - - - - - - - - -
mattaḥ prabhavato hyetau mayyeva layameṣyataḥ|
sāhametāvatī {10}bhāvairvividhairvistṛtiṃ gatā || 22 ||
22. - - - - - - - - - - - -
{10. bhāvairviṣayaiḥ A. B. C. D. }
nārāyaṇe pratiṣṭhāya punastasmādudemyaham|
eko nārāyaṇo viṣṇurvāsudevaḥ sanātanaḥ || 23 ||
23. - - - - - - - - - - - -
apṛthagbhūtaśaktitvādadvaitaṃ brahma niṣkalam|
jñānaśaktibalaiśvaryavīryatejomahodadhiḥ || 24 ||
24. śkatiśaktimatorapṛthaksiddhasaṃbandhāt ekatvam| ato nādvitīyatvavirodha iti bhāvaḥ|
nistaraṅgaḥ sadaivāsau jagadetaccarācaram|
iti te sāṃkhyavijñānaṃ leśataḥ śakra darśitam || 25 ||
25. asau nārāyaṇa eva carācarātmakajagadrūpatayāvatiṣṭhata iti yāvat|
yā tattvagaṇanā saṃkhyā tāṃ purā śīlayedbudhaḥ|
tataḥ sādharmyavaidharmyasvarūpaprabhavādikām || 26 ||
26. - - - - - - - - - - - -
kuryāccarcātmikāṃ saṃkhyāṃ śāsratattvopadeśajām|
carcāyāmiha saṃkhyāyāṃ {11}siddhāyāmamalātmani || 27 ||
27. carcā nāma punaḥ punaḥ pariśīlanam|
{11. F. omits all portions from here up to evaṃ hi parisaṃkhyāya in the 29th verse. }
udeti yā samīcīnā saṃkhyā sattattvagocarā|
eṣā sā paramā saṃkhyā matprasādasamudbhavā || 28 ||
28. - - - - - - - - - - - -
sāṃkhyadarśanametatte parisaṃkhyānamīritam|
evaṃ hi parisaṃkhyāya sāṃkhyā {12}madbhāvamāgatāḥ || 29 ||
29. - - - - - - - - - - - - - - -
{12. sadbhāva A. B. C. }
upāyo {13}yastṛtīyaste vakṣyate yogasaṃjñakaḥ|
yogastu dvividho jñeyaḥ samādhiḥ saṃyamastathā || 30 ||
30. - - - - - - - - - - - - -
{13. ayaṃ A. B. }
yamādyaṅgasamudbhūtā samādhiḥ saṃsthitiḥ pare|
brahmaṇi śrīnivāsākhye hyutthānaparivarjitā{14} || 31 ||
31. - - - - - - - - - - - - - -
{14. varjitaḥ A. B. C. D. }
sākṣātkāramayī sā hi sthitiḥ sadbrahmavedinām|
dhyātṛdhyeyāvibhāgasthā matprasādasamudbhavā || 32 ||
32. avibhāgastheti| "ātmeti tūpagacchanti grāhayanti ca" ityuktarītyā parasya brahmaṇo'vibhāgenopāsanamatrābhipretam|
saṃyamo nāma satkarma paramātmaikagocaram|
tatpunardvividhaṃ proktaṃ śārīraṃ mānasaṃ tathā || 33 ||
33. - - - - - - - - - - - -
vistareṇābhidhāsyete samādhiḥ saṃyamastathā|
prathamo ya upāyaste karmātmā kathitaḥ purā || 34 ||
34. - - - - - - - - - - - -
saṃjñānaṃ janayecchuddhamantaḥkaraṇaśodhanāt|
tena hi prīṇitā sāhaṃ sadācāraniṣevaṇāt || 35 ||
35. - - - - - - - - - - - -
dadāmi buddhiyogaṃ tamantaḥkaraṇaśodhanam|
sāṃkhyaṃ nāma dvitīyo ya upāyaḥ kathitastava || 36 ||
36. - - - - - - - - - - - -
parokṣaḥ śāsrajanyo'sau nirṇayo dṛḍhatāṃ gataḥ|
pratyakṣatāmivāpanno matprītiṃ janayetparām || 37 ||
37. - - - - - - - - - - - -
ahaṃ saṃkhyāyamānā hi svarūpaguṇavaibhavaiḥ |
udbhāvayāmi tajjñānaṃ pratyakṣaṃ yadvivekajam || 38 ||
38. - - - - - - - - - - - -
tṛtīyastu samādhyātmā {15}pratyakṣo'viplavo dṛḍhaḥ|
prakṛṣṭasattvasaṃbhūtaḥ prasādātiśayo hi saḥ || 39 ||
39. - - - - - - - - - - - -
{15. pratyakṣāviplavo A. }
tṛtīyasya vidhā yo'sau saṃyamo nāma varṇitaḥ|
bhogaiḥ śuddhaisridhodbhūtairatyantaprītaye mama || 40 ||
40. - - - - - - - - - - -
ahaṃ hi tatra viśvātmā viṣṇuśaktiḥ parāvarā|
sākṣādeva samārādhyā devo vā puruṣottamaḥ || 41 ||
41. - - - - - - - - - - - -
iti te kathitāḥ samyagupāyāsraya ūrjitāḥ|
śṛṇūpāyaṃ caturthaṃ me sarvatyāgasamāhvayam || 42 ||
42. - - - - - - - - - - - -
{16}tatra dharmān parityajya sarvānuccāvacāṅgakān|
saṃsārānalasaṃtapto māmekāṃ śaraṇaṃ vrajet || 43 ||
43. - - - - - - - - - - - -
{16. sarva C. }
ahaṃ hi śaraṇaṃ prāptā nareṇaānanyacetasā|
prāpayāmyātmanātmānaṃ nirdhūtākhilakalmaṣam || 44 ||
44. - - - - - - - - - - - -
iti {17}śrīpāñcarātrasāre lakṣmītantre {18}upāyaprakāravivaraṇaṃ nāma ṣoḍaśo'dhyāyaḥ
{17. śrīpañcarātra A.; śrīpāñcarātre sāre I. }
{18. vedāntārthaprakāśo E.; F. omits the title. }
********iti ṣoḍaśo'dhyāyaḥ********