Chapter 13.4

[English text for this chapter is available]

karśanapūrvaṃ paryupāsanakarma || KAZ_13.4.01 ||

janapadaṃ yathāniviṣṭamabhaye sthāpayet || KAZ_13.4.02 ||

utthitamanugrahaparihārābhyāṃ niveṣayet anyatrāpasarataḥ || KAZ_13.4.03 ||

saṃgrāmādanyasyāṃ bhūmau niveśayet ekasyāṃ vā vāsayet || KAZ_13.4.04 ||

na hyajano janapado rājyamajanapadaṃ vā bhavatīti kauṭilyaḥ || KAZ_13.4.05 ||

viṣamasthasya muṣṭiṃ sasyaṃ vā hanyādvīvadhaprasārau ca || KAZ_13.4.06 ||

prasāravīvadhacchedānmuṣṭisasyavadhādapi || KAZ_13.4.07ab ||

vamanādgūḍhaghātācca jāyate prakṛtikṣayaḥ || KAZ_13.4.07cd ||

prabhūtaguṇabaddhānyakupyayantraśastrāvaraṇaviṣṭiraśmisamagraṃ me sainyamṛtuśca purastāt apartuḥ parasya vyādhidurbhikṣanicayarakṣākṣayaḥ krītabalanirvedo mitrabalanirvedaśca iti paryupāsīta || KAZ_13.4.08 ||

kṛtvā skandhāvārasya rakṣāṃ vīvadhāsārayoḥ pathaśca parikṣipya durgaṃ khātasālābhyām dūṣayitvodakamavasrāvya parikhāḥ sampūrayitvā vā suruṅgābalakuṭikābhyāṃ vapraprākārau hārayetdāraṃ ca guḍena || KAZ_13.4.09 ||

nimnaṃ vā pāṃsumālayācchādayet || KAZ_13.4.10 ||

bahulārakṣaṃ yantrairghātayet || KAZ_13.4.11 ||

niṣkirādupaniṣkṛṣyāśvaiśca prahareyuḥ || KAZ_13.4.12 ||

vikramāntareṣu ca niyogavikalpasamuccayaiścopāyānāṃ siddhiṃ lipseta || KAZ_13.4.13 ||

durgavāsinaḥ śyenakākanaptṛbhāsaśukasārikolūkakapotān grāhayitvā puccheṣvagniyogayuktānparadurge visṛjet || KAZ_13.4.14 ||

apakṛṣṭaskandhāvārāducchritadhvajadhanvārakṣo vā mānuṣeṇāgninā paradurgamādīpayet || KAZ_13.4.15 ||

gūḍhapurṣāścāntardurgapālakā nakulavānarabiḍālaśunāṃ puccheṣvagniyogamādhāya kāṇḍanicayarakṣāvidhānaveśmasu visṛjeyuḥ || KAZ_13.4.16 ||

śuṣkamatsyānāmudareṣvagnimādhāya vallūre vā vāyasopahāreṇa vayobhirhārayeyuḥ || KAZ_13.4.17 ||

saraladevadārupūtitṛṇagugguluśrīveṣṭakasarjarasalākṣāgulikāḥ kharoṣṭrājāvīnāṃ leṇḍaṃ cāgnidhāraṇam || KAZ_13.4.18 ||

priyālacūrṇamavalgujamaṣīmadhūcchiṣṭamaśvakharoṣṭragoleṇḍamityeṣa kṣepyo'gniyogaḥ || KAZ_13.4.19 ||

sarvalohacūrṇamagnivarṇaṃ vā kumbhīsīsatrapucūrṇaṃ vā pāribhadrakapalāśapuṣpakeśamaṣītailamadhūcchiṣṭakaśrīveṣṭakayukto'gniyogo viśvāsaghātī vā || KAZ_13.4.20 ||

tenāvaliptaḥ śaṇatrapusavalkaveṣṭito bāṇa ityagniyogaḥ || KAZ_13.4.21 ||

na tveva vidyamāne parākrame'gnimavasṛjet || KAZ_13.4.22 ||

aviśvāsyo hyagnirdaivapīḍanaṃ ca apratisaṃkhyātaprāṇidhānyapaśuhiraṇyakupyadravyakṣayakaraḥ || KAZ_13.4.23 ||

kṣīṇanicayaṃ cāvāptamapi rājyaṃ kṣayāyaiva bhavati | iti paryupāsanakarma || KAZ_13.4.24 ||

sarvārambhopakaraṇaviṣṭisampanno'smi vyādhitaḥ para upadhāviruddhaprakṛtirakṛtadurgakarmanicayo vā nirāsāraḥ sāsāro vā purā mitraiḥ saṃdhatte ityavamardakālaḥ || KAZ_13.4.25 ||

svayamagnau jāte samutthāpite vā prahavaṇe prekṣānīkadarśanasaṅgasaurikakalaheṣu nityayuddhaśrāntabale bahulayuddhapratividdhapretapuruṣe jāgaraṇaklāntasuptajane durdine nadīvege vā nīhārasamplave vāvamṛdnīyāt || KAZ_13.4.26 ||

skandhāvāramutsṛjya vā vanagūḍhaḥ śatruṃ niṣkrāntaṃ ghātayet || KAZ_13.4.27 ||

mitrāsāramukhyavyañjano vā samruddhena maitrīṃ kṛtvā dūtamabhityaktaṃ preṣayet idaṃ te chidramime dūṣyāḥ samroddhurvā chidramayaṃ te kṛtyapakṣaḥ iti || KAZ_13.4.28 ||

taṃ pratidūtamādāya nirgacchantaṃ vijigīṣurgṛhītvā doṣamabhivikhyāpya pravāsya apagacchet || KAZ_13.4.29 ||

tato mitrāsāravyañjano vā samruddhaṃ brūyātmāṃ trātumupanirgaccha mayā vā saha samroddhāraṃ jahi iti || KAZ_13.4.30 ||

pratipannamubhayataḥsampīḍanena ghātayetjīvagrāheṇa vā rājyavinimayaṃ kārayet || KAZ_13.4.31 ||

nagaraṃ vāsya pramṛdnīyāt || KAZ_13.4.32 ||

sārabalaṃ vāsya vamayitvābhihanyāt || KAZ_13.4.33 ||

tena daṇḍopanatāṭavikā vyākhyātāḥ || KAZ_13.4.34 ||

daṇḍopanatāṭavikayoranyataro vā samruddhasya preṣayet ayaṃ samroddhā vyādhitaḥ pārṣṇigrāheṇābhiyuktaḥ chidramanyadutthitamanyasyāṃ bhūmāvapayātukāmaḥ iti || KAZ_13.4.35 ||

pratipanne samroddhā skandhāvāramādīpyāpayāyāt || KAZ_13.4.36 ||

tataḥ pūrvavadācaret || KAZ_13.4.37 ||

paṇyasampātaṃ vā kṛtvā paṇyenainaṃ rasaviddhenātisaṃdadhyāt || KAZ_13.4.38 ||

āsāravyañjano vā samruddhasya dūtaṃ preṣayetmayā bāhyamabhihatamupanirgacchābhihantumiti || KAZ_13.4.39 ||

pratipannaṃ pūrvavadācaret || KAZ_13.4.40 ||

mitraṃ bandhuṃ vāpadiśya yogapuruṣāḥ śāsanamudrāhastāḥ praviśya durgaṃ grāhayeyuḥ || KAZ_13.4.41 ||

āsāravyañjñano vā samruddhasya preṣayet amuṣmindeśe kāle ca skandhāvāramabhihaniṣyāmi yuṣmābhirapi yoddhavyamiti || KAZ_13.4.42 ||

pratipannaṃ yathoktamabhyāghātasaṃkulaṃ darśayitvā rātrau durgānniṣkrāntaṃ ghātayet || KAZ_13.4.43 ||

yadvā mitramāvāhayedāṭavvikaṃ vā tamutsāhayet vikramya samruddhe bhūmimasya pratipadyasva iti || KAZ_13.4.44 ||

vikrāntaṃ prakṛtibhirdūṣyamukhyopagraheṇa vā ghātayetsvayaṃ vā rasena mitraghātako'yamityavāptārthaḥ || KAZ_13.4.45 ||

vikramitukāmaṃ vā mitravyañjanaḥ parasyābhiśaṃset || KAZ_13.4.46 ||

āptabhāvopagataḥ pravīrapuruṣānasyopaghātayet || KAZ_13.4.47 ||

saṃdhiṃ vā kṛtvā janapadamenaṃ niveśayet || KAZ_13.4.48 ||

niviṣṭamasya janapadamavijñāto hanyāt || KAZ_13.4.49 ||

apakārayitvā dūṣyāṭavikeṣu vā balaikadeśamatinīya durgamavaskandena hārayet || KAZ_13.4.50 ||

dūṣyāmitrāṭavikadveṣyapratyapasṛtāśca kṛtārthamānasaṃjñācihnāḥ paradurgamavaskandeyuḥ || KAZ_13.4.51 ||

paradurgamavaskandya skandhāvāraṃ vā patitaparānmukhābhipannamuktakeśaśastrabhayavirūpebhyaścābhayamayudhyamānebhyaśca dadyuḥ || KAZ_13.4.52 ||

paradurgamavāpya viśuddhaśatrupakṣaṃ kṛtopāṃśudaṇḍapratīkāramantarbahiśca praviśet || KAZ_13.4.53 ||

evaṃ vijigīṣuramitrabhūmiṃ labdhvā madhyamaṃ lipseta tatsiddhāv udāsīnam || KAZ_13.4.54 ||

eṣa prathamo mārgaḥ pṛthivīṃ jetum || KAZ_13.4.55 ||

madhyamodāsīnayorabhāve guṇātiśayenāriprakṛtīḥ sādhayettata uttarāḥ prakṛtīḥ || KAZ_13.4.56 ||

eṣa dvitīyo mārgaḥ || KAZ_13.4.57 ||

maṇḍalasyābhāve śatruṇā mitraṃ mitreṇa vā śatrumubhayataḥsampīḍanena sādhayet || KAZ_13.4.58 ||

eṣatṛtīyo mārgaḥ || KAZ_13.4.59 ||

śakyamekaṃ vā sāmantaṃ sādhayettena dviguṇo dvitīyam triguṇastṛtīyam || KAZ_13.4.60 ||

eṣa caturtho mārgaḥ pṛthivīṃ jetum || KAZ_13.4.61 ||

jitvā ca pṛthivīṃ vibhaktavarṇāśramāṃ svadharmeṇa bhuñjīta || KAZ_13.4.62 ||

upajāpo'pasarpaśca vāmanaṃ paryupāsanam || KAZ_13.4.63ab ||

avamardaśca pañcaite durgalambhasya hetavaḥ || KAZ_13.4.63cd ||