Chapter 5.2

[English text for this chapter is available]

kośamakośaḥ pratyutpannārthakṛcchraḥ saṃgṛhṇīyāt || KAZ_05.2.01 ||

janapadaṃ mahāntamalpapramāṇaṃ vādevamātṛkaṃ prabhūtadhānyaṃ dhānyasyāṃśaṃ tṛtīyaṃ caturthaṃ vā yāceta yathāsāraṃ madhyamavaraṃ vā || KAZ_05.2.02 ||

durgasetukarmavaṇikpathaśūnyaniveśakhanidravyahastivanakarmopakāriṇaṃ pratyantamalpapramāṇaṃ vā na yāceta || KAZ_05.2.03 ||

dhānyapaśuhiraṇyādi niviśamānāya dadyāt || KAZ_05.2.04 ||

caturthamaṃśaṃ dhānyānāṃ bījabhaktaśuddhaṃ ca hiraṇyena krīṇīyāt || KAZ_05.2.05 ||

araṇyajātaṃ śrotriyasvaṃ ca pariharet || KAZ_05.2.06 ||

tadapyanugraheṇa krīṇīyāt || KAZ_05.2.07 ||

tasyākaraṇe vā samāhartṛpuruṣā grīṣme karṣakāṇāmudvāpaṃ kārayeyuḥ || KAZ_05.2.08 ||

pramādāvaskannasyātyayaṃ dviguṇamudāharanto bījakāle bījalekhyaṃ kuryuḥ || KAZ_05.2.09 ||

niṣpanne haritapakvādānaṃ vārayeyuḥ anyatra śākakaṭabhaṅgamuṣṭibhyāṃ devapitṛpūjādānārthaṃ gavārthaṃ vā || KAZ_05.2.10 ||

bhikṣukagrāmabhṛtakārthaṃ ca rāśimūlaṃ parihareyuḥ || KAZ_05.2.11 ||

svasasyāpahāriṇaḥ pratipāto'ṣṭaguṇaḥ || KAZ_05.2.12 ||

parasasyāpahāriṇaḥ pañcāśadguṇaḥ sītātyayaḥ svavargasya bāhyasya tu vadhaḥ || KAZ_05.2.13 ||

caturthamaṃśaṃ dhānyānāṃ ṣaṣṭhaṃ vanyānāṃ tūlalākṣākṣaumavalkakārpāsaraumakauśeyakauṣadhagandhapuṣpaphalaśākapaṇyānāṃ kāṣṭhaveṇumāṃsavallūrāṇāṃ ca gṛhṇīyuḥ dantājinasyārdham || KAZ_05.2.14 ||

tadanisṛṣṭaṃ vikrīṇānasya pūrvaḥ sāhasadaṇḍaḥ || KAZ_05.2.15 ||

iti karṣakeṣu praṇayaḥ || KAZ_05.2.16 ||

suvarṇarajatavajramaṇimuktāpravālāśvahastipaṇyāḥ pañcāśatkarāḥ || KAZ_05.2.17 ||

sūtravastratāmravṛttakaṃsagandhabhaiṣajyaśīdhupaṇyāścatvāriṃśatkarāḥ || KAZ_05.2.18 ||

dhānyarasalohapaṇyāḥ śakaṭavyavahāriṇaśca triṃśatkarāḥ || KAZ_05.2.19 ||

kācavyavahāriṇo mahākāravaśca viṃśatikarāḥ || KAZ_05.2.20 ||

kṣudrakāravo bandhakīpoṣakāśca daśakarāḥ || KAZ_05.2.21 ||

kāṣṭhaveṇupāṣāṇamṛdbhāṇḍapakvānnaharitapaṇyāḥ pañcakarāḥ || KAZ_05.2.22 ||

kuśīlavā rūpājīvāśca vetanārdhaṃ dadyuḥ || KAZ_05.2.23 ||

hiraṇyakaraṃ karmaṇyānāhārayeyuḥ na caiṣāṃ kaṃcidaparādhaṃ parihareyuḥ || KAZ_05.2.24 ||

te hyaparigṛhītamabhinīya vikrīṇīran || KAZ_05.2.25 ||

iti vyavahāriṣu praṇayaḥ || KAZ_05.2.26 ||

kukkuṭasūkaramardhaṃ dadyātkṣudrapaśavaḥ ṣaḍbhāgaṃ gomahiṣāśvatarakharoṣṭrāśca daśabhāgam || KAZ_05.2.27 ||

bandhakīpoṣakā rājapreṣyābhiḥ paramarūpayauvanābhiḥ kośaṃ saṃhareyuḥ || KAZ_05.2.28 ||

iti yonipoṣakeṣu praṇayaḥ || KAZ_05.2.29 ||

sakṛdeva na dviḥ prayojyaḥ || KAZ_05.2.30 ||

tasyākaraṇe vā samāhartā kāryamapadiśya paurajānapadānbhikṣeta || KAZ_05.2.31 ||

yogapuruṣāścātra pūrvamatimātraṃ dadyuḥ || KAZ_05.2.32 ||

etena pradeśena rājā paurajānapadānbhikṣeta || KAZ_05.2.33 ||

kāpaṭikāścainānalpaṃ prayacchataḥ kutsayeyuḥ || KAZ_05.2.34 ||

sārato vā hiraṇyamāḍhyānyāceta yathopakāraṃ vā svavaśā vā yadupahareyuḥ || KAZ_05.2.35 ||

sthānacchatraveṣṭanavibhūṣāścaiṣāṃ hiraṇyena prayacchet || KAZ_05.2.36 ||

pāṣaṇḍasaṃghadravyamaśrotriyopabhogyaṃ devadravyaṃ vā kṛtyakarāḥ pretasya dagdhagṛhasya vā haste nyastamityupahareyuḥ || KAZ_05.2.37 ||

devatādhyakṣo durgarāṣṭradevatānāṃ yathāsvamekasthaṃ kośaṃ kuryāttathaiva copaharet || KAZ_05.2.38 ||

daivatacaityaṃ siddhapuṇyasthānamaupapādikaṃ vā rātrāv utthāpya yātrāsamājābhyāmājīvet || KAZ_05.2.39 ||

caityopavanavṛkṣeṇa vā devatābhigamanamanārtavapuṣpaphalayuktena khyāpayet || KAZ_05.2.40 ||

manuṣyakaraṃ vā vṛkṣe rakṣobhayaṃ prarūpayitvā siddhavyañjanāḥ paurajānapadānāṃ hiraṇyena pratikuryuḥ || KAZ_05.2.41 ||

suruṅgāyukte vā kūpe nāgamaniyataśiraskaṃ hiraṇyopahāreṇa darśayet || KAZ_05.2.42 ||

nāgapratimāyāmantaśchannāyāṃ caityacchidre valmīkacchidre vā sarpadarśanamāhāreṇa pratibaddhasaṃjñaṃ kṛtvā śraddadhānānāṃ darśayet || KAZ_05.2.43 ||

aśraddadhānānāmācamanaprokṣaṇeṣu rasamupacārya devatābhiśāpaṃ brūyāt abhityaktaṃ vā daṃśayitvā || KAZ_05.2.44 ||

yogadarśanapratīkāreṇa vā kośābhisaṃharaṇaṃ kuryāt || KAZ_05.2.45 ||

vaidehakavyañjano vā prabhūtapaṇyāntevāsī vyavahareta || KAZ_05.2.46 ||

sa yadā paṇyamūlye nikṣepaprayogairupacitaḥ syāttadainaṃ rātrau moṣayet || KAZ_05.2.47 ||

etena rūpadarśakaḥ suvarṇakāraśca vyākhyātau || KAZ_05.2.48 ||

vaidehakavyañjano vā prakhyātavyavahāraḥ prahavaṇanimittaṃ yācitakamavakrītakaṃ vā rūpyasuvarṇabhāṇḍamanekaṃ gṛhṇīyāt || KAZ_05.2.49 ||

samāje vā sarvapaṇyasaṃdohena prabhūtaṃ hiraṇyasuvarṇamṛṇaṃ gṛhṇīyātpratibhāṇḍamūlyaṃ ca || KAZ_05.2.50 ||

tadubhayaṃ rātrau moṣayet || KAZ_05.2.51 ||

sādhvīvyañjanābhiḥ strībhirdūṣyānunmādayitvā tāsāmeva veśmasvabhigṛhya sarvasvānyāhareyuḥ || KAZ_05.2.52 ||

dūṣyakulyānāṃ vā vivāde pratyutpanne rasadāḥ praṇihitā rasaṃ dadyuḥ || KAZ_05.2.53 ||

tena doṣeṇetare paryādātavyāḥ || KAZ_05.2.54 ||

dūṣyamabhityakto vā śraddheyāpadeśaṃ paṇyaṃ hiraṇyanikṣepamṛṇaprayogaṃ dāyaṃ vā yāceta || KAZ_05.2.55 ||

dāsaśabdena vā dūṣyamālambeta bhāryāmasya snuṣāṃ duhitaraṃ vā dāsīśabdena bhāryāśabdena vā || KAZ_05.2.56 ||

taṃ dūṣyagṛhapratidvāri rātrāv upaśayānamanyatra vā vasantaṃ tīkṣṇo hatvā brūyāt hato'yamarthakāmukaḥ iti || KAZ_05.2.57 ||

tena doṣeṇetare paryādātavyāḥ || KAZ_05.2.58 ||

siddhavyañjano vā dūṣyaṃ jambhakavidyābhiḥ pralobhayitvā brūyāt akṣayahiraṇyaṃ rājadvārikaṃ strīhṛdayamarivyādhikaramāyuṣyaṃ putrīyaṃ vā karma jānāmi iti || KAZ_05.2.59 ||

pratipannaṃ caityasthāne rātrau prabhūtasurāmāṃsagandhamupahāraṃ kārayet || KAZ_05.2.60 ||

ekarūpaṃ cātra hiraṇyaṃ pūrvanikhātaṃ pretāṅgaṃ pretaśiśurvā yatra nihitaḥ syāttato hiraṇyamasya darśayedatyalpamiti ca brūyāt || KAZ_05.2.61 ||

prabhūtahiraṇyahetoḥ punarupahāraḥ kartavya iti svayamevaitena hiraṇyena śvobhūte prabhūtamaupahārikaṃ krīṇīhi iti || KAZ_05.2.62 ||

sa tena hiraṇyenāupahārikakraye gṛhyeta || KAZ_05.2.63 ||

mātṛvyañjanayā vā putro me tvayā hataḥ ityavakupitā syāt || KAZ_05.2.64 ||

saṃsiddhamevāsya rātriyāge vanayāge vanakrīḍāyāṃ vā pravṛttāyāṃ tīkṣṇā viśasyābhityaktamatinayeyuḥ || KAZ_05.2.65 ||

dūṣyasya vā bhṛtakavyañjano vetanahiraṇye kūṭarūpaṃ prakṣipya prarūpayet || KAZ_05.2.66 ||

karmakaravyañjano vā gṛhe karma kurvāṇaḥ stenakūṭarūpakārakopakaraṇamupanidadhyāt cikitsakavyañjano vā garamagadāpadeśena || KAZ_05.2.67 ||

pratyāsanno vā dūṣyasya sattrī praṇihitamabhiṣekabhāṇḍamamitraśāsanaṃ ca kāpaṭikamukhenācakṣīta kāraṇaṃ ca brūyāt || KAZ_05.2.68 ||

evaṃ dūṣyeṣvadhārmikeṣu ca varteta netareṣu || KAZ_05.2.69 ||

pakvaṃ pakvamivārāmātphalaṃ rājyādavāpnuyāt || KAZ_05.2.70ab ||

ātmacchedabhayādāmaṃ varjayetkopakārakam || KAZ_05.2.70cd ||