Chapter 4

tato 'sya vikramādityasyaikadātra kathāntare |
rājñī kaliṅgasenākhyā sapatnīrevam abravīt || 1 ||
[Analyze grammar]

rājñā malayavatyarthe yatkṛtaṃ na tadadbhutam |
sadā viṣamaśīlo hi devo 'yaṃ prathito bhuvi || 2 ||
[Analyze grammar]

ahaṃ na pariṇītā kim avaskandyāmunā balāt |
madrūpāṃ putrikāṃ dṛṣṭvā gatenānaṅganighnatām || 3 ||
[Analyze grammar]

etannimittamākhyātā kathā kārpaṭikena yā |
devasenena me tāṃ vaḥ kathayāmi niśamyatām || 4 ||
[Analyze grammar]

pariṇītāsmyavidhinā kathaṃ rājñeti duḥkhitām |
māmetyāśvāsayannevaṃ sa hi kārpaṭiko 'bravīt || 5 ||
[Analyze grammar]

mā sma manyuṃ kṛthā devi śraddhayā parayā hy asi |
pariṇītātisaṃrambhādatrāmūlātkathāṃ śṛṇu || 6 ||
[Analyze grammar]

ahaṃ kārpaṭiko bhūtvā sevāṃ kurvan bhavatprabhoḥ |
aṭavyāṃ dūrato 'drākṣaṃ mahāntaṃ kroḍam ekadā || 7 ||
[Analyze grammar]

daṃṣṭrāviśaṅkaṭamukhaṃ tamālaśyāmalacchavim |
kṛṣṇapakṣaṃ śaśikalāḥ khādantam iva rūpiṇam || 8 ||
[Analyze grammar]

etya cāvedito devi mayā rājñe tathaiva saḥ |
rājāpi tadrasākṛṣṭo niragānmṛgayākṛte || 9 ||
[Analyze grammar]

mṛgāṭavīṃ ca saṃprāpya kurvanvyāghramṛgakṣayam |
āveditaṃ mayā dūrādvarāhaṃ paśyati sma tam || 10 ||
[Analyze grammar]

dṛṣṭvādbhutaṃ ca taṃ matvā kaṃcitkāraṇasūkaram |
ratnākarākhyamārohadaśvamuccaiḥśravaḥsutam || 11 ||
[Analyze grammar]

madhyāhne hi sadā bhānurmuhūrtaṃ vyomni tiṣṭhati |
tatkālaṃ cāruṇenāśvā mucyante snānapānayoḥ || 12 ||
[Analyze grammar]

ekadoccaiḥśravā muktastadā ravirathādvane |
dṛṣṭām upetya rājño 'śvāṃ taṃ turaṃgamajījanat || 13 ||
[Analyze grammar]

tasminnāruhya vātāśve javādanvapatac ca tam |
varāhaṃ vidrutaṃ rājā bhūmiṃ dūrāddavīyasīm || 14 ||
[Analyze grammar]

tatra dṛṣṭipathātso 'sya naṣṭo 'bhūtkvāpi sūkaraḥ |
uccaiḥśravaḥsutādaśvāttasmādapi javādhikaḥ || 15 ||
[Analyze grammar]

tato rājā tamaprāpya dūrojjhitaparicchadaḥ |
ekamanvāgataṃ dṛṣṭvā māmevaṃ paripṛṣṭavān || 16 ||
[Analyze grammar]

api jānāsi kiyatīṃ vayaṃ bhūmim upāgatāḥ |
tac chrutvā devi rājānaṃ pratyavocamahaṃ tadā || 17 ||
[Analyze grammar]

yojanānāṃ śatāni trīṇyāgatāḥ smaḥ prabho iti |
tato rājābravīttarhi tvaṃ padbhyāṃ kathamāgataḥ || 18 ||
[Analyze grammar]

evaṃ savismayenāhaṃ rājñā pṛṣṭastam abravam |
devāsti pādalepo me vṛttāntaṃ cātra taṃ śṛṇu || 19 ||
[Analyze grammar]

pūrvaṃ bhāryāviyogena tīrthayātrāvinirgataḥ |
pathi devakulaṃ sāyaṃ sodyānaṃ prāptavānaham || 20 ||
[Analyze grammar]

tatra cāhaṃ niśāṃ netuṃ praviṣṭo 'paśyamantare |
striyamekāmatiṣṭhaṃ ca tatrātithyādṛtastayā || 21 ||
[Analyze grammar]

rātrau ca sā nabhasyekamoṣṭhaṃ kṛtvāparaṃ bhuvi |
vyāttāsyā prāha māmīdṛgdṛṣṭaṃ kvāpi mukhaṃ tvayā || 22 ||
[Analyze grammar]

tato 'sidhenumākṛṣya sabhrūbhaṅgamabibhyatā |
tvayā cedṛkpumāndṛṣṭaḥ kvāpīty uktā mayāpi sā || 23 ||
[Analyze grammar]

atha saumyavapurbhūtvā sābravīnmāmavaikṛtā |
yakṣī caṇḍyabhidhānāhaṃ tuṣṭā dhair yeṇa cāsmi te || 24 ||
[Analyze grammar]

tadidānīṃ mama brūhi kiṃ priyaṃ karavāṇi te |
evam uktavatīṃ tāṃ ca yakṣiṇīmaham abhyadhām || 25 ||
[Analyze grammar]

parituṣṭāsi cetsatyaṃ tatkuruṣva tathā mama |
akleśena yathā tīrthānyaṭeyaṃ nikhilānyapi || 26 ||
[Analyze grammar]

evaṃ mayoktā yakṣī sā pādalepamadānmama |
tena tīrthānyahaṃ bhrāntastvaṃ cehādyānudhāvitaḥ || 27 ||
[Analyze grammar]

tenaiva pratyahaṃ cāhamihāgatyāṭavībhuvi |
bhuktvā phalānyujjayinīmetya sevāṃ karomi te || 28 ||
[Analyze grammar]

iti devi mayā rājā vijñapto 'ntaramanyata |
prasannadṛṣṭikathitaṃ yogyaṃ māmanuyāyinam || 29 ||
[Analyze grammar]

bhūyo mayaivaṃ vijñapto rājā devānayāmy aham |
susvādūni phalānīha bhujyante prabhuṇā yadi || 30 ||
[Analyze grammar]

nāhaṃ bhokṣye na me kiṃcid upayuktaṃ bhavān punaḥ |
bhuṅktāṃ kiṃcit pariśrānta iti rājādiśac ca mām || 31 ||
[Analyze grammar]

tataḥ karkaṭikāṃ tatra saṃprāpyāhamabhakṣayam |
tayā cājagaro 'bhūvamahaṃ bhakṣitamātrayā || 32 ||
[Analyze grammar]

dṛṣṭvā cājagarībhūtamakasmāddevi māṃ tadā |
devo viṣamaśīlo 'bhūtsaviṣādaḥ savismayaḥ || 33 ||
[Analyze grammar]

ekākī cātra vetālaṃ bhūtaketuṃ samasmarat |
prāṅnetrarogād dṛṣṭyaiva mocayitvā vaśīkṛtam || 34 ||
[Analyze grammar]

sa vetālaḥ smṛtāyātaḥ prahvo rājānam abravīt |
kiṃ smṛto 'smi mahārāja nideśo dīyatāmiti || 35 ||
[Analyze grammar]

atha rājābravīdetaṃ bhadra kārpaṭikaṃ mama |
sahasājagarībhūtaṃ prāpaya prakṛtiṃ nijām || 36 ||
[Analyze grammar]

vetālo 'py avadaddeva nāsti śaktirmamedṛśī |
śaktayo niyatā vāri vaidyutāgniṃ nu hanti kim || 37 ||
[Analyze grammar]

tato rājābravīttarhi yāmaḥ pallīmimāṃ sakhe |
ato budhyeta bhillebhyaḥ ko 'py upāyaḥ kadācana || 38 ||
[Analyze grammar]

ityālocya savetālo rājā pallīṃ jagāma tām |
tatra sābharaṇaṃ dṛṣṭvā taṃ caurāḥ paryavārayan || 39 ||
[Analyze grammar]

kiratāṃ śaravarṣāṇi teṣāṃ pañcaśatāni ca |
bhūtaketuḥ sa vetālo rājādeśādabhakṣayat || 40 ||
[Analyze grammar]

śeṣāḥ palāyya gatvā tatsvasenāpataye 'bruvan |
ekākikesarī nāma sa cāgātsabalaḥ krudhā || 41 ||
[Analyze grammar]

bhṛtyasyaikasya ca mukhādbuddhvā pratyabhijānataḥ |
senāpatiḥ sa rājānametya jagrāha pādayoḥ || 42 ||
[Analyze grammar]

tato niveditātmānaṃ prahvaṃ pratyabhinandya tam |
pṛṣṭvā ca kuśalaṃ rājā senāpatim abhāṣata || 43 ||
[Analyze grammar]

mama kārpaṭiko bhuktvā phalaṃ karkaṭikāṃ vane |
gato 'jagaratāṃ tasya yuktiṃ tanmuktaye kuru || 44 ||
[Analyze grammar]

etadrājavacaḥ śrutvā senāpatir uvāca saḥ |
devānugo 'yaṃ matputrāyāsmai taṃ darśayatviti || 45 ||
[Analyze grammar]

tataḥ sa tena tatputro vetālena sahaitya mām |
oṣadhīrasanasyena pūrvavanmānuṣaṃ vyadhāt || 46 ||
[Analyze grammar]

upāgacchāma ca tato hṛṣṭā rājāntikaṃ vayam |
rājā ca tamudantaṃ māṃ pādānatamabodhayat || 47 ||
[Analyze grammar]

ekākikesarī so 'tha bhillasenāpatirnijam |
gṛhamabhyarthya rājānamanaiṣīdasmadanvitam || 48 ||
[Analyze grammar]

apaśyāma ca tattasya sadanaṃ śabarīvṛtam |
dantidantacitottuṅgabhitti vyāghracchadacchavi || 49 ||
[Analyze grammar]

vāsāṃsi barhipicchāni hārā guñjāphalasrajaḥ |
mātaṅgamadaniṣyando yatra strīṇāṃ ca maṇḍanam || 50 ||
[Analyze grammar]

tatra senāpaterbhāryā paricaryāṃ vyadhātsvayam |
rājño mṛgamadāmodivāsā muktādyalaṃkṛtā || 51 ||
[Analyze grammar]

snātabhuktastato rājā tatra vṛddhāṃstadātmajān |
senāpatiṃ ca taruṇaṃ dṛṣṭvā taṃ paripṛṣṭavān || 52 ||
[Analyze grammar]

senāpate mamāścaryamidaṃ tāvattvayocyatām |
taruṇastvaṃ tvadīyāstu putrā vṛddhā amī katham || 53 ||
[Analyze grammar]

evaṃ sa rājñā gaditaḥ śabarendro 'bravīdidam |
mahatyeṣā kathā deva śrūyataṃ yadi kautukam || 54 ||
[Analyze grammar]

candrasvāmīti vipro 'haṃ māyāpuryāṃ purāvasam |
so 'haṃ vanamagāṃ jātu dārvarthaṃ piturājñayā || 55 ||
[Analyze grammar]

tatra me markaṭo mārgam ruddhvātiṣṭhad abādhakṛt |
ārtena cakṣuṣā paśyan mārgam anyaṃ pradarśayan || 56 ||
[Analyze grammar]

na khādatyeṣa māṃ tāvattadgacchāmi varaṃ pathā |
etatpradarśyamānena paśyāmyasyāśayaṃ kapeḥ || 57 ||
[Analyze grammar]

ityālocyātha tenāhaṃ mārgeṇa prasthito 'bhavam |
sa ca me markaṭo 'gre 'gre prāyātpaśyanvivṛtya mām || 58 ||
[Analyze grammar]

gatvā ca dūramārohajjambūvṛkṣaṃ sa markaṭaḥ |
tatpṛṣṭhe ca latājālaghane dṛṣṭimadāmaham || 59 ||
[Analyze grammar]

latāvalayabaddhāṅgīmapaśyaṃ cātra vānarīm |
etadarthamanenāhamānīta iti cāvidam || 60 ||
[Analyze grammar]

tato 'haṃ vṛkṣamāruhya vallīvalayapāśakam |
chittvā paraśunā taṃ ca vānarīṃ tāmamocayam || 61 ||
[Analyze grammar]

athāvatīrya vṛkṣāttau vānaro vānarī ca sā |
avatīrṇasya me pādāvagṛhṇītāmubhāvapi || 62 ||
[Analyze grammar]

sthāpayitvā ca me pādalagnāṃ tāṃ vānarīṃ kṣaṇam |
gatvā sa kapirānīya mahyaṃ divyamadātphalam || 63 ||
[Analyze grammar]

tadādāya gṛhītvāhamindhanānyāgamaṃ gṛham |
tatra cābhakṣayaṃ bhāryāsahitastatphalottamam || 64 ||
[Analyze grammar]

tasmin bhukte jarārogau sabhāryasya gatau mama |
tatas tatrodabhūd asmaddeśe durbhikṣaviplavaḥ || 65 ||
[Analyze grammar]

tadākrāntaś ca tatratyo jano yāto yatas tataḥ |
ahaṃ daivād imaṃ deśaṃ sabhāryaḥ prāptavān kramāt || 66 ||
[Analyze grammar]

iha kāñcanadaṃṣṭrāskhyastadābhūcchabarādhipaḥ |
tasya śastram upādāya bhṛtyatāmahamāśrayam || 67 ||
[Analyze grammar]

āyodhaneṣu dṛṣṭvā ca teṣu teṣv agrayāyinam |
so 'tha kāñcanadaṃṣṭro māṃ senāpatye 'bhiṣiktavān || 68 ||
[Analyze grammar]

ekabhaktyā ca sa mayā tato 'pyārādhitaḥ prabhuḥ |
mahyamevāntakāle 'tra rājyaṃ prādādaputrakaḥ || 69 ||
[Analyze grammar]

ihasthasya ca me yātānyabdānām saptaviṃśatiḥ |
śatāni na jarā cāsti mama tatphalabhakṣaṇāt || 70 ||
[Analyze grammar]

evaṃ svodantamākhyāya sa rājānaṃ savismayam |
ekākikesarī bhūyo bhillarājo vyajijñapat || 71 ||
[Analyze grammar]

tanmayā vānaraphalādyatkṛtaṃ cirajīvitam |
pūrṇaṃ tato 'dya saṃprāptaṃ phalaṃ tvatpādadarśanam || 72 ||
[Analyze grammar]

ato 'hamarthaye deva yo gṛhāgamanānmayi |
darśito 'nugraho 'dyāyaṃ paritoṣaṃ sa nīyatām || 73 ||
[Analyze grammar]

bhāryāyāṃ kṣatriyāyāṃ me devotpannāsti kanyakā |
ananyatulyā rūpeṇa nāmnā madanasundarī || 74 ||
[Analyze grammar]

kanyāratnaṃ ca tad evādṛte nānyatra śobhate |
tat prayacchāmi tāṃ tubhyam udvahasva yathāvidhi || 75 ||
[Analyze grammar]

dāso 'haṃ ca dhanurlakṣadvayenānugataḥ prabho |
iti tenārthito rājā sa tathetyanvamanyata || 76 ||
[Analyze grammar]

śubhe lagne ca tāṃ tasya tanayāṃ pariṇītavān |
muktākastūrikābhārabhṛtoṣṭraśatadāyinaḥ || 77 ||
[Analyze grammar]

saptarātramuṣitvā ca rājā prasthitavāṃs tataḥ |
tayā madanasundaryā sabhillānīkayā saha || 78 ||
[Analyze grammar]

atrāntare 'śvāpahṛte rājñi tanmṛgayāvane |
sthitamasmadbalaṃ vignaṃ kṣattā bhadrāyudho 'bhyadhāt || 79 ||
[Analyze grammar]

alaṃ viṣādenāyāti nacirād eva vaḥ prabhuḥ |
nāsya divyaprabhāvasya kiṃcidatyahitaṃ bhavet || 80 ||
[Analyze grammar]

kiṃ na smaratha yadgatvā pātālātpariṇīya ca |
nāgakanyāṃ surūpākhyāmekakaḥ sa ihāgataḥ || 81 ||
[Analyze grammar]

gandharvalokaṃ gatvā ca vīraḥ pratyāgatas tataḥ |
tārāvalīm upādāya gandharvādhipakanyakām || 82 ||
[Analyze grammar]

ity uktvāśvāsitāḥ sarve tena bhadrāyudhena te |
atiṣṭhannaṭavīdvāre rājño mārgāvalokinaḥ || 83 ||
[Analyze grammar]

rājāpi spaṣṭamārgeṇa samaṃ śabarasainikaiḥ |
tasyāṃ madanasundaryāṃ prakrāmantyāṃ yathecchayā || 84 ||
[Analyze grammar]

prāviśatturagārūḍhaḥ savetālo mayā saha |
vanaṃ tatpūrvadṛṣṭasya varāhasya didṛkṣayā || 85 ||
[Analyze grammar]

praviṣṭasya ca tatrāgādvarāhas tasya so 'grataḥ |
dṛṣṭvaiva ca sa rājā tamavadhītpañcabhiḥ śaraiḥ || 86 ||
[Analyze grammar]

hatasya tasya dhāvitvā vetālena vidāritāt |
udarāddevi niragādakasmātsubhagaḥ pumān || 87 ||
[Analyze grammar]

ko bhavāniti yāvattaṃ rājā pṛcchati vismayāt |
jaṅgamādrinibhastāvadāgāttatra vanadvipaḥ || 88 ||
[Analyze grammar]

āpatantaṃ tamāraṇyaṃ rājā dṛṣṭvaiva kuñjaram |
ekenaiva pṛṣatkena marmāhatamapātayat || 89 ||
[Analyze grammar]

tasyāpi pāṭitāttena vetālenodarāntarāt |
puruṣo niragāddivyaḥ strī ca sarvāṅgasundarī || 90 ||
[Analyze grammar]

praṣṭukāmaṃ ca rājānaṃ varāhodaranirgataḥ |
sa pumānavadadrājansvodantaṃ śṛṇu vacmi te || 91 ||
[Analyze grammar]

āvāṃ devakumārau dvau bhadrākhyo 'yamahaṃ śubhaḥ |
tau bhramantāvapaśyāva kaṇvaṃ dhyānasthitaṃ munim || 92 ||
[Analyze grammar]

gajasūkarayo rūpamāvābhyāṃ krīḍayā kṛtam |
kṛtvā ca trāsito mohānmaharṣiḥ śapati sma nau || 93 ||
[Analyze grammar]

aṭavyāmīdṛśāveva bhavataṃ gajasūkarau |
vikramādityabhūpena hatau muktimavāpsyathaḥ || 94 ||
[Analyze grammar]

ityāvāṃ muniśāpena gajasūkaratāṃ gatau |
tvayādya mocitau strī tu svodantaṃ vaktviyaṃ svayam || 95 ||
[Analyze grammar]

etaṃ ca sūkaraṃ kaṇṭhe pṛṣṭe ca spṛśa vāraṇam |
kṛpāṇacarmaṇī divye tavaitau hi bhaviṣyataḥ || 96 ||
[Analyze grammar]

ity uktvā sadvitīyaḥ sa tiro 'bhūttau ca bhūpateḥ |
kroḍadvipau karaspṛṣṭau saṃpannau khaḍgacarmaṇī || 97 ||
[Analyze grammar]

tataḥ sā strī svavṛttāntaṃ pṛṣṭā saty evam abravīt |
bharyāhaṃ dhanadattākhyasyojjayinyāṃ vaṇikpateḥ || 98 ||
[Analyze grammar]

sā harmyatalasuptāhamāgatyānena dantinā |
nirgīyaivamihānītā na cāsyāntaḥ pumānabhūt || 99 ||
[Analyze grammar]

bhinnodarāttu niryātaḥ pumānasmānmayā saha |
evam uktavatīṃ rājā dīnāṃ tāmavadatstriyam || 100 ||
[Analyze grammar]

dhīrā bhava gṛhān bhartur bhavatīṃ prāpayāmy aham |
samaṃ madavarodhena gaccha prakamanirbhayā || 101 ||
[Analyze grammar]

ity uktvānāyayitvā tāṃ vetālena samarpayat |
rājñyai madanasundaryai prakrāmantyai pṛthakpathā || 102 ||
[Analyze grammar]

pratyāgate 'tha vetāle tatrāpaśyāva kānane |
akasmādrājakanye dve bhūribhavyaparicchade || 103 ||
[Analyze grammar]

ānāyayac ca māṃ preṣya tayo rājā mahattarān |
kutaḥ ke kanyake caite iti pṛṣṭāś ca te 'bruvan || 104 ||
[Analyze grammar]

asti dvīpaṃ kaṭāhākhyaṃ ketanaṃ sarvasaṃpadām |
anvarthanāmā tatrāsti nṛpatirguṇasāgaraḥ || 105 ||
[Analyze grammar]

tasyājani mahādevyāṃ nāmnā guṇavatī sutā |
nirmātureva dhāturyā rūpeṇāścaryadāyinī || 106 ||
[Analyze grammar]

tasyāś ca siddhair ādiṣṭaḥ saptadvīpeśvaraḥ patiḥ |
tataś ca tatpitā rājā so 'mantrayata mantribhiḥ || 107 ||
[Analyze grammar]

vikramādityadevo 'syā yogyo me duhiturvaraḥ |
tatpāṇigrahaṇāyaitāṃ tasyaiva preṣayāmy aham || 108 ||
[Analyze grammar]

iti saṃmantrya vahane jaladhau saparicchadām |
āropya sadhanāṃ tāṃ ca sa rājā vyasṛjatsutām || 109 ||
[Analyze grammar]

suvarṇadvīpanikaṭaṃ prāptaṃ daivānnyagīryata |
sarājakanyaṃ sajanaṃ vahanaṃ śaphareṇa tat || 110 ||
[Analyze grammar]

sa cābdhivelayā nītvā vidhigatyeva rodhasi |
kṣiptastaddvīpasaṃlagno mahāmatsyo 'vasannavān || 111 ||
[Analyze grammar]

dṛṣṭvaiva tatra dhāvitvā nānāpraharaṇo janaḥ |
vyāpādyāścaryamatsyasya tasyodaramapāṭayat || 112 ||
[Analyze grammar]

niragāc ca tataḥ pūrṇaṃ janaistadvahanaṃ mahat |
buddhvaitadvismayādāgāttatra taddvīpabhūpatiḥ || 113 ||
[Analyze grammar]

sa candraśekharo rājā guṇasāgarabhūbhṛtaḥ |
syālo janādvahanagādyathātattvamabudhyata || 114 ||
[Analyze grammar]

tato buddhvā guṇavatīṃ bhagineyīṃ sa tāṃ nṛpaḥ |
praveśya rājadhānīṃ svāmānandādutsavaṃ vyadhāt || 115 ||
[Analyze grammar]

anyedyuś ca sutāṃ candravatīṃ nāma sa bhūpatiḥ |
vikramādityadevāya dātuṃ prākparikalpitām || 116 ||
[Analyze grammar]

guṇavatya tayā sākaṃ tatkṛte vibhavottarām |
prāsthāpayatpravahaṇe sumuhūrte 'dhiropitām || 117 ||
[Analyze grammar]

te ime tīrṇajaladhī prakrāmantyau kramādiha |
rājakanye ubhe prāpte vayaṃ parikaro 'nayoḥ || 118 ||
[Analyze grammar]

iha prāptāṃś ca naḥ kroḍavāraṇāvabhyadhāvatām |
sumahāntau tato 'smābhir evamākranditaṃ prabho || 119 ||
[Analyze grammar]

āgate vikramādityadevasyaite svayaṃvare |
kanyake lokapālāstattasya dharmeṇa rakṣata || 120 ||
[Analyze grammar]

tac chrutvāvocatāṃ tau naḥ kroḍebhau vyaktayā girā |
dhīrā bhavata bhīrnāsti rājanāmagraheṇa vaḥ || 121 ||
[Analyze grammar]

ihaiva taṃ ca rājānamāgataṃ drakṣyathādhunā |
ity uktvā tau gajakroḍau divyau kaucidito gatau || 122 ||
[Analyze grammar]

eṣo 'smadīyavṛttānta ity ukte tair mahattaraiḥ |
ayaṃ sa eva rājeti devi tānaham abravam || 123 ||
[Analyze grammar]

tatas te pādapatitā hṛṣṭāste rājakanyake |
tasmai guṇavatīcandravatyau rājñe samarpayan || 124 ||
[Analyze grammar]

rājāpyādiśya vetālaṃ sundaryau te anāyayat |
sārdhaṃ madanasundaryā samaṃ tisro 'pi yāntiti || 125 ||
[Analyze grammar]

svayaṃ ca tena vetālenāgatena tataḥ kṣaṇāt |
mayā ca sahitaḥ prāyadutpatehnaiva devi saḥ || 126 ||
[Analyze grammar]

gacchatāṃ ca vane 'smākaṃ ravirastam upāgamat |
tatkālaṃ tatra cāsmābhir aśrāvi murajadhvaniḥ || 127 ||
[Analyze grammar]

kuto murajaśabdo 'yasmiti rājani pṛcchati |
vetālaḥ so 'bravīddevakulaṃ devātra vidyate || 128 ||
[Analyze grammar]

divyakautūhalaṃ tac ca nirmitaṃ viśvakarmaṇā |
tatraiṣa murajadhvānaḥ saṃdhyāprekṣaṇake prabho || 129 ||
[Analyze grammar]

ity uktavān sa vetālo rājā cāhaṃ ca kautukāt |
tatrāgacchāma saṃyamya turagaṃ praviśāma ca || 130 ||
[Analyze grammar]

apaśyāmārcitaṃ cātra tārkṣyaratnamayaṃ mahat |
liṅgaṃ tadagre codagradīpakaṃ prekṣaṇīyakam || 131 ||
[Analyze grammar]

anṛtyansuciraṃ tatra divyarūpā varastriyaḥ |
caturvidhena vādyena gānagāndharvayoginā || 132 ||
[Analyze grammar]

prekṣyānte dṛṣṭamasmābhistatrāścaryaṃ praviśya yat |
stambhasthaputrikāsvantarnartakyo layamāgatāḥ || 133 ||
[Analyze grammar]

gāyanā vādakādyāś ca citrasthapuruṣeṣv api |
taddṛṣṭvā vismite rājñi sa vetālo 'bravīdidam || 134 ||
[Analyze grammar]

māyeyamīdṛśī divya viśvakarmakṛtākṣayā |
satataṃ hi bhavatyetatsaṃdhyayor ubhayor api || 135 ||
[Analyze grammar]

ity ukte tena tatrāntarbhramantau vayamekataḥ |
saviśeṣamapaśyāma rūpeṇa stambhaputrikām || 136 ||
[Analyze grammar]

rājā tu tāṃ vilokyaiva tallāvaṇyavimohitaḥ |
śūnyaḥ stabdhaḥ kṣaṇaṃ so 'pi stambhotkīrṇa ivābhavat || 137 ||
[Analyze grammar]

abravīc ca na paśyāmi rūpeṇānena cedaham |
sajīvāmaṅganāṃ tanme kiṃ rājyaṃ kiṃ ca jīvitam || 138 ||
[Analyze grammar]

etac chrutvā sa vetālo 'vādīnnaitaddurāsadam |
kaliṅgasenā nāmāsti kaliṅgādhipateḥ sutā || 139 ||
[Analyze grammar]

tāṃ dṛṣṭvā rūpakāreṇa tadrūpahaṭanepsunā |
vardhamānapurīyeṇa kṛteyaṃ sālabhañjikā || 140 ||
[Analyze grammar]

tadgatvojjayinīṃ tasmātkāliṅgānnṛpateḥ prabho |
tāmarhayasva tatkanyāṃ vikrameṇa harāthavā || 141 ||
[Analyze grammar]

iti vetālavacanaṃ nyadhādrājā tathā hṛdi |
tato nītvātra tāṃ rātriṃ prātaḥ saṃprasthitā vayam || 142 ||
[Analyze grammar]

yāntaścāśokavṛkṣasya tale 'paśyāma pūruṣau |
bhavyau dvau tau ca rājānamutthāyānamatāṃ tataḥ || 143 ||
[Analyze grammar]

kau yuvāṃ kimaraṇyasthāviti rājñoktayostayoḥ |
eko vakti sma devaitacchrūyatāṃ kathayāmy aham || 144 ||
[Analyze grammar]

dhanadattābhidhāno 'ham ujjayinyāṃ vaṇiksutaḥ |
so 'haṃ harmyatale jātu saṃsupto bhāryayā saha || 145 ||
[Analyze grammar]

prātaḥ prabudhya paśyāmi yāvat sā tatra nāsti me |
bhāryā harmye na cānyeṣu prāsādopavanādiṣu || 146 ||
[Analyze grammar]

na tasyāścittamanyādṛkḷpto 'tra pratyayas tathā |
yadi sādhvyasmi tadiyaṃ na mlāyeddhruvamityasau || 147 ||
[Analyze grammar]

mālā mahyaṃ tayā dattā sā cāmlānaiva vartate |
tan na jāne kva yātā sā nīta bhūtādinā nu kim || 148 ||
[Analyze grammar]

iti saṃcintayaṃścinvannākrandanvilapanrudan |
atiṣṭhaṃ tadviyogāgnijvalito 'hamabhojanaḥ || 149 ||
[Analyze grammar]

bāndhavāśvāsitaḥ kiṃcit kṛtāhāro 'tha duḥkhitaḥ |
brāhmaṇān bhojayann āsaṃ devāgāre kṛtasthitiḥ || 150 ||
[Analyze grammar]

tatra jātu pariśrānto vipro māmayam abhyadhāt |
mayā viśramitaścāyaṃ snānāhārādinā tadā || 151 ||
[Analyze grammar]

kutas tvam iti pṛṣṭaś ca bhuktottaram asau mayā |
vārāṇasīsamīpasthād grāmād asmīty abhāṣata || 152 ||
[Analyze grammar]

madbhṛtyākyātamad duḥkhas tata eṣo 'bravīt punaḥ |
ātmāvasādito mittra kimanudyoginā tvayā || 153 ||
[Analyze grammar]

vyavasāyī hi duṣprāpamati prāpnoti tatsakhe |
uttiṣṭha tava bhāryāṃ tāmanviṣyāvaḥ sakhāsmi te || 154 ||
[Analyze grammar]

kathaṃ sānviṣyate yasyā diṅmātraṃ naiva budhyate |
ity uktavantamatha māṃ prītyā bhūyo 'bravīdayam || 155 ||
[Analyze grammar]

maiva kiṃ kesaṭo na prāgasaṃbhāvyasamāgamām |
prāpa rūpavatīṃ bhāryāṃ tathā caitatkathāṃ śṛṇu || 156 ||
[Analyze grammar]

pure pāṭaliputre 'bhūddhanāḍhyabrāhmaṇātmajaḥ |
kesaṭākhyo dvijayuvā rūpe kāma ivāparaḥ || 157 ||
[Analyze grammar]

sa bhāryāṃ sadṛśīṃ prepsuḥ pitroravidito gṛhāt |
nirgatya deśān babhrāma tāṃs tāṃs tīrthāpadeśataḥ || 158 ||
[Analyze grammar]

kramāc ca narmadātīraṃ prāpto jātu dadarśa saḥ |
mahāntamāgataṃ tena janyayātrājanaṃ pathā || 159 ||
[Analyze grammar]

dṛṣṭvā ca dūrāt tanmadhyād etyaikas taṃ dvijāgraṇīḥ |
saṃbhāṣya kesaṭaṃ vṛddhaḥ prāha sapraṇayaṃ rahaḥ || 160 ||
[Analyze grammar]

tvatto 'hamarthaye kiṃcil līlāsādhyaṃ ca tat tava |
mama tūpakṛtiḥ pūrṇā karoṣi yadi vacmi tat || 161 ||
[Analyze grammar]

tac chrutvā kesaṭo 'vādīdārya śakyaṃ bravīṣi cet |
tanniścitaṃ mayā kāryaṃ bhavatūpakṛtistava || 162 ||
[Analyze grammar]

tato vṛddhadvijo 'vādīcchṛṇu putrāsti te sutaḥ |
sa cāgraṇīrvirūpāṇāṃ surūpāṇāṃ bhavāniva || 163 ||
[Analyze grammar]

danturaścipiṭaghrāṇaḥ kṛṣṇaḥ kātaralocanaḥ |
pṛthūdaro vakrapādaḥ śūrpakarṇapuṭaś ca saḥ || 164 ||
[Analyze grammar]

tādṛśasya kṛte snehātkṛtvā rūpābhivarṇanam |
brāhmaṇādratnadattākhyātkanyakā yācitā mayā || 165 ||
[Analyze grammar]

sā ca rūpavatī nāma pitrā dātuṃ pratiśrutā |
tenānvarthābhidhā tasmai so 'dya pāṇigrahastayoḥ || 166 ||
[Analyze grammar]

tadarthamāgatā ete vayaṃ dṛṣṭe ca matsute |
na saṃbandhī sutāṃ dadyādārambho 'yaṃ vṛthā bhavet || 167 ||
[Analyze grammar]

upāyaṃ dhyāyatā cātra mayā labdho bhavāniha |
tadvācā pratipannaṃ drāgidaṃ me vāñchitaṃ kuru || 168 ||
[Analyze grammar]

asmābhiḥ samamāgatya kanyāṃ tāṃ pariṇīya ca |
matputrāya prayacchādya vadhvāstvaṃ hy anurūpakaḥ || 169 ||
[Analyze grammar]

tac chrutvā taṃ tathety uktavantamādāya kesaṭam |
naubhiḥ sa narmadāṃ tīrtvā pāraṃ vṛddhadvijo yayau || 170 ||
[Analyze grammar]

prāpya caikaṃ puraṃ so 'tha vyaśramatsānugo bahiḥ |
ākāśapathiko 'stādrau tāvadarko 'py upāviśat || 171 ||
[Analyze grammar]

prasarpati tato dhvānte jalopānte sa kesaṭaḥ |
upaspraṣṭuṃ gato 'drakṣīdrākṣasaṃ ghoramutthitam || 172 ||
[Analyze grammar]

bhakṣayāmy ahameṣa tvāṃ kva me kesaṭa yāsyasi |
ity uktavantaṃ ca sa taṃ rākṣasaṃ kesaṭo 'bhyadhāt || 173 ||
[Analyze grammar]

mā sma māṃ bhakṣayestāvattvām upaiṣyāmyahaṃ punaḥ |
brāhmaṇasya pratijñātaṃ kāryaṃ nirvāhya niścitam || 174 ||
[Analyze grammar]

tac chrutvā kārayitvā ca śapathaṃ so 'tha rākṣasaḥ |
mumoca kesaṭaṃ so 'pi tajjanyabalakaṃ yayau || 175 ||
[Analyze grammar]

tataḥ sa vṛddhaviprastaṃ varamaṇḍanamaṇḍitam |
ādāya kesaṭaṃ janyaiḥ samaṃ tatprāviśatpuram || 176 ||
[Analyze grammar]

tatra sajjitavedīkaṃ ratnadattagṛhaṃ ca saḥ |
prāveśayat kesaṭaṃ taṃ vividhātodyanāditam || 177 ||
[Analyze grammar]

kesaṭaś ca sa tāṃ samyagupayeme varānanām |
kanyāṃ rūpavatīṃ tatra pitrā prattamahādhanām || 178 ||
[Analyze grammar]

nananda strījanaścātra tulyau vīkṣya vadhūvarau |
sā ca rūpavatī prāptaṃ dṛṣṭvā taṃ tādṛśaṃ varam || 179 ||
[Analyze grammar]

tasyāḥ sakhyo 'pi taṃ dṛṣṭvā jajñire jātamanmathāḥ |
viṣādavismayākrāntaḥ sa tvāsītkesaṭastadā || 180 ||
[Analyze grammar]

rātrau ca śayanīye taṃ cintāsaktaṃ parāṅmukham |
priyaṃ rūpavatīṃ dṛṣṭvā vyājasuptaṃ cakāra sā || 181 ||
[Analyze grammar]

niśīthe so 'tha suptāṃ tāṃ matvā nirgatya kesaṭaḥ |
rākṣasasyāntikaṃ tasya satyaṃ pālayituṃ yayau || 182 ||
[Analyze grammar]

sāpi rūpavatī svair amutthāyānyupalakṣitā |
sakautukā taṃ bhartāramanviyāya pativratā || 183 ||
[Analyze grammar]

prāptaṃ ca kesaṭaṃ tatra rākṣasaḥ sa jagāda tam |
sādhu bhoḥ pālitaṃ satyaṃ mahāsattvo 'si kesaṭa || 184 ||
[Analyze grammar]

puraṃ pāṭaliputraṃ taddesaṭaś ca pitā tvayā |
pavitritastadāyāhi yāvattvāṃ bhakṣayāmy aham || 185 ||
[Analyze grammar]

tac chrutvā sahasopetya rūpavaty abhyadhād idam |
māṃ khāda bhakṣite hy asmin patyau kā me gatir bhavet || 186 ||
[Analyze grammar]

bhikṣā te gatirity ukte rakṣasā sāpy uvāca tam |
ko me bhikṣāṃ mahāsattva dāsyatīha striyā iti || 187 ||
[Analyze grammar]

yo na dāsyati bhikṣāṃ te yācitas tasya yāsyati |
śatadhā śira ity ukte rākṣasena ca sābravīt || 188 ||
[Analyze grammar]

tarhi tvam eva me dehi bhartṛbhikṣāmimāmiti |
adadac ca mamārāśu śīrṇamūrdhā sa rākṣasaḥ || 189 ||
[Analyze grammar]

sātha kesaṭamādāya taccāritrātivismitam |
āgādrūpavatī veśma tāvac cākṣīyata kṣapā || 190 ||
[Analyze grammar]

śvobhūte ca kṛtāhāraṃ tajjanyabalakaṃ tataḥ |
prasthāya narmadātīraṃ saṃprāpa savadhūvaram || 191 ||
[Analyze grammar]

tato vadhūṃ rūpavatīṃ nāvamāropya sānugām |
sa mukhyavṛddhavipro 'nyāṃ nāvamārohadātmanā || 192 ||
[Analyze grammar]

kesaṭaṃ tu pṛthaṅnāvi svīkṛtyābharaṇādi saḥ |
āropayacchaṭhaḥ kṛtvā nāvikaiḥ saha saṃvidam || 193 ||
[Analyze grammar]

tataḥ sa savadhūjanyaḥ pāraṃ tīrtvā yayau dvijaḥ |
nadīmadhyena dūraṃ tu dāśair ninye sa kesaṭaḥ || 194 ||
[Analyze grammar]

tatra kṣiptvā mahatyoghe nāvaṃ tāṃ kesaṭaṃ ca te |
vṛddhadvijādāttadhanā bāhutīrṇāpagā yayuḥ || 195 ||
[Analyze grammar]

kesaṭastu sanauko 'pi nadyā hṛtvottaraṅgayā |
kṣipto 'mbudhau vātavaśānnyasto 'bhūdūrmiṇā taṭe || 196 ||
[Analyze grammar]

tatrāyuṣaḥ saśeṣatvātsamāśvasya vyacintayat |
aho pratyupakāro 'yaṃ kṛtastena dvijena me || 197 ||
[Analyze grammar]

kiṃ vā tenaiva nākhyātā tasya nirdharmamūrkhata |
yunakti bhāryayā putraṃ pareṇa pariṇāyya yat || 198 ||
[Analyze grammar]

iti saṃcintayanyāvadāste tatra sa vihvalaḥ |
vicaratkhecarīcakrā tāvattasyāyayau kṣapā || 199 ||
[Analyze grammar]

tasyāṃ vinidras turye sa yāme kalakalaṃ divi |
śrutvā dadarśa subhagaṃ khādbhraṣṭaṃ puruṣaṃ puraḥ || 200 ||
[Analyze grammar]

trastaścirādavikṛtaṃ taṃ vibhāvya sa kesaṭaḥ |
ko bhavāniti papraccha tatas taṃ so 'bravītpumān || 201 ||
[Analyze grammar]

tvaṃ me brūhi bhavān ko 'tra tato vakṣyāmy ahaṃ tava |
tac chrutvā kesaṭas tasmai svavṛttān tam avarṇayat || 202 ||
[Analyze grammar]

tataḥ sa puruṣo 'vādīttulyāvastho 'si tarhi me |
tadidānīṃ svavṛttāntaṃ tava vacmi sakhe śṛṇu || 203 ||
[Analyze grammar]

asti veṇānadītīre puraṃ ratnapurākhyayā |
tatra kaṃdarpanāmāhamāḍhyaputro gṛhī dvijaḥ || 204 ||
[Analyze grammar]

so 'haṃ pradoṣe toyārthī veṇāmavatarannadīm |
tasyāṃ skhalitvā patito vāryogheṇa hṛto 'bhavam || 205 ||
[Analyze grammar]

dūraṃ nītvā tayā rātryā tenāhaṃ ca dināgame |
āyurbalātkacchagate tarukhaṇḍe niveśitaḥ || 206 ||
[Analyze grammar]

śākhāvalambenāruhya rodhasyāśvasya cāntike |
mātṛdevagṛhaṃ śūnyaṃ tatrāpaśyam ahaṃ mahat || 207 ||
[Analyze grammar]

tasmin praviśya dṛṣṭvāntaḥ sphurantīriva tejasā |
mātṝr ahaṃ śāntabhayo natvā stutvā vyajijñapam || 208 ||
[Analyze grammar]

bhagavatyaḥ paritrāṇaṃ kurudhaṃ kṛpaṇasya me |
ahameṣa hi yuṣmākaṃ prāpto 'dya śaraṇāgataḥ || 209 ||
[Analyze grammar]

iti vijñapya nadyoghaparikliṣṭasya tatra me |
viśrāmyataḥ śanair mittraṃ viśrāntiṃ vāsaro 'py agāt || 210 ||
[Analyze grammar]

āgāttārāsthimālāḍhyā jyotsnābhūtisitā tataḥ |
śaśiśubhrakapālā ca raudrī rajanitāpasī || 211 ||
[Analyze grammar]

tatkālaṃ cātra jānāmi tato mātṛgaṇāntarāt |
nirgatya yoginīgrāmaḥ parasparam abhāṣata || 212 ||
[Analyze grammar]

adya cakrapure 'smābhir gantavyaṃ cakramelake |
iha ca śvāpadākīrṇe rakṣāsya brāhmaṇasya kā || 213 ||
[Analyze grammar]

tad eṣa sthāpyatāṃ nītvā yatraitasya śubhaṃ bhavet |
āneṣyāmaḥ punaś cainam eṣo 'smāñ śaraṇaṃ śritaḥ || 214 ||
[Analyze grammar]

ity uktvā khena nītvā māmalaṃkṛtya nidhāya ca |
pure kvāpi gṛhe kasyāpyāḍhyaviprasya tā gatāḥ || 215 ||
[Analyze grammar]

tatra paśyāmi yāvac ca kanyodvāhāya sajjitā |
vedo lagnaś ca saṃprāpto na janyabalakaṃ punaḥ || 216 ||
[Analyze grammar]

tatas tatra sthitaṃ divyavaraveṣaṃ vilokya mām |
ayaṃ tāvadvaraḥ prāpta iti sarvo 'bravījjanaḥ || 217 ||
[Analyze grammar]

tato nītvaiva māṃ vedīm ānīyālaṃkṛtāṃ sutām |
gṛhastho 'tra sa viprastāṃ mahyaṃ prādādyathāvidhi || 218 ||
[Analyze grammar]

diṣṭyā tulyavaraprāpterasyāḥ sumanaso 'dhunā |
saundaryaṃ saphalībhūtamityanyonyaṃ striyo 'bhyadhuḥ || 219 ||
[Analyze grammar]

tataḥ kṛtavivāho 'tra tayā sumanasā saha |
mahopacārasukhitaḥ prāsāde suptavānaham || 220 ||
[Analyze grammar]

athāsmin paścime yāme yoginyaś cakramelakat |
āgatya tāḥ svayuktyā māṃ hṛtvaivodapatan nabhaḥ || 221 ||
[Analyze grammar]

yāntīnāṃ nabhasā tāsāmanyābhir majjihīrṣubhiḥ |
sākaṃ pravṛttayuddhānāmahaṃ hastādiha cyutaḥ || 222 ||
[Analyze grammar]

na ca tadvedmi nagaraṃ yatra sā sumanā mayā |
pariṇītā na jāne ca kimidānīṃ bhaviṣyati || 223 ||
[Analyze grammar]

ityeṣa vidhinā dattā yā me duḥkhaparamparā |
sā sukhāntaiva saṃpannā mamādya tvatsamāgamāt || 224 ||
[Analyze grammar]

ity uktavantaṃ kaṃdarpaṃ kesaṭas tam uvāca saḥ |
mā bhaiṣīrmittra nedānīṃ yoginyaḥ prabhavanti te || 225 ||
[Analyze grammar]

asti me tādṛśī śaktiḥ kāpyapratihatā yataḥ |
sahaiva ca bhramiṣyāvo vidhiḥ śreyo vidhāsyati || 226 ||
[Analyze grammar]

anyonyaṃ vadatorevaṃ vyatītāya tayor niśā |
prātas tatraḥ prayātaḥ sma tau ca tīrṇāmbudhī ubhau || 227 ||
[Analyze grammar]

kramād bhīmapuraṃ nāma nagaraṃ prāpatuś ca tau |
saha kesaṭakaṃdarpau ratnanadyāḥ samīpagam || 228 ||
[Analyze grammar]

tatra tau tan nadītīre śrutvā kalakalaṃ tadā |
gatvā dadṛśaturmatsyamāpūritataṭadvayam || 229 ||
[Analyze grammar]

samudravelayā kṣiptaṃ baddhaṃ kāyamahattayā |
māṃsārthibhiḥ pāṭyamānaṃ nānāśastrakarair janaiḥ || 230 ||
[Analyze grammar]

pāṭyamānasya niragādudarāttasya cāṅganā |
sāścaryajanadṛṣṭā ca sā bhītāśiśriyattaṭam || 231 ||
[Analyze grammar]

tatastāṃ vīkṣya kaṃdarpo hṛṣṭo 'bhāṣata kesaṭam |
vayasya seyaṃ sumanā yāmahaṃ pariṇītavān || 232 ||
[Analyze grammar]

na jāne punaretasyā vāso matsyodare katham |
tattūṣṇīmiha tiṣṭhāvo yāvadvyaktirbhaviṣyati || 233 ||
[Analyze grammar]

tatheti kesaṭenokte tatrāvasthitayostayoḥ |
kā tvaṃ kimetaditi sā pṛṣṭābhūtsumanā janaiḥ || 234 ||
[Analyze grammar]

tataḥ kṛcchreṇa sāvādīdahaṃ ratnākare pure |
jayadattābhidhānasya vipracūḍāmaṇeḥ sutā || 235 ||
[Analyze grammar]

sumanā iti nāmnāsmi sāhaṃ bhavyena kenacit |
pariṇītānurūpeṇa niśi brāhmaṇasūnunā || 236 ||
[Analyze grammar]

tadrātrāveva suptāyā gataḥ kvāpi sa me patiḥ |
yatnānviṣṭo 'pi matpitra na ca prāptaḥ kuto 'pi saḥ || 237 ||
[Analyze grammar]

tato 'smi patitā nadyāṃ tadviyogāgniśāntaye |
nigīrṇānena matsyena saṃprāpteha vidhervaśāt || 238 ||
[Analyze grammar]

iti tāṃ vādinīmevaṃ nirgatya janamadhyataḥ |
āśliṣya yajñasvāmīti vipra eko 'bravīdidam || 239 ||
[Analyze grammar]

ehyehi putri bhavati bhaginīduhitā mama |
yajñasvāmīti hi bhrātā sodaryo māturasmi te || 240 ||
[Analyze grammar]

tac chrutvā mukhamudghāṭya sumanāstamavekṣya sā |
mātulaṃ pratyabhijñāya sāsrā jagrāha pādayoḥ || 241 ||
[Analyze grammar]

kṣaṇaṃ tyaktvāśru cāvādīttaṃ tu kāṣṭhāni dehi me |
āryaputraviyuktāyā agreranyā na me gatiḥ || 242 ||
[Analyze grammar]

bodhyamānāpi sā asmānniścayāsnna cacāla yat |
tatparīkṣitataccittaḥ kaṃdarpastām upāyayau || 243 ||
[Analyze grammar]

tam upāgatam ālokya pratyabhijñāya dhīmatī |
sumanāḥ pādayos tasya patitvā praruroda sā || 244 ||
[Analyze grammar]

janena pṛcchyamānā ca tena sā mātulena ca |
ayaṃ sa mama bharteti nijagāda manasvinī || 245 ||
[Analyze grammar]

tataḥ sarveṣu hṛṣṭeṣu yajñasvāmī nināya tām |
svagṛhaṃ tatpatiṃ taṃ ca kaṃdarpaṃ kesaṭānvitam || 246 ||
[Analyze grammar]

tatra tānvarṇitasvasvavṛttāntānsakuṭumbakaḥ |
upacāreṇa mahatā prītyā paricacāra saḥ || 247 ||
[Analyze grammar]

gateṣv ahaḥsu kaṃdarpaṃ kesaṭo 'tra jagāda tam |
abhīṣṭabhāryāprāptyā tvaṃ prāptastāvatkṛtārthatām || 248 ||
[Analyze grammar]

tatsabhāryo 'dhunā gaccha nijaṃ ratnapuraṃ puram |
akṛtārtho gamiṣyāmi na svadeśamahaṃ punaḥ || 249 ||
[Analyze grammar]

tīrthānyeva bhramandehaṃ kṣapayiṣyāmyamuṃ sakhe |
tac chrutvā kesaṭaṃ yajñasvāmī tatra sthito 'vadat || 250 ||
[Analyze grammar]

kimudvegādvadasyevaṃ sarvaṃ jīvadbhir āpyate |
kusumāyudhavṛttāntaṃ tathā ca śṛṇu vacmi te || 251 ||
[Analyze grammar]

devasvāmītyabhūccaṇḍapurākhye nagare dvijaḥ |
tasyātirūpā kanyābhūnnāmnā kamalalocanā || 252 ||
[Analyze grammar]

śiṣyaś ca vipraputro 'bhūnnāmnāsya kusumāyudhaḥ |
sa śiṣyaḥ sā ca tatkanyā prītāvāstāṃ parasparam || 253 ||
[Analyze grammar]

ekadā niścitā dātuṃ pitrānyasmai varāya sā |
kanyā sakhīmukenāśu taṃ smāha kusumāyudham || 254 ||
[Analyze grammar]

tāto maṃ dātumanyasmai pratipanno bhavāṃś ca me |
pūrvasaṃkalpito bhartā tadyuktyā hara māmitaḥ || 255 ||
[Analyze grammar]

tato 'syāḥ so 'parahāya kṛtasaṃvidbahirniśi |
asthāpayadvegasarīṃ bhṛtyaṃ ca kusumāyudhaḥ || 256 ||
[Analyze grammar]

svair aṃ nirgatya cārūḍhā tasyāṃ bhṛtyena tena sā |
na tasya nikaṭaṃ ninye ninye svīkartumanyataḥ || 257 ||
[Analyze grammar]

dūraṃ nītā ca sā tena rātrau kamalalocanā |
prāpyaikaṃ nagaraṃ prātastamāha sma ca sā satī || 258 ||
[Analyze grammar]

tvatsvāmī kva sa madbhartā taṃ prāpayasi kiṃ na mām |
tac chrutvā sa śaṭho 'vādīdekikāṃ tāṃ videśagām || 259 ||
[Analyze grammar]

ahaṃ tvāṃ pariṇeṣyāmi kiṃ tena sa kuto 'dhunā |
śrutvaitatsābravītprājñā tvaṃ hi me sutarāṃ priyaḥ || 260 ||
[Analyze grammar]

tatastāṃ nagarodyāne sthāpayitvaiva durmatiḥ |
sa vivāhopakaraṇaṃ jagāmānetumāpaṇam || 261 ||
[Analyze grammar]

tāvat palāyya gatvā sā kanyā vegasarīyutā |
mālākārasya kasyāpi vṛddhasya prāviśadgṛham || 262 ||
[Analyze grammar]

tatroktanijavṛttāntā tasthau sā tena satkṛtā |
so 'py aprāpya kubhṛtyastāmudyānādvimukho yayau || 263 ||
[Analyze grammar]

gatvā covāca pṛcchantaṃ prabhuṃ taṃ kusumāyudham |
ṛjustvaṃ vetsi na strīṇāṃ kuṭilānāṃ hi ceṣṭitam || 264 ||
[Analyze grammar]

naiva sā niragāttāvaddṛṣṭo yāvadahaṃ janaiḥ |
tatrānyaistair avaṣṭabdho hṛtā vegasarī ca sā || 265 ||
[Analyze grammar]

daivātkathaṃcidadhunā palāyyāhamihāgataḥ |
tac chrutvā vimṛśaṃstūṣṇīmāsītsa kusumāyudhaḥ || 266 ||
[Analyze grammar]

ekadā preritaḥ pitrā vivāhāya vrajaṃś ca saḥ |
tatprāpa nagaraṃ yatra sthitā kamalalocanā || 267 ||
[Analyze grammar]

tatrāvāsitajanyaughamudyāne nikaṭasthite |
ekaṃ bhramantaṃ kamalalocanā sā dadarśa tam || 268 ||
[Analyze grammar]

śaśaṃsa mālākārāya tasmai sā yadgṛhe sthitā |
so 'pi gatvoktavṛttāntastaṃ tasyāḥ patimānayat || 269 ||
[Analyze grammar]

tatsaṃbhṛtopakaraṇas tataḥ sucirakāṅkṣitaḥ |
varavadhvostayoḥ sadyo vivāho niravartata || 270 ||
[Analyze grammar]

atha taṃ pāpabhṛtyaṃ sa nigṛhya kusumāyudhaḥ |
pariṇīyāpi kamalalocanāprāptikāraṇam || 271 ||
[Analyze grammar]

dvitīyām apikanyāṃ tāṃ yadvivāhārthamāgamat |
tābhyāṃ vadhūbhyāṃ sahito hṛṣṭaḥ svaṃ deśamāyayau || 272 ||
[Analyze grammar]

itthaṃ bhavati bhavyānāmacintyo 'pi samāgamaḥ |
tatkesaṭa tvam apy evamacirātprāpsyasi priyām || 273 ||
[Analyze grammar]

evaṃ tenodite yajñasvāminā tasthurasya te |
kanyapyahāni kaṃdarpasumanaḥkesaṭā gṛhe || 274 ||
[Analyze grammar]

prasthitāś ca svadeśaṃ te tataḥ prāpya mahāṭavīm |
jajñire 'nyonyavibhraṣṭā vanyebhāpātasaṃbhramāt || 275 ||
[Analyze grammar]

teṣāṃ sa kesaṭo gacchannekākī duḥkhitaḥ kramāt |
prāpya kāśipurīṃ mittraṃ kaṃdarpaṃ prāptavāṃs tataḥ || 276 ||
[Analyze grammar]

tena sākaṃ yayau tac ca nijaṃ pāṭaliputrakam |
pitrābhinanditas tatra kaṃcitkālamuvāsa saḥ || 277 ||
[Analyze grammar]

avarṇayadrūpavatīvivāhaprabhṛti svakam |
kaṃdarpodantaparyantaṃ pitrorvṛttāntamatra saḥ || 278 ||
[Analyze grammar]

atrāntare sā sumanā hastibhītipalāyitā |
vanaṃ viveśa tatrāyā yayau cāstaṃ divākaraḥ || 279 ||
[Analyze grammar]

hā hāryaputra hā tāta hāmbetyatra niśāgame |
śocantī dāvadahane kṣeptuṃ tanumiyeṣa sā || 280 ||
[Analyze grammar]

tāvattadyoginīcakraṃ kaṃdarpasya kṛpāparam |
yoginīstā vijityānyāstatprāpāyatanaṃ nijam || 281 ||
[Analyze grammar]

tatra saṃsmṛtya kaṃdarpaṃ svavijñānād avetya ca |
bhāryāṃ tasya vane bhraṣṭāṃ mantrayāṃcakrire ca tāḥ || 282 ||
[Analyze grammar]

kaṃdarpaḥ puruṣo dhīro vāñchitaṃ prāpnuyātsvayam |
tadbhāryā tu vane bhraṣṭā dhruvaṃ bālā tyajedasūn || 283 ||
[Analyze grammar]

tattāṃ ratnapuraṃ nītvā kṣipāmo yena tatra sā |
kaṃdarpasya piturgehe sapatnya saha tiṣṭhati || 284 ||
[Analyze grammar]

iti saṃmantrya gatvā tadvanamāśvāsya cātra tām |
yoginyastāḥ sumanasaṃ nītvā ratnapure jahuḥ || 285 ||
[Analyze grammar]

gatāyāṃ niśi sā tatra bhramantī sumanāḥ pure |
ucyamānaṃ janenedaṃ śuśrāva paridhāvatā || 286 ||
[Analyze grammar]

eṣānaṅgavatī bhāryā kaṃdarpasya dvijanmanaḥ |
patyau kvāpi gate kālaṃ kaṃcit tatprāptivāñchayā || 287 ||
[Analyze grammar]

sthitā sādhvī tam aprāpya nirāśā nirgatādhunā |
agniṃ praveṣṭuṃ duḥkhibhyāṃ śvaśurābhyām anudrutā || 288 ||
[Analyze grammar]

etac chrutvaiva sumanā taccitāsthānamāśu sā |
gatvānaṅgavatīmevaṃ tām upetya nyavārayat || 289 ||
[Analyze grammar]

ārye mā sāhasaṃ kārṣīḥ sa hi jīvati te patiḥ |
ity uktvā mūlataḥ kṛtsnaṃ tadvṛttāntaṃ śaśaṃsa sā || 290 ||
[Analyze grammar]

adarśayac ca kaṃdarpadattaṃ ratnāṅgulīyakam |
tataḥ sarve 'bhyanandaṃstāṃ satyaṃ vijñāya tadvacaḥ || 291 ||
[Analyze grammar]

athānaṅgavatīṃ tuṣṭāṃ vadhūṃ sumanasaṃ ca tām |
saṃpūjya kaṃdarpapitā gṛhe tuṣṭo nyaveśayat || 292 ||
[Analyze grammar]

tāvat sa sumanaḥprāptyai bhrāntuṃ pāṭaliputrakāt |
kaṃdarpo 'nicchato 'nuktvā kesaṭasya yayau tataḥ || 293 ||
[Analyze grammar]

kesaṭo 'pi gate tasminduḥkhī rūpavatīṃ vinā |
gṛhādaviditaḥ pitroḥ prāyādbhrāntumitas tataḥ || 294 ||
[Analyze grammar]

kaṃdarpo 'pi bhramandaivāttatprāpa nagaraṃ kila |
yatra rūpavatīṃ tāṃ sa kesaṭaḥ pariṇītavān || 295 ||
[Analyze grammar]

janakolāhalaṃ śrutvā kimetaditi tatra tam |
kaṃdarpaṃ paripṛcchantaṃ pumāneko 'bravīdidam || 296 ||
[Analyze grammar]

eṣā rūpavatī bhartrā kesaṭena vinodyatā |
martuṃ kalakalastena śṛṇu vṛttāntamatra ca || 297 ||
[Analyze grammar]

ity uktyā kesaṭodvāharākṣasodantakautukam |
rūpavatyāśritaṃ procya sa pumānabravītpunaḥ || 298 ||
[Analyze grammar]

tatas taṃ vañcayitvaiva vṛddhavipraḥ sa kesaṭam |
ādāya tāṃ rūpavatīṃ putrārthaṃ prayayau tataḥ || 299 ||
[Analyze grammar]

kesaṭastu na vijñātaḥ kva yātaḥ pariṇīya tām |
rūpavaty apy apaśyantī kesaṭaṃ sābravīt pathi || 300 ||
[Analyze grammar]

āryaputraṃ na paśyāmi kiṃ sarveṣu vrajatsv iha |
tac chrutvā darśayan putraṃ taṃ sa vṛddhadvijo 'bhyadhāt || 301 ||
[Analyze grammar]

so 'yaṃ mattanayaḥ putri bhartā te dṛśyatāmiti |
tato rūpavatī vṛddhāṃs tatrasthān abravīt krudhā || 302 ||
[Analyze grammar]

ko 'yaṃ kurūpo bhartā me mariṣyāmyeva niścitam |
yena hy aḥ pariṇītāsmi taṃ prāpsyāmi na cetpatim || 303 ||
[Analyze grammar]

evaṃ vadantī tyaktānnapānā rājabhayena sā |
pitureva gṛhaṃ tena vṛddhavipreṇa nāyita || 304 ||
[Analyze grammar]

tatroktataddvijavyājāṃ śocaṃs tām avadat pitā |
ko 'sāv iti kathaṃ jñeyaḥ pariṇetā sa putri te || 305 ||
[Analyze grammar]

tato rūpavatī smāha tāta pāṭaliputrakāt |
desaṭākhyadvijasutaḥ kesaṭākhyaḥ sa matpatiḥ || 306 ||
[Analyze grammar]

rakṣomukhānmayā hyetac chrutamityabhidhāya sā |
kṛtsnaṃ tasmai samācakhyau vṛttāntaṃ patirakṣasoḥ || 307 ||
[Analyze grammar]

tataḥ sa tatpitā gatvā dṛṣṭvā rakṣo mṛtasthitam |
saṃjātapratyayo 'tuṣyaddaṃpatyostattvatastayoḥ || 308 ||
[Analyze grammar]

patiprāptyāśayāśvāsya sutāṃ tāṃ prāhiṇoc ca saḥ |
anveṣan kesaṭapituḥ pārśvaṃ pāṭaliputrakam || 309 ||
[Analyze grammar]

te tatra gatvā nacirādāgatyaivamihābruvan |
dṛṣṭaḥ pāṭaliputrasthaḥ so 'smābhir bhartṛdesaṭaḥ || 310 ||
[Analyze grammar]

kesaṭaḥ kva sa te putra iti pṛṣṭaś ca tatra saḥ |
sabāṣpam abravīd asmān kesaṭo 'tra kutaḥ sutaḥ || 311 ||
[Analyze grammar]

sa hy āgato 'pi kaṃdarpanāmni mittre sahāgate |
ito rūpavatīduḥkhātkvāpy anuktvaiva me gataḥ || 312 ||
[Analyze grammar]

etattasya vacaḥ śrutvā kramādvayamihāgatāḥ |
ity ukte 'nveṣakai rūpavatī pitaram abhyadhāt || 313 ||
[Analyze grammar]

nāsty āryaputraprāptir me tadagniṃ praviśāmy aham |
bhartrā vinākṛtā tāta tiṣṭheyaṃ hi kiyacciram || 314 ||
[Analyze grammar]

evaṃ bruvāṇā na yadā niṣeddhuṃ tena pāritā |
tadā rūpavatī sādya nirgatā martumagninā || 315 ||
[Analyze grammar]

tasyāḥ sakhyāvubhe kanye tadvanmartuṃ vinirgate |
ekā śṛṅgāravatyākhyā hy anurāgavatī parā || 316 ||
[Analyze grammar]

tadvivāhe sa tābhyāṃ hi dṛṣṭaḥ prākkesaṭo yuvā |
tadrūpahṛtacittābhyāṃ bhartṛtve paryakalpyata || 317 ||
[Analyze grammar]

itthaṃ kolāhalamidaṃ janasyātreti tena saḥ |
kaṃdarpaḥ puruṣeṇokto yayau tāsāṃ citāntikam || 318 ||
[Analyze grammar]

tato dūrātkalakalaṃ nirvāyopetya ca drutam |
avocadagnimarcantīmevaṃ rūpavatīṃ sa tām || 319 ||
[Analyze grammar]

alaṃ te sāhasenārye jīvatyeva sa kesaṭaḥ |
sa bhartā tava mittraṃ me kaṃdarpaṃ māmavehi ca || 320 ||
[Analyze grammar]

ity ūcivān vṛddhavipracchadmanaukādhirohaṇāt |
ārabhya kesaṭodantaṃ kathayām āsa so 'khilam || 321 ||
[Analyze grammar]

tataḥ saṃvādasaṃjātapratyayā sā piturgṛham |
hṛṣṭā rūpavatī tābhyāṃ sakhībhyāṃ praviśatsaha || 322 ||
[Analyze grammar]

kaṃdarpo 'pi ca tatpitrā prītyopacaritastadā |
surakṣitaś ca tatraiva tasthau tadanurodhataḥ || 323 ||
[Analyze grammar]

tāvat sa kesaṭo daivatprāpa ratnapuraṃ bhraman |
kaṃdarpasya gṛhaṃ tatra tadbhārye yatra te sthite || 324 ||
[Analyze grammar]

paribhramantaṃ taṃ tatra harmyātkaṃdarpabhāryayā |
dṛṣṭvā sumanasā harṣādūcire śvaśurādayaḥ || 325 ||
[Analyze grammar]

āryaputrasuhṛtso 'yaṃ saṃprāpaḥ kesaṭo 'dhunā |
asmāt pravṛttir budhyeta śīghraṃ saṃbhāvyatām iti || 326 ||
[Analyze grammar]

tato gatvaiva tair uktvā yasthāvastu sa kesaṭaḥ |
ānītastāṃ sumanasaṃ dṛṣṭvāhṛṣyadupāgatām || 327 ||
[Analyze grammar]

viśrāntaś ca kṣaṇātpṛṣṭastasyai vanyebhasaṃbhramāt |
ārabhya kaṃdarpagataṃ svaṃ ca vṛttāntam abravīt || 328 ||
[Analyze grammar]

satkṛto divasān kāṃścid āste yāvac ca tatra saḥ |
lekhahastaḥ pumāṃs tāvad āgāt kaṃdarpapārśvataḥ || 329 ||
[Analyze grammar]

yatra rūpavatīṃ nāma svatsuhṛtpariṇītavān |
kesaṭas tatra kaṃdarpaḥ sthito rūpavatī ca sā || 330 ||
[Analyze grammar]

iti covāca sa pumāllekhārtho 'bhūttathaiva ca |
kaṃdarpapitre svodvāhaṃ kesaṭo 'varṇayac ca saḥ || 331 ||
[Analyze grammar]

tataḥ kṛtotsavo 'nyedyuḥ kaṃdarpānayanāya saḥ |
tatpitā prāhiṇoddūtaṃ priyāprāptyai ca kesaṭam || 332 ||
[Analyze grammar]

kesaṭo 'pi yayau sākaṃ lekhahāreṇa tena saḥ |
taṃ deśaṃ yatra sā rūpavatī pitṛgṛhe sthitā || 333 ||
[Analyze grammar]

tatra saṃbhāvayām āsa sa tāṃ rūpavatīṃ cirāt |
sotsavāṃ hṛtasaṃtāpastoyadaścātakīmiva || 334 ||
[Analyze grammar]

kaṃdarpeṇa samāgamya pariṇinye ca te api |
rūpavatyā vayasye dve pūrvokte preritastayā || 335 ||
[Analyze grammar]

te cānurāgaśṛṅgāravatyau rūpavatīṃ ca tām |
ādāyāpṛṣṭakaṃdarpaḥ svadeśaṃ kesaṭo yayau || 336 ||
[Analyze grammar]

kaṃdarpo 'pi sadūtas tad gatvā ratnapuraṃ tataḥ |
saṃjagme sumanonaṅgavatībhyām bandhubhis tadā || 337 ||
[Analyze grammar]

nijanijadeśagatau tau rūpavatīsumanasau priye prāpya |
kesaṭakaṃdarpāvatha bhuñjānau tasthaturbhogān || 338 ||
[Analyze grammar]

iti vidhuravidhātṛviprayuktāḥ punar api yānti samāgamaṃ priyābhiḥ |
akalitagahanāvadhīni duḥkhāny api viṣamāṇyavatīrya dhīrasattvāḥ || 339 ||
[Analyze grammar]

tac chīghram uttiṣṭha sakhe vrajāvaś cinvaṃs tvam apy āpsyasi jātu bhāryām |
ko veda daivasya gatiṃ mayaiva mṛtāpi bhāryādhigatā sajīvā || 340 ||
[Analyze grammar]

ityevamākhyāya kathāmanena protsāhitaścānugataś ca sakhyā |
bhramanbhuvaṃ prāpamimāmathātra sakroḍamadrākṣamahaṃ gajendram || 341 ||
[Analyze grammar]

udgīrya tena ca gajena punarnigīrṇāṃ tām eva citramavaśāṃ svavadhūmapaśyam |
taṃ cinvatāpi kariṇaṃ ciradṛṣṭanaṣṭaṃ dṛṣṭvā mayādya sukṛtair iha devapādāḥ || 342 ||
[Analyze grammar]

evaṃ tasyoktavato vaṇiksutasyātha vikramādityaḥ |
ānāyya tāṃ sa rājā gajavadhalabdhāṃ samarpayad bhāryām || 343 ||
[Analyze grammar]

tau ca vicitrasamāgamamuditāvanyonyakathitavṛttāntau |
śrīviṣamaśīlasaṃstutimukharamukhau daṃpatī tadābhūtām || 344 ||
[Analyze grammar]