Chapter 2

ity uktvā vikramādityadevāyāsthānavartini |
anaṅgadevaḥ punarapyevaṃ kathayati sma saḥ || 1 ||
[Analyze grammar]

tato bhuktottaraṃ sā māṃ sakhīmadhyasthitābravīt |
anaṅgadeva sarvaṃ te kathayāmyadhunā śṛṇu || 2 ||
[Analyze grammar]

eṣāhaṃ dhanadabhrāturmaṇibhadrasya gehinī |
dundubheryakṣarājasya sutā madanamañjarī || 3 ||
[Analyze grammar]

sāhaṃ tīreṣu saritāṃ śaileṣūpavaneṣu ca |
manohareṣu vyaharaṃ bhartrā saha sukhaṃ sadā || 4 ||
[Analyze grammar]

ekadā ca gatābhūvamujjayinyāmahaṃ kila |
udyānaṃ makarandākhyaṃ vihartuṃ vallabhānvitā || 5 ||
[Analyze grammar]

tatra daivāduṣasyekaḥ khaṇḍakāpālikādhamaḥ |
vihāraśramasaṃsuptaprabuddhāṃ paśyati sma mām || 6 ||
[Analyze grammar]

sa kāmavaśagaḥ pāpo bhāryātve homakarmaṇā |
mantreṇa māṃ sādhayituṃ prāvartiṣṭa śmaśānagaḥ || 7 ||
[Analyze grammar]

tadahaṃ svaprabhāveṇa buddhvā bhartre nyavedayam |
tenāpyāveditaṃ bhrāturjyāyaso dhanadasya tat || 8 ||
[Analyze grammar]

dhanādhyakṣeṇa gatvā ca vijñaptaḥ kamalodbhavaḥ |
sa cāpi bhagavānevaṃ brahma dhyātvā tam abhyadhāt || 9 ||
[Analyze grammar]

satyaṃ sa bhrātṛjāyāṃ te kapālī hartumudyataḥ |
yakṣasādhanamantrāṇāṃ śaktisteṣāṃ hi tādṛśī || 10 ||
[Analyze grammar]

tayā tu vikramādityo mantreṇākṛṣyamāṇayā |
ākrandanīyo nṛpatiḥ sa rakṣiṣyati tāṃ tataḥ || 11 ||
[Analyze grammar]

etadbrahmavaco 'bhyetya madbhartre dhanado 'bravīt |
madbhartā mahyamāha sma kumantracakitātmane || 12 ||
[Analyze grammar]

tāvac ca kramasiddhena mantreṇākṛṣṭavān sa mām |
homaṃ kurvañ śmaśānasthaḥ khaṇḍakāpālikaḥ svataḥ || 13 ||
[Analyze grammar]

ahaṃ ca mantrākṛṣṭā tadvitrastā pitṛkānanam |
prāpamasthikapālāḍhyaṃ bhair avaṃ bhūtasevitam || 14 ||
[Analyze grammar]

tatrāpaśyaṃ ca taṃ duṣṭakāpālikam ahaṃ tadā |
hutāgnim arcitottānaśavādhiṣṭhitamaṇḍalam || 15 ||
[Analyze grammar]

sa ca kāpālikaḥ prāptāṃ dṛṣṭvā māṃ darpamohitaḥ |
agātkathaṃcidācāntuṃ nadīṃ daivādadūragām || 16 ||
[Analyze grammar]

tatkṣaṇaṃ saṃmṛtabrahmavacanāhamacintayam |
kiṃ nākrandāmi rājānaṃ sa rātrau jātviha bhramet || 17 ||
[Analyze grammar]

ityetaccintayitvoccaistatrākranditavaty aham |
paritrāyasva māṃ deva vikramāditya bhūpate || 18 ||
[Analyze grammar]

jagradrakṣāmaṇe paśya valātkulavadhūṃ satīm |
gṛhiṇīṃ maṇibhadrasya dhanādhyakṣānujanmanaḥ || 19 ||
[Analyze grammar]

dundubhestanayāṃ yakṣīṃ nāmnā madanamañjarīm |
kāpāliko 'yaṃ tvadrājye māṃ dhvaṃsayitumudyataḥ || 20 ||
[Analyze grammar]

ityākranditavatyeva jvalantam iva tejasā |
kṛpāṇapāṇimāyāntaṃ tamadrākṣamahaṃ nṛpam || 21 ||
[Analyze grammar]

sa ca māmavadadbhadre mā bhaiṣīrnivṛtā bhava |
ahaṃ kāpālikādasmādrakṣāmī bhavatīṃ śubhe || 22 ||
[Analyze grammar]

ko hi rājye mamādharmamīdṛśaṃ kartumīśvaraḥ |
ity uktvāgniśikhaṃ nāma vetālaṃ sa samāhvayat || 23 ||
[Analyze grammar]

sa cāhūto jvalannevaḥ pāṃśurūrdhvaśiroruhaḥ |
upetyaivābravīdbhūpaṃ kiṃ karomyādiśeti tam || 24 ||
[Analyze grammar]

atha rājābravīdeṣe paradārāpahārakṛt |
pāpaḥ kāpāliko hatvā bhavatā bhakṣyatāmiti || 25 ||
[Analyze grammar]

tataḥ so 'gniśikhas tasmiñ śave 'rcāmaṇḍalasthite |
praviśyādhāvadutthāya prasāritabhujānanaḥ || 26 ||
[Analyze grammar]

agrahījjaṅghayoḥ paścāttaṃ cācāntaparāgatam |
kāpālikaṃ sa vetālaḥ palāyanaparāyaṇam || 27 ||
[Analyze grammar]

nabhasi bhrāmayitvā ca kṣipramāsphoṭya ca kṣitau |
dehaṃ manorathaṃ caiva samamasya vyacūrṇayat || 28 ||
[Analyze grammar]

hataṃ kāpālinaṃ dṛṣṭvā bhūteṣvāmiṣagardhiṣu |
āgādyamaśikho nāma vetālas tatra durmadaḥ || 29 ||
[Analyze grammar]

etyaiva tadagṛhṇātsa kāpālikakalevaram |
tataḥ so 'gniśikhaḥ pūrvo vetālastama bhāṣata || 30 ||
[Analyze grammar]

are śrīvikramādityadevasyādeśato mayā |
kāpāliko 'yaṃ nihato durācāra tvamasya kaḥ || 31 ||
[Analyze grammar]

etac chrutvā yamaśikhaḥ prāha tvaṃ brūhi tarhi me |
kiṃprabhāvaḥ sa rājeti tataḥ so 'gniśikho 'bravīt || 32 ||
[Analyze grammar]

tatprabhāvaṃ na cedvetsi tadahaṃ śṛṇu vacmi te |
ihābhūḍḍākineyākhyaḥ sudhīraḥ kitavaḥ puri || 33 ||
[Analyze grammar]

sa jātu hṛtasarvasvaḥ kitavaidyūrtamāyayā |
adhikāvarjitānyārthanimittaṃ tair abadhyata || 34 ||
[Analyze grammar]

asvatvādadadantaṃ ca tair eva laguḍādibhiḥ |
tāḍyamāno 'vatasthe ca grāvabhūto mṛto yathā || 35 ||
[Analyze grammar]

tataḥ sa sabhyaiḥ sarvaistarnītvā pāpaiḥ sa cikṣipe |
mahāndhakūpe saṃbhāvya jīvato 'smātpratikriyām || 36 ||
[Analyze grammar]

sa ca tatrātigambhīre kitavo ḍākineyakaḥ |
kūpe bhraṣṭo dadarśo 'gnau mahāntau puruṣāvubhau || 37 ||
[Analyze grammar]

tau ca taṃ patitaṃ sāmnā dṛṣṭvā bhītam apṛcchatām |
kas tvaṃ kutaś ca kūpe 'smin patito 'syucyatām iti || 38 ||
[Analyze grammar]

athāśvasya svavṛttāntaṃ dyūtakāro nivedya saḥ |
tāv apy apṛcchad brūtaṃ me kau kutaś ca yuvām iha || 39 ||
[Analyze grammar]

tac chrutvā tau jagadatuḥ puruṣāvavaṭasthitau |
āvāmasyāḥ puro bhadra śmaśāne brahmarākṣasau || 40 ||
[Analyze grammar]

agṛhṇīva ca tāvāvāmihaiva puri kanyake |
mukhyamantrisutāmekāmanyāṃ mukhyavaṇiksutām || 41 ||
[Analyze grammar]

na ca mocayituṃ kaś citte śaknoti sma kanyake |
māntriko dīptamantro 'pi pṛthvyāmasmatsakāśataḥ || 42 ||
[Analyze grammar]

buddhvātha vikramādityadevastatpitṛvatsalaḥ |
tatrāgādyatra kanye te pitroḥ sakhyātsaha sthite || 43 ||
[Analyze grammar]

taṃ dṛṣṭvaiva nṛpaṃ muktvā kanyake te palāyitum |
icchantāvapi naivāvāṃ tato gantumaśaknuvaḥ || 44 ||
[Analyze grammar]

āpaśyāva diśaḥ sarvā jvalantīs tasya tejasā |
tato 'badhnātsa nṛpatirdṛṣṭvā nau svaprabhāvataḥ || 45 ||
[Analyze grammar]

jātamṛtyubhayau dīnau vīkṣya caivaṃ samādiśat |
bhoḥ pāpāvandhakūpāntarvasataṃ vatsarāvadhi || 46 ||
[Analyze grammar]

muktābhyāṃ ca tataḥ kāryaṃ bhavadbhyāṃ nedṛśaṃ punaḥ |
kariṣyataścettadahaṃ nigrahīṣyāmi vāṃ tataḥ || 47 ||
[Analyze grammar]

ityādiśyāndhakūpe 'tra tenāvāṃ kṣapitāvimau |
rājñā viṣamaśīlena kṛpayā na vipāditau || 48 ||
[Analyze grammar]

aṣṭabhir divasaiḥ kūpanivāsasyāsya cāvayoḥ |
avadhiḥ pūryate varṣādito mucyāvahe tataḥ || 49 ||
[Analyze grammar]

tadbhakṣyaṃ kiṃcidetāni yadyahāni dadāsi nau |
taduddhṛtyāmutaḥ kūpāttvāṃ kṣipāvo bahiḥ sakhe || 50 ||
[Analyze grammar]

aṅgīkṛtya na ceddāsyasyāvābhyāṃ bhakṣyamuddhṛtaḥ |
tatastvāṃ bhakṣayiṣyāvo niścitaṃ nirgatāvitaḥ || 51 ||
[Analyze grammar]

ity uktvā brahmarakṣobhyāṃ tābhyāṃ sa kitavas tataḥ |
tatheti pratipannārthaḥ kūpādbahirudasyata || 52 ||
[Analyze grammar]

sa kūpādudgatopaśyaṃstadarthaprāptimanyathā |
paṇāyituṃ mahāmāṃsaṃ śmaśānaṃ prāviśanniśi || 53 ||
[Analyze grammar]

tatkālaṃ tiṣṭhatā tatra sa dṛṣṭaḥ kitavo mayā |
gṛhṇātu kaścid vikrīṇe mahāmāṃsam iti bruvan || 54 ||
[Analyze grammar]

ahaṃ gṛhṇāmi kiṃ mūlyaṃ mārgasītyudite mayā |
rūpaprabhāvau svau dehi mahyamityabravīc ca saḥ || 55 ||
[Analyze grammar]

vīra kiṃ kuruṣe tābhyāmity uktaś ca mayā punaḥ |
uktvā kṛtsnaṃ svavṛttāntam evaṃ sa kitavo 'bhyadhāt || 56 ||
[Analyze grammar]

tat tvadrūpaprabhāvābhyāṃ tān ākṛṣya dadāmy aham |
kitavān brahmarakṣobhyāṃ bhakṣyaṃ sabhyayutān arīn || 57 ||
[Analyze grammar]

tac chrutvā dhair yatuṣṭena tasmai dyūtakṛte mayā |
dattau rūpaprabhāvau svavābhāṣya dinasaptakam || 58 ||
[Analyze grammar]

tābhyām ākṛṣya kūpe tān kramāt kṣiptvāpakāriṇaḥ |
nayati sma sa saptāhādbrahmarākṣasabhakṣyatām || 59 ||
[Analyze grammar]

tato mayā svīkṛtayoḥ svayo rūpaprabhāvayoḥ |
so 'bravīḍḍākineyo māṃ dyūtakāro bhayākulaḥ || 60 ||
[Analyze grammar]

nādya dattaṃ mayā bhakṣyamaṣṭamaṃ tadahastayoḥ |
tanmāṃ nirgatya tau brahmarākṣasau bhakṣayiṣyataḥ || 61 ||
[Analyze grammar]

tad atra kiṃ mayā kāryaṃ brūhi mitraṃ hi me bhavān |
ity uktavantaṃ tamahaṃ saṃstavaprītito 'bravam || 62 ||
[Analyze grammar]

yadyevaṃ tattvayā tābhyāṃ rākṣasābhyāṃ hi khāditāḥ |
kitavāste tavārthe tau rākṣasāvadmy ahaṃ punaḥ || 63 ||
[Analyze grammar]

tattau darśaya me mitrety uktavāṃstena tatkṣaṇam |
nītastatūpanikaṭaṃ kitavena tathety aham || 64 ||
[Analyze grammar]

avāṅmukhaś ca yāvattaṃ kūpaṃ paśyāmyaśaṅkitaḥ |
tāvattenāsmi dattvārdhacandraṃ kṣiptastadantare || 65 ||
[Analyze grammar]

kūpāntaḥ patitasyātha rakṣobhyāṃ bhakṣyabuddhitaḥ |
gṛhītasya samaṃ tābhyāṃ bāhuyuddhamabhūnmama || 66 ||
[Analyze grammar]

yadātivartituṃ bāhubalaṃ nāśaknutāṃ mama |
yuddhaṃ tyaktvā tadā kastvamiti tau māmapṛcchatām || 67 ||
[Analyze grammar]

tato mayā ḍākineyavṛttāntātprabhṛti svake |
vṛttānte kathite maitrīṃ kṛtvā māṃ vadataḥ sma tau || 68 ||
[Analyze grammar]

aho tavāvayosteṣāṃ kitavānāṃ ca kīdṛśī |
avasthā vihitā tena kitavena durātmanā || 69 ||
[Analyze grammar]

yeṣāṃ na maittrī na ghṛṇā nopakāraḥ spṛśenmanaḥ |
teṣu cchalaikavidyeṣu viśvāsaḥ kitaveṣu kaḥ || 70 ||
[Analyze grammar]

sāhasaṃ nair apekṣyaṃ ca kitavānāṃ nisargajam |
ṭhiṇṭhākarālasya kathā tathā ca śrūyatāṃ tvayā || 71 ||
[Analyze grammar]

asyāmevojjayinyāṃ sa dyūtakāro 'bhavatpuri |
pūrvaṃ ṭhiṇṭhākarālākhyo viṣamo 'nvarthanāmakaḥ || 72 ||
[Analyze grammar]

tasya hārayato nityaṃ dyūte ye jayino 'pare |
te pratyahaṃ dyūtakārāḥ kapardakaśataṃ daduḥ || 73 ||
[Analyze grammar]

tenāpaṇātsa godhūmacūrṇaṃ krītvā dinātyaye |
cakārāpūpikāḥ kvāpi mṛditvā karpare 'mbhasā || 74 ||
[Analyze grammar]

gatvā śmaśāne paktvā tāścitāgnāvetya cāgrataḥ |
mahākālasya taddīpaghṛtābhyaktā abhakṣayat || 75 ||
[Analyze grammar]

tatraiva ca mahākāladevāgārāṅgaṇe sadā |
upadhānīkṛtabhujaḥ sa suṣvāpa kṣitau niśi || 76 ||
[Analyze grammar]

ekadā rajanau tatra mahākālaniketane |
mātṛmaṇḍalayakṣādipratimās tasya paśyataḥ || 77 ||
[Analyze grammar]

sphurantīrmantrasāṃnidhyānmatirevamajāyata |
na karomi kimarthārtham upāyamiha yuktitaḥ || 78 ||
[Analyze grammar]

siddhaścedbhadramathavā na siddhaḥ kā kṣatirmama |
ityālocyābravīddyūtāyākṣipandevatāḥ sa tāḥ || 79 ||
[Analyze grammar]

eta bhoḥ saha yuṣmābhir dīvyāmīhāham eva ca |
sabhyas tathā pātayitā jitaṃ sadyaś ca dīyate || 80 ||
[Analyze grammar]

ity uktāstena tāstūṣṇīṃ yattasthustadapātayat |
ṭhiṇṭhākarālaḥ sa paṇaṃ kṛtvā citrā varāṭikāḥ || 81 ||
[Analyze grammar]

aṅgīkṛtaṃ pātanaṃ syātkitavenāniṣedhatā |
iti dyūte hi sarvatra sthitirdyūtakṛtāṃ sadā || 82 ||
[Analyze grammar]

tato jitvā bahu svarṇaṃ devatāstā jagāda saḥ |
jitaṃ prayacchata dhanaṃ mahyamābhāṣitaṃ yathā || 83 ||
[Analyze grammar]

ity ucyamānāḥ kitavenāsakṛt tena tā yadā |
devatā nālapan kiṃcit tadā vakti sma sa krudhā || 84 ||
[Analyze grammar]

yadi sthitāḥ sthas tūṣṇīṃ tatkriyate kitavasya yat |
adattahāritārthasya śilābhūtasya tiṣṭhataḥ || 85 ||
[Analyze grammar]

yamadaṃṣṭrāgratīkṣṇena krakacenāṅgapāṭanam |
tadahaṃ vaḥ kariṣyāmi nahyapekṣāsti kāpi me || 86 ||
[Analyze grammar]

ity uktvā yāvadādāya krakacaṃ so 'bhidhāvati |
tāvattasmai daduḥ svarṇaṃ devatāstā yathājitam || 87 ||
[Analyze grammar]

hārayitvā ca tatprātarnaktametya tathaiva saḥ |
ācakarṣa haṭhadyūtenārthaṃ mātṛgaṇātpunaḥ || 88 ||
[Analyze grammar]

evaṃ sa kurute yāvat pratyahaṃ tāvadekadā |
jagāda devī cāmuṇḍā mātṛstāḥ khinnamānasāḥ || 89 ||
[Analyze grammar]

ito 'haṃ nirgato dyūtādityāhūto bravīti yaḥ |
sa nākṣepya iti dyūte śailīyaṃ mātṛdevatāḥ || 90 ||
[Analyze grammar]

tasmādāhvayamānaṃ taṃ tadevoktvā nirasyata |
iti cāmuṇḍayoktāstā devyaścetasi tadvyadhuḥ || 91 ||
[Analyze grammar]

niśi prāptaṃ kṛtāhvānaṃ kitavaṃ taṃ ca devane |
nirgatāḥ sma ito dyūtādityūcuḥ sarvadevatāḥ || 92 ||
[Analyze grammar]

evaṃ nirākṛtaṣṭhiṇṭhākarālastābhir eva saḥ |
tatprabhuṃ taṃ mahākālamevāhvayata devitum || 93 ||
[Analyze grammar]

so 'pi labdhāvakāśaṃ taṃ matvā haṭhadurodare |
nirgato 'ham ito dyūtād iti devaḥ kilābravīt || 94 ||
[Analyze grammar]

akṣīṇadoṣādviṣamādiṣṭāniṣṭabhayojjhitāt |
durjanādbata devā apyaśaktā iva bibhyati || 95 ||
[Analyze grammar]

tathā durodarācārabhagnakaitavayuktinā |
tena ṭhiṇṭhākarālena khinnenaivamacintyata || 96 ||
[Analyze grammar]

aho dyūtasthitiṃ devaiḥ śikṣitvāsmi nirākṛtaḥ |
tad etam eva deveśam idānīṃ śaraṇaṃ śraye || 97 ||
[Analyze grammar]

ityākalayya hṛdaye parigṛhyaiva pādayoḥ |
stuvaṃṣṭhiṇṭhākarālastaṃ mahākālaṃ vyajijñapat || 98 ||
[Analyze grammar]

devyā dyūtajiteṣvinduvṛṣakuñjaracarmasu |
jānunyastakapolaṃ te naumi nagnāṅgamāsitam || 99 ||
[Analyze grammar]

yadicchāmātratas tās tā vibhūtīr dadate surāḥ |
yo nirīho jaṭābhasmakapālaikaparigrahaḥ || 100 ||
[Analyze grammar]

sa salobho 'dya jātastvaṃ mandapuṇye kathaṃ mayi |
yadalpahetor mām evaṃ hā vañcayitum īhase || 101 ||
[Analyze grammar]

kalpavṛkṣo 'py adhanyānāṃ nāśāṃ pūrayati dhruvam |
yadbibharṣi na māṃ nātha bhṛtaviśvo 'pi bhair ava || 102 ||
[Analyze grammar]

tatprapannasya me kaṣṭavyasanāviṣṭacetasaḥ |
vyatikramam api sthāṇo bhagavan kṣantum arhasi || 103 ||
[Analyze grammar]

tryakṣastvaṃ tādṛgevāhaṃ bhasmāṅge te mamāpi tat |
tvaṃ kapāle yathā bhuṅkṣe tathaivāhaṃ dayasya me || 104 ||
[Analyze grammar]

yuṣmābhiḥ samamālapya kathaṃ nu kitavair aham |
sahālapiṣyāmi punastanmāmāpannamuddhara || 105 ||
[Analyze grammar]

ityādi tāvadastauṣītkitavastaṃ sa bhair avam |
tāvat sa parituṣyaivaṃ devaḥ sākṣāduvāca tam || 106 ||
[Analyze grammar]

ṭhiṇṭhākarāla tuṣṭo 'smi tava mā smādhṛtiṃ kṛthāḥ |
ahaṃ dāsyāmi te bhogān ihaivāssva mamāntike || 107 ||
[Analyze grammar]

iti devājñayā tatra tasthau sa kitavastadā |
tatprasādādupanatāṃ bhuñjāno bhogasaṃpadam || 108 ||
[Analyze grammar]

ekadā ca mahākālatīrthe 'tra snātumāgatāḥ |
rātrāvapsaraso dṛṣṭvā sa devo vyādideśa tam || 109 ||
[Analyze grammar]

āsāṃ snātuṃ pravṛttānāṃ sarvāsāṃ surayoṣitāsm |
taṭanyastāni vāsāṃsi laghu hṛtvā tvamānaya || 110 ||
[Analyze grammar]

yāvadetā na dāsyanti tubhyametāṃ kalāvatīm |
apsaraḥkanyakāṃ tāvadāsāṃ vastrāṇi mā mucaḥ || 111 ||
[Analyze grammar]

evaṃsa bhair aveṇokto gatvāmaramṛgīdṛśām |
ṭhiṇṭhākarālaḥ snāntīnāṃ tāsāṃ vastrāṇyapāharat || 112 ||
[Analyze grammar]

muñca muñcāmbarāṇyasmānmā sma kārṣīrdigambarāḥ |
iti bruvāṇāś ca sa tā vyājahāra haraujasā || 113 ||
[Analyze grammar]

kanyāṃ kalāvatīmetāṃ yadi mahyaṃ prayacchatha |
tadahaṃ vo vimokṣyāmi vāsāṃsyetāni nānyathā || 114 ||
[Analyze grammar]

tac chrutvā taṃ durādharṣaṃ dṛṣṭvā smṛtvā ca tādṛśam |
śakraśāpaṃ kalāvatyāstāścaitatpratipedire || 115 ||
[Analyze grammar]

daduḥ kalāvatīṃ tāṃ ca tasmāy ujjhitavāsase |
ṭhiṇṭhākarālāya tato vidhinālambuṣāsutām || 116 ||
[Analyze grammar]

athāpsaraḥsu yātāsu kalāvatyā tayā saha |
tasthau ṭhiṇṭhākarālo 'sau devecchānirmitāspadaḥ || 117 ||
[Analyze grammar]

kalāvatī ca devendram upasthātumagāddivā |
tridivaṃ rajanau taṃ ca sadā patim upāyayau || 118 ||
[Analyze grammar]

tvatprāptihetunā śakraśāpena mama vallabha |
varāyitamiti prītyā kadācidbruvatī ca sā || 119 ||
[Analyze grammar]

tena ṭhiṇthākarālena patyā tacchāpakāraṇam |
pṛṣṭvā satī suravadhūḥ kalāvaty abravīd idam || 120 ||
[Analyze grammar]

dṛṣṭvodyāne surāñjātu maryabhogāḥ stutā mayā |
nindantyā dviviṣadbhogān dṛṣṭimātropabhogadān || 121 ||
[Analyze grammar]

tadbuddhvā devarājo māmaśapadgaccha bhokṣyase |
martyena pariṇītā tvaṃ bhogāṃstanmānuṣāniti || 122 ||
[Analyze grammar]

tenāyamāvayor jātaḥ saṃyogo 'nyonyasaṃmataḥ |
śvaś ca nākāccireṇaiṣyābhyahaṃ mā bhūc ca te 'dhṛtiḥ || 123 ||
[Analyze grammar]

rambhā navaprayogaṃ hi nartiṣyati hareḥ puraḥ |
ā tatsamāpter asmābhiḥ sthātavyaṃ tatra ca priya || 124 ||
[Analyze grammar]

tataṣṭhiṇṭhākarālastāṃ premadurlalito 'bhyadhāt |
ahaṃ drakṣyāmi tannṛtyaṃ guptaṃ tatraiva māṃ naya || 125 ||
[Analyze grammar]

etac chrutvā kalāvatyā tayā sa jagade patiḥ |
yujyate kathametanme kupyedbuddhvā hi devarāṭ || 126 ||
[Analyze grammar]

evam ukto 'pi nirbandhaṃ yadā tasyāścakāra saḥ |
tadā kalāvatī snehānnetuṃ taṃ pratyapadyata || 127 ||
[Analyze grammar]

prātaḥ prabhāvagūḍhaṃ taṃ kṛtvā karṇotpalāntare |
ṭhiṇṭhākarālamanayatsā mahendrasya mandiram || 128 ||
[Analyze grammar]

surebhaśobhitadvāraṃ nandanodyānasundaram |
dṛṣṭvā ṭhiṇṭhākarālastaddevamānī tutoṣa saḥ || 129 ||
[Analyze grammar]

dadarśa cātra vṛtrārerāsthāne tridaśāśrite |
pragītasvarvadhūsārthaṃ rambhānṛttotsavādbhutam || 130 ||
[Analyze grammar]

nāradādipraṇītāni sarvātodyāni cāśṛṇot |
prasanne hi kimaprāpyamastīha parameśvare || 131 ||
[Analyze grammar]

tataḥ prekṣaṇakasyānte tatrotthāya pravṛttavān |
divyaśchāgākṛtirbhaṇḍo nartituṃ divyabhaṅgibhiḥ || 132 ||
[Analyze grammar]

ṭhiṇṭhākarālo dṛṣṭvā taṃ parijñāya vyacintayat |
aho etamahaṃ paśyamyujjayinyāmajaṃ paśum || 133 ||
[Analyze grammar]

ihendrasya puraścāyamīdṛśo bhaṇḍanartakaḥ |
atarkyā divyamāyeyaṃ vicitrā bata kācana || 134 ||
[Analyze grammar]

evaṃ ṭhiṇṭhākarālasya tasya cintayato hṛdi |
nṛttānte chāgabhaṇḍasya śakrāsthānaṃ nyavartata || 135 ||
[Analyze grammar]

tataḥ kalāvatī hṛṣṭā sā karṇotpalasaṃśritam |
ṭhiṇṭhākarālaṃ svasthānamānināya tathaiva tam || 136 ||
[Analyze grammar]

ṭhiṇṭhākarālaś cānyedyur ujjayinyāṃ tam āgatam |
dṛṣṭvā chāgākṛtiṃ darpād devabhaṇḍam abhāṣata || 137 ||
[Analyze grammar]

are mamāgrato nṛtya nṛtyasīndrāgrato yathā |
anyathā na kṣamiṣye te tannṛtaṃ bhaṇḍa darśaya || 138 ||
[Analyze grammar]

tac chrutvā vismitaśchāgastūṣṇīm eva babhūva saḥ |
kuto 'yaṃ mānuṣo 'pyevaṃ māṃ jānātīti cintayan || 139 ||
[Analyze grammar]

nirbandhenocyamāno yannaiva cchāgo nanarta saḥ |
tatsa ṭhiṇṭhākarālastaṃ laguḍair mūrdhnyatāḍayat || 140 ||
[Analyze grammar]

tataḥ sa gatvā śakrāya tathaiva cchāgalo 'khilam |
sravadraktena śirasā yathāvṛttaṃ nyavedayat || 141 ||
[Analyze grammar]

indro 'pi praṇidhānena bubudhe tadyathā divam |
ṭhiṇṭhākarālamānaiṣīdrambhānṛtte kalāvatī || 142 ||
[Analyze grammar]

yathā ca cchāganṛttaṃ taddṛṣṭaṃ tenāparādhinā |
tataḥ kalāvatīmevamāhūyendraḥ śaśāpa saḥ || 143 ||
[Analyze grammar]

nṛttārthamasya cchāgasya yenāvasthā kṛtedṛśī |
rāgāttaṃ mānuṣaṃ guptaṃ yadihānītavatyasi || 144 ||
[Analyze grammar]

tadgaccha narasiṃhena rājñā nāgapure pure |
devāgāre kṛte stambhe bhava tvaṃ sālabhañjikā || 145 ||
[Analyze grammar]

ity uktavān kalāvatyā mātrālambuṣayā tayā |
śakro 'nunāthitaḥ kṛcchrād evaṃ śāpāntam ādiśat || 146 ||
[Analyze grammar]

yadā bahvabdaniṣpannaṃ devaveśma vinaśya tat |
bhaviṣyati samaṃ bhūmerasyāḥ śāpakṣayastadā || 147 ||
[Analyze grammar]

itīndraśāpaśāpāntāvevaṃ sāśruḥ śaśaṃsa sā |
tasmai kalāvatī ṭhiṇṭhākarālāya savācya tam || 148 ||
[Analyze grammar]

dattvā svābharaṇaṃ tasmai tirobhūya viveśa ca |
gatvā nāgapure devagṛhastambhāgraputrikām || 149 ||
[Analyze grammar]

ṭhiṇṭhākarālo 'pi tatas tadviyogaviṣāhataḥ |
na dadarśa na śuśrāva luloṭha bhuvi mūrcchitaḥ || 150 ||
[Analyze grammar]

aho rahasyaṃ matvāpi mūḍhenāviṣkṛtaṃ mayā |
nisargacapalānāṃ hi mādṛśāṃ saṃyamaḥ kutaḥ || 151 ||
[Analyze grammar]

tadidānīmayaṃ prāpto viyogo viṣamo mayā |
ityādilabdhasaṃjñaś ca kitavo vilalāpa saḥ || 152 ||
[Analyze grammar]

kṣaṇāccācintayatkālo vaiklavyasyaiva naiva me |
gṛhītadhair yaḥ śāpāsntahetostasyā na kiṃ yate || 153 ||
[Analyze grammar]

ity ālocya vicāryātha pravrāḍveṣaṃ vidhāya saḥ |
sākṣasūtrājinajaṭaṃ dhūrto nāgapuraṃ yayau || 154 ||
[Analyze grammar]

tatrāṭavyāṃ catasṛṣu nyadhāddikṣu purādbahiḥ |
kāntālaṃkārakalaśānnikhāya caturo bhuvi || 155 ||
[Analyze grammar]

pañcamaṃ ca mahāratnasapūrṇaṃ nicakhāna saḥ |
nagarāntarniśi svair aṃ devāgrāpaṇabhūtale || 156 ||
[Analyze grammar]

evaṃ kṛtvā sa tatrāsīnnadyāstīre kṛtoṭajaḥ |
āśritya kaitavatapaḥ kṛtakadhyānajapyavān || 157 ||
[Analyze grammar]

kurvandinasya triḥ snānaṃ bhuñjāno bhaikṣyamambubhiḥ |
prakṣālya dṛṣadi prāpa sa mahātāpasaprathām || 158 ||
[Analyze grammar]

kramāc chrutipathāyāto rājñā so 'bhyarthito 'pi yat |
nāgātadantikaṃ tatsa rājā tatpārśvamāyayau || 159 ||
[Analyze grammar]

sthitvā kathābhiś ca ciraṃ sāyaṃ tasmin yiyāsati |
rājñy akasmāc chivā cakre śabdaṃ tatra vidūrataḥ || 160 ||
[Analyze grammar]

tac chrutvā tāpasacchadmā kitavo hasati sma saḥ |
kimetaditi pṛṣṭaś ca kimanenetyabhāṣata || 161 ||
[Analyze grammar]

nirbandhāc ca nṛpe pṛcchatyuvācaivaṃ sa māyikaḥ |
aṭavyāṃ nagarasyāsya pūrvato vetasītale || 162 ||
[Analyze grammar]

ratnābharaṇapūrṇo 'sti kalaśastadgṛhāṇa tam |
ity uktaṃ me rutajñasya nṛpate śivayaitayā || 163 ||
[Analyze grammar]

uktvaivaṃ kautukāviṣṭaṃ nītvā taṃ tatra bhūpatim |
khātvā sa bhūmimuddhṛtya tasmai taṃ kalaśaṃ dadau || 164 ||
[Analyze grammar]

tataḥ sa labdhābharaṇaḥ saṃjātapratyayo nṛpaḥ |
jñāninaṃ satyavācaṃ taṃ mene niḥspṛhatāpasam || 165 ||
[Analyze grammar]

ānīya svāśramaṃ taṃ ca muhurnatvā ca pādayoḥ |
sa yayau mandiraṃ naktaṃ sāmātyastadguṇānstuvan || 166 ||
[Analyze grammar]

evaṃ kramāttamāyāntaṃ dhūrto rutamiṣānnṛpam |
so 'nyāṃs trīn ratnakalaśān digbhyo 'nyabhyo vyalambhayat || 167 ||
[Analyze grammar]

tataḥ sa rājā paurāś ca mantriṇo 'ntapurāṇi ca |
tattāpasaikabhaktāni tanmayānyeva jajñire || 168 ||
[Analyze grammar]

ekadā nīyamānaś ca devāgārekṣaṇāya saḥ |
rājñā kutāpaso 'śrauṣīd āpaṇe kākavāśitam || 169 ||
[Analyze grammar]

tato 'bravīttaṃ rājānaṃ śrutā kākasya vāktvayā |
āpaṇe 'traiva devāgre nikhāto bhuvi tiṣṭhati || 170 ||
[Analyze grammar]

sadratnapūrṇaḥ kalaśaḥ kasmātso 'pi na gṛhyate |
ity etad uktaṃ kākena tadehi svīkuruṣva tat || 171 ||
[Analyze grammar]

ity uktvā tatra nītvā taṃ bhūmer uddhṛtya bhūbhṛte |
sadratnakalaśaṃ prādāt sa tasmai kūṭatāpasaḥ || 172 ||
[Analyze grammar]

tato 'tiparitoṣātsa svayaṃ has te 'valambya tam |
kapaṭajñāninaṃ rājā devāgāraṃ praviṣṭavān || 173 ||
[Analyze grammar]

tatra stambhe samādhūya parivrāṭ sālabhañjikām |
anupraviṣṭāṃ priyayā kalāvatyā dadarśa tām || 174 ||
[Analyze grammar]

kalāvatī ca tatsālabhañjikārūpadhāriṇī |
duḥkhitā taṃ patiṃ dṛṣṭvā prārebhe tatra roditum || 175 ||
[Analyze grammar]

taddṛṣṭvā sānugo rājā savismayaviṣādavān |
jñānābhāsamapṛcchattaṃ kimidaṃ bhagavanniti || 176 ||
[Analyze grammar]

tato viṣaṇṇavibhrānta iva dhūrto jagāda saḥ |
ehi svabhavanaṃ tatra vacmyavaktavyam apy adaḥ || 177 ||
[Analyze grammar]

ity uktvā sa nṛpaṃ nītvā rājadhānīm uvāca tam |
asthāne kumuhūrte ca devāgāramidaṃ tvayā || 178 ||
[Analyze grammar]

yatkṛtaṃ tattṛṭīye 'hni bhaviṣyatyahitaṃ tava |
atastvaddarśanātsaiṣā prārodītstambhaputrikā || 179 ||
[Analyze grammar]

taccharīreṇa cet kṛtya tava nirloṭhya tan nṛpa |
adyaivaitaddrutaṃ devakulaṃ bhūmisamaṃ kuru || 180 ||
[Analyze grammar]

susthāne sumuhūrte ca kurvanyatra surālayam |
animittaṃ śamaṃ yātu sarāṣṭrasyāstu te śivam || 181 ||
[Analyze grammar]

ity uktastena sa nṛpaḥ samājñāpya bhayātprajāḥ |
ekāhenaiva taddevagṛhaṃ bhūmisamaṃ vyadhāt || 182 ||
[Analyze grammar]

sthānāntare ca prārebhe kartuṃ devakulaṃ punaḥ |
aho viśvāsya vañcyante dhūrtaiśchadmabhir īśvarāḥ || 183 ||
[Analyze grammar]

siddhakāryas tatas tyaktvā pravrāḍveṣaṃ palāyya saḥ |
ṭhiṇṭhākarālaḥ kitavaḥ prāyād ujjayinīṃ tataḥ || 184 ||
[Analyze grammar]

kalāvatī ca tadbuddhvā śāpamuktābhyupetya tam |
mārge hṛṣṭā samāśvāsya draṣṭumindramagāddivam || 185 ||
[Analyze grammar]

indro 'pi vismito buddhvā tanmukhāttasya tatpateḥ |
māyāṃ tāṃ dyūtakārasya jahāsa ca tutoṣa ca || 186 ||
[Analyze grammar]

tataḥ prārśvasthitaḥ śakraṃ tam uvāca bṛhaspatiḥ |
vicitramāyāḥ kitavā īdṛśā eva sarvadā || 187 ||
[Analyze grammar]

purākalpe tathā cābhūnnagare kitavaḥ kva cit |
kuṭṭinīkapaṭo nāma kapaṭadyūtakovidaḥ || 188 ||
[Analyze grammar]

paralokagataṃ taṃ ca dharmarājaḥ kilābravīt |
kalpaṃ narakavāsas te kitavāsti svapātakaiḥ || 189 ||
[Analyze grammar]

ekaṃ tu dinamindratvamasti dānavaśāttava |
dattaṃ brahmavide hyekaṃ suvarṇaṃ jātucittvayā || 190 ||
[Analyze grammar]

tadbrūhi pūrvaṃ kiṃ bhuṅkṣe narakaṃ kim utendratām |
tac chrutvā kitavo 'vocadbhuñje prāgindratāmiti || 191 ||
[Analyze grammar]

tataḥ sa dharmarājena preṣitaḥ kitavo divi |
ekāhamindramutthāpya devai rājye 'bhyaṣicyata || 192 ||
[Analyze grammar]

saṃprāptadevarājyaḥ sannānāyya kitavān sakhīn |
saveśyāś ca divaṃ devānādideśādhipatyataḥ || 193 ||
[Analyze grammar]

nītvāsmānsarvatīrtheṣu sarvānsnapayata kṣaṇāt |
divyeṣv api ca bhaumeṣu saptadvīpagateṣv api || 194 ||
[Analyze grammar]

anupraviśya cādyaiva bhūpatīn nikhilān bhuvi |
prayacchata mahādānāny asmadartham anāratam || 195 ||
[Analyze grammar]

ityādiṣṭāḥ surāstena sarvaṃ cakrustadaiva tat |
dhūtapāpaḥ sa taiḥ puṇyair dhūrtaḥ prāpendratāṃ sthirām || 196 ||
[Analyze grammar]

tadvayasyāś ca veśyāś ca ye tenānāyitā divam |
amaratvaṃ yayuste 'pi tatprasādāddhatāṃhasaḥ || 197 ||
[Analyze grammar]

dvitīye 'hni sthiraprāptadevarājyam svabuddhitaḥ |
kitavaṃ dharmarājāya citraguptaḥ śaśaṃsa tam || 198 ||
[Analyze grammar]

tataḥ sucaritaṃ buddhvā dharmarājo visismiye |
aho bata dyūtakṛtā vañcitāḥ sma iti bruvan || 199 ||
[Analyze grammar]

īdṛśāḥ kitavā vajrinnity uktvā virate gurau |
ṭhiṇṭhākarālaṃ dyāmindro 'naiṣītpreṣya kalāvatīm || 200 ||
[Analyze grammar]

tatra tadbuddhidhair yābhyāṃ tuṣṭaḥ saṃmānya devarāṭ |
dattvā kalāvatīṃ cakre taṃ sa pārśvasthamātmanaḥ || 201 ||
[Analyze grammar]

tataḥ sa devavaddhīraḥ kalāvatyā samaṃ sukhī |
ṭhiṇṭhākarālo nyavasacchaṃkarānugrahāddivi || 202 ||
[Analyze grammar]

taddīdṛgdyūtakārāṇāṃ māyāsāhasayor gatiḥ |
tadagniśikha vetāla kiṃ citraṃ kitavena yat || 203 ||
[Analyze grammar]

ḍākineyena nikṣiptaḥ kūpe 'sminmāyayā bhavān |
tattvaṃ niryāhi mittrāvāṃ nireṣyāvo 'vaṭāditaḥ || 204 ||
[Analyze grammar]

ity ukto brahmarakṣobhyāṃ nirgatyāhaṃ tato 'vaṭāt |
rātrāvasyāṃ puri prāpaṃ kṣudhārtaḥ pathikaṃ dvijam || 205 ||
[Analyze grammar]

taṃ ca gṛhṇāmi dhāvitvā vipraṃ yāvajjighṛtsayā |
tāvac chrīvikramādityadevamākrandati sma saḥ || 206 ||
[Analyze grammar]

śrutvaiva ca sa nirgatya rājā jvalanasaṃnibhaḥ |
āḥ pāpa mā vadhīrvipramityārātpratihatya mām || 207 ||
[Analyze grammar]

prāvartata śiraś chettum ālekhyapuruṣasya yat |
tena me chedam āgacchan kaṇṭho 'bhūt srutaśoṇitaḥ || 208 ||
[Analyze grammar]

tato 'ṅghrilagnas tenaiva rakṣito 'smy ujjhitadvijaḥ |
evaṃprabhāvo devo 'sau vikramādityabhūpatiḥ || 209 ||
[Analyze grammar]

tadājñayā hataścāyaṃ khaṇḍakāpāliko mayā |
tadetaṃ mama vetāla bhakṣyaṃ yamaśikhaṃ tyaja || 210 ||
[Analyze grammar]

evamagniśikhenokto 'pyākṣipattatsa pāṇinā |
darpādyamaśikhaḥ khaṇḍakāpālikakalevaram || 211 ||
[Analyze grammar]

tataḥ śrīvikramādityaḥ prakāśyātmāsnamatra saḥ |
ālikhya puruṣaṃ bhūmau pāṇiṃ tasyāsinācchinat || 212 ||
[Analyze grammar]

tena cchinno yamaśikhasyāpatattasya yatkaraḥ |
tatsa taṃ kuṇapaṃ tyaktvā palāyyaivāgamadbhayāt || 213 ||
[Analyze grammar]

abhakṣayaccāgniśikhaḥ kuṇapaṃ taṃ kapālinaḥ |
ahaṃ ca nirbhayo 'drākṣaṃ sarvaṃ rājaujasā tu tat || 214 ||
[Analyze grammar]

evamākhyāya sā yakṣavadhūrmadanamañjarī |
tvatprabhāvaṃ mahārāja tatra māmavadatpunaḥ || 215 ||
[Analyze grammar]

tato vakti sma madhuraṃ sa rājānaṅgadeva mām |
yakṣi kāpālikānmuktvā gaccha bhartṛgṛhāniti || 216 ||
[Analyze grammar]

tataḥ praṇamya tamahaṃ gṛhaṃ svam idamāgatā |
cintayāntyupakārasya niṣkṛtiṃ tasya bhūpateḥ || 217 ||
[Analyze grammar]

evaṃ prāṇāḥ kulaṃ bhartā dattā me prabhuṇā tava |
tvadākhyātā ca tasyaiṣā saṃvadiṣyati matkathā || 218 ||
[Analyze grammar]

adya jñātaṃ ca yat tasya rājñastrailokyasundarī |
preṣitā siṃhalendreṇa tanayā sā svayaṃvarā || 219 ||
[Analyze grammar]

tāṃ ca hartuṃ kṛtā buddhiḥ sarvaiḥ saṃbhūya rājabhiḥ |
hatvā vikramaśaktiṃ taṃ tatsāmantaṃ samatsaraiḥ || 220 ||
[Analyze grammar]

tasmādvikramaśaktestvaṃ gatvā tadviditaṃ kuru |
yena teṣāmavahitaḥ pratīkāre sa tiṣṭhati || 221 ||
[Analyze grammar]

ahaṃ ca tatkariṣyāmi prayatnaṃ yena tānarīn |
hatvā sa vikramādityadevo vijayamāpsyati || 222 ||
[Analyze grammar]

etadartham ihānīto mayā tvaṃ nijamāyayā |
yena rājñaḥ sasāmantasyaitatsarvaṃ vadiṣyasi || 223 ||
[Analyze grammar]

prābhṛtaṃ ca praheṣyāmi tvatprabhos tasya tādṛśam |
dadyāṃ tadupakārasya leśato yena niṣkṛtim || 224 ||
[Analyze grammar]

evaṃ vadati yāvat sā tāvatte tatra kanyake |
āgate samṛge ye dve dṛṣṭe asmābhir ambudhau || 225 ||
[Analyze grammar]

ekā candrāvadātāṅgī priyaṅgusyāmalāparā |
saritpateḥ kṛtopāse jāhnavīyamune iva || 226 ||
[Analyze grammar]

niṣaṇṇayostayostāṃ ca yakṣīṃ devāsmi pṛṣṭavān |
devi ke kanyake ete sauvarṇo 'yaṃ mṛgaś ca kaḥ || 227 ||
[Analyze grammar]

tac chrutvā sā mahārāja yakṣiṇī mām abhāṣata |
anaṅgadeva yadi te kautukaṃ vacmi tacchṛṇu || 228 ||
[Analyze grammar]

vighnāyājagmatuḥ pūrvaṃ prajāsarge prajāpateḥ |
ghorau ghaṇṭanighaṇtākhyau dānavau devadurjayau || 229 ||
[Analyze grammar]

tayor vināśakāmaś ca vidhātā kanyake ime |
jagadunmādanoddāmarūpaśobhe vinirmame || 230 ||
[Analyze grammar]

dṛṣṭvaivātyadbhute caite harantau tau mahāsurau |
parasparaṃ yudhyamānau jagmaturdvāvapi kṣayam || 231 ||
[Analyze grammar]

tato brahmā dhanādhyakṣāyaite kanye samarpayat |
tvayā yogyāya kasmaicidbhartre deye ime iti || 232 ||
[Analyze grammar]

dhanado 'yarpayadime madbhartre svānujanmane |
madbhartā cārpayanmahyaṃ tathaiva varakāraṇam || 233 ||
[Analyze grammar]

mayā śrīvikramādityaścānayościntito varaḥ |
devāvatāro hyucitaḥ sa eva patiretayoḥ || 234 ||
[Analyze grammar]

evaṃrūpe ime kanye mṛgasyākhyāyikāṃ śṛṇu |
jayanto nāma tanayo dayito 'sti śacīpateḥ || 235 ||
[Analyze grammar]

sa bhrāmyamāṇaḥ svaḥstrībhir vyomnā jātu śiśurbhuvi |
rājaputrānadho 'drākṣītkrīḍato mṛgapotakaiḥ || 236 ||
[Analyze grammar]

tataḥ sa bālabhāvena krīḍāmṛgaśiśuṃ vinā |
hevākī tridivaṃ gatvā prārodītpituragrataḥ || 237 ||
[Analyze grammar]

tena tasya kṛte śakro 'kārayadviśvakarmaṇā |
sudhāsekārpitaprāṇaṃ hemaratnamayaṃ mṛgam || 238 ||
[Analyze grammar]

atha tena sa cikrīḍa jayantaḥ saṃtutoṣa ca |
so 'py atra tasthau viharannāke hariṇapotakaḥ || 239 ||
[Analyze grammar]

kālenendrajitānvarthanāmnā rāvaṇasūnunā |
so 'pahṛtyā mṛgo ninye laṅkāṃ svanagarīṃ divaḥ || 240 ||
[Analyze grammar]

gate ca kāle hatayoḥ sitāharaṇamanyunā |
rāmalakṣmaṇavīrābhyāṃ rāvaṇendrajitostayoḥ || 241 ||
[Analyze grammar]

laṅkārājye 'bhiṣiktasya rākṣasendrasya mandire |
vibhīṣaṇasya so 'tiṣṭhadratnahemamṛgo 'dbhutaḥ || 242 ||
[Analyze grammar]

vibhīṣaṇaś ca taṃ mahyamutsave jātucidgṛhān |
nītāyai bhartṛbāndhavyānmṛgaṃ saṃmānayannadāt || 243 ||
[Analyze grammar]

so 'yaṃ mṛgaśiśur divyo vartate 'dya gṛhe mama |
mayā ca tvatprabhoreṣa kartavyo 'yam upāyanam || 244 ||
[Analyze grammar]

iti sā yāvadākhyāti yakṣiṇī me kathākramam |
tāvatkamalinīkānto ravirastam upāyayau || 245 ||
[Analyze grammar]

tatas tayā samādiṣṭe dhāmni saṃdhyāvidheḥ param |
siṃhaleśvaradūto 'yamahaṃ ca śayitāvubhau || 246 ||
[Analyze grammar]

prātaḥ prabuddhau saṃmānya kuśalaṃ paripṛcchya ca |
siṃhaleśvarasaṃdeśaṃ yāvannau praṣṭumicchati || 247 ||
[Analyze grammar]

tato vicintya yakṣiṇyās tatprabhāvavijṛmbhitam |
pārśvaṃ vikramaśakter drāg gatāv āvāṃ savismayau || 248 ||
[Analyze grammar]

sa ca dṛṣṭvaiva saṃmānya kuśalaṃ paripṛcchya ca |
siṃhaleśvarasaṃdeśaṃ yāvan nau praṣṭum icchati || 249 ||
[Analyze grammar]

tāvat te yakṣiṇīproktasvarūpe divyakanyake |
mṛgapotaś ca saṃprāptās tatra yakṣacamūvṛtāḥ || 250 ||
[Analyze grammar]

tān dṛṣṭvā duṣṭabhūtādimāyāśaṅkī sa saṃśayāt |
deva vikramaśaktirmāṃ kimetaditi pṛṣṭavān || 251 ||
[Analyze grammar]

tataḥ sasiṃhalādhīśakāryaṃ tasmāyahaṃ kramāt |
yakṣiṇīkanyakāyugmamṛgodantamavarṇayam || 252 ||
[Analyze grammar]

yakṣīmukhāc chrutaṃ taṃ ca sarveṣāmaikamatyataḥ |
rājadviṣṭodyamaṃ rājñāṃ tasyāvocasmahaṃ tataḥ || 253 ||
[Analyze grammar]

tataḥ sa saṃmānyāvāṃ ca divyakanye ca te ubhe |
prahṛṣṭaḥ sainyam akarot sāmantaḥ sajjamāhave || 254 ||
[Analyze grammar]

kṣaṇāccaśrāvi devātra sainyatūryamahāravaḥ |
kṣaṇāccādarśi samlecchaṃ pratirājabalaṃ mahat || 255 ||
[Analyze grammar]

anyonyadarśanakrodhādabhidhāvitayostayoḥ |
prāvartata dvayor yuddhamasmatsainyārisainyayoḥ || 256 ||
[Analyze grammar]

tato yakṣīvisṛṣṭais tair yakṣair asmaddviṣadbalam |
anyair asmadbhaṭāviṣṭair anyaiḥ sakyādahanyata || 257 ||
[Analyze grammar]

sainyareṇugaṇākīrṇaṃ khaḍgadhārāsnirantaram |
saśūragarjitaṃ ghoramudabhūdraṇadurdinam || 258 ||
[Analyze grammar]

chedocchaladbhir dviṣatāṃ nipatadbhiś ca mūrdhabhiḥ |
aśobhata jayaśrīrnaḥ krīḍantī kandukair iva || 259 ||
[Analyze grammar]

kṣaṇāc ca hataśeṣāste rājāno bhagnasainikāḥ |
tvatsāmantasya kaṭakaṃ praṇatāḥ śaraṇaṃ śritāḥ || 260 ||
[Analyze grammar]

tato citasu sadvīpāsvāśāsu catasṛṣvapi |
utsāditeṣu mleccheṣu sarvabhūmīśvara tvayā || 261 ||
[Analyze grammar]

nijena bhartrā sahitā prakaṭībhūya yakṣiṇī |
deva vikramaśaktiṃ taṃ māṃ caivaṃ vadati sma sā || 262 ||
[Analyze grammar]

mayā yadetadvihitaṃ sevāmātraṃ bhavatprabhoḥ |
tadāvedyaṃ punaścaivaṃ sa vijñāpo girā mama || 263 ||
[Analyze grammar]

tvayaite pariṇetavye kanyake devanirmite |
draṣṭavye ca prasādena lālanīyo 'py ayaṃ mṛgaḥ || 264 ||
[Analyze grammar]

madīyaṃ prābhṛtaṃ hyetadity uktvā ratnasaṃcayam |
dattvā yakṣī tiro 'bhūtsā bhartrā saha sahānugā || 265 ||
[Analyze grammar]

anyedyuḥ parivāreṇa vibhavena ca bhūyasā |
āgānmadanalekhā sā siṃhaleśvarakanyakā || 266 ||
[Analyze grammar]

kṛtvā pratyudgamaṃ sātha tena vikramaśaktinā |
prāveśyata svakaṭakaṃ praṇatena praharṣataḥ || 267 ||
[Analyze grammar]

dvitīye 'hni gṛhītvā tāṃ te cobhe divyakanyake |
hemaratnamṛgaṃ taṃ ca trijagannetrakautukam || 268 ||
[Analyze grammar]

siddhakārya ihāgantuṃ devapādadidṛkṣayā |
tato vikramaśaktiḥ sa calito rājabhiḥ saha || 269 ||
[Analyze grammar]

sa ceha nikaṭaprāptaḥ sāmanto deva vartate |
āvedanāya devasya tenāvāṃ preṣitau puraḥ || 270 ||
[Analyze grammar]

taddeva siṃhalendrasya yakṣiṇyāścānurodhataḥ |
tatkanyāhariṇāndevaḥ pratyudyātu nṛpānapi || 271 ||
[Analyze grammar]

ity ukto 'naṅgadevena vikramādityabhūpatiḥ |
kṛtaṃ duḥsādhyam apitadyakṣiṇīrakṣaṇaṃ smaran || 272 ||
[Analyze grammar]

nāmanyata tṛṇāyāpi śrutvā tatpratyupakriyām |
bahu kṛtvāpi manyante svalpam eva mahāśayāḥ || 273 ||
[Analyze grammar]

hṛṣṭaś ca siṃhalādhīśadūtayuktaṃ punaḥ sa tam |
anaṅgadevaṃ hastyaśvagrāmaratnair apūrayat || 274 ||
[Analyze grammar]

nītvā dinaṃ tad atha siṃhalarājaputryās tasyās tayoḥ kamalajodbhavakanyayoś ca |
pratyudgamāya sa mahīpatirujjayinyāḥ sainyair gajāśvavahanaiḥ samamuccacāla || 275 ||
[Analyze grammar]

satkuñjaro 'ñjanagirirjayavardhanasya mattadvipo raṇabhaṭasya ca kālameghaḥ |
saṅgrāmasiddhirapi siṃhaparākramasya vīrasya vikramanidhe ripurākṣasaś ca || 276 ||
[Analyze grammar]

pavanajavo jayaketorvallabhaśakteḥ samudrakallolaḥ |
aśvau bāhusubāhvoḥ śaravego garuḍavegaśca || 277 ||
[Analyze grammar]

śyāmā kuvalayamālā kokkāṇī kīrtivarmaṇasturagī |
karkā gaṅgālaharī susaindhavī samarasiṃhasya || 278 ||
[Analyze grammar]

iti hastyaśvaṃ rājasu teṣv api caliteṣu vibhajatāmabhitaḥ |
śuśruvire 'tra ca rājani calite daṇḍādhikāriṇāṃ vācaḥ || 279 ||
[Analyze grammar]

bhūmiḥ sainyamayī tadutthitamahāśabdaikamayyo diśaḥ saṃsarpaddhvajinīvimardavilasadddhūlīmayī dyaurapi |
sarvasyādbhutatatprabhāvamahimavyāhāramayyo giras tasmin rājñi pathi prayāti sakaladvīpādhināthe 'bhavan || 280 ||
[Analyze grammar]