Chapter 5

evaṃ padmāvatī yāvattatprāptyai saṃśritā tapaḥ |
tāvat svanagaraṃ muktāphalaketuravāpya saḥ || 1 ||
[Analyze grammar]

brahmaśāpavaśāsannamānuṣyāvataro bhayāt |
vidyādharendratanayaḥ śaraṇaṃ śiśriye śivam || 2 ||
[Analyze grammar]

tamarcayaṃś ca tadgarbhagṛhācchuśrāva bhāratīm |
mā bhaiṣīrna hi te garbhavāsakleśo bhaviṣyati || 3 ||
[Analyze grammar]

mānuṣye nāpi te duḥkhaṃ bhāvi nāpi ciraṃ sthitiḥ |
janiṣyase rājasuto mahābalaparākramaḥ || 4 ||
[Analyze grammar]

tapodhanānmuneḥ kṛtsnamastragrāmamavāpsyasi |
madīyaḥ kiṃkarākhyaś ca gaṇas te bhavitānujaḥ || 5 ||
[Analyze grammar]

tatsahāyo ripūñjitvā kṛtvā kāryaṃ divaukasām |
kartāsi khecaraiśvaryaṃ padmāvatyā yutaḥ punaḥ || 6 ||
[Analyze grammar]

evaṃ śrutvā giraṃ baddhadhṛtiḥ śāpaphalāgamam |
pratīkṣamāṇa iva taṃ tasthau rājasuto 'tha saḥ || 7 ||
[Analyze grammar]

atrāntare kathāsaṃdhau pūrvasyāṃ nagaraṃ diśi |
āsīddevasabhaṃ nāma jitadevasabhaṃ śriyā || 8 ||
[Analyze grammar]

tatra merudhvajo nāma sārvabhaumo 'bhavannṛpaḥ |
sahāyo devarājasya devāsuraraṇāgame || 9 ||
[Analyze grammar]

yasya lobho yaśasyāsīnna parasve mahātmanaḥ |
taikṣṇyaṃ khaḍge na daṇḍe tu bhayaṃ pāpānna śatrutaḥ || 10 ||
[Analyze grammar]

kuṭilatvaṃ bhruvoḥ kope nāśaye yasya cābhavat |
maurvīkiṇāṅke pāruṣyaṃ bhuje na vacane punaḥ || 11 ||
[Analyze grammar]

vyadhādyudhi na koṣe tu yo dīnārātirakṣaṇam |
ratiṃ ca dharmacaryāsu śraddadhe nāṅganāsu yaḥ || 12 ||
[Analyze grammar]

tasyābhūtāmubhe cinte bhūpateḥ satataṃ hṛdi |
ekā putro na yat tasya tāvadeko 'py ajāyata || 13 ||
[Analyze grammar]

dvitīyā cāpi yatpūrvaṃ devāsuramahāhavāt |
jagmuḥ pātālamasurā hataśeṣāḥ palāyya ye || 14 ||
[Analyze grammar]

te nirgatya tato dūrātsatīrthāyatanāśramān |
vināśyaiva cchalāttasya pātālamasakṛdyayuḥ || 15 ||
[Analyze grammar]

na ca tān prāpa sa nṛpaḥ pātālavyomacāriṇaḥ |
tejasvī tena saṃtepe niḥsapatne 'pi bhūtale || 16 ||
[Analyze grammar]

etaccintākulo jātu śakraprahitasadrathaḥ |
devāsthānaṃ yayau so 'tra caitraśukladināgame || 17 ||
[Analyze grammar]

śakrasya vatsarārambhe sarvāsthānaṃ tathāhi tat |
tadrathena sa yāti sma rājā merudhvajaḥ sadā || 18 ||
[Analyze grammar]

tadā tu tatra divyastrīnṛttagītākule 'pi saḥ |
saṃmānito 'pi śakreṇa niḥśvasannāsta bhūpatiḥ || 19 ||
[Analyze grammar]

tad dṛṣṭvā jñātahṛdayo devarājo jagāda tam |
rājañjānāmyahaṃ yatte duḥkhaṃ tanmā ca bhūttava || 20 ||
[Analyze grammar]

muktāphaladhvajākhyas te śivāṃśo janitā sutaḥ |
eko gaṇāvatāraś ca dvitīyo malayadhvajaḥ || 21 ||
[Analyze grammar]

tapodhanānmunervidyāḥ kāmarūpaṃ ca vāhanam |
muktāphaladhvajaḥ prāpsyatyastrāṇi ca sahānujaḥ || 22 ||
[Analyze grammar]

mahāpāśupatāstraṃ ca punaḥ prāpya sa durjayaḥ |
kariṣyati vaśe pṛthvīṃ pātālaṃ ca hatāsuraḥ || 23 ||
[Analyze grammar]

tvaṃ ca vyomacarāv etau samahāstrau gṛhāṇa me |
vāraṇaṃ kāñcanagiriṃ tathā kāñcanaśekharam || 24 ||
[Analyze grammar]

ity uktvāstragajāndattvā preṣitaḥ so 'tha vajriṇā |
āgānmerudhvajo hṛṣṭo bhūtale nagaraṃ nijam || 25 ||
[Analyze grammar]

te tu cchalakṛtāvadyās tasya pātālasaṃśrayāt |
khecaratvaṃ gatasyāpi prāpyā nāsan kilāsurāḥ || 26 ||
[Analyze grammar]

tataḥ śakrāc chrutasyāsau rājā putrecchur āśramam |
tapodhanasya tasyarṣer yayau divyebhavāhanaḥ || 27 ||
[Analyze grammar]

tatrābhigamya tamṛṣiṃ śakrādeśaṃ nivedya tam |
bhagavannādiśopāyaṃ śīghraṃ me 'treti so 'bravīt || 28 ||
[Analyze grammar]

sa ca tasyācireṇeṣṭasiddhaye munirādiśat |
vratamārādhanaṃ śaṃbhoḥ sabhāryasya mahībhujaḥ || 29 ||
[Analyze grammar]

sa tenārādhayām āsa vratenorvīpatiḥ śivam |
tuṣṭaḥ sa ca vibhuḥ svapne tam evamavadannṛpam || 30 ||
[Analyze grammar]

uttiṣṭha rājan prāptāsi krameṇaivāvilambitam |
śeṣāsuravināśāya dvau putrāvaparājitau || 31 ||
[Analyze grammar]

etac chrutvā prabudhyaiva prātaruktvā muneś ca saḥ |
sabhāryaḥ pāraṇaṃ kṛtvā rāja svapuramāyayau || 32 ||
[Analyze grammar]

tatra tasya mahādevī rājñī merudhvajasya sā |
ṛtuṃ dinaiḥ katipayaiḥ pratipede sulakṣaṇā || 33 ||
[Analyze grammar]

tasyāḥ sa garbhe samabhūn muktvā śāpavaśena tām |
vaidyādharīṃ tanum muktāphalaketur atarkitam || 34 ||
[Analyze grammar]

sā ca tasya tanus tatra nije candrapure pure |
vidyāprabhāvād amlānā tasthau bāndhavarakṣitā || 35 ||
[Analyze grammar]

sāpi merudhvajasyātra rājño devasabhe pure |
rājñī sagarbhā saṃpadya nandayām āsa taṃ patim || 36 ||
[Analyze grammar]

yathā yathā ca sā rājñī jajñe garbhabharālasā |
tathā tathā sa sotsāhastasyāḥ patirabhūnnṛpaḥ || 37 ||
[Analyze grammar]

prāpte ca samaye putraṃ sāsūta smārkasaṃnibham |
bālamevogramahasaṃ kumāram iva pārvatī || 38 ||
[Analyze grammar]

babhūva cotsavaḥ kṛtsne na paraṃ vasudhātale |
yāvannabhastale 'pyāsīddevaprahatadundubhau || 39 ||
[Analyze grammar]

svayam āgān muniś cātra divyadṛk sa tapodhanaḥ |
diṣṭyā vardhayituṃ merudhvajaṃ taṃ pṛthivīpatim || 40 ||
[Analyze grammar]

tena sākaṃ sa muninā nāmnā śakroditena tam |
muktāphaladhvajaṃ cakre putraṃ rājā kṛtotsavaḥ || 41 ||
[Analyze grammar]

tato gate munau tasmiṃs tasya saṃvatsarāntare |
rājño dvitīyastanayo rājñāṃ tasyāmajāyata || 42 ||
[Analyze grammar]

taṃ ca nāmnā sa nṛpatiścakāra malayadhvajam |
tathaiva harṣāyātena tenaiva muninā saha || 43 ||
[Analyze grammar]

tataḥ saṃyatakaḥ so 'pi śāpāttanmantriṇaḥ sutaḥ |
jajñe nāma pitā cāsya mahābuddhiriti vyadhāt || 44 ||
[Analyze grammar]

tatas tau siṃhaśāvābhāv avardhetāṃ nṛpātmajau |
krameṇa tejasā sārdhaṃ mantriputreṇa tena ca || 45 ||
[Analyze grammar]

gateṣv athāṣṭamātreṣu varṣeṣu sa tapodhanaḥ |
etyopanayanaṃ cakre rājasūnvostayor muniḥ || 46 ||
[Analyze grammar]

aṣṭau cānyāni varṣāṇi vidyāsu ca kalāsu ca |
mahāstreṣu ca sarveṣu vinīyete sma tena tau || 47 ||
[Analyze grammar]

tato yuvānau dṛṣṭvā tau sarvaśastrās trayodhinau |
putrau kṛtinamātmānaṃ mene merudhvajo nṛpaḥ || 48 ||
[Analyze grammar]

atha taṃ svāśramaṃ gantum icchantaṃ so 'bravīn munim |
abhīṣṭā dakṣiṇedānīṃ bhagavan gṛhyatām iti || 49 ||
[Analyze grammar]

eṣaiva dakṣiṇābhīṣṭā mama tvatto mahīpate |
asurān yajñahantṝn yat saputro me haniṣyasi || 50 ||
[Analyze grammar]

ityūcivāṃsamavadattaṃ maharṣiṃ sa bhūpatiḥ |
ata evādhunā grāhyā bhagavandakṣiṇā tvayā || 51 ||
[Analyze grammar]

tadārabhasva yajñaṃ tvaṃ tadvighnāyāsurāś ca te |
eṣyantyahaṃ ca tatkālaṃ tatraiṣyāmi saputrakaḥ || 52 ||
[Analyze grammar]

pūrvakālaṃ hi daityāste kṛtvā doṣaṃ chalena vaḥ |
khamutpatya nipatyābdhau pātālamagamanmune || 53 ||
[Analyze grammar]

idānīṃ tv indradattau me vidyete khacarau gajau |
tābhyāṃ saha saputras tān prāpsyāmi vyomagān api || 54 ||
[Analyze grammar]

tac chrutvā sa munistuṣṭas tam uvāca narādhipam |
tarhi tvaṃ yajñasaṃbhāraṃ yathāyogyaṃ kuruṣva me || 55 ||
[Analyze grammar]

yāvaddigviśrutaṃ gatvā tatra yāgaṃ samārabhe |
preṣayāmi ca vo dūtaṃ śiṣyametaṃ dṛḍhavratam || 56 ||
[Analyze grammar]

saṃjātakāmagoddāmamahābalakhagākṛtim |
muktāphaladhvajasyāsya bhavitā saiṣa vāhanam || 57 ||
[Analyze grammar]

ity uktvā sa muniḥ prāyātsvāśramaṃ sa ca bhūpatiḥ |
prāhiṇotsarvasaṃbhārāṃstasyānupadam eva tān || 58 ||
[Analyze grammar]

prārabdhe tena yajñe ca miladdevarṣisaṃsadi |
buddhvā pātālanilayā dānavāḥ kṣobham āyayuḥ || 59 ||
[Analyze grammar]

tajjñātvā sa muniḥ śiṣyaṃ prāhiṇottaṃ dṛḍhavratam |
śāspakalpitapakṣīndrarūpaṃ devasabhaṃ puram || 60 ||
[Analyze grammar]

tatra prāptaṃ ca taṃ dṛṣṭvā smṛtvā munivacaś ca saḥ |
sajjīcakāra tau divyau rājā merudhvajo gajau || 61 ||
[Analyze grammar]

āruroha tayor mukhyaṃ sa kāñcanagiriṃ svayam |
kanīyase ca putrāya dadau kāñcanaśekharam || 62 ||
[Analyze grammar]

dṛḍhavratakhagendraṃ ca taṃ sa muktāphaladhvajaḥ |
ārurohāttadivyāstro bandivṛndābhivanditaḥ || 63 ||
[Analyze grammar]

tatas te prayayur vīrās trayaḥ khecaravāhanāḥ |
dattāśiṣo dvijavaraiḥ puraḥ prahitasainikāḥ || 64 ||
[Analyze grammar]

prāptānāṃ cāśramaṃ teṣāṃ sa muniḥ prītamānasaḥ |
abhedyāḥ sarvaśastrāṇāṃ bhūyāsteti varaṃ dadau || 65 ||
[Analyze grammar]

tāvac ca dānavabalaṃ nihantuṃ yajñamāyayau |
abhyadhāvaca taddṛṣṭvā merudhvajabalaṃ nadat || 66 ||
[Analyze grammar]

prāvartata tato yuddhaṃ daityānāṃ mānuṣaiḥ saha |
daityās tu mānuṣān svasthā bhūtalasthān babādhire || 67 ||
[Analyze grammar]

tataḥ sa pakṣivahano daityānmuktāphaladhvajaḥ |
pradhāvya śaravarṣeṇa cakarta ca mamātha ca || 68 ||
[Analyze grammar]

taṃ ca dṛṣṭvā vihaṃgasthaṃ jvalantam iva tejasā |
taccheṣāḥ prādravandaityāste nārāyaṇaśaṅkitāḥ || 69 ||
[Analyze grammar]

gatvā bhayāc ca pātālaṃ sarvaṃ trailokyamāline |
tatkālaṃ daityarājāya śaśaṃsuste tathaiva tat || 70 ||
[Analyze grammar]

sa tadbuddhvā drutaṃ cārair anviṣya tamavetya ca |
muktāphaladhvajaṃ martyaṃ mānuṣābhibhavākṣamī || 71 ||
[Analyze grammar]

saṃghaṭya sarvapātāladānavānasureśvaraḥ |
vāryamāṇo 'pi śakunair yoddhumāgāttamāśramam || 72 ||
[Analyze grammar]

muktāphaladhvajādyāś ca tatraivāvahitāḥ sthitāḥ |
tam abhyadhāvan dṛṣṭvaiva sabalaṃ dānavādhipam || 73 ||
[Analyze grammar]

tataḥ pravṛtte bhūyo 'tra martyāsuramahāhave |
vimānair āyayurdraṣṭuṃ rudrendrapramukhāḥ surāḥ || 74 ||
[Analyze grammar]

muktāphaladhvajaścātra tatkṣaṇopasthitaṃ puraḥ |
dadarśālaṅghyatejaskamastraṃ pāśupataṃ mahat || 75 ||
[Analyze grammar]

atipramāṇamudvahnijvālaṃ tryakṣaṃ caturmukham |
ekāṅghrimaṣṭabāhuṃ ca kalpāntānalasaṃnibham || 76 ||
[Analyze grammar]

viddhi māṃ śaṃkarādeśādāyātaṃ vijayāya te |
iti bruvāṇaṃ so 'bhyarcya rājaputrastadagrahīt || 77 ||
[Analyze grammar]

tāvac ca gagane taistair asurair astravṛṣṭibhiḥ |
merudhvajabalaṃ tāmyadadhaḥsthitamabādhyata || 78 ||
[Analyze grammar]

tatas tadrakṣituṃ citrayodhī muktāphaladhvajaḥ |
śarajālaṃ dadau madhye yuyudhe cāsuraiḥ saha || 79 ||
[Analyze grammar]

pitṛbhrātṛyutaṃ dṛṣṭvā taṃ nabhaścaravāhanam |
trailokyamālī daityendraḥ pannagāstraṃ mumoca saḥ || 80 ||
[Analyze grammar]

tasmān nirgacchato 'saṃkhyān ghorān āśīviṣān ahīn |
garuḍair gāruḍāstrotthair ardayan malayadhvajaḥ || 81 ||
[Analyze grammar]

tato yadyatsa daityendraḥ saputro 'stramavāsṛjat |
muktāphaladhvajastattannirāsyat tasya helayā || 82 ||
[Analyze grammar]

atha kruddhaḥ sa devāristatputro 'nye ca dānavāḥ |
āgneyādīni yugapattasminnastrāṇi cikṣipuḥ || 83 ||
[Analyze grammar]

tāni tasyāgrato dṛṣṭvā sthitaṃ pāśupataṃ jvalat |
bhītānyastrāṇi sarvāṇi vimukhāni kṣaṇādyayuḥ || 84 ||
[Analyze grammar]

tatas te yāvadicchanti bhītā daityāḥ palāyitum |
tāvattadāśayaṃ buddhvā vīro muktāphaladhvajaḥ || 85 ||
[Analyze grammar]

babandha teṣām ūrdhvaṃ ca caturdikkaṃ ca tatkṣaṇam |
śarajālaṃ sa durbhedaṃ vajrapañjarasaṃnibham || 86 ||
[Analyze grammar]

tatrāntarbhramatastāṃś ca śakuntāniva dānavān |
pitrā bhrātrā ca sahitaḥ sa jaghāna śitaiḥ śaraiḥ || 87 ||
[Analyze grammar]

nipetuś ca karāḥ pādāḥ śarīrāṇi śirāṃsi ca |
chinnāni teṣāṃ daityānāmavahaṃścāsranimnagāḥ || 88 ||
[Analyze grammar]

sādhuvāde tato datte puṣpavarṣānuge suraiḥ |
mohanāstraṃ dadau teṣāṃ dviṣāṃ muktāphaladhvajaḥ || 89 ||
[Analyze grammar]

tena saṃmohitān bhūmau patitāṃs tān sarājakān |
asurān vāruṇāstreṇa pāśabaddhāṃś cakāra saḥ || 90 ||
[Analyze grammar]

tapodhano 'tha so 'vādīnmerudhvajanṛpaṃ muniḥ |
na vadhyamāsuraṃ sainyaṃ hataśeṣamidaṃ khalu || 91 ||
[Analyze grammar]

svīkṛtena hy anenaiva pravekṣyadhvaṃ rasātalam |
daityendrastu saputro 'yaṃ baddhvā nītvā samantrikaḥ || 92 ||
[Analyze grammar]

mahāsurair duṣṭanāgair yukto mukhyaiś ca rākṣasaiḥ |
sthāpyo devasabhāsanne śvetaśailaguhāntare || 93 ||
[Analyze grammar]

ity ukto muninā daityayodhānmerudhvajo 'bravīt |
mā bhaiṣṭa yūyaṃ nāsmābhir vadhyā sabhrātṛkasya tu || 94 ||
[Analyze grammar]

muktāphaladhvajasyāsya vartadhvaṃ śāsane 'dhunā |
ity uktā dānavā rājñā hṛṣṭāstatpratipedire || 95 ||
[Analyze grammar]

tataḥ sa rājā taṃ daityarājaṃ trailokyamālinam |
putrādibhistaiḥ sahitaṃ śvetaśailamanāyayat || 96 ||
[Analyze grammar]

tadguhābhyantare taṃ ca sthāpayām āsa saṃyatam |
bhūriśūrabalopetapradhāsnāmātyarakṣitam || 97 ||
[Analyze grammar]

tato nivṛtte saṅgrāme muktamandaravṛṣṭiṣu |
vaimānikeṣu yāteṣu pravṛtte jagadutsave || 98 ||
[Analyze grammar]

sa tatra putrau vakti sma rājā merudhvajo jayī |
ihaiva yajñarakṣārthamahaṃ tiṣṭhāmi saṃprati || 99 ||
[Analyze grammar]

yuvāṃ prayātaṃ pātālametaiḥ svaiḥ sainikaiḥ saha |
prāptadaityavimānaughaiḥ śeṣāsurabalena ca || 100 ||
[Analyze grammar]

āśvāsya sthāpayitvā ca vaśe pātālavāsinaḥ |
pradhānādhiṣṭhitān kṛtvā svīkṛtyehāgamiṣyathaḥ || 101 ||
[Analyze grammar]

etac chrutvā tathetyāśu divyakāmagavāhanaḥ |
muktāphaladhvajo vīraḥ sa cāpi malayadhvajaḥ || 102 ||
[Analyze grammar]

rasātalaṃ viviśatuḥ sasainyau bhrātarāvubhau |
saha dānavasainyena praṇatenāgrayāyinā || 103 ||
[Analyze grammar]

hatvā carakṣiṇaḥ sthānasthāneṣu paripanthinaḥ |
adātāmatra tau śeṣajanasyābhayaḍiṇḍimam || 104 ||
[Analyze grammar]

viśvastapraṇate caitau jane sapta rasātalāsn |
svīcakratuḥ puraśatair nānāratnamayair yutān || 105 ||
[Analyze grammar]

bubhujāte ca tān ramyān udyānaiḥ sarvakāmadaiḥ |
divyāsavabhṛtān ekaratnasopān avāpikaiḥ || 106 ||
[Analyze grammar]

tatrādbhutākṛtī tau ca dadṛśurdānavāṅganāḥ |
tatkanyāś ca taruṣvantarmāyācchāditavigrahāḥ || 107 ||
[Analyze grammar]

ārebhe ca tadā tatra bharturbaddhasya śarmaṇe |
tapaḥ svayaṃprabhā nāma bhāryā trailokyamālinaḥ || 108 ||
[Analyze grammar]

tasyāḥ sute ca trailokyaprabhātribhuvanaprabhe |
ārebhāte tapastadvatkumāryau śreyase pituḥ || 109 ||
[Analyze grammar]

tau ca rājasutau tatra pātāle sakalaṃ janam |
labdhapraśamanasvasthaṃ saṃmānya vividhaiḥ priyaiḥ || 110 ||
[Analyze grammar]

sthāpayitvā ca saṅgrāmasiṃhādīnadhikāriṇaḥ |
tapovanāśramapadaṃ pituḥ pārśvam upeyatuḥ || 111 ||
[Analyze grammar]

tāvattatra muneryajñaḥ sa samāptim upāyayau |
gantuṃ prārebhir e devāḥ svadhiṣṇyānyṛṣayas tathā || 112 ||
[Analyze grammar]

tato merudhvajaḥ śakraṃ parituṣṭaṃ vyajijñapat |
āgamyatāṃ mannagaraṃ deva tuṣṭo 'si cenmayi || 113 ||
[Analyze grammar]

tac chrutvā tatpriyāyāgānmunimāmantrya vāsavaḥ |
rājñā tena saputreṇa saha devasabhaṃ puram || 114 ||
[Analyze grammar]

tatra copācarattaṃ sa rājā lokadvayeśvaraḥ |
tathā śakraṃ yathā divyaṃ sukhaṃ vismarati sma saḥ || 115 ||
[Analyze grammar]

tataḥ prītaḥ sa śakro 'pi taṃ saputraṃ mahīpatim |
divyātmavāhanārūḍhaṃ nināya svaṃ triviṣṭapasm || 116 ||
[Analyze grammar]

tatra nāradarambhādisaṃgītasukhasundare |
sa viśramayya taṃ merudhvajaṃ samalayadhvajam || 117 ||
[Analyze grammar]

muktāphaladhvajaṃ cendraḥ pārijātamayīḥ srajaḥ |
dattvā sadivyamukuṭāḥ saṃmānya prāhiṇodgṛham || 118 ||
[Analyze grammar]

te cāgatyātra bhūloke pātāle ca gatāgatam |
kurvāṇāścakrire rajyaṃ nṛdevā lokayor dvayoḥ || 119 ||
[Analyze grammar]

tato merudhvajo muktāphaladhvajam uvāca saḥ |
vijitāḥ śatravaḥ putra yuvānau bhrātarau yuvām || 120 ||
[Analyze grammar]

svādhīnā rājakanyāś ca mayā tāś ca gaveṣitāḥ |
vartante prāptakālastatkriyatāṃ dārasaṃgrahaḥ || 121 ||
[Analyze grammar]

iti pitrodite 'vādītso 'tha muktāphaladhvajaḥ |
na me pariṇaye tāta manastāvat pravartate || 122 ||
[Analyze grammar]

ahaṃ tapaścariṣyāsmi saṃpratyārādhituṃ haram |
eṣa vatsastu kurutāṃ vivāhaṃ malayadhvajaḥ || 123 ||
[Analyze grammar]

etac chrutvaiva malayadhvajastaṃ so 'nujo 'bravīt |
vivāho mama yuktaḥ kimārya tvayyaparigrahe || 124 ||
[Analyze grammar]

rājyaṃ vā tvayyarājyasthe tava mārgānugo hy aham |
ity ukte tena malayadhvajenovāca bhūpatiḥ || 125 ||
[Analyze grammar]

merudhvajastaṃ tanayaṃ jyeṣṭhaṃ muktāphaladhvajam |
yuktam evāmunā tāvadanujena tavoditam || 126 ||
[Analyze grammar]

tvaṃ tvayuktaṃ vadasyetan nava evātra yauvane |
ko nāma kālastapaso bhogakālo hy ayaṃ tava || 127 ||
[Analyze grammar]

tadakālocitaḥ putra mucyatāmeṣa durgrahaḥ |
iti tenocyamāno 'pi rājñā jyeṣṭhaḥ suto 'tra ca || 128 ||
[Analyze grammar]

nāṅgīcakre yadā saṃpratyudvāhaṃ niścayena saḥ |
tadā sa nṛpatistūṣṇīṃ tasthau kālaṃ pratīkṣitum || 129 ||
[Analyze grammar]

atrāntare ca pātāle bhāryāṃ trailokyamālinaḥ |
svayaṃprabhām ūcatus tāṃ tapaḥsthe te svakanyake || 130 ||
[Analyze grammar]

āvayor amba saptāṣṭavarṣayoḥ saṃyataḥ pitā |
rājyabhraṃśaś ca saṃvṛttaḥ kasmād akṛtapuṇyayoḥ || 131 ||
[Analyze grammar]

aṣṭamaṃ varṣametac ca tapasyantyorna nau haraḥ |
prasīdati na tāto 'yaṃ mucyate 'dyāpi bandhanāt || 132 ||
[Analyze grammar]

tadyāvadāvayor na syādripoḥ paribhavo 'thavā |
nirlakṣaṇāmimāṃ tāvadanale juhuvustanum || 133 ||
[Analyze grammar]

ity uktā duhitṛbhyāṃ sā jagādaivaṃ svayaṃprabhā |
putryau pratīkṣyatāṃ tāvadudayo hy asti naḥ punaḥ || 134 ||
[Analyze grammar]

tapaḥsthitāṃ hi māṃ svapne jāne devo 'bravīcchivaḥ |
vatse kuryā dhṛtiṃ rājyaṃ punaḥ prāpsyati te patiḥ || 135 ||
[Analyze grammar]

muktāphaladhvajaścaiṣa tathaiva malayadhvajaḥ |
duhitrostava bhartārau rājaputrau bhaviṣyataḥ || 136 ||
[Analyze grammar]

mānuṣāviti mā caitau vijñāsīretayor yataḥ |
eko vidyādharavaro dvitīyo māmako gaṇaḥ || 137 ||
[Analyze grammar]

ityādiṣṭeśvareṇāhaṃ prabuddhā rajanīkṣaye |
ityāśayaitayā caiṣa soḍhaḥ kleśo mahānmayā || 138 ||
[Analyze grammar]

tasmādāvedayāmyetadarthaṃ yuṣmatpituḥ prabhoḥ |
tadicchayā yatiṣye ca yuṣmadudvāhasiddhaye || 139 ||
[Analyze grammar]

evamāśvāsya sā rājñī kanyake sve svayaṃprabhā |
uvācendumatīṃ nāma vṛddhāmantaḥpurastriyam || 140 ||
[Analyze grammar]

āryaputrasya nikaṭaṃ śvetaśailaguhāṃ vraja |
nipatya pādayostaṃ ca vijñāpaya girā mama || 141 ||
[Analyze grammar]

nirmitāsmi mahārāja dhātrānyenaiva dāruṇā |
tvadviyogāgninādyāpi na dahye jvalatāpi yā || 142 ||
[Analyze grammar]

ātmā tu na mayā tyaktaḥ punastvaddarśanāśayā |
ity uktvā māmakaṃ śārvaṃ svapnādeśaṃ nivedayeḥ || 143 ||
[Analyze grammar]

tataḥ kanyāvivāhārthaṃ pṛcchestaṃ yac ca vakṣyati |
tattvayāgatya me vācyaṃ vidhāsye 'haṃ tathāvidham || 144 ||
[Analyze grammar]

ity uktvendumatīṃ tāṃ sā praiṣayatsāpi nirgatā |
pātālātprāpa tacchailaguhādvāraṃ surakṣitam || 145 ||
[Analyze grammar]

rakṣiṇo 'bhyarthya tatrāntaḥ praviśyālokya saṃyatam |
trailokyamālinaṃ taṃ sā sāśrurjagrāha pādayoḥ || 146 ||
[Analyze grammar]

tatpṛṣṭakuśalā tac ca śanaistasmai śaśaṃsa sā |
kṛtsnaṃ svabhāryāsaṃdeśaṃ tato rājā jagāda saḥ || 147 ||
[Analyze grammar]

yaḥ prokto rājyalābho naḥ śarveṇāstu tathaiva saḥ |
merudhvajasyātmajayoḥ kanyādāne tu kā kathā || 148 ||
[Analyze grammar]

ihaivāhaṃ vipadyeya na tu dadyāṃ nijātmaje |
śatrubhyāṃ mānuṣābhyāṃ ca saṃyataḥ sannupāyanam || 149 ||
[Analyze grammar]

ity uktvendumatī rājñā preṣitā tena sā tataḥ |
etya svayaṃprabhāyai tattatpatnyai tadvaco 'bhyadhāt || 150 ||
[Analyze grammar]

śrutvā tatas te trailokyaprabhātribhuvanaprabhe |
daityendrakanye jananīmūcatustāṃ svayaṃprabhām || 151 ||
[Analyze grammar]

āvayor yauvanabhayadagnirevādhunā gatiḥ |
tadambāsyāṃ caturdaśyāṃ tatpraveśaṃ vidadhvahe || 152 ||
[Analyze grammar]

kṛtaniścayayor evaṃ tayoḥ sāpy akarottadā |
niścayaṃ maraṇāyaiva tanmātā saparicchadā || 153 ||
[Analyze grammar]

prāptāyāṃ ca caturdaśyāṃ tāḥ pāparipunāmani |
tīrthe sarvāścitāś cakrurarcitvā hāṭakeśvaram || 154 ||
[Analyze grammar]

tāvanmerudhvajo rājā tithau tasyāṃ saputrakaḥ |
sabhāryaścāyayau tāvaddhāṭakeśvaramarcitum || 155 ||
[Analyze grammar]

sa pāpariputīrthaṃ tatsnānārthaṃ sānugo vrajan |
dūraddadarśa tattīre vanāntardhūmamudgatam || 156 ||
[Analyze grammar]

dhūmodgamaḥ kuto 'treti pṛcchantaṃ taṃ ca bhūpatim |
ūcuḥ saṅgrāmasiṃhādyāḥ pātālādhikṛtā nijāḥ || 157 ||
[Analyze grammar]

trailokyāmālino bhāryā mahārāja svayaṃprabhā |
duhitṛbhyāṃ kumārībhyāṃ sahātra tapasi sthitā || 158 ||
[Analyze grammar]

nūnaṃ tā agnikāryādi kiṃcid atrādya kurvate |
yadi vātitapaḥkhinnāḥ kurvantyagnipraveśanam || 159 ||
[Analyze grammar]

tac chrutvā saha putrābhyāṃ patnyā taiścādhikāribhiḥ |
draṣṭuṃ sa rājā tatrāgānniṣiddhānyaparicchadaḥ || 160 ||
[Analyze grammar]

dadarśa cātra pracchannaḥ sthitas te daityakanyake |
samātṛke pūjayantyau susamiddhaṃ citānalam || 161 ||
[Analyze grammar]

mukhalāvaṇyasaṃdohaniḥsyandair dikṣu sarvataḥ |
candrabimbaśatānīva racayantyau rasātale || 162 ||
[Analyze grammar]

lolahārāmbupūrābhyāṃ kāmasyevābhiṣecanam |
kucakāñcanakumbhābhyāṃ kurvatyau trijagajjaye || 163 ||
[Analyze grammar]

bibhrāṇe jaghanābhogaṃ vipulaṃ baddhamekhalam |
nakṣatramālāṅkam iva smasradvipaśiraḥsthalam || 164 ||
[Analyze grammar]

vahantyau keśapāśau ca pannagāviva nirmitau |
dātrā lāvaṇyasarvasvanidhānaṃ rakṣituṃ tayoḥ || 165 ||
[Analyze grammar]

dṛṣṭvā te cintayāsmāsa sa rājā jātavismayaḥ |
aho viśvasṛjaḥ sṛṣṭirlasannavanavādbhutā || 166 ||
[Analyze grammar]

tadetayor na rambhāpi norvaśī na tilottamā |
rūpe bhajati tulyatvamasurādhipakanyayoḥ || 167 ||
[Analyze grammar]

iti cintayatas tasya rājñaḥ sā daityakanyakā |
jyeṣṭhārcayitvā trailokyaprabhā vahniṃ vyajijñapat || 168 ||
[Analyze grammar]

uktaḥ svapnaharādeśo yataḥ prabhṛti me 'mbayā |
tataḥ prabhṛti baddhvaiva bhartṛbuddhiryato mayā || 169 ||
[Analyze grammar]

tasmin guṇanidhau rājaputre muktāsphaladhvaje |
tat sa eva patir bhūyād bhagavan me 'nyajanmani || 170 ||
[Analyze grammar]

iha janmani tātena saṃyatasthena māninā |
ditsitāpyambayā tasmai dātuṃ nāṅgīkṛtāsmi yat || 171 ||
[Analyze grammar]

tac chrutvā tadvadevātra sāpi tribhuvanaprabhā |
vavre hutāśānmalayadhvajaṃ janmāntare patim || 172 ||
[Analyze grammar]

tato merudhvajo rājā sa tacchravaṇaharṣulaḥ |
tadbhāryā ca mahādevī parasparamavocatām || 173 ||
[Analyze grammar]

prāpnuyātāmime bhārye yadyasmattanayāvimau |
tadetābhyāmavāptaṃ syāllokadvayajayātphalam || 174 ||
[Analyze grammar]

tadyāvadasminnanale nātmānaṃ kṣipataḥ kṣaṇam |
tāvatkiṃ nopasṛtyaite vārayāmaḥ samātṛke || 175 ||
[Analyze grammar]

evaṃ devyā sahālocya rājāvocadupetya tāḥ |
mā kārṣṭa sāhasaṃ duḥkhaṃ śamayiṣyāmyahaṃ hi vaḥ || 176 ||
[Analyze grammar]

śrutvaitacchrotrapīyūṣavarṣābhaṃ bhūpatervacaḥ |
dṛṣṭvā ca taṃ tāḥ sakalāḥ praṇemurasurāṅganāḥ || 177 ||
[Analyze grammar]

paśyanto 'pi vayaṃ pūrvaṃ māyācchannā na lakṣitāḥ |
lokadvayeśvareṇeha dṛṣṭāḥ smo 'dya punas tvayā || 178 ||
[Analyze grammar]

tvaddṛṣṭānāṃ ca duḥkhānto bhavatyevācireṇa naḥ |
kiṃ punaḥ svagirā datte devenābhyarthite vare || 179 ||
[Analyze grammar]

tadgṛhṇītārghyapādyādi kṛtāsanaparigrahāḥ |
bhavanto hi jagatpūjyā ayaṃ casmākamāśramaḥ || 180 ||
[Analyze grammar]

iti svayaṃprabhāmuktavatīmāha hasannṛpaḥ |
jāmātṛbhyāṃ tvayaitābhyāṃ pādyārghyaṃ dīyatāmiti || 181 ||
[Analyze grammar]

tataḥ svayaṃprabhāvādīttadetābhyāṃ vṛṣadhvajaḥ |
devo dāpayitārghādi yuṣmābhistvadya gṛhyatām || 182 ||
[Analyze grammar]

merudhvajo jagādātha sarvamāttamidaṃ mayā |
yūyaṃ ca maraṇodyogānnivartadhvamito 'dhunā || 183 ||
[Analyze grammar]

praviśya tiṣṭhataikasminsvapure sarvakāmade |
tato 'ham eva jñāsyāmi yathā vaḥ kuśalaṃ bhavet || 184 ||
[Analyze grammar]

ity uktavantaṃ rājānaṃ sā jagāda svayaṃprabhā |
devādeśānnivṛttāḥ smaḥ śarīratyāganiścayāt || 185 ||
[Analyze grammar]

kārāsthe tu prabhau yuktā kathaṃ naḥ svagṛhasthitiḥ |
tadihaiva vayaṃ tāvattiṣṭhāsmo deva saṃprati || 186 ||
[Analyze grammar]

yāvaddevaḥ svayaṃ dattaṃ varaṃ naḥ pālayiṣyati |
sasutāmātyamasmākaṃ mocayiṣyati ca prabhum || 187 ||
[Analyze grammar]

muktastvadadhikārī sansa ca rājyaṃ kariṣyati |
arpayiṣyati rājyaṃ ca tubhyam eva tvadicchayā || 188 ||
[Analyze grammar]

samayapratibandhaṃ ca sa kariṣyati tādṛśam |
antarasthā vayaṃ cātra saha pātālavāsibhiḥ || 189 ||
[Analyze grammar]

pātālebhyo 'smadīyāni ratnāni svīkuruṣva ca |
evam uktavatīṃ tāṃ sa rājā merudhvajo 'bravīt || 190 ||
[Analyze grammar]

vijñāsyāmy ahamevaitatsmartavyaṃ svavacastu vaḥ |
ity uktvā sa nṛpaḥ snātvā hāṭakeśamapūjayat || 191 ||
[Analyze grammar]

daityarājasute te ca tayor evaṃ svadṛṣṭayoḥ |
tatputrayostadekāgragatacitte babhūvatuḥ || 192 ||
[Analyze grammar]

atha sa rasātalanilayair nikhilaistrailokyamālino muktim |
praṇipatya yācyamāno rājā merudhvajaḥ sukṛtī || 193 ||
[Analyze grammar]

chattraiḥ svayaśaḥśubhraiḥ sthagayannāśāḥ sadārasutabhṛtyaḥ |
nirgatyāsuralokāttasmādāgānnijaṃ nagaram || 194 ||
[Analyze grammar]

tatrāsya putro malayadhvajastāṃ kanīyasīṃ dānavarājaputrīm |
dhyāyannanidro 'pi nimīlitākṣaḥ smasrajvarārto rajanīṃ nināya || 195 ||
[Analyze grammar]

sadhair yajaladhistu tām apivicintya muktāphaladhvajo 'surapateḥ sutāṃ dṛḍhanibaddhabhāvāṃ yuvā |
munīndramanasām apismaravikāradāṃ jyāyasīṃ purārthitavaro munerna khalu cukṣubhe cetasā || 196 ||
[Analyze grammar]

merudhvajas tu tam avetya sutaṃ niṣiddhadārakriyaṃ smaravaśaṃ malayadhvajaṃ ca |
kanyāpradānavimukhaṃ ca mahāsuraṃ tam āsīd upāyaghaṭanākulacittavṛttiḥ || 197 ||
[Analyze grammar]