Chapter 4

tato vakrapure tatra sthitamāsthānavartinam |
naravāhanadattaṃ taṃ nūtanaṃ cakravartinam || 1 ||
[Analyze grammar]

anyedyur avatīryaiva vetrahasto nabhastalāt |
upagamya pumānekaḥ praṇamyaivaṃ vyajijñapat || 2 ||
[Analyze grammar]

cakravartipratīhāraṃ viddhi deva kramāgatam |
māṃ paurarucidevākhyaṃ svasevārtham upāgatam || 3 ||
[Analyze grammar]

tac chrutvā so 'mitagatermukhamaikṣata tena ca |
satyaṃ deveti vijñaptaḥ kṣattṛtve 'bhinananda tam || 4 ||
[Analyze grammar]

atha prabhāvato buddhvā vegavatyādibhiḥ saha |
tatpatnībhir dhanavatī caṇḍasiṃhaś ca tatsutaḥ || 5 ||
[Analyze grammar]

tathā piṅgalagāndhāro rājā vāyupathānvitaḥ |
samaṃ sāgaradattena tatra citrāṅgadaś ca saḥ || 6 ||
[Analyze grammar]

āyayuḥ sainyaruddhārkāḥ saha hemaprabhādibhiḥ |
paratejo 'sahiṣṇutvaṃ sūcayanta ivāgrataḥ || 7 ||
[Analyze grammar]

upetya pādayos tasya nipetuścakravartinaḥ |
so 'pi saṃmānayām āsa yathārhaṃ svāgatena tān || 8 ||
[Analyze grammar]

dhanavatyāstu caraṇau gauravātpraṇanāma saḥ |
sāpi jāmātaraṃ prītā tamāśīrbhir avardhayat || 9 ||
[Analyze grammar]

uktātmasiddhivṛttāntastena te prabhuṇā tataḥ |
caṇḍasiṃhādayaḥ sarve pramodaṃ sutarāṃ dadhuḥ || 10 ||
[Analyze grammar]

pārśvopayāstāḥ patnīś ca dṛṣṭvā dhanavatīṃ tadā |
cakravartī sa papraccha kva te me sacivā iti || 11 ||
[Analyze grammar]

kṣiptā mānasavegena rakṣitvā sthāpitā mayā |
vidyāmukhena te bhinnā iti sā pratyuvāca tam || 12 ||
[Analyze grammar]

tataś cānāyayat tān sa vidyāmādiśya rūpiṇīm |
āgatān pṛṣṭhakuśalān pādalagnāñ jagāda ca || 13 ||
[Analyze grammar]

iyanto divasāḥ kena kathaṃ kutrātivāhitāḥ |
ityekakena yuṣmābhiś citraṃ me kathyatāmiti || 14 ||
[Analyze grammar]

tato 'vādītsvavṛttāntamādāvevaṃ sa gomukhaḥ |
dviṣā kṣiptaṃ tadā kāpi devī māṃ hastayor adhāt || 15 ||
[Analyze grammar]

āśvāsya dūre 'raṇye ca sthāpayitvā tirodadhe |
tato 'haṃ duḥkhito dehaṃ tyaktumaicchaṃ prapātataḥ || 16 ||
[Analyze grammar]

maivaṃ gomukha siddhārthaṃ punardrakṣyasi taṃ prabhum |
iti māṃ tapasastāvatko 'py upetya nyavārayat || 17 ||
[Analyze grammar]

kastvaṃ kathaṃ ca vetsyetadity uktaś ca mayā tataḥ |
ehyāśramaṃ me vakṣyāmi tatraitaditi so 'bravīt || 18 ||
[Analyze grammar]

tato mannāmavijñānasūcitajñānasaṃpadā |
ahaṃ tena sahāgacchaṃ śivakṣetraṃ tadāśramam || 19 ||
[Analyze grammar]

tatra me sa kṛtātithyaḥ kathāṃ svāmevam abhyadhāt |
nāgasvāmīti nāmāhaṃ kuṇḍinākhyātpurāddvijaḥ || 20 ||
[Analyze grammar]

pitari svargate so 'haṃ gatvā pāṭaliputrakam |
jayadattam upādhyāyaṃ vidyāhetor upāsadam || 21 ||
[Analyze grammar]

śikṣyamāṇo 'pi jāḍyena na yadākṣaram apy aham |
avidaṃ tena māṃ tatra cchāttrāḥ sarve 'py upāhasan || 22 ||
[Analyze grammar]

tato 'vamānagrasto 'haṃ prasthito vindhyavāsinīm |
draṣṭum ardhapathe prāpaṃ puraṃ vakrolakābhidham || 23 ||
[Analyze grammar]

tatra mahyaṃ praviṣṭāya bhikṣārthaṃ gṛhiṇī gṛhāt |
ekasmādraktakamalaṃ pradadau bhikṣayā saha || 24 ||
[Analyze grammar]

tadgṛhītvāparaṃ gehaṃ prāptaṃ māṃ vīkṣya cābravīt |
tatratyā gehinī hā dhigyoginyā svīkṛto bhavān || 25 ||
[Analyze grammar]

paśya datto nṛhastas te raktābjavyājato 'nayā |
tac chrutvā yāvadīkṣe 'haṃ tāvat pāṇiḥ sa nāmbujam || 26 ||
[Analyze grammar]

tattyaktvātha patitvāsyāḥ pādayor aham abravam |
mātaḥ kuruṣvopāyaṃ me yathā jīvāmy ahaṃ tathā || 27 ||
[Analyze grammar]

tac chrutvā māmavādītsā gaccheto yojanatraye |
devarakṣita ityasti grāme karabhake dvijaḥ || 28 ||
[Analyze grammar]

tasyāsti kapilā gehe sākṣātsurabhir uttamā |
sādya tvāṃ śaraṇaṃ prāptaṃ rakṣiṣyati niśāmimām || 29 ||
[Analyze grammar]

evaṃ tayoktaḥ sabhayo dhāvann asmi dinakṣaye |
prāptavān karabhagrāme gṛhaṃ tasya dvijanmanaḥ || 30 ||
[Analyze grammar]

praviśya tatra dṛṣṭvāhaṃ kapilāṃ tāṃ praṇamya ca |
bhītastvāṃ śaraṇaṃ devi prāpto 'smīti vyajijñapam || 31 ||
[Analyze grammar]

tāvat sā tarjayantī māmanyābhiḥ saha yoginī |
tatrāgānnabhasā naktaṃ manmāṃsarudhirārthinī || 32 ||
[Analyze grammar]

taddṛṣṭvā kapilā sātha khuramadhye niveśya mām |
arakṣadyodhayantī tā yoginīrakhilāṃ niśām || 33 ||
[Analyze grammar]

prātastāsu gatāsveṣā kapilā vyaktayā girā |
māmavocanna putrāhaṃ tvāṃ śakṣyāmyadya rakṣitum || 34 ||
[Analyze grammar]

tadgaccha pañcayojanyāmito 'raṇye śivālaye |
asti bhūtiśivo nāma jñānī pāśupatottamaḥ || 35 ||
[Analyze grammar]

sa rakṣiṣyati rātriṃ tvāmadyaikāṃ śaraṇāgatam |
tac chrutvā tāṃ praṇamyaiva tato 'haṃ prasthito 'bhavam || 36 ||
[Analyze grammar]

drutaṃ bhūtiśivaṃ taṃ ca prāpyāhaṃ śaraṇaṃ śritaḥ |
naktaṃ ca tatra yoginyas tās tathaivāgaman punaḥ || 37 ||
[Analyze grammar]

tataḥ praveśya mām antargṛhaṃ bhūtiśivaḥ sa tāḥ |
triśūlahasto dvārastho yoginīr nirabhartsayat || 38 ||
[Analyze grammar]

jitvaitā bhojayitvā māṃ prātarbhūtiśivo 'bhyadhāt |
brahmanna śakṣyāmyadhunā rakṣituṃ tvāmahaṃ punaḥ || 39 ||
[Analyze grammar]

tadasti saṃdhyavāsākhye yojaneṣu daśasvitaḥ |
grāme vasumatir nāma viprastasyātikaṃ vraja || 40 ||
[Analyze grammar]

tatas tṛtīyām adya tvaṃ rātrim uttīrya mokṣyase |
ity uktas tena natvā taṃ tataḥ prasthitavān aham || 41 ||
[Analyze grammar]

gacchataś cādhvano dairghyād gato 'staṃ me 'ntarā raviḥ |
yoginyas tāś ca māṃ naktam agṛhṇannetya pṛṣṭhataḥ || 42 ||
[Analyze grammar]

māṃ gṛhītvā ca yāvattā hṛṣṭā yānti vihāyasā |
tāvattāsāṃ puro 'pūrvā yoginyo 'nyāḥ parāpatan || 43 ||
[Analyze grammar]

tābhiḥ sahodabhūdāsāmakasmādyuddhamuddhatam |
tena tāsāmahaṃ hastādbhraṣṭo deśe 'tinirjane || 44 ||
[Analyze grammar]

ekamevātha tatrāhamapaśyaṃ mandiraṃ mahat |
praviśeti bruvadiva dvāreṇāpāvṛtena mām || 45 ||
[Analyze grammar]

palāyyābhyantare tatra praviśyāhaṃ bhayākulaḥ |
adrākṣamadbhutākārāṃ nārīṃ nārīśatānvitām || 46 ||
[Analyze grammar]

prakāśamānāṃ prabhayā pradoṣajvalitāmiva |
rakṣāmahauṣadhiṃ sṛṣṭāṃ dhātrā madanukampayā || 47 ||
[Analyze grammar]

kṣaṇānmayā samāśvasya pṛṣṭā sā mām abhāṣata |
yakṣiṇyahaṃ sumittrākhyā śāpādevamiha sthitā || 48 ||
[Analyze grammar]

mānuṣeṇa ca me saṅgaḥ pradiṣṭaḥ śāpaśāntaye |
tanmāmaśaṅkitaprāpto bhajasva bhava nirbhayaḥ || 49 ||
[Analyze grammar]

ity uktvā kṣipramāviśya dāsīḥ snānavilepanaiḥ |
vastrair āhārapānaiś ca hṛṣṭaṃ sā mām upācarat || 50 ||
[Analyze grammar]

kva ḍākinībhir bhītiḥ sā kva sukhaṃ tac ca tatkṣaṇam |
acintyo bata daivenāpyāpātaḥ sukhaduḥkhayoḥ || 51 ||
[Analyze grammar]

tatas tayā samaṃ tatra yakṣiṇyā tāny ahāny aham |
sukhamāsam atha svairam ekadā sābravīc ca mām || 52 ||
[Analyze grammar]

kṣīṇaḥ śāpaḥ sa me brahmaṃstadito 'dya vrajāmy aham |
matprasādāca divyaṃ te vijñānaṃ saṃbhaviṣyati || 53 ||
[Analyze grammar]

tapasvī siddhabhogaś ca nirbhayaś ca bhaviṣyasi |
ihastho madgṛhasyāsya mā drākṣīrmadhyamaṃ puram || 54 ||
[Analyze grammar]

evam uktvā tiro 'bhūtsā tato 'haṃ kautukena tat |
madhyamaṃ puramārūḍhastatrāpaśyaṃ turaṃgamam || 55 ||
[Analyze grammar]

tenāhaṃ nikaṭaprāptaḥ kṣipto 'śvena khurāhataḥ |
kṣaṇād adrākṣam ātmānaṃ sthitam asmiñ śivālaye || 56 ||
[Analyze grammar]

tataḥ prabhṛti cātrāhaṃ sthitaḥ siddho 'smi ca kramāt |
taditthaṃ mānuṣasyāpi trikālajñānamasti me || 57 ||
[Analyze grammar]

evaṃ ca kleśabahulāḥ sarvasyāpīha siddhayaḥ |
tad ihāssva tavābhīṣṭasiddhiṃ śaṃbhur vidhāsyati || 58 ||
[Analyze grammar]

ity ukto jñāninā tena tatreyanti dināny aham |
tvatpādaprāptijātāsthaḥ sthito 'bhūvaṃ tadāśrame || 59 ||
[Analyze grammar]

svapnādiṣṭabhavatsiddhiḥ śarveṇādya kila prabho |
kayāpy ahamihānīto gṛhītvā divyayā striyā || 60 ||
[Analyze grammar]

ityeṣa mama vṛttānta ity uktvā gomukhe sthite |
naravāhanadattāgre marubhūtirathābravīt || 61 ||
[Analyze grammar]

kṣiptaṃ mānasavegena māṃ tadā kāpi devatā |
pāṇyorvidhāya vinyasya dūre 'ṭavyāṃ tiro 'bhavat || 62 ||
[Analyze grammar]

tato 'haṃ tatra duḥkhārto maraṇopāyacintayā |
bhrāmyannadīparikṣiptaṃ dṛṣṭavānekamāśramam || 63 ||
[Analyze grammar]

tatra praviśya cāpaśyam upaviṣṭaṃ śilātale |
jaṭābhistāpasaṃ taṃ ca praṇamyāham upāgamam || 64 ||
[Analyze grammar]

kastvaṃ kathamanuprāpto 'syetāṃ bhūmimamānuṣīm |
iti pṛṣṭaś ca tenāhaṃ tasmai sarvamavarṇayam || 65 ||
[Analyze grammar]

tataḥ sa buddhvāvocan māṃ mātmānaṃ sāṃprataṃ vadhīḥ |
jñāsyasīha prabhor vārtāṃ tataḥ kartāsi yatkṣamam || 66 ||
[Analyze grammar]

iti tadvacanādyuṣmadvārtājijñāsayā sthite |
mayi tatra striyo divyā nadīṃ tāṃ snātumāgaman || 67 ||
[Analyze grammar]

so 'tha māṃ tāpaso 'vādīdgacchāsyā vastramānaya |
āsu snāntyāstvamekasyā vārtāṃ jñāsyasyataḥ prabhoḥ || 68 ||
[Analyze grammar]

tac chrutvāhaṃ tathākārṣaṃ māmanvāgāc ca sā vadhūḥ |
hṛtavastrārdravasanā sahastasvastikastanī || 69 ||
[Analyze grammar]

naravāhanadattasya vartāmākhyāya vāsasī |
gṛhāṇetyuditā tena tāpasenātha sābravīt || 70 ||
[Analyze grammar]

naravāhanadatto 'dya haramārādhayansthitaḥ |
kailāse divasair vidyādharasamrāḍ bhaviṣyati || 71 ||
[Analyze grammar]

evam uktavatī tasya saṃpede tāpasasya sā |
bhāryā śāpavaśāddivyā tatkathāsaṃstavādvadhūḥ || 72 ||
[Analyze grammar]

tatas tayā samaṃ tasthau vidyādharyā sa tāpasaḥ |
tadgirā cāhamatrāsaṃ jātāsthastvatsamāgame || 73 ||
[Analyze grammar]

dinaiḥ sagarbhā ca satī garbhaṃ dyustrī prasūya tam |
sāvocattāpasaṃ śāntaḥ śāpastvatsaṅgato mama || 74 ||
[Analyze grammar]

bhūyo matsaṅgavāñchā te yadi tattaṇḍulaiḥ saha |
paktvā bhuktvānvagādetāṃ khamutpatya sa tāpasaḥ || 75 ||
[Analyze grammar]

ity uktvāsyām prayātāyām etadgarbhaṃ sataṇḍulam |
paktvā bhuktvānvagād etaṃ bhuṅkṣva prāpsyasi mām tataḥ || 76 ||
[Analyze grammar]

ahaṃ tadukto 'pyādau tannāśnāṃ siddhimavekṣya tu |
bhaktasikthadvayaṃ prāpya pākabhāṇḍādabhakṣayam || 77 ||
[Analyze grammar]

tena yatrāham aṣṭhīvam abhūt tat tatra kāñcanam |
athādainyaḥ paribhrāmyan prāpam ekam ahaṃ puram || 78 ||
[Analyze grammar]

tatra veśyāgṛhe hemnā tenodāravyayasya me |
vasato vamanaṃ prādājjijñāsuḥ kuṭṭanī chalāt || 79 ||
[Analyze grammar]

tena me vamato bhāsvatpadmarāganibhe ubhe |
prāgbhuktabhaktasikthe te mukhena niragacchatām || 80 ||
[Analyze grammar]

nirgate eva kuṭṭanyā gṛhīte bhakṣite ca te |
naṣṭātha hemasiddhiḥ sā kuṭṭanyāpahṛtā tayā || 81 ||
[Analyze grammar]

sacandrārdhaḥ śivo 'dyāspi hariryaccaḥ sakaustubhaḥ |
tattayor vedmi kuṭṭanyā gocarāpatane phalam || 82 ||
[Analyze grammar]

kiṃ cedṛgeṣa saṃsāro bahvāścaryo bahucchalaḥ |
paricchettuṃ kadā kena samudra iva pāryate || 83 ||
[Analyze grammar]

ityahaṃ vimṛśan khinnas tvatprāptyai caṇḍikāgṛham |
agacchaṃ tapasā devīṃ tām ārādhayituṃ tataḥ || 84 ||
[Analyze grammar]

trirātropoṣitaṃ sā māṃ devī svapne samādiśat |
siddhakāmaḥ sa te svāmī saṃpanno gaccha paśya tam || 85 ||
[Analyze grammar]

etac chrutvā prabuddho 'smi prātardevyā kayāpy aham |
tvatpādamūlamānīta ityeṣā deva me kathā || 86 ||
[Analyze grammar]

ity uktavantaṃ kuṭṭanyā marubhūtiṃ viḍambitam |
naravāhanadatto 'sau jahāsa saha pārśvagaiḥ || 87 ||
[Analyze grammar]

tato hariśikho 'vādītprāstaṃ māṃ ripuṇā tadā |
ujjayinyāṃ nyadhātkāpi rakṣitvā deva devatā || 88 ||
[Analyze grammar]

tatrāhaṃ duḥkhito dehaṃ tyaktumicchanniśāgame |
gatvā śmaśānaṃ tatratyaiḥ kāṣṭhair aracayaṃ citām || 89 ||
[Analyze grammar]

tāṃ prajvālya ca tatrāgniṃ pūjayantam upetya mām |
tālajaṅgha iti khyāto bhūtādhipatirabhyadhāt || 90 ||
[Analyze grammar]

kimarthaṃ praviśasyagniṃ sthito jīvansa te prabhuḥ |
pūrṇasvasiddhikāmena tena tvaṃ saṃgamiṣyasi || 91 ||
[Analyze grammar]

iti māṃ maraṇātprītyā sa krūro 'pi nyavārayat |
grāvāṇo 'pyārdratāṃ samyagbhajantyabhimukhe vidhau || 92 ||
[Analyze grammar]

gatvā tato 'haṃ devāgre tapasyaṃś ca tataḥ sthitaḥ |
tavānītaḥ kayāpyadya pārśvaṃ devatayā prabho || 93 ||
[Analyze grammar]

evaṃ hariśikhenokte tathaivānyair api kramāt |
naravāhanadatto 'sau rājāmitagatergirā || 94 ||
[Analyze grammar]

tāmarhantīṃ dhanavatīṃ prerya vidyādharārcitām |
tebhyaḥ svasacivebhyo 'pi vidyāḥ sarvā adāpayast || 95 ||
[Analyze grammar]

tato vidyādharībhūteṣveṣu tatsaciveṣv api |
śatrūñjayādhunety ukto dhanavatyā śubhe 'hani || 96 ||
[Analyze grammar]

sa cakravartī sainyānāṃ prayāṇārambhamādiśat |
vīro govindakūṭākhyaṃ gaurimuṇḍapuraṃ prati || 97 ||
[Analyze grammar]

athoccacāla cchannārkaṃ vidyādharabalaṃ divi |
vair iśītakarākālarāhūdayakṛtabhramam || 98 ||
[Analyze grammar]

naravāhanadatto 'pi svayamāruhya karṇikām |
tasya padmavimānasya bhāryāḥ svāḥ kesareṣu ca || 99 ||
[Analyze grammar]

āropya pattreṣu sakhīṃścaṇḍasiṃhādikeṣu ca |
puraḥsareṣu nabhasā pratasthe vijayāya saḥ || 100 ||
[Analyze grammar]

gacchaṃścārdhapathaprāpte tasthau dhanavatīgṛhe |
tadarcitaḥ saṃs tadaharmātaṅgapurasaṃjñake || 101 ||
[Analyze grammar]

tatrasthaścāhavāhvāne dūtamekaṃ vyasarjayat |
vidyādhareśayor gaurimuṇḍamānasavegayoḥ || 102 ||
[Analyze grammar]

anyedyus tatra mātaṅgapure patnīrnidhāya saḥ |
govindakūṭaṃ taṃ prāyādrājabhir dyucaraiḥ saha || 103 ||
[Analyze grammar]

tatra yuddhāya tau gaurimuṇḍamānasavegakau |
nirgatau pratyagṛhṇaṃste caṇḍasiṃhādayo 'grataḥ || 104 ||
[Analyze grammar]

pravṛttasamarādiṣṭapatatsubhaṭapādapaḥ |
so 'bhūdgovindakūṭādriḥ sravadrudhiranirjharaḥ || 105 ||
[Analyze grammar]

raktaliptalasatkhaḍgajatājihvo vyajṛmbhata |
saṅgrāmakālaḥ śūrāṇāṃ jighatsurjīvitāni saḥ || 106 ||
[Analyze grammar]

māṃsāsṛṅmattavetālatālavādyaviśaṅkaṭaḥ |
abhūnnṛtyatkabandho 'sau bhūtaprītyai raṇotsavaḥ || 107 ||
[Analyze grammar]

atha mānasavegaṃ taṃ raṇe 'smin saṃmukhāgatam |
naravāhanadattaḥ sa svayamabhyapatatkrudhā || 108 ||
[Analyze grammar]

abhipatya ca keśeṣu gṛhītvā tasya tatkṣaṇam |
cakravartī sa ciccheda śiraḥ khaḍgena pāpmanaḥ || 109 ||
[Analyze grammar]

taddṛṣṭvā kupitaṃ tatra gaurimuṇḍaṃ pradhāvitam |
keśeṣvākṛṣya taddṛṣṭinaṣṭavidyābalaṃ bhuvi || 110 ||
[Analyze grammar]

kṣiptvā gṛhītvāṅghriyuge bhrāmayitvā nabhastale |
naravāhanadatto 'sau taṃ śilāyāmacūrṇayat || 111 ||
[Analyze grammar]

evaṃ tena tayor gaurimuṇḍamānasavegayoḥ |
hatayostadbalaṃ śeṣamagādbhītaṃ palāyya tat || 112 ||
[Analyze grammar]

papāta puṣpavṛṣṭiś ca tasyāṅge cakravartinaḥ |
gaganasthāḥ surāḥ sarve sādhu sādhviti cābruvan || 113 ||
[Analyze grammar]

athātra gaurimuṇḍasya rājadhānīṃ viveśa saḥ |
naravāhanadattas taiḥ svaiḥ sarvai rājabhiḥ saha || 114 ||
[Analyze grammar]

tadaiva gaurimuṇḍādisaṃbaddhās tasya śāsanam |
etya vidyādharādhīśāḥ praṇatāḥ pratipedire || 115 ||
[Analyze grammar]

tato 'tra nihatārātirājyaprāptyutsavāntare |
upetya taṃ dhanavatī sā samrājaṃ vyajijñapat || 116 ||
[Analyze grammar]

devāsti gaurimuṇḍasya sutā trailokyasundarī |
tāmihātmanikānāmnīm upayacchasva kanyakām || 117 ||
[Analyze grammar]

ity uktaḥ sa tayā rājā tāmānāyyaiva tatkṣaṇam |
upayeme tayā sākamāsīc ca tadahaḥ sukham || 118 ||
[Analyze grammar]

prātar mānasavegasya purān madanamañcukām |
ānāyayad vegavatīprabhāvatyau visṛjya saḥ || 119 ||
[Analyze grammar]

ānītā harṣabāṣpārdravikasvaramukhī patim |
udayasthaṃ hatārātitamasaṃ pravilokya tam || 120 ||
[Analyze grammar]

śūraṃ virahadoṣānte bheje kam apisaṃmadam |
sāvaśyāyajalotphullakamalā nalinīva sā || 121 ||
[Analyze grammar]

so 'pi tasyai mudā dattvā sarvavidyāścirotsukaḥ |
reme tayā samaṃ sadyaḥ prāptavidyādharatvayā || 122 ||
[Analyze grammar]

nināya tāni cāhāni bhāryābhiḥ saha tatra saḥ |
gaurimuṇḍapurodyānavartī pānādilīlayā || 123 ||
[Analyze grammar]

prabhāvatīṃ visṛjyātha bhāgīrathayaśā api |
ānāyitābhūt tenātha vidyāś cāsyai sa dattavān || 124 ||
[Analyze grammar]

ekadā ca tamāsthānavartinaṃ cakravartinam |
yathāvadetya vijñaptavantau vidyādharāvubhau || 125 ||
[Analyze grammar]

āvāmuttaravedyardhaṃ devābhūva gatāvitaḥ |
jñātuṃ mandaradevasya ceṣṭāṃ dhanavatīgirā || 126 ||
[Analyze grammar]

tatra dṛṣṭaḥ sa cāsthānagato vidyādhareśvaraḥ |
āvābhyāṃ channadehābhyām evaṃ yuṣmān prati bruvan || 127 ||
[Analyze grammar]

śrutaṃ mayā yannihatā gaurimuṇḍādayo 'khilāḥ |
naravāhanadattena prāpya vidyādhareśatām || 128 ||
[Analyze grammar]

tadupekṣy ona so 'smābhir hantavyastūdbhavanripuḥ |
etac chrutvā vacastasmādāvāṃ vaktumihāgatau || 129 ||
[Analyze grammar]

iti cāramukhāc chrutvā babhau kopākulā sabhā |
naravāhanadattasya padminīvānilāhatā || 130 ||
[Analyze grammar]

citrāṅgadasya bāhū svau vidhūtaprasṛtau punaḥ |
amārgatāmivādeśaṃ yoddhuṃ valayaniḥsvanaiḥ || 131 ||
[Analyze grammar]

hāro 'mitagater vakṣasy utphalañ śvasataḥ krudhā |
uttiṣṭhottiṣṭha vīra tvam itīva muhur abravīt || 132 ||
[Analyze grammar]

bhūmiṃ piṅgalagāndhāraḥ kareṇa ghnansaśabdakam |
cūrṇanopakramoṃkāram iva vyadhita vairiṇām || 133 ||
[Analyze grammar]

mukhe vāyupathasyāpi bhrukuṭiḥ pādamādadhe |
kopenāropitā cāpalatevāntāya vidviṣām || 134 ||
[Analyze grammar]

saṃkruddhaḥ pāṇinā pāṇiṃ caṇḍasiṃhaḥ pramardayan |
evaṃ vinirmathāmy asmiñ śatrūn ity abhyadhād iva || 135 ||
[Analyze grammar]

bāhuḥ sāgaradattasya karāsphālanajanmanā |
śabdena mūrcchatā vyomni ripumāhvayateva tam || 136 ||
[Analyze grammar]

naravāhanadattas tu kope 'pyāsīdanākulaḥ |
akṣobhyataiva mahatāṃ mahattvasya hi lakṣaṇam || 137 ||
[Analyze grammar]

dyucāricakravartyaṅgaratnasādhanapūrvakam |
śatruṃ sa jetuṃ cakre 'tra yātrāyai niścayaṃ tadā || 138 ||
[Analyze grammar]

athāruhya vimānaṃ tatsabhāryaḥ sacivānvitaḥ |
cakravartī pratasthe sa tato govindakūṭataḥ || 139 ||
[Analyze grammar]

te ca sarve 'pi gandharvarājavidyādharādhipāḥ |
sabalāḥ parivṛttyaitaṃ celuścandram iva grahāḥ || 140 ||
[Analyze grammar]

dhanavatyāṃ purogāyāmathāsādya himācalam |
naravāhanadattaḥ sa prāpadekaṃ mahatsaraḥ || 141 ||
[Analyze grammar]

sitapadmocchritacchatramullasaddhaṃsacāmaram |
upasthitamivādāya samrāḍyogyam upāyanam || 142 ||
[Analyze grammar]

uccair abhimukhodastair vīcihastair adūrataḥ |
kurvatsāmrājyasaṃsiddhisnānāhvānamivāsakṛt || 143 ||
[Analyze grammar]

cakravartinsarasyasminsnātavyaṃ bhavateti saḥ |
samrāḍ vāyupathenoktas tatra snātumavātarat || 144 ||
[Analyze grammar]

nācakravartinaḥ snānaṃ siddyatyatra tadadya te |
siddhaṃ taccakravartitvamiti divyābravīc ca vāk || 145 ||
[Analyze grammar]

tac chrutvā cakravartī sa praviṣṭastajjalāntare |
cikrīḍāntaḥpuraiḥ sākaṃ pāthaspatirivāmbudhau || 146 ||
[Analyze grammar]

dhautāñ janāruṇadṛśaḥ ślathadhammillabandhanāḥ |
reme so 'tra priyāḥ paśyann aṅgalagnārdravāsasaḥ || 147 ||
[Analyze grammar]

saśabdamutpatantyo 'smāt sarasaḥ pattripaṅktayaḥ |
pratyudgatānāṃ raśanāstacchriyām iva rejire || 148 ||
[Analyze grammar]

tadvadhūvadanāmbhojalāvaṇyavijitāni ca |
mamajjurlajjayevātra paṅkajāni jalormiṣu || 149 ||
[Analyze grammar]

kṛtasnānaś ca tadahastasyaiva sarasastaṭe |
naravāhanadatto 'sāv uvāsa saparicchadaḥ || 150 ||
[Analyze grammar]

tatra narmakathālāpaiḥ sa bhāryāsacivaḥ kṛtī |
sthitvā prātarvimānasthaḥ pratasthe sabalas tataḥ || 151 ||
[Analyze grammar]

gacchanvāyupathasyātha prāpya mārgavaśātpuram |
tasthau tadanurodhena taṃ tatraiva sa vāsaram || 152 ||
[Analyze grammar]

atra dṛṣṭacarī tena kanyā vāyupathasvasā |
vāyuvegayaśā nāma hyudyānasthābhyavāñchyata || 153 ||
[Analyze grammar]

sā hemavālukanadītīrodyānavihāriṇī |
saṃpūrṇacandravadanā saumyālāpamanoramā || 154 ||
[Analyze grammar]

sitahāsā guruśroṇibhārā sadgrahaśālinī |
vīkṣyāgataṃ taṃ tadraktacittāpyantardadhe tataḥ || 155 ||
[Analyze grammar]

vilakṣo 'tha sa tāṃ matvā hetvantaraparāṅmukhīm |
naravāhanadatto 'tra nijamāvāsamāyayau || 156 ||
[Analyze grammar]

tatra gomukhavaidagdhyavaśena marubhūtinā |
vṛttaṃ rājñaḥ sahasthena vṛttāntam upalabhya tam || 157 ||
[Analyze grammar]

devyaś citrān parīhāsān samrājas tasya cakrire |
marubhūteravaidagdhyāt satrape gomukhe sthite || 158 ||
[Analyze grammar]

salajjamatha rājānaṃ vīkṣyāśvāsya ca gomukhaḥ |
vāyuvegayaśaścittaṃ jijñāsustatpuraṃ yayau || 159 ||
[Analyze grammar]

tato vāyupatho 'kasmātpuraṃ draṣṭumivāgatam |
dṛṣṭvā prītikṛtātithyo nītvaikānte jagāda tam || 160 ||
[Analyze grammar]

vāyuvegayaśā nāma kanyāsti bhaginī mama |
siddhaiḥ sā bhāvinī cakravartibhāryā kiloditā || 161 ||
[Analyze grammar]

atastāmiha ditsāmi prābhṛtaṃ cakravartine |
naravāhanadattāya tanme tvaṃ sādhayepsitam || 162 ||
[Analyze grammar]

āgantuṃ prastutaścāhametadarthaṃ tavāntikam |
iti vāyupathenokte mantrī taṃ gomukho 'bravīt || 163 ||
[Analyze grammar]

yadyapyarijigīṣārthaṃ prasthitaḥ prabhureṣa naḥ |
vijñāpaya tathāpi tvamahaṃ te sādhayāmyadaḥ || 164 ||
[Analyze grammar]

ity uktvāmantrya taṃ gatvā siddhaṃ kāryaṃ nyavedayat |
naravāhanadattāya gomukho 'bhyarthanāṃ vinā || 165 ||
[Analyze grammar]

anyedyuś ca tam atrārtham etya vāyupathe svayam |
vijñāpayati rājānaṃ taṃ dhīmān gomukho 'bravīt || 166 ||
[Analyze grammar]

na kāryo 'bhyarthanābhaṅgo deva vāyupathasya te |
bhakto 'yaṃ yadbravītyeṣa kartavyaṃ tatprabhoriti || 167 ||
[Analyze grammar]

tataḥ sa pratipede tadrājā vāyupatho 'pi tām |
tasmai prādādanicchantīm apy ānīya nijānujām || 168 ||
[Analyze grammar]

vivāhyamānā sāvocadanicchantī balādaham |
bhrātrā datteti nādharmo lokapālā mamāstyataḥ || 169 ||
[Analyze grammar]

etadbruvatyāṃ tasyāṃ ca sarvā vāyupathāṅganāḥ |
cakruḥ kolāhalaṃ yena nānye tacchuśruvurvacaḥ || 170 ||
[Analyze grammar]

tato rājñasrapādāyitadvākyāśayalabdhaye |
gomukho yuktimanveṣṭuṃ tatrābhramaditas tataḥ || 171 ||
[Analyze grammar]

bhrāntvā dadarśa caikānte vidyādharakumārikāḥ |
agnipraveśaṃ yugapaccatasraḥ kartumudyatāḥ || 172 ||
[Analyze grammar]

kāraṇaṃ tena pṛṣṭāś ca jagadus tāḥ sumadhyamāḥ |
samayollaṅghanaṃ tasmai vāyuvegayaśaḥkṛtam || 173 ||
[Analyze grammar]

tataḥ sa gomukho gatvā rājñastatsarvasaṃnidhau |
naravāhanadattāya yathāvastu nyavedayat || 174 ||
[Analyze grammar]

tadbuddhvā vismite rājñi vāyuvegayaśāstadā |
jagādottiṣṭha gacchāmastvaritaṃ rakṣituṃ vayam || 175 ||
[Analyze grammar]

āryaputra kumārīstāstato vakṣyāmi kāraṇam |
ity uktaḥ sa tayā rājā tatra sarvaiḥ samaṃ yayau || 176 ||
[Analyze grammar]

dadarśa ca kumārīstāḥ puraḥprajvalitānalāḥ |
vidhāryaitāś ca rājānaṃ vāyuvegayaśā jagau || 177 ||
[Analyze grammar]

eṣaikā kālikā nāma kālakūṭapateḥ sutā |
vidyutpuñjā dvitīyeyaṃ vidyutpuñjātmasaṃbhavā || 178 ||
[Analyze grammar]

mandarasya sutā rājaṃstṛtīyaiṣā mataṅginī |
caturthīyaṃ mahādaṃṣṭrasutā padmaprabhā prabho || 179 ||
[Analyze grammar]

pañcamyahaṃ ceti vayaṃ dṛṣṭvā tvāṃ māramohitāḥ |
siddhakṣetre tapasyantaṃ vyadadhma samayaṃ mithaḥ || 180 ||
[Analyze grammar]

samaṃ pañcabhir asmābhir āhāryo 'yaṃ priyaḥ patiḥ |
nātmārpaṇīyas tv etasmai kayācid api bhinnayā || 181 ||
[Analyze grammar]

ekā cetpṛthagetena vivāhaṃ vidadhīta tat |
praveśyo vahniranyābhir uddiśyaitāṃ sakhīdruham || 182 ||
[Analyze grammar]

etatsamayabhītāhaṃ naicchaṃ pariṇayaṃ pṛthak |
na cātmā tubhyamadhunāpyāryaputra samarpyate || 183 ||
[Analyze grammar]

mamāryaputra evātra lokapālāś ca sākṣiṇaḥ |
yadyeṣa samayo 'dyāpi svecchamullaṅghito mayā || 184 ||
[Analyze grammar]

tadāryaputra tā etā upayacchasva me sakhīḥ |
yuṣmābhir etad bhoḥ sakhyo bhāvanīyaṃ ca nānyathā || 185 ||
[Analyze grammar]

evaṃ tayokte tutuṣuḥ samāśliṣyaṃś ca tā mithaḥ |
kumāryo maraṇottīrṇā rājāpyantarjaharṣa saḥ || 186 ||
[Analyze grammar]

buddhvā tatpitaras te ca tatra tatkṣaṇam āyayuḥ |
naravāhanadattāya tasmai prāduś ca tāḥ sutāḥ || 187 ||
[Analyze grammar]

śāsanaṃ te 'pi tatkālaṃ jāmātuḥ pratipedire |
kālakūṭapatipraṣṭhās tasya vidyādhareśvarāḥ || 188 ||
[Analyze grammar]

evaṃ pañca samaṃ prāpya mahāvidyādharātmajāḥ |
naravāhanadatto 'tra māhātmyaṃ sa paraṃ yayau || 189 ||
[Analyze grammar]

tasthau ca tatra katicittābhiḥ saha dināni saḥ |
tataścaivaṃ hariśikhaḥ senāpatir uvāca tam || 190 ||
[Analyze grammar]

śāstrajño 'pi kathaṃ deva nītimullaṅghya vartase |
vigrahāvasare ko 'yaṃ kāmabhogarasastava || 191 ||
[Analyze grammar]

kvāyaṃ mandaradevaṃ taṃ jetuṃ yātrāsamudyamaḥ |
kva ceyanti dinānīha vihāro 'ntaḥpuraiḥ saha || 192 ||
[Analyze grammar]

evaṃ hariśikhenokte mahārājo jagāda saḥ |
yuktamuktaṃ prayatnastu na bhogāyātra ko'pi me || 193 ||
[Analyze grammar]

bandhuprāptiprado hyeṣa bhāryāvyatikaro mayā |
arimarde 'dhunā mukhyamaṅgamityabhinanditaḥ || 194 ||
[Analyze grammar]

tadetāni calantvadya sainyānyarijayāya me |
ity uktavantaṃ rājānaṃ śvaśuro mandaro 'bravīt || 195 ||
[Analyze grammar]

asiddhacakravartyaṅgasarvaratnasya durjayaḥ |
deva mandaradevo 'sau dūradurgamabhūmigaḥ || 196 ||
[Analyze grammar]

devamāyamahāvīrarakṣitadvāradeśayā |
agrasthayā triśīrṣākhyaguhayā hy eṣa rakṣyate || 197 ||
[Analyze grammar]

siddharatnena cākramya sā guhā cakravartinā |
taccakravartiratnaṃ yo deva candanapādapaḥ || 198 ||
[Analyze grammar]

asyāṃ bhuvyasti taṃ tāvat sādhayābhīṣṭasiddhaye |
nācakravartī nikaṭaṃ taroḥ prāpnoti tasya ca || 199 ||
[Analyze grammar]

śrutvaitanmandarādrātrau nirāhāro yatavrataḥ |
naravāhanadatto 'gāttaṃ candanataruṃ prati || 200 ||
[Analyze grammar]

gacchanvitrāsyamāno 'pi vīro vighnaiḥ sudāruṇaiḥ |
na sa tatrāsa mūlaṃ ca prāpa tasya mahātaroḥ || 201 ||
[Analyze grammar]

dṛṣṭvā ca taṃ mahāratnaṃ nibaddhottuṅgavedikam |
etyādhyāruhya sopānair vavande candanadrumam || 202 ||
[Analyze grammar]

cakravartinnayamahaṃ siddhas te candanadrumaḥ |
smṛtasya saṃnidhāsye te tadito vraja sāṃpratam || 203 ||
[Analyze grammar]

govindakūṭaṃ setsyanti ratnānyanyāni te tataḥ |
tato mandaradevaṃ tvaṃ helayaiva vijeṣyase || 204 ||
[Analyze grammar]

ity uktaś ca girā tatra sa rātrāvaśarīrayā |
tathety uktvā praṇamyaitaṃ siddhimāndivyapādapam || 205 ||
[Analyze grammar]

prahṛṣṭo vyomamārgeṇa mahāvidyādhareśvaraḥ |
naravāhanadatto 'tha nijaṃ kaṭakamāyayau || 206 ||
[Analyze grammar]

atha nītvā sa niśāṃ tāmāsthāne sarvasaṃnidhau prātaḥ |
naiśaṃ sādhitacandanapādapavṛttāntamakhilamācakhyau || 207 ||
[Analyze grammar]

tadbuddhvā dayitāś ca bālasacivāścāptāś ca vidyādharās te te vāyupathādayaḥ sakaṭakāścitrāṅgadādyāś ca te |
gandharvāḥ prasabhaprasādhitamahāsiddheḥ praharṣākulāḥ sattvotsāhadhṛtiprabhāvamahatīṃ tasyāstuvandhīratām || 208 ||
[Analyze grammar]

saṃmantrya taiḥ saha sa mandaradevadarpaṃ rājā vijetumatha divyavimānagāmī |
śeṣānyacandanatarūditaratnasiddhyai govindakūṭagirim eva jagāma tāvat || 209 ||
[Analyze grammar]