Chapter 36

tataḥ sa vindhyamullaṅghya prāpa saṃnaddhasainikaḥ |
mṛgāṅkadattaḥ sīmāntamujjayinyāḥ suhṛdyutaḥ || 1 ||
[Analyze grammar]

tadbuddhvā karmaseno 'pi rājāsya sabalo 'grataḥ |
dhīro yuddhāya saṃnahya nagaryā niragāttataḥ || 2 ||
[Analyze grammar]

nikaṭībhūya cānyonyadarśinyorubhayostayoḥ |
tatsenayoḥ pravavṛte saṃgrāmo vīraharṣaṇaḥ || 3 ||
[Analyze grammar]

nṛsiṃhanādavitrastabhagnaklībāsurākulaḥ |
so 'bhūddhiraṇyakaśipornivāsa iva saṃgaraḥ || 4 ||
[Analyze grammar]

saṃtatā vinikṛntanto ghanā gaganagāminaḥ |
subhaṭeṣviṣavaḥ petuḥ sasyeṣu śalabhā iva || 5 ||
[Analyze grammar]

khaḍgāhatebhakumbhottho babhau muktāphalotkaraḥ |
saṃrambhatruṭito hāra iva tatsamaraśriyaḥ || 6 ||
[Analyze grammar]

tīkṣṇakuntāgradaśanaṃ grastāśvanarakuñjaram |
kṛtāntasyeva vadanaṃ tadvireje raṇājiram || 7 ||
[Analyze grammar]

utphellurbhallalūnāni śirāṃsi bhujaśālinām |
divi dattordhvajhampāni divyastrīriva cumbitum || 8 ||
[Analyze grammar]

kabandhā nanṛtuścātra subhaṭānāṃ pade pade |
nirbhāsitottamasvāmisaṃgarapramadādiva || 9 ||
[Analyze grammar]

evaṃ ca pañcadivasānvahacchoṇitanimnagaḥ |
āsītkaraṅkakūṭāḍhyaḥ sa śūrāntakaro raṇaḥ || 10 ||
[Analyze grammar]

pañcame 'hni rahaḥ sāyaṃ taṃ sametaṃ svamantribhiḥ |
mṛgāṅkadattaṃ śrutadhirvipro 'bhyetya jagāda saḥ || 11 ||
[Analyze grammar]

yuṣmāsu samaravyagreṣvito bhikṣukarūpiṇā |
gatvā nirākuladvārāṃ praviśyojjayinīṃ mayā || 12 ||
[Analyze grammar]

nikaṭādapyadṛśyena bhūtvā vidyāprabhāvataḥ |
yadanviṣṭaṃ yathavattacchṛṇu deva vadāmi te || 13 ||
[Analyze grammar]

yadaiva karmaseno 'sau rājā yuddhāya nirgataḥ |
tadaivānujñayā mātuḥ sā śaśāṅkavatī gṛhāt || 14 ||
[Analyze grammar]

nirgatya tatpurīvartigauryāyatanamāśritā |
tāmārādhayituṃ devīṃ śreyorthaṃ samare pituḥ || 15 ||
[Analyze grammar]

tatrasthā ca rahasyekāṃ sakhīmāptām uvāca sā |
matkṛte sakhi tātasya vigraho 'yam upāgataḥ || 16 ||
[Analyze grammar]

ākrāntaścārpayedeṣa tasmai rājasutāya mām |
gaṇayanti na rājyārthe 'patyasnehaṃ mahībhujaḥ || 17 ||
[Analyze grammar]

na ca jāne 'nurūpaḥ kiṃ sa me rājasuto na vā |
kāmaṃ hi mṛtyumiccheyaṃ na virūpamahaṃ patim || 18 ||
[Analyze grammar]

manye rūpābhisaṃpanno daridro 'pi varaṃ patiḥ |
na virūpaḥ punaḥ kṛtsnapṛthivīcakravartyapi || 19 ||
[Analyze grammar]

tatkīdṛgiti gatvā taṃ vilokyāgaccha sainyataḥ |
prajñānena ca nāmnā ca śubhe caturikā hy asi || 20 ||
[Analyze grammar]

evaṃ sakhī tayoktā sā yuktyā kaṭakametya naḥ |
tvāṃ vilokya vibho gatvā rājaputrīm uvāca tām || 21 ||
[Analyze grammar]

kim anyat sakhi sā jihvā jāne nāsty api vāsuke |
yā śaktā gadituṃ tasya rūpaṃ rājasutasya tat || 22 ||
[Analyze grammar]

bravīmi punaretāvadyathā nānyā samāsti te |
nārī rūpeṇa manujas tathā nānyo 'sti tatsamaḥ || 23 ||
[Analyze grammar]

atyalpaṃ dhiṅmayoktaṃ vā manye hy asmiñjagattraye |
na siddho nāpi gandharvo na devo 'py asti tādṛśaḥ || 24 ||
[Analyze grammar]

evaṃ sakhīgirā tasyāstvayi nyastaṃ ca mānasam |
śaśāṅkavatyāḥ kāmena kīlitaṃ ca samaṃ śaraiḥ || 25 ||
[Analyze grammar]

tatkṣaṇātprabhṛti śreyaskāmā tava pituś ca sā |
kṛśībhavantī tapasā sthitā tvadviraheṇa ca || 26 ||
[Analyze grammar]

tadguptaṃ niśi gatvādya hṛtvā gauryāśramāt tataḥ |
vijanādānayata tāṃ rājaputrīmalakṣitam || 27 ||
[Analyze grammar]

yāta māyābaṭorasya gṛhānete nṛpās tataḥ |
paścātprakopaṃ rakṣitvā tatraiṣyanti samaṃ mayā || 28 ||
[Analyze grammar]

nivartatāmidaṃ yuddhaṃ mā sma bhūtsainyasaṃkṣayaḥ |
astu vaḥ kuśalaṃ dehe rājñastvacchvaśurasya ca || 29 ||
[Analyze grammar]

gatireṣā hy agatikā yuddhaṃ prāṇārpaṇena yat |
upāyeṣu jaghanyo 'yam upāyo gīyate budhaiḥ || 30 ||
[Analyze grammar]

evam uktaḥ śrutadhinā sa guptaṃ prayayau niśi |
mṛgāṅkadattas tatrāśvān āruhya sacivaiḥ saha || 31 ||
[Analyze grammar]

suptastrībālaśeṣāṃ tāṃ viveśojjayinīṃ ca saḥ |
gatvaiva saṃvṛtadvārāṃ suptaiḥ svalpaiś ca rakṣibhiḥ || 32 ||
[Analyze grammar]

tataḥ śrutadhinā dattair abhijñānaiḥ sulakṣitam |
khyātaṃ puṣpakaraṇḍākhyamahodyānāntarasthitim || 33 ||
[Analyze grammar]

tatkālālaṃkṛtaprācīmukhena śaśinā karaiḥ |
prakāśitaṃ rājasutastaṃ sa gauryāśramaṃ yayau || 34 ||
[Analyze grammar]

tāvac ca paricaryādiśrānte supte sakhījane |
sā śaśāṅkavatī tatra vītanidrā vyacintayat || 35 ||
[Analyze grammar]

madarthaṃ bata rājāno rājaputrā dine dine |
vīrāste te ca hanyante samityubhayasainyayoḥ || 36 ||
[Analyze grammar]

sa ca rājasuto devyā svapne hy ambikayānayā |
ādiṣṭaḥ pūrvabhartā me madarthaprārthitāhavaḥ || 37 ||
[Analyze grammar]

hṛdayaṃ ca yam ācchidya dattvā śaraparamparām |
siddhalakṣeṇa kāmena nītvā tasmai samarpitam || 38 ||
[Analyze grammar]

tātastu mandapuṇyāṃ māṃ naiva tasmai pradāsyati |
pūrvavair āc ca darpāc ca lekhādityadya hi śrutam || 39 ||
[Analyze grammar]

vāme vidhau ca kaḥ svapnadevatādeśaniścayaḥ |
priyaprāptau ca paśyāmi na kāṃcitsarvathā diśam || 40 ||
[Analyze grammar]

tadyāvannāhitaṃ kiṃcittasya tātasya vā raṇe |
śṛṇomi tāvadātmānaṃ hatāśaṃ na tyajāmi kim || 41 ||
[Analyze grammar]

ity utthāya puro gatvā gauryāḥ sāśokapādape |
pāśaṃ viracayām āsa svottarīyeṇa duḥkhitā || 42 ||
[Analyze grammar]

tāvanmṛgāṅkadatto 'pi savayasyaḥ praviśya tam |
udyānaṃ tarubaddhāśvo gauryāgārāśramaṃ gataḥ || 43 ||
[Analyze grammar]

tatra tatsacivenārādrājaputrīṃ vilokya tām |
mṛgāṅkadatto jagade svairaṃ vimalabuddhinā || 44 ||
[Analyze grammar]

deva paśyātra kāpyeṣā pāśena varakanyakā |
udyatā hantumātmānaṃ tatkā nāma bhavediyam || 45 ||
[Analyze grammar]

tac chrutvaiva vilokyaitāṃ rājasūnur uvāca saḥ |
aho keyaṃ ratiḥ kiṃsvidrūpiṇī kimu nirvṛtiḥ || 46 ||
[Analyze grammar]

sākārā kāntirindorvā manmathājñāya jaṅgamā |
kiṃ vāmarāṅganā maivamasyāḥ pāśodyamaḥ katham || 47 ||
[Analyze grammar]

tattāvadiha tiṣṭhāmaḥ pādapantaritāḥ kṣaṇam |
yāvajjānīmahe keyamiti vyaktaṃ kathaṃcana || 48 ||
[Analyze grammar]

ity uktvā savayasyo 'tra yāvac channaḥ sa tiṣṭhati |
sā śaśāṅkavatī tāvadvignā devīṃ vyajijñapat || 49 ||
[Analyze grammar]

asmiñjanmani ceddevi na sa rājasutaḥ patiḥ |
devo mṛgāṅkadatto me niṣpannaḥ pūrvaduṣkṛtaiḥ || 50 ||
[Analyze grammar]

tvatprasādena tadbhūyādanyasminnapi janmani |
sa bhartā gauri bhagavatyāpannārtihare mama || 51 ||
[Analyze grammar]

iti vijñapya devīṃ sā rājaputrī praṇamya ca |
kaṇṭhe samarpayām āsa pāśaṃ bāṣpārdralocanā || 52 ||
[Analyze grammar]

tatkṣaṇaṃ ca prabuddhyaiva tadadarśanavihvalāḥ |
cinvantyaḥ sahasā tasyāḥ sakhyo 'ntikam upāyayuḥ || 53 ||
[Analyze grammar]

hā hā kim idamārabdhaṃ sakhi dhiksāhasaṃ tvayā |
ity uktvaiva ca tāstasyāḥ pāśaṃ kaṇṭhādapāharan || 54 ||
[Analyze grammar]

atha hrītaviṣaṇṇā sā yāvadbālātra tiṣṭhati |
udabhūdbhāratī tāvadgaurīgarbhagṛhāntarāt || 55 ||
[Analyze grammar]

mā viṣādaṃ kṛthāḥ putri śaśāṅkavati naiva tat |
vaco mṛṣā me yatsvapne tavoktaṃ subhage mayā || 56 ||
[Analyze grammar]

so 'yaṃ mṛgāṅkadatto hi pūrvabhartā tavāntike |
prāpta eva vrajānena saha bhuṅkṣvākhilāṃ bhuvam || 57 ||
[Analyze grammar]

śrutvaitāṃ sahasā vāṇīṃ sā śaśāṅkavatī śanaiḥ |
yāvadvilokayatyatra pārśve kiṃcitsasādhvasā || 58 ||
[Analyze grammar]

tāvanmṛgāṅkadattasya mantrī vikramakesarī |
tam upāgamya vakti sma darśayannagrapāṇinā || 59 ||
[Analyze grammar]

devi satyaṃ bhavānyā te samādiṣṭamayaṃ hi saḥ |
rājaputraḥ patiḥ premapāśākṛṣṭastavāgrataḥ || 60 ||
[Analyze grammar]

tacchrtuvā sā tatastiryaṅnyastadṛṣṭirdadarśa tam |
kāntaṃ tejasvinaṃ madhyavartinaṃ sahacāriṇām || 61 ||
[Analyze grammar]

grahaiḥ parivṛtaṃ candramavatīrṇamivāmbarāt |
rūpopamānām anyeṣām amṛtasyandanaṃ dṛśoḥ || 62 ||
[Analyze grammar]

tataḥ patadanaṅgeṣupuṅkhapakṣmacitair iva |
aṅgaiḥ kaṇṭakitair yāvadāste sā stambhaniścalā || 63 ||
[Analyze grammar]

tāvan mṛgāṅkadattas tām upetya tyājayan hriyam |
sa kālocitam āha sma girā premamadhuś cyutā || 64 ||
[Analyze grammar]

tyājayitvā nijaṃ deśaṃ rājyaṃ bandhūṃś ca dūrataḥ |
dāsīkṛtyāhamānīto guṇair baddhvā natāṅgi te || 65 ||
[Analyze grammar]

tanmayāraṇyavāsasya vasudhāśayanasya ca |
phalāhārasya tīvrārkatāpasaṃsevanasya ca || 66 ||
[Analyze grammar]

tapaḥkaṣṭasya tanvaṅgi saṃprāptaṃ phalamīdṛśam |
yaddṛṣṭā netrapīyūṣavṛṭireṣā tanustava || 67 ||
[Analyze grammar]

yadi snehānurodhaś ca mayi te hariṇākṣi tat |
asmatpurīpuraṃdhrīṇāṃ prayaccha nayanotsavam || 68 ||
[Analyze grammar]

saṅgrāmaḥ śāmyatu śreyo bhavatūbhayapakṣayoḥ |
kṛtārthaṃ jāyatāṃ janma saha gurvāśiṣā mama || 69 ||
[Analyze grammar]

evaṃ mṛgāṅkadattena sā śaśāṅkavatī tadā |
uktā jagāda vasudhāvinyastanayanā śanaiḥ || 70 ||
[Analyze grammar]

ayaṃ tāvadguṇakrīto janaḥ svādhīna eva te |
tadāryaputra kuśalaṃ yadavaiṣi kuruṣva tat || 71 ||
[Analyze grammar]

iti vāksudhayā tasyāḥ kṛtī nirvāpito 'tha saḥ |
mṛgāṅkadatto devīṃ tāṃ gaurīṃ stutvā praṇamya ca || 72 ||
[Analyze grammar]

āropya rājaputrīṃ ca tāṃ turaṃge svapṛṣṭhataḥ |
tatsakhībhiḥ samārūḍhapaścād bhāgāśvapṛṣṭhagaiḥ || 73 ||
[Analyze grammar]

daśabhiḥ sahito vīraiḥ sacivaiḥ śastrapāṇibhiḥ |
uccacāla tato rātrau rājaputro dhṛtāyudhaḥ || 74 ||
[Analyze grammar]

te caikādaśa dṛṣṭvāpi tatra roddhuṃ na śekire |
nagarīrakṣibhiḥ kruddhā rudrā eva durāsadāḥ || 75 ||
[Analyze grammar]

vinirgatyojjayinyāś ca jagmur māyābaṭor gṛham |
saśaśāṅkavatīkāste yathā śrutadhinoditam || 76 ||
[Analyze grammar]

ka ete kva prayātāścetyudbhrānteṣv atra rakṣiṣu |
sā cojjayinyāṃ bubudhe kramādrājasutā hṛtā || 77 ||
[Analyze grammar]

taccākhyātuṃ mahādevī karmasenāya bhūbhṛte |
satvaraṃ nagarādhyakṣaṃ prāhiṇotkaṭakaṃ prati || 78 ||
[Analyze grammar]

atrāntare ca kaṭake tatra rātrāvupetya tam |
cārādhikārī rājānaṃ karmasenaṃ vyajijñapat || 79 ||
[Analyze grammar]

deva pradoṣa egvādya guptaṃ nirgatya sainyataḥ |
mṛgāṅkadattaḥ sāmātyo hayair ujjayinīṃ gataḥ || 80 ||
[Analyze grammar]

tāṃ śaśāṅkavatīṃ hartuṃ gauryāyatanavartinīm |
iti samyaṅ mayā jñātaṃ prabhur jānāty ataḥ param || 81 ||
[Analyze grammar]

ityākarṇya samāhūya karmasenaḥ sa bhūpatiḥ |
rahaḥ svasenāpataye yathāśrutamavarṇayat || 82 ||
[Analyze grammar]

jagāda ca varāśvānāṃ sahitaḥ pañcabhiḥ śataiḥ |
śūrādhirūḍhaiḥ pracchannaṃ drutamujjayinīṃ braja || 83 ||
[Analyze grammar]

mṛgāṅkadattaṃ jahi taṃ pāpaṃ prāpya badhāna vā |
viddhi māmāgataṃ paścātpṛṣṭhasthāpitasainikam || 84 ||
[Analyze grammar]

ity uktastena rājñā sa yathādiṣṭabalānvitaḥ |
prāyātsenāpatī rātrau tathetyujjayinīṃ prati || 85 ||
[Analyze grammar]

mārge tan nagarādhyakṣānmilitādaśṛṇoc ca saḥ |
rājaputrīṃ hṛtāṃ vīrair yathānyair eva kaiścana || 86 ||
[Analyze grammar]

tataḥ sanagarādhyakṣaḥ pratyāgatya tathaiva tat |
karmasenaṃ sa rājānaṃ yathāvṛttamabodhayat || 87 ||
[Analyze grammar]

sa tadbuddhvā vicintyaiva tadaśakyaṃ tato nṛpaḥ |
avaskandanivṛttastāṃ tūṣṇīmevānayanniśām || 88 ||
[Analyze grammar]

mṛgāṅkadattasainye 'pi māyābaṭumukhā nṛpāḥ |
ninyus tathaiva tāṃ rātriṃ saṃnaddhāḥ śrutadhergirā || 89 ||
[Analyze grammar]

prātaścānviṣṭhavṛttāntaḥ karmasenanṛpaḥ sudhīḥ |
mṛgāṅkadattakaṭake rājñāṃ dūtaṃ visṛṣṭavān || 90 ||
[Analyze grammar]

mṛgāṅkadattena hṛtā sutā tāvac chalena me |
tadastu ko 'paro hy asyāstādṛśaḥ sadṛśaḥ patiḥ || 91 ||
[Analyze grammar]

tadidānīṃ sa yuṣmābhiḥ samamāyātu madgṛham |
karomi yāvadudvāhaṃ tanayāyā yathāvidhi || 92 ||
[Analyze grammar]

evaṃ sa saṃdideśāsya mukhe dūtasya bhūpatiḥ |
tac ca te saśrutadhayo rājānaḥ śraddadhustadā || 93 ||
[Analyze grammar]

ūcuś ca dūtaṃ svapurīṃ tarhi yātveṣa vaḥ prabhuḥ |
yāvattamānayāmo tra gatvā rājasutaṃ vayam || 94 ||
[Analyze grammar]

tac chrutvaiva tathā tena gatvā dūtena varṇite |
sa karmasenaḥ sabalas tathetyujjayinīmagāt || 95 ||
[Analyze grammar]

taddṛṣṭvā te 'pi rājāno māyābaṭupuraḥsarāḥ |
mṛgāṅkadattaṃ prati taṃ celuḥ śrutadhinā saha || 96 ||
[Analyze grammar]

tāvanmṛgāṅkadatto 'pi sa śaśāṅkavatīyutaḥ |
māyābaṭugṛhaṃ prāpa tatkāñcanapuraṃ puram || 97 ||
[Analyze grammar]

tatra so 'ntaḥ purais tasya yathārhakṛtasatkriyaḥ |
savayasyo viśaśrāma siddhakāryaḥ priyāsakhaḥ || 98 ||
[Analyze grammar]

anyedyuḥ saśrutadhayo nṛpāste 'tra sam āyayuḥ |
sa kirātapatirbīraḥ sasainyaḥ śaktirakṣitaḥ || 99 ||
[Analyze grammar]

śabarādhipatiḥ so 'pi rājā māyābaṭurbalī |
śūro durgapiśācaś ca sa mātaṅgacamūpatiḥ || 100 ||
[Analyze grammar]

sarve śaśāṅkavatyā te yuktaṃ rātry eva kairavam |
mṛgāṅkadattaṃ dṛṣṭvā tam abhyanandan kṛtotsavāḥ || 101 ||
[Analyze grammar]

yathārhakṛtamānāya tasmai taṃ ca nyavedayan |
saṃdeśaṃ karmasenīyaṃ praveśaṃ ca nije gṛhe || 102 ||
[Analyze grammar]

saṃniveśyātha kaṭakaṃ calannagarasaṃnibham |
mṛgāṅkadatto mantrāya samaṃ sarvair upāviśat || 103 ||
[Analyze grammar]

vivāhāyojjayinyaṃ kiṃ gantavyamuta no mayā |
ucyatāmiti papraccha nṛpatīnsacivāṃś ca saḥ || 104 ||
[Analyze grammar]

duṣṭaḥ sa rājā tadgehagamane kuśalaṃ kutaḥ |
kāryaṃ ca tatra nāstyeva prāptaiva hi tadātmajā || 105 ||
[Analyze grammar]

ityaikamatyena nṛpāḥ sacivāścābruvanyadā |
tadā mṛgāṅkadattastamapṛcchacchrutadhiṃ dvijam || 106 ||
[Analyze grammar]

udāsīna iva brahmaṃstūṣṇīmevaṃ sthito 'si kim |
kimetadevābhimataṃ tavāpyuta na vā vada || 107 ||
[Analyze grammar]

tataḥ śrutadhirāha sma yadi śroṣyasi vacmi tat |
gantavyaṃ karmasenasya gṛheṣviti matirmama || 108 ||
[Analyze grammar]

aśāṭhyena hi saṃdiṣṭametattenānyathā katham |
sutāpahāre sa balī yuddhaṃ tyaktvā gṛhaṃ vrajet || 109 ||
[Analyze grammar]

sabalasya ca kiṃ kuryātprāptasyāpi gṛhaṃ sa te |
prītistu tatra yātasya bhavettena samaṃ tava || 110 ||
[Analyze grammar]

sahāyo 'gre sa ca syānnaḥ snehena duhituḥ punaḥ |
necchatyavidhinodvāhaṃ tenaivaṃ vakti tattvataḥ || 111 ||
[Analyze grammar]

tadyuktaṃ gamanaṃ tatrety ukte śrutadhinā tadā |
sādhu sādhviti tatrocuḥ sarve śraddhāya tadvacaḥ || 112 ||
[Analyze grammar]

tato mṛgāṅkadattastānavocatsarvamastvadaḥ |
kiṃ tu tātaṃ vināmbāṃ ca vivāho me na rocate || 113 ||
[Analyze grammar]

tadambātātayoḥ kaścid āhvānāya vrajatv itaḥ |
buddhvā ca tadabhiprāyaṃ kariṣyāmo yathocitam || 114 ||
[Analyze grammar]

ityūcivān sa saṃmantrya pitroḥ pārśvaṃ svamantriṇam |
tatrastha eva vyasṛjadvīro bhīmaparākramam || 115 ||
[Analyze grammar]

tāvac ca tatrāyodhyāyāṃ puri rājā sa tatpitā |
kālenāmaradattastajjñātavāṃs tasya lokataḥ || 116 ||
[Analyze grammar]

mṛgāṅkadattasya kṛtaṃ deśanirvāsanapradam |
vinītamatinā mithyā rājaputrasya paiśunam || 117 ||
[Analyze grammar]

tataḥ kumantriṇaṃ kopāttaṃ nihatya sa sānvayam |
putranirvāsanodagraduḥkhakaṣṭāmagāddaśām || 118 ||
[Analyze grammar]

nirgatya ca purībāhye tasthāvāyatane hareḥ |
rājā sa nandigrāmākhye carandāraiḥ samaṃ tapaḥ || 119 ||
[Analyze grammar]

tatra sthite cirāttasminsa cārāveditāgamaḥ |
ayodhyāṃ prāpa vātāśvavegādbhīmaparākramaḥ || 120 ||
[Analyze grammar]

sa tāmapaśyadudvignāṃ gatarājasutāṃ purīm |
rāmapravāsavaidhuryakaṭaṃ punarivāgatām || 121 ||
[Analyze grammar]

rājaputrasya pṛcchadbhir vārtāṃ paurair vṛto 'tha saḥ |
tanmukhāc chrutavṛttānto nandigrāmaṃ tato yayau || 122 ||
[Analyze grammar]

tatrābhīṣṭasutodantasotsukaṃ mahiṣīyutam |
dadarśāmaradattaṃ taṃ tapaḥkṣāmatanuṃ nṛpam || 123 ||
[Analyze grammar]

tam etya pādapatitaḥ kṛtakaṇṭhagrahaṃ nṛpam |
pṛṣṭodantam avocat sa sāsraṃ bhīmaparākramaḥ || 124 ||
[Analyze grammar]

prāptā mṛgāṅkadattena sūnunā te svavīryataḥ |
sā śaśāṅkavatī deva karmasenanṛpātmajā || 125 ||
[Analyze grammar]

tadvivāhaś ca devena vinā devyā ca sarvathā |
na tasya pitṛbhaktasya śobhanaḥ pratibhāsate || 126 ||
[Analyze grammar]

atas tena visṛṣṭo 'ham ihaivāgamyatām iti |
vijñāpanāya dharaṇinyastamūrdhnā sutena vaḥ || 127 ||
[Analyze grammar]

pratīkṣamāṇo yuṣmāṃś ca sa kāñcanapure sthitaḥ |
śabarādhipaterdeva rājño māyābaṭorgṛhe || 128 ||
[Analyze grammar]

śṛṇvidānīṃ ca vṛttāntamity uktvā deśanirgamāt |
ārabhya so 'ṭavīvāsaviyogaviṣamāyatam || 129 ||
[Analyze grammar]

sa yuddhaṃ karmasenīyasaṃdhyantaṃ vividhādbhutam |
kṛtsnaṃ svaprabhuvṛttāntaṃ jagau bhīmaparākramaḥ || 130 ||
[Analyze grammar]

tac chrutvā sutakalyāṇe sa rājā jātaniścayaḥ |
tadaivāmaradattaḥ svaṃ harṣātprasthānamādiśat || 131 ||
[Analyze grammar]

gajārūḍhaḥ samaṃ devyā rājabhiḥ sacivaiś ca saḥ |
sahastyaśvabalaḥ prāyātputraṃ pratyutsukas tataḥ || 132 ||
[Analyze grammar]

alpair eva ca sa prāpa divasair avilambitaḥ |
śabarādhipadeśasthaṃ sutasya kaṭakaṃ nṛpaḥ || 133 ||
[Analyze grammar]

tadbuddhvaiva ca tasyāgre samagrai rājabhiḥ saha |
mṛgāṅkadatto niragātsavayasyaścirotsukaḥ || 134 ||
[Analyze grammar]

dṛṣṭvaiva dūrātturagādavatīryāsya pādayoḥ |
gajāvarūḍhasya piturmātuś ca nipapāta saḥ || 135 ||
[Analyze grammar]

āliṅgitaḥ sa ca pituḥ śarīreṇa bhujāntaram |
manorathena hṛdayaṃ bāṣpaiś cāpūrayad dṛśau || 136 ||
[Analyze grammar]

mātāpyāśliṣya sucirātpaśyantīṃ taṃ muhuḥ sutam |
bhūyo viyogabhīteva na moktumaśakacciram || 137 ||
[Analyze grammar]

te cāpy amaradattaṃ taṃ sadevīkaṃ nṛpāḥ prabhum |
mṛgāṅkadattasuhṛdastadākhyātāstadāsnaman || 138 ||
[Analyze grammar]

sa rājā sāpi taddevi daṃpatīvidhureṣu tān |
sahāyānekaputrasya snehādabhinanandatuḥ || 139 ||
[Analyze grammar]

māyābaṭoḥ praviśyātha rājadhānīṃ vilokya ca |
sa śaśāṅkavatīṃ tatra tāṃ pādāvanatāṃ snuṣāsm || 140 ||
[Analyze grammar]

gṛhītaprābhṛto devyā tayā ca snuṣayā saha |
nirgatyāmaradattaḥ sve kaṭake vasatiṃ vyadhāt || 141 ||
[Analyze grammar]

bhuktvā ca tatra putreṇa saha sarvaiś ca rājabhiḥ |
gītavāditranṛttaistannināya sasukhaṃ dinam || 142 ||
[Analyze grammar]

mene ca labdhayaśasā kṛtinaṃ tena sūnunā |
mṛgāṅkadattenātmānaṃ bhāvinā cakravartinā || 143 ||
[Analyze grammar]

tāvac ca karmasenena rājñā tena sumedhasā |
dūto mṛgāṅkadattasya saṃmantryātra vyasṛjyata || 144 ||
[Analyze grammar]

bhavānujjayinīṃ tāvadimāṃ naivāgamiṣyati |
tatpreṣayiṣyāmy atraiva suṣeṇākhyam ahaṃ sutam || 145 ||
[Analyze grammar]

sa śaśāṅkavatīṃ tubhyaṃ vidhivadbhaginīṃ nijām |
dāsyatyato nāvidhinā sā vivāhyā tvayānagha || 146 ||
[Analyze grammar]

asmatsnehānurodhaścediti taṃ saṃdideśa ca |
lekhe dūtamukhe cāsya rājasūnoḥ sa bhūpatiḥ || 147 ||
[Analyze grammar]

rājasthāne śrute tasminsaṃdeśe rājasūnunā |
tatpitā tasya dūtasya sa rājaivottaraṃ dadau || 148 ||
[Analyze grammar]

karmasenanṛpātko 'nyo vaktyetattasya sanmateḥ |
sneho 'sti kāmamasmāsu tadenaṃ preṣayatvitaḥ || 149 ||
[Analyze grammar]

suṣeṇaṃ sa nijaṃ putraṃ kariṣyāmas tathā vayam |
yathā saṃtoṣakṛttasya sutodvāho bhaviṣyati || 150 ||
[Analyze grammar]

ity uktvā pratisaṃdeśaṃ dūtaṃ taṃ preṣya satkṛtam |
rājā saśrutadhiṃ putraṃ nṛpatīṃś ca jagāda saḥ || 151 ||
[Analyze grammar]

ayodhyāmadhunā yāmo vivāhas tatra śobhate |
suṣeṇasya ca satkāro yathāvattatra siddhyati || 152 ||
[Analyze grammar]

rājā māyābaṭuśceha suṣeṇaṃ saṃpratīkṣatām |
tenāgatena sahito 'yodhyāṃ paścādupaiṣyati || 153 ||
[Analyze grammar]

vayaṃ vivāhasaṃbhārahetoryāmo 'grataḥ punaḥ |
iti rājavacas tatra te sarve 'py anumenire || 154 ||
[Analyze grammar]

tato 'nyedyuḥ samaṃ devyā sainyaiś ca sa mahīpatiḥ |
mṛgāṅkadattaś ca yutau rājabhiḥ sacivaiś ca taiḥ || 155 ||
[Analyze grammar]

māyābaṭuṃ nidhāyātra suṣeṇāgamanāvadhi |
śaśāṅkavatyā sahitau celatuḥ kṛtinau tataḥ || 156 ||
[Analyze grammar]

valgatturaṃgasaṃghātataraṅgaśatasaṃkulaḥ |
asaṃkhyasarpatpādātapāthaḥ pūritadiṅmukhaḥ || 157 ||
[Analyze grammar]

tumulaprollasacchabdapihitānyaravaśravaḥ |
cacāla sa balāmbhodhistayor gambhīrabhīṣaṇaḥ || 158 ||
[Analyze grammar]

kurvāṇau ca rajaś channāṃ vasudhāvibhramāṃ divam |
garjadgajaghanākīrṇāṃ vasudhāṃ ca dyuvibhramām || 159 ||
[Analyze grammar]

mārge krameṇa gacchantau śaktirakṣitakasya tau |
gṛhaṃ kirātarājasya pitāputrāvavāpatuḥ || 160 ||
[Analyze grammar]

tatra tena mahāratnahemasadvastrarāśibhiḥ |
sadāreṇa kṛtodārasaparyau saparigrahau || 161 ||
[Analyze grammar]

dinamekaṃ kṛtāhārau viśramya sabalau tataḥ |
prasthāya ca svanagarīmayodhyāṃ prāpatuḥ kramāt || 162 ||
[Analyze grammar]

harmyavātāyanārūḍhacañcatpaurāṅganānanaiḥ |
kāntipallavitaiḥ phullavilolakamalāmiva || 163 ||
[Analyze grammar]

savadhūkacirāyātarājaputrekṣaṇotsukaiḥ |
netraiḥ pāriplavaiścāsāṃ calatkuvalayair iva || 164 ||
[Analyze grammar]

saṃpatadbhir vṛtāṃ rājahaṃsair viviśatuś ca tām |
taraṅgitāṃ patākābhiḥ pravāte sarasīmiva || 165 ||
[Analyze grammar]

tatrābhyanandan paurās tau dīyamānāśiṣau dvijaiḥ |
bandibhiḥ stūyamānau ca gīyamānau ca cāraṇaiḥ || 166 ||
[Analyze grammar]

karmasenasya tanayāmimāmālokayedyadi |
na punaḥ sutayā lakṣmyā darpaṃ kuryānmahodadhiḥ || 167 ||
[Analyze grammar]

na ca gauryāpi himavānityatra ca jagau janaḥ |
śaśāṅkavatyā lāvaṇyasaṃpadaṃ vīkṣya vismita || 168 ||
[Analyze grammar]

tadā ca maṅgalamahātūryapratiravair diśaḥ |
utsavādhigame rājñāṃ saṃvedanam iva vyadhuḥ || 169 ||
[Analyze grammar]

bahiḥ sṛteneva bharād anurāgeṇa nirbharā |
sindūreṇa pranṛttā sā sarvābhūtsotsavā purī || 170 ||
[Analyze grammar]

anyeyurgaṇakaiḥ sūnorlagnāhe niścite nṛpaḥ |
cakārāmaradatto 'tra tadvivāhāya saṃbhṛtim || 171 ||
[Analyze grammar]

apūri tasya nagarī taistair nānādigāgataiḥ |
ratnais tathā yathā cakre sā kuberapurīm adhaḥ || 172 ||
[Analyze grammar]

athāgatyācirād eko hṛṣṭadvāḥsthaniveditaḥ |
dūto māyābaṭor atra nṛpatiṃ taṃ vyajijñapat || 173 ||
[Analyze grammar]

devāgato rājaputraḥ suṣeṇo nṛpatiś ca saḥ |
māyābaṭurayodhyāyāḥ sīmānte 'syāḥ sthitābubhau || 174 ||
[Analyze grammar]

śrutvaivāmaradattastadrājā sainyaiḥ samaṃ nijam |
senāpatiṃ suṣeṇasya tasyāgre visasarja saḥ || 175 ||
[Analyze grammar]

tena sākamayodhyāto rājaputram upāgatam |
mṛgāṅkadattaḥ sasuhṛtprītyā pratyudyayau tataḥ || 176 ||
[Analyze grammar]

dūrādvāhāvatīrṇau ca kṛtakaṇṭhagrahau mithaḥ |
tāvubhau pṛṣṭakuśalau milataḥ sma nṛpātmajau || 177 ||
[Analyze grammar]

premṇā caikarathārūḍhau nagarīṃ viśataḥ sma tām |
diśantau pauranārīṇāṃ vilocanamahotsavam || 178 ||
[Analyze grammar]

suṣeṇaścātra rājānaṃ dṛṣṭvā tadbahumānitaḥ |
śaśāṅkavatyāstadanu svasurvāsagṛhaṃ yayau || 179 ||
[Analyze grammar]

tatrotthāya kṛtāśleṣastayā bāṣpāyamāṇayā |
upaviśya sa savrīḍāṃ rājaputrīṃ jagāda tām || 180 ||
[Analyze grammar]

tātastvāmāha nāyuktaṃ putri kiṃcittvayā kṛtam |
adyaitaddhi mayā jñātaṃ yatsvapne 'mbikayā tava || 181 ||
[Analyze grammar]

mṛgāṅkadatto bhartāsau samādiṣṭo nṛpātmajaḥ |
bhartṛmārgānusaraṇaṃ strīṇāṃ ca paramaṃ vratam || 182 ||
[Analyze grammar]

ity uktā tena sā bālā hṛdayaṃ svamadhomukhī |
siddhamiṣṭaṃ tavetyevaṃ paśyantī vijahau trapām || 183 ||
[Analyze grammar]

atha tasyai suṣeṇo 'sau nītvā rājāgrato dadau |
dhanaṃ śaśāṅkavatyai tadyat tasyā nijasaṃcitam || 184 ||
[Analyze grammar]

hemno bhārasahasre dve ratnābharaṇakāraṇam |
subhṛtān pañca karabhān bhāṇḍaṃ cānyad dhiraṇmayam || 185 ||
[Analyze grammar]

uvāca caitadasyāḥ svaṃ tātānupreṣitaṃ tu yat |
vivāhavedyām asyaitat pradāsyāmi kramād iti || 186 ||
[Analyze grammar]

tataḥ sarve 'pi te tatra bhuktapītā nṛpāntike |
mṛgāṅkadattādiyutā ninyustannirvṛtā dinam || 187 ||
[Analyze grammar]

prāpte lagnadine 'nyedyurvyagre rājñi svayaṃ mudā |
mṛgāṅkadattaḥ snānādi cakārātmānurūpataḥ || 188 ||
[Analyze grammar]

tāṃ śaśāṅkavatīṃ cātra kāntyaiva kṛtakautukām |
nāryaḥ prasādhayāmāsurācāra iti kevalam || 189 ||
[Analyze grammar]

nirgatya kautukāgārādatha vyagrasuṣeṇataḥ |
hutāśanavatī vedīmadhyāsātāṃ vadhūvarau || 190 ||
[Analyze grammar]

tasyāṃ sa rājaduhitustasyā vyagrasuṣeṇataḥ |
dhṛtābjaśobhāruciraṃ pāṇiṃ lakṣmyā ivācyutaḥ || 191 ||
[Analyze grammar]

babhau kim apitāpāc ca dhūmāccāgnipradakṣiṇe |
akope 'py aruṇodbāṣpaṃ tacchaśāṅkavatīmukham || 192 ||
[Analyze grammar]

vahnau ca lājāñjalayo vikīrṇā vibabhustayā |
hāsāḥ prayatnasāphalyahṛṣṭasyeva manobhuvaḥ || 193 ||
[Analyze grammar]

dadau lājavisarge ca suṣeṇaḥ prathame tadā |
pañcāśvānāṃ sahasrāṇi vāraṇānāṃ śataṃ tathā || 194 ||
[Analyze grammar]

svarṇabhāraśate dve ca navatiṃ ca kareṇukāḥ |
bhṛtāḥ sadvastrasadratnamuktābharaṇabhārakaiḥ || 195 ||
[Analyze grammar]

mahīvijayajaṃ vittaṃ tad eva dviguṇaṃ kramāt |
anyeṣu lājamokṣeṣu prādāttasyāḥ sa sodaraḥ || 196 ||
[Analyze grammar]

athollasatyutsavatūryaniḥsvane viveśa niṣpannavivāhamaṅgalaḥ |
mṛgāṅkadattaḥ sa navoḍhayā tayā śaśāṅkavatyā saha mandiraṃ nijam || 197 ||
[Analyze grammar]

pitā carājāsya yathārhadattair hastyaśvaratnābharaṇānnapānaiḥ |
ā rājacakraṃ śukaśārikāntaṃ so 'rañjayatsvāḥ prakṛtīḥ sapaurāḥ || 198 ||
[Analyze grammar]

tyāgaprakarṣaś ca tadāsya rājñas tenaiva paryāptatayātra jajñe |
ābaddhavastrābharaṇā viterur drumā mahīkalpatarubhramaṃ yat || 199 ||
[Analyze grammar]

tataḥ sa rājā samṛgāṅkadattaḥ śaśāṅkavatyā saha rājabhiś ca |
bhuktvā suṣeṇena ca sākam etam āpānagoṣṭhyā divasaṃ nināya || 200 ||
[Analyze grammar]

atha sevitanṛttacarcarīke gṛhage tatra jane subhuktapīte |
paripītadharāraso gatādhvā ravirastācalakaṃdaraṃ viveśa || 201 ||
[Analyze grammar]

tam avekṣya ca saṃdhyayā sametaṃ navarāgojjvalayā kva citprayātam |
vicalatkhagamekhalā kilerṣyākupitevānudadhāva vāsaraśrīḥ || 202 ||
[Analyze grammar]

dadṛśe ca vilolatārakeṇa prabalībhūtamanobhuvā mukhena |
vilasattimirāsitāṃśukāntā prasṛtā rātryabhisārikā krameṇa || 203 ||
[Analyze grammar]

udayācalabāraṇāṅkuśatvaṃ navasindūrasamujjvalo jagāma |
udayann atha kupyadāyatākṣīkuṭilāpāṅgasahodaraḥ śaśāṅkaḥ || 204 ||
[Analyze grammar]

śaśinā kṛtakelikarṇapūraṃ rativallīnavapallavena tena |
tamaso 'pagame dhṛtaprasādā haridaindrī hasadānanaṃ babhāra || 205 ||
[Analyze grammar]

kṛtasāṃdhyavidhiś ca so 'pi naktaṃ navavadhvā sahito mṛgāṅkadattaḥ |
praviveśa tayā śaśāṅkavatyā rajanīvāsagṛhaṃ mahārhaśayyam || 206 ||
[Analyze grammar]

mukhacandramasā tadāṅganāyā niśi tasyāḥ praviluptatāmasena |
avabhāsitacitrabhittināntaḥ punaruktīkṛtasanmaṇipradīpam || 207 ||
[Analyze grammar]

śayanīyagataś ca tatra tasyāḥ sthitavatyāḥ parivṛtya sapriyāyāḥ |
aharatparirabhya cumbanena kramaśaścādharakhaṇḍanena lajjām || 208 ||
[Analyze grammar]

cirakāṅkṣitamanvabhūc ca mā mety alamalpoccaradakṣaraṃ sa tasyāḥ |
navamohanamantrasārasaukhyaṃ truṭitasphāramahārharatnakāñci || 209 ||
[Analyze grammar]

aramata lulitālakena cāsyā mukhaśaśinārdhanimīlitekṣaṇena |
śramavaśaśithilālasaiś ca so 'ṅgair viralaviluptavilepanai ratānte || 210 ||
[Analyze grammar]

atha tatparibhogalīlayeva kṣapitākṣīyata sā tayostriyāmā |
vikasat suratotsavābhilāṣaprasarā prītirupāyayau tu vṛddhim || 211 ||
[Analyze grammar]

gatā niśā saṃprati deva mucyatāṃ vilāsaśayyā surataklamacchidaḥ |
amī hi cūrṇālakakampadāyino mṛgīdṛśāṃ vānti niśāntavāyavaḥ || 212 ||
[Analyze grammar]

candraṃ niśāyāḥ sahasānuyāntyā hāsracyutānīva ca mauktikāni |
dūrvāvanāgreṣv avapiṇḍitāni sphuranti sacchāyamuṣojalāni || 213 ||
[Analyze grammar]

koṣeṣu vyalasannipītamadhavo ye kair avāṇāṃ ciraṃ labdhābhyantarasusthitā vikasatāminduprabhāsaṃgame |
te saṃkocam upāgateṣu vigalacchrīkeṣu teṣv anyato bhṛṅgāḥ paśya kumāra yānti malināḥ kasya sthirā hy āpadi || 214 ||
[Analyze grammar]

dinakṛtkaramaṇḍitādharām avalokyaiva niśāṃ manobhuvā |
apaśaśitilakaṃ vapuḥ kṛtaṃ mathitālpālpatamoñjanaṃ tathā || 215 ||
[Analyze grammar]

iti mṛdumadhuraiḥ sa bandivākyair uṣasi śaśāṅkavatīvimuktakaṇṭhaḥ |
apagatasuratāntakhedanidraḥ sapadi jahau śayanaṃ mṛgāṅkadattaḥ || 216 ||
[Analyze grammar]

utthāya ca vyadhita vāsarakṛtyameṣa pitrā nijocitakṛtākhilasaṃvidhānaḥ |
bhūyas tathaiva ca nināya tadā bahūni tānyutsavena dayitāsahito dināni || 217 ||
[Analyze grammar]

atha rājāmaradattas tajjanakas tacchvaśuryasya |
śirasi suṣeṇasyādau babandha paṭṭaṃ kṛtābhiṣekasya || 218 ||
[Analyze grammar]

viṣayaṃ tad ucitam ekaṃ hastyaśvahiraṇyabhāravastrāṇi |
śatasaṃkhyāś ca varastrīr dadau sa tasmai kṛtādaro nṛpatiḥ || 219 ||
[Analyze grammar]

śabarakirātādhipatī māyābaṭuśaktirakṣitau ca tataḥ |
sahabāndhavau sadārau mātaṅgacamūpatiṃ ca taṃ sa nṛpam || 220 ||
[Analyze grammar]

durgapiśācaṃ sacivān mṛgāṅkadattasya tāṃś ca saśrutadhīn |
samam ānayat pradattair viṣayair govājihemavastraiś ca || 221 ||
[Analyze grammar]

tataḥ kirātendramukhān visṛjya tān nṛpān svadeśeṣu suṣeṇasaṃyutān |
śaśāsa rājyaṃ sutaśauryanirvṛtaḥ sa tatsukhenāmaradattabhūpatiḥ || 222 ||
[Analyze grammar]

mṛgāṅkadatto 'pi vijitya vairiṇaḥ śaśāṅkavatyā sucirādavāptayā |
nijaiś ca tair bhīmaparākramādibhiḥ sahāvatasthe sacivaiściraṃ sukhī || 223 ||
[Analyze grammar]

kāle 'tha yātyamaradattanṛpasya tasya svair aṃ jarā śravaṇamūlam upājagāma |
bhuktāḥ śriyaḥ pariṇataṃ vayasā śamasya nanveṣa kāla iti vaktumivāṅgabhūtā || 224 ||
[Analyze grammar]

tataḥ sa bhogeṣu viraktamānaso mahīpatiḥ svānnijagāda mantriṇaḥ |
niśamyatāṃ saṃprati varṇayāmi vo vidhitsitaṃ yanmama vartate hṛdi || 225 ||
[Analyze grammar]

gataṃ vayo naḥ palitena sāṃprataṃ kṛtāntadūtena kacagrahaḥ kṛtaḥ |
jarāgame jīrṇarasaṃ ca mādṛśāṃ kubhogatṛṣṇāvyasanaṃ viḍambanā || 226 ||
[Analyze grammar]

vivṛddhibhājā vayasā samaṃ ca yad vivardhate lobhamanobhavagrahaḥ |
asaṃśayaṃ kāpuruṣavrataṃ hi tat svabhāvajaṃ satpuruṣair aśikṣitam || 227 ||
[Analyze grammar]

tad asti me labdhayaśā mahītale sarājakāvantinarendranirjayāt |
svato 'nuraktaprakṛtirguṇādhiko mṛgāṅkadattaḥ susahāyavānayam || 228 ||
[Analyze grammar]

tad etad asmai nijarājyamūrjitaṃ samarpya tīrthaṃ tapase 'hamāśraye |
parair anindyaṃ caritaṃ manasvināṃ vayonusārocitam eva śobhate || 229 ||
[Analyze grammar]

iti kṣitīśasya vacaḥ suniścitaṃ niśamya dhīrāḥ kila tasya mantriṇaḥ |
krameṇa devīpramukhāś ca paurās tatheti sarve pratipedire tadā || 230 ||
[Analyze grammar]

tataḥ sa rājā gaṇakoktalagne dine vivikte sahito dvijāgryaiḥ |
mṛgāṅkadattasya cakāra tasya rājyābhiṣekotsavamātmajasya || 231 ||
[Analyze grammar]

itas tataḥ kṣattṛnideśadhāvajjanākulaṃ vyagraniyuktavargam |
tadāsya nṛtyadvaracāraṇastri mudā jughūrṇeva gṛhaṃ nṛpasya || 232 ||
[Analyze grammar]

tīrthodakaṃ bhūri sabhāryakasya mṛgāṅkadattasya papāta mūrdhni |
jalapravāhāḥ punar asya pitroḥ sānandayor netrayugānnirīyuḥ || 233 ||
[Analyze grammar]

adhiṣṭhite tena navena rājñā siṃhāsane siṃhaparākrameṇa |
tadvidviṣāṃ kopabhayānatānāṃ bhūmāv asiṃhāsanam eva mene || 234 ||
[Analyze grammar]

tataḥ pitā tasya dināni sapta tatāna sajjīkṛtarājamārgam |
yathārhasaṃmānitarājalokaṃ mahotsavaṃ so 'maradattabhūpaḥ || 235 ||
[Analyze grammar]

dine 'ṣṭame dārayuto nagaryā nirgatya putraṃ sa mṛgāṅkadattam |
nivartya taṃ bāṣpamukhaṃ sapauraṃ vārāṇasīṃ mantrisakho jagāma || 236 ||
[Analyze grammar]

tasyāṃ sa gaṅgāmbupariplutāṅgo rājā trisaṃdhyaṃ tripurāntakasya |
kurvan saparyāṃ phalamūlavṛttis tasthau tapasyan munivat sadāraḥ || 237 ||
[Analyze grammar]

āsādya rājyamatha so 'pi mṛgāṅkadatto bhāsvānivāmbaratalaṃ vipulāmalaṃ tat |
ākramya ca kṣitibhṛtaḥ karasaṃnipātaiḥ prāvartata pratapituṃ prasaratpratāpaḥ || 238 ||
[Analyze grammar]

māyābaṭuprabhṛtibhiś ca sakarmasenaiḥ saṃbhūya saśrutadhibhiḥ sacivaiḥ sa taiḥ svaiḥ |
sadvīpametadavajitya caturdigantam ekātapatram avanīvalayaṃ śaśāsa || 239 ||
[Analyze grammar]

tasmiṃś ca rājani kathāsu niśamyamānadurbhikṣadasyuparacakrabhayādiduḥkhā |
nityaprahṛṣṭasukhitā navarāmabhadrasaurājyasaukhyagasamaṃ vasudhā babhāra || 240 ||
[Analyze grammar]

adhyāsya taiś ca sacivaiḥ saha tāmayodhyāṃ nānādigāgatanṛpārcitapādapadmaḥ |
samrāṭ samaṃ dayitayā sa śaśāṅkavatyā bhogānakaṇṭakasukhān bubhuje cirāya || 241 ||
[Analyze grammar]

iti sa vyākhyāya kathāṃ malayavanānte muniḥ piśaṅgajaṭaḥ |
taṃ naravāhanadattaṃ rājasutaṃ virahiṇaṃ jagade || 242 ||
[Analyze grammar]

tasmātsoḍhakleśo mṛgāṅkadatto yathā śaśāṅkavatīm |
prāpa purā putra tathā prāpsyasi tāṃ madanamañcukāṃ tvamapi || 243 ||
[Analyze grammar]

iti tasmātsa munīndrādākarṇya vacomṛtaṃ piśaṅgajaṭāt |
hṛdi naravāhanadatto dhṛtimādhānmadanamañcukāprāptau || 244 ||
[Analyze grammar]

tadgatacitto 'tha sa taṃ munivaramāmantrya hāritāṃ pūrvam |
tatrānetrīṃ cinvanmalayagirau lalitalocanāṃ vyacarat || 245 ||
[Analyze grammar]