Chapter 29

tato rājā punar gatvā vetālaṃ śiṃśapāgrataḥ |
sa trivikramasenas taṃ prāpyāṃsāropitaṃ vyadhāt || 1 ||
[Analyze grammar]

āyāntaṃ taṃ ca rājānaṃ sa vetālo 'bravīt pathi |
rājan sādhuḥ susattvas tvaṃ tad apūrvāṃ kathāṃ śṛṇu || 2 ||
[Analyze grammar]

babhūva pūrvaṃ kusumapurākhyanagareśvaraḥ |
pṛthvītale 'smin dharaṇīvarāho nāma bhūpatiḥ || 3 ||
[Analyze grammar]

tasya brāhmaṇabhūyiṣṭhe rāṣṭre brahmasthalābhidhaḥ |
agrahāro 'bhavat tatra viṣṇusvāmīty abhūd dvijaḥ || 4 ||
[Analyze grammar]

tasyānurūpā bhāryābhūd yathā svāhā havir bhujaḥ |
tasyāṃ ca tasya catvāraḥ kramād utpedire sutāḥ || 5 ||
[Analyze grammar]

adhītavedeṣūtkrāntaśaiśaveṣu ca teṣu saḥ |
viṣṇusvāmī divaṃ prāyād bhāryayānugatas tayā || 6 ||
[Analyze grammar]

tatas te tatra tatputrāḥ sarve 'py ānāyya duḥsthitāḥ |
gotrajair hṛtasarvasvā mantrayāṃcakrire mithaḥ || 7 ||
[Analyze grammar]

nāstīha gatir asmākaṃ tad vrajāmo vayaṃ na kim |
ito mātāmahagṛhaṃ grāmaṃ yañjasthalābhidham || 8 ||
[Analyze grammar]

etad eva viniścitya prasthitā bhaikṣyabhojanāḥ |
mātāmahagṛhaṃ prāpus te 'tha tad bahubhir dinaiḥ || 9 ||
[Analyze grammar]

tatra mātāmahābhāvān mātulair dattasaṃśrayāḥ |
bhuñjānās tadgṛhe tasthuḥ svādhyāyābhyāsatatparāḥ || 10 ||
[Analyze grammar]

kālakramāc ca teṣāṃ te mātulānām akiṃcanāḥ |
avajñāpātratāṃ jagmur bhojanācchādanādiṣu || 11 ||
[Analyze grammar]

tataḥ svajanasaṃsphūrjadavamānahatātmanām |
teṣāṃ rahaḥ sacintānāṃ jyeṣṭho bhrātābravīd idam || 12 ||
[Analyze grammar]

bho bhrātaraḥ kiṃ kriyate sarvam āceṣṭate vidhiḥ |
na śakyaṃ puruṣasyeha kvacit kiṃcit kadācana || 13 ||
[Analyze grammar]

ahaṃ hy udvegato bhrāmyan prāpto 'dya pitṛkānane |
vipannasthitam adrākṣaṃ trastāṅgaṃ puruṣaṃ bhuvi || 14 ||
[Analyze grammar]

acintayaṃ ca dṛṣṭvā tam ahaṃ tāṃ spṛhayan gatim |
dhanyo 'yam evaṃ viśrānto duḥkhabhāraṃ vimucya yaḥ || 15 ||
[Analyze grammar]

iti saṃcintya tat kālaṃ kṛtvā maraṇaniścayam |
vṛkṣāgrasaṅginā pāśenātmānam udalambayam || 16 ||
[Analyze grammar]

yāvac ca me visaṃjñasya tadā niryānti nāsavaḥ |
tāvat truṭitapāśo 'tra patito 'smi mahītale || 17 ||
[Analyze grammar]

labdhasaṃjñaś ca kenāpi puṃsā kṣiprāt kṛpālunā |
āśvāsyamānam ātmānam apaśyaṃ paṭamārutaiḥ || 18 ||
[Analyze grammar]

sakhe kathaya vidvān apy evaṃ kaṃ prati khidyase |
sukhaṃ hi sukṛtād duḥkhaṃ duḥkṛtād eti nānyataḥ || 19 ||
[Analyze grammar]

duḥkhād yadi tavodvegaḥ sukṛtaṃ tat samācara |
kathaṃ tu nārakaṃ duḥkham ātmatyāgena vāñchasi || 20 ||
[Analyze grammar]

ity uktvā māṃ samāśvāsya sa ca kvāpi gataḥ pumān |
ahaṃ cehāgatas tyaktvā tādṛśaṃ maraṇodyamam || 21 ||
[Analyze grammar]

tad evaṃ necchati vidhau na martum api labhyate |
idānīṃ ca tanuṃ tīrthe tapasā dāhayāmy aham || 22 ||
[Analyze grammar]

yena nirdhanatāduḥkhabhāgī na syām ahaṃ punaḥ |
ity uktavantaṃ jyeṣṭhaṃ taṃ kaniṣṭhā bhrātaro 'bruvan || 23 ||
[Analyze grammar]

arthair vinā kathaṃ prājño 'py ārya duḥkena bādhyase |
kiṃ na vetsi yad arthānāṃ śaradabhracalā gatiḥ || 24 ||
[Analyze grammar]

āhṛtya rakṣyamāṇāpi yatnenāntavirāgiṇī |
asanmaitrī ca veśyā ca śrīś ca kasya kadā sthirā || 25 ||
[Analyze grammar]

tad udyogena sa guṇaḥ ko 'py upārjyo manasvinā |
ānīyante haṭād baddhvā yenārthahariṇā muhuḥ || 26 ||
[Analyze grammar]

ity ukto bhrātṛbhir dhairyaṃ kṣaṇāj jyeṣṭho 'valambya saḥ |
uvāca ko guṇas tādṛgarjanīyo bhaved iti || 27 ||
[Analyze grammar]

tato vicitya sarve te vadanti sma parasparam |
vicintya pṛthvīṃ vijñānaṃ kiṃcic chikṣāmahe vayam || 28 ||
[Analyze grammar]

niścityaitac ca saṃketasthānam uktvā samāgame |
ekaikaśas te catvāraś catasraḥ prayayur diśaḥ || 29 ||
[Analyze grammar]

yāti kāle ca militās te saṃketaniketane |
kiṃ kena śikṣitam iti bhrātaro 'nyonyam abruvan || 30 ||
[Analyze grammar]

athātraiko 'bravīd īdṛg vijñānaṃ śikṣitaṃ mayā |
yenāsthiśakalaṃ prāpya prāṇino yasya kasyacit || 31 ||
[Analyze grammar]

utpādayāmy ahaṃ tasmin māṃsaṃ taducitaṃ kṣaṇāt |
etat tasya vacaḥ śrutvā dvitīyas teṣv abhāṣata || 32 ||
[Analyze grammar]

ahaṃ tatraiva saṃjātamāṃse 'sthiśakale kila |
jāne janayituṃ lomatvacaṃ tatprāṇisaṃbhavi || 33 ||
[Analyze grammar]

tatas tṛtīyo 'py avadaj jāne tatraiva cāsmy aham |
tatprānyavayavān sraṣṭuṃ jātatvaṅmāṃsalomani || 34 ||
[Analyze grammar]

caturthaś ca tato 'vādīd utpannāvayavākṛtim |
tam eva prāṇinaṃ prānair yuktaṃ kartum avaimy aham || 35 ||
[Analyze grammar]

evam uktvā mithaḥ svasvavijñānaprathanāya te |
catvāro 'py asthikhaṇḍāya prayayur bhrātaro 'ṭavīm || 36 ||
[Analyze grammar]

tatra siṃhasya te prāpur asthikhaṇḍaṃ vidher vaśāt |
avijñātaviśeṣāś ca gṛhnanti sma tathaiva tat || 37 ||
[Analyze grammar]

ekaś ca tat samucitais tato māṃsair ayojayat |
dvitīyo 'janayat tasya tadvat tvaglomasaṃhatīḥ || 38 ||
[Analyze grammar]

tṛtīyaś cākhilair aṅgais tadyogyais tad apūrayat |
caturthaś ca dadau tasya siṃhībhūtasya jīvitam || 39 ||
[Analyze grammar]

udatiṣṭhad athoddhūtasaṭābhāro 'tibhairavaḥ |
sa daṃṣṭrāsaṃkaṭamukhaḥ siṃhaḥ kharanakhāṅkuśaḥ || 40 ||
[Analyze grammar]

dhāvitvā ca svanirmātṝṃs tān eva caturo 'pi saḥ |
avadhīt kesarī tṛpto viveśa ca vanaṃ tataḥ || 41 ||
[Analyze grammar]

evaṃ te siṃhanirmāṇadoṣān naṣṭā dvijātayaḥ |
duṣṭaṃ hi jantum utthāpya kasyātmani sukhaṃ bhavet || 42 ||
[Analyze grammar]

itthaṃ copārjito yatnād guṇo 'pi vidhure vidhau |
saṃpattaye na na paraṃ jāyate tu vipattaye || 43 ||
[Analyze grammar]

mūle hy avikṛte daive sikte prajñānavāriṇā |
nayālavālaḥ phalati prāyaḥ pauruṣapādapaḥ || 44 ||
[Analyze grammar]

iti tasyāṃ niśi mārge vetālenāṃsataḥ kathāṃ tena |
ākhyāya sa trivikramaseno rājā punar jagade || 45 ||
[Analyze grammar]

rājaṃs teṣv aparādhyati caturṣu kas tatra siṃhanirmāṇe |
yan nyavadhīt tatkḷpto vada samayaḥ so 'tra pūrvas te || 46 ||
[Analyze grammar]

iti vetālāc chrutvā rājā so 'cintayad vimaunasya |
icchati gantum ayaṃ me yātv āneṣyāmy amuṃ bhūyaḥ || 47 ||
[Analyze grammar]

iti hṛdi niścitya sa taṃ mahīpatiḥ pratyuvāca vetālam |
yas tasya jīvadāyī siṃhasya sa pāpabhāk teṣu || 48 ||
[Analyze grammar]

prāṇiviśeṣam abuddhvā māṃsatvaglomagātranirmāṇam |
yuktibalāt tu kṛtaṃ yais teṣāṃ doṣo 'sti nājñānāt || 49 ||
[Analyze grammar]

yena tu siṃhākāraṃ dṛṣṭvā vidyāprakāśanotkena |
prāṇās tasya vitīrṇās tena kṛtā brahmahatyās tāḥ || 50 ||
[Analyze grammar]

etat sa rājño vacanaṃ niśamya svadhāma vetālavaro jagāma |
tasyāṃsatas tat puna eva māyī rājāpi taṃ so 'nusasāra bhūyaḥ || 51 ||
[Analyze grammar]