Chapter 28

atha gatvā punaḥ prāpya śiṃśapātas tato 'grahīt |
sa trivikramaseno 'ṃse vetālaṃ taṃ narādhipaḥ || 1 ||
[Analyze grammar]

āgacchantaṃ ca taṃ bhūyaḥ sa vetālo 'bravīn nṛpam |
rājann udgāḍhakandarpāṃ śṛṇv ekāṃ vacmi te kathām || 2 ||
[Analyze grammar]

asti śakrapurīvānyā dhātrā sukṛtināṃ kṛte |
divaś cyutānāṃ vihitā viśālākhyā purī bhuvi || 3 ||
[Analyze grammar]

tasyāṃ babhūva nṛpatiḥ padmanābha iti śrutaḥ |
saccakranandakaḥ srīmān ākrāntabalirājakaḥ || 4 ||
[Analyze grammar]

tasmin pṛthvīpatau tasyāṃ nagaryāṃ sumahāvaṇik |
arthadattābhidhāno 'bhūd dhanair vijitavittapaḥ || 5 ||
[Analyze grammar]

tasyaikā ca sutānaṅgamañjarīty udapadyata |
svaḥsundarīpratikṛtir bhuvi dhātreva darśitā || 6 ||
[Analyze grammar]

dattā ca tena vaṇijā vaṇigvarasutāya sā |
maṇivarmābhidhānāya tāmraliptīnivāsine || 7 ||
[Analyze grammar]

ekāpatyatayā cātivatsalaḥ sa na tāṃ vaṇik |
bhartṛyuktāṃ sutāṃ gehāt tatyājānaṅgamañjarīm || 8 ||
[Analyze grammar]

tasyāś cānaṅgamañjaryāḥ patir dveṣyo babhūva saḥ |
maṇivarmā sarogasya kaṭutiktam ivauṣadham || 9 ||
[Analyze grammar]

patyus tu sāsya sumukhī jīvitād apy abhūt priyā |
dhanarddhiḥ kṛpaṇasyeva kṛcchrāt sucirasaṃcitā || 10 ||
[Analyze grammar]

ekadā cāntikaṃ pitros tāmraliptīṃ nijaṃ gṛham |
utkaṇṭhādinimittena maṇivarmā jagāma saḥ || 11 ||
[Analyze grammar]

tato dineṣu yāteṣu tīkṣṇasūryāṃśusāyakaiḥ |
proṣitānāṃ niruddhādhvā gharmakāla ihābhyagāt || 12 ||
[Analyze grammar]

vasantavirahād uṣṇā niḥśvāsāḥ kakubhām iva |
mallikāpāṭalāmodamedurā maruto vavuḥ || 13 ||
[Analyze grammar]

utpetuḥ pavanoddhūtā gagane reṇurājayaḥ |
dūtyo ghanāgamāyeva prahitās taptayā bhuvā || 14 ||
[Analyze grammar]

ākāṅkṣitatarucchāyāḥ kaṭhorātapatāpitāḥ |
pathikā iva yānti sma cireṇa divasā api || 15 ||
[Analyze grammar]

candrāṃśupāṇḍurucayo gāḍhāśleṣasukhapradam |
vinā hemantam agamann atidurbalatāṃ niśāḥ || 16 ||
[Analyze grammar]

tatkālaṃ candanālepadhavalā sā vaṇiksutā |
saṃvītatanukauśeyaśobhitānaṅgamañjarī || 17 ||
[Analyze grammar]

dadarśa svagṛhottuṅgavātāyanagataikadā |
āptasakhyā yutā bhavyaṃ yuvānaṃ vipraputrakam || 18 ||
[Analyze grammar]

saṃcarantaṃ ratiprāptyai navotpannam iva smaram |
kamalākaranāmānaṃ putraṃ rājapurodhasaḥ || 19 ||
[Analyze grammar]

so 'pīndor iva mūrtiṃ tāṃ kāntāṃ dṛṣṭvopari sthitām |
kumudākaratāṃ bheje sānandaḥ kamalākaraḥ || 20 ||
[Analyze grammar]

tayor abhūd amūlyaṃ tan manaḥsaṃvananaṃ tadā |
smaragurvājñayā yūnor anyonyasyāvalokanam || 21 ||
[Analyze grammar]

unmūlitahriyau tau ca dūravikṣiptacetasā |
rajobhibhūtau jahrāte manmathāvegavātyayā || 22 ||
[Analyze grammar]

dṛṣṭvā ca madanāviṣṭaḥ sakhyā sa kamalākaraḥ |
sahasthitena nīto 'bhūt kathaṃcid bhavanaṃ nijam || 23 ||
[Analyze grammar]

sāpi taṃ nāmato 'nviṣya vivaśānaṅgamañjarī |
tayā svayā samaṃ sakhyā prāviśad vāsakaṃ śanaiḥ || 24 ||
[Analyze grammar]

tatra saṃcintayantī ca kāntaṃ kāmajvarāturā |
nāpaśyan nāśṛṇot kiṃcil luṭhantī śayanīyake || 25 ||
[Analyze grammar]

gateṣv ahaḥsu dvitreṣu satrapā sabhayā ca sā |
asahā virahonmādaṃ visoḍhuṃ kṛśapāṇḍurā || 26 ||
[Analyze grammar]

duṣprāpapriyasaṃyoganirāsthā naktam ekadā |
gavākṣapreritakareṇākṛṣṭeva himāṃśunā || 27 ||
[Analyze grammar]

supte parijane svairaṃ nirgatya maraṇonmukhī |
jagāma svagṛhodyānavāpīṃ tarulatāvṛtām || 28 ||
[Analyze grammar]

tatra pitrā kṛtodārapratiṣṭhāṃ kuladevatām |
upetya caṇḍikāṃ devīṃ natvā stutvā vyajijñapat || 29 ||
[Analyze grammar]

asmiñ janmani ced bhartā na mayā kamalākaraḥ |
prāptas tad devi bhūyān me so 'nyasminn api janmani || 30 ||
[Analyze grammar]

ity uktvā puratas tasyā devyāḥ sāśokapādape |
pāśaṃ viracayāmāsa svottarīyeṇa rāgiṇī || 31 ||
[Analyze grammar]

tāvad āptā sakhī tasyāḥ sā prabudhyātra vāsake |
tām adṛṣṭvā tad udyānaṃ daivād āgād vicinvatī || 32 ||
[Analyze grammar]

tatra dṛṣṭvā ca tāṃ pāśam arpayantīṃ tathā gale |
mā mety uktvā pradhāvyaiva pāśaṃ tasyās tam acchinat || 33 ||
[Analyze grammar]

sāpi tāṃ vīkṣya saṃprāptāṃ kṛttapāśāṃ nijāṃ sakhīm |
anaṅgamañjarī bhūmau papātādhikaduḥkhitā || 34 ||
[Analyze grammar]

āśvāsitā svasakhyā ca tayā pṛṣṭā ca sā kṣaṇāt |
duḥkhahetuṃ samākhyāya puna enām abhāṣata || 35 ||
[Analyze grammar]

sakhi mālatike tan me durlabhe priyasaṃgame |
gurvādiparatantrāyā na sukhaṃ maraṇāt param || 36 ||
[Analyze grammar]

iti bruvāṇaivānaṅgaśarāgnijvalitā bhṛśam |
sānaṅgamañjarī mohaṃ yayau nairāśyaniḥsahā || 37 ||
[Analyze grammar]

kaṣṭaṃ smarājñā durlaṅghyā yayā nītā daśām imām |
anyāvinītavanitāhāsinīyaṃ sakhī mama || 38 ||
[Analyze grammar]

ityādivilapantī ca tāṃ sā mālatikā sakhī |
śanair āśvāsayāmāsa śītāmbupavanādibhiḥ || 39 ||
[Analyze grammar]

tāpopaśāntaye cāsyāś cakāra nalinīdalaiḥ |
śayyāṃ dadau ca hṛdaye hāraṃ tuhinaśītalam || 40 ||
[Analyze grammar]

tataḥ sāśrur uvācaitāṃ sakhīṃ sānaṅgamañjarī |
sakhi hārādibhir nāyaṃ dāho 'nto mama śāmyati || 41 ||
[Analyze grammar]

yena praśāmyati punaḥ svabuddhyaiva vidhatsva tat |
māṃ saṃyojaya kāntena jīvitaṃ me yadīcchasi || 42 ||
[Analyze grammar]

evam uktavatīṃ tāṃ sā snehān mālatikābravīt |
sakhi bhūyiṣṭayātādya rātriḥ prātar ahaṃ punaḥ || 43 ||
[Analyze grammar]

ihaiva kṛtasaṃketam āneṣyāmi priyaṃ tava |
tad ālambya dhṛtiṃ tāvan nijaṃ praviśa mandiram || 44 ||
[Analyze grammar]

ityuktavatyai saṃtuṣya tasyai sānaṅgamañjarī |
hāraṃ svakaṇṭhād ākṛṣya pradadau pāritoṣikam || 45 ||
[Analyze grammar]

gacchādhunaiva svagṛhaṃ prātaḥ siddhyai tato vraja |
iti caitāṃ sakhīṃ preṣya sā viveśa svavāsakam || 46 ||
[Analyze grammar]

prātaś ca sā mālatikā kenāpy anupalakṣitā |
tatsakhī tasya kamalākarasya bhavanaṃ yayau || 47 ||
[Analyze grammar]

cinvatī tatra codyāne tarumūle dadarśa tam |
candanārdrāmburuhiṇīpattraśayyāvivartinam || 48 ||
[Analyze grammar]

rahasyadhāriṇaikena kadalīdalamārutaiḥ |
āśvāsyamānaṃ suhṛdā dahyamānaṃ smarāgninā || 49 ||
[Analyze grammar]

tasyā vineyam asya syāt kāmāvasthedṛśīti sā |
vicintya tasthau pracchannā jñātuṃ tatra viniścayam || 50 ||
[Analyze grammar]

tāvac ca suhṛdā tena sa ūce kamalākaraḥ |
kṣaṇam ekam ihodyāne dattvā dṛṣṭiṃ manorame || 51 ||
[Analyze grammar]

vinodaya mano mitra mātra viklavatām agāḥ |
tac chrutvā taṃ svasuhṛdaṃ vipraputro jagāda saḥ || 52 ||
[Analyze grammar]

yan mamānaṅgamañjaryā vaṇikputryā tayā hṛtam |
vinodayāmi tad idaṃ kutaḥ śūnyāśayo manaḥ || 53 ||
[Analyze grammar]

smareṇa śūnyahṛdayo bāṇatūṇīkṛto hy aham |
tat prāpsyāmi manaścaurīṃ tāṃ yathā kuru me tathā || 54 ||
[Analyze grammar]

ity ukte vipraputreṇa tenātmānaṃ pradarśya sā |
hṛṣṭā mālatikābhyetya tam uvācāstasaṃśayā || 55 ||
[Analyze grammar]

tavāsmy anaṅgamañjaryā subhaga prahitāntikam |
saṃdeśaṃ cāham evaiṣā vispaṣṭārthaṃ bravīmi te || 56 ||
[Analyze grammar]

eṣa kaḥ śiṣṭadharmo yat praviśya hṛdayaṃ haṭhāt |
mano muṣitvā mugdhāyā gamyate sthagitātmanā || 57 ||
[Analyze grammar]

citraṃ ca yad vāmadṛśā tubhyam eva tayādhunā |
manoharāya deho 'pi dātuṃ prāṇaiḥ saheṣyate || 58 ||
[Analyze grammar]

niḥśvāsān sā hi saṃtaptān vimuñcati divāniśam |
jvalato hṛdi kandarpavahner dhūmodgamān iva || 59 ||
[Analyze grammar]

saṃpatanti muhuś cāsyāḥ sāñjanā bāṣpabindavaḥ |
vadanāmbhojasaugandhyalubdhā madhukarā iva || 60 ||
[Analyze grammar]

tad yadīcchasi tad vacmi śivaṃ vām ubhayor aham |
ity ukto mālatikayā so 'bravīt kamalākaraḥ || 61 ||
[Analyze grammar]

bhadre bhayaṃ karoty eṣā vāk tavāśvāsayaty api |
vadantī vidhurāvasthāṃ baddhabhāvāṃ ca me priyām || 62 ||
[Analyze grammar]

tad ekā gatir atra tvaṃ yathā vetsi tathā kuru |
ityuktavākye kamalākare mālatikābravīt || 63 ||
[Analyze grammar]

anaṅgamañjarīm adya guptaṃ tāṃ prāpayāmy aham |
naktaṃ svabhavanodyānaṃ tvaṃ tiṣṭhes tatra bāhyataḥ || 64 ||
[Analyze grammar]

tataḥ praveśayiṣyāmi tvām atrāntaḥ svayuktitaḥ |
evaṃ yatheṣṭo yuvayor bhaviṣyati samāgamaḥ || 65 ||
[Analyze grammar]

ity uktvānandya taṃ vipraputraṃ mālatikā tataḥ |
gatvā kṛtārthā sānaṅgamañjarīm apy anandayat || 66 ||
[Analyze grammar]

athāhnā saha yāte 'rke kvāpi saṃdhyānurāgiṇi |
aindryā diśendutilakenānane suprasādhite || 67 ||
[Analyze grammar]

tyaktapadmākarā prāptā śrīr mayetīva harṣataḥ |
hasaty uphullavadane viśade kumudākare || 68 ||
[Analyze grammar]

kṛtaprasādhanaḥ sotkaḥ svairaṃ sa kamalākaraḥ |
kāmī kāntāgṛhodyānadvārabāhyam upāgamat || 69 ||
[Analyze grammar]

tāvac ca sā mālatikā tāṃ yuktyānaṅgamañjarīm |
ānināya tad udyānaṃ kṛcchrād gamitavāsarām || 70 ||
[Analyze grammar]

upaveśya ca tāṃ madhye gulmake cūtaśākhinām |
prāveśayat taṃ nirgatya tatraiva kamalākaram || 71 ||
[Analyze grammar]

sa ca praviśya pattraughaghanapādapamadhyagām |
tām adhvaga iva chāyāṃ dadarśānaṅgamañjarīm || 72 ||
[Analyze grammar]

upaiti yāvac ca sa tāṃ tāvad dṛṣṭvā pradhāvya sā |
kāmavegahṛtavrīḍā kaṇṭhe taṃ sahasāgrahīt || 73 ||
[Analyze grammar]

kva yāsi labdho 'si mamety ālapantī ca tat kṣaṇam |
sātiharṣabharastabdhaniḥśvāsā pañcatām agāt || 74 ||
[Analyze grammar]

papāta ca mahīpṛṣṭhe vātarugṇā lateva sā |
vicitro bata kāmasya vipākaviṣamaḥ kramaḥ || 75 ||
[Analyze grammar]

tad dṛṣṭvāśanipātograṃ sadyaḥ sa kamalākaraḥ |
hā hā kim etad ity uktvā mūrcchito nyapatad bhuvi || 76 ||
[Analyze grammar]

labdhasaṃjñaḥ kṣaṇenātha tām aṅkāropitāṃ priyām |
āliṅgan paricumbaṃś ca tat tac ca vilapan bahu || 77 ||
[Analyze grammar]

tathā dukhātibhāreṇa sa prasahya nipīḍitaḥ |
yathā tasya ṭasatkṛtya kṣaṇād dhṛdayam asphuṭat || 78 ||
[Analyze grammar]

atha tau mālatikayā śocyamānāv ubhāv api |
dṛṣṭvā prāptakṣayau śokād iva kṣīṇābhavat kṣapā || 79 ||
[Analyze grammar]

prāta udyānapālebhyo jñātvā bandhujanas tayoḥ |
tatrāyayau trapāścaryaduḥkhamohākulīkṛtaḥ || 80 ||
[Analyze grammar]

āsīt kartavyatāmūḍhaś ciraṃ khedād avāṅmukhaḥ |
kaṣṭāḥ kulakhalīkārahetavo bata kustriyaḥ || 81 ||
[Analyze grammar]

tāvac ca tāmraliptītaḥ sa tasyāḥ patir āgamat |
sotkaṇṭho 'naṅgamañjaryā maṇivarmā pitur gṛhāt || 82 ||
[Analyze grammar]

sa śvāśuraṃ gṛhaṃ prāpya yathātattvam avetya tat |
bāṣpāndhalocano dhyāyaṃs tad evodyānam āyayau || 83 ||
[Analyze grammar]

tatra bhāryāṃ gatāsuṃ tāṃ dṛṣṭvānyasahitām api |
śokāgnijvalito rāgī sadyaḥ so 'pi jahāv asūn || 84 ||
[Analyze grammar]

tataḥ krandati tatrasthe jane kolāhalākulāḥ |
āyayur jñātavṛttāntāḥ paurāḥ sarve 'tra vismitāḥ || 85 ||
[Analyze grammar]

athātrānaṅgamañjaryāḥ pitrā pūrvāvatāritā |
devī saṃnihitā caṇḍī vijñaptābhūn nijair gaṇaiḥ || 86 ||
[Analyze grammar]

tvadākārapratiṣṭhākṛd arthadattaḥ sadaiṣa te |
bhakto vaṇik tad asyāsmin duḥkhe devi dayāṃ kuru || 87 ||
[Analyze grammar]

etad gaṇebhyaḥ śrutvā sā śaraṇyā śaṅkarapriyā |
śāntānaṅgās trayo 'py ete jīvantv iti samādiśat || 88 ||
[Analyze grammar]

atha sarve 'pi te suptapratibuddhā iva kṣaṇāt |
tatprasādāt samuttasthur jīvanto vītamanmathāḥ || 89 ||
[Analyze grammar]

tato dṛṣṭvā tad āścaryaṃ sānande sakale jane |
lajjānatamukhaḥ prāyāt svagṛhaṃ kamalākaraḥ || 90 ||
[Analyze grammar]

arthadatto 'pi tāṃ hrītām ādāyānaṅgamañjarīm |
sutāṃ svabhartṛsahitāṃ yayau baddhotsavo gṛhān || 91 ||
[Analyze grammar]

iti kathayitvā tasyāṃ rātrau mārge kathāṃ sa vetālaḥ |
nijagāda taṃ trivikramasenaṃ kṣoṇīpatiṃ bhūyaḥ || 92 ||
[Analyze grammar]

rājan kasya vadaiteṣv adhiko moho 'nurāgamūḍheṣu |
so 'tra ca pūrvoktas te śāpo jānan na ced vadasi || 93 ||
[Analyze grammar]

ity etad vetālāc chrutvā sa pratyuvāca taṃ nṛpatiḥ |
eteṣu rāgamūḍhaḥ pratibhāti mamādhikaḥ sa maṇivarmā || 94 ||
[Analyze grammar]

itarau hi tāv ubhāv api kālakramapakvamanmathāvasthau |
anyonasānurāgau yadi jīvitam ujjhataḥ sma tad bhavatu || 95 ||
[Analyze grammar]

maṇivarmā tv atimūḍho yo bhāryām anyapuruṣasaktamṛtām |
dṛṣṭvaiva kopakāle pratyuta raktaḥ śucāmucat prāṇān || 96 ||
[Analyze grammar]

iti gaditavataḥ sa tasya rājño bata vetālapatiḥ punar jagāma |
nijam eva padaṃ tad aṃsapīṭhād atha rājāpi tam anvagāt sa bhūyaḥ || 97 ||
[Analyze grammar]