Chapter 27

tato gatvā gṛhītvāṃse vetālaṃ śiṃśapātaroḥ |
sa trivikramasenas tam uccacāla punar nṛpaḥ || 1 ||
[Analyze grammar]

maunena prasthitaṃ taṃ ca vetālo 'ṃsād uvāca saḥ |
rājan kas te 'nubandho 'yaṃ gaccha rātrisukhaṃ bhaja || 2 ||
[Analyze grammar]

na yuktaṃ tava netuṃ māṃ kubhikṣos tasya gocaram |
graho vā tatra ced astu kathām ekām imāṃ śṛṇu || 3 ||
[Analyze grammar]

asti svarekhānutkrāntavarṇabhedavyavasthiti |
nagaraṃ citrakūṭākhyaṃ bibhrāṇaṃ satyanāmatām || 4 ||
[Analyze grammar]

tatrāmṛtarasāsāravarṣī praṇayicakṣuṣām |
candrāvaloka ity āsīd rājā rājaśikhāmaṇiḥ || 5 ||
[Analyze grammar]

ālānaṃ śauryakariṇas tyāgasyotpattiketanam |
vilāsaveśma rūpasya śaśaṃsur yaṃ vicakṣaṇāḥ || 6 ||
[Analyze grammar]

satīṣu sarvasaṃpatsu yan na prāpa nijocitām |
bhāryāṃ saikā paraṃ cintā yūnas tasyābhavad dhṛdi || 7 ||
[Analyze grammar]

ekadā ca tadudvegavinodāya mahāṭavīm |
jagāmāśvīyasahito mṛgayāyai sa bhūpatiḥ || 8 ||
[Analyze grammar]

tatra sūkaravṛndāni bhindan bāṇair nirantaraiḥ |
śyāmalāmbararociṣṇus tamāṃsīva raviḥ karaiḥ || 9 ||
[Analyze grammar]

śāyayañ śaraśayyāsu siṃhān samaradurmadān |
mūrdhajair dhavalair bhīṣmān arjunādhikavikramaḥ || 10 ||
[Analyze grammar]

vipakṣīkṛtya śarabhān pātayan parvatopamān |
dambholikarkaśaprāsapātair jambhārivikramaḥ || 11 ||
[Analyze grammar]

rasād vivikṣuḥ sa nṛpo vanābhyantaram ekakaḥ |
tīvrapārṣṇiprahāreṇa prerayāmāsa vājinam || 12 ||
[Analyze grammar]

sa vājī tena ca kaśāghātenottejito bhṛśam |
pārṣṇighātena viṣamaṃ samaṃ cāgaṇayan kṣaṇāt || 13 ||
[Analyze grammar]

vanāntaraṃ tato 'naiṣīd vātādhikajavo nṛpam |
mohitendriyavṛttiṃ taṃ vyatītya daśayojanīm || 14 ||
[Analyze grammar]

tatra tasmin sthite vāhe rājā diṅmoham etya saḥ |
bhramañ śrānto dadarśaikam ārāt suvipulaṃ saraḥ || 15 ||
[Analyze grammar]

mārutenābhimukhyena namitonnamitair muhuḥ |
ita ehīti hastābhaiḥ saṃjñāṃ kurvad ivāmbujaiḥ || 16 ||
[Analyze grammar]

tatra gatvā ca turagaṃ viparyāṇopavartitam |
snātapītaṃ tarucchāyābaddhaṃ dattatṛṇotkaram || 17 ||
[Analyze grammar]

kṛtvā svayaṃ kṛtasnānaḥ pītāmbur galitaśramaḥ |
ramyeṣu tatpradeśeṣu dadau dṛṣṭim itas tataḥ || 18 ||
[Analyze grammar]

ekatra cāśokataror adhastān munikanyakām |
āmuktapuṣpābharaṇāṃ valkalāṃśukaśobhinīm || 19 ||
[Analyze grammar]

mugdhabaddhajaṭājūṭasaviśeṣamanoramām |
sakhīdvitīyām āścaryarūpāṃ rājā dadarśa saḥ || 20 ||
[Analyze grammar]

acintayac ca puṣpeṣoḥ patitaḥ śaragocare |
keyaṃ syāt sarasi snātuṃ sāvitrī kiṃ svid āgatā || 21 ||
[Analyze grammar]

kiṃ harasyāṅkavibhraṣṭā gaurī bhūyaḥ śritā tapaḥ |
ahany astaṃgatasyendoḥ kāntiḥ kiṃ vā dhṛtavratā || 22 ||
[Analyze grammar]

tad etām upasṛtyeha śanair upalabhe varam |
ity ālocya yayau tasyāḥ kanyāyāḥ so 'ntikaṃ nṛpaḥ || 23 ||
[Analyze grammar]

sāpi dṛṣṭvā tam āyāntaṃ tadrūpākulitekṣaṇā |
pūrvaprārabdhapuṣpasraksannahastā vyacintayat || 24 ||
[Analyze grammar]

ko 'yam īdṛg araṇye 'smin siddho vidyādharo nu kim |
batāsya rūpaṃ viśvasya kṛtārthīkaraṇaṃ dṛśoḥ || 25 ||
[Analyze grammar]

evaṃ vitarkya paśyantī tiryak taṃ trapayā tataḥ |
utthāya sorustambhāpi gantuṃ prāvartataiva sā || 26 ||
[Analyze grammar]

athopetya sa rājā tām evaṃ nāgariko 'bravīt |
āstāṃ prathamadṛṣṭasya darśanaikaphalārthinaḥ || 27 ||
[Analyze grammar]

janasya dūrāyātasya sundari svāgatādikam |
ko 'yaṃ nv āśramiṇāṃ dharmo yad etasmāt palāyyate || 28 ||
[Analyze grammar]

ity ukte bhūbhujā tasyāḥ sakhī tadvad vicakṣaṇā |
tatropaveśya nṛpateś cakārātithyasatkriyām || 29 ||
[Analyze grammar]

atha sapraṇayaṃ rājā tāṃ sa papraccha sotsukaḥ |
bhadre kaḥ puṇyavān vaṃśas tvatsakhyālaṃkṛto 'nayā || 30 ||
[Analyze grammar]

kāni śrotrāmṛtasyandīny asyā nāmākṣarāṇi ca |
kiṃ caivam anayā puṣpasukumāram idaṃ vapuḥ || 31 ||
[Analyze grammar]

tāpasocitayā vṛttyā vijane 'smin kadarthyate |
iti rājño vacaḥ śrutvā tatsakhī pratyuvāca sā || 32 ||
[Analyze grammar]

eṣā maharṣeḥ kaṇvasya duhitā vardhitāśrame |
menakāsaṃbhavā kanyā nāmnā cendīvaraprabhā || 33 ||
[Analyze grammar]

ihāsmin sarasi snātum āgatānujñayā pituḥ |
ito 'tra nātidūre 'sti tasyaitat pitur āśramaḥ || 34 ||
[Analyze grammar]

ity uktaḥ sa tayā hṛṣṭo rājāruhya turaṅgamam |
yācituṃ tāṃ sutāṃ tasya kaṇvarṣer āśramaṃ yayau || 35 ||
[Analyze grammar]

viveśa ca vinītas taṃ bahiḥ sthāpitavāhanaḥ |
jaṭāvalkalibhiḥ pūrṇaṃ pādapair iva tāpasaiḥ || 36 ||
[Analyze grammar]

tanmadhye ca tam adrākṣīd ṛṣibhiḥ parivāritam |
tejasāhlādanaṃ kaṇvamuniṃ candram iva grahaiḥ || 37 ||
[Analyze grammar]

upetya pādayos taṃ ca vavande so 'pi taṃ muniḥ |
kalpitātithyaviśrāntaṃ jñānī kṣiprād abhāṣata || 38 ||
[Analyze grammar]

vatsa candravalokaitac chṛṇu yad vacmi te hitam |
jānāsi yādṛk saṃsāre prāṇināṃ mṛtyuto bhayam || 39 ||
[Analyze grammar]

tan niḥkāraṇam evaitān varākān haṃsi kiṃ mṛgān |
śastraṃ hi bhītarakṣārthaṃ dhātrā kṣatrasya nirmitam || 40 ||
[Analyze grammar]

tat prajā rakṣa dharmeṇa samun mūlaya kaṇṭakān |
hastyaśvāstrādiyogyābhiś calalakṣmyādi sādhaya || 41 ||
[Analyze grammar]

bhuṅkṣva rājyasukhaṃ dehi dhanaṃ dikṣu yaśaḥ kira |
kṛtāntakrīḍitaṃ hiṃsraṃ mṛgayāvyasanaṃ tyaja || 42 ||
[Analyze grammar]

hantur vadhyasya cānyasya yatra tulyā pramāditā |
kiṃ tena bahvanarthena pāṇḍor vṛttaṃ na kiṃ śrutam || 43 ||
[Analyze grammar]

etat kaṇvamuner vākyaṃ śrutvā samabhinandya ca |
rājā candrāvalokas tam arthajñaḥ pratyabhāṣata || 44 ||
[Analyze grammar]

anuśiṣṭo 'smi bhagavan kṛto me 'nugrahaḥ paraḥ |
mṛgayāyā nivṛtto 'haṃ prāṇinaḥ santu nirbhayāḥ || 45 ||
[Analyze grammar]

tac chrutvovāca sa munis tuṣṭo 'ham amunā tava |
prāṇiṣv abhayadānena tad vṛṇīṣvepsitaṃ varam || 46 ||
[Analyze grammar]

ity uktas tena muninā kālajñaḥ sa nṛpo 'bhyadhāt |
tuṣṭo 'si cet sutāṃ dehi mahyam indīvaraprabhām || 47 ||
[Analyze grammar]

ity arthitavate so 'smai rājñe snānagatāṃ muniḥ |
apsaraḥsaṃbhavāṃ kanyāṃ tāṃ dadāv anurūpikām || 48 ||
[Analyze grammar]

tataḥ kṛtavivāhas tāṃ munibhāryāprasādhitām |
kṛtānuyātrām udbāṣpais tāpasair ā nijāśramāt || 49 ||
[Analyze grammar]

indīvaraprabhāṃ bhāryām ādāyāruhya vājinam |
candrāvalokas tarasā pratasthe sa tato nṛpaḥ || 50 ||
[Analyze grammar]

gacchataś cāsya vitataṃ dṛṣṭvā taddinaceṣṭitam |
raviḥ khinna ivāstādrim astake samupāviśat || 51 ||
[Analyze grammar]

dadṛśe mṛganetrā ca kramād udriktamanmathā |
dhvāntanīlapaṭacchannarūpā rātryabhisārikā || 52 ||
[Analyze grammar]

tasmin kāle pathi prāpa sa rājāśvatthapādapam |
sajjanāśayasusvacchavāpījalataṭasthitam || 53 ||
[Analyze grammar]

śākhāpattraughasaṃchannaśādvalaśyāmalasthalam |
dṛṣṭvā ca taṃ vasāmīha rātrim ity akarod dhṛdi || 54 ||
[Analyze grammar]

tato 'vatīrya turagād dattvā tasmai tṛṇodakam |
viśramya puline vāpyā upayuktāmbumārutaḥ || 55 ||
[Analyze grammar]

muniputrikayā sārdhaṃ tayā tasya taros tale |
priyayā puṣpaśayyāyāṃ saṃviveśa sa bhūpatiḥ || 56 ||
[Analyze grammar]

tatkṣaṇaṃ ca samākramya timirāṃśukahāriṇā |
sarāgam ānanaṃ prācyāś cucumbe śaśalakṣmaṇā || 57 ||
[Analyze grammar]

virejuś candrakiraṇaiḥ samāśliṣya prasāritāḥ |
vītamānāvakāśāś cāśeṣā vitamaso diśaḥ || 58 ||
[Analyze grammar]

atrāntare latāgulmavivaraprasṛtaiḥ karaiḥ |
aindavai ratnadīpābhais tarumūle vibhāsite || 59 ||
[Analyze grammar]

so 'pi rājā siṣeve tām āśliṣyendīvaraprabhām |
navasaṃgamasotkaṇṭhasarasaṃ suratotsavam || 60 ||
[Analyze grammar]

visraṃsayāmāsa śanair nīvīṃ tasyās trapām iva |
akhaṇḍayac ca daśanair mugdhabhāvam ivādharam || 61 ||
[Analyze grammar]

racayāmāsa kucayor yauvanadvipakumbhayoḥ |
karajakṣatasadratnanavanakṣatramālikām || 62 ||
[Analyze grammar]

mukhaṃ kapolau nayane muhuḥ paricucumba ca |
lāvaṇyāmṛtaniḥṣyandam āpibann iva sarvataḥ || 63 ||
[Analyze grammar]

itthan nidhuvanakrīḍāsukhena sa tayā saha |
nināya kāntayā tatra rājā kṣaṇam iva kṣapām || 64 ||
[Analyze grammar]

prātaś ca muktaśayanaḥ sāṃdhyasyānantaraṃ vidheḥ |
svasainyāvāptaye yātum unmukho 'bhūd vadhūsakhaḥ || 65 ||
[Analyze grammar]

tāvac ca naktaṃ luptābjakhaṇḍaśobhaṃ niśāpatim |
bhiyevāstādrikuharapralīnaṃ dhvastatejasam || 66 ||
[Analyze grammar]

hantukāma iva krodhād ātāmratararociṣi |
prasāritakarotkṣiptamaṇḍalāgre vivasvati || 67 ||
[Analyze grammar]

akasmād ājagāmātra vidyutpiṅgaśiroruhaḥ |
kajjalaśyāmalaḥ kālameghābho brahmarākṣasaḥ || 68 ||
[Analyze grammar]

antramālākṛtottaṃsaḥ keśayajñopavītabhṛt |
khādan naraśiromāṃsaṃ kapālena pibann asṛk || 69 ||
[Analyze grammar]

so 'ṭṭahāsaṃ vimucyograṃ mukhenāgniṃ vaman krudhā |
daṃṣṭrākarālo rājānaṃ bhartsayan nijagāda tam || 70 ||
[Analyze grammar]

pāpa jvālāmukhaṃ nāma viddhi māṃ brahmarākṣasam |
nivāsaś caiṣa me 'śvattho devair api na laṅghyate || 71 ||
[Analyze grammar]

so 'yaṃ tvayā samākramya paribhuktaḥ striyā saha |
rātricaryāgatasyādya tad bhuṅkṣvāvinayāt phalam || 72 ||
[Analyze grammar]

eṣo 'haṃ te durācāra kāmopahatacetasaḥ |
utpāṭya hṛdayaṃ bhokṣye pāsyāmy eva ca śoṇitam || 73 ||
[Analyze grammar]

tac chrutvaiva tathā ghoraṃ tam avadhyam avekṣya ca |
trastāṅganaḥ savinayaṃ bhayāt pratyabravīn nṛpaḥ || 74 ||
[Analyze grammar]

ajānatāparāddhaṃ yan mayā te tat kṣamasva me |
tavāham āśrame hy asminn atithiḥ śaraṇāśritaḥ || 75 ||
[Analyze grammar]

dāsyāmi cepsitaṃ tubhyam ānīya puruṣaṃ paśum |
yena te bhavitā tṛptis tat prasīda krudhaṃ tyaja || 76 ||
[Analyze grammar]

iti rājño vacaḥ śrutvā śāntaḥ sa brahmarāksasaḥ |
astu ko doṣa ity anto vicintyaivam abhāṣata || 77 ||
[Analyze grammar]

yaḥ saptavarṣadeśyo 'pi mahāsattvo vivekavān |
tvadarthe svecchayātmānaṃ dadyād brāhmaṇaputrakaḥ || 78 ||
[Analyze grammar]

hanyamānaṃ ca yaṃ mātā hastayoḥ pādayoḥ pitā |
avaṣṭabhyātisudṛḍhaṃ saṃniveśya mahītale || 79 ||
[Analyze grammar]

tādṛśaṃ puruṣaṃ mahyam upahārīkaroṣi cet |
svayaṃ khaḍgaprahāreṇa hatvā saptadināntare || 80 ||
[Analyze grammar]

tat te kṣamiṣye nyakkāram anyathā tu mahīpate |
sadyo vināśayiṣyāmi tvām ahaṃ saparicchadam || 81 ||
[Analyze grammar]

śrutvaitat sa bhayād rājā pratipede tatheti tat |
tirobabhūva ca brahmarākṣasaḥ so 'pi tat kṣaṇam || 82 ||
[Analyze grammar]

atha candrāvaloko 'sau rājā sendīvaraprabhaḥ |
hayārūḍhas tataḥ prāyāt sainyaṃ cinvan sudurmanāḥ || 83 ||
[Analyze grammar]

aho ahaṃ mṛgayayā madanena ca mohitaḥ |
gataḥ pāṇḍur ivākāṇḍe vināśaṃ bata bāliśaḥ || 84 ||
[Analyze grammar]

prāpyate hy upahāro 'sya rākṣasas tādṛśaḥ kutaḥ |
tan nijaṃ nagaraṃ tāvad yāmi paśyāmi bhāvi kim || 85 ||
[Analyze grammar]

iti dhyāyan sa ca prāpa svasainyaṃ cinvad āgatam |
tadyuktaś ca sadāraḥ svaṃ citrakūṭam agāt puram || 86 ||
[Analyze grammar]

tatra tasyocitāṃ bhāryāprāptiṃ vīkṣya kṛtotsave |
rāṣṭre 'ntargataduḥkhasya dinaśeṣo jagāma saḥ || 87 ||
[Analyze grammar]

dvitīye 'hni rahaḥ sarvaṃ svavṛttāntaṃ śaśaṃsa saḥ |
mantribhyas teṣu caikas taṃ mantrī sumatir abravīt || 88 ||
[Analyze grammar]

viṣādo deva te mā bhūd upahāraṃ hi tādṛśam |
āneṣyāmy aham anviṣya bahvāścaryā hi medinī || 89 ||
[Analyze grammar]

evam āśvāsya rājānaṃ sa sauvarṇīm akārayat |
mantrī saptābdadeśīyabālakapratimāṃ drutam || 90 ||
[Analyze grammar]

ratnair alaṃkṛtāṃ tāṃ ca kṛtvā karṇirathārpitām |
bhrāmayāmāsa nagaragrāmaghoṣeṣv itas tataḥ || 91 ||
[Analyze grammar]

yaḥ saptavarṣadeśīyaḥ svecchayā vipraputrakaḥ |
dadāti sarvasattvārtham ātmānaṃ brahmarakṣase || 92 ||
[Analyze grammar]

upahārāya sattvastho mātāpitror anujñayā |
hanyamānaś ca yas tābhyāṃ hastapāde pragṛhyate || 93 ||
[Analyze grammar]

tasmai grāmaśatopetāṃ hemaratnamayīm imām |
dadāti pratimāṃ rājā pitror upacikīrṣave || 94 ||
[Analyze grammar]

iti ca bhrāmyamānāyās tasyāḥ pratikṛteḥ śiśoḥ |
paṭahodghoṣaṇāṃ mantrī so 'gre 'jasram adāpayat || 95 ||
[Analyze grammar]

tāvac chrutvā tad ekasminn agrahāre dvijārbhakaḥ |
ko'pi saptābdadeśīyo 'py atidhīro 'dbhutākṛtiḥ || 96 ||
[Analyze grammar]

pūrvābhyāsena bālye 'pi sadā parahite rataḥ |
prajāpuṇyaparīpāka iva sākāratāṃ gataḥ || 97 ||
[Analyze grammar]

uvācodghoṣakān etya yuṣmadarthe dadāmy aham |
ātmānaṃ pitarau gatvā bodhayitvābhyupaimi ca || 98 ||
[Analyze grammar]

ity ūcivāṃs tān muditān sa bālo 'numataś ca taiḥ |
gatvā gṛhaṃ jagāda svau pitarau racitāñjaliḥ || 99 ||
[Analyze grammar]

dadāmi sarvasattvārthaṃ deham etaṃ vinaśvaram |
tan mām abhyanujānītaṃ hatāṃ cāpadam ātmanaḥ || 100 ||
[Analyze grammar]

ātmapratikṛtiṃ hy etāṃ gṛhītvā vitarāmi vām |
hemaratnamayīṃ rājñā dattāṃ grāmaśatānvitām || 101 ||
[Analyze grammar]

evaṃ me yuṣmadānṛṇyaṃ parārthaś caiva sidhyati |
yuvāṃ ca dhvastadāridryau bahūn putrān avāpsyathaḥ || 102 ||
[Analyze grammar]

ity uktavantaṃ sahasā pitarau tau tam ūcatuḥ |
kim etad bhāṣase putra vātena kṣubhito 'si kim || 103 ||
[Analyze grammar]

kiṃ vā grahagṛhīto 'si pralapasy anyathā katham |
ko hy arthair ghātayet putraṃ dehaṃ dadyāc ca kaḥ śiśuḥ || 104 ||
[Analyze grammar]

etat pitror vacaḥ śrutvā bālaḥ puna uvāca saḥ |
na buddhimohāj jalpāmi śṛṇutaṃ me 'rthavad vacaḥ || 105 ||
[Analyze grammar]

avācyāśucisaṃpūrṇam utpattyaiva sugupsitam |
duḥkhakṣetraṃ vināśy eva śarīram acirād idam || 106 ||
[Analyze grammar]

tad etenātyasāreṇa sukṛtaṃ yad upārjyate |
tad eva sāraṃ saṃsāre kṛtabuddhibhir ucyate || 107 ||
[Analyze grammar]

sarvabhūtopakārāc ca kim anyat sukṛtaṃ param |
tatrāpi pitror bhaktiś cet kiṃ dehād dṛśyate phalam || 108 ||
[Analyze grammar]

ityādivākyaiḥ sa śiśuḥ śocantau dṛḍhaniścayaḥ |
tāv aṅgīkārayāmāsa pitarau svamanīṣitam || 109 ||
[Analyze grammar]

gatvā ca rājabhṛtyebhyaḥ pratimāṃ taṃ hiraṇmayīm |
ānīya pradadau tābhyāṃ sagrāmaśataśāsanām || 110 ||
[Analyze grammar]

tataḥ kṛtvāgrato rājabhṛtyāṃs tān eva sa drutam |
pitṛbhyām anvitaḥ prāyāc citrakūṭaṃ nṛpāntikam || 111 ||
[Analyze grammar]

tatra candrāvalokas taṃ vīkṣyākhaṇḍitatejasam |
rakṣāratnam iva prāptaṃ bālaṃ rājā nananda saḥ || 112 ||
[Analyze grammar]

āropya gajapṛṣṭaṃ ca racitasragvilepanam |
nīnāya taṃ sapitṛkaṃ ketanaṃ brahmarakṣasaḥ || 113 ||
[Analyze grammar]

tatra maṇḍalam ālikhya tasyāśvatthasya pārśvataḥ |
vihitocitapūjena hute vahnau purodhasā || 114 ||
[Analyze grammar]

āvirbabhūva muktāṭṭahāsaḥ so 'dhyayanaṃ paṭhan |
ghūrṇan raktāsavakṣībo jṛmbhamāṇo muhuḥ śvasan || 115 ||
[Analyze grammar]

jvalannetro diśaḥ kurvan dehacchāyāndhakāritāḥ |
jvālāmukho mahāraudradarśano brahmarākṣasaḥ || 116 ||
[Analyze grammar]

tataś candrāvalokas taṃ dṛṣṭvā prahvo 'bravīn nṛpaḥ |
naropahāro bhagavann ānītaḥ sa mayā tava || 117 ||
[Analyze grammar]

saptamo divasaś cādya pratijñātasya so 'sya te |
tat prasīda gṛhāṇaitam upahāraṃ yathāvidhi || 118 ||
[Analyze grammar]

iti rāñjārthito viprakumāraṃ brahmarākṣasaḥ |
sa tam ālokayāmāsa jihvayā sṛkkiṇī lihan || 119 ||
[Analyze grammar]

tat kṣaṇaṃ sa mahāsattvo bālo hṛṣyann acintayat |
svadehadānenānena sukṛtaṃ yan mayārjitam || 120 ||
[Analyze grammar]

tena mā bhūn mama svargo mokṣo vā nirupakriyaḥ |
bhūyāt tu me parārthāya deho janmani janmani || 121 ||
[Analyze grammar]

iti saṃkalpayaty eva tasminn āpūryata kṣaṇāt |
vimānaiḥ surasaṃghānāṃ puṣpavṛṣṭimucāṃ nabhaḥ || 122 ||
[Analyze grammar]

athāgre prāpitaṃ tasya bālaṃ taṃ brahmarakṣasaḥ |
mātā jagrāha karayoḥ pitā caraṇayos tathā || 123 ||
[Analyze grammar]

tato yāvat tam ākṛṣṭakhaḍgo rājā jighāṃsati |
tāvaj jahāsa sa śiśus tathā sarve 'tra te yathā || 124 ||
[Analyze grammar]

sabrahmarākṣasās tyaktvā svaṃ svaṃ karma savismayāḥ |
racitāñjalayaḥ prahvās tanmukhaprekṣiṇo 'bhavan || 125 ||
[Analyze grammar]

iti vyākhyāya vetālo vicitrasarasāṃ kathām |
taṃ trivikramasenaṃ sa nijagāda nṛpaṃ punaḥ || 126 ||
[Analyze grammar]

tad brūhi rājan ko hetur yat tena hasitaṃ tadā |
bālenaitādṛśe 'py asmin prāṇāntasamaye 'py aho || 127 ||
[Analyze grammar]

kautukaṃ ca mahan me 'tra tad etac cen na vakṣyasi |
jānāno 'pi tato mūrdhā śatadhā te sphuṭiṣyati || 128 ||
[Analyze grammar]

iti vetālataḥ śrutvā sa rājā pratyuvāca tam |
śṛṇu yo 'bhūd abhiprāyo hāse tasya śiśos tadā || 129 ||
[Analyze grammar]

yo nāma durbalo jantuḥ sa bhaye pratyupasthite |
krandati prāṇahetoḥ svaṃ pitaraṃ mātaraṃ tathā || 130 ||
[Analyze grammar]

tadvyapāye ca rājānam ārtatrāṇāya nirmitam |
tadalābhe 'pi yady atra yathāsaṃbhavi daivatam || 131 ||
[Analyze grammar]

tasya tv ekastham apy etat sarvaṃ saṃjātam anyathā |
pitṛbhyāṃ hastapādaṃ hi ruddhaṃ tasyārthatṛṣṇayā || 132 ||
[Analyze grammar]

rājā ca trātum ātmānaṃ svayaṃ taṃ hantum udyataḥ |
daivataṃ tatra yad brahmarakṣas tat tasya bhakṣakam || 133 ||
[Analyze grammar]

adhruvasyāntavirasasyādhivyādhikṣatasya ca |
dehasyārthe vimūḍhānāṃ teṣām īdṛg viḍambanā || 134 ||
[Analyze grammar]

brahmendraviṣṇurudrādyā yatrāvaśyaṃ vināśinaḥ |
tatraiṣām īdṛśī kāpi śarīrasthairyavāsanā || 135 ||
[Analyze grammar]

etat tan mohavaicitryaṃ dṛṣṭvā matvā ca vāñchitam |
siddham āścaryaharṣābhyāṃ sa jahāsa dvijārbhakaḥ || 136 ||
[Analyze grammar]

ity uktvā viratasya tasya nṛpater aṃsāt sa bhūyo 'pi tad vetālo jhagiti svakaṃ padam agād antarhito māyayā |
rājā so 'py avikalpam eva punar apy anvag yayau taṃ javād akṣobhyaṃ hṛdayaṃ bateha mahatām ambhonidhīnām iva || 137 ||
[Analyze grammar]