Chapter 22

tato gatvā punaḥ prāpya vetālaṃ śiṃśapātaroḥ |
sa trivikramasenas tam ādāyodacalat punaḥ || 1 ||
[Analyze grammar]

āyāntaṃ taṃ ca rājānaṃ sa vetālo 'ṃsapṛṣṭhagaḥ |
jagāda bhūyo 'py etāṃ te rājan vacmi kathāṃ śṛṇu || 2 ||
[Analyze grammar]

abhūn nepālaviṣaye nāmnā śivapuraṃ puram |
yathārthanāmā tatrāsīd yaśaḥketuḥ purā nṛpaḥ || 3 ||
[Analyze grammar]

sa mantriṇi nyasya bharaṃ prajñāsāgarasaṃjñake |
candraprabhākhyayā devyā sārdhaṃ bhogān asevata || 4 ||
[Analyze grammar]

kālena tasyāṃ devyāṃ ca tasyājāyata kanyakā |
rājñaḥ śaśiprabhā nāma jagannetraśaśiprabhā || 5 ||
[Analyze grammar]

krameṇa yauvanasthā sā madhumāse kadācana |
yayau yātrotsavaṃ draṣṭum udyānaṃ saparicchadā || 6 ||
[Analyze grammar]

tatraikadeśe 'paśyat tāṃ kusumāvacayodyatām |
utkṣiptabāhulatikālakṣitaikapayodharām || 7 ||
[Analyze grammar]

prasūnavṛntavigalatsaṃdaṃśakaraśobhinīm |
āḍhyaputro manaḥsvāmī nāma yātrāgato dvijaḥ || 8 ||
[Analyze grammar]

sa tayā dṛṣṭayā sadyo hṛtasya manaso yuvā |
manaḥsvāmy api naivābhūt svāmī madanamohitaḥ || 9 ||
[Analyze grammar]

mārgaṇānāṃ kṛte kiṃ svid ratir eṣā manobhuvaḥ |
vasantasaṃbhṛtānīha puṣpāṇy uccinute svayam || 10 ||
[Analyze grammar]

kiṃ vārcayitukāmeyaṃ mādhavaṃ vanadevatā |
iti saṃcintayantaṃ taṃ sāpy apaśyan nṛpātmajā || 11 ||
[Analyze grammar]

dṛṣṭamātre ca sā tasmin sāṅge nava iva smare |
na puṣpāṇi na cāṅgāni sotkā nātmānam asmarat || 12 ||
[Analyze grammar]

ity anyonanavapremasarasau yāvad atra tau |
tiṣṭhatas tāvad udabhūd dhāhāheti mahāravaḥ || 13 ||
[Analyze grammar]

kim etad iti cotkṣiptakaṃdharaṃ paśyatos tayoḥ |
āyād atropalabdhānyagajagandhotthayā ruṣā || 14 ||
[Analyze grammar]

bhagnālāno vinirgatya matto mārgadrumān rujan |
patitādhorano dhāvaṃl lambamānāṅkuśaḥ karī || 15 ||
[Analyze grammar]

tataḥ parijane trastavidrute tāṃ sasaṃbhramam |
rājaputrīṃ pradhāvyaiva dorbhyām utkṣipya caikakām || 16 ||
[Analyze grammar]

aṅgaiḥ kiṃcit kṛtāśleṣāṃ bhayaprematrapākulām |
nināya sa manaḥsvāmī sudūraṃ gajagocarāt || 17 ||
[Analyze grammar]

athāgataiḥ parijanaiḥ stuvadbhis taṃ dvijottamam |
muhur vivṛtya paśyantī sā ninye nijamandiram || 18 ||
[Analyze grammar]

tatra tasthau tam evārtā smarantī prāṇadāyinam |
smarāgnipuṭapākena pacyamānā divāniśam || 19 ||
[Analyze grammar]

so 'py udyānān manaḥsvāmī tadā tasmād anuvrajan |
svāntaḥpurapraviṣṭāṃ tāṃ dṛṣṭvā sotko vyacintayat || 20 ||
[Analyze grammar]

naitāṃ vinādhunā sthātuṃ jīvituṃ vāham utsahe |
tan me śrīmūladevo 'tra dhūrthaḥ siddho gurur gatiḥ || 21 ||
[Analyze grammar]

iti saṃcintya katham apy asminn avasite dine |
prato yayau guros tasya mūladevasya so 'ntikam || 22 ||
[Analyze grammar]

dadarśa taṃ ca mitreṇa śaśinā nitya saṃgatam |
siddhamāyādbhutapathaṃ saśarīram ivāmbaram || 23 ||
[Analyze grammar]

nyavedayac ca tat tasmai praṇamya svamanīṣitam |
so 'pi sādhayituṃ tasya pratipede vihasya tat || 24 ||
[Analyze grammar]

tataḥ sa yogagulikāṃ kṣiptvā dhūrtapatir mukhe |
mūladevo vyadhād vṛddhabrāhmaṇākṛtim ātmanaḥ || 25 ||
[Analyze grammar]

dvitīyāṃ gulikāṃ dattvā mukhakṣepyāṃ cakāra ca |
sukāntakanyakārūpaṃ taṃ manaḥsvāminaṃ dvijam || 26 ||
[Analyze grammar]

tadrūpaṃ taṃ samādāya gatvā dhūrtādhipo 'tha saḥ |
tatpriyājanakaṃ bhūpam āsthāne taṃ vyajijñapat || 27 ||
[Analyze grammar]

rājann eko 'sti me putraḥ kanyā dūrāc ca tatkṛte |
mayaiṣā yācitānītā sa ca kvāpi gato 'dhunā || 28 ||
[Analyze grammar]

tam anveṣṭum ahaṃ yāmi tad eṣā rakṣyatāṃ tvayā |
ānayāmi sutaṃ yāvat tvaṃ hi viśvasya rakṣitā || 29 ||
[Analyze grammar]

tac chrutvā śāpabhītyā ca pratipadya sa bhūpatiḥ |
sutām ānāyayāmāsa yaśaḥketuḥ śaśiprabhām || 30 ||
[Analyze grammar]

jagāda caitāṃ putrīmāṃ kanyāṃ rakṣeḥ svamandire |
svapārśva eva cāhāraṃ śayyāṃ cāsyāḥ prakalpayeḥ || 31 ||
[Analyze grammar]

iti pitroktayā ninye kanyārūpas tatheti saḥ |
antaḥpuraṃ manaḥsvāmī rājaputryā tayā nijam || 32 ||
[Analyze grammar]

yathāruci tato yāte muladeve dvijākṛtau |
kanyārūpaḥ sa tatrāsīn manaḥsvāmī priyāntike || 33 ||
[Analyze grammar]

dinaiś ca tāṃ sakhīprītivisrambhaṃ samyagāgatām |
ekadā virahakṣāmāṃ śayanīyaluṭhattanum || 34 ||
[Analyze grammar]

rātrau raho rājasutām āsannaśayanasthitaḥ |
kanyārūpapraticchanno manaḥsvāmī sa pṛṣṭavān || 35 ||
[Analyze grammar]

sakhi kiṃ pāṇḍuracchāyā kṣīyamāṇā dine dine |
kāntapakṣaviyukteva duḥkhitāsi śaśiprabhe || 36 ||
[Analyze grammar]

brūhi me ko hy aviśvāsaḥ snigdhamugdhe sakhījane |
idānīṃ naiva bhokṣye 'haṃ na vadiṣyasi cen mama || 37 ||
[Analyze grammar]

tac chrutvā sā viniḥśvasya śanai rājasutābravīt |
kiṃ me tvayy apy aviśvāsaḥ śṛṇu tat sakhi vacmi te || 38 ||
[Analyze grammar]

ekadāhaṃ madhūdyānayātrāṃ draṣṭuṃ gatābhavam |
tatrāpaśyaṃ ca subhagaṃ kaṃcid brāhmaṇaputrakam || 39 ||
[Analyze grammar]

himamuktendusaśrīkaṃ darśanoddīpitasmaram |
madhumāsam ivālokakrīḍālaṃkṛtakānanam || 40 ||
[Analyze grammar]

cakorāyitum ete ca pravṛtte yāvad unmukhe |
tanmukhendudyutisudhāpāyinī me vilocane || 41 ||
[Analyze grammar]

tāvat sravanmadajalas tatrākasmān nirargalaḥ |
akālakālameghābho garjann āgān mahāgajaḥ || 42 ||
[Analyze grammar]

tatsaṃbhramāt parijane naṣṭe 'haṃ bhayavihvalā |
utkṣipya vipraputreṇa nītā tenaiva dūrataḥ || 43 ||
[Analyze grammar]

śrīkhaṇḍenānulipteva sikteva sudhayā tathā |
ahaṃ tadaṅgasparśena na jāne kāṃ daśām agām || 44 ||
[Analyze grammar]

kṣanāc ca parivāreṇa militenāvaśā tataḥ |
ihānītāsmi nikṣiptā svargād iva bhuvas tale || 45 ||
[Analyze grammar]

tadāprabhṛti saṃkalpais tais taiḥ kalpitasaṃgamam |
paśyāmi taṃ prabuddhāpi pārśvasthaṃ prāṇadaṃ patim || 46 ||
[Analyze grammar]

suptā svapne ca kurvāṇaṃ cāṭūny ālokayāmi tam |
tyājayantaṃ haṭhāl lajjāṃ cumbanāliṅganādhibhiḥ || 47 ||
[Analyze grammar]

na ca prāpnomy abhavyā tannāmādyajñānamohitā |
tad evaṃ māṃ dahaty eṣa prāṇeśavirahānalaḥ || 48 ||
[Analyze grammar]

iti vāksudhayā tasyāḥ pūrṇasvaśravaṇodaraḥ |
sānandaḥ sa manaḥsvāmī viprakanyāvapurdharaḥ || 49 ||
[Analyze grammar]

kṛtārthamānī matvā taṃ kālam ātmaprakāśane |
svarūpaṃ prakaṭīcakre niṣkṛṣya gulikāṃ mukhāt || 50 ||
[Analyze grammar]

jagāda ca vilolākṣi so 'ham evaiṣa yas tvayā |
udyāne darśanakrīto nīto nirvyājadāsatām || 51 ||
[Analyze grammar]

tvat saṃstavakṣaṇabhraṃśāt kleśaṃ taṃ cāptavān aham |
yasyaiṣaḥ pariṇāmo me kanyārūpagraho 'bhavat || 52 ||
[Analyze grammar]

tasmāt saphalayaitāṃ me visoḍhāṃ virahavyathām |
ātmanaś ca na tanvaṅgi kṣamate 'taḥ paraṃ smaraḥ || 53 ||
[Analyze grammar]

evaṃ vadantaṃ sahasā prāṇeśaṃ taṃ vilokya sā |
āsīd rājasutā kṣipraṃ snehāścaryatrapākulā || 54 ||
[Analyze grammar]

athātyautsukyanirvṛttagāndharvodvāhayos tayoḥ |
premṇas tasya mato yādṛk tādṛśo 'bhūd ratotsavaḥ || 55 ||
[Analyze grammar]

tataḥ so 'tra manaḥsvāmī kṛtī tasthau dvirūpabhṛt |
divā sagulikāḥ kanyā rātrāv agulikāḥ pumān || 56 ||
[Analyze grammar]

gateṣv atha dineṣv atra yaśaḥketor mahīpateḥ |
mṛgāṅkadattasaṃjñena svaśuryeṇa nijā sutā || 57 ||
[Analyze grammar]

dattā mṛgāṅkavatyākhyā mahārhavibhavottarā |
dvijātaye mahāmantriprajñāsāgarasūnave || 58 ||
[Analyze grammar]

tasmin mātulaputryāḥ sā rājaputrī śaśiprabhā |
vivāhe mātulagṛhaṃ taj jagāma nimantritā || 59 ||
[Analyze grammar]

tayā saha yayau so 'pi kanyakāparivārayā |
vipraputro manaḥsvāmī kāntakanyāsvarūpadhṛt || 60 ||
[Analyze grammar]

tatra taṃ kanyakārūpadharaṃ mantrisuto 'tha saḥ |
dṛṣṭvā kila smaravyādhagāḍhabāṇāhato 'bhavat || 61 ||
[Analyze grammar]

tato muṣitacittaḥ saṃs tayā kapaṭakanyayā |
yayau mantrisutaḥ śūnyaṃ svagṛhaṃ svavadhūsakhaḥ || 62 ||
[Analyze grammar]

tatra tanmukhalāvanyadhyānāsakto jagāma saḥ |
tīvrarāgamahāvyāladaṣṭo moham aśaṅkitam || 63 ||
[Analyze grammar]

kim etad iti saṃbhrānte jane tatrotsavojjhite |
tam upāgād drutaṃ buddhvā sa prajñāsāgaraḥ pitā || 64 ||
[Analyze grammar]

tena cāśvāsyamāno 'pi pitrā mohāt prabudhya saḥ |
pralapann iva sonmādam ujjagāra manogatam || 65 ||
[Analyze grammar]

asvādhīnaṃ ca taṃ matvā tat pitary ativihvale |
tasmin rājāpi tad buddhvā tatraiva samupāyayau || 66 ||
[Analyze grammar]

sa taṃ dṛṣṭvā jhaṭity eva gāḍhābhiṣvaṅgato gatam |
saptamīṃ madanāvasthāṃ jagāda prakṛtīr nṛpaḥ || 67 ||
[Analyze grammar]

kathaṃ brāhmaṇanikṣepaḥ kanyā sāsmai pradīyate |
tayā vinā ca niyataṃ paścimām ety asau daśām || 68 ||
[Analyze grammar]

asmin naṣṭe pitāsyaiṣo mama mantrī vinaṅkṣyati |
etannāśe rājyanāśas tad iha brūta kā gatiḥ || 69 ||
[Analyze grammar]

ity uktās tena rājñā tāḥ sarvāḥ prakṛtayo 'bruvan |
rājño dharmaṃ nijaṃ prāhuḥ prajānāṃ dharmarakṣaṇam || 70 ||
[Analyze grammar]

mūlaṃ tasya vidur mantraṃ sa ca mantriṣv avasthitaḥ |
mantrināśe mūlanāśād rakṣyā dharmakṣatir dhruvam || 71 ||
[Analyze grammar]

pāpaṃ ca syād dvijasyāsya sasūnor mantriṇo vadhāt |
tasmād rakṣyo 'yam āsanno 'vaśyaṃ te dharmaviplavaḥ || 72 ||
[Analyze grammar]

dātavyā mantriputrāya vipranyastā kumārikā |
kālāntarāgate vipre kruddhe pratividhāsyate || 73 ||
[Analyze grammar]

evam uktaḥ prakṛtibhis tatheti pratyapadyata |
sa rājā mantriputrāya dātuṃ tāṃ kūṭakanyakām || 74 ||
[Analyze grammar]

ānītaś ca sa niścitya lagnaṃ rājasutāgṛhāt |
kanyārūpo manaḥsvāmī taṃ jagāda mahīpatim || 75 ||
[Analyze grammar]

anyenānyārtham ānītām anyasmai māṃ dadāsi cet |
kāmaṃ tad astu rājā tvaṃ dharmādharmau tavādya tau || 76 ||
[Analyze grammar]

ahaṃ vivāham icchāmi samayenedṛśena tu |
ekaśayyāṃ na netavyā patyā tāvad ahaṃ haṭhāt || 77 ||
[Analyze grammar]

yāvat tīrthāni ṣaṇmāsān paribhramya sa nāgataḥ |
evaṃ na cet kṛttajihvāṃ dantair jānīhi māṃ mṛtām || 78 ||
[Analyze grammar]

ity ukte samaye tena yūnā kanyāvapurbhṛtā |
rājñā sa bodhitaḥ prāpa nirvṛttiṃ mantriputrakaḥ || 79 ||
[Analyze grammar]

tatheti pratipadyaitat kṛtvodvāhaṃ kilāśu tam |
ekasmin sthāpayitvā ca vāsake te surakṣite || 80 ||
[Analyze grammar]

tāṃ mṛgāṅkavatīm ādyāṃ vadhūṃ kūṭavadhūṃ ca tām |
jagāma tīrthayātrāyai mūḍaḥ kāntāpriyecchayā || 81 ||
[Analyze grammar]

sa covāsa manaḥsvāmī strīrūpo 'tra tayā saha |
mṛgāṅkavatyekagṛhe samānaśayanāsanaḥ || 82 ||
[Analyze grammar]

tathā sthitaṃ kadācit taṃ sā mṛgāṅkavatī niśi |
śayyāgṛhe raho 'vādīd bahiḥsupte paricchade || 83 ||
[Analyze grammar]

kathāṃ kāṃcit tvam ākhyāhi nidrā nāsti hi me sakhi |
tac chrutvākathayat so 'syai strīrūpas tāṃ kathāṃ yuvā || 84 ||
[Analyze grammar]

yatrelākhyasya rājarṣeḥ sūryavaṃśabhuvaḥ purā |
prāptasya gaurīśāpena strītvaṃ viśvaikamohanam || 85 ||
[Analyze grammar]

anyonyadarśanaprītyā devodyānavanāntare |
abhūd budhena saṃyogaḥ samabhūc ca purūravāḥ || 86 ||
[Analyze grammar]

tāṃ kathāṃ kathayitvā ca dhūrtaḥ puna uvāca saḥ |
tad evaṃ devatādeśān mantrauṣadhavaśena vā || 87 ||
[Analyze grammar]

puruṣaḥ strī kadācit syāt strī vā jātu pumān bhavet |
bhavanti caivaṃ saṃyogāḥ kāmajā mahatām api || 88 ||
[Analyze grammar]

śrutvaitat taruṇī mugdhā vivāhaproṣitānukā |
sā mṛgāṅkavatī smāha viśvastā sahavāsataḥ || 89 ||
[Analyze grammar]

śrutvaitāṃ me kathām etad aṅgaṃ simisimāyate |
hṛdayaṃ sīdatīvedaṃ tad etat sakhi kiṃ vada || 90 ||
[Analyze grammar]

tac chrutvā so 'ṅganārūpo vipraḥ puna uvāca tām |
etāni kāmacihnāni nanv apūrvāṇi te sakhi || 91 ||
[Analyze grammar]

mayaitāny anubhūtāni nigūhe na hy ahaṃ tava |
iti tenoditāvādīt sā mṛgāṅkavatī śanaiḥ || 92 ||
[Analyze grammar]

sakhi prāṇasamā tvaṃ me tat kālajñā na vacmi kim |
api puṃsaḥ praveśaḥ syād upāyena hi kenacit || 93 ||
[Analyze grammar]

evam uktavatīm etāṃ sa ca labdhāśayas tadā |
prāha dhūrtapateḥ śiṣyo yady evaṃ tad vadāmi te || 94 ||
[Analyze grammar]

vaiṣṇavo 'sti prasādo me yenāhaṃ svecchayā niśi |
puruṣaḥ syāṃ tad eṣo 'dya bhavāmi tvatkṛte pumān || 95 ||
[Analyze grammar]

ity uktvā sa manaḥsvāmī niṣkṛṣya gulikāṃ mukhāt |
yauvanoddāmam ātmānaṃ tasyai kāntam adarśayat || 96 ||
[Analyze grammar]

tataḥ kathitavisrambhaḥ sarvasvagatayantraṇaḥ |
kālocitarasaḥ ko'pi tayor āsīd ratotsavaḥ || 97 ||
[Analyze grammar]

atha tatra tayā sākaṃ sa mantrisutabhāryayā |
tasthau dvijo divā nārī rātrau ca puruṣo bhavan || 98 ||
[Analyze grammar]

āsannāgamanaṃ taṃ ca buddhvā mantrisutaṃ dinaiḥ |
tām ādāya niśi svairaṃ palāyya sa yayau tataḥ || 99 ||
[Analyze grammar]

etasmiṃś ca kathāsaṃdhau mūladevaḥ sa tadguruḥ |
buddhvā tad akhilaṃ bhūtvā bhūyo vṛddhadvijākṛtiḥ || 100 ||
[Analyze grammar]

śaśinānugataḥ sakhyā taruṇadvijarūpiṇā |
āgatya taṃ yaśaḥketuṃ prahvo rājānam abravīt || 101 ||
[Analyze grammar]

ānīto 'yaṃ mayā putro dehi me tāṃ snuṣām iti |
tataḥ saṃmantrya sa nṛpaḥ śāpabhītas tam abhyadhāt || 102 ||
[Analyze grammar]

brahman na jāne kva gatā sā snuṣā te kṣamasva tat |
aparādhāt sutasyārthe dadāmi svasutāṃ tava || 103 ||
[Analyze grammar]

ity uktvā dhūrtarājaṃ taṃ kṛtakakrodhaniṣṭhuram |
vibruvāṇaṃ jaradviprarūpaṃ prārthya sa bhūpatiḥ || 104 ||
[Analyze grammar]

tatsakhye kṛtatatputravyapadeśāya tāṃ dadau |
tanayāṃ śaśine tasmai yathāvidhi śaśiprabhām || 105 ||
[Analyze grammar]

tataḥ sa mūladevas tau yathābhūtau vadhūvarau |
ādāya svāspadaṃ prāyād rājārtheṣv akṛtaspṛhaḥ || 106 ||
[Analyze grammar]

tatra tasmiṃś ca milite manaḥsvāmīny abhūn mahān |
vivādo mūladevāgre śaśinas tasya cobhayoḥ || 107 ||
[Analyze grammar]

manaḥsvāmy abravīd eṣā dīyatāṃ me śaśiprabhā |
kanyaiva hi mayodūḍā prāg asau gurvanugrahāt || 108 ||
[Analyze grammar]

śaśī jagāda ko 'syās tvaṃ mūrkha dārā iyaṃ mama |
agnisākṣikam eṣā hi pitrā me pratipāditā || 109 ||
[Analyze grammar]

evaṃ māyābalaprāptarājaputrīnimittataḥ |
vivādāsaktayor nāsīt paricchedas tayor dvayoḥ || 110 ||
[Analyze grammar]

tad rājaṃs tvaṃ mama brūhi tāvat kasyopapadyate |
bhāryā sā saṃśayaṃ chindhi pūrvoktaḥ samayo 'sti te || 111 ||
[Analyze grammar]

manye śaśina evāsau bhāryā nyāyyā nṛpātmajā |
yasmai pradattā prakaṭaṃ pitrā dharmyeṇa vartmanā || 112 ||
[Analyze grammar]

manaḥsvāmī tu tāṃ bheje cauryād gāndharvadharmataḥ |
caurasya tu parasveṣu svatvaṃ nyāyyaṃ na jātu cit || 113 ||
[Analyze grammar]

iti tasya vaco niśamya rājño vetālaḥ sa yayau punas tad eva |
sahasaiva tad aṃsataḥ svadhāma kṣitipaḥ so 'pi tam anviyāya tūrṇam || 114 ||
[Analyze grammar]