Chapter 21

sa trivikramaseno 'tha gatvā taṃ śiṃśapātaroḥ |
bhūyo 'py āsādya vetālaṃ skandhe jagrāha bhūpatiḥ || 1 ||
[Analyze grammar]

prasthitaṃ ca tam urvīśaṃ sa vetālo 'bhyadhāt punaḥ |
rājañ śrānto 'si tac citrāṃ kathām ākhyāmi te śṛṇu || 2 ||
[Analyze grammar]

asty ayodhyeti nagarī rājadhānī babhūva yā |
rakṣaḥkulakṛtāntasya rāmarūpasya śārṅgiṇaḥ || 3 ||
[Analyze grammar]

tasyāṃ rājābhavad vīraketur nāma rarakṣa yaḥ |
kṣoṇīm imāṃ mahābāhuḥ prākāro nagarīm iva || 4 ||
[Analyze grammar]

tasmin mahīpatāv asyāṃ puryām eko mahāvaṇik |
ratnadattābhidhāno 'bhūd vaṇiṅnīvahanāyakaḥ || 5 ||
[Analyze grammar]

nandayantyabhidhānāyāṃ patnyāṃ tasyodapadyata |
sutā ratnavatī nāma devatārādhanārjitā || 6 ||
[Analyze grammar]

sā ca tasya pitur veśmany avardhata manasvinī |
rūpalāvaṇyavinayaiḥ sahaiva sahajair guṇaiḥ || 7 ||
[Analyze grammar]

yauvanasthāṃ ca tāṃ tasmād ratnadattān na kevalam |
mahānto vaṇijo yāvad rājāno 'pi yayācire || 8 ||
[Analyze grammar]

sā tu puṃdveṣiṇī naicchad bhartāram api vāsavam |
prāṇatyāgodyatā sehe na vivāhakathām api || 9 ||
[Analyze grammar]

tena tasyāḥ pitā tūṣṇīṃ tasthau vātsalyaduḥsthitaḥ |
sa ca pravādo 'yodyāyāṃ tasyāṃ sarvatra paprathe || 10 ||
[Analyze grammar]

atrāntare sadā caurair muṣyamāṇāḥ kilākhilāḥ |
saṃbhūyātra nṛpaṃ paurā vīraketuṃ vyajijñapan || 11 ||
[Analyze grammar]

nityaṃ muṣyāmahe caurai rātrau rātrāv iha prabho |
lakṣyante te ca nāsmābhis tad devo vettu yat param || 12 ||
[Analyze grammar]

iti pauraiḥ sa vijñapto rājā tām abhitaḥ purīm |
taskarānveṣaṇe channān ādiśad ratrirakṣakān || 13 ||
[Analyze grammar]

te 'pi prāpur na yac caurān purī sāmuṣyataiva ca |
tadaikadā svayaṃ rājā niśi svairaṃ viniryayau || 14 ||
[Analyze grammar]

ekākī cāttaśastro 'tra bhraman so 'paśyad ekataḥ |
ekaṃ prākārapṛṣṭena yāntaṃ kam api pūruṣam || 15 ||
[Analyze grammar]

niḥśabdapadavinyāsavicitragatikauśalam |
saśaṅkalolanayanaṃ paśyantaṃ pṛṣṭato muhuḥ || 16 ||
[Analyze grammar]

ayaṃ sa nūnaṃ cauro me muṣṇāty ekacaraḥ purīm |
iti matvaiva nikaṭaṃ sa tasyopayayau nṛpaḥ || 17 ||
[Analyze grammar]

tataḥ sa cauro dṛṣṭvā taṃ nṛpaṃ ko 'sīty abhāṣata |
cauro 'ham iti rājā taṃ cauraṃ pratyabravīt sa tam || 18 ||
[Analyze grammar]

so 'tha cauro 'bhyadhād dṛṣṭvā tarhi tulyo 'si me suhṛt |
tad ehi madgṛhaṃ tāvan mitrācāraṃ karomi te || 19 ||
[Analyze grammar]

tac chrutvā sa tathety uktvā tenaiva saha bhūpatiḥ |
yayau vanāntardharaṇīkhātāntarvarti tadgṛham || 20 ||
[Analyze grammar]

aśeṣabhogabhogāḍhyaṃ bhāsvaddīpaprakāśitam |
navīnam iva pātālaṃ balirājānadhiṣṭhitam || 21 ||
[Analyze grammar]

tatra praviṣṭe tasmiṃś ca kṛtāsanaparigrahe |
rājñi so 'bhyantaragṛhaṃ praviveśātha taskaraḥ || 22 ||
[Analyze grammar]

tat kṣaṇaṃ ca tam etyaikā dāsī tatrāvadan nṛpam |
mahābhāga praviṣṭas tvam iha mṛtyumukhe katham || 23 ||
[Analyze grammar]

ekacauro hy asau pāpaṃ nirgatyātaḥ kariṣyati |
dhruvaṃ visvāsaghātīti tad itas tvaritaṃ vraja || 24 ||
[Analyze grammar]

ity uktaḥ sa tayā rājā nirgatyaiva tato drutam |
gatvā svarājadhānīṃ ca niśi sainyāny asajjayat || 25 ||
[Analyze grammar]

saṃnaddhasainyaś cāgatya dasyos tasya rurodha tat |
bhūgṛhadvāravivaraṃ rasattūryākulair balaiḥ || 26 ||
[Analyze grammar]

tato ruddhe gṛhe vṛttaṃ pratibhedam avetya saḥ |
maraṇe niścitaś cauraḥ śūro yuddhāya niryayau || 27 ||
[Analyze grammar]

nirgataś ca raṇe cakre parākramam amānuṣam |
karāṃś cakarta kariṇāṃ jaṅghāś ciccheda vājinām || 28 ||
[Analyze grammar]

jahāra ca śirāṃsy eko bhaṭānāṃ khaḍgacarmabhṛt |
tatas taṃ kṣapitānīkam abhyadhāvat svayaṃ nṛpaḥ || 29 ||
[Analyze grammar]

sa tasya khaḍgavidyājño rājā karaṇayuktitaḥ |
hastāj jahāra nistriṃśam atha tāṃ kṣurikām api || 30 ||
[Analyze grammar]

aśastraṃ muktaśastro 'tha bāhuyuddhena taṃ nṛpaḥ |
cauraṃ nihatya dharaṇau sajīvagrāham agrahīt || 31 ||
[Analyze grammar]

nināya taṃ ca saṃyamya sadhanaṃ nagarīṃ nijām |
prātaś cājñāpayat tasya śūlāropaṇanigraham || 32 ||
[Analyze grammar]

nīyamānaṃ ca taṃ vadhyabhūmiṃ cauraṃ saḍiṇḍimam |
dadarśa sā ratnavatī vaṇikkanyātra harmyataḥ || 33 ||
[Analyze grammar]

vraṇitaṃ dhūliliptāṅgam apy etaṃ māramohitā |
dṛṣṭvaiva gatvā pitaraṃ ratnadattam uvāca sā || 34 ||
[Analyze grammar]

vadhāya nīyate yo 'yam eṣa bhartā vṛto mayā |
tan nṛpād rakṣa tātainaṃ na ced enam anu mriye || 35 ||
[Analyze grammar]

tac chrutvā tāṃ pitāvādīt kim idaṃ putri bhāṣase |
yā tvaṃ necchasi bhūpālām api bhartṝn abhīpsataḥ || 36 ||
[Analyze grammar]

sā pāpaṃ taskaram imaṃ vāñchasy āpadgataṃ katham |
ity ādi pitrā proktāpi niścayān na cacāla sā || 37 ||
[Analyze grammar]

tataḥ sa tatpitā gatvā tasya caurasya satvaram |
sarvasvenāpi rājānaṃ vadhān mokṣam ayācata || 38 ||
[Analyze grammar]

rājā tu taṃ na tatyāja hemakoṭiśatair api |
svaśarīrapaṇānītaṃ cauraṃ sarvāpahāriṇam || 39 ||
[Analyze grammar]

tataḥ pitary upāyāte vimukhe sā vaṇiksutā |
anumartuṃ kṛtasnānā vāryamāṇāpi bandhubhiḥ || 40 ||
[Analyze grammar]

āruhya śibikāṃ tasya dasyor vadhyabhuvaṃ yayau |
anvīyamānā rudatā pitrā mātrā janena ca || 41 ||
[Analyze grammar]

tāvac ca vadhakaiḥ so 'tra cauraḥ śūle 'dhiropitaḥ |
tāṃ dadarśa galatprāṇas tathā sajñātim āgatām || 42 ||
[Analyze grammar]

janāc chrutvā ca vṛttāntam aśru muktvā kṣaṇaṃ tataḥ |
hasan sa cauraḥ kim api prāṇāñ śūlagato jahau || 43 ||
[Analyze grammar]

tato 'vatāritaṃ śūlāt sā taccaurakalevaram |
ādāya cārurohātra citāṃ sādhvī vaṇiksutā || 44 ||
[Analyze grammar]

tat kṣaṇaṃ ca śmaśāne 'tra bhairavaḥ kṛtasaṃnidhiḥ |
adṛśyo bhagavān evaṃ tām uvācāntarikṣataḥ || 45 ||
[Analyze grammar]

asmin svayaṃvarapatāv evaṃ bhaktyā tavānayā |
tuṣṭo 'smi tad varaṃ mattaḥ prārthayasva pativrate || 46 ||
[Analyze grammar]

tac chrutvaiva varaṃ devād evaṃ vavre praṇamya sā |
nātha putraśataṃ bhūyād aputrasyāpi matpituḥ || 47 ||
[Analyze grammar]

yenānanyasuto naiṣaḥ prāṇāñ jahyān mayā vinā |
iti proktavatīm enāṃ sādhvīṃ devo 'bravīt punaḥ || 48 ||
[Analyze grammar]

pituḥ putraśataṃ te 'stu varam anyaṃ vṛṇīṣva ca |
tvādṛśī dṛḍhasattvā hi naitāvanmātram arhati || 49 ||
[Analyze grammar]

tad ākarṇyātha sāvādīt prasanno mayi cet prabhuḥ |
taj jīvatv eṣa bhartā me dhārmikaś ca sadāstv iti || 50 ||
[Analyze grammar]

evam astv akṣato jīvann uttiṣṭhatv eṣa te patiḥ |
dhārmikaś cāstu rājāsya vīraketuś ca tuṣyatu || 51 ||
[Analyze grammar]

ity uktavaty anālakṣyamūrtau śarve nabhaḥsthite |
uttasthāv akṣatāṅgo 'tra cauro jīvaṃs tadaiva saḥ || 52 ||
[Analyze grammar]

tato vismitahṛṣṭaḥ san ratnadattaḥ sutāṃ vaṇik |
ādāya tāṃ ratnavatīṃ cauraṃ jāmātaraṃ ca tam || 53 ||
[Analyze grammar]

prahṛṣṭair bāndhavaiḥ sākaṃ praviśya nijamandiram |
labdhaputravaraś cakre svānandocitam utsavam || 54 ||
[Analyze grammar]

jñātavṛttāntatuṣṭaś ca tadaivānāyya taṃ nṛpaḥ |
ekavīraṃ vīraketuś cauraṃ senāpatiṃ vyadhāt || 55 ||
[Analyze grammar]

cauryān nivṛtto 'tha sa tāṃ pariṇīya vaṇiksutām |
ekavīraḥ sukhaṃ tasthau mārgastho rājasaṃmataḥ || 56 ||
[Analyze grammar]

iti kathayitvā sa kathāṃ vetālo dattapūrvaśāpabhayam |
aṃsasthitas trivikramasenaṃ papraccha taṃ kṣitipam || 57 ||
[Analyze grammar]

rājan brūhi sapitṛkām upasthitāṃ tāṃ vaṇiksutāṃ dṛṣṭvā |
caureṇa śūlapṛṣṭe ruditaṃ hasitaṃ ca kiṃ tena || 58 ||
[Analyze grammar]

atha rājā pratyavadad ruditaṃ caureṇa duḥkhatas tena |
nāsyānṛṇyam akāraṇabandhor yāto 'smi vaṇija iti || 59 ||
[Analyze grammar]

āścaryataś ca hasitaṃ kim iyaṃ kanyā nṛpān varān hitvā |
mayy asminn anuraktā strīcittam aho vicitram iti || 60 ||
[Analyze grammar]

ity uktavākyasya mahībhṛto 'ṃsān māyī svaśaktyaiva tadā jagāma |
svaṃ dhāma vetālavaraḥ sa rājāpy etaṃ punaḥ pūrvavad anvagacchat || 61 ||
[Analyze grammar]