Chapter 16

tato gatvā punas tasmāc chiṃśapāpādapān nṛpaḥ |
sa trivikramasenas taṃ skandhe vetālam agrahīt || 1 ||
[Analyze grammar]

prasthitaś ca tatas tena vetālenābhyadhāyi saḥ |
rājan kva rājyaṃ kvaitasmiñ śmaśāne bhramaṇaṃ niśi || 2 ||
[Analyze grammar]

kim etan nekṣase bhūtasaṃkulaṃ rātribhīṣaṇam |
citādhūmair iva dhvāntair niruddhaṃ pitṛkānanam || 3 ||
[Analyze grammar]

kaṣṭaṃ kīdṛg graho 'yaṃ te bhikṣos tasyānurodhataḥ |
tad idaṃ śṛṇu tāvan me praśnaṃ mārgavinodanam || 4 ||
[Analyze grammar]

avantiṣv asti nagarī yugādau devanirmitā |
śaivī tanur ivoddāmabhogibhūtivibhūṣitā || 5 ||
[Analyze grammar]

padmāvatī bhogavatī yā hiraṇyavatīti ca |
kṛtādiṣu triṣu khyātā kalāv ujjayinīti ca || 6 ||
[Analyze grammar]

tasyāṃ ca vīradevākhyo rājābhūd bhūbhṛtāṃ varaḥ |
tasya padmaratir nāma mahādevī babhūva ca || 7 ||
[Analyze grammar]

so 'tha rājā tayā sākaṃ gatvā mandākinītaṭe |
haram ārādhayāmāsa tapasā putrakāmyayā || 8 ||
[Analyze grammar]

ciraṃ tapaḥsthitaś cātra parituṣṭeśvaroditām |
kṛtasnānārcanavidhiḥ śuśrāvemāṃ giraṃ divaḥ || 9 ||
[Analyze grammar]

rājann utpatsyate putraḥ śūras tava kulodbhavaḥ |
kanyā cānanyasāmānyalāvaṇyanyakkṛtāpsarāḥ || 10 ||
[Analyze grammar]

śrutvaitāṃ nābhasīṃ vāṇīṃ siddhābhīṣṭaḥ sa bhūpatiḥ |
vīradevaḥ svanagarīm āyayau mahiṣīsakhaḥ || 11 ||
[Analyze grammar]

tatrāsya śūradevākhye jāte prathamam ātmaje |
tasyāṃ padmaratau devyāṃ kramād ajani kanyakā || 12 ||
[Analyze grammar]

anaṅgasyāpi rūpeṇa ratim utpādayed iyam |
ity anaṅgaratir nāmnā pitrā tena vyadhāyi sā || 13 ||
[Analyze grammar]

vṛddhiṃ gatāyās tasyāś ca sa pitā sadṛśaṃ varam |
prepsur ānāyayat pṛthvyāṃ paṭeṣu likhithān nṛpān || 14 ||
[Analyze grammar]

teṣv eko 'pi na yat tasya tattulyaḥ pratyabhāsata |
tena rājā sa vātsalyāt tāṃ sutāṃ pratyabhāṣata || 15 ||
[Analyze grammar]

ahaṃ tāvan na paśyāmi sadṛśaṃ putri te varam |
tat kuruṣva nṛpān sarvān melayitvā svayaṃvaram || 16 ||
[Analyze grammar]

etat pitṛvacaḥ śrutvā rājaputrī jagāda sā |
tāta svayaṃvaraṃ kartuṃ hrepaṇān nāham utsahe || 17 ||
[Analyze grammar]

kiṃ tv ekaṃ vetti yo 'pūrvaṃ vijñānaṃ svākṛtir yuvā |
tasmai tvayāhaṃ dātavyā nārtho 'nyenādhikena me || 18 ||
[Analyze grammar]

ity anaṅgarates tasyāḥ śrutvā svaduhitur vacaḥ |
tādṛśaṃ tadvaraṃ yāvad anviṣyati sa bhūpatiḥ || 19 ||
[Analyze grammar]

tāvat tallokato buddhvā catvāras tam upāyayuḥ |
vīrā vijñānino bhavyāḥ puruṣā dakṣiṇāpathāt || 20 ||
[Analyze grammar]

te rājñā pūjitās tasmai svaṃ svaṃ vijñānam ekaśaḥ |
śaśaṃsuḥ saṃnidhau tasyā rājaputryās tadarthinaḥ || 21 ||
[Analyze grammar]

eko jagāda śūdro 'ham ākhyayā pañcapaṭṭikaḥ |
pañcāgryavastrayugmāni karomy eko 'ham anvaham || 22 ||
[Analyze grammar]

tebhya ekaṃ prayacchāmi devāyaikaṃ dvijanmane |
ekaṃ ca parigṛhṇāmi vāsasor ātmanaḥ kṛte || 23 ||
[Analyze grammar]

ekaṃ dadāmi bhāryāyai yadi sā bhavatīha me |
ekaṃ vikrīya cāhārapānādi vidadhāmy aham || 24 ||
[Analyze grammar]

evaṃ vijñānine 'naṅgaratir me dīyatām iti |
ity ekenodite tena dvitīyaḥ puruṣo 'bravīt || 25 ||
[Analyze grammar]

bhāṣājño nāma vaiśyo 'haṃ sarveṣāṃ mṛgapakṣiṇām |
rutaṃ vedmi tad eṣā me rājaputrī pradīyatām || 26 ||
[Analyze grammar]

evam ukte dvitīyena tṛtīyaḥ proktavāṃs tataḥ |
ahaṃ khaḍgadharo nāma doḥśālī kṣatriyo nṛpa || 27 ||
[Analyze grammar]

na khaḍgavidyāvijñāne pratimallo 'sti me kṣitau |
tad eṣā tanayā rājaṃs tvayā mahyaṃ vitīryatām || 28 ||
[Analyze grammar]

ity ukte tu tṛtīyena caturtha idam abhyadhāt |
vipro 'haṃ jīvadattākhyo vijñānaṃ ca mamedṛśam || 29 ||
[Analyze grammar]

jantūṃ mṛtān apy ānīya darśayāmy āśu jīvataḥ |
tadvīracaryāsiddhaṃ māṃ patim eṣā prapadyatām || 30 ||
[Analyze grammar]

evaṃ vaktṝn sa tān paśyan divyaveṣākṛtīn nṛpaḥ |
vīradevaḥ sutāyukto dolārūḍha ivābhavat || 31 ||
[Analyze grammar]

ity ākhyāya kathām etāṃ vetālaḥ pṛṣṭavān nṛpam |
sa trivikramasenaṃ taṃ dattapūrvoktaśāpabhīḥ || 32 ||
[Analyze grammar]

tad bhavān vaktu tāvan me kasmai deyā viśāmpate |
teṣāṃ caturṇāṃ madhyāt sā kanyānaṅgaratir bhavet || 33 ||
[Analyze grammar]

etac chrutvā sa rājā taṃ vetālaṃ pratyabhāṣata |
maunaṃ tyājayati prāyaḥ kālakṣepāya māṃ bhavān || 34 ||
[Analyze grammar]

anyathā gahanaḥ ko 'yaṃ praśno yogeśvarocyatām |
śūdrāya hi kuvindāya kṣatriyā dīyate katham || 35 ||
[Analyze grammar]

vaiśyāyāpi kathaṃ deyā kṣatriyā yac ca tad gatam |
mṛgādibhāṣāvijñānaṃ kārye tat kvopayujyate || 36 ||
[Analyze grammar]

yo 'pi vipras tṛtīyo 'tra tenāpi patitena kim |
svakarmapracyutenendrajālinā vīramāninā || 37 ||
[Analyze grammar]

tasmāt tasmai kṣatriyāya caturthāya samāya sā |
deyā khaḍgadharāyaiva svavidyāvīryaśāline || 38 ||
[Analyze grammar]

etat tasya vaco niśamya nṛpater aṃsasthalāt pūrvavat vetālaḥ sa jagāma yogabalataḥ svasthānam evāśu tat |
bhūpālo 'pi sa taṃ tathaiva punar apy ānetum anvag yayau utsāhaikaghane hi vīrahṛdaye nāpnoti khedo 'ntaram || 39 ||
[Analyze grammar]