Chapter 13

tato gatvā punas tasmāt prāpya taṃ śiṃśapātaroḥ |
vetālaṃ prāgvad ādāya skandhe maunena bhūpatiḥ || 1 ||
[Analyze grammar]

sa trivikramaseno 'tra yāvad āgacchati drutam |
tāvat pathi sa vetālo bhūyo 'py evam uvāca tam || 2 ||
[Analyze grammar]

rājan sudhīḥ susattvaś ca bhavāṃs tena priyo 'si me |
ato vinodinīṃ vacmi kathāṃ praśnaṃ ca me śṛṇu || 3 ||
[Analyze grammar]

āsīd rājā yaśaḥketur iti khyāto mahītale |
tasya śobhāvatī nāma rājadhāny abhavat purī || 4 ||
[Analyze grammar]

tasyām abhūn nagaryāṃ ca gauryāyatanam uttamam |
tasya dakṣiṇataś cāsīd gaurītīrthābhidhaṃ saraḥ || 5 ||
[Analyze grammar]

tasyāṣāḍhacaturdaśyāṃ śuklāyāṃ prativatsaram |
yātrāyāṃ snātum eti sma nānādigbhyo mahājanaḥ || 6 ||
[Analyze grammar]

ekadā ca tithau tasyāṃ snātum atrāyayau yuvā |
rajako dhavalo nāma grāmād brahmasthalābhidhāt || 7 ||
[Analyze grammar]

so 'paśyad rajakasyātra tīrthe snānāgatāṃ sutām |
kanyāṃ śuddhapaṭākhyasya nāmnā madanasundarīm || 8 ||
[Analyze grammar]

indor lāvaṇyahāriṇyā tayā sa hṛtamānasaḥ |
anviṣya tannāmakule kāmārto 'tha gṛhaṃ yayau || 9 ||
[Analyze grammar]

tatrānavasthitas tiṣṭhan nirāhāras tayā vinā |
pṛṣṭho mātrārtayā tasyai tac chaśaṃsa manogatam || 10 ||
[Analyze grammar]

sā gatvā vimalākhyāya tat svabhartre nyavedayat |
so 'py āgatya tathāvasthaṃ dṛṣṭvā taṃ sutam abhyadhāt || 11 ||
[Analyze grammar]

kiṃ viṣīdasi putraivam aduṣprāpye 'pi vāñchite |
sa hi madyācitaḥ śuddhapaṭo dāsyati te sutām || 12 ||
[Analyze grammar]

anyūnā hi vayaṃ tasmāt kulenārthena karmaṇā |
taṃ vedmy ahaṃ sa māṃ vetti tenaitan me na duḥkaram || 13 ||
[Analyze grammar]

ity āśvāsya sa taṃ putram āhārādau pravartya ca |
tadyukto vimalo 'nyedyur yayau śuddhapaṭāspadam || 14 ||
[Analyze grammar]

yayāce cātra putrasya tasyārthe dhavalasya saḥ |
kanyāṃ tasmāt sa cāsmai tāṃ pratiśuśrāva sādaram || 15 ||
[Analyze grammar]

lagnaṃ niścitya cānyedyus tāṃ sa śuddhapaṭaḥ sutām |
dhavalāya dadau tasmai tulyāṃ madanasundarīm || 16 ||
[Analyze grammar]

kṛtodvāhaś ca sa tayā sākaṃ darśanasaktayā |
bhāryayā svapitur gehaṃ jagāma dhavalaḥ kṛtī || 17 ||
[Analyze grammar]

sukhasthitasya tasyātha kadācic chvaśurātmajaḥ |
tasyā madanasundaryā bhrātā tatrāgato 'bhavat || 18 ||
[Analyze grammar]

sa kṛtapraśrayaḥ sarvaiḥ svasrāśliṣyābhinanditaḥ |
saṃbandhipṛṣṭakuśalo viśrāntaś ca jagāda tān || 19 ||
[Analyze grammar]

ahaṃ madanasundaryā jāmātuś ca nimantraṇe |
tātena preṣito yasmād devīpūjotsavo 'sti naḥ || 20 ||
[Analyze grammar]

śraddhāya caitat tadvākyaṃ yathārhaiḥ pānabhojanaiḥ |
te saṃbandhyādayaḥ sarve tad ahas tam upācaran || 21 ||
[Analyze grammar]

prātar madanasundaryā svaśuryeṇa ca tena saḥ |
sahito dhavalaḥ prāyād gṛhaṃ tac chvāśuraṃ prati || 22 ||
[Analyze grammar]

prāpya śobhāvatīṃ tāṃ ca purīm ātmatṛtīyakaḥ |
dadarśa nikaṭaṃ prāpya sa gauryāyatanaṃ mahat || 23 ||
[Analyze grammar]

nijagāda ca tau bhāryāśvaśuryau śraddhayā tataḥ |
etam etāṃ bhagavatīṃ paśyāmo devatām iha || 24 ||
[Analyze grammar]

tac chrutvā sa śvaśuryas taṃ niṣedhaṃ pratyabhāṣata |
iyanto riktahastāḥ kiṃ paśyāmo devatām iti || 25 ||
[Analyze grammar]

ahaṃ tāvad vrajāmy eko yuvām atraiva tiṣṭhatam |
ity uktvā dhavalo draṣṭuṃ devīṃ tāṃ sa tato yayau || 26 ||
[Analyze grammar]

praviśyāyatanaṃ tasyāḥ praṇamya ca vibhāvya ca |
tām aṣṭādaśadordaṇḍakhaṇḍitoccaṇḍadānavām || 27 ||
[Analyze grammar]

pādapadmatalākṣiptamahiṣāsuramardinīm |
sa vidhipreraṇotpannabuddhir evam acintayat || 28 ||
[Analyze grammar]

jīvopahārair vividhair imāṃ devīṃ jano 'rcati |
ahaṃ tu siddhyai kiṃ naitāṃ prīṇāmy ātmopahārataḥ || 29 ||
[Analyze grammar]

iti dhyātvaiva tadgarbhagṛhād ādāya nirjanāt |
khaḍgaṃ sāṃyātrikaiḥ kaiścid devyāḥ prāk prābhṛtīkṛtam || 30 ||
[Analyze grammar]

baddhvā śiroruhair ghaṇṭāśṛṅkhalāyāṃ nijaṃ śiram |
cicchedaitena khaḍgena tac chinnaṃ cāpatad bhuvi || 31 ||
[Analyze grammar]

ciraṃ yāvat sa nāyāti tāvad gatvā tam īkṣitum |
tatraiva devībhavane tacchvaśuryo viveśa saḥ || 32 ||
[Analyze grammar]

so 'pi dṛṣṭvā tam utkṛttamūrdhānaṃ bhaginīpatim |
vyāmohitas tathaiva svaṃ śiras tenāsinācchinat || 33 ||
[Analyze grammar]

so 'pi yāvac ca nāyāti tāvad udbhrāntamānasā |
taddevībhavanaṃ sāpi yayau madanasundarī || 34 ||
[Analyze grammar]

praviśya dṛṣṭvaiva patiṃ bhrātaraṃ ca tathāgatau |
hā kim etad dhatāsmīti vilapanty apatad bhuvi || 35 ||
[Analyze grammar]

kṣaṇāc cotthāya śocantī tāv akāṇḍahatāv ubhau |
kiṃ mamāpy adhunānena jīvitenety acintayat || 36 ||
[Analyze grammar]

vyajijñapac ca devīṃ tāṃ dehatyāgonmukhī satī |
devi saubhāgyacāritravidhānaikādhidevate || 37 ||
[Analyze grammar]

adhyāsitaśarīrārdhe bhartur māraripor api |
aśeṣalalanālokaśaraṇye duḥkhahāriṇi || 38 ||
[Analyze grammar]

hṛtāv ekapade kasmād bhartā bhrātā ca me tvayā |
na yuktam etan mayi te nityabhaktā hy ahaṃ tvayi || 39 ||
[Analyze grammar]

tan me śritāyāḥ śaraṇaṃ śṛṇv ekaṃ kṛpaṇaṃ vacaḥ |
etāṃ tāvat tyajāmy atra daurbhāgyopahatāṃ tanum || 40 ||
[Analyze grammar]

janiṣye devi bhūyas tu yatra kutrāpi janmani |
tatraitāv eva bhūyāstāṃ dvau bhartṛbhrātarau mama || 41 ||
[Analyze grammar]

iti saṃstutya vijñapya devīṃ natvā ca tāṃ punaḥ |
pāśaṃ viracayāmāsa latayāśokapādape || 42 ||
[Analyze grammar]

tatrārpayati yāvac ca pāśe kaṇṭhaṃ vitatya sā |
tāvat tatroccacāraivaṃ bhāratī gaganāṅgaṇāt || 43 ||
[Analyze grammar]

mā kṛthāḥ sāhasaṃ putri bālāyā api te 'munā |
sattvotkarṣeṇa tuṣṭāsmi pāśam etaṃ parityaja || 44 ||
[Analyze grammar]

saṃśleṣaya śiraḥ svaṃ svaṃ bhartṛbhrātṛkabandhayoḥ |
uttiṣṭhatāṃ te jīvantāv etau dvāv api madvarāt || 45 ||
[Analyze grammar]

etac chrutvaiva saṃtyajya pāśaṃ harṣād upetya sā |
avibhāvyātirabhasād bhrāntā madanasundarī || 46 ||
[Analyze grammar]

bālā bhartṛśiro bhrātṛdehena samayojayat |
bhartṛdehena ca bhrātṛśiro vidhiniyogataḥ || 47 ||
[Analyze grammar]

tato 'kṣatāṅgau jīvantāv ubhāv uttasthatuś ca tau |
śirovinimayāj jātasaṃkarau kāyayor mithaḥ || 48 ||
[Analyze grammar]

athānyonyoditasvasvayathāvṛttāntatoṣiṇaḥ |
praṇamya devīṃ śarvānīṃ yatheṣṭaṃ te yayus trayaḥ || 49 ||
[Analyze grammar]

yāntī ca dṛṣṭvā svakṛtaṃ śirovinimayaṃ tayoḥ |
vignā kiṃkāryatāmūḍhā sābhūn madanasundarī || 50 ||
[Analyze grammar]

tad brūhi rājan ko bhartā tasyāḥ saṃkīrṇayos tayoḥ |
purvoktaḥ syāt sa śāpas te jānāno na bravīṣi cet || 51 ||
[Analyze grammar]

ity ākarṇya kathāpraśnaṃ rājā vetālatas tataḥ |
sa trivikramaseno 'tra tam evaṃ pratyabhāṣata || 52 ||
[Analyze grammar]

yat saṃsthaṃ tatpatiśiraḥ saiṣa tasyāḥ patis tayoḥ |
pradhānaṃ ca śiro 'ṅgeṣu pratyabhijñā ca tadgatā || 53 ||
[Analyze grammar]

ity uktavato nṛpates tasyāṃsāt punar atarkitaḥ sa yayau |
vetālaḥ sa ca rājā jagāma bhūyas tam ānetum || 54 ||
[Analyze grammar]