Kathasaritsagara [sanskrit]
by C. H. Tawney | 2014 | 226,424 words | ISBN-13: 9789350501351
The Sanskrit edition of the Kathasaritsagara referencing the English translation and grammatical analysis. Written by Somadeva and dating from the 12th century, the Kathasaritsagara (or Katha-sarit-sagara) represents an epic legend narrating the adventures of Naravahanadatta as he strives to become the destined emperor of the Vidyadharas. Alternative titles: (Kathāsaritsāgara, कथासरित्सागर, Kathā-sarit-sāgara)
Chapter 4
tataḥ prātaḥ samaṃ sainyaiḥ sa sumerutapovanāt |
tasmāt sūryaprabhaḥ prāyāc chrutaśarmajigīṣayā || 1 ||
[Analyze grammar]
tannivāsasya nikaṭaṃ trikūṭādrer avāpya ca |
āvāsito 'bhūt tatrasthaṃ balenotsārya tadbalam || 2 ||
[Analyze grammar]
āvāsite ca tatrāsmin sasumerumayādike |
āsthānasthe trikūṭeśasaṃbandhī dūta āyayau || 3 ||
[Analyze grammar]
sa cāgatya jagādaivaṃ sumeruṃ khecareśvaram |
śrutaśarmapitā rājā tava saṃdiṣṭavān idam || 4 ||
[Analyze grammar]
dūrasthasya na te 'smābhir ācāro jātucit kṛtaḥ |
adyāsmadviṣayaṃ prāptaḥ sa tvaṃ prāghuṇikaiḥ saha || 5 ||
[Analyze grammar]
tad ātithyam idānīṃ vo vidhāsyāmo yathocitam |
śrutvaitaṃ śatrusaṃdeśaṃ sumeruḥ pratyuvāca tam || 6 ||
[Analyze grammar]
sādhu nāsmatsamaṃ pātram atithiṃ prāpsyathāparam |
ātithyaṃ na pare loke dāsyatīhaiva tatphalam || 7 ||
[Analyze grammar]
tad ime vayam ātithyaṃ kriyatām ity udāhṛte |
sumeruṇā tathaivāgāt sa dūtaḥ svaṃ prabhuṃ prati || 8 ||
[Analyze grammar]
athonnatapradeśasthās te tu sūryaprabhādayaḥ |
sainyāni dadṛśuḥ svāni niviṣṭāni pṛthak pṛthak || 9 ||
[Analyze grammar]
tataḥ sunīthaḥ pitaraṃ svam uvāca mayāsuram |
pravibhāgaṃ rathādīnām asmatsainye 'tra śaṃsa naḥ || 10 ||
[Analyze grammar]
evaṃ karomi śṛṇutety uktvāṅgulyā nidarśayan |
dānavendraḥ sa sarvajño vaktum evaṃ pracakrame || 11 ||
[Analyze grammar]
asau subāhur nirghāto muṣṭiko goharas tathā |
pralambaś ca pramāthaś ca kaṅkaṭaḥ piṅgalo 'pi ca || 12 ||
[Analyze grammar]
vasudattādayaś caite rājāno 'rdharathā ime |
aṅkurī suviśālaś ca daṇḍibhūṣaṇasomilāḥ || 13 ||
[Analyze grammar]
unmattako devaśarmā pitṛśarmā kumārakaḥ |
ete saharidattādyāḥ sarve pūrṇarathā matāḥ || 14 ||
[Analyze grammar]
prakampano darpitaś ca kumbhīro mātṛpālitaḥ |
mahābhaṭaḥ sograbhaṭo vīrasvāmī surādharaḥ || 15 ||
[Analyze grammar]
bhaṇḍīraḥ siṃhadattaś ca guṇavarmā sakīṭakaḥ |
bhīmo bhayaṃkaraś ceti sarve 'mī dviguṇā rathāḥ || 16 ||
[Analyze grammar]
virocano vīraseno yajñaseno 'tha khujjaraḥ |
indravarmā śabarakaḥ krūrakarmā nirāsakaḥ || 17 ||
[Analyze grammar]
bhaveyus triguṇā ete rathā rājasutāḥ suta |
suśarmā bāhuśālī ca viśākhaḥ krodhano 'py ayam || 18 ||
[Analyze grammar]
pracaṇḍaś cety amī rājaputrā rathacaturguṇāḥ |
juñjarī vīravarmā ca pravīravara eva ca || 19 ||
[Analyze grammar]
supratijño 'marārāmaś caṇḍadatto 'tha jālikaḥ |
trayaḥ siṃhabhaṭavyāghrabhaṭaśatrubhaṭā api || 20 ||
[Analyze grammar]
rājāno rājaputrāś ca rathāḥ pañcaguṇā amī |
ugravarmā tv ayaṃ rājaputraḥ syāt ṣaḍguṇo rathaḥ || 21 ||
[Analyze grammar]
rājaputro viśākhaś ca sutantuḥ sugamo 'pi ca |
narendraśarmā cety ete rathāḥ saptaguṇā matāḥ || 22 ||
[Analyze grammar]
mahārathaḥ punar ayaṃ sahasrāyunṛpātmajaḥ |
mahārathānāṃ yūthasya śatānīkas tv ayaṃ patiḥ || 23 ||
[Analyze grammar]
subhāsaharṣavimalāḥ sūryaprabhavayasyakāḥ |
mahābuddhyacalākhyau ca priyaṃkaraśubhaṃkarau || 24 ||
[Analyze grammar]
ete mahārathā yajñarucidharmarucī tathā |
evaṃ viśvarucir bhāsaḥ siddhārthaś cety amī trayaḥ || 25 ||
[Analyze grammar]
sūryaprabhasya sacivāḥ syur mahārathayūthapāḥ |
prahastaś ca mahārthaś ca tasyātirathayūthapau || 26 ||
[Analyze grammar]
yūthapau rathayūthānāṃ prajñāḍhyasthirabuddhikau |
dānavaḥ sarvadamanas tathā pramathano 'py asau || 27 ||
[Analyze grammar]
dhūmaketuḥ pravahaṇo vajrapañjara eva ca |
kālacakro marudvego rathātirathapā amī || 28 ||
[Analyze grammar]
prakampanaḥ siṃhanādo rathātirathayūthapau |
mahāmāyaḥ kāmbalikaḥ kālakampanako 'py ayam || 29 ||
[Analyze grammar]
prahṛṣṭaromā cety ete catvāro 'py asurādhipāḥ |
putr ātirathayūthādhipatīnām adhipā ime || 30 ||
[Analyze grammar]
sūryaprabhasamaś cāyaṃ prabhāsaḥ sainyanāyakaḥ |
sumerutanayaś caiṣa śrīkuñjarakumārakaḥ || 31 ||
[Analyze grammar]
dvau mahārathayūthādhipatiyūthādhipāv imau |
ity ete 'smadbale 'nye ca śūrāḥ svaiḥ svair balair vṛtāḥ || 32 ||
[Analyze grammar]
parasainye 'dhikāḥ santi tathāpy asmadbalasya te |
na paryāptā bhaviṣyanti saprasāde maheśvare || 33 ||
[Analyze grammar]
iti yāvat sunīthaṃ taṃ bravīti sa mayāsuraḥ |
śrutaśarmapituḥ pārśvād dūto 'nyas tāvad āyayau || 34 ||
[Analyze grammar]
sa covāca trikūṭādhipatir evaṃ bravīti vaḥ |
saṅgrāmo nāma śūrāṇām utsavo hi mahān ayam || 35 ||
[Analyze grammar]
tasyaiṣā saṃkaṭā bhūmis tasmād āgamyatām itaḥ |
yāmaḥ kalāpagrāmākhyaṃ pradeśaṃ vipulāntaram || 36 ||
[Analyze grammar]
etac chrutvā sunīthādyāḥ sainyaiḥ saha tatheti te |
sarve kalāpagrāmaṃ taṃ sūryaprabhayutā yayuḥ || 37 ||
[Analyze grammar]
śrutaśarmādayas te 'pi tathaiva samaronmukhāḥ |
tam eva deśam ājagmur vidyādharabalair vṛtāḥ || 38 ||
[Analyze grammar]
śrutaśarmabale dṛṣṭvā gajān sūryaprabhādayaḥ |
ānāyayan gajānīkaṃ svaṃ vimānādhiropitam || 39 ||
[Analyze grammar]
tataḥ senāpatiś cakre senāyāṃ śrutaśarmaṇaḥ |
dāmodaro mahāsūcivyūhaṃ vidyādharottamaḥ || 40 ||
[Analyze grammar]
tatra pārśve svayaṃ tasthau śrutaśarmā samantrikaḥ |
agre dāmodaraś cāsīd anyatrānye mahārathāḥ || 41 ||
[Analyze grammar]
sainye sūryaprabhasyāpi prabhāso 'nīkinīpatiḥ |
ardhacandraṃ vyadhād vyūhaṃ madhye tasyābhavat svayam || 42 ||
[Analyze grammar]
sakuñjarakumāraś ca prahastaś cāsya koṇayoḥ |
sūryaprabhasunīthādyās tasthuḥ sarve 'tra pṛṣṭhataḥ || 43 ||
[Analyze grammar]
sumerau tatsamīpasthe sasuvāsakumārake |
āhanyanta raṇātodyāny ubhayor api sainyayoḥ || 44 ||
[Analyze grammar]
tāvac ca gaganaṃ devaiḥ saṅgrāmaṃ draṣṭum āgataiḥ |
sendraiḥ salokapālaiś ca sāpsaraskair apūryata || 45 ||
[Analyze grammar]
āyayau cātra viśveśaḥ śaṃkaraḥ pārvatīyutaḥ |
devatābhir gaṇair bhūtair mātṛbhiś cāpy anudrutaḥ || 46 ||
[Analyze grammar]
āgāc ca bhagavān brahmā sāvitryādibhir anvitaḥ |
mūrtair vedaiś ca śāstraiś ca nikhilaiś ca maharṣibhiḥ || 47 ||
[Analyze grammar]
ājagāma ca devībhir lakṣmīkīrtijayādibhiḥ |
dhṛtacakrāyudho devaḥ pakṣirājaratho hariḥ || 48 ||
[Analyze grammar]
sabhāryaḥ kaśyapo 'py āgād ādityā vasavo 'pi ca |
yakṣarākṣasanāgendrāḥ prahlādādyās tathāsurāḥ || 49 ||
[Analyze grammar]
tair āvṛte nabhobhāge śastrasaṃpātadāruṇaḥ |
prāvartata mahānādaḥ saṅgrāmaḥ senayos tayoḥ || 50 ||
[Analyze grammar]
dikcakre bāṇajālena ghanenācchādite tadā |
anyonyaśarasaṃgharṣajātānalataḍillate || 51 ||
[Analyze grammar]
śastrakṣatagajāśvaugharaktadhārāvapūritāḥ |
vīrakāyavahadgrāhā niryayuḥ śoṇitāpagāḥ || 52 ||
[Analyze grammar]
nṛtyatāṃ taratāṃ rakte nadatāṃ cotsavāya saḥ |
śūrāṇāṃ pheravāṇāṃ ca bhūtānaṃ cābhavad raṇaḥ || 53 ||
[Analyze grammar]
śānte tumulasaṅgrāme nihatāsaṃkhyasainike |
lakṣyamāṇe vibhāge ca śanaiḥ svaparasainyayoḥ || 54 ||
[Analyze grammar]
pratipakṣapravīrāṇāṃ prayuddhānāṃ sumerutaḥ |
nāmādau śrūyamāṇe ca kramāt sūryaprabhādibhiḥ || 55 ||
[Analyze grammar]
pūrvaṃ subāhor nṛpater vidyādharapates tathā |
aṭṭahāsābhidhānasya dvandvayuddham abhūd dvayoḥ || 56 ||
[Analyze grammar]
suciraṃ yudhyamānasya tasya viddhasya sāyakaiḥ |
aṭṭahāso 'rdhacandreṇa subāhor acchinac chiraḥ || 57 ||
[Analyze grammar]
dṛṣṭvā subāhuṃ nihataṃ muṣṭiko 'bhyāpatat krudhā |
so 'pi tenāṭṭahāsena hṛdi bāṇahato 'patat || 58 ||
[Analyze grammar]
muṣṭike nihate kruddhaḥ pralambo nāma bhūpatiḥ |
abhidhāvyāṭṭahāsaṃ taṃ śaravarṣair ayodhayat || 59 ||
[Analyze grammar]
aṭṭahāso 'pi tatsainyaṃ hatvā hatvā ca marmaṇi |
pralambam api taṃ vīraṃ rathapṛṣṭhe nyapātayat || 60 ||
[Analyze grammar]
vīkṣya pralambaṃ nihataṃ mohano nāma bhūpatiḥ |
saṃnipatyāṭṭahāsaṃ taṃ tāḍayām āsa sāyakaiḥ || 61 ||
[Analyze grammar]
tato 'ṭṭahāsas taṃ chinnakodaṇḍaṃ hatasārathim |
dṛḍhaprahārābhihataṃ pātayām āsa mohanam || 62 ||
[Analyze grammar]
dṛṣṭvāṭṭahāsena hatāṃś caturaś catureṇa tān |
śrutaśarmabalaṃ harṣād unnanāda jayonmukham || 63 ||
[Analyze grammar]
tad dṛṣṭvā kupito harṣaḥ sūryaprabhavayasyakaḥ |
sasainyam abhyadhāvat tam aṭṭahāsaṃ sasainikaḥ || 64 ||
[Analyze grammar]
nivārya ca śarais tasya śarān sainyaṃ nihatya ca |
vyāpādya sārathiṃ dvis trir dhanuś chittvā ca sadhvajam || 65 ||
[Analyze grammar]
harṣo yad aṭṭahāsasya nirbibheda śaraiḥ śiraḥ |
tenāsau rudhirodgārī nipapāta rathād bhuvi || 66 ||
[Analyze grammar]
aṭṭahāse hate tādṛk kṣobho 'bhūd atra saṃyuge |
kṣaṇād ardhāvaśeṣaṃ tad yena jajñe baladvayam || 67 ||
[Analyze grammar]
nipetur eva nihatās tatrāśvagajapattayaḥ |
raṇamūrdhani cottasthuḥ kabandhā eva kevalam || 68 ||
[Analyze grammar]
tato vikṛtadaṃṣṭrākhyo harṣaṃ vidyādhareśvaraḥ |
etyāṭṭahāsanidhanakruddho bāṇair avākirat || 69 ||
[Analyze grammar]
harṣo 'pi tasya nirdhūya śarān sadhvajasārathīn |
hatvā rathāśvāṃś ciccheda śiro lalitakuṇḍalam || 70 ||
[Analyze grammar]
hate vikṛtadaṃṣṭre tu cakravāla iti śrutaḥ |
rājā vidyādharo harṣam abhyadhāvad amarṣitaḥ || 71 ||
[Analyze grammar]
sa yudhyamānam avadhīd asakṛcchinnakārmukam |
cakravālo yudhi śrāntaṃ harṣaṃ śīrṇāparāyudham || 72 ||
[Analyze grammar]
tatkrodhād etya nṛpatiḥ pramāthas tam ayodhayat |
so 'py ahanyata tenātha cakravālena saṃyuge || 73 ||
[Analyze grammar]
tathaiva tena cātrānye 'py ekaśo dhāvitāḥ kramāt |
catvāraś cakravālena rājamukhyā nipātitāḥ || 74 ||
[Analyze grammar]
kaṅkaṭaś ca viśālaś ca pracaṇḍaś cāṅkurī tathā |
tad dṛṣṭvābhyapatat krodhān nirghāto nāma taṃ nṛpaḥ || 75 ||
[Analyze grammar]
tau cakravālanirghātau yudhyamānau ciraṃ kramāt |
anyonyacūrṇitarathāv abhūtāṃ pādacāriṇau || 76 ||
[Analyze grammar]
asicakradharau dvāv apy ākopamilitau ca tau |
khaḍgāhatidvidhābhūtamūrdhānau bhuvi petatuḥ || 77 ||
[Analyze grammar]
vipannau vīkṣya tau vīrau viṣaṇṇe 'pi baladvaye |
raṇāgram āyayau vidyādharendraḥ kālakampanaḥ || 78 ||
[Analyze grammar]
rājaputro 'bhyadhāvac ca taṃ prakampananāmakaḥ |
sa kālakampanenātra kṣaṇāt tena nyapātyata || 79 ||
[Analyze grammar]
tasmin nipatite tasya pañcānye 'bhyapatan rathāḥ |
jālikaś caṇḍadattaś ca gopakaḥ somilo 'pi ca || 80 ||
[Analyze grammar]
pitṛśarmā ca sarve te śarāṃs tasmin sahāmucan |
sa tu pañcāpi tān kālakampano virathīkṛtān || 81 ||
[Analyze grammar]
jaghāna yugapad vidhyan nārācair hṛdi pañcabhiḥ |
praṇeduḥ khecarās tena vyaṣīdan manujāsurāḥ || 82 ||
[Analyze grammar]
tato 'bhyadhāvann apare catvāras taṃ rathāḥ samam |
unmattakaḥ praśastaś ca vilambakadhuraṃdharau || 83 ||
[Analyze grammar]
sa tān apy avadhīt kālakampano līlayākhilān |
tathaiva dhāvitān anyān ṣaḍ rathān nijaghāna saḥ || 84 ||
[Analyze grammar]
tejikaṃ geyikaṃ caiva vegilaṃ śākhilaṃ tathā |
bhadraṃkaraṃ daṇḍinaṃ ca bhūrisainyān mahārathān || 85 ||
[Analyze grammar]
aparāṃś ca punaḥ pañca so 'vadhīn militān yudhi |
bhīmabhīṣaṇakumbhīravikaṭān savilocanān || 86 ||
[Analyze grammar]
tad dṛṣṭvā kadanaṃ kālakampanena kṛtaṃ raṇe |
adhāvat sugaṇo nāma rājaputro 'sya saṃmukhaḥ || 87 ||
[Analyze grammar]
sa tena tāvad vidadhe samaṃ yuddham ubhāv api |
hatāśvasārathī yāvad virathau tau babhūvatuḥ || 88 ||
[Analyze grammar]
tatas taṃ khaḍgayuddhena sugaṇaṃ pādacāriṇam |
sa kālakampanaḥ pādacāry eva bhuvi jaghnivān || 89 ||
[Analyze grammar]
tāvac ca mānuṣair vidyādharāṇāṃ samam āhavam |
asaṃbhāvyaṃ vilokyeva khinno 'staṃ prayayau raviḥ || 90 ||
[Analyze grammar]
raktāmbupūrabharitaṃ na paraṃ samarāṅgaṇam |
yāvat saṃdhyākṛtapadaṃ yayau vyomāpi śoṇatam || 91 ||
[Analyze grammar]
kabandhaiḥ saha bhūteṣu saṃdhyānṛttodyateṣv atha |
saṃhṛtya yuddhaṃ yayatuḥ svaniveśāya te bale || 92 ||
[Analyze grammar]
śrutaśarmabale tasmin dine vīrā hatās trayaḥ |
trayastriṃśat pravīrās tu bale sauryaprabhe hatāḥ || 93 ||
[Analyze grammar]
tena bāndhavamittrādinidhanena sudurmanāḥ |
sūryaprabhas triyāmāṃ tām āsīd antaḥpurair vinā || 94 ||
[Analyze grammar]
anidra eva sacivaiḥ saha saṅgrāmasaṃkathāḥ |
tās tāḥ kurvan nināyaitāṃ punaryuddhonmukho niśām || 95 ||
[Analyze grammar]
tadbhāryāś ca milanti sma hatabāndhavaduḥkhitāḥ |
ekatra tasyāṃ rajanāv anyonyāśvāsanāgatāḥ || 96 ||
[Analyze grammar]
ruditāvasare 'py atra kathā nānāvidhā vyadhuḥ |
strīṇāṃ na sa kṣaṇo yatra na kathāsv aparāśrayā || 97 ||
[Analyze grammar]
tatprasaṅgena tatraikā rājaputrīdam abravīt |
āścaryam āryaputro 'dya kathaṃ supto niraṅganaḥ || 98 ||
[Analyze grammar]
tac chrutvā vyājahārānyā saṅgrāme svajanakṣayāt |
duḥkhito hy āryaputro 'dya ramate strījane katham || 99 ||
[Analyze grammar]
tato 'parā bravīti sma prāpnoty abhinavāṃ yadi |
varakanyāṃ sa tadduḥkhaṃ vismaraty adhunaiva tat || 100 ||
[Analyze grammar]
athetarābravīn maivaṃ yady api strīṣu lampaṭaḥ |
tathāpi na sa duḥkhe 'sminn īdṛśaḥ syāt tathāvidhaḥ || 101 ||
[Analyze grammar]
iti tāsu vadantīṣu jagādaikā savismayam |
brūta strīlampaṭaḥ kasmād āryaputro batedṛśaḥ || 102 ||
[Analyze grammar]
āhṛtāsv api bhāryāsu bhūyasīṣu navā navāḥ |
aniśaṃ rājaputrīr yat sa gṛhṇan naiva tuṣyati || 103 ||
[Analyze grammar]
etac chrutvā vidagdhaikā tāsu nāmnā manovatī |
uvāca śrūyatāṃ yena rājāno bahuvallabhāḥ || 104 ||
[Analyze grammar]
deśarūpavayaśceṣṭāvijñānādivibhedataḥ |
bhinnā guṇā varastrīṇāṃ naikā sarvaguṇānvitā || 105 ||
[Analyze grammar]
karṇāṭalāṭasaurāṣṭramadhyadeśādideśajāḥ |
yoṣā deśasamācārai rañjayanti nijair nijaiḥ || 106 ||
[Analyze grammar]
kāścid dharanti sudṛśaḥ śāradendunibhair mukhaiḥ |
anyāḥ kanakakumbhābhaiḥ stanair unnatasaṃhataiḥ || 107 ||
[Analyze grammar]
smarasiṃhāsanaprakhyair aparā jaghanasthalaiḥ |
itarāś cetarair aṅgaiḥ svasaundaryamanoramaiḥ || 108 ||
[Analyze grammar]
kācit kāñcanagaurāṅgī priyaṅguśyāmalāparā |
anyā raktāvadātā ca dṛṣṭvaiva haratīkṣaṇe || 109 ||
[Analyze grammar]
kācit pratyagrasubhagā kācit saṃpūrṇayauvanā |
kācit prauḍhatvasurasā prasaradvibhramojjvalā || 110 ||
[Analyze grammar]
hasantī śobhate kācit kācit kope 'pi hāriṇī |
vrajantī gajavat kāpi haṃsavat kāpi rājate || 111 ||
[Analyze grammar]
ālapanty amṛteneva kācid āsiñcati śrutim |
sabhrūvilāsaṃ paśyantī svabhāvād bhāti kācana || 112 ||
[Analyze grammar]
nṛttena rocate kācit kācid gītena rājate |
vīṇādivādanajñānenānyā kāntā ca rocate || 113 ||
[Analyze grammar]
kācid bāhyaratābhijñā kācid ābhyantarapriyā |
prasādhanojjvalā kācit kācid vaidagdhyaśobhitā || 114 ||
[Analyze grammar]
bhartṛcittagrahābhijñā cānyā saubhāgyam aśrute |
kiyad vā vacmi bahavo 'py anye 'nyāsāṃ pṛthag guṇāḥ || 115 ||
[Analyze grammar]
tad evam iha kasyāścid guṇaḥ ko'pi varastriyaḥ |
na tu sarvaguṇāḥ sarvās trilokyām api kāścana || 116 ||
[Analyze grammar]
ato nānārasāsvādalabdhakakṣyāḥ kileśvarāḥ |
āhṛtyāpy āharantyeva bhāryā navanavāḥ sadā || 117 ||
[Analyze grammar]
uttamās tu na vāñchanti paradārān kathaṃcana |
tann āryaputrasyaiṣa syād doṣo nerṣyā ca naḥ kṣamā || 118 ||
[Analyze grammar]
evamādyā manovatyā proktāḥ sūryaprabhāṅganāḥ |
anyā madanasenādyās tathaivocuḥ kathāḥ kramāt || 119 ||
[Analyze grammar]
tato 'tirasataś ca tā vigatayantraṇānargalāḥ parasparam upādiśan suratakāryatantrāṇy api |
prasaṅgamilitāḥ kathāprasarasaktacittā mithas tad asti na kim apy aho yad iha nodvamanti striyaḥ || 120 ||
[Analyze grammar]
atha katham api dīrghā sā kathā cātra tāsām avasitim upayātā sā ca rātriḥ krameṇa |
timiravigamavelāvekṣaṇaikābhikāṅkṣo ripubalavijigīṣos tatra sūryaprabhasya || 121 ||
[Analyze grammar]
Other editions:
Also see the following editions of the Sanskrit text or (alternative) English translations of the Kathasaritsagara Chapter 4
The Ocean of Story
by C.H. Tawney (2014)
Being C.H. Tawney's Translation of Somadeva's Katha Sarit Sagara (Kathasaritsagara): (Ten Volumes)
Buy now!
Kathasaritsagar
by Kedarnath Sharma Saraswat (2005)
The Only Edition with the Sanskrit Text and its Hindi Translation (An Old and Rare Book) Set of 3 Vol.
Buy now!
Kathasaritsagara of Somadeva Bhatta (Sanskrit Text Only)
by Vasudeva Laksmana Sastri (2013)
Katha Sarit Sagar in Marathi
by H. A Bhave (1995)
Set of 5 Volumes; Published by Varada Books, Pune. 2256 pages (Throughout B/W Illustrations).
Buy now!
Katha Sarit Sagara (Tamil)
by S. V. Ganapati (எஸ். வி. கணபதி) (2014)
[கதா சரித் சாகரம்] Published by Alliance Publications.
Buy now!
Galpa Shono
by Abhijit Chattopadhyay (2014)
[গল্প শোনো] Galpa Shono: Bengali Translation of 'Suno Kahani From Katha Sarit Sagar'; 9788126015436; Published by Sahitya Akademi, Delhi.
Buy now!