Kathasaritsagara [sanskrit]
by C. H. Tawney | 2014 | 226,424 words | ISBN-13: 9789350501351
The Sanskrit edition of the Kathasaritsagara referencing the English translation and grammatical analysis. Written by Somadeva and dating from the 12th century, the Kathasaritsagara (or Katha-sarit-sagara) represents an epic legend narrating the adventures of Naravahanadatta as he strives to become the destined emperor of the Vidyadharas. Alternative titles: (Kathāsaritsāgara, कथासरित्सागर, Kathā-sarit-sāgara)
Chapter 6
tataḥ prātaḥ punā ratnaprabhāsadmani taṃ sthitam |
naravāhanadattaṃ te gomukhādyā upāgaman || 1 ||
[Analyze grammar]
marubhūtiḥ sa tu manākpītāsavamadālasaḥ |
baddhapuṣpo 'nuliptaś ca vilambita upāyayau || 2 ||
[Analyze grammar]
praskhalatpadayā gatyā hāsayaṃstaṃ girā tadā |
tannītirañjitamukho narmaṇovāca gomukhaḥ || 3 ||
[Analyze grammar]
yaugandharāyaṇasuto bhūtvā nītiṃ na vetsi kim |
prātaḥ pibasi madyaṃ yanmattaḥ prabhumupaiṣi ca || 4 ||
[Analyze grammar]
tac chrutvā taṃ krudhā kṣībo marubhūtir jagāda saḥ |
etan me prabhuṇā vācyamamunā guruṇāpi vā || 5 ||
[Analyze grammar]
tvaṃ tu kaḥ śikṣayasi māmityakātmaja re vada |
ity uktavantaṃ taṃ bhūyo hasannāha sa gomukhaḥ || 6 ||
[Analyze grammar]
bhartsayantyavinītaṃ kiṃ svavācā prabhaviṣṇavaḥ |
avaśyaṃ tasya vaktavyaṃ tatpārśvasthairyathocitam || 7 ||
[Analyze grammar]
satyaṃ cetyakaputro 'haṃ tvaṃ mantrivṛṣabhaḥ punaḥ |
vakti te jāḍyam evaitadviṣāṇe staḥ paraṃ na te || 8 ||
[Analyze grammar]
ity ukto gomukhenātra marubhūtirabhāṣata |
tav aiva vṛṣabhatvaṃ hi gomukhasyopapadyate || 9 ||
[Analyze grammar]
tathāpi yadadānto 'si so 'yaṃ te jātisaṃkaraḥ |
etac chrutvātra sarveṣu hasatsūvāca gomukhaḥ || 10 ||
[Analyze grammar]
marubhūtirayaṃ ratnaṃ jātu yatnaśatairapi |
avedhyaṃ vajrametasmin guṇaṃ ko hi praveśayet || 11 ||
[Analyze grammar]
anyatpuruṣaratnaṃ tadyadayatnena vedhyate |
sikatāsetuvṛttāntaṃ śṛṇu cātra nidarśanam || 12 ||
[Analyze grammar]
āsīt ko'pi pratiṣṭhāne tapodatta iti dvijaḥ |
sa pitrā kleśyamāno 'pi vidyā nādhyaita śaiśave || 13 ||
[Analyze grammar]
anantaraṃ garhyamāṇaḥ sarvairanuśayānvitaḥ |
sa vidyāsiddhaye taptuṃ tapo gaṅgātaṭaṃ yayau || 14 ||
[Analyze grammar]
tatrāśritogratapasas tasya taṃ vīkṣya vismitaḥ |
vārayiṣyandvijacchadmā śakro nikaṭamāyayau || 15 ||
[Analyze grammar]
āgatya ca sa gaṅgāyāstaṭāccikṣepa vāriṇi |
uddhṛtyoddhṛtya sikatāḥ paśyatas tasya sormiṇi || 16 ||
[Analyze grammar]
tad dṛṣṭvā muktamaunas taṃ tapodattaḥ sa pṛṣṭavān |
aśrāntaḥ kim idaṃ brahman karoṣīti sakautukam || 17 ||
[Analyze grammar]
nirbandhapṛṣṭaḥ sa ca taṃ śakro 'vādīddvijākṛtiḥ |
setuṃ badhnāmi gaṅgāyāṃ tārāya prāṇināmiti || 18 ||
[Analyze grammar]
tato 'bravīttapodattaḥ setuḥ kiṃ mūrkha badhyate |
gaṅgāyāmoghahāryābhiḥ sikatābhiḥ kadācana || 19 ||
[Analyze grammar]
tac chrutvā tam uvācaivaṃ śakro 'tha dvijarūpadhṛk |
yadyevaṃ vetsi tadvidyāṃ vinā pāṭhaṃ vinā śrutam || 20 ||
[Analyze grammar]
kasmādvratopavāsādyaistvaṃ sādhayitumudyataḥ |
iyaṃ śaśaviṣāṇecchā vyomni vā citrakalpanā || 21 ||
[Analyze grammar]
anakṣaro lipinyāso yadvidyādhyayanaṃ vinā |
evaṃ yadi bhavedetannahyadhīyīta kaścana || 22 ||
[Analyze grammar]
ity uktaḥ sa tapodattaḥ śakreṇa dvijarūpiṇā |
vicārya tattathā matvā tapastyaktvā gṛhaṃ yayau || 23 ||
[Analyze grammar]
evaṃ sudhīḥ sukhaṃ bodhyo marubhūtistu durmatiḥ |
na śakyate bodhayituṃ bodhyamānaś ca kupyati || 24 ||
[Analyze grammar]
ity ukte gomukhenātra madhye hariśikho 'bhyadhāt |
bhavanti sukhasaṃbodhyāḥ satyaṃ deva sumedhasaḥ || 25 ||
[Analyze grammar]
tathā ca pūrvamabhavad vārāṇasyāṃ dvijottamaḥ |
kaścidvirūpaśarmākhyo virūpo nirdhanastathā || 26 ||
[Analyze grammar]
sa cavairūpyadaurgatyanirviṇṇastattapovanam |
gatvā tīvraṃ tapaścakre rūpadraviṇakāṅkṣayā || 27 ||
[Analyze grammar]
tataḥ surapatiḥ kṛtvā vikṛtavyādhitākṛteḥ |
jambukasyādhamaṃ rūpametyāgre tasya tasthivān || 28 ||
[Analyze grammar]
taṃ vilokya parītāṅgamakṣikābhiralakṣaṇam |
virūpaśarmā śanakairmanasā vimamarśa saḥ || 29 ||
[Analyze grammar]
īdṛśā api jāyante saṃsāre pūrvakarmabhiḥ |
tanmamālpamidaṃ dhātrā kṛtaṃ yannedṛśaḥ kṛtaḥ || 30 ||
[Analyze grammar]
ko daivalikhitaṃ bhogaṃ laṅghayed ity avetya saḥ |
virūpaśarmā śanakais tapaḥsthānād yayau gṛham || 31 ||
[Analyze grammar]
itthaṃ subuddhiralpena deva yatnena bodhyate |
na kṛcchreṇāpi mahatā nirvicāramatiḥ punaḥ || 32 ||
[Analyze grammar]
evaṃ hariśikhenokte śraddhadhāne ca gomukhe |
marubhūtiranātmajñaḥ kṣībo 'tikupito 'bravīt || 33 ||
[Analyze grammar]
balaṃ gomukha vācyeva na tu bāhvorbhavādṛśām |
vācālaiḥ kalahaḥ klībaistrapākṛdbāhuśālinām || 34 ||
[Analyze grammar]
iti bruvāṇaṃ yuddhecchuṃ marubhūtiṃ smitānanaḥ |
naravāhanadatto 'tha prabhuḥ svayamasāntvayat || 35 ||
[Analyze grammar]
visṛjya taṃ ca svagṛhaṃ taṃ bālasakhivatsalaḥ |
kurvandivasakāryāṇi nināya tadahaḥ sukham || 36 ||
[Analyze grammar]
prātaś ca sarveṣv āyāteṣv eṣu mantriṣu taṃ priyā |
ratnaprabhā jagādaivaṃ marubhūtau trapānate || 37 ||
[Analyze grammar]
tvamāryaputra sukṛtī yasya te sacivā ime |
ābālyasnehanigaḍanibaddhāḥ śuddhacetasaḥ || 38 ||
[Analyze grammar]
ete ca dhanyā yeṣāṃ tvamīdṛksnehaparaḥ prabhuḥ |
prākkarmopārjitā yūyamanyonyasya na saṃśayaḥ || 39 ||
[Analyze grammar]
evam ukte tayā rājñyā vasantakasuto 'bravīt |
naravāhanadattasya narmamittraṃ tapantakaḥ || 40 ||
[Analyze grammar]
satyaṃ purvārjito 'yaṃ naḥ svāmī sarvaṃ hi tiṣṭhati |
pūrvakarmavaśādeva tathā ca śrūyatāṃ kathā || 41 ||
[Analyze grammar]
abhucchrīkaṇṭhanilaye vilāsapuranāmani |
pure vinayaśīlākhyo nāmnānvarthena bhūpatiḥ || 42 ||
[Analyze grammar]
tasya prāṇasamā devī babhūva kamalaprabhā |
tayā sākaṃ ca bhogaikasaktas tasthau cirāya saḥ || 43 ||
[Analyze grammar]
atha kālena bhūpasya jarā saundaryahāriṇī |
tasyāvirāsīt tāṃ dṛṣṭvā sa cāsīdatiduḥkhitaḥ || 44 ||
[Analyze grammar]
himāhatamivāmbhojaṃ palitamlānamānanam |
darśayāmi kathaṃ devyai hā dhiṅme maraṇaṃ varam || 45 ||
[Analyze grammar]
ityādi cintayan so 'tha sadasyāhūya bhūpatiḥ |
vaidyaṃ taruṇacandrākhyaṃ nijagāda kṛtādaraḥ || 46 ||
[Analyze grammar]
bhadra bhaktastvamasmāsu kuśalaś ceti pṛcchyase |
apy asti kācid yuktiḥ sā yayeyaṃ vāryate jarā || 47 ||
[Analyze grammar]
tac chrutvaiva kalāmātrasāro vāñchansa pūrṇatām |
vakrastaruṇacandro 'ntaḥ satyanāmā vyacintayat || 48 ||
[Analyze grammar]
mūrkho 'yaṃ nṛpatirbhojyo mayā vetsyāmi ca kramāt |
iti saṃcintya sa bhiṣaktam evam avadannṛpam || 49 ||
[Analyze grammar]
ekastvaṃ bhūgṛhe māsānaṣṭau yadidamauṣadham |
upayuṅkṣe tato deva jarāmapanayāmi te || 50 ||
[Analyze grammar]
etac chrutvaiva sa nṛpastadbhūgṛhamakārayat |
kṣamante na vicāraṃ hi mūrkhā viṣayalolupāḥ || 51 ||
[Analyze grammar]
rājansattvena pūrveṣāṃ tapasā ca damena ca |
rasāyanāni siddhāni prabhāveṇa yugasya ca || 52 ||
[Analyze grammar]
adyatve ca śrutānyeva rasānyetāni bhūpate |
sāmagryabhāvāt kurvanti yatpratyuta viparyayam || 53 ||
[Analyze grammar]
tanna yuktamidaṃ dhūrtāḥ krīḍantyeva hi bāliśaiḥ |
kiṃ deva samatikrāntamāgacchati punarvayaḥ || 54 ||
[Analyze grammar]
ity ādi mantriṇāṃ vākyaṃ na lebhe tasya cāntaram |
āvṛte hṛdaye rājño gāḍhayā bhogatṛṣṇayā || 55 ||
[Analyze grammar]
viveśa ca girā tasya bhiṣajastatsa bhūgṛham |
ekākī vāritāśeṣarājocitaparicchadaḥ || 56 ||
[Analyze grammar]
eko vaidyaḥ svabhṛtyena sahaikenaiva tasya saḥ |
tatrauṣadhādicaryāyāṃ babhūva paricārakaḥ || 57 ||
[Analyze grammar]
tasthau ca tatra sa nṛpo bhūmigarbhe tamomaye |
ajñāna iva bhūyastvātprasṛte hṛdayādbahiḥ || 58 ||
[Analyze grammar]
gateṣu cātra māseṣu ṣaṇmātreṣv asya bhūpateḥ |
vilokyābhyadhikībhūtāṃ tāṃ jarāṃ sa śaṭho bhiṣak || 59 ||
[Analyze grammar]
ājahāra kam apy ekaṃ puruṣaṃ tādṛśākṛtim |
rājānaṃ tvāṃ karomīti yuvānaṃ kṛtasaṃvidam || 60 ||
[Analyze grammar]
tataḥ suraṅgāṃ bhūgehe dūrāddattvātra taṃ nṛpam |
suptaṃ hatvā tayā nītvā so 'ndhakūpe 'kṣipanniśi || 61 ||
[Analyze grammar]
tay aiva puruṣaṃ taṃ ca taruṇaṃ tatra bhūgṛhe |
praveśya sthāpayām āsa suraṅgāṃ pidadhe ca tām || 62 ||
[Analyze grammar]
saṃprāpya mūḍhabuddhīnāmavakāśaṃ nirargalam |
ucchṛṅkhalamatiḥ kuryātprākṛtaḥ kiṃ na sāhasam || 63 ||
[Analyze grammar]
tataḥ sa sarvāḥ prakṛtīr vaidyo 'nyedyur abhāṣata |
ajaro 'yaṃ kṛtas tāvat ṣaḍbhir māsair mayā nṛpaḥ || 64 ||
[Analyze grammar]
māsadvayena caitasya rūpamanyadbhaviṣyati |
taddūrātkiṃcidātmānamasmai darśayatādhunā || 65 ||
[Analyze grammar]
ity uktvā bhūgṛhadvāri sarvānānīya darśayan |
tasmai nyavedayadyūne sa teṣāṃ nāmakarmaṇī || 66 ||
[Analyze grammar]
ity antaḥpuraparyantaṃ māsadvitayamanvaham |
bhūgṛhe 'bodhayadyuktyā yuvānaṃ puruṣaṃ sa tam || 67 ||
[Analyze grammar]
prāpte ca samaye taṃ sa bhogapuṣṭaṃ dharāgṛhāt |
ujjahārājaraḥ so 'yaṃ jāto rājetyudāharan || 68 ||
[Analyze grammar]
tataś cauṣadhisaṃsiddhiḥ saiṣa rājeti tatra saḥ |
paryavāryata hṛṣṭābhiḥ pumān prakṛtibhir yuvā || 69 ||
[Analyze grammar]
atha snātastathā labdharājyo rājocitāḥ kriyāḥ |
cakāra sa sahāmātyaiḥ sotsavastaruṇaḥ pumān || 70 ||
[Analyze grammar]
tadāprabhṛti tasthau ca kurvanrājyaṃ sukhena saḥ |
nāmājara iti prāpya krīḍannantaḥpuraiḥ saha || 71 ||
[Analyze grammar]
sarve caitamasaṃbhāvyavaidyavṛttāviśaṅkinaḥ |
rasāyanaparāvṛttarūpaṃ svaṃ menire prabhum || 72 ||
[Analyze grammar]
prītyānurañjya prakṛtīrdevīṃ ca kamalaprabhām |
so 'tha svamitrairajaro rājābhuṅkta saha śriyam || 73 ||
[Analyze grammar]
mittraṃ bheṣajacandrākhyaṃ tathānyaṃ padmadarśanam |
ubhe ātmasame cakre hasyaśvagrāmapūrite || 74 ||
[Analyze grammar]
vaidyaṃ taruṇacandraṃ tu prakriyārthamamānayat |
na tu tasmin viśaśvāsa satyadharmacyutātmani || 75 ||
[Analyze grammar]
ekadā ca sa vaidyastaṃ svairaṃ rājānam abravīt |
kiṃ māmagaṇayitvaiva svātantryeṇa viceṣṭase || 76 ||
[Analyze grammar]
tadvismṛtaṃ yadā rājā bhavāniha mayā kṛtaḥ |
tac chrutvaiva sa rājā tamajaro vaidyamabhyadhāt || 77 ||
[Analyze grammar]
aho mūrkho 'si kaḥ kasya kartā dātāpi vā pumān |
prāktanaṃ karma hi sakhe karoti ca dadāti ca || 78 ||
[Analyze grammar]
atastvaṃ mā kṛthā darpaṃ tapaḥsiddhamidaṃ hi me |
etac ca darśayiṣyāmi pratyakṣamacireṇa te || 79 ||
[Analyze grammar]
ity uktas tena sa trasta iva vaidyo vyacintayat |
aho kim apy adhṛṣṭo 'yaṃ dhīro jñānīva bhāṣate || 80 ||
[Analyze grammar]
yadrahasyāntaraṅgatvaṃ svāmisaṃvananaṃ param |
tad api kṣamate nāsminnanuvartyastadeṣa me || 81 ||
[Analyze grammar]
paśyāmi tāvatkimayaṃ sākṣānme darśayiṣyati |
ity ālocya tathety evaṃ bhiṣaktūṣṇīṃ babhūva saḥ || 82 ||
[Analyze grammar]
anyedyuścājaro rājā paribhrāntuṃ sa niryayau |
krīḍaṃstaruṇacandrādyaiḥ sevyamānāḥ suhṛtsakhaḥ || 83 ||
[Analyze grammar]
bhrāmyan prāpto nadītīraṃ yasyā madhye dadarśa saḥ |
pravāhe vahadāyātaṃ sauvarṇaṃ padmapañcakam || 84 ||
[Analyze grammar]
ānāyayac ca bhṛtyaistadgṛhītvā pravilokya ca |
vaidyaṃ taruṇacandraṃ taṃ jagāda nikaṭasthitam || 85 ||
[Analyze grammar]
nadītīreṇa gaccha tvamupariṣṭādito 'munā |
utpattisthānam eteṣāṃ paṅkajānāṃ gaveṣaya || 86 ||
[Analyze grammar]
tac ca dṛṣṭvā tvamāgaccheḥ sumahatkautukaṃ hi me |
adbhuteṣveṣu padmeṣu tvaṃ ca dakṣaḥ suhṛnmama || 87 ||
[Analyze grammar]
ity uktvā preṣitas tena rājñā sa vivaśo bhiṣak |
yathādiṣṭena mārgeṇa tatheti prayayau tataḥ || 88 ||
[Analyze grammar]
rājāpyayāsīt svapuraṃ sa ca gacchan bhiṣak kramāt |
prāpadāyatanaṃ śaivaṃ nadyās tasyās taṭasthitam || 89 ||
[Analyze grammar]
tadagre tatsarittīrthataṭe vaṭamahātarum |
apaśyal lambamānaṃ ca tasminnarakaraṅkakam || 90 ||
[Analyze grammar]
tataḥ śrāntaḥ kṛtasnāno devam abhyarcya tatra saḥ |
yāvattiṣṭhati megho 'tra tāvadāgatya vṛṣṭavān || 91 ||
[Analyze grammar]
meghābhivṛṣṭāt tasmāc ca vaṭaśākhāvalambinaḥ |
mānuṣāsthikaraṅkādye nyapataṃstoyabindavaḥ || 92 ||
[Analyze grammar]
nadyāstīrthajale tasyāstebhyastāni dadarśa saḥ |
jāyamānāni padmāni sauvarṇāni kṣaṇādbhiṣak || 93 ||
[Analyze grammar]
aho kimidamāścaryaṃ kaṃ pṛcchāmyajane vane |
yadi vā veda kaḥ sargaṃ bahvāścaryamayaṃ vidheḥ || 94 ||
[Analyze grammar]
dṛṣṭastāvanmayā so 'yaṃ kanakāmbhoruhākaraḥ |
tadetatprakṣipāmyatra tīrthe narakalevaram || 95 ||
[Analyze grammar]
dharmo 'stu vaitatpṛṣṭhe ca jāyantām ambujāni vā |
ity ālocya sa vṛkṣāgrāt tataḥ kaṅkālamakṣipat || 96 ||
[Analyze grammar]
nītvā ca taddinaṃ tatra siddhakaryo 'pare 'hani |
pratyāvartiṣṭa sa tato bhiṣagdeśaṃ nijaṃ prati || 97 ||
[Analyze grammar]
dinaiḥ katipayaḥ prāpa tadvilāsapuraṃ ca saḥ |
tasyājarasya nikaṭaṃ rājño 'dhvakṛśadhūsaraḥ || 98 ||
[Analyze grammar]
dvāḥsthenāvedito yāvatpraviśya caraṇānataḥ |
sa pṛṣṭakuśalo rājñā vṛttāntaṃ vakti taṃ bhiṣak || 99 ||
[Analyze grammar]
tāvat sa vijanaṃ kṛtvā rājā taṃ svayam abhyadhāt |
dṛṣṭaṃ hemāmbujotpattisthānaṃ tadbhavatā sakhe || 100 ||
[Analyze grammar]
tatkṣetramuttamaṃ caivaṃ tatra dṛṣṭastvayā ca saḥ |
karaṅko vaṭavṛkṣe tāṃ prāktanīṃ viddhi me tanum || 101 ||
[Analyze grammar]
tadūrdhvapādena mayā lambamānena kurvatā |
tapas tatra purā tyaktamupaśoṣya kalevaram || 102 ||
[Analyze grammar]
tapasas tasya māhātmyātkaraṅkātpracyutais tataḥ |
meghāmbubhis te jāyante padmās tatra hiraṇmayāḥ || 103 ||
[Analyze grammar]
sa karaṅkaś ca yatkṣiptastīrthe tatra mama tvayā |
yuktaṃ tadvihitaṃ tvaṃ hi mittraṃ me pūrvajanmani || 104 ||
[Analyze grammar]
eṣa bheṣajacandraś ca tathāsau padmadarśanaḥ |
etāvapi ca tajjanmasaṃgatau suhṛdau mama || 105 ||
[Analyze grammar]
tattasya tapaso mittra prāktanasya prabhāvataḥ |
jātismaratvaṃ jñānaṃ ca rājyaṃ copanataṃ mama || 106 ||
[Analyze grammar]
tadetaddarśitaṃ tubhyaṃ yuktyā pratyakṣato mayā |
bhavatkṣiptāsthisaṃghātaṃ sābhijñānaṃ ca varṇitam || 107 ||
[Analyze grammar]
tasmāttubhyaṃ mayā rājyamadāyīti mama tvayā |
ahaṃkāro na kartavyaḥ sthāpyaṃ ceto na duḥsthitam || 108 ||
[Analyze grammar]
vinā hi prāktanaṃ karma na dātā ko'pi kasyacit |
agarbhājjanturaśnāti pūrvakarmataroḥ phalam || 109 ||
[Analyze grammar]
ity uktaḥ sa bhiṣaktena rājñā dṛṣṭvā tathaiva tat |
asaṃtoṣaṃ punarnaiva tatsevāsukhito 'bhyagāt || 110 ||
[Analyze grammar]
so 'pi rājājaro jātismarastaṃ bhiṣajaṃ tataḥ |
saṃmānyārthapradānena yathocitamudāradhīḥ || 111 ||
[Analyze grammar]
antaḥpuraiḥ suhṛdbhiś ca sākaṃ nayajitāṃ mahīm |
bhuñjānaḥ sukṛtaprāptāṃ sukhamāstāpakaṇṭakām || 112 ||
[Analyze grammar]
evaṃ bhavati loke 'smin deva sarvasya sarvadā |
prākkarmopārjitaṃ jantoḥ sarvam eva śubhāśubham || 113 ||
[Analyze grammar]
tasmāttvam api naḥ svāmī manye janmāntarārjitaḥ |
satsv anyeṣv evam asmākaṃ prasanno 'sy anyathā katham || 114 ||
[Analyze grammar]
ity apūrvaramaṇīyavicitrāṃ kāntayā saha tapantakavaktrāt |
saṃniśamya sa kahāmudatiṣṭhat snātum atra naravāhanadattaḥ || 115 ||
[Analyze grammar]
kṛtasnāno gatvā nikaṭamatha vatseśanṛpateḥ pitur muñcan mātur muhur amṛtavarṣaṃ nayanayoḥ |
kṛtāhāras tābhyāṃ saha sadayito mantrisahitaḥ sukhair āpānādyair dinam anayad etāṃ ca rajanīm || 116 ||
[Analyze grammar]
Other editions:
Also see the following editions of the Sanskrit text or (alternative) English translations of the Kathasaritsagara Chapter 6
The Ocean of Story
by C.H. Tawney (2014)
Being C.H. Tawney's Translation of Somadeva's Katha Sarit Sagara (Kathasaritsagara): (Ten Volumes)
Buy now!
Kathasaritsagar
by Kedarnath Sharma Saraswat (2005)
The Only Edition with the Sanskrit Text and its Hindi Translation (An Old and Rare Book) Set of 3 Vol.
Buy now!
Kathasaritsagara of Somadeva Bhatta (Sanskrit Text Only)
by Vasudeva Laksmana Sastri (2013)
Katha Sarit Sagar in Marathi
by H. A Bhave (1995)
Set of 5 Volumes; Published by Varada Books, Pune. 2256 pages (Throughout B/W Illustrations).
Buy now!
Katha Sarit Sagara (Tamil)
by S. V. Ganapati (எஸ். வி. கணபதி) (2014)
[கதா சரித் சாகரம்] Published by Alliance Publications.
Buy now!
Galpa Shono
by Abhijit Chattopadhyay (2014)
[গল্প শোনো] Galpa Shono: Bengali Translation of 'Suno Kahani From Katha Sarit Sagar'; 9788126015436; Published by Sahitya Akademi, Delhi.
Buy now!