Chapter 3

tato vāsavadattā sā vatsarājaṃ samīpagam |
vijane sacivair yuktam anyedyur idam abravīt || 1 ||
[Analyze grammar]

yataḥ prabhṛti garbho 'yam āryaputra dhṛto mayā |
tataḥ prabhṛti tadrakṣā tīvrā māṃ hṛdi bādhate || 2 ||
[Analyze grammar]

adya taccintayā cāhaṃ suptā niśi kathaṃcana |
jāne dṛṣṭavatī kaṃcit svapne puruṣam āgatam || 3 ||
[Analyze grammar]

bhasmāṅgarāgasitayā śekharīkṛtacandrayā |
piśaṅgajaṭayā mūrtyā śobhitaṃ śūlahastayā || 4 ||
[Analyze grammar]

sa ca mām abhyupetyaiva sānukampa ivāvadat |
putri garbhakṛte cintā na kāryā kācana tvayā || 5 ||
[Analyze grammar]

ahaṃ tavainaṃ rakṣāmi datto hy eṣa mayaiva te |
kiṃcānyac chṛṇu vacmy eva tava pratyayakāraṇam || 6 ||
[Analyze grammar]

śvaḥ kāpi nārī vijñaptihetor yuṣmān upaiṣyati |
avaṣṭabhyaiva sākṣepam ākarṣantī nijaṃ patim |
pañcabhis tanayair yuktā bahubandhujanāvṛtā || 7 ||
[Analyze grammar]

sā ca duścāriṇī yoṣit svabāndhavabalāt patim |
taṃ ghātayitum icchantī sarvaṃ mithyā bravīti tat || 8 ||
[Analyze grammar]

tvaṃ cātra putri vatseśaṃ pūrvaṃ vijñāpayes tathā |
tasyāḥ sakāśāt sa yathā sādhur mucyeta kustriyaḥ || 9 ||
[Analyze grammar]

ity ādiśya gate tasminn antardhānaṃ mahātmani |
prabuddhā sahasaivāhaṃ bibhātā ca vibhāvarī || 10 ||
[Analyze grammar]

evam ukte tayā devyā śarvānugrahavādinaḥ |
tatrāsan vismitāḥ sarve saṃvādāpekṣimānasāḥ || 11 ||
[Analyze grammar]

tasminn eva kṣaṇe cātra praviśyārtānukampinam |
vatsarājaṃ pratīhāramukhyo 'kasmād vyajijñapat || 12 ||
[Analyze grammar]

āgatā deva vijñaptyai kāpi strī bāndhavair vṛtā |
pañcaputrān gṛhītvā svam ākṣipya vivaśaṃ patim || 13 ||
[Analyze grammar]

tac chrutvā nṛpatir devīsvapnasaṃvādavismitaḥ |
praveśyatām ihaiveti pratīhāraṃ tam ādiśat || 14 ||
[Analyze grammar]

svapnasatyatvasaṃjātasatputraprāptiniścayaḥ |
devī vāsavadattāpi sā saṃprāpa parāṃ mudam || 15 ||
[Analyze grammar]

atha dvāronmukhaiḥ sarvair vīkṣyamāṇā sakautukam |
pratīhārājñayā yoṣid bhartṛyuktā viveśa sā || 16 ||
[Analyze grammar]

praviśyāśritadainyā ca yathākramakṛtānatiḥ |
atha saṃsadi rājānaṃ sadevīkaṃ vyajijñapat || 17 ||
[Analyze grammar]

ayaṃ niraparādhāyā mama bhartā bhavann api |
na prayacchaty anāthāyā bhojanācchādanādikam || 18 ||
[Analyze grammar]

ity uktavatyāṃ tasyāṃ ca sa tadbhartā vyajijñapat |
deva mithyā vadaty eṣā sabandhur madvadhaiṣiṇī || 19 ||
[Analyze grammar]

ā vatsarāntaṃ sarvaṃ hi dattam asyā mayāgrataḥ |
etadbandhava evānye taṭasthā me 'tra sākṣiṇaḥ || 20 ||
[Analyze grammar]

evaṃ vijñāpitas tena rājā svayam abhāṣata |
devīsvapne kṛtaṃ sākṣyaṃ devenaivātra śūlinā || 21 ||
[Analyze grammar]

tat kiṃ sākṣibhir eṣaiva nigrāhyā strī sabandhavā |
iti rājñodite 'vādīd dhīmān yaugandharāyaṇaḥ || 22 ||
[Analyze grammar]

tathāpi sākṣivacanāt kāryaṃ deva yathocitam |
loko hy etad ajānāno na pratīyāt kathaṃcana || 23 ||
[Analyze grammar]

tac chrutvā sākṣiṇo rājñā tathety ānāyya tatkṣaṇam |
pṛṣṭāḥ śaśaṃsus te cātra tāṃ mithyāvādinīṃ striyam || 24 ||
[Analyze grammar]

tataḥ prakhyātasadbhartṛdrohām etāṃ sabāndhavām |
saputrāṃ ca sa vatseśaḥ svadeśān niravāsayat || 25 ||
[Analyze grammar]

visasarja ca taṃ sādhuṃ tadbhartāraṃ dayārdradhīḥ |
vivāhāntaraparyāptaṃ vitīrya vipulaṃ vasu || 26 ||
[Analyze grammar]

pumāṃsam ākulaṃ krūrā patitaṃ durdaśāvaṭe |
jīvantam eva kuṣṇāti kākīva kukuṭumbinī || 27 ||
[Analyze grammar]

snigdhā kulīnā mahatī gṛhiṇī tāpahāriṇī |
tarucchāyeva margasthā puṇyaiḥ kasyāpi jāyate || 28 ||
[Analyze grammar]

iti caitatprasaṅgena vadantaṃ taṃ mahīpatim |
vasantakaḥ sthitaḥ pārśve kathāpaṭur avocata || 29 ||
[Analyze grammar]

kiṃ ca deva virodho vā sneho vāpīha dehinām |
prāgjanmavāsanābhyāsavaśāt prāyeṇa jāyate || 30 ||
[Analyze grammar]

tathā ca śrūyatām atra katheyaṃ varṇyate mayā |
āsīd vikramacaṇḍākhyo vārāṇasyāṃ mahīpatiḥ || 31 ||
[Analyze grammar]

tasyābhūd vallabho bhṛtyo nāmnā siṃhaparākramaḥ |
yo raṇeṣv iva sarveṣu dyūteṣv apy asamo jayī || 32 ||
[Analyze grammar]

tasyābhavac ca vikṛtā vapuṣīvāśaye 'py alam |
khyātā kalahakārīti nāmnānvarthena gehinī || 33 ||
[Analyze grammar]

sa tasyāḥ satataṃ bhūri rājato dyūtatas tathā |
prāpya prāpya dhanaṃ dhīraḥ sarvam eva samarpayat || 34 ||
[Analyze grammar]

sā tu tasya samutpannaputratrayayutā śaṭhā |
tathāpi kṣaṇam apy ekaṃ na tasthau kalahaṃ vinā || 35 ||
[Analyze grammar]

bahiḥ pibasi bhuṅkṣe ca naiva kiṃcid dadāsi naḥ |
ity āraṭantī sasutā sā taṃ nityam atāpayat || 36 ||
[Analyze grammar]

prasādyamānāpy āhārapānavastrair aharniśam |
durantā bhogatṛṣṇeva bhṛśaṃ jajvāla tasya sā || 37 ||
[Analyze grammar]

tataḥ krameṇa tanmanyukhinnas tyaktvaiva tadgṛham |
sa vindhyavāsinīṃ draṣṭum agāt siṃhaparākramaḥ || 38 ||
[Analyze grammar]

sā taṃ svapne nirāhārasthitaṃ devī samādiśat |
uttiṣṭha putra tām eva gaccha vārāṇasīṃ purīm || 39 ||
[Analyze grammar]

tatra sarvamahān eko yo 'sti nyagrodhapādapaḥ |
tanmūlāt khanyamānāt tvaṃ svairaṃ nidhim avāpsyasi || 40 ||
[Analyze grammar]

tanmadhyāl lapsyase caikaṃ nabhaḥkhaṇḍam iva cyutam |
pātraṃ garuḍamāṇikyamayaṃ nistriṃśanirmalam || 41 ||
[Analyze grammar]

tatrārpitekṣaṇo drakṣyasy antaḥ pratimitām iva |
sarvasya jantoḥ prāgjātiṃ yā syāj jijñāsitā tava || 42 ||
[Analyze grammar]

tenaiva buddhvā bhāryāyāḥ pūrvajātiṃ tathātmanaḥ |
avāptārthaḥ sukhī tatra gatakhedo nivatsyasi || 43 ||
[Analyze grammar]

evam uktaś ca devyā sa prabuddhaḥ kṛtapāraṇaḥ |
vārāṇasīṃ prati prāyāt prātaḥ siṃhaparākramaḥ || 44 ||
[Analyze grammar]

gatvā ca tāṃ purīṃ prāpya tasmān nyagrodhamūlataḥ |
lebhe nidhānaṃ tanmadhyāt pātraṃ maṇimayaṃ mahat || 45 ||
[Analyze grammar]

apaśyac cātra jijñāsuḥ pātre pūrvatra janmani |
ghorām ṛkṣīṃ svabhāryāṃ tām ātmānaṃ ca mṛgādhipam || 46 ||
[Analyze grammar]

pūrvajātimahāvairavāsanāniścalaṃ tataḥ |
buddhvā bhāryātmanor dveṣaṃ śokamohau mumoca saḥ || 47 ||
[Analyze grammar]

atha bahvīḥ parijñātās tatra pātraprabhāvataḥ |
prāgjanmabhinnajātīyāḥ parihṛtyaiva kanyakāḥ || 48 ||
[Analyze grammar]

tulyāṃ janmāntare siṃhīṃ pariṇinye vicintya saḥ |
bhāryāṃ dvitīyāṃ siṃhaśrīnāmnīṃ siṃhaparākramaḥ || 49 ||
[Analyze grammar]

kṛtvā kalahakārīṃ ca tāṃ sa grāmaikabhāginīm |
nidhānaprāptisukhitas tasthau navavadhūsakhaḥ || 50 ||
[Analyze grammar]

itthaṃ dārādayo 'pīha bhavanti bhuvane nṛṇām |
prāksaṃskāravaśāyātavairasnehā mahīpate || 51 ||
[Analyze grammar]

ity ākarṇya kathāṃ citrāṃ vatsarājo vasantakāt |
bhṛśaṃ tutoṣa sahito devyā vāsavadattayā || 52 ||
[Analyze grammar]

evaṃ dineṣu gacchatsu rājñas tasya divāniśam |
atṛptasya lasadgarbhadevīvaktrendudarśane || 53 ||
[Analyze grammar]

mantriṇām udapadyanta sarveṣāṃ śubhalakṣaṇāḥ |
krameṇa tanayās tatra bhāvikalyāṇasūcakāḥ || 54 ||
[Analyze grammar]

prathamaṃ mantrimukhyasya jāyate sma kilātmajaḥ |
yaugandharāyaṇasyaiva marubhūtir iti śrutaḥ || 55 ||
[Analyze grammar]

tato rumaṇvato jajñe suto hariśikhābhidhaḥ |
vasantakasyāpy utpede tanayo 'tha tapantakaḥ || 56 ||
[Analyze grammar]

tato nityoditākhyasya pratīhārādhikāriṇaḥ |
ityakāparasaṃjñasya putro 'jāyata gomukhaḥ || 57 ||
[Analyze grammar]

vatsarājasutasyeha bhāvinaś cakravartinaḥ |
mantriṇo 'mī bhaviṣyanti vairivaṃśāvamardinaḥ || 58 ||
[Analyze grammar]

iti teṣu ca jāteṣu vartamāne mahotsave |
tatrāśarīrā nabhaso niḥsasāra sarasvatī || 59 ||
[Analyze grammar]

divaseṣv atha yāteṣu vatsarājasya tasya sā |
devī vāsavadattābhūd āsannaprasavodayā || 60 ||
[Analyze grammar]

adhyāsta sā ca tac citraṃ putriṇībhiḥ pariṣkṛtam |
jātavāsagṛhaṃ sārkaśamīguptagavākṣakam || 61 ||
[Analyze grammar]

ratnadīpaprabhāsaṅgamaṅgalair vividhāyudhaiḥ |
garbharakṣākṣamaṃ tejo jvalayadbhir ivāvṛtam || 62 ||
[Analyze grammar]

mantribhis tantritānekamantratantrādirakṣitam |
jātaṃ mātṛgaṇasyeva durgaṃ duritadurjayam || 63 ||
[Analyze grammar]

tatrāsūta ca sā kāle kumāraṃ kāntadarśanam |
dyaur indum iva nirgacchadacchāmṛtamayadyutim || 64 ||
[Analyze grammar]

yena jātena na paraṃ mandiraṃ tatprakāśitam |
yāvad dhṛdayam apy asyā mātur niḥśokatāmasam || 65 ||
[Analyze grammar]

tataḥ pramode prasaraty atrāntaḥpuravāsinām |
vatseśaḥ sutajanmaitac chuśrāvābhyāntarāj janāt || 66 ||
[Analyze grammar]

tasmai sa rājyam api yatprītaḥ priyanivedine |
na dadau tadanaucityabhayena na tu tṛṣṇayā || 67 ||
[Analyze grammar]

etya cāntaḥpuraṃ sadyo baddhautsukyena cetasā |
cirāt phalitasaṃkalpaḥ sa dadarśa sutaṃ nṛpaḥ || 68 ||
[Analyze grammar]

raktāyatādharadalaṃ calorṇācārukesaram |
mukhaṃ dadhānaṃ sāmrājyalakṣmīlīlāmbujopamam || 69 ||
[Analyze grammar]

prāg evānyanṛpaśrībhir bhityeva nijalāñchanaiḥ |
ujjhitair aṅkitaṃ mṛdvoḥ padayoś chattracāmaraiḥ || 70 ||
[Analyze grammar]

tato harṣabharāpūrapīḍanotphullayā dṛśā |
sāsrayā sravatīvāsmin sutasnehaṃ mahīpatau || 71 ||
[Analyze grammar]

nandatsv api ca yaugandharāyaṇādiṣu mantriṣu |
gaganād uccacāraivaṃ kāle tasmin sarasvatī || 72 ||
[Analyze grammar]

kāmadevāvatāro 'yaṃ rājañ jātas tavātmajaḥ |
naravāhanadattaṃ ca jānīhy enam ihākhyayā || 73 ||
[Analyze grammar]

anena bhavitavyaṃ ca divyaṃ kalpam atandriṇā |
sarvavidyādharendrāṇām acirāc cakravartinā || 74 ||
[Analyze grammar]

ity uktvā virataṃ vācā tatkṣaṇaṃ nabhasaḥ kramāt |
puṣpavarṣair nipatitaṃ prasṛtaṃ dundubhisvanaiḥ || 75 ||
[Analyze grammar]

tataḥ surakṛtārambhajanitābhyadhikādaram |
sa rājā sutarāṃ hṛṣṭaś cakāra param utsavam || 76 ||
[Analyze grammar]

babhramus tūryaninadā nabhasto mandirodgatāḥ |
vidyādharebhyaḥ sarvebhyo rājajanmeva śaṃsitum || 77 ||
[Analyze grammar]

saudhāgreṣv aniloddhūtāḥ śoṇarāgāḥ svakāntibhiḥ |
patākā api sindūram anyonyam akirann iva || 78 ||
[Analyze grammar]

bhuvi sāṅgasmarotpattitoṣād iva surāṅganāḥ |
samāgatāḥ pratipadaṃ nanṛtur vārayoṣitaḥ || 79 ||
[Analyze grammar]

adṛśyata ca sarvā sā samānavibhavā purī |
rājño baddhotsavāt prāptair navavastravibhūṣaṇaiḥ || 80 ||
[Analyze grammar]

tadā hy arthān nṛpe tasmin varṣaty arthyanujīviṣu |
koṣād ṛte na tatratyo dadhau kaścana riktatām || 81 ||
[Analyze grammar]

maṅgalyapūrvāḥ svācāradakṣiṇā nartitāparāḥ |
satprābhṛtottarās tais taiḥ surakṣibhir adhiṣṭhitāḥ || 82 ||
[Analyze grammar]

prasṛtātodyanirhrādāḥ sākṣād diśa ivākhilāḥ |
samantād āyayuś cātra sāmantāntaḥpurāṅganāḥ || 83 ||
[Analyze grammar]

ceṣṭā nṛttamayī tatra pūrṇapātramayaṃ vacaḥ |
vyavahāro mahātyāgamayas tūryamayo dhvaniḥ || 84 ||
[Analyze grammar]

cīnapiṣṭamayo lokaś cāraṇaikamayī ca bhūḥ |
ānandamayyāṃ sarvasyām api tasyām abhūt puri || 85 ||
[Analyze grammar]

evaṃ mahotsavas tatra bhūrivāsaravardhitaḥ |
nivartate sma sa samaṃ pūrṇaiḥ pauramanorathaiḥ || 86 ||
[Analyze grammar]

so 'pi vrajatsu divaseṣv atha rājaputro vṛddhiṃ śiśuḥ pratipad indur ivājagāma |
pitrā yathāvidhiniveditadivyavāṇīnirdiṣṭapūrvanaravāhanadattanāmnā || 87 ||
[Analyze grammar]

yāni sphuranmasṛṇamugdhanakhaprabhāṇi dvitrāṇi yāni ca khacaddaśanāṅkurāṇi |
tāni skhalanti dadato vadataś ca tasya dṛṣṭvā niśamya ca padāni pitā tutoṣa || 88 ||
[Analyze grammar]

atha tasmai mantrivarāḥ svasutān ānīya rājaputrāya |
śiśave śiśūn mahīpatihṛdayānandān samarpayām āsuḥ || 89 ||
[Analyze grammar]

yaugandharāyaṇaḥ prāṅ marubhūtiṃ hariśikhaṃ rumaṇvāṃś ca |
gomukham ityakanāmā tapantakākhyaṃ vasantakaś ca sutam || 90 ||
[Analyze grammar]

śāntikaro 'pi purodhā bhrātṛsutaṃ śāntisomam aparaṃ ca |
vaiśvānaram arpitavān piṅgalikāputrakau yamajau || 91 ||
[Analyze grammar]

tasmin kṣaṇe ca nabhaso nipapāta divyā nāndīninādasubhagā surapuṣpavṛṣṭiḥ |
rājā nananda ca tadā mahiṣīsametaḥ satkṛtya tatra sacivātmajamaṇḍalaṃ tat || 92 ||
[Analyze grammar]

bālye 'pi tair abhimatair atha mantriputraiḥ ṣaḍbhis tadekanirataiś ca sa rājaputraḥ |
yuktaḥ sadaiva naravāhanadatta āsīd yukto guṇair iva mahodayahetubhūtaiḥ || 93 ||
[Analyze grammar]

taṃ ca krīḍākalitalalitāvyaktanarmābhilāṣaṃ yāntaṃ prītipravaṇamanasām aṅkato 'ṅkaṃ nṛpāṇām |
putraṃ smerānanasarasijaṃ sādaraṃ paśyatas te baddhvānandāḥ kim api divasā vatsarājasya jagmuḥ || 94 ||
[Analyze grammar]