Chapter 4

tato lāvāṇakāt tasmād anyedyuḥ sacivaiḥ saha |
vatsarājaḥ sa kauśāmbīṃ pratasthe dayitānvitaḥ || 1 ||
[Analyze grammar]

prasasre ca lasannādaistasyāpūritabhūtalaiḥ |
balairasamayodvelajalarāśijalairiva || 2 ||
[Analyze grammar]

upamā nṛpatestasya gajendrasthasya gacchataḥ |
bhavedyadi raviryāyādgagane sodayācalaḥ || 3 ||
[Analyze grammar]

sa sitenātapatreṇa kṛtacchāyo babhau nṛpaḥ |
jitārkatejaḥprītena sevyamāna ivendunā || 4 ||
[Analyze grammar]

tejasvinaṃ svakakṣābhistaṃ sarvoparivartinam |
sāmantāḥ parito bhremurdhruvaṃ grahagaṇā iva || 5 ||
[Analyze grammar]

paścātkareṇukārūḍhe devyau dve tasya rejatuḥ |
śrībhuvāvanurāgeṇa sākṣādanugate iva || 6 ||
[Analyze grammar]

tvaṅgatturaṃgasaṃghātakhurāgrāṅkanakhakṣatā |
pathi tasyābhavad bhūmir upabhukteva bhūpateḥ || 7 ||
[Analyze grammar]

evaṃ vatseśvaro gacchanstūyamānaḥ sa bandibhiḥ |
dinaiḥ katipayaiḥ prāpa kauśāmbīṃ vitatotsavām || 8 ||
[Analyze grammar]

dhvajaraktāṃśukacchannā gavākṣotphullalocanā |
pradvāradarśitottuṅgapūrṇakumbhakucadvayā || 9 ||
[Analyze grammar]

janakolāhalānandasaṃlāpā saudhahāsinī |
sā pravāsāgate patyau tatkālaṃ śuśubhe purī || 10 ||
[Analyze grammar]

devīdvayānuyātaśca sa rājā praviveśa tām |
paurastrīṇāṃ ca ko 'pyāsīttatra taddarśanotsavaḥ || 11 ||
[Analyze grammar]

apūri hāriharmyastharāmānanaśatairnabhaḥ |
devīmukhajitasyendoḥ sainyaiḥ sevāgatairiva || 12 ||
[Analyze grammar]

vātāyanagatāścānyāḥ paśyantyo 'nimiṣekṣaṇāḥ |
cakruḥ sakautukāyātavimānasthātsarobhramam || 13 ||
[Analyze grammar]

kāścidgavākṣajālāgralagnapakṣmalalocanāḥ |
asṛjanniva nārācapañjarāṇi manobhuvaḥ || 14 ||
[Analyze grammar]

ekasyāḥ srotsukā dṛṣṭirnṛpālokavikasvarā |
śruteḥ pārśvamapaśyantyāstadākhyātumivāyayau || 15 ||
[Analyze grammar]

drutāgatāyāḥ kasyāścinmuhurucchvasitau stanau |
kañcukādiva nirgantum īṣatus taddidṛkṣayā || 16 ||
[Analyze grammar]

anyasyāḥ saṃbhramacchinnahāramuktākaṇā babhuḥ |
galanto hṛdayasyeva harṣabāṣpāmbusīkarāḥ || 17 ||
[Analyze grammar]

yadyasyāmācaretpāpamagnirlāvāṇake tataḥ |
prakāśako 'pyasāvandhaṃ tamo jagati pātayet || 18 ||
[Analyze grammar]

iti vāsavadattāṃ ca dṛṣṭvā smṛtvā ca tattathā |
dāhapravādaṃ sotkaṇṭhā iva kāścidbabhāṣire || 19 ||
[Analyze grammar]

diṣṭyā na lajjitā devī sapatnyā sakhitulyayā |
iti padmāvatīṃ vīkṣya vayasyā jagade 'nyayā || 20 ||
[Analyze grammar]

nūnaṃ haramurāribhyāṃ na dṛṣṭaṃ rūpametayoḥ |
kimanyathā bhajetāṃ tau bahumānamumāśriyau || 21 ||
[Analyze grammar]

ityūcuraparāste dve dṛṣṭvā devyau parasparam |
kṣipantyaḥ pramadotphullalocanendīvarasrajaḥ || 22 ||
[Analyze grammar]

evaṃ vatseśvaraḥ kurvañjanatānayanotsavam |
svamandiraṃ sadevīkaḥ prāviśatkṛtamaṅgalaḥ || 23 ||
[Analyze grammar]

prabhāte yābjasaraso yābdherindūdaye tathā |
tatkālaṃ tasya sā kāpi śobhābhūdrājaveśmanaḥ || 24 ||
[Analyze grammar]

kṣaṇād apūri sāmantamaṅgalopāyanaiś ca tat |
sūcayadbhir ivāśeṣabhūpālopāyanāgamam || 25 ||
[Analyze grammar]

saṃmānya rājalokaṃ ca vatsarājaḥ kṛtotsavaḥ |
cittaṃ sarvajanasyeva viveśāntaḥpuraṃ tataḥ || 26 ||
[Analyze grammar]

devyormadhyasthitastatra ratiprītyoriva smaraḥ |
pānādilīlayā rājā dinaśeṣaṃ nināya saḥ || 27 ||
[Analyze grammar]

aparedyuśca tasyaiko nṛpasyāsthānavartinaḥ |
mantriṇāṃ saṃnidhau vipro dvāri cakranda kaścana || 28 ||
[Analyze grammar]

abrahmaṇyamaṭavyāṃ me pāpairgopālakaiḥ prabho |
putrasya caraṇocchedo vihitaḥ kāraṇaṃ vinā || 29 ||
[Analyze grammar]

tacchrutvā tatkṣaṇaṃ dvitrānvaṣṭabhyānāyya bhūpatiḥ |
gopālakānsa papraccha tataste 'pyevamabruvan || 30 ||
[Analyze grammar]

deva gopālakā bhūtvā krīḍāmo vijane vayam |
tatraiko devasenākhyo madhye gopālako 'sti naḥ || 31 ||
[Analyze grammar]

ekadeśe ca so 'ṭavyāmupaviṣṭaḥ śilāsane |
rājā yuṣmākamasmīti vaktyasmānanuśāsti ca || 32 ||
[Analyze grammar]

asmanmadhye ca kenāpi tasyājñā na vilaṅghyate |
evaṃ gopālako 'raṇye rājyaṃ sa kurute prabho || 33 ||
[Analyze grammar]

adya caitasya viprasya tanayas tena vartmanā |
gacchan gopālarājasya praṇāmaṃ tasya nākarot || 34 ||
[Analyze grammar]

mā gās tvam apraṇamyeti rājādeśena jalpataḥ |
asmān vidhūya so 'yāsīc chāsito 'pi hasan baṭuḥ || 35 ||
[Analyze grammar]

tatastasyāvinītasya pādacchedena nigraham |
kartuṃ gopālarājena vayamājñāpitā baṭoḥ || 36 ||
[Analyze grammar]

dhāvitvā ca tato 'smābhiśchinno 'sya caraṇaḥ prabho |
asmādṛśaḥ prabhorājñāṃ ko 'tilaṅghayituṃ kṣamaḥ || 37 ||
[Analyze grammar]

evaṃ gopālakai rajñi vijñapte saṃpradhārya tat |
yaugandharāyaṇo dhīmānrājānaṃ vijane 'bravīt || 38 ||
[Analyze grammar]

nūnaṃ nidhānādiyutaṃ tatsthānāṃ yatprabhāvataḥ |
gopālako 'pi prabhavatyevaṃ tattatra gamyatām || 39 ||
[Analyze grammar]

ity ukto mantriṇā rājā kṛtvā gopālakān puraḥ |
yayau tadaṭavīsthānaṃ sasainyaḥ saparicchadaḥ || 40 ||
[Analyze grammar]

parīkṣya bhūmiṃ yāvacca khanyate tatra karmibhiḥ |
adhastāttāvaduttasthau yakṣaḥ śailamayākṛtiḥ || 41 ||
[Analyze grammar]

so 'bravīcca mayā rājannidaṃ yadrakṣitaṃ ciram |
pitāmahanikhātaṃ te nidhānaṃ svīkuruṣva tat || 42 ||
[Analyze grammar]

iti vatseśamuktvā ca tatpūjāṃ pratigṛhya ca |
yakṣastiro 'bhūt khāte ca mahānāvirabhūnnidhiḥ || 43 ||
[Analyze grammar]

alabhyata mahārhaṃ ca ratnasiṃhāsanaṃ tataḥ |
bhavantyudayakāle hi satkalyāṇaparamparāḥ || 44 ||
[Analyze grammar]

tataḥ kṛtsnaṃ samādāya nidhānaṃ sa kṛtotsavaḥ |
tān praśāsya ca gopālān vatseśaḥ svapurīṃ yayau || 45 ||
[Analyze grammar]

tatrāruṇamaṇigrāvakiraṇaprasaraiḥ prabhoḥ |
pratāpākramaṇaṃ dikṣu bhaviṣyadiva darśayat || 46 ||
[Analyze grammar]

raupyāṅkuramukhaprotamuktāsaṃtatidanturam |
muhurhāsamivālocya tanmastrimativismayam || 47 ||
[Analyze grammar]

dadṛśustannṛpānītaṃ hemasiṃhāsanaṃ janāḥ |
nananduśca hatānandadundubhidhvānasundaram || 48 ||
[Analyze grammar]

mantriṇo 'pyutsavaṃ cakrurjayaṃ niścitya bhūpateḥ |
āmukhāpātikalyāṇaṃ kāryasiddhiṃ hi śaṃsati || 49 ||
[Analyze grammar]

tataḥ patākāvidyudbhir ākīrṇe gaganāntare |
vavarṣa rājajaladaḥ kanakaṃ so 'nujīviṣu || 50 ||
[Analyze grammar]

utsavena ca nīte 'smindine yaugandharāyaṇaḥ |
cittaṃ jijñāsuranyedyurvatseśvaramabhāṣata || 51 ||
[Analyze grammar]

etatkulakramāyātaṃ mahāsiṃhāsanaṃ tvayā |
yaprāptaṃ tatsamāruhya devālaṃkriyatāmiti || 52 ||
[Analyze grammar]

vijitya pṛthvīm ārūḍhā yatra me prapitāmahāḥ |
tatrājitvā diśaḥ sarvāḥ kā mamārohataḥ prathā || 53 ||
[Analyze grammar]

jitvaivemāṃ samudrāntāṃ pṛhvīṃ pṛthuvibhūṣaṇām |
alaṃkaromi pūrveṣāṃ ratnasiṃhāsanaṃ mahat || 54 ||
[Analyze grammar]

ityūcivānnarapatirnāruroha sa saṃprati |
saṃbhavatyabhijātānāmabhimāno hyakṛtrimaḥ || 55 ||
[Analyze grammar]

tataḥ prītastamāha sma nṛpaṃ yaugandharāyaṇaḥ |
sādhu deva kuru prācyāṃ tarhi pūrvaṃ jayodyamam || 56 ||
[Analyze grammar]

tacchrutvaiva prasaṅgāttaṃ rājā papraccha manriṇam |
sthitāsvapyuttarādyāsu prākpācīṃ yānti kiṃ nṛpāḥ || 57 ||
[Analyze grammar]

etacchrutvā jagādainaṃ punaryaugandharāyaṇaḥ |
sphītāpi rājan kauberī mlecchasaṃsargagarhitā || 58 ||
[Analyze grammar]

arkādyastamaye hetuḥ paścimāpi na pūjyate |
āsannarākṣasā duṣṭā dakṣiṇāpyanakāśritā || 59 ||
[Analyze grammar]

prācyāmudeti sūryastu prācīmindro 'dhitiṣṭhati |
jāhnavīṃ yāti ca prācīṃ tena prācī praśasyate || 60 ||
[Analyze grammar]

deśeṣvapi ca vindhyādrihimavanmadhyavartiṣu |
jāhnavījalapūto yaḥ sa praśasyatamo mataḥ || 61 ||
[Analyze grammar]

tasmātprācīṃ prayāntyādau rājāno maṅgalaiṣiṇaḥ |
nivasanti ca deśe 'pi surasindhusamāśrite || 62 ||
[Analyze grammar]

pūrvajairapi hi prācīprakrameṇa jitā diśaḥ |
gaṅgopakaṇṭhe vāsaśca vihito hastināpure || 63 ||
[Analyze grammar]

śatānīkastu kauśāmbīṃ ramyabhāvena śiśriye |
sāmrājye pauruṣādhīne paśyandeśamakāraṇam || 64 ||
[Analyze grammar]

ityuktvā virate tatra tasminyaugandharāyaṇe |
rājā puruṣakāraikabahumānādabhāṣata || 65 ||
[Analyze grammar]

satyaṃ na deśaniyamaḥ sāmrājyasyeha kāraṇam |
saṃpatsu hi susattvānāmekahetuḥ svapauruṣam || 66 ||
[Analyze grammar]

eko 'pyāśrayahīno 'pi lakṣmīṃ prāpnoti sattvavān |
śrutā kiṃ nātra yuṣmābhiḥ puṃsaḥ sattvavataḥ kathā || 67 ||
[Analyze grammar]

evamuktvā sa vatseśaḥ sacivābhyarthitaḥ śubhām |
vicitrāṃ saṃnidhau devyorimāmakathayatkathām || 68 ||
[Analyze grammar]

asti bhūtalavikhyātā yeyamujjayinī purī |
tasyāmādityasenākhyaḥ pūrvamāsīnmahīpatiḥ || 69 ||
[Analyze grammar]

ādityasyeva yasyeha na caskhāla kila kvacit |
pratāpanilayasyaikacakravartitayā rathaḥ || 70 ||
[Analyze grammar]

bhāsayatyucchrite vyoma yaccatre tuhinatviṣi |
nyavartantātapatrāṇi rājñāmapagatoṣmaṇām || 71 ||
[Analyze grammar]

samastabhūtalābhogasaṃbhavānāṃ babhūva saḥ |
bhājanaṃ sarvaratnānāmamburāśirivāmbhasām || 72 ||
[Analyze grammar]

sa kadācana kasyāpi hetoryātrāgato nṛpaḥ |
sasainyo jāhnavīkūlamāsādyāvasthito 'bhavat || 73 ||
[Analyze grammar]

tatra taṃ guṇavarmākhyaḥ ko 'pyāḍhyastatpradeśajaḥ |
abhyagānnṛpamādāya kanyāratnamupāyanam || 74 ||
[Analyze grammar]

ratnaṃ tribhuvane 'pyeṣā kanyotpannā gṛhe mama |
nānyatra dātuṃ śakyā ca devo hi prabhur īdṛśaḥ || 75 ||
[Analyze grammar]

ity āvedya pratīhāramukhenātha praviśya saḥ |
guṇavarmā nijāṃ tasmai rājñe kanyāmadarśayat || 76 ||
[Analyze grammar]

sa tāṃ tejasvatīṃ nāma dīptidyotitadiṅmukhām |
anaṅgamaṅgalāvāsaratnadīpaśikhāmiva || 77 ||
[Analyze grammar]

paśyansnehamayo rājā śliṣṭastatkāntitejasā |
kāmāgnineva saṃtaptaḥ svinno vigalati sma saḥ || 78 ||
[Analyze grammar]

svīkṛtyaitāṃ ca tatkālaṃ mahādevīpadocitām |
cakāra guṇavarmāṇaṃ parituṣyātmanaḥ samam || 79 ||
[Analyze grammar]

tatastāṃ pariṇīyaiva priyāṃ tejasvatīṃ nṛpaḥ |
kṛtārthamānī sa tayā sākamujjayinīṃ yayau || 80 ||
[Analyze grammar]

tatra tanmukhasaktaikadṛṣtī rājā hy abhūt tathā |
dadarśa rājakāryāṇi na yathā sumahānty api || 81 ||
[Analyze grammar]

tejasvatīkalālāpakīliteva kila śrutiḥ |
nāvasannaprajākrandaistasyākraṣṭumaśakyata || 82 ||
[Analyze grammar]

cirapraviṣṭo niragānnaiva so 'ntaḥpurānnṛpaḥ |
niragādarivargasya hṛdayāttu rujājvaraḥ || 83 ||
[Analyze grammar]

kālena tasya jajñe ca rājñaḥ sarvābhinanditā |
kanyā tejasvatīdevyāṃ buddhau ca vijigīṣutā || 84 ||
[Analyze grammar]

paramādbhutarūpā sā tṛṇīkṛtya jagattrayam |
harṣaṃ tasyākarotkanyā pratāpaṃ ca jigīṣutā || 85 ||
[Analyze grammar]

athābhiyoktumutsiktaṃ sāmantaṃ kaṃcidekadā |
ādityasenaḥ prayayāvujjayinyāḥ sa bhūpatiḥ || 86 ||
[Analyze grammar]

tāṃ ca tejasvatīṃ rājñīṃ samārūḍhakareṇukām |
sahaprayāyinīṃ cakre sainyasyevādhidevatām || 87 ||
[Analyze grammar]

ārurodhā varāśvaṃ ca darpodyaddharmanirjharam |
jaṅgamādrinibhaṃ tuṅgaṃ sa śrīvṛkṣaṃ samekhalam || 88 ||
[Analyze grammar]

āsṛkkotthitapādābhyāmabhyasyantamivāmbare |
gatiṃ garutmato dṛṣṭāṃ vegasabrahmacāriṇaḥ || 89 ||
[Analyze grammar]

javasya mama paryāptā kiṃ nu syāditi medinīm |
kalayantamivonnamya kaṃdharāṃ dhīrayā dṛśā || 90 ||
[Analyze grammar]

kiṃcidgatvā ca saṃprāpya samāṃ bhūmiṃ sa bhūpatiḥ |
aśvamuttejayāmāsa tejasvatyāḥ pradarśayan || 91 ||
[Analyze grammar]

so 'śvastatpārṣṇighātena yantreṇeveritaḥ śaraḥ |
jagāma kvāpyatijavādalakṣyo lokalocanaiḥ || 92 ||
[Analyze grammar]

taddṛṣṭvā vihvale sainye hayārohāḥ sahasradhā |
anvadhāvanna ca prāpustamaśvāpahṛtaṃ nṛpam || 93 ||
[Analyze grammar]

tataścāniṣṭamāśaṅkya sasainyā mantriṇo bhayāt |
ādāya devīṃ krandantīṃ nivṛttyojjayinīṃ yayuḥ || 94 ||
[Analyze grammar]

tatra te pihitadvārakṛtaprākāraguptayaḥ |
rājñaḥ pravṛttiṃ cinvantastasthurāśvāsitaprajāḥ || 95 ||
[Analyze grammar]

atrāntare sa rājāpi nīto 'bhūttena vājinā |
saraudrasiṃhasaṃcārāṃ durgāṃ vindhyātavīṃ kṣaṇāt || 96 ||
[Analyze grammar]

tatra daivātsthite tasminnaśve sa sahasā nṛpaḥ |
āsīnmahāṭavīdattadiṅmoho vihvalākulaḥ || 97 ||
[Analyze grammar]

gatimanyāmapaśyaṃśca so 'vatīrya praṇamya ca |
taṃ jāgādāśvajātijño rājā varaturaṃgamam || 98 ||
[Analyze grammar]

devastvaṃ na prabhudrohaṃ tvādṛśaḥ kartumarhati |
tanme tvameva śaraṇaṃ śivena naya māṃ pathā || 99 ||
[Analyze grammar]

tacchrutvā sānutāpaḥ sanso 'śvo jātismarastadā |
tat tathety agrahīd buddhau daivataṃ hi hayottamaḥ || 100 ||
[Analyze grammar]

tato rājñi samārūḍhe sa pratasthe turaṃgamaḥ |
svacchaśītāmbusarasā mārgeṇādhvaklamacchidā || 101 ||
[Analyze grammar]

sāyaṃ ca prāpayāmāsa sa yojanaśatāntaram |
ujjayinyāḥ samīpaṃ taṃ rājānaṃ vājisattamaḥ || 102 ||
[Analyze grammar]

tadvegavijitānvīkṣya saptāpi nijavājinaḥ |
astādrikaṃdarālīne lajjayevāṃśumālini || 103 ||
[Analyze grammar]

tamasi prasṛte dvārāṇyujjayinyā vilokya saḥ |
pihitāni śmaśānaṃ ca bahistatkālabhīṣaṇam || 104 ||
[Analyze grammar]

nināyainaṃ nivāsāya bhūpatiṃ buddhimān hayaḥ |
bāhyaikāntasthitaṃ tatra guptaṃ vipramaṭhaṃ niśi || 105 ||
[Analyze grammar]

niśātivāhayogyaṃ ca taṃ sa dṛṣṭvā maṭhaṃ nṛpaḥ |
ādityasenaḥ prārebhe praveṣṭuṃ śrāntavāhanaḥ || 106 ||
[Analyze grammar]

rurudhustasya viprāśca praveśaṃ tannivāsinaḥ |
śmaśānapālaś cauro vā ko 'pyasāviti vādinaḥ || 107 ||
[Analyze grammar]

niryayuste ca saṃsaktakalahā lolaniṣṭhurāḥ |
bhayakārkaśyakopānāṃ gṛhaṃ hi cchāndasā dvijāḥ || 108 ||
[Analyze grammar]

raṭatsu teṣu tatraiko nirjagāma tato maṭhāt |
vidūṣakākhyo guṇavāndhuryaḥ sattvavatāṃ dvijaḥ || 109 ||
[Analyze grammar]

yo yuvā bāhuśālī ca tapasārādhya pāvakam |
prāpa khaḍgottamaṃ tasmāddhyātamātropagāminam || 110 ||
[Analyze grammar]

sa dṛṣṭvā taṃ niśi prāptaṃ dhīro bhavyākṛtiṃ nṛpam |
pracchannaḥ ko'pi devo 'yamiti dadhyau vidūṣakaḥ || 111 ||
[Analyze grammar]

vidhūya viprāṃś cānyāṃs tān sa sarvānucitāśayaḥ |
nṛpaṃ praveśayāmāsa maṭhāntaḥ praśrayānataḥ || 112 ||
[Analyze grammar]

viśrāntasya ca dāsībhir dhūtādhvarajasaḥ kṣaṇāt |
āhāraṃ kalpayāmāsa rājñastasya nijocitam || 113 ||
[Analyze grammar]

taṃ cāpanītaparyāṇaṃ tadīyaṃ turagottamam |
yavasādipradānena cakāra vigataśramam || 114 ||
[Analyze grammar]

rakṣāmyahaṃ śarīraṃ te tatsukhaṃ svapihi prabho |
ityuvāca ca taṃ śrāntamāstīrṇaśayanaṃ nṛpam || 115 ||
[Analyze grammar]

supte ca tasmin dvārastho jāgarāmāsa sa dvijaḥ |
cintitopasthitāgneyakhaḍgahasto 'khilāṃ niśām || 116 ||
[Analyze grammar]

prātaś ca tasya nṛpateḥ prabuddhasyaiva sa svayam |
anukta eva turagaṃ sajjīcakre vidūṣakaḥ || 117 ||
[Analyze grammar]

rājāpi sa tam āmantrya samāruhya ca vājinam |
viveśojjayinīṃ dūrāddṛṣṭo harṣākulairjanaiḥ || 118 ||
[Analyze grammar]

praviṣṭamabhijagmustaṃ sarvāḥ prakṛtayaḥ kṣaṇāt |
tadāgamanajānandalasatkalakalāravāḥ || 119 ||
[Analyze grammar]

āyayau rājabhavanaṃ sa rājā sacivānvitaḥ |
yayau tejasvatīdevyā hṛdayācca mahājvaraḥ || 120 ||
[Analyze grammar]

vātāhatotsavākṣiptapatākāṃśukapaṅktibhiḥ |
utsāritā ivābhūvannagaryāstatkṣaṇaṃ śucaḥ || 121 ||
[Analyze grammar]

akarodā dināntaṃ ca devī tāvanmahotsavam |
yāvannagaraloko 'bhūtsārkaḥ sindūrapiṅgalaḥ || 122 ||
[Analyze grammar]

anyedyuḥ sa tamādityaseno rājā vidūṣakam |
maṭhādānāyayāmāsa tasmātsarvairdvijaiḥ saha || 123 ||
[Analyze grammar]

prakhyāpya rātrivṛttāntaṃ dadau tasmai ca tatkṣaṇam |
vidūṣakāya grāmāṇāṃ sahasramupakāriṇe || 124 ||
[Analyze grammar]

paurohitye ca cakre taṃ pradattacchattravāhanam |
vipraṃ kṛtajño nṛpatiḥ kautukālokitaṃ janaiḥ || 125 ||
[Analyze grammar]

evaṃ tadaiva sāmantatulyaḥ so 'bhūdvidūṣakaḥ |
moghā hi nāma jāyeta mahatsūpakṛtiḥ kutaḥ || 126 ||
[Analyze grammar]

yāṃśca prāpa nṛpādgrāmāṃstānsarvānsa mahāśayaḥ |
tanmaṭhāśrayibhirvipraiḥ samaṃ sādhāraṇānvyadhāt || 127 ||
[Analyze grammar]

tasthau ca sevamānastaṃ rājānaṃ sa tadāśritaḥ |
bhuñjānaśca sahānyaistairbrāhmaṇairgrāmasaṃcayam || 128 ||
[Analyze grammar]

kāle gacchati cānye te sarve prādhānyamicchavaḥ |
naiva taṃ gaṇayām āsur dvijā dhanamadoddhatāḥ || 129 ||
[Analyze grammar]

vibhinnaiḥ saptasaṃkhyākairekasthānāśrayairmithaḥ |
saṃgharṣāttair abādhyanta grāmā duṣṭair grahair iva || 130 ||
[Analyze grammar]

ucchṛṅkhaleṣu teṣvāsīdudāsīno vidūṣakaḥ |
alpabhāveṣu dhīrāṇāmavajñaiva hi śobhate || 131 ||
[Analyze grammar]

ekadā kalahāsaktāndṛṣṭvā tānabhyupāyayau |
kaściccakradharo nāma vipraḥ prakṛtiniṣṭhuraḥ || 132 ||
[Analyze grammar]

parārtanyāyavādeṣu kāṇo 'pyamlānadarśanaḥ |
kubjo 'pi vāci suspaṣṭo viprastānityabhāṣata || 133 ||
[Analyze grammar]

prāptā bhikṣācarairbhūtvā bhavadbhiḥ śrīriyaṃ śaṭhāḥ |
tannāśayatha kiṃ grāmānanyonyamasahiṣṇavaḥ || 134 ||
[Analyze grammar]

vidūṣakasya doṣo 'yaṃ yena yūyamupekṣitāḥ |
tadasaṃdigdhamacirātpunarbhikṣāṃ bhramiṣyatha || 135 ||
[Analyze grammar]

varaṃ hi daivāyattaikavṛddhisthānam anāyakam |
na tu viplutasarvārthaṃ vibhinnabahunāyakam || 136 ||
[Analyze grammar]

tadekaṃ nāyakaṃ dhīraṃ kurudhvaṃ vacasā mama |
sthirayā yadi kṛtyaṃ vo dhuryarakṣitayā śriyā || 137 ||
[Analyze grammar]

tac chrutvā nāyakatvaṃ te sarve 'py aicchan yadātmanaḥ |
tadā vicintya mūḍhāṃs tān punaś cakradharo 'bravīt || 138 ||
[Analyze grammar]

saṃgharṣaśālināṃ tarhi samayaṃ vo dadāmyaham |
itaḥ śmaśāne śūlāyāṃ trayaścaurā niṣūditāḥ || 139 ||
[Analyze grammar]

nāsāsteṣāṃ niśi cchittvā yaḥ susattva ihānayet |
sa yuṣmākaṃ pradhānaḥ syādvīro hi svāmyamarhati || 140 ||
[Analyze grammar]

iti cakradhareṇoktānviprāṃstānantikasthitaḥ |
kurudhvam etat ko doṣa ity uvāca vidūṣakaḥ || 141 ||
[Analyze grammar]

tataste 'syāvadanviprā naitatkartuṃ kṣamā vayam |
yo vā śaktaḥ sa kurutāṃ samaye ca vayaṃ sthitāḥ || 142 ||
[Analyze grammar]

tato vidūṣako 'vādīdahametatkaromi bhoḥ |
ānayāmi niśi cchittvā nāsāsteṣāṃ śmaśānataḥ || 143 ||
[Analyze grammar]

tatastadduṣkaraṃ matvā te 'pi mūḍhāstamabruvan |
evaṃ kṛte tvamasmākaṃ svāmī niyama eṣa naḥ || 144 ||
[Analyze grammar]

ity evākhyāpya samayaṃ prāptāyāṃ rajanau ca tān |
āmantrya viprān prayayau śmaśānaṃ sa vidūṣakaḥ || 145 ||
[Analyze grammar]

praviveśa ca tadvīro nijaṃ karmeva bhīṣaṇam |
cintitopasthitāgneyakṛpāṇaikaparigrahaḥ || 146 ||
[Analyze grammar]

ḍākinīnādasaṃvṛddhagṛdhravāyasavāśite |
ulkāmukhamukholkāgnivisphāritacitānale || 147 ||
[Analyze grammar]

dadarśa tatra madhye ca sa tāñ śūlādhiropitān |
puruṣān nāsikāchedabhiyevordhvīkṛtānanān || 148 ||
[Analyze grammar]

yāvac ca nikaṭaṃ teṣāṃ prāpa tāvat trayo 'pi te |
vetālādhiṣṭhitās tasmin praharanti sma muṣṭibhiḥ || 149 ||
[Analyze grammar]

niṣkampa eva khaḍgena so 'pi pratijaghāna tān |
na śikṣitaḥ prayatno hi dhīrāṇāṃ hṛdaye bhiyā || 150 ||
[Analyze grammar]

tenāpagatavetālavikārāṇāṃ sa nāsikāḥ |
teṣāṃ cakarta vaddhvā ca kṛtī jagrāha vāsasi || 151 ||
[Analyze grammar]

āgacchaṃśca dadarśaikaṃ śavasyopari saṃsthitam |
pravrājakaṃ śmaśāne 'tra japantaṃ sa vidūṣakaḥ || 152 ||
[Analyze grammar]

tacceṣṭālokanakrīḍākautukādupagamya tam |
pracchannaḥ pṛṣṭhatastasya tasthau pravrājakasya saḥ || 153 ||
[Analyze grammar]

kṣaṇāt pravrājakasyādhaḥ phūtkāraṃ muktavāñ śavaḥ |
niragāc ca mukhāt tasya jvālā nābheś ca sarṣapāḥ || 154 ||
[Analyze grammar]

gṛhītvā sarṣapāṃstāṃśca sa parivrājakastataḥ |
utthāya tāḍayāmāsa śavaṃ pāṇitalena tam || 155 ||
[Analyze grammar]

udatiṣṭhatsa cottālavetālādhiṣṭhitaḥ śavaḥ |
āruroha ca tasyaiva skandhe pravrājako 'tha saḥ || 156 ||
[Analyze grammar]

tadārūḍhaśca sahasā gantuṃ pravavṛte tataḥ |
vidūṣako 'pi taṃ tūṣṇīmanvagacchadalakṣitaḥ || 157 ||
[Analyze grammar]

nātidūramatikramya sa dadarśa vidūṣakaḥ |
śūnyaṃ kātyāyanīmūrtisanāthaṃ devatāgṛham || 158 ||
[Analyze grammar]

tatrāvatīrya vetālaskandhātpravrājakastataḥ |
viveśa garbhabhavanaṃ vetālo 'pyapatadbhuvi || 159 ||
[Analyze grammar]

vidūṣakaśca tatrāsīdyuktyā paśyannalakṣitaḥ |
pravrājako 'pi saṃpūjya tatra devīṃ vyajijñapat || 160 ||
[Analyze grammar]

tuṣṭāsi yadi taddevi dehi me varamīpsitam |
anyathātmopahāreṇa prīṇāmi bhavatīmaham || 161 ||
[Analyze grammar]

ityuktavantaṃ taṃ tīvramantrasādhanagarvitam |
pravrājakaṃ jagādaivaṃ vāṇī garbhagṛhodgatā || 162 ||
[Analyze grammar]

ādityasenanṛpateḥ sutāmānīya kanyakām |
upahārīkuruṣveha tataḥ prāpsyasi vāñchitam || 163 ||
[Analyze grammar]

etacchrutvā sa nirgatya kareṇāhatya taṃ punaḥ |
pravrāḍutthāpayāmāsa vetālaṃ muktaphūtkṛtim || 164 ||
[Analyze grammar]

tasya ca skandhamāruhya niryadvaktrānalārciṣaḥ |
ānetuṃ rājaputrīṃ tāmutpatya nabhasā yayau || 165 ||
[Analyze grammar]

vidūṣako 'pi tatsarvaṃ dṛṣṭvā tatra vyacintayat |
kathaṃ rājasutānena hanyate mayi jīvati || 166 ||
[Analyze grammar]

ihaiva tāvat tiṣṭhāmi yāvad āyāty asau śaṭhaḥ |
ityāllocya sa tatraiva tasthau channo vidūṣakaḥ || 167 ||
[Analyze grammar]

pravrājakaśca gatvaiva vātāyanapathena saḥ |
praviśyāntaḥpuraṃ prāpa suptāṃ niśi nṛpātmajām || 168 ||
[Analyze grammar]

āyayau ca gṛhītvā tāṃ gaganena tamomayaḥ |
kāntiprakāśitadiśaṃ rāhuḥ śaśikalāmiva || 169 ||
[Analyze grammar]

hā tāta hāmbeti ca tāṃ krandantīṃ kanyakāṃ vahan |
tatraiva devībhavane so 'ntarikṣādavātarat || 170 ||
[Analyze grammar]

praviveśa ca tatkālaṃ vetālaṃ pravimucya saḥ |
kanyāratnaṃ tadādāya devīgarbhagṛhāntaram || 171 ||
[Analyze grammar]

tatra yāvannihantuṃ tāṃ rājaputrīmiyeṣa saḥ |
tāvadākṛṣṭakhaḍgo 'tra praviveśa vidūṣakaḥ || 172 ||
[Analyze grammar]

āḥ pāpa mālatīpuṣpamaśmanā hantumīhase |
yadasyāmākṛtau śastraṃ vyāpārayitumicchasi || 173 ||
[Analyze grammar]

ityuktvākṛṣya keśeṣu śirastasya vivellataḥ |
pravrājakasya ciccheda khaḍgena sa vidūṣakaḥ || 174 ||
[Analyze grammar]

āśvāsayāmāsa ca tāṃ rājaputrīṃ bhayākulām |
praviśantīmivāṅgāni kiṃcitpratyabhijānatīm || 175 ||
[Analyze grammar]

kathamantaḥpuraṃ rājño rājaputrīmimāmitaḥ |
nayeyamiti tatkālamasau dhīro vyacintayat || 176 ||
[Analyze grammar]

bho vidūṣaka śṛṇvetadyo 'yaṃ pravrāṭ tvayā hataḥ |
mahānetasya vetālaḥ siddho 'bhūtsarṣapāstathā || 177 ||
[Analyze grammar]

tato 'sya pṛthvīrājye ca vāñchā rājātmajāsu ca |
udapadyata tenāyam evaṃ mūḍho 'dya vañcitaḥ || 178 ||
[Analyze grammar]

tadgṛhāṇaitadīyāṃstvaṃ sarṣapānvīra yena te |
imāmekāṃ niśāmadya bhaviṣyatyambare gatiḥ || 179 ||
[Analyze grammar]

ityākāśagatā vāṇī jātaharṣaṃ jagāda tam |
anugṛhṇanti hi prāyo devatā api tādṛśam || 180 ||
[Analyze grammar]

tato vastrāñcalāt tasya sa parivrājakasya tān |
jarāha sarṣapān haste tām aṅke ca nṛpātmajām || 181 ||
[Analyze grammar]

yāvacca devībhavanātsa tasmānniryayau bahiḥ |
uccacāra punastāvadanyā nabhasi bhāratī || 182 ||
[Analyze grammar]

ihaiva devībhavane māsasyānte punastvayā |
āgantavyaṃ mahāvīra vismartavyamidaṃ na te || 183 ||
[Analyze grammar]

tacchrutvā sa tathetyuktvā sadyo devīprasādataḥ |
utpapāta nabho bibhradrājaputrīṃ vidūṣakaḥ || 184 ||
[Analyze grammar]

gatvā ca gaganenāśu sa tāmantaḥpurāntaram |
prāveśayadrājasutāṃ samāśvastāmuvāca ca || 185 ||
[Analyze grammar]

na me bhaviṣyati prātargatirvyomni tataśca mām |
sarve drakṣyanti niryāntaṃ tatsaṃpratyeva yāmyaham || 186 ||
[Analyze grammar]

iti tenoditā bālā bibhyatī sā jagāda tam |
gate tvayi mama prāṇāstrāsākrāntāḥ prayāntyamī || 187 ||
[Analyze grammar]

tanmahābhāga mā gāstvaṃ dehi me jīvitaṃ punaḥ |
pratipannārthanirvāhaḥ sahajaṃ hi satāṃ vratam || 188 ||
[Analyze grammar]

tac chrutvā cintayām āsa sa susattvo vidūṣakaḥ |
yad astu me na gacchāmi muñcet prāṇān bhayādiyam || 189 ||
[Analyze grammar]

tataśca nṛpaterbhaktiḥ kā mayā vihitā bhavet |
ityālocya sa tatraiva tasthāvantaḥpure niśi || 190 ||
[Analyze grammar]

vyāyāmajāgaraśrānto yayau nidrāṃ śanaiśca saḥ |
rājaputrī tvanidraiva bhītā tāmanayanniśām || 191 ||
[Analyze grammar]

viśrāmyatu kṣaṇaṃ tāvaditi premārdramānasā |
suptaṃ prabodhayāmāsa sā prabhāte 'pi naiva tam || 192 ||
[Analyze grammar]

tataḥ praviṣṭā dadṛśustamantaḥpuracārikāḥ |
sasaṃbhramāśca gatvaiva rājānaṃ taṃ vyajijñapan || 193 ||
[Analyze grammar]

rājāpy avekṣituṃ tattvaṃ pratīhāraṃ vyasarjayat |
pratīhāraśca gatvāntastatrāpaśyadvidūṣakam || 194 ||
[Analyze grammar]

śuśrāva ca yathāvṛttaṃ sa tadrājasutāmukhāt |
tathaiva gatvā rājñe ca sa samagraṃ nyavedayat || 195 ||
[Analyze grammar]

vidūṣakasya sattvajñastacchrutvā sa mahīpatiḥ |
kimetatsyāditi kṣipraṃ samudbhrānta ivābhavat || 196 ||
[Analyze grammar]

ānāyayacca duhiturmandirāttaṃ vidūṣakam |
dattānuyātraṃ manasā tasyāḥ snehānupātinā || 197 ||
[Analyze grammar]

papraccha ca yathāvṛttaṃ sa rājā tamupāgatam |
ā mūlataśca so 'pyasmai vipro vṛttāntamabravīt || 198 ||
[Analyze grammar]

adarśayac ca vastrānte nibaddhāś cauranāsikāḥ |
pravrāṭsaṃbandhinas tāṃś ca sarṣapān bhūmibhedinaḥ || 199 ||
[Analyze grammar]

tataḥ saṃbhāvya satyaṃ tat tāṃś cānāyya maṭhadvijān |
sarvāṃś cakradharopetān pṛṣṭvā tanmūlakāraṇam || 200 ||
[Analyze grammar]

svayaṃ śmaśāne gatvā ca dṛṣṭvā tāṃśchinnanāsikān |
puruṣāṃstaṃ ca nirlūnakaṇṭhaṃ pravrājakādhamam || 201 ||
[Analyze grammar]

utpannapratyayo rājā sa tutoṣa mahāśayaḥ |
vidūṣakāya kṛtine sutāprāṇapradāyine || 202 ||
[Analyze grammar]

dadau tasmai ca tāmeva tadaiva tanayāṃ nijām |
kimadeyamudārāṇāmupakāriṣu tuṣyatām || 203 ||
[Analyze grammar]

śrīruvāsāmbujaprītyā nūnaṃ rājasutākare |
gṛhītapāṇir yenāsyā lebhe lakṣmīṃ vidūṣakaḥ || 204 ||
[Analyze grammar]

tato rājopacāreṇa sa tayā kāntayā saha |
ādityasenanṛpatestasthau ślāghyayaśā gṛhe || 205 ||
[Analyze grammar]

atha yāteṣu divaseṣvekadā daivacoditā |
tamuvāca niśāyāṃ sā rājaputrī vidūṣakam || 206 ||
[Analyze grammar]

nātha smarasi yattatra tava devīgṛhe niśi |
māsānte tvamihāgaccherityuktaṃ divyayā girā || 207 ||
[Analyze grammar]

tatra cādya gato māso bhavatastacca vismṛtam |
ity uktaḥ priyayā smṛtvā sa jaharṣa vidūṣakaḥ || 208 ||
[Analyze grammar]

sādhu smṛtaṃ tvayā tanvi vismṛtaṃ tanmayā punaḥ |
ityuktvāliṅganaṃ cāsyi sa dadau pāritoṣakam || 209 ||
[Analyze grammar]

suptāyāṃ ca tatastasyāṃ nirgatyāntaḥpurānniśi |
ādāya khaḍgaṃ svasthaḥ saṃstaddevībhavanaṃ yayau || 210 ||
[Analyze grammar]

prāpto vidūṣako 'haṃ bhor iti tatra vadan bahiḥ |
praviśety aśṛṇod vācam antaḥ kenāpy udīritām || 211 ||
[Analyze grammar]

praviśya cāntare so 'tra divyamāvāsamaikṣata |
tadantardivyarūpāṃ ca kanyāṃ divyaparicchadām || 212 ||
[Analyze grammar]

svaprabhābhinnatimirāṃ rajanijvalitāmiva |
harakopāgninirdagdhasmarasaṃjīvanauṣadhim || 213 ||
[Analyze grammar]

kimetaditi sāścaryaḥ sa tayā hṛṣṭayā svayam |
sasnehabahumānena svāgatenābhyanandyata || 214 ||
[Analyze grammar]

upaviṣṭaṃ ca saṃjātavisrambhaṃ premadarśanāt |
tatsvarūpaparijñānasotsukaṃ sā tamabravīt || 215 ||
[Analyze grammar]

ahaṃ vidyādharī kanyā bhadrānāma mahānvayā |
iha kāmacaratvācca tvāmapaśyamahaṃ tadā || 216 ||
[Analyze grammar]

tvadguṇākṛṣṭacittā ca tatkālamahameva tām |
adṛśyavāṇīmasṛjaṃ punarāgamanāya te || 217 ||
[Analyze grammar]

adya vidyāprayogāś ca saṃmohya preritā mayā |
sā te rājasutaivāsmin kārye smṛtim ajījanat || 218 ||
[Analyze grammar]

tvadarthaṃ ca sthitāsmīha tattubhyamidamarpitam |
śarīraṃ sundara mayā kuru pāṇigrahaṃ mama || 219 ||
[Analyze grammar]

ityukto bhadrayā bhavyo vidyādharyā vidūṣakaḥ |
tatheti pariṇinye tāṃ gāndharvavidinā tadā || 220 ||
[Analyze grammar]

atiṣṭhadatha tatraiva divyaṃ bhogamavāpya saḥ |
svapauruṣaphalarddhyeva priyayā saṃgatastayā || 221 ||
[Analyze grammar]

atrāntare prabuddhā sā rājaputrī niśākṣaye |
bhartāraṃ tamapaśyantī viṣādaṃ sahasāgamat || 222 ||
[Analyze grammar]

utthāya cāntikaṃ mātuḥ praskhaladbhiḥ padairyayau |
vihvalā saṃgaladvāṣpataraṅgitavilocanā || 223 ||
[Analyze grammar]

sa patirme gataḥ kvāpi rātrāviti ca mātaram |
ātmāparādhasabhayā sānutāpā ca sābhyadhāt || 224 ||
[Analyze grammar]

tatastanmātari snehātsaṃbhrāntāyāṃ krameṇa tat |
buddhvā rājāpi tatraitya paramākulatāmagāt || 225 ||
[Analyze grammar]

jāne śmaśānabāhyaṃ taṃ gato 'sau devatāgṛham |
ityukte rājasutayā rājā tatra svayaṃ yayau || 226 ||
[Analyze grammar]

tatra vidyādharīvidyāprabhāveṇa tirohitam |
vicintyāpi na lebhe taṃ sa kṣitīśo vidūṣakam || 227 ||
[Analyze grammar]

tato rājñi parāvṛtte nirāśāṃ tāṃ nṛpātmajām |
dehatyāgonmukhīmetya jñānī ko 'pyabravīdidam || 228 ||
[Analyze grammar]

nāriṣṭaśaṅkā kartavyā sa hi te vartate patiḥ |
yukto divyena bhogena tvāmupaiṣyati cācirāt || 229 ||
[Analyze grammar]

tacchrutvā rājaputrī sā dhārayāmāsa jīvitam |
hṛdi praviṣṭayā ruddhaṃ tatpratyāgamavāñchayā || 230 ||
[Analyze grammar]

vidūṣakasyāpi tatastiṣṭhatastatra tāṃ priyām |
bhadrāṃ yageśvarī nāma sakhī kācidupāyayau || 231 ||
[Analyze grammar]

upetya sā rahasyenāmidaṃ bhadrāmathābravīt |
sakhi mānuṣasaṃsargātkruddhā vidyādharāstvayi || 232 ||
[Analyze grammar]

pāpaṃ ca te cikīrṣanti tadito gamyatāṃ tvayā |
asti pūrvāmbudheḥ pāre puraṃ kārkoṭakābhidham || 233 ||
[Analyze grammar]

tadatikramya ca nadī śītodā nāma pāvanī |
tīrtvā tāmudayākhyaśca siddhakṣetraṃ mahāgiriḥ || 234 ||
[Analyze grammar]

vidyādharairanākramyastatra tvaṃ gaccha sāṃpratam |
priyasya mānuṣasyāsya kṛte cintāṃ ca mā kṛthāḥ || 235 ||
[Analyze grammar]

etaddhi sarvametasya kathayitvā gamiṣyasi |
yenaiṣa paścāt tatraiva sattvavānāgamiṣyati || 236 ||
[Analyze grammar]

ityuktā sā tayā sakhyā bhadrā bhayavaśīkṛtā |
vidūṣakānuraktāpi pratipede tatheti tat || 237 ||
[Analyze grammar]

uktvā ca tasya tadyuktyā dattvā ca svāṅgulīyakam |
vidūṣakasya rātryantasamaye sā tirodadhe || 238 ||
[Analyze grammar]

vidūṣakasya pūrvasmiñ śūnye devagṛhe sthitam |
kṣaṇād apaśyad ātmānaṃ na bhadrāṃ na ca mandiram || 239 ||
[Analyze grammar]

smaranvidyāprapañcaṃ taṃ paśyaṃścaivāṅgulīyakam |
viṣādavismayāveśavaśaḥ so 'bhūdvidūṣakaḥ || 240 ||
[Analyze grammar]

acintayacca tasyāḥ sa vacaḥ svapnamiva smaran |
gatā tāvannivedyaiva sā mamodayaparvatam || 241 ||
[Analyze grammar]

tanmayāpyāśu tatraiva gantavyaṃ tadavāptaye |
na caivaṃ lokadṛṣṭaṃ māṃ labdhvā rājā parityajet || 242 ||
[Analyze grammar]

tasmādyuktiṃ karomīha kāryaṃ siddhyati me yathā |
iti saṃcintya matimānrūpamanyatsa śiśriye || 243 ||
[Analyze grammar]

jīrṇavāsā rajolipto bhūtvā devīgṛhāttataḥ |
niragādatha hā bhadre hā bhadre iti sa bruvan || 244 ||
[Analyze grammar]

tatkṣaṇaṃ ca vilokyainaṃ janāstaddeśavartinaḥ |
so 'yaṃ vidūṣakaḥ prāpta iti kolāhalaṃ vyadhuḥ || 245 ||
[Analyze grammar]

buddhvā ca rājñā nirgatya svayaṃ dṛṣṭvā tathāvidhaḥ |
unmattaceṣṭo 'vaṣṭabhya sa nīto 'bhūtsvamandiram || 246 ||
[Analyze grammar]

tatra snehākulairyadyadukto 'bhūdbhṛtyabāndhavaiḥ |
tatra tatra sa hā bhadre iti pratyuttaraṃ dadau || 247 ||
[Analyze grammar]

vaidyopadiṣṭair abhyaṅgair abhyakto 'pi sa tatkṣaṇam |
aṅgamuddhūlayāmāsa bhūriṇā bhasmareṇunā || 248 ||
[Analyze grammar]

snehena rājaputryā ca svahastābhyāmupāhṛtaḥ |
āhārastena sahasā pādenāhatya cikṣipe || 249 ||
[Analyze grammar]

evaṃ sa tasthau katiciddivasāṃstatra niḥspṛhaḥ |
pāṭayannijavastrāṇi kṛtonmādo vidūṣakaḥ || 250 ||
[Analyze grammar]

aśakyapratikāro 'yaṃ tat kimarthaṃ kadarthyate |
tyajet kadācana prāṇān brahmahatyā bhavet tataḥ || 251 ||
[Analyze grammar]

svacchandacāriṇastvasya kālena kuśalaṃ bhavet |
ityālocya sa cādityaseno rājā mumoca tam || 252 ||
[Analyze grammar]

tataḥ svacchandacārī sannanyedyuḥ sāṅgulīyakaḥ |
vīro bhadrāṃ prati svairaṃ sa pratasthe vidūṣakaḥ || 253 ||
[Analyze grammar]

gacchann ahar ahaḥ prācyāṃ diśi prāpa sa ca kramāt |
madhye mārgavaśāyātaṃ nagaraṃ pauṇḍravardhanam || 254 ||
[Analyze grammar]

mātaratra vasāmyekāṃ rātrimityabhidhāya saḥ |
brāhmaṇyāstatra kasyāścidvṛddhāyāḥ prāviśadgṛham || 255 ||
[Analyze grammar]

pratipannāśrayā sā ca kṛtātithyā kṣaṇāntare |
brāhmaṇī samupetyaivaṃ sāntarduḥkhā jagāda tam || 256 ||
[Analyze grammar]

tubhyameva mayā dattaṃ putra sarvamidaṃ gṛham |
tadgṛhāṇa yato nāsti jīvitaṃ mama sāṃpratam || 257 ||
[Analyze grammar]

kasmādevaṃ bravīṣīti tenoktā vismitena sā |
śrūyatāṃ kathayāmyetadityuktvā punarabravīt || 258 ||
[Analyze grammar]

astīha devasenākhyo nagare putra bhūpatiḥ |
tasya caikā samutpannā kanyā bhūtalabhūṣaṇam || 259 ||
[Analyze grammar]

mayā duḥkhena labdheyam iti tāṃ duḥkhalabdhikām |
nāmnā cakāraiṣa nṛpastanayāmativatsalaḥ || 260 ||
[Analyze grammar]

kālena yauvanārūḍhāmānītāya svaveśmani |
rājñe kacchapanāthāya tāṃ prādāccaiṣa bhūpatiḥ || 261 ||
[Analyze grammar]

sa kacchapeśvarastasyā vadhvā vāsagṛhaṃ niśi |
praviṣṭa eva prathamaṃ tatkālaṃ pañcatāṃ yayau || 262 ||
[Analyze grammar]

tato vimanasā rājñā bhūyopyetena sā sutā |
dattānyasmai nṛpāyābhūtso 'pi tadvadvyapadyata || 263 ||
[Analyze grammar]

tadbhayācca yadānye 'pi nṛpāvāñchanti naiva tām |
tadā senāpatiṃ rājā nijamevaṃ samādiśat || 264 ||
[Analyze grammar]

ito deśāt tvayaikaikaḥ kramād ekaikato gṛhāt |
putrān praty aham āneyo brāhmaṇaḥ kṣatriyo 'thavā || 265 ||
[Analyze grammar]

ānīya ca praveśyo 'tra rātrau matputrikāgṛhe |
paśyāmo 'tra vipadyante kiyanto 'tra kiyacciram || 266 ||
[Analyze grammar]

uttariṣyati yaścātra so 'syā bhartā bhaviṣyati |
gatiḥ śakyā paricchetuṃ nahyadbhutavidhervidheḥ || 267 ||
[Analyze grammar]

iti senāpatī rājñā samāviṣṭo dine dine |
vārakrameṇa gehebhyo nayatyeva narāniha || 268 ||
[Analyze grammar]

evaṃ ca tatra yātāni kṣayaṃ naraśatānyapi |
mama cākṛtapuṇyāyā ekaḥ putro 'tra vartate || 269 ||
[Analyze grammar]

tasya vāro 'dya saṃprāptastatra gantuṃ vipattaye |
tadabhāve mayā kāryaṃ prātaragnipraveśanam || 270 ||
[Analyze grammar]

tajjīvantī svahastena tubhyaṃ guṇavate gṛham |
dadāmi sarvaṃ yena syāṃ na punarduḥkhabhāginī || 271 ||
[Analyze grammar]

evamuktavatīṃ dhīrastāmavocadvidūṣakaḥ |
yadyevamamba tarhi tvaṃ mā sma viklavatāṃ kṛthāḥ || 272 ||
[Analyze grammar]

ahaṃ tatrādya gacchāmi jīvatvekasutastava |
kimetaṃ ghātayāmīti kṛpā te mayi mā ca bhūt || 273 ||
[Analyze grammar]

siddhiyogāddhi nāstyeva bhayaṃ tatra gatasya me |
evaṃ vidūṣakeṇoktā brāhmaṇī sā jagāda tam || 274 ||
[Analyze grammar]

tarhi puṇyairmayāyātaḥ ko'pi devo bhavāniha |
tatprāṇāndehi naḥ putra kuśalaṃ ca tathātmani || 275 ||
[Analyze grammar]

evaṃ tayā so 'nugataḥ sāyaṃ rājasutāgṛham |
senāpatiniyuktena kiṃkareṇa samaṃ yayau || 276 ||
[Analyze grammar]

tatrāpaśyannṛpasutāṃ tāṃ yauvanamadoddhatām |
latāmanuccitasphītapuṣpabhārānatām iva || 277 ||
[Analyze grammar]

tato niśāyāṃ śayane rājaputryā tayāśrite |
dhyātopanatamāgneyaṃ khaḍgaṃ vibhratkareṇa saḥ || 278 ||
[Analyze grammar]

vāsaveśmani tatrāsīj jāgrad eva vidūṣakaḥ |
paśyāmi tāvat ko hanti narānatreti cintayan || 279 ||
[Analyze grammar]

prasupte ca jane kṣiprādapāvṛtakapāṭakam |
sa dvāradeśād āyāntaṃ ghoraṃ rākṣasamaikṣata || 280 ||
[Analyze grammar]

sa ca dvāri sthitastatra rākṣaso vāsakāntare |
bhujaṃ naraśatākāṇḍayamadaṇḍaṃ nyaveśayat || 281 ||
[Analyze grammar]

vidūṣakaśca ciccheda dhāvitvā tasya taṃ krudhā |
ekakhaḍgaprahāreṇa bāhuṃ sapadi rakṣasaḥ || 282 ||
[Analyze grammar]

chinnabāhuḥ palāyyāśu jagāma sa niśācaraḥ |
bhūyo 'nāgamanāyaiva tatsattvotkarṣabhītitaḥ || 283 ||
[Analyze grammar]

prabuddhā vīkṣya patitaṃ rakṣobāhuṃ nṛpātmajā |
bhītā ca jātaharṣā ca vismitā ca babhūva sā || 284 ||
[Analyze grammar]

prātaśca dadṛśe rājñā devasenena tatra saḥ |
svasutāntaḥpuradvāri sthitaśchinnacyuto bhujaḥ || 285 ||
[Analyze grammar]

itaḥprabhṛti nehānyaiḥ praveṣṭavyaṃ narairiti |
datto vidūṣakeṇeva sudīrghaḥ parighārgalaḥ || 286 ||
[Analyze grammar]

tato divyaprabhāvāya tasmai prītaḥ sa pārthivaḥ |
vidūṣakāya tanayāṃ tāṃ dadau vibhavottaram || 287 ||
[Analyze grammar]

tatastayā samaṃ tatra kāntayā sa vidūṣakaḥ |
tasthau dināni katicidrūpavatyeva saṃpadā || 288 ||
[Analyze grammar]

ekasmiṃśca dine suptāṃ rājaputrīṃ vihāya tām |
sa tataḥ prayayau rātrau tāṃ bhadrāṃ prati satvaraḥ || 289 ||
[Analyze grammar]

rājaputrī ca sā prātastadadarśanaduḥkhitā |
āsīdāśvāsitā pitrā tatpratyāvartanāśayā || 290 ||
[Analyze grammar]

so 'pi gacchannaharahaḥ kramātprāpta vidūṣakaḥ |
pūrvāmbudheradūrasthāṃ nagarīṃ tāmraliptikām || 291 ||
[Analyze grammar]

tatra cakre sa kenāpi vaṇijā saha saṃgatim |
skandadāsābhidhānena pāramabdheryiyāsatā || 292 ||
[Analyze grammar]

tenaiva saha so 'nalpatadīyadhanasaṃbhṛtam |
yānapātraṃ samāruhya pratasthe 'mbudhivartmanā || 293 ||
[Analyze grammar]

tataḥ samudramadhye tadyānapātramupāgatam |
akasmādabhavadruddhaṃ vyāsaktamiva kenacit || 294 ||
[Analyze grammar]

arcite 'pyarṇave ratnairyadā na vicacāla tat |
tadā sa vaṇigārtaḥ saskandadāso 'bravīdidam || 295 ||
[Analyze grammar]

yo mocayati saṃruddhamidaṃ pravahaṇaṃ mama |
tasmai nijadhanārdhaṃ ca svasutāṃ ca dadāmyaham || 296 ||
[Analyze grammar]

tacchrutvaiva jagādaivaṃ dhīracetā vidūṣakaḥ |
ahamatrāvatīryāntarvicinomyambudherjalam || 297 ||
[Analyze grammar]

kṣaṇācca mocayāmyetadbaddhaṃ pravahaṇaṃ tava |
yūyaṃ cāpyavalambadhvaṃ baddhvā māṃ pāśurajjubhiḥ || 298 ||
[Analyze grammar]

vimukte ca pravahaṇe tatkṣaṇaṃ vārimadhyataḥ |
uddhartavyo 'smi yuṣmābhiravalambanarajjubhiḥ || 299 ||
[Analyze grammar]

tatheti tena vaṇijā tadvacasyabhinandite |
babandhuḥ karṇadhārāstaṃ rajjubandhena kakṣayoḥ || 300 ||
[Analyze grammar]

tadbaddho 'vatatāraiva vāridhau sa vidūṣakaḥ |
na jātvavasare prāpte sattvavānavasīdati || 301 ||
[Analyze grammar]

dhyātopasthitamāgneyaṃ khaḍgaṃ kṛtvā ca taṃ kare |
vīraḥ pravahaṇasyādho madhyevāri viveśa saḥ || 302 ||
[Analyze grammar]

tatra caikaṃ mahākāyaṃ suptaṃ puruṣamaikṣata |
jaṅghāyāṃ tasya ruddhaṃ ca yānapātraṃ vyalokayat || 303 ||
[Analyze grammar]

ciccheda tāṃ sa jaṅghāṃ ca tasya khaḍgena tatkṣaṇam |
cacāla ca pravahaṇaṃ rodhamuktaṃ tadaiva tat || 304 ||
[Analyze grammar]

taddṛṣṭvaiva vaṇikpāpaśchedayāmāsa tasya tat |
vidūṣakasya rajjūstāḥ pratipannārthalobhataḥ || 305 ||
[Analyze grammar]

vṛttenaiva ca muktena drutaṃ pravahaṇena saḥ |
svalobhasyeva mahataḥ pāramambunidheryayau || 306 ||
[Analyze grammar]

vidūṣako 'pi sa cchinnarajjvālambo 'mbumadhyagaḥ |
unmajjya tattathā dṛṣṭvā dhīraḥ kṣaṇamacintayat || 307 ||
[Analyze grammar]

kimidaṃ vaṇijā tena kṛtaṃ kimathavocyate |
kṛtaghnā dhanalobhāndhā nopakārekṣaṇakṣamāḥ || 308 ||
[Analyze grammar]

tadeṣa kālaḥ sutarāmavaiklavyasya sāṃpratam |
nahi sattvāvasādena svalpā vyāpadvilaṅghyate || 309 ||
[Analyze grammar]

iti saṃcintya tatkālaṃ jaṅghāṃ tāmāruroha saḥ |
yā sāntarjalasuptasya puṃsastasya nyakṛtyata || 310 ||
[Analyze grammar]

tayā tatāra nāveva hastavyastāmburambudhim |
daivameva hi sāhāyyaṃ kurute sattvaśālinām || 311 ||
[Analyze grammar]

taṃ mārutimivāmbhodhipāraṃ rāmārthamāgatam |
balavantamuvācaivamantarikṣātsarasvatī || 312 ||
[Analyze grammar]

sādhu sādhu susattvo 'sti ko 'nyastvatto vidūṣaka |
anena tava dhairyeṇa tuṣṭo 'smi tadidaṃ śṛṇu || 313 ||
[Analyze grammar]

prāpto 'si nagnaviṣayamimaṃ saṃpratyato 'pi ca |
kārkoṭakākhyaṃ nagaraṃ dinaiḥ prāpsyasi saptabhiḥ || 314 ||
[Analyze grammar]

tato labdhadhṛtirgatvā śīghraṃ prāpsyasi cepsitam |
ahaṃ cārādhipaḥ pūrvaṃ bhavatā havyakavyabhuk || 315 ||
[Analyze grammar]

madvarācca tavedānīṃ kṣuttṛṣṇā ca na vartsyati |
tadgaccha siddhyai visrabdhamityuktvā virarāma vāk || 316 ||
[Analyze grammar]

vidūṣakaśca tacchrutvā praṇayāgniṃ praharṣitaḥ |
pratasthe saptame cāhni prāpa kārkoṭakaṃ puram || 317 ||
[Analyze grammar]

tatra ca praviveśaikaṃ maṭhamāryairadhiṣṭhitam |
nānādeśodbhavaistaistairdvijairabhyāgatapriyaiḥ || 318 ||
[Analyze grammar]

śrīmatā nirmitaṃ rājñā tatratyenāryavarmaṇā |
ṛddhaṃ samagrasauvarṇahṛdyadevakulānvitam || 319 ||
[Analyze grammar]

tatra sarvaiḥ kṛtātithyamekastaṃ brāhmaṇo 'tithim |
snānena bhojanairvastrairnītvā gṛhamupācarat || 320 ||
[Analyze grammar]

sāyaṃ ca tanmaṭhasthaḥ san pure śuśrāva tatra saḥ |
vidūṣakaḥ sapaṭahaṃ ghoṣyamāṇam idaṃ vacaḥ || 321 ||
[Analyze grammar]

brāhmaṇaḥ kṣatriyo vāpi pariṇetuṃ nṛpātmajām |
prātaricchati yaḥ so 'dya rātrau vasatu tadgṛhe || 322 ||
[Analyze grammar]

tacchrutvā sanimittaṃ sa tadāśaṅkya ca tatkṣaṇam |
gantuṃ rājasutāvāsamiyeṣa priyasāhasaḥ || 323 ||
[Analyze grammar]

ūcustaṃ maṭhaviprāste brahmanmā sāhasaṃ kṛthāḥ |
tanna rājasutāsadma tanmṛtyorvivṛtaṃ mukham || 324 ||
[Analyze grammar]

yo hi tatra praviśati kṣapāyāṃ na sa jīvati |
gatāḥ subahavaścaivamatra sāhasikāḥ kṣayam || 325 ||
[Analyze grammar]

ityukto 'pi sa tair viprair anaṅgīkṛtatadvacāḥ |
vidūṣako rājagṛhaṃ yayau tatkiṃkaraiḥ saha || 326 ||
[Analyze grammar]

tatrāryavarmaṇā rājñā svayaṃ dṛṣṭvābhinanditaḥ |
viveśa tatsutāvāsaṃ naktamarka ivānalam || 327 ||
[Analyze grammar]

dadarśa rājakanyāṃ ca tāmākṛtyānurāgiṇīm |
nairāśyaduḥkhavidhuraṃ paśyantīṃ sāsrayā dṛśā || 328 ||
[Analyze grammar]

āsīcca jāgradevātra sa rātrāvavalokayan |
kare kṛpāṇamāgneyaṃ cintitopanataṃ dadhat || 329 ||
[Analyze grammar]

akasmācca mahāghoraṃ dadarśa dvāri rākṣasam |
chinnadakṣiṇabāhutvātprasāritabhujāntaram || 330 ||
[Analyze grammar]

dṛṣṭvā vyacintayac cāsau hanta so 'yaṃ niśācaraḥ |
yasya bāhur mayā chinno nagare pauṇḍravardhane || 331 ||
[Analyze grammar]

tadadya na punarbāhau prahariṣyāmyasau hi me |
palāyya pūrvavadgacchettasmātsādhu nihanmyamum || 332 ||
[Analyze grammar]

ityālocya pradhāvyaiva keśeṣvākṛṣya tasya saḥ |
rākṣasasya śiraśchettuṃ samārebhe vidūṣakaḥ || 333 ||
[Analyze grammar]

tatkṣaṇaṃ bhītabhītaśca tamuvāca sa rākṣasaḥ |
mā māṃ vadhīḥ susattvastvaṃ tatkuruṣva kṛpāmiti || 334 ||
[Analyze grammar]

kiṃnāma tvaṃ ca keyaṃ ca tava ceṣṭeti tena saḥ |
muktvā pṛṣṭaśca vīreṇa punarāha sa rākṣasaḥ || 335 ||
[Analyze grammar]

yamadaṃṣṭrābhidhānasya mamābhūtāṃ sute ime |
iyam ekā tathānyā ca pauṇḍravardhanavartinī || 336 ||
[Analyze grammar]

avīrapuruṣāsaṅgādrakṣaṇīye nṛpātmaje |
śaṃkarājñāprasādo hi mamābhūdayamīdṛśaḥ || 337 ||
[Analyze grammar]

tatrādau bāhur ekena chinno me pauṇḍravardhane |
tvayā cādya jito 'smīha tat samāptam idaṃ mama || 338 ||
[Analyze grammar]

tac chrutvā sa vihasyainaṃ pratyuvāca vidūṣakaḥ |
mayaiva sa bhujas tatra lūnaste pauṇḍravardhane || 339 ||
[Analyze grammar]

rākṣaso 'pyavadattarhi devāṃśastvaṃ na mānuṣaḥ |
manye tvadarthamevābhūccharvājñānugrahaḥ sa me || 340 ||
[Analyze grammar]

tadidānīṃ suhṛnme tvaṃ yadā māṃ ca smariṣyasi |
tadāhaṃ saṃnidhāsye te siddhaye saṃkaṭeṣvapi || 341 ||
[Analyze grammar]

evaṃ sa rākṣaso maitryā varayitvā vidūṣakam |
tenābhinanditavacā yamadaṃṣṭrastirodadhe || 342 ||
[Analyze grammar]

vidūṣako 'pi sānandamabhinanditavikramaḥ |
rājaputryā tayā tatra hṛṣṭastāmanayanniśām || 343 ||
[Analyze grammar]

prātaśca jñātavṛttāntastuṣṭastasmai dadau nṛpaḥ |
vibhavaiḥ saha śauryaikapatākāmiva tāṃ sutām || 344 ||
[Analyze grammar]

sa tayā saha tatrāsīdrātrīḥ kāścidvidūṣakaḥ |
padātpadamamuñcantyā lakṣmyeva guṇabaddhayā || 345 ||
[Analyze grammar]

ekadā ca niśi svairaṃ tataḥ prāyātpriyotsukaḥ |
labdhadivyarasāsvādaḥ ko hi rajyedrasāntare || 346 ||
[Analyze grammar]

nagarācca vinirgatya sa taṃ sasmāra rākṣasam |
smṛtamātrāgataṃ taṃ ca jagāda racitānatim || 347 ||
[Analyze grammar]

siddhakṣetre prayātavyamudayādrau mayā sakhe |
bhadrāvidyādharīhetoratastvaṃ tatra māṃ naya || 348 ||
[Analyze grammar]

tathetuktavatastasya skandhamāruhya rakṣasaḥ |
yayau ca sa tayā rātryā durgamāṃ ṣaṣṭiyojanīm || 349 ||
[Analyze grammar]

prātaśca tīrtvā śītodāmalaṅghyāṃ mānuṣairnadīm |
udayādreratha prāpatsaṃnikarṣamayatnataḥ || 350 ||
[Analyze grammar]

ayaṃ sa parvataḥ śrīmānudayākhyaḥ purastava |
atropari ca nāstyeva siddhadhāmni gatirmama || 351 ||
[Analyze grammar]

ity uktvā rākṣase tasmin prāptānujñe tirohite |
dīrghikāṃ sa dadarśaikāṃ ramyāṃ tatra vidūṣakaḥ || 352 ||
[Analyze grammar]

vadantyāḥ svāgatamiva bhramadbhramaraguñjitaiḥ |
tasyās tīre nyaṣīdac ca phullapadmānanaśriyaḥ || 353 ||
[Analyze grammar]

strīṇāmivātra cāpaśyatpadapaṅktiṃ suvistarām |
ayaṃ priyāgame mārgastaveti bruvatīmiva || 354 ||
[Analyze grammar]

alaṅghyo 'yaṃ girirmartyaistadihaiva varaṃ kṣaṇam |
sthito bhavāmi paśyāmi kasyeyaṃ padapaddhatiḥ || 355 ||
[Analyze grammar]

iti cintayatastasya tatra toyārthamāyayuḥ |
gṛhītakāñcanaghaṭā bhavyāḥ subahavaḥ striyaḥ || 356 ||
[Analyze grammar]

vāripūritakumbhāśca tāḥ sa papraccha yoṣitaḥ |
kasyedaṃ nīyate toyamiti praṇayapeśalam || 357 ||
[Analyze grammar]

āste cidyādharī bhadra bhadrānāmātra parvate |
idaṃ snānodakaṃ tasyā iti tāśca tamabruvan || 358 ||
[Analyze grammar]

citraṃ dhātaiva dhīrāṇāmārabdhoddāmakarmaṇām |
parituṣyeva sāmagrīṃ ghaṭayatyupayoginīm || 359 ||
[Analyze grammar]

yadekā sahasaiva strī tāsāṃ madhyāduvāca tam |
mahābhāga mama skandhe kumbha utkṣipyatāmiti || 360 ||
[Analyze grammar]

tatheti ca ghaṭe tasyāḥ skandhotkṣipte sa buddhimān |
nidadhe bhadrayā pūrvaṃ dattaṃ ratnāṅgulīyakam || 361 ||
[Analyze grammar]

upāviśacca tatraiva sa punardīrghikātaṭe |
tāśca tajjalamādāya yayurbhadrāgṛhaṃ striyaḥ || 362 ||
[Analyze grammar]

tatra tābhiśca bhadrāyā yāvatsnānāmbu dīyate |
tāvattasyāstadutsaṅge nipapātāṅgulīyakam || 363 ||
[Analyze grammar]

taddṛṣṭvā pratyabhijñāya bhadrā papraccha tāḥ sakhīḥ |
dṛṣṭaḥ kiṃ ko'pi yuṣmābhirihāpūrvaḥ pumāniti || 364 ||
[Analyze grammar]

dṛṣṭa eko yuvāsmābhirmānuṣo vāpikātaṭe |
tenotkṣipto ghaṭaścāyamiti pratyabruvaṃśca tāḥ || 365 ||
[Analyze grammar]

tato bhadrābravīcchīghraṃ prakḷptasnānamaṇḍanam |
ihānayata gatvā taṃ sa hi bhartā mamāgataḥ || 366 ||
[Analyze grammar]

ityukte bhadrayā gatvā yathavastu nivedya ca |
snātaśca tadvayasyābhistatrāninye vidūṣakaḥ || 367 ||
[Analyze grammar]

prāptaśca sa dadarśātra bhadrāṃ mārgonmukhīṃ cirāt |
nijasattvataroḥ sākṣātpakvāmiva phalaśriyam || 368 ||
[Analyze grammar]

sāpi dṛṣṭvā tamutthāya harṣabāṣpāmbusīkaraiḥ |
dattārgheva babandhāsya kaṇṭhe bhujalatāsrajam || 369 ||
[Analyze grammar]

parasparāliṅgitayostayoḥ svedacchalādiva |
atipīḍanataḥ snehaḥ sasyande cirasaṃbhṛtaḥ || 370 ||
[Analyze grammar]

athopaviṣṭāv anyonyam avitṛptau vilokane |
ubhau śataguṇībhūtām ivotkaṇṭhām udūhatuḥ || 371 ||
[Analyze grammar]

āgato 'si kathaṃ bhūmimimāmiti ca bhadrayā |
paripṛṣṭaḥ sa tatkālamuvācedaṃ vidūṣakaḥ || 372 ||
[Analyze grammar]

samālambya bhavetsnehamāruhya prāṇasaṃśayān |
subahūnāgato 'smīha kimanyadvacmi sundari || 373 ||
[Analyze grammar]

tacchrutvā tasya dṛṣṭvā tāmanapekṣitajīvitām |
prītiṃ kāṣṭhāgatasnehā sā bhadrā tamabhāṣata || 374 ||
[Analyze grammar]

āryaputra na me kāryaṃ sakhibhirna ca siddhibhiḥ |
tvaṃ me prāṇā guṇakrītā dāsī cāhaṃ tava prabho || 375 ||
[Analyze grammar]

vidūṣakastato 'vādīttarhyāgaccha mayā saha |
muktvā divyamimaṃ bhogaṃ vastumujjayinīṃ priye || 376 ||
[Analyze grammar]

tatheti pratipede sā bhadrā sapadi tadvacaḥ |
tatsaṃkalpaparibhraṣṭā vidyāśca tṛṇavajjahau || 377 ||
[Analyze grammar]

tatastayā samaṃ tatra sa viśaśrāma tāṃ niśām |
kḷptopacāras tatsakhyā yogeśvaryā vidūṣakaḥ || 378 ||
[Analyze grammar]

prātaśca bhadrayā sākamavatīryodayādritaḥ |
sasmāra yamadaṃṣṭraṃ taṃ rākṣasaṃ sa punaḥ kṛtī || 379 ||
[Analyze grammar]

smṛtamātrāgatasyoktvā gantavyādhvakramaṃ nijam |
tasyāruroha sa skandhe bhadrāmāropya tāṃ puraḥ || 380 ||
[Analyze grammar]

sāpi sehe tadatyugrarākṣasāṃsādhirohaṇam |
anurāgaparāyattāḥ kurvate kiṃ na yoṣitaḥ || 381 ||
[Analyze grammar]

rakṣodhirūḍhaśca tataḥ sa pratasthe priyāsakhaḥ |
vidūṣakaḥ punaḥ prāpa tacca kārkoṭakaṃ puram || 382 ||
[Analyze grammar]

rakṣodarśanasatrāsaṃ tatra cālokito janaiḥ |
dṛṣṭvāryavarmanṛpatiṃ svāṃ bhāryāṃ mārgati sma saḥ || 383 ||
[Analyze grammar]

dattāṃ tena gṛhītvā ca tatsutāṃ tāṃ bhujarjitām |
tathaiva rākṣasārūḍhaḥ sa pratasthe purāttataḥ || 384 ||
[Analyze grammar]

gatvāmbudhestaṭe prāpa pāpaṃ taṃ vaṇijaṃ ca saḥ |
yenāsya vāridhau pūrvaṃ chinnāḥ kṣiptasya rajjavaḥ || 385 ||
[Analyze grammar]

jahāra tasya ca sutāṃ vaṇijaḥ sa dhanaiḥ saha |
prāgambudhau pravahaṇapramocanapaṇārjitām || 386 ||
[Analyze grammar]

dhanāpahāramevāsya vadhaṃ mene ca pāpmanaḥ |
kadaryāṇāṃ pure prāṇāḥ prāyeṇa hyarthasaṃcayāḥ || 387 ||
[Analyze grammar]

tato rakṣorathārūḍhastāmānīya vaṇiksutām |
sa bhadrārājaputrībhyāṃ sahaivodapatannabhaḥ || 388 ||
[Analyze grammar]

darśayannijakāntānāṃ dyumārgeṇa tatāra ca |
vilasatsattvasaṃrambhaṃ svapauruṣamivāmbudhim || 389 ||
[Analyze grammar]

prāpa tac ca sa bhūyo 'pi nagaraṃ pauṇḍravardhanam |
dṛṣṭaḥ savismayaṃ sarvair vāhanīkṛtarākṣasaḥ || 390 ||
[Analyze grammar]

tatra tāṃ devasenasya sutāṃ rājñaścirotsukām |
bhāryāṃ saṃbhāvayāmāsa rākṣasāvajayārjitām || 391 ||
[Analyze grammar]

rudhyamāno 'pi tatpitrā sa svadeśasamutsukaḥ |
gṛhītvā tāmapi tataḥ prāyādujjayinīṃ prati || 392 ||
[Analyze grammar]

acireṇa ca tāṃ prāpa purīṃ rākṣasayogataḥ |
bahirgatāmivātmīyadeśadarśananirvṛtim || 393 ||
[Analyze grammar]

athopari sthitastasya mahākāyasya rakṣasaḥ |
aṃsasthatadvadhūcakrakāntiprakaṭitātmanaḥ || 394 ||
[Analyze grammar]

sa janairdadṛśe tatra śikhare jvalitauṣadhau |
śaśāṅka iva pūrvādrerudayastho vidūṣakaḥ || 395 ||
[Analyze grammar]

tato vismitavitraste jane buddhvātra bhūpatiḥ |
ādityaseno niragācchvaśuro 'sya tadā puraḥ || 396 ||
[Analyze grammar]

vidūṣakastu dṛṣṭvā tamavatīryāśu rākṣasāt |
praṇamya nṛpamabhyāgānnṛpo 'pyabhinananda tam || 397 ||
[Analyze grammar]

avatāryaiva tatskandhāttāḥ svabhāryāstato 'khilāḥ |
mumoca kāmacārāya rākṣasaṃ sa vidūṣakaḥ || 398 ||
[Analyze grammar]

gate ca rākṣase tasmin sa tena saha bhūbhujā |
śvaśureṇa sabhāryaḥ san prāviśad rājamandiram || 399 ||
[Analyze grammar]

tatra tāṃ prathamāṃ bhāryāṃ tanayāṃ tasya bhūpateḥ |
ānandayadupāgatya cirotkaṇṭhāvaśīkṛtām || 400 ||
[Analyze grammar]

kathametāstvayā bhāryāḥ prāptāḥ kaścaiṣa rākṣasaḥ |
iti pṛṣṭaḥ sa rājñātra sarvamasmai śaśaṃsa tat || 401 ||
[Analyze grammar]

tataḥ prabhāvatuṣṭena tena tasya mahībhṛtā |
jāmāturnijarājyārdhaṃ pradattaṃ kāryavedinā || 402 ||
[Analyze grammar]

tatkṣaṇācca sa rājābhūdvipro bhūtvā vidūṣakaḥ |
samucchritasitacchattro vidhūtobhayacāmaraḥ || 403 ||
[Analyze grammar]

tadā ca maṅgalātodyavādyanirhrādanirbharā |
praharṣamuktanādeva rarājojjayinī purī || 404 ||
[Analyze grammar]

ityāptarājyavibhavaḥ kramaśaḥ sa kṛtsnāṃ jitvā mahīmakhilarājakapūjitāṅghriḥ |
tābhiḥ samaṃ vigatamatsaranirvṛtābhir bhadrāsakhaściramaraṃsta nijapriyābhiḥ || 405 ||
[Analyze grammar]

ityanukūle daive bhajati nijaṃ sattvam eva dhīrāṇām |
lakṣmīrabhasākarṣaṇasiddhamahāmodamantratvam || 406 ||
[Analyze grammar]

itthaṃ śrutvā vatsarājasya vaktrāc citrām etām adbhutārthāṃ kathāṃ te |
pāśvāsīnā mantriṇaś cāsya sarve devyau cāpi prītimagryāmavāpuḥ || 407 ||
[Analyze grammar]