Chapter 3

tato vatseśvaro 'nyedyuḥ saha vāsavadattayā |
padmāvatyā ca saṃsaktapānalīlo viviktagaḥ || 1 ||
[Analyze grammar]

sagopālakamānīya sarumaṇvadvasantakam |
yaugandharāyaṇaṃ tāśca cakre visrambhiṇīḥ kathāḥ || 2 ||
[Analyze grammar]

tatra svavirahodghātaprasaṅge ca mahīpatiḥ |
sarveṣu teṣu śṛṇvatsu kathāmetāmavarṇayat || 3 ||
[Analyze grammar]

āsītpurūravā nāma rajā paramavaiṣṇavaḥ |
abhudbhuvīva nāke 'pi yasyāpratihatā gatiḥ || 4 ||
[Analyze grammar]

bhramantaṃ nandane jātu taṃ dadarśa kilāpsarāḥ |
urvaśī nāma kāmasya mohanāstramivāparam || 5 ||
[Analyze grammar]

dṛṣṭamātreṇa tenābhūtsā tathā hṛtacetanā |
yathā sabhayarambhādisakhīcetāṃsyakampayat || 6 ||
[Analyze grammar]

so 'pi tāṃ vīkṣya lāvaṇyarasanirjhariṇīṃ nṛpaḥ |
yanna prāpa pariṣvaṅgaṃ tṛṣākrānto mumūrccha tat || 7 ||
[Analyze grammar]

athādideśa sarvajño hariḥ kṣīrāmbudhisthitaḥ |
nāradākhyaṃ munivaraṃ darśanārthamupāgatam || 8 ||
[Analyze grammar]

devarṣe nandanodyānavartī rājā purūravāḥ |
urvaśīhṛtacittaḥ sansthito virahaniḥsahaḥ || 9 ||
[Analyze grammar]

tadgatvā mama vākyena bodhayitvā śatakratum |
dāpaya tvaritaṃ tasmai rājñe tāmurvaśīṃ mune || 10 ||
[Analyze grammar]

ityādiṣṭaḥ sa hariṇā tathetyāgatya nāradaḥ |
prabodhya taṃ tathābhūtaṃ purūravasamabravīt || 11 ||
[Analyze grammar]

uttiṣṭha tvatkṛte rājan prahito 'smīha viṣṇunā |
sa hi nirvyājabhaktānāṃ naivāpadam upekṣate || 12 ||
[Analyze grammar]

ityuktvāśvāsitenātha sa purūravasā saha |
jagāma devarājasya nikaṭaṃ nārado muniḥ || 13 ||
[Analyze grammar]

harer nirdeśam indrāya nivedya praṇatātmane |
urvaśīṃ dāpayām āsa sa purūravase tataḥ || 14 ||
[Analyze grammar]

tadabhūdurvaśīdānaṃ nirjīvakaraṇaṃ divaḥ |
urvaśyāstu tadevāsīnmṛtasaṃjīvanauṣadham || 15 ||
[Analyze grammar]

athājagāma bhūlokaṃ tāmādāya purūravāḥ |
svarvadhūdarśanāścaryamarpayanmartyacakṣuṣām || 16 ||
[Analyze grammar]

tato 'napāyinau tau dvāvurvaśī ca nṛpaśca saḥ |
anyonyadṛṣṭipāśena nibaddhāviva tasthatuḥ || 17 ||
[Analyze grammar]

ekadā dānavaiḥ sākaṃ prāptayuddhena vajriṇā |
sāhāyakārthamāhūto yayau nākaṃ purūravāḥ || 18 ||
[Analyze grammar]

tatra tasmin hate māyādharanāmnyasurādhipe |
pranṛttasvarvadhūsārthaḥ śakrasyābhavad utsavaḥ || 19 ||
[Analyze grammar]

tataśca rambhāṃ nṛtyantīmācārye tumburau sthite |
calitābhinayāṃ dṛṣṭvā jahāsa sa purūravāḥ || 20 ||
[Analyze grammar]

jāne divyam idaṃ nṛttaṃ kiṃ tvaṃ jānāsi mānuṣa |
iti rambhāṇi tatkālaṃ sāsuyaṃ tam abhāṣata || 21 ||
[Analyze grammar]

jāne 'hamurvaśī saṅgāttadyadvetti na tumburuḥ |
yuṣmadgururapītyenāmuvācātha purūravāḥ || 22 ||
[Analyze grammar]

tacchrutvā tumburuḥ kopāttasmai śāpamathādiśat |
urvaśyā te viyogaḥ syadā kṛṣṇārādhanāditi || 23 ||
[Analyze grammar]

śrutaśāpaśca gatvaiva tamurvaśyai purūravāḥ |
akālāśanipātograṃ svavṛttāntaṃ nyavedayat || 24 ||
[Analyze grammar]

tato 'kasmānnipatyaiva ninye kvāpyapahṛtya sā |
adṛṣṭaistena bhūpena gandharvairurvaśī kila || 25 ||
[Analyze grammar]

avetya śāpadoṣaṃ taṃ so 'tha gatvā purūravāḥ |
harerārādhanaṃ cakre tato badarikāśrame || 26 ||
[Analyze grammar]

urvaśī tu viyogārtā gandharvaviṣayasthitā |
āsīnmṛteva supteva likhiteva vicetanā || 27 ||
[Analyze grammar]

āścaryaṃ yanna sā prāṇaiḥ śāpāntāśāvalambinī |
muktā virahadīrghāsu cakravākīva rātriṣu || 28 ||
[Analyze grammar]

purūravāśca tapasā tenācyutamatoṣayat |
tatprasādena gandharvā mumucustasya corvaśīm || 29 ||
[Analyze grammar]

śāpāntalabdhayā yuktaḥ punar apsarasā tayā |
divyān sa rājā bubhuje bhogān bhūtalavarty api || 30 ||
[Analyze grammar]

ityuktvā virate rājñi śrutorvaśyanurāgayā |
prāpi soḍhaviyogatvādvrīḍā vāsavadattayā || 31 ||
[Analyze grammar]

tāṃ dṛṣṭvā yuktyupālabdhāṃ rājñā devīṃ vilakṣitām |
athāpyāyayituṃ bhūpamāha yaugandharāyaṇaḥ || 32 ||
[Analyze grammar]

na śrutā yadi tad rājan katheyaṃ śrūyatāṃ tvayā |
astīha timirānāma nagarī mandiraṃ śriyaḥ || 33 ||
[Analyze grammar]

tasyāṃ vihitasenākhyaḥ khyātimānabhavannṛpaḥ |
tasya tejovatītyāsīdbhāryā kṣititalāpsarāḥ || 34 ||
[Analyze grammar]

tasyāḥ kaṇṭhagrahaikāgraḥ sa rājā sparśalolubhaḥ |
na sehe kañcukenāpi kṣipramācchuritaṃ vapuḥ || 35 ||
[Analyze grammar]

kadācit tasya rājñaś ca jajñe jīrṇajvarāmayaḥ |
vaidyā nivārayāmāsustayā devyāsya saṃgamam || 36 ||
[Analyze grammar]

devīsaṃparkahīnasya hṛdaye tasya bhūbhṛtaḥ |
auṣadhopakramāsādhyo vyādhiḥ samudapadyata || 37 ||
[Analyze grammar]

bhayācchokābhighātādvā rājño rogaḥ kadācana |
sphuṭed ayam iti smāhur bhiṣajo mantriṇaṃ rahaḥ || 38 ||
[Analyze grammar]

yaḥ purā pṛṣṭhapatite na tatrāsa mahorage |
nāntaḥpurapraviṣṭe 'pi parānīke ca cukṣubhe || 39 ||
[Analyze grammar]

tasyāsya rājño jāyeta bhayaṃ sattvavataḥ katham |
nāstyatropāyabuddhirnaḥ kiṃ kurmastena mantriṇaḥ || 40 ||
[Analyze grammar]

iti saṃcintya saṃmantrya te devyā saha mantriṇaḥ |
tāṃ pracchādya tamūcuśca mṛtā devīti bhūpatim || 41 ||
[Analyze grammar]

tena śokātibhāreṇa mathyamānasya tasya saḥ |
pusphoṭa hṛdayavyādhirvihvalasya mahībhṛtaḥ || 42 ||
[Analyze grammar]

uttirṇarogavipade tasmai rājñe 'tha mantribhiḥ |
arpitā sā mahādevī sukhasaṃpadivāparā || 43 ||
[Analyze grammar]

bahu mene ca so 'pyenāṃ rājā prāṇapradāyinīm |
na punarmatimānasyai cukrodhācchāditātmane || 44 ||
[Analyze grammar]

hitaiṣitā hi yā patyuḥ sā devītvasya kāraṇam |
priyakāritvamātreṇa devīśabdo na labhyate || 45 ||
[Analyze grammar]

sā mantritā ca yadrājyakāryabhāraikacintanam |
cittānuvartanaṃ yattadupajīvakalakṣaṇam || 46 ||
[Analyze grammar]

ato magadharājena saṃdhātuṃ paripanthinā |
pṛthvīvijayahetos te yatno 'smābhiriyaṃ kṛtaḥ || 47 ||
[Analyze grammar]

tena deva bhavadbhaktisoḍhāsahyaviyogayā |
devyā naivāparāddhaṃ te pūrṇā tūpakṛtiḥ kṛtā || 48 ||
[Analyze grammar]

etacchrutyā vacastasya yathārthaṃ mukhyamantriṇaḥ |
mene 'parāddhamātmānaṃ vatsarājastutoṣa ca || 49 ||
[Analyze grammar]

uvāca caitaj jāne 'haṃ devyā yuṣmatprayuktayā |
ākāravatyā nītyeva mama dattaiva medinī || 50 ||
[Analyze grammar]

kiṃ tvatipraṇayādetanmayoktamasamañjasam |
anurāgāndhamanasāṃ vicārasahatā kutaḥ || 51 ||
[Analyze grammar]

ityādibhiḥ samālāpairvatsarājaḥ sa taddinam |
lajjoparāgaṃ devyāśca samamevāpanītavān || 52 ||
[Analyze grammar]

anyedyurmagadheśena preṣito jñānavastunā |
dūto vatseśamabhyetya tadvākyena vyajijñapat || 53 ||
[Analyze grammar]

mantribhiste vayaṃ tāvadvañcitā tattathādhunā |
kuryāḥ śokamayo yena jīvaloko bhavenna naḥ || 54 ||
[Analyze grammar]

etacchrutvātha saṃmānya vatseśaḥ prajighāya tam |
dūtaṃ padmāvatīpārśvaṃ pratisaṃdeśalabdhaye || 55 ||
[Analyze grammar]

sāpi vāsavadattaikanamrā tatsaṃnidhau dadau |
dūtasya darśanaṃ tasya vinayo hi satīvratam || 56 ||
[Analyze grammar]

vyājena putri nītā tvamanyāsaktaśca te patiḥ |
iti śokānmayā labdhaṃ kanyājanakatāphalam || 57 ||
[Analyze grammar]

ityuktapitṛsaṃdeśaṃ dūtaṃ padmāvatī tadā |
jagāda bhadra vijñāpyastāto 'mbā ca girā mama || 58 ||
[Analyze grammar]

kiṃ śokenāryaputro hi paramaṃ sadayo mayi |
devī vāsavadattā ca sasnehā bhaginīva me || 59 ||
[Analyze grammar]

tattātenāryaputrasya bhāvyaṃ naiva vikāriṇā |
nijasatyamivātyājyaṃ madīyaṃ jīvitaṃ yadi || 60 ||
[Analyze grammar]

ityukte pratisaṃdeśe padmāvatyā yathocite |
dūtaṃ vāsavadattā taṃ satkṛtya prāhiṇottataḥ || 61 ||
[Analyze grammar]

dūte pratigate tasminsmarantī pitṛveśmanaḥ |
kiṃcitpadmāvatī tatsthāvutkaṇṭhāvimanā iva || 62 ||
[Analyze grammar]

tatastasya vinodārthamukto vāsavadattayā |
vasantako 'ntikaprāptaḥ kathāmitthamavarṇayat || 63 ||
[Analyze grammar]

asti pāṭaliputrākhyaṃ puraṃ pṛthvīvibhūṣaṇam |
tasmiṃśca dharmaguptākhyo babhūvaiko mahāvaṇik || 64 ||
[Analyze grammar]

tasya candraprabhety āsīd bhāryā sā ca kadācana |
sagarbhābhūt prasūtātha kanyāṃ sarvāṅgasundarīm || 65 ||
[Analyze grammar]

sā kanyā jātamātraiva kāntidyotitavāsakā |
cakre savyaktamālāpamutthāyopaviveśa ca || 66 ||
[Analyze grammar]

tato vismitavitrastaṃ strījanaṃ jātaveśmani |
dṛṣṭvā sa dharmagupto 'tra sabhayaḥ svayamāyayau || 67 ||
[Analyze grammar]

papraccha kanyakāṃ tāṃ ca praṇatastatkṣaṇaṃ rahaḥ |
bhagavatyavatīrṇāsi kā tvaṃ mama gṛheṣviti || 68 ||
[Analyze grammar]

sāpyavādīttvayā naiva deyā kasmaicidapyaham |
gṛhasthitā śubhāhaṃ te pṛṣṭenānyena tāta kim || 69 ||
[Analyze grammar]

ityuktaḥ sa tayā bhīto dharmaguptaḥ svamandire |
guptaṃ tāṃ sthāpayāmāsa mṛteti khyāpitāṃ bahiḥ || 70 ||
[Analyze grammar]

tataḥ somaprabhā nāmnā sā kanyā vavṛdhe kramāt |
mānuṣeṇa śarīreṇa rūpakāntyā tu divyayā || 71 ||
[Analyze grammar]

ekadā tu pramodena madhūtsavavilokinīm |
harmyasthāṃ guhacandrākhyo vaṇikputro dadarśa tām || 72 ||
[Analyze grammar]

sa manobhavabhallyeva sadyo hṛdayalagnayā |
tayā mumūrccheva tadā kṛcchācca gṛhamāyayau || 73 ||
[Analyze grammar]

smarārtividhurastatra pitrorasvāsthyakāraṇam |
nirbandhapṛṣṭo vakti sma svavayasyamukhena saḥ || 74 ||
[Analyze grammar]

tato 'sya guhasenākhyaḥ pitā snehena yācitum |
āṃ kanyāṃ dharmaguptasya vaṇijo bhavanaṃ yayau || 75 ||
[Analyze grammar]

tatra taṃ kṛtayācñaṃ sa guhasenaṃ snuṣārthinam |
kanyā kuto me mūḍheti dharmagupto nirākarot || 76 ||
[Analyze grammar]

nihnutāṃ tena kanyāṃ tāṃ matvā gatvā gṛhe sutam |
dṛṣṭvā smarajvarākrāntaṃ guhaseno vyacintayat || 77 ||
[Analyze grammar]

rājānaṃ prerayāmyatra sa hi me pūrvasevitaḥ |
dāpayatyapi putrāya sa kanyāṃ tāṃ mumūrṣave || 78 ||
[Analyze grammar]

iti niścitya gatvā ca dattvāsmai ratnamuttamam |
nṛpaṃ vijñāpayāmāsa sa vaṇiksvābhikāṅkṣitam || 79 ||
[Analyze grammar]

nṛpo 'pi prītimānasya sāhāyye nagarādhipam |
dadau tena samaṃ cāsau dharmaguptagṛhaṃ yayau || 80 ||
[Analyze grammar]

rurodha ca gṛhaṃ tasya dharmaguptasya tadbalaiḥ |
asubhiḥ kaṇṭhadeśaṃ ca sarvanāśaviśaṅkinaḥ || 81 ||
[Analyze grammar]

tataḥ somaprabhā sā taṃ dharmaguptamabhāṣata |
dehi māṃ tāta mā bhūtte mannimittamupadravaḥ || 82 ||
[Analyze grammar]

āropaṇīyā śayyāyāṃ nāhaṃ bhartrā kadācana |
īdṛktu vācā niyamo grāhyaḥ saṃbandhināṃ tvayā || 83 ||
[Analyze grammar]

ityuktaḥ sa tayā putryā dātuṃ tāṃ patyapadyata |
dharmaguptastadābhāṣya śayyāropaṇavarjanam || 84 ||
[Analyze grammar]

guhaseno 'numene ca sāntarhāsastathaiva tat |
vivāho mama putrasya tāvadatviti cintayan || 85 ||
[Analyze grammar]

athādāya kṛtodvāhāṃ tāṃ sa somaprabhāṃ vadhūm |
guhasenasutaḥ prāyādguhacandro nijaṃ gṛham || 86 ||
[Analyze grammar]

sāyaṃ cainaṃ pitāvādītputra śayyāmimāṃ vadhūm |
āropaya svabhāryā hi kasyāśayyā bhaviṣyati || 87 ||
[Analyze grammar]

tacchrutvā śvaśuraṃ taṃ sā vadhūḥ somaprabhā krudhā |
vilokya bhrāmayāmāsa yamājñāmiva tarjanīm || 88 ||
[Analyze grammar]

tāṃ dṛṣṭaivāṅguliṃ tasyāḥ snuṣāyāstasya tatkṣaṇam |
vaṇijaḥ prayayuḥ prāṇā anyeṣāmāyayau bhayam || 89 ||
[Analyze grammar]

guhacandro 'pi saṃprāpte tasmin pitari pañcatām |
mārī mama gṛhe bhāryā praviṣṭeti vyacintayat || 90 ||
[Analyze grammar]

tataścānupabhuñjāno bhāryāṃ tāṃ gṛhavartinīm |
siṣeve guhacandro 'sāvasidhāramiva vratam || 91 ||
[Analyze grammar]

tadduḥkhadahyamāno 'ntarvirakto bhogasaṃpadi |
brāhmaṇān bhojayām āsa pratyahaṃ sa kṛtavrataḥ || 92 ||
[Analyze grammar]

tadbhāryāpi ca sā tebhyo dvijebhyo maunadhāriṇī |
bhuktavadbhyo dadau nityaṃ dakṣiṇāṃ divyarūpadhṛt || 93 ||
[Analyze grammar]

ekadā brāhmaṇo vṛddhastāmeko bhojanāgataḥ |
dadarśa jagadāścaryajananīṃ rūpasaṃpadā || 94 ||
[Analyze grammar]

sakautuko dvijo 'prākṣīdguhacandraṃ rahastadā |
kā tebhavati bāleyaṃ tvayā me kathyatāmiti || 95 ||
[Analyze grammar]

nirbandhapṛṣṭaḥ so 'pyasmai guhacandro dvijanmane |
śaśaṃsa tadgataṃ sarvaṃ vṛttāntaṃ khinnamānasaḥ || 96 ||
[Analyze grammar]

tadbuddhvā sa tatastasmai sānukampo dvijottamaḥ |
agnerārādhanaṃ mantraṃ dadāvīpsitasiddhaye || 97 ||
[Analyze grammar]

tena mantreṇa tasyātha japaṃ rahasi kurvataḥ |
udabhūdguhacandrasya puruṣo bahnimadhyataḥ || 98 ||
[Analyze grammar]

sa cāgnirdvijarūpī taṃ jagāda caraṇānatam |
adyāhaṃ tvadgṛhe bhokṣye rātrau sthāsyāmi tatra ca || 99 ||
[Analyze grammar]

darśayitvā ca tattvaṃ te sādhayiṣyāmi vāñchitam |
ityuktvā guhacandraṃ sa brāhmaṇastadgṛhaṃ yayau || 100 ||
[Analyze grammar]

tatrānyavipravadbhuktvā guhacandrāntike ca saḥ |
siṣeve śayanaṃ rātrau yāmamātramatandritaḥ || 101 ||
[Analyze grammar]

tāvacca saṃsuptajanātsā tasmāttasya mandirāt |
niryayau guhacandrasya bhāryā somaprabhā niśi || 102 ||
[Analyze grammar]

tatkālaṃ brāhmaṇaḥ so 'tra guhacandramabodhayat |
ehi svabhāryāvṛttāntaṃ paśyety enam uvāca ca || 103 ||
[Analyze grammar]

yogena bhṛṅgarūpaṃ ca kṛtvā tasyātmanastathā |
nirgatyādarśayattasya bhāryāṃ tāṃ gṛhanirgatām || 104 ||
[Analyze grammar]

sā jagāma sudūraṃ ca sundarī nagarādbahiḥ |
guhacandreṇa sākaṃ ca dvijo 'pyanujagāma tām || 105 ||
[Analyze grammar]

tatastatra mahābhogaṃ sacchāyaskandhasundaram |
guhacandro dadarśāsāvekaṃ nyaprodhapādapam || 106 ||
[Analyze grammar]

tasyādhastācca śuśrāva vīṇāveṇuravānvitam |
ullasadgītamadhuraṃ divyaṃ saṃgītakadhvanim || 107 ||
[Analyze grammar]

skandhadeśe ca tasyaikāṃ svabhāryāsadṛśākṛtim |
apaśyatkanyakāṃ divyāmupaviṣṭāṃ mahāsane || 108 ||
[Analyze grammar]

nijakāntijitajyotsnāṃ śuklacāmaravījitām |
indorlāvaṇyasarvasvakoṣasyevādhidevatām || 109 ||
[Analyze grammar]

atraivāruhya vṛkṣe ca tasyā ardhāsane tadā |
upaviṣṭāṃ svabhāryāṃ tāṃ guhacandro dadarśa saḥ || 110 ||
[Analyze grammar]

tatkālaṃ tulyakāntī te saṃgate divyakanyake |
paśyatastasya bhāti sma sā tricandreva yāminī || 111 ||
[Analyze grammar]

tataḥ sa kautukāviṣṭaḥ kṣaṇam evam acintayat |
kiṃ svapno 'yam uta bhrāntir dhig etad athavā dvayam || 112 ||
[Analyze grammar]

yā sanmārgataroreṣā vidvatsaṃgatimañjarī |
asau puṣpodgatistasyā mamocitaphalonmukhī || 113 ||
[Analyze grammar]

iti cintayati svairaṃ tasmiṃste divyakanyake |
bhuktvā nijocitaṃ bhojyaṃ divyaṃ papaturāsavam || 114 ||
[Analyze grammar]

adyāgato mahātejā dvijaḥ ko'pi gṛheṣu naḥ |
tasmādbhagini ceto me śaṅkitaṃ tadvrajāmyaham || 115 ||
[Analyze grammar]

ityuktvā tāmathāmantrya dvitīyāṃ divyakanyakām |
guhacandrasya gṛhiṇī taroravaruroha sā || 116 ||
[Analyze grammar]

taddṛṣṭvā bhṛṅgarūpau tau guhacandro dvijaśca saḥ |
pratyāgatyāgrato gehe pūrvavattasthaturniśi || 117 ||
[Analyze grammar]

tataḥ sā divyakanyāpi guhacandrasya gehinī |
āgatyālakṣitātraiva praviveśa svamandiram || 118 ||
[Analyze grammar]

tataḥ sa brāhmaṇaḥ svairaṃ guhacandramabhāṣata |
dṛṣṭaṃ tvayā yadeṣā te bhāryā divyā na mānuṣī || 119 ||
[Analyze grammar]

dvitīyā sāpi caitasyā dṛṣṭādya bhaginī tvayā |
divyā strī tu manuṣyeṇa kathamicchati saṃgamam || 120 ||
[Analyze grammar]

tadetatsiddhaye mantraṃ dvārollekhyaṃ dadāmi te |
tasyopabṛṃhaṇīṃ bāhyāṃ yuktiṃ copadiśāmyaham || 121 ||
[Analyze grammar]

viśuddho 'pi jvalayagnirvātyāyoge tu kā kathā |
evaṃ mantro 'rthado 'pyekaḥ kiṃ punaryuktisaṃyutaḥ || 122 ||
[Analyze grammar]

ityuktvā guhacandrāya dattvā mantraṃ dvijottamaḥ |
upadiśya ca tāṃ yuktiṃ prabhāte sa tirodave || 123 ||
[Analyze grammar]

guhacandro 'pi bhāryāyā gṛhadvāre 'bhilikhya tam |
mantraṃ punaścakāraivaṃ sāyaṃ yuktiṃ prarocanīm || 124 ||
[Analyze grammar]

gatvā sa tasyāḥ paśyantyā kayāpi varayoṣitā |
saha cakre samālāpaṃ racitodāramaṇḍanaḥ || 125 ||
[Analyze grammar]

taddṛṣṭaiva tamāhūya mantronmudritayā girā |
eṣā kāstīti papraccha sā serṣyā divyakanyakā || 126 ||
[Analyze grammar]

asau varāṅganā baddhabhāvā mayy aham adya ca |
etadgṛhaṃ vrajāmīti praty avocat sa tāṃ mṛṣā || 127 ||
[Analyze grammar]

tataḥ sācīkṛtadṛśā mukhena valitabhruṇā |
dṛṣṭvā nivārya vāmena kareṇa tamuvāca sā || 128 ||
[Analyze grammar]

huṃ jñātametadartho 'yaṃ veṣastatra ca mā sma gāḥ |
kiṃ tayā māmuṣehi tvamahaṃ hi tava gehinī || 129 ||
[Analyze grammar]

ityuktaḥ pulakotkampasaṃkṣobhākulayā tayā |
āviṣṭayeva tanmantradūtadurgrahayāpi saḥ || 130 ||
[Analyze grammar]

praviśya vāsake sadyastayaiva samamanvabhūt |
martyo 'pi divyasaṃbhogamasaṃspṛṣṭaṃ manorahaiḥ || 131 ||
[Analyze grammar]

itthaṃ tāṃ prāpya sapremāṃ mantrasiddhiprasādhitām |
tyaktadivyasthitiṃ tasthau guhacandro yathāsukham || 132 ||
[Analyze grammar]

evaṃ yāgapradānādisukṛtaiḥ śubhakarmaṇām |
divyāḥ śāpacyutā nāryastiṣṭhanti gṛhiṇīpade || 133 ||
[Analyze grammar]

devadvijasaparyā hi kāmadhenurmatā satām |
kiṃ hi na prāpyate tasyāḥ śaiṣāḥ sāmādivarṇanāḥ || 134 ||
[Analyze grammar]

duṣkṛtaṃ tvayi divyānāmatyuccapadajanmanām |
pravātamiva puṣpāṇāmadhaḥ pātaikakāraṇam || 135 ||
[Analyze grammar]

ityuktvā rājaputryāḥ sa punarāha vasantakaḥ |
kiṃ cātra yadahalyāyā vṛttaṃ tacchrūyatāmidam || 136 ||
[Analyze grammar]

purābhūd gautamo nāma trikālajño mahāmuniḥ |
ahalyeti ca tasyāsīd bhāryā rūpajitāpsarāḥ || 137 ||
[Analyze grammar]

ekadā rūpalubdhastāmindraḥ prārthitavānrahaḥ |
prabhūṇāṃ hi vibhūtyandhā dhāvatyaviṣaye matiḥ || 138 ||
[Analyze grammar]

sānumene ca taṃ mūḍhā vṛṣasyantī śacīpatim |
tacca prabhāvato buddhvā tatrāgādgautamo muniḥ || 139 ||
[Analyze grammar]

mārjārarūpaṃ cakre ca bhayādindro 'pi tatkṣaṇam |
kaḥ sthito 'treti so 'pṛcchadahalyāmatha gautamaḥ || 140 ||
[Analyze grammar]

eso ṭhio khu majjāro ity apabhraṣṭavakrayā |
girā satyānurodhinyā sā taṃ pratyabravītpatim || 141 ||
[Analyze grammar]

satyaṃ tvajjāra ityuktvā vihasansa tato muniḥ |
satyānurodhakḷptāntaṃ śāpaṃ tasyāmapātayat || 142 ||
[Analyze grammar]

pāpaśīle śilābhāvaṃ bhūrikālamavāpnuhi |
ā vanāntarasaṃcāriraghavālokanāditi || 143 ||
[Analyze grammar]

varāṅgalubdhasyāṅge te tatsahasraṃ bhaviṣyati |
divyastrīṃ viśvakarmā yāṃ nirmāsyati tilottamām || 144 ||
[Analyze grammar]

tāṃ vilokya tadaivākṣṇāṃ sahasraṃ bhavitā ca te |
itīndramapi tatkālaṃ śapati sma sa gautamaḥ || 145 ||
[Analyze grammar]

dattaśāpo yathākāmaṃ tapase sa muniryayau |
ahalyāpi śilābhāvaṃ dāruṇaṃ pratyapadyata || 146 ||
[Analyze grammar]

indro 'pyāvṛtasarvāṅgo varāṅgairabhavattataḥ |
aśīlaṃ tasya nāma syān na khalīkārakāraṇam || 147 ||
[Analyze grammar]

evaṃ kukarma sarvasya phalatyātmani sarvadā |
yo yadvapati bījaṃ hi labhate so 'pi tatphalam || 148 ||
[Analyze grammar]

tasmātparaviruddheṣu notsahante mahāśayāḥ |
etaduttamasattvānāṃ vidhisiddhaṃ hi sadvratam || 149 ||
[Analyze grammar]

yuvāṃ pūrvabhaginyau ca devyau śāpacyute ubhe |
tadvadanyonyahitakṛnnirdvandvaṃ hṛdayaṃ hi vām || 150 ||
[Analyze grammar]

etadvasantakācchrutvā mitho vāsavadattayā |
padmāvatyā ca sutarāmīrṣyāleśo 'pyamucyata || 151 ||
[Analyze grammar]

devī vāsavadattā ca kṛtvā sādhāraṇaṃ patim |
ātmanīva priyaṃ cakre padmāvatyāṃ hitonmukhī || 152 ||
[Analyze grammar]

tasyā mahānubhāvatvaṃ tattādṛṅmagadheśvaraḥ |
buddhvā padmāvatīsṛṣṭadūtebhyo 'pi tutoṣa saḥ || 153 ||
[Analyze grammar]

anyedyuratha vatseśaṃ mantrī yaugandharāyaṇaḥ |
upetya saṃnidhau devyāḥ sthiteṣvanyeṣvabhāṣata || 154 ||
[Analyze grammar]

udyogāyādhunā deva kauśāmbī kiṃ na gamyate |
nāśaṅkā magadheśācca vidyate vañcitādapi || 155 ||
[Analyze grammar]

kanyāsaṃbandhanāmnā hi sāmnā samyaksa bādhitaḥ |
vigṛhya ca kathaṃ jahyājjīvitādadhikāṃ sutām || 156 ||
[Analyze grammar]

satyaṃ tasyānupālyaṃ ca tvayā ca sa na vañcitaḥ |
mayā svayaṃ kṛtaṃ hyetanna ca tasyāsukhāvaham || 157 ||
[Analyze grammar]

cārebhyaśca mayā jñātaṃ yathā vikurute na saḥ |
tadarthameva cāsmābhiḥ sthitaṃ ca divasānamūn || 158 ||
[Analyze grammar]

evaṃ vadati nirvyūḍhakārye yaugandharāyaṇe |
magadheśvarasaṃbandhī dūto 'tra samupāyayau || 159 ||
[Analyze grammar]

tatkṣaṇaṃ sa praviṣṭo 'tra pratihāraniveditaḥ |
praṇāmāntaramāsīno vatsarājaṃ vyajijñapat || 160 ||
[Analyze grammar]

devīpadmāvatīdattasaṃdeśaparitoṣiṇā |
magadheśena nirdiṣṭamidaṃ devasya sāṃpratam || 161 ||
[Analyze grammar]

bahunā kiṃ mayā sarvaṃ jñātuṃ prīto 'smi ca tvayi |
tadyadartho 'yamārambhastatkuru praṇatā vayam || 162 ||
[Analyze grammar]

etaddūtavacaḥ svecchaṃ vatseśo 'bhinananda saḥ |
yaugandharāyaṇīyasya puṣpaṃ nayataroriva || 163 ||
[Analyze grammar]

tataḥ padmāvatīṃ rājñyā samānāyya samaṃ tayā |
taṃ dattaprābhṛtaṃ dūtaṃ sa saṃmānya vyasarjayat || 164 ||
[Analyze grammar]

atha caṇḍamahāsenadūto 'pyatra samāyayau |
praviśya sa yathāvacca rājānaṃ praṇato 'bravīt || 165 ||
[Analyze grammar]

deva caṇḍamahāsenabhūpatiḥ kāryatatvavit |
tava vijñātavṛttānto hṛṣṭaḥ saṃdiṣṭavān idam || 166 ||
[Analyze grammar]

prāśastyaṃ bhavatastāvadiyataivopavarṇitam |
yaugandharāyaṇo yatte manrī kimadhikoktibhiḥ || 167 ||
[Analyze grammar]

dhanyā vāsavadattā tu tvadbhaktyā tatkṛtaṃ tayā |
yenāsmābhiḥ satāṃ madhye ciramunnamitaṃ śiraḥ || 168 ||
[Analyze grammar]

na ca vāsavadattāto bhinnā padmāvatī mama |
tayorekaṃ hi hṛdayaṃ tacchīghraṃ kurutodyamam || 169 ||
[Analyze grammar]

etan nijaśvaśuradūtavaco niśamya vatseśvarasya hṛdaye sapadi pramodaḥ |
devyaṃ ca ko'pi vavṛdhe praṇayaprakarṣo bhūyāṃś ca mantrivṛṣabhe praṇayānubandhaḥ || 170 ||
[Analyze grammar]

tatastaṃ devībhyāṃ samamucitasatkāravidhinā kṛtātithyaṃ dūtaṃ sarabhasamanāḥ preṣya muditam |
vidhāsyannudyogaṃ tvaritamatha saṃmantrya sacivaiḥ sa cakre kauśāmbīṃ prati gamanabuddhiṃ narapatiḥ || 171 ||
[Analyze grammar]