Chapter 4

atrāntare sa vatseśapratidūtastadabravīt |
gatvā prativacaścaṇḍamahāsenāya bhūbhṛte || 1 ||
[Analyze grammar]

so 'pi caṇḍamahāsenastacchrutvaiva vyacintayat |
sa tāvadiha nāyāti mānī vatseśvaro bhṛśam || 2 ||
[Analyze grammar]

kanyā hi tatra na preṣyā bhavedevaṃ hi lāghavam |
tasmādbaddhvaiva taṃ yuktyā nṛpamānāyayāmyaham || 3 ||
[Analyze grammar]

iti saṃcintya saṃmantrya sa rājā mantribhiḥ saha |
akārayatsvasadṛśaṃ mahāntaṃ yantrahastinam || 4 ||
[Analyze grammar]

taṃ cāntarvīrapuruṣaiḥ kṛtvā channairadhiṣṭhitam |
vindhyāṭavyāṃ sa nidadhe rājā yantramayaṃ gajam || 5 ||
[Analyze grammar]

tatra taṃ cārapuruṣāḥ paśyanti sma vidūrataḥ |
gajabandharasāsaktavatsarājopajīvinaḥ || 6 ||
[Analyze grammar]

te ca tvaritamāgatya vatsarājaṃ vyajijñapan |
deva dṛṣṭo gajo 'smābhireko vindhyavane bhraman || 7 ||
[Analyze grammar]

asminniyati bhūloke naiva yo 'nyatra dṛśyate |
varṣmaṇā vyāptagagano vindhyādririva jaṅgamaḥ || 8 ||
[Analyze grammar]

tataścāravacaḥ śrutvā vatsarājo jaharṣa saḥ |
tebhyaḥ suvarṇalakṣaṃ ca pradadau pāritoṣikam || 9 ||
[Analyze grammar]

taṃ cedgajendraṃ prāpsyāmi pratimallaṃ naḍāgireḥ |
tataścaṇḍamahāseno vaśyo bhavati me dhruvam || 10 ||
[Analyze grammar]

tato vāsavadattāṃ tāṃ sa svayaṃ me prayacchati |
iti saṃcintayanso 'tha rājā tāmanayanniśām || 11 ||
[Analyze grammar]

prātaśca mantrivacanaṃ nyakṛtvā gajatṛṣṇayā |
puraskṛtyaiva tāṃścārānyayau vindhyāṭavīṃ prati || 12 ||
[Analyze grammar]

prasthānalagnasya phalaṃ kanyālābhaṃ sabandhanam |
yadūcurgaṇakāstasya tatsa naiva vyacārayat || 13 ||
[Analyze grammar]

prāpya vindhyāṭavīṃ tasya gajasya kṣobhaśaṅkayā |
vatsarājaḥ sa sainyāni dūrādeva nyavārayat || 14 ||
[Analyze grammar]

cāramātrasahāyastu vīṇāṃ ghoṣavatīṃ dadhat |
nijavyasanavistīrṇāṃ tāṃ viveśa mahāṭavīm || 15 ||
[Analyze grammar]

vindhyasya dakṣiṇe pārśve dūrācāraiḥ pradarśitam |
gajaṃ satyagajābhāsaṃ taṃ dadarśa sa bhūpatiḥ || 16 ||
[Analyze grammar]

ekākī vādayanvīṇāṃ cintayan bandhanāni saḥ |
madhuradhvani gāyaṃś ca śanair upajagāma tam || 17 ||
[Analyze grammar]

gāndharvadattacittatvātsaṃdhyādhvāntavaśācca saḥ |
na taṃ vanagajaṃ rājā māyāgajamalakṣayat || 18 ||
[Analyze grammar]

so 'pi hastī tamutkarṇatālo gītarasādiva |
upetyopetya vicalandūramākṛṣṭavānnṛpam || 19 ||
[Analyze grammar]

tato 'kasmācca nirgatya tasmādyantramayādgajāt |
vatseśvaraṃ taṃ saṃnaddhāḥ puruṣāḥ paryavārayan || 20 ||
[Analyze grammar]

tāndṛṣṭvā nṛpatiḥ kopādākṛṣṭacchuriko 'tha saḥ |
agrasthānyodhayannanyairetya paścādagṛhyata || 21 ||
[Analyze grammar]

saṃketamilitaiścānyairyodhāstaiḥ sainikaiḥ saha |
ninyurvatseśvaraṃ caṇḍamahāsenāntikaṃ ca tam || 22 ||
[Analyze grammar]

so 'pi caṇḍamahāseno nirgayāgre kṛtādaraḥ |
vatseśena samaṃ tena viveśojjayinīṃ purīm || 23 ||
[Analyze grammar]

sa tatra tadṛśe paurairavamānakalaṅkitaḥ |
śaśīva locanānando vatsarājo navāgataḥ || 24 ||
[Analyze grammar]

tato 'sya guṇarāgeṇa vadhamāśaṅkya tatra te |
paurāḥ saṃbhūya sakalāścakrurmaraṇaniścayam || 25 ||
[Analyze grammar]

na me vatseśvaro vadhyaḥ saṃdheya iti tān bruvan |
so 'tha caṇḍamahāsenaḥ paurān kṣobhād avārayat || 26 ||
[Analyze grammar]

tato vāsavadattāṃ tāṃ sutāṃ tatraiva bhūpatiḥ |
vatsarājāya gāndharvaśikṣāhetoḥ samarpayat || 27 ||
[Analyze grammar]

uvāca cainaṃ gāndharvaṃ tvametāṃ śikṣaya prabho |
tataḥ prāpsyasi kalyāṇaṃ mā viṣādaṃ kṛthā iti || 28 ||
[Analyze grammar]

tasya dṛṣṭvā tu tāṃ kanyāṃ vatsarājasya mānasam |
tathā snehāktamabhavanna yahā manyumaikṣata || 29 ||
[Analyze grammar]

tasyāś ca cakṣurmanasī saha taṃ prati jagmatuḥ |
hriyā cakṣur nivavṛtte manas tu na kathaṃcana || 30 ||
[Analyze grammar]

atha vāsavadattāṃ tāṃ gāpayaṃstadgatekṣaṇaḥ |
tatra gāndharvaśālāyāṃ vatsarāja uvāsa saḥ || 31 ||
[Analyze grammar]

aṅke ghoṣavatī tasya kaṇṭhe gītaśrutistathā |
puro vāsavadattā ca tasthau cetovinodinī || 32 ||
[Analyze grammar]

sā ca vāsavadattāsya paricaryāparābhavat |
takṣmīriva tadekāgrā baddhasyāpyanapāyinī || 33 ||
[Analyze grammar]

atrāntare ca kauśāmbyāṃ vatsarājānuge jane |
āvṛtte taṃ prabhuṃ buddhvā baddhaṃ rāṣṭraṃ pracukṣubhe || 34 ||
[Analyze grammar]

ujjayinyāmavaskandaṃ dātumaicchansamantataḥ |
vatseśvarānurāgeṇa kruddhāḥ prakṛtayastadā || 35 ||
[Analyze grammar]

naiva caṇḍamahāseno balasādhyo mahān hi saḥ |
na caivaṃ vatsarājasya śarīre kuśalaṃ bhavet || 36 ||
[Analyze grammar]

tasmānna yukto 'vaskando buddhisādhyamidaṃ punaḥ |
iti prakṛtayaḥ kṣobhānnavāryanta rumaṇvatā || 37 ||
[Analyze grammar]

tato 'nuraktamālokya rāṣṭramavyabhicāri tat |
rumaṇvadādīn āha sma dhīro yaugandharāyaṇaḥ || 38 ||
[Analyze grammar]

ihaiva sarvair yuṣmābhiḥ sthātavyaṃ satatodyataiḥ |
rakṣaṇīyamidaṃ rāṣṭraṃ kāle kāryaśca vikramaḥ || 39 ||
[Analyze grammar]

vasantakadvitīyaśca gatvāhaṃ prajñayā svayā |
vatseśaṃ mocayitvā tamānayāmi na saṃśayaḥ || 40 ||
[Analyze grammar]

jalāhatau viśeṣeṇa vaidyutāgneriva dyutiḥ |
āpadi sphurati prajñā yasya dhīraḥ sa eva hi || 41 ||
[Analyze grammar]

prākārabhañjanānyogāṃstathā nigaḍabhañjanān |
adarśanaprayogāṃśca jāne 'hamupayoginaḥ || 42 ||
[Analyze grammar]

ityuktvā prakṛtīḥ kṛtvā hastanyastā rumaṇvataḥ |
yaugandharāyaṇaḥ prāyāt kauśāmbyāḥ savasantakaḥ || 43 ||
[Analyze grammar]

praviveśa ca tenaiva saha vindhyamahāṭavīm |
svaprajñāmiva sattāḍhyāṃ svanītimiva durgamām || 44 ||
[Analyze grammar]

tatra vatseśamittrasya vindhyaprāgbhāravāsinaḥ |
gṛhaṃ pulindakākhyasya pulindādhipateragāt || 45 ||
[Analyze grammar]

taṃ sajjaṃ sthāpayitvā ca pahā tenāgamiṣyataḥ |
vatsarājasya rakṣārthaṃ bhūrisainyasamanvitam || 46 ||
[Analyze grammar]

gatvā vasantakasakhastato yaugandharāyaṇaḥ |
ujjayinyāṃ mahākālaśmaśānaṃ prāpa sa kramāt || 47 ||
[Analyze grammar]

viveśa tacca vetālaiḥ kravyagandhibhirāvṛtam |
itastatastamaḥ śyāmaiścitādhūmairivāparaiḥ || 48 ||
[Analyze grammar]

tatrainaṃ darśanaprīto mittrabhāvāya tatkṣaṇam |
yogeśvarākhyo vṛtavānabhyetya brahmarākṣasaḥ || 49 ||
[Analyze grammar]

tenopadiṣṭayā yuktyā tato yaugandharāyaṇaḥ |
na cakārātmanaḥ sadyo rūpasya parivartanam || 50 ||
[Analyze grammar]

babhūva tena vikṛtaḥ kubjo vṛddhaśca tatkṣaṇāt |
unmattaveṣaḥ khalvāṭo hāsyasaṃjananaḥ param || 51 ||
[Analyze grammar]

tayaiva yuktyā sa tadā sirānaddhapṛthūdaram |
cakre vasantakasyāpi rūpaṃ danturadurmukham || 52 ||
[Analyze grammar]

tato rājakuladvāramādau preṣya vasantakam |
viveśojjayinīṃ tāṃ sa tādṛgyaugandharāyaṇaḥ || 53 ||
[Analyze grammar]

nṛtyan gāyaṃś ca tatrāsau baṭubhiḥ parivāritaḥ |
dṛṣṭaḥ sakautukaṃ sarvairyayau rājagṛhaṃ prati || 54 ||
[Analyze grammar]

tatra rājāvarodhānāṃ tenāsau kṛtakautukaḥ |
agādvāsavadattāyāḥ śanaiḥ śravaṇagocaram || 55 ||
[Analyze grammar]

sā tamānāyayāmāsa ceṭikāṃ preṣya satvaram |
gāndharvaśālāṃ narmaikasādaraṃ hi navaṃ vayaḥ || 56 ||
[Analyze grammar]

sa ca tatra gato vṛddhaṃ vatsarājaṃ dadarśa tam |
unmattaveṣo vigaladvāṣpo yaugandharāyaṇaḥ || 57 ||
[Analyze grammar]

cakāra tasmai saṃjñāṃ ca vatsarājāya so 'pi tam |
pratyabhijñātavānrājā veṣapracchannamāgatam || 58 ||
[Analyze grammar]

tato vāsavadattāṃ ca tacceṭīḥ prati cātmanaḥ |
adarśanaṃ yuktibalād vyadhād yaugandharāyaṇaḥ || 59 ||
[Analyze grammar]

rājā tveko dadarśainaṃ tāśca sarvāḥ savismayam |
vadanti sma gato 'kasmādunmattaḥ kvāpyasāviti || 60 ||
[Analyze grammar]

tacchrutvā taṃ ca dṛṣṭāgre matvā yogabalena tat |
yuktyā vāsavadattāṃ tāṃ vatsarājo 'bravīdidam || 61 ||
[Analyze grammar]

gatvā sarasvatīpūjāmādāyāgaccha dārike |
tacchrutvā sā tathetyuktvā savayasyā viniryayau || 62 ||
[Analyze grammar]

yathocitamupetyātha dadau vatseśvarāya saḥ |
yaugandharāyaṇas tasmai yogān nigaḍabhañjanān || 63 ||
[Analyze grammar]

anyānvāsavadattāyā vīṇātantrīniyojitān |
vaśīkaraṇayogāṃśca rājñe 'smai sa samārpayat || 64 ||
[Analyze grammar]

vyajijñapacca taṃ rājannihāyāto vasantakaḥ |
dvāri sthito 'nyarūpeṇa taṃ kuruṣvāntike dvijam || 65 ||
[Analyze grammar]

yadā vāsavadatteyaṃ tvayi visrambhameṣyati |
tadā vakṣyāmi yadahaṃ tatkuryāstiṣṭha sāṃpratam || 66 ||
[Analyze grammar]

ityuktvā niryayau śīghraṃ tato yaugandharāyaṇaḥ |
agādvāsavadattā ca pūjāmādāya tatkṣaṇāt || 67 ||
[Analyze grammar]

so 'tha tāmavadadrājā bahirdvāri dvijaḥ sthitaḥ |
sarasvatyarcane so 'smindakṣiṇārthe praveśyatām || 68 ||
[Analyze grammar]

tatheti dvāradeśātsa tatra vāsavadattayā |
virūpāmākṛtiṃ bibhradānāyyata vasantakaḥ || 69 ||
[Analyze grammar]

sa cānītastamālokya vatseśamarudacchucā |
tataścāpratibhedāya sa rājā nijagāda tam || 70 ||
[Analyze grammar]

he brahmanrogavairūpyaṃ sarvametadahaṃ tava |
nivārayāmi mā rodīstiṣṭhehaiva mamāntike || 71 ||
[Analyze grammar]

mahān prasādo deveti sa covāca vasantakaḥ |
so 'tha taṃ vikṛtaṃ dṛṣṭvā rājā smitamukho 'bhavat || 72 ||
[Analyze grammar]

taccālokyāśayaṃ buddhvā tasya so 'pi vasantakaḥ |
hasati smādhikodbhūtavirūpānanavaikṛtaḥ || 73 ||
[Analyze grammar]

taṃ hasantaṃ tathā dṛṣṭvā krīḍanīyakasaṃnibham |
tatra vāsavadattāpi jahāsa ca tutoṣa ca || 74 ||
[Analyze grammar]

tataḥ sā narmaṇā bālā taṃ papraccha vasantakam |
kiṃ vijñānaṃ vijānāsi bho brahman kathyatām iti || 75 ||
[Analyze grammar]

kathāḥ kathayituṃ devi jānāmīti sa cāvadat |
kathāṃ kathaya tarhokāmiti sāpi tato 'bravīt || 76 ||
[Analyze grammar]

tatastāṃ rājatanayāṃ rañjayansa vasantakaḥ |
hāsyavaicitrasarasām imām akathayat kathām || 77 ||
[Analyze grammar]

astīha mathurā nāma purī kaṃsārijanmabhūḥ |
tasyāṃ rūpaṇiketyāsītkhyātā vāravilāsinī || 78 ||
[Analyze grammar]

tasyā makaradaṃṣṭrākhyā mātābhūdvṛddhakuṭṭanī |
tadguṇākṛṣyamāṇānāṃ yūnāṃ dṛśi viṣacchaṭā || 79 ||
[Analyze grammar]

pūjākāle surakulaṃ svaniyogāya jātu sā |
gatā rūpaṇikā dūrādekaṃ puruṣamaikṣata || 80 ||
[Analyze grammar]

sa dṛṣṭaḥ subhagastasyā viveśa hṛdayaṃ tathā |
yathā mātrā kṛtāste 'smādupadeśā viniryayuḥ || 81 ||
[Analyze grammar]

ceṭikāmatha sāvādīdgaccha madvacanādamum |
puruṣaṃ brūhi madgehe tvayādyāgamyatāmiti || 82 ||
[Analyze grammar]

tatheti ceṭikā sā ca gatvā tasmai tad abravīt |
tataḥ sa kiṃcid vimṛśan puruṣas tām abhāṣata || 83 ||
[Analyze grammar]

lohajaṅghābhidhāno 'smi brāhmaṇo nāsti me dhanam |
tadāḍhyajanalabhye hi ko 'haṃ rūpaṇikāgṛhe || 84 ||
[Analyze grammar]

na dhanaṃ vāñchyate tvattaḥ svāminyetyudite tayā |
sa lohajaṅghas tadvākyaṃ tatheti pratyapadyata || 85 ||
[Analyze grammar]

tataśceṭīmukhādbuddhvā tacca sā gṛhamutsukā |
gatvā rūpaṇikā tatsthau tanmārganyastalocanā || 86 ||
[Analyze grammar]

kṣaṇācca lohajaṅgho 'tha tasyāmandiramāyayau |
kuto 'yamiti kuṭṭanyā dṛṣṭo makaradaṃṣṭrayā || 87 ||
[Analyze grammar]

sāpi rūpaṇikā dṛṣṭvā svayamutthāya sādarā |
vāsaveśmāntaraṃ hṛṣṭā kaṇṭhe lagnā nināya tam || 88 ||
[Analyze grammar]

tatra sā lohajaṅghasya tasya saubhāgyasaṃpadā |
vaśīkṛtā satī nānyatphalaṃ janmanyamanyata || 89 ||
[Analyze grammar]

tatastayā nivṛttānyapuruṣāsaṅgayā saha |
yathāsukhaṃ sa tatraiva tasthau tanmandire yuvā || 90 ||
[Analyze grammar]

taddṛṣṭvā śikṣitāśeṣaveṣayoṣijjagāda tām |
mātā makaradaṃṣṭrā sā khinnā rūpaṇikāṃ rahaḥ || 91 ||
[Analyze grammar]

kimayaṃ nirdhanaḥ putri sevyate puruṣastvayā |
śavaṃ spṛśanti sujanā gaṇikā na tu nirdhanam || 92 ||
[Analyze grammar]

kānurāgaḥ kva veśyātvamiti te vismṛtaṃ katham |
saṃdhyeva rāgiṇī veśyā na ciraṃ putri dīpyate || 93 ||
[Analyze grammar]

naṭīva kṛtrimaṃ prema gaṇikārthāya darśayet |
tadenaṃ nirdhanaṃ muñca mā kṛthā nāśamātmanaḥ || 94 ||
[Analyze grammar]

iti mātṛvacaḥ śrutvā ruṣā rūpaṇikābravīt |
maivaṃ vādīrmama hyeṣa prāṇebhyo 'pyadhikaḥ priyaḥ || 95 ||
[Analyze grammar]

dhanamasti ca me bhūri kimanyena karomyaham |
tadamba naiva vaktavyā bhūyo 'pyevamahaṃ tvayā || 96 ||
[Analyze grammar]

tacchrutvā lohajaṅghasya nirvāsanavidhau krudhā |
tasthau makaradaṃṣṭrā sā tasyopāyaṃ vicinvatī || 97 ||
[Analyze grammar]

atha mārgāgataṃ kaṃcitkṣīṇakoṣaṃ dadarśa sā |
rājaputraṃ parivṛtaṃ puruṣaiḥ śastrapāṇibhiḥ || 98 ||
[Analyze grammar]

upagamya drutaṃ taṃ ca nītvaikānte jagāda sā |
nirdhanena mamaikena kāmukenāvṛtaṃ gṛham || 99 ||
[Analyze grammar]

tattvamāgaccha tatrādya tathā ca kuru yena saḥ |
gṛhānmama nivarteta madīyāṃ ca sutāṃ bhaja || 100 ||
[Analyze grammar]

tatheti rājaputro 'tha praviveśa sa tadgṛham |
tasmin kṣaṇe rūpaṇikā tasthau devakule ca sā || 101 ||
[Analyze grammar]

lohajaṅghaśca tatkālaṃ bahiḥ kvāpi sthito 'bhavat |
kṣaṇāntare ca niḥśaṅkastatraiva samupāyayau || 102 ||
[Analyze grammar]

tatkṣaṇaṃ rājaputrasya tasya bhṛtyaiḥ pradhāvya saḥ |
dṛḍhaṃ pādaprahārādyaiḥ sarveṣvaṅgeṣv atāḍyata || 103 ||
[Analyze grammar]

tatas tair eva cāmedhyapūrṇe kṣiptaḥ sa khātake |
lohajaṅghaḥ kathamapi prapalāyitavāṃstataḥ || 104 ||
[Analyze grammar]

athāgatā rūpaṇikā tadbuddhvā śokavihvalā |
sābhūdvīkṣyātha sa yayau rājaputro yathāgatam || 105 ||
[Analyze grammar]

lohajaṅgho 'pi kuṭṭanyā prasahya sa khalīkṛtaḥ |
gantuṃ pravavṛte tīrthaṃ prāṇāṃstyaktuṃ viyogavān || 106 ||
[Analyze grammar]

gacchannaṭavyāṃ saṃtaptaḥ kuṭṭanīmanyunā hṛdi |
tvaci ca grīṣmatāpena cchāyāmabhilalāṣa saḥ || 107 ||
[Analyze grammar]

tarumaprāpnuvanso 'tha lebhe hastikalevaram |
jaghanena praviśyāntarnirmāṃsaṃ jambukaiḥ kṛtam || 108 ||
[Analyze grammar]

carmāvaśeṣe tatrāntaḥ pariśrānaḥ praviśya saḥ |
lohajaṅgho yayau nidrāṃ praviśadvātaśītale || 109 ||
[Analyze grammar]

athākasmātsamutthāya kṣaṇenaiva samantataḥ |
meghaḥ pravavṛte tatra dhārāsāreṇa varṣitum || 110 ||
[Analyze grammar]

tena nirvivaraṃ prāpa saṃkocaṃ hasticarma tat |
kṣaṇācca tena mārgeṇa jalaugho bhṛśamāyayau || 111 ||
[Analyze grammar]

tenāpahṛtya gaṅgāyāmakṣepi gajacarma tat |
tajjalaughena nītvā ca samudrāntarnyadhīyata || 112 ||
[Analyze grammar]

tatra dṛṣṭvā ca taccarma nipatyāmiṣaśaṅkayā |
hṛtvābdheḥ pāramanayatpakṣī garuḍavaṃśajaḥ || 113 ||
[Analyze grammar]

tatra cañcvā vidāryaitad gajacarma vilokya ca |
antaḥsthaṃ mānuṣaṃ pakṣī palāyya sa tato yayau || 114 ||
[Analyze grammar]

tataśca carmaṇastasmātpakṣisaṃrambhabodhitaḥ |
taccañcuracitadvārāllohajaṅgho viniryayau || 115 ||
[Analyze grammar]

dṛṣṭvā samudrapārasthamātmānaṃ ca savismayaḥ |
anidrasvapnamiva tat sa samagram amanyata || 116 ||
[Analyze grammar]

atha dvau rākṣasau tatra ghorau bhīto dadarśa saḥ |
tau cāpi rākṣasau dūrāccakitau tamapaśyatām || 117 ||
[Analyze grammar]

rāmātparābhavaṃ smṛtvā taṃ tathaiva ca mānuṣam |
dṛṣṭvā tīrṇāmbudhiṃ bhūyastau bhayaṃ hṛdi cakratuḥ || 118 ||
[Analyze grammar]

saṃmantrya ca tayormadhyādeko gatvā tadaiva tam |
vibhīṣaṇāya prabhave yathādṛṣṭaṃ nyavedayat || 119 ||
[Analyze grammar]

dṛṣṭarāmaprabhāvaḥ sanso 'pi rājā vibhīṣaṇaḥ |
mānuṣāgamanādbhīto rākṣasaṃ tamabhāṣata || 120 ||
[Analyze grammar]

gaccha madvacanādbhadra prītyā taṃ brūhi mānuṣam |
āgamyatāṃ gṛhe 'smākaṃ prasādaḥ kriyatāmiti || 121 ||
[Analyze grammar]

tathetyāgatya tattasmai svaprabhuprārthanāvacaḥ |
cakito lohajaṅghāya śaśaṃsa sa ca rākṣasaḥ || 122 ||
[Analyze grammar]

so 'pyaṅgīkṛtya tadvipro lohajaṅghaḥ praśāntadhīḥ |
tenaiva sadvitīyena saha laṅkāṃ tato 'gamat || 123 ||
[Analyze grammar]

tasyāṃ ca dṛṣṭasauvarṇatattatprāsādavismitaḥ |
praviśya rājabhavanaṃ sa dadarśa vibhīṣaṇam || 124 ||
[Analyze grammar]

so 'pi papraccha rājā taṃ kṛtātithyaḥ kṛtāśiṣam |
brahman katham imāṃ bhūmim anuprāpto bhavān iti || 125 ||
[Analyze grammar]

tataḥ sa dhūrto 'vādīttaṃ lohajaṅgho vibhīṣaṇam |
vipro 'haṃ lohajaṅghākhyo mathurāyāṃ kṛtasthitiḥ || 126 ||
[Analyze grammar]

so 'haṃ dāridryasaṃtaptastatra nārāyaṇāmataḥ |
nirāhāraḥ sthito 'kārṣaṃ gatvā devakulaṃ tapaḥ || 127 ||
[Analyze grammar]

vibhīṣaṇāntikaṃ gaccha madbhakaḥ sa hi te dhanam |
dāsyatīty ādiśat svapne tato māṃ bhagavān hariḥ || 128 ||
[Analyze grammar]

kvāhaṃ vibhīṣaṇaḥ keti mayokte sa punaḥ prabhuḥ |
samādiśadvrajādyaiva taṃ drakṣyasi vibhīṣaṇam || 129 ||
[Analyze grammar]

ityuktaḥ prabhuṇā sadyaḥ prabuddho 'hamihāmbudheḥ |
pāre 'vasthitamātmānamapaśyaṃ vedmi nāparam || 130 ||
[Analyze grammar]

ityukto lohajaṅghena laṅkāmālokya durgamām |
satyaṃ divyaprabhāvo 'yamiti mene vibhīṣaṇaḥ || 131 ||
[Analyze grammar]

tiṣṭha dāsyāmi te vittam ity uktvā brāhmaṇaṃ ca tam |
matvā ca rakṣasāṃ haste tamapreṣyaṃ nṛghātinām || 132 ||
[Analyze grammar]

tatrasthātsvarṇamūlākhyādgireḥ saṃprekṣya rākṣasān |
ānāyayat pakṣipotaṃ garuḍānvayasaṃbhavam || 133 ||
[Analyze grammar]

taṃ cāsmai lohajaṅghāyā mathurāyāṃ gamiṣyate |
tatkālameva pradadau vaśīkārāya vāhanam || 134 ||
[Analyze grammar]

lohajaṅgho 'pi laṅkāyāṃ vāhayannadhiruhya tam |
kaṃcitkālaṃ viśaśrāma sa vibhīṣaṇasatkṛtaḥ || 135 ||
[Analyze grammar]

ekadā taṃ ca papraccha rākṣasendraṃ sakautukaḥ |
laṅkāyāṃ kāṣṭhamayyeṣā kathaṃ sarvaiva bhūriti || 136 ||
[Analyze grammar]

tacchrutvā sa ca tadvṛttaṃ tamuvāca vibhīṣaṇaḥ |
yadi te kautukaṃ brahmaṃstadidaṃ śṛṇu vacmi te || 137 ||
[Analyze grammar]

purā pratijñopanatāṃ nāgānāṃ dāsabhāvataḥ |
niṣkraṣṭukāmo jananīṃ garuḍaḥ kaśyapātmajaḥ || 138 ||
[Analyze grammar]

tanmūlyabhūtāṃ devebhyaḥ sudhāmāhartumudyataḥ |
balasya hetor bhakṣyārthī svapitur nikaṭaṃ yayau || 139 ||
[Analyze grammar]

sa cainaṃ yācito 'vādīnmahāntau gajakacchapau |
abdhau staḥ putra tau bhuṅkṣva gaccha śāpacutāviti || 140 ||
[Analyze grammar]

tataḥ sa garuḍo gatvā bhakṣyāvādāya tāvubhau |
mahataḥ kalpavṛkṣasya śākhāyāṃ samupāviśat || 141 ||
[Analyze grammar]

tāṃ ca śākhāṃ bharāt sadyo bhagnāṃ cañcvā babhāra saḥ |
adhaḥ sthitataponiṣṭhavālakhilyānurodhataḥ || 142 ||
[Analyze grammar]

lokopamardabhītena tenātha piturājñayā |
ānīya vijane tyaktā sā śākheha garutmatā || 143 ||
[Analyze grammar]

tasyāḥ pṛṣṭhe kṛtā laṅkā tena kāṭhamayīha bhūḥ |
etadvibhiṣaṇācchrutvā lohajaṅghastutoṣa saḥ || 144 ||
[Analyze grammar]

tatas tasmai mahārghāṇi ratnāni subahūni ca |
vibhīṣaṇo dadāti sma mathurāṃ gantumicchate || 145 ||
[Analyze grammar]

bhaktyā ca devasya harer mathurāvartinaḥ kṛte |
haste 'syābjagadāśaṅkhacakrān hemamayān dadau || 146 ||
[Analyze grammar]

tadgṛhītvākhilaṃ tasmin vibhīṣaṇasamarpite |
āruhya vihage lakṣaṃ yojanānāṃ prayātari || 147 ||
[Analyze grammar]

utpatya vyomamārgeṇa laṅkāyāstīrṇavāridhiḥ |
sa lohajaṅgho mathurāmakleśenājagāma tām || 148 ||
[Analyze grammar]

tasyāṃ śūnye vihāre ca bāhye vyomno 'vatīrya saḥ |
sthāpayāmāsa ratnaughaṃ taṃ babandha ca pakṣiṇam || 149 ||
[Analyze grammar]

āpaṇe ratnam ekaṃ ca gatvā vikrītavāṃs tataḥ |
atha vastrāṅgarāgādi krītavān bhojanaṃ tathā || 150 ||
[Analyze grammar]

tadvihāre ca tatraiva bhuktvā dattvā ca pakṣiṇe |
vastrāṅgarāgapuṣpādyairātmānaṃ tairabhūṣayat || 151 ||
[Analyze grammar]

pradoṣe cāyayau tasyāstatraivāruhya pakṣiṇi |
gṛhaṃ rūpaṇikāyāstāḥ śaṅkhacakragadā vahan || 152 ||
[Analyze grammar]

tatropari tataḥ sthitvā sthānavitkhe caraṃś ca saḥ |
śabdaṃ cakāra gambhīraṃ rahaḥsthāṃ śrāvayan priyām || 153 ||
[Analyze grammar]

taṃ ca śrutvaiva niryātā sāpaśyadratnarājitam |
enaṃ nārāyaṇākalpaṃ vyomni rūpaṇikā niśi || 154 ||
[Analyze grammar]

ahaṃ haririhāyātastvadarthamiti tena sā |
uktā praṇamya vakti sma dayāṃ devaḥ karotviti || 155 ||
[Analyze grammar]

athāvatīryā saṃyamya lohajaṅgho vihaṃgamam |
viveśa vāsabhavanaṃ sa tayā kānayā saha || 156 ||
[Analyze grammar]

tatra saṃprāptasaṃbhogaḥ sa niṣkramya kṣaṇāntare |
tathaiva vihagārūḍho jagāma nabhasā tataḥ || 157 ||
[Analyze grammar]

devatā viṣubhāryāhaṃ martyaiḥ saha na mantraye |
iti rūpaṇikā prātas tasthau maunaṃ vidhāya sā || 158 ||
[Analyze grammar]

kasmādevaṃvidhaṃ putri vartase kathyatāṃ tvayā |
ityapṛcchata sā mātrā tato makaradaṃṣṭrayā || 159 ||
[Analyze grammar]

nirbandhapṛṣṭā tasyai ca sā mātre maunakāraṇam |
śaśaṃsa rātrivṛttāntaṃ dāpayitvāntare paṭam || 160 ||
[Analyze grammar]

sā tacchrutvā sasaṃdehā svayaṃ taṃ kuṭṭanī niśi |
dadarśa vihagārūḍhaṃ lohajaṅghaṃ tataḥ kṣaṇam || 161 ||
[Analyze grammar]

prabhāte ca paṭāntaḥsthāmetya rūpaṇikāṃ rahaḥ |
prahvā makaradaṃṣṭrā sā kuṭṭanīti vyajijñapat || 162 ||
[Analyze grammar]

devasyānugrahātputri tvaṃ devītvamihāgatā |
ahaṃ ca te 'tra jananī tanme dehi sutāphalam || 163 ||
[Analyze grammar]

vṛddhānenaiva dehena yathā svargaṃ vrajāmyaham |
tathā devasya vijñaptiṃ kuruṣvānugṛhāṇa mām || 164 ||
[Analyze grammar]

tatheti sā rūpaṇikā tamevārthaṃ vyajijñapat |
vyājaviṣṇuṃ punarnaktaṃ lohajaṅgahmupāgatam || 165 ||
[Analyze grammar]

tataḥ sa devaveṣas tāṃ lohajaṅgho 'bravītpriyām |
pāpā te jananī svargaṃ vyaktaṃ netuṃ na yujyate || 166 ||
[Analyze grammar]

ekādaśyāṃ punaḥ prātardvāramudghaṭyate divi |
tatra ca praviśantyagre bahavaḥ śāṃbhavā gaṇāḥ || 167 ||
[Analyze grammar]

tanmadhye kṛtatadveṣā tvanmātāsau praveśyate |
tadasyāḥ pañcacūḍaṃ tvaṃ kṣurakḷptaṃ śiraḥ kuru || 168 ||
[Analyze grammar]

kaṇṭhaṃ karaṅkamālāḍhyaṃ pārśvaṃ caikaṃ sakajjalam |
anyatsindūraliptaṃ ca kurvasyā vītavāsasaḥ || 169 ||
[Analyze grammar]

evaṃ hyenāṃ gaṇākārāṃ sukhaṃ svargaṃ nayāmyaham |
ityuktvā sa kṣaṇaṃ sthitvā lohajaṅghastato 'gamat || 170 ||
[Analyze grammar]

prātaśca sā rūpaṇikā yathoktaṃ tamakārayat |
veṣaṃ māturathaipāpi tasthau svargaikasaṃmukhī || 171 ||
[Analyze grammar]

āyayau ca punastatra lohajaṅgho niśāmukhe |
sā ca rūpaṇikā tasmai mātaraṃ tāṃ samarpayat || 172 ||
[Analyze grammar]

tataḥ sa vihagārūḍhastāmādāyaiva kuṭṭanīm |
agnāṃ vikṛtaveṣāṃ ca javādudapatannabhaḥ || 173 ||
[Analyze grammar]

gaganasthaśca tatraiva prāṃśuṃ devakulāgrataḥ |
sa dadarśa śilāstambhaṃ cakreṇopari lāñchitam || 174 ||
[Analyze grammar]

tasya pṛṣṭhe sa cakraikasālambe tāṃ nyaveśayat |
khalikārapratīkārapatākāmiva kuṭṭanīm || 175 ||
[Analyze grammar]

iha tiṣṭha kṣaṇaṃ yāvatsāṃnidhyānugrahaṃ bhuvi |
gatvā karomīty uktvā ca tasyā dṛṣṭipathād yayau || 176 ||
[Analyze grammar]

tatas tatraiva devāgre dṛṣṭvā jāgaraṇāgatān |
rātrau yātrotsave lokān gaganād evam abravīt || 177 ||
[Analyze grammar]

he lokā iha yuṣmākamuparyadya patiṣyati |
sarvasaṃhāriṇī māri tadeta śaraṇaṃ harim || 178 ||
[Analyze grammar]

śrutvaitāṃ gaganādvāṇīṃ bhītāḥ sarve 'pi tatra te |
māthurā devamāśritya tasthuḥ svastyayanādṛtāḥ || 179 ||
[Analyze grammar]

so 'pi vyomno 'vatīryaiva lohajaṅgho 'valokayan |
tasthāv adṛṣṭas tanmadhye devaveṣaṃ nivārya tam || 180 ||
[Analyze grammar]

adyāpi nāgato devo na ca svargamahaṃ gatā |
iti ca stambhapṛṣṭhasthā kuṭṭanyevamacintayat || 181 ||
[Analyze grammar]

akṣamaivopari sthātuṃ śrāvayantī janānadhaḥ |
hā hāhaṃ patitāsmīti sā cakranda ca vibhyatī || 182 ||
[Analyze grammar]

tacchrutvā patitā seyaṃ mārītyāśaṅkya cākulāḥ |
devi mā mā patetyūcaste devāgragatā janāḥ || 183 ||
[Analyze grammar]

tataḥ sabālavṛddhāste māthurāstāṃ vibhāvarīm |
mārīpātabhayodbhrāntā kathamapyatyavāhayan || 184 ||
[Analyze grammar]

prātaśca dṛṣṭvā stambhasthāṃ kuṭṭanīṃ tāṃ tathāvidhām |
pratyabhijñātavānsarvaḥ pauralokaḥ sarājakaḥ || 185 ||
[Analyze grammar]

atikrāntabhaye tatra jātahāse 'khile jane |
āyayau śutavṛttāntā tatra rūpaṇikātha sā || 186 ||
[Analyze grammar]

sā ca dṛṣṭvā savailaṣyā stambhāgrājjananīṃ nijām |
tāmavātārayatsadyastatrasthaiśca janaiḥ saha || 187 ||
[Analyze grammar]

tataḥ sā kuṭṭanī tatra sarvaistaiḥ sakutūhalaiḥ |
apṛcchyata yathāvṛttaṃ sāpi tebhyaḥ śaśaṃsa tat || 188 ||
[Analyze grammar]

tataḥ siddhādicaritaṃ tanmatvādbhutakārakam |
sarājavipravaṇijo janās te vākyam abruvan || 189 ||
[Analyze grammar]

yeneyaṃ vipralabdhā hi vañcitānekakāmukā |
prakaṭaḥ so 'stu tasyeha paṭṭabandho vidhīyate || 190 ||
[Analyze grammar]

tacchrutvā lohajaṅghaḥ sa tatrātmānamadarśayat |
pṛṣṭaścāmūlataḥ sarvaṃ vṛttāntaṃ tamavarṇayat || 191 ||
[Analyze grammar]

dadau ca tatra devāya śaṅkhacakrādyupāyanam |
vibhīṣaṇena prahitaṃ janavismayakārakam || 192 ||
[Analyze grammar]

atha tasya sapadi paṭṭaṃ baddhvā saṃtuṣya māthurāḥ sarve |
svādhīnāṃ rūpaṇikāṃ rājādeśena tāṃ cakruḥ || 193 ||
[Analyze grammar]

tataś ca tatra priyayā samaṃ tadā samṛddhakoṣo bahuratnasaṃcayaiḥ |
sa lohajaṅghaḥ pratikṛtya kuṭṭanī nikāramanyuṃ nyavasadyathāsukham || 194 ||
[Analyze grammar]

ity anyarūpasya vasantakasya mukhāt samākarṇya kathām avāpi |
baddhasya vatsādhipateḥ samīpe toṣaḥ paro vāsavadattayāntaḥ || 195 ||
[Analyze grammar]