Chapter 8

evaṃ guṇāḍhyavacasā sātha saptakathāmayi |
svabhāṣayā kathā divyā kathitā kāṇabhūtinā || 1 ||
[Analyze grammar]

tathaiva ca guṇāḍhyena paiśācyā bhāṣayā tayā |
nibaddhā saptabhir varṣair granthalakṣāṇi sapta sā || 2 ||
[Analyze grammar]

maitāṃ vidyādharā hārṣuriti tāmātmaśoṇitaiḥ |
aṭavyāṃ maṣyabhāvācca lilekha sa mahākaviḥ || 3 ||
[Analyze grammar]

tathā ca śrotumāyātaiḥ siddhavidyādharādibhiḥ |
nirantaramabhūttatra savitānamivāmbaram || 4 ||
[Analyze grammar]

guṇāḍhyena nibaddhāṃ ca tāṃ dṛṣṭvaiva mahākathām |
jagāma muktaśāpaḥ san kāṇabhūtir nijāṃ gatim || 5 ||
[Analyze grammar]

piśācā ye 'pi tatrāsannanye tatsahacāriṇaḥ |
te 'pi prāpurdivaṃ sarve divyamākarṇya tāṃ kathām || 6 ||
[Analyze grammar]

pratiṣṭhāṃ prāpaṇīyaiṣā pṛthivyāṃ me bṛhatkathā |
ayamartho 'pi me devyā śāpāntoktāvudīritaḥ || 7 ||
[Analyze grammar]

tatkathaṃ prāpayāmyenāṃ kasmai tāvatsamarpaye |
iti cācintayattatra sa guṇāḍhyo mahākaviḥ || 8 ||
[Analyze grammar]

athaiko guṇadevākhyo nandidevābhidhaḥ paraḥ |
tamūcaturupādhyāyaṃ śiṣyāvanugatāvubhau || 9 ||
[Analyze grammar]

tatkāvyasyārpaṇasthānamekaḥ śrīsātavāhanaḥ |
rasiko hi vahetkāvyaṃ puṣpāmodamivānilaḥ || 10 ||
[Analyze grammar]

evamastviti tau śiṣyāvantikaṃ tasya bhūpateḥ |
prāhiṇotpustakaṃ dattvā guṇāḍhyo guṇaśālinau || 11 ||
[Analyze grammar]

svayaṃ ca gatvā tatraiva pratiṣṭhānapurādbahiḥ |
kṛtasaṃketa udyāne tasthau devīvinirmite || 12 ||
[Analyze grammar]

gacchiṣyābhyāṃ ca gatvā tatsātavāhanabhūpateḥ |
guṇāḍhyakṛtireṣeti darśitaṃ kāvyapustakam || 13 ||
[Analyze grammar]

piśācabhāṣāṃ tāṃ śrutvā tau ca dṛṣṭvā tadākṛtī |
vidyāmadena sāsūyaṃ sa rājaivam abhāṣata || 14 ||
[Analyze grammar]

pramāṇaṃ saptalakṣāṇi paiśācaṃ nīrasaṃ vacaḥ |
śoṇitenākṣaranyāso dhikpiśācakathāmimām || 15 ||
[Analyze grammar]

tataḥ pustakamādāya gatvā tābhyāṃ yathāgatam |
śiṣyābhyāṃ tadguṇāḍhyāya yathāvṛttamakathyata || 16 ||
[Analyze grammar]

guṇāḍhyo 'pi tadākaṇya sadyaḥ khedavaśo 'bhavat |
tattvajñena kṛtāvajñaḥ ko nāmāntarna tapyate || 17 ||
[Analyze grammar]

saśiṣyaśca tato gatvā nātidūraṃ śiloccayam |
viviktaramyabhūbhāgamagnikuṇḍaṃ vyadhātpuraḥ || 18 ||
[Analyze grammar]

tatrāgnau pattramekaikaṃ śiṣyābhyāṃ sāśru vīkṣitaḥ |
vācayitvā sa cikṣepa śrāvayanmṛgapakṣiṇaḥ || 19 ||
[Analyze grammar]

naravāhanadattasya caritaṃ śiṣyayoḥ kṛte |
granthalakṣaṃ kathāmekāṃ varjayitvā tadīpsitām || 20 ||
[Analyze grammar]

tasmiṃśca tāṃ kathāṃ divyāṃ paṭhatyapi dahatyapi |
parityaktatṛṇāhārāḥ śṛṇvantaḥ sāśrulocanāḥ || 21 ||
[Analyze grammar]

āsannabhyetya tatraiva niścalā baddhamaṇḍalāḥ |
nikhilāḥ khalu sāraṅgavarāhamahiṣādayaḥ || 22 ||
[Analyze grammar]

atrāntare ca rājābhūdasvasthaḥ sātavāhanaḥ |
doṣaṃ cāsyāvadanvaidyāḥ śuṣkamāṃsopabhogajam || 23 ||
[Analyze grammar]

ākṣiptāstannimittaṃ ca sūpakārā babhāṣire |
asmākamīdṛśaṃ māṃsaṃ dadate lubdhakā iti || 24 ||
[Analyze grammar]

pṛṣṭāśca lubdhakā ūcurnātidūre girāvitaḥ |
paṭhitvā patramekaikaṃ ko 'pyagnau kṣipati dvijaḥ || 25 ||
[Analyze grammar]

tatsametya nirāhārāḥ śṛṇvanti prāṇino 'khilāḥ |
nānyato yānti tenaiṣāṃ śuṣkaṃ māṃsamidaṃ kṣudhā || 26 ||
[Analyze grammar]

iti vyādhavacaḥ śrutvā kṛtvā tāneva cāgrataḥ |
svayaṃ sa kautukādrājā guṇāḍhyasyāntikaṃ yayau || 27 ||
[Analyze grammar]

dadarśa taṃ samākīrṇaṃ jaṭābhirvanavāsataḥ |
praśāntaśeṣaśāpāgnidhūmikābirivābhitaḥ || 28 ||
[Analyze grammar]

athainaṃ pratyabhijñāya sabāṣpamṛgamadhyagam |
namaskṛtya ca papraccha taṃ vṛttāntaṃ mahīpatiḥ || 29 ||
[Analyze grammar]

so 'pi svaṃ puṣpadantasya rājñe śāpādiceṣṭitam |
jñānī kathāvatāraṃ tamācakhyau bhūtabhāṣayā || 30 ||
[Analyze grammar]

tato gaṇāvatāraṃ taṃ matvā pādānato nṛpaḥ |
yayāce tāṃ kathāṃ tasmāddivyāṃ haramukhodgatām || 31 ||
[Analyze grammar]

athovāca sa taṃ bhūpaṃ guṇāḍhyaḥ sātavāhanam |
rājan ṣaḍgranthalakṣāṇi mayā dagdhāni ṣaṭkathāḥ || 32 ||
[Analyze grammar]

lakṣamekamidaṃ tvasti kathaikā saiva gṛhyatām |
macchiṣyau tava cātraitau vyākhyātārau bhaviṣyataḥ || 33 ||
[Analyze grammar]

ityuktvā nṛpamāmantrya tyaktvā yogena tāṃ tanum |
guṇāḍhyaḥ śāpanirmuktaḥ prāpa divyaṃ nijaṃ padam || 34 ||
[Analyze grammar]

atha tāṃ guṇāḍhyadattāmādāya kathāṃ bṛhatkathāṃ nāmnā |
nṛpatiragānnijanagaraṃ naravāhanadattacaritamayīm || 35 ||
[Analyze grammar]

guṇadevanandidevau tatra ca tau tatkathākaveḥ śiṣyau |
kṣitikanakavastravāhanabhavanadhanaiḥ saṃvibheje saḥ || 36 ||
[Analyze grammar]

tābhyāṃ saha ca kathāṃ tāmāśvāsya sa sātavāhanastasyāḥ |
tadbhāṣayāvatāraṃ vaktuṃ cakre kathāpīṭham || 37 ||
[Analyze grammar]

sā ca citrarasanirbharā kathā vismṛtāmarakathā kutūhalāt |
tadvidhāya nagare nirantarāṃ khyātimatra bhuvanatraye gatā || 38 ||
[Analyze grammar]