Chapter 3

evamuktvā vararuciḥ śṛṇvatyekāgramānase |
kāṇabhūtau vane tatra punarevedamabravīt || 1 ||
[Analyze grammar]

kadācid yāti kāle 'tha kṛte svādhyāyakarmaṇi |
iti varṣa upādyāyaḥ pṛṣṭo 'smābhiḥ kṛtāhnikaḥ || 2 ||
[Analyze grammar]

idam evaṃvidhaṃ kasmān nagaraṃ kṣetratāṃ gatam |
sarasvatyāś ca lakṣmyāś ca tadupādhyāya kathyatām || 3 ||
[Analyze grammar]

tacchrutvā so 'bravīdasmāñchṛṇutaitatkathāmimām |
tīrthaṃ kanakhalaṃ nāma gaṅgādvāre 'sti pāvanam || 4 ||
[Analyze grammar]

yatra kāñcanapātena jāhnavī devadantinā |
uśīnaragiriprasthādbhittvā samavatāritā || 5 ||
[Analyze grammar]

dākṣiṇātyo dvijaḥ kaścit tapasyan bhāryayā saha |
tatrāsīt tasya cātraiva jāyante sma trayaḥ sutāḥ || 6 ||
[Analyze grammar]

kālena svargate tasminsabhārye te ca tatsutāḥ |
sthānaṃ rājagṛhaṃ nāma jagmurvidyārjanecchayā || 7 ||
[Analyze grammar]

tatra cādhītavidyāste trayo 'pyānāthyaduḥkhitāḥ |
yayuḥ svāmikumārasya darśane dakṣiṇāpatham || 8 ||
[Analyze grammar]

tatra te ciñcinīṃ nāma nagarīm ambudhes taṭe |
gatvā bhojikasaṃjñasya viprasya nyavasan gṛhe || 9 ||
[Analyze grammar]

sa ca kanyā nijāstisrastebhyo dattvā dhanāni ca |
tapase 'nanyasaṃtāno gaṅgāṃ yāti sma bhojikaḥ || 10 ||
[Analyze grammar]

atha teṣāṃ nivasatāṃ tatra śvaśuraveśmani |
avagrahakṛtastīvro durbhikṣaḥ samajāyata || 11 ||
[Analyze grammar]

tena bhāryāḥ parityajya sādhvīstāste trayo yayuḥ |
spṛśanti na nṛśaṃsānāṃ hṛdayaṃ bandhubuddhayaḥ || 12 ||
[Analyze grammar]

tatastu madhyamā tāsāṃ sagarbhābhūttataśca tāḥ |
bhavanaṃ yajñadattasya pitṛmitrasya śiśriyuḥ || 13 ||
[Analyze grammar]

tatra tasthur nijān bhartṝn dhyāyantyaḥ kliṣṭavṛttayaḥ |
āpadyapi satīvṛttaṃ kiṃ muñcanti kulastriyaḥ || 14 ||
[Analyze grammar]

kālena madhyamā cātra tāsāṃ putramasūta sā |
anyonyātiśayāttasminsnehaścāsāmavardhata || 15 ||
[Analyze grammar]

kadācidvyomamārgeṇa viharantaṃ maheśvaram |
aṅkasthā skandajananī taṃ dṛṣṭvā sadayāvadat || 16 ||
[Analyze grammar]

deva paśya śiśāv asminn etās tisro 'pi yoṣitaḥ |
baddhasnehā dadhatyāśāmeṣo 'smāñjīvayediti || 17 ||
[Analyze grammar]

tattathā kuru yenāyametā bālo 'pi jīvayet |
ityuktaḥ priyayā devo varadaḥ sa jagāda tām || 18 ||
[Analyze grammar]

anugṛhṇāmyamuṃ pūrvaṃ sabhāryeṇāmunā yataḥ |
arādhito 'smi tenāyaṃ bhogārthaṃ nirmito bhuvi || 19 ||
[Analyze grammar]

etajjāyā ca sā jātā pāṭalī nāma bhūpateḥ |
mahendravarmaṇaḥ putrī bhāryāsyaiva bhaviṣyati || 20 ||
[Analyze grammar]

ityuktvā sa vibhuḥ svapne sādhvīstisro jagāda tāḥ |
nāmnā putraka evāyaṃ yuṣmākaṃ bālaputrakaḥ || 21 ||
[Analyze grammar]

asya suptaprabuddhasya śīrṣānte ca dine dine |
suvarṇalakṣaṃ bhavitā rājā cāyaṃ bhaviṣyati || 22 ||
[Analyze grammar]

tataḥ suptotthite tasmin bāle tāḥ prāpya kāñcanam |
yajñadattasutāḥ sādhvyo nananduḥ phalitavratāḥ || 23 ||
[Analyze grammar]

atha tena suvarṇena vṛddhakoṣo 'cireṇa saḥ |
babhūva putrako rājā tapodhīnā hi saṃpadaḥ || 24 ||
[Analyze grammar]

kadācidyajñadatto 'tha rahaḥ putrakamabravīt |
rājandurbhikṣadoṣeṇa kvāpi tepitaro gatāḥ || 25 ||
[Analyze grammar]

tatsadā dehi viprebhyo yenāyānti viśamya te |
brahmadattakathāṃ caitāṃ kathayāmyatra te śṛṇu || 26 ||
[Analyze grammar]

vārāṇasyāmabhūtpūrvaṃ brahmadattābhidho nṛpaḥ |
so 'paśyaddhaṃsayugalaṃ prayāntaṃ gagane niśi || 27 ||
[Analyze grammar]

visphuratkanakacchāyaṃ rājahaṃsaśatairvṛtam |
vidyutpuñjamivākāṇḍasitābhrapariveṣṭitam || 28 ||
[Analyze grammar]

punastaddarśanotkaṇṭhā tathāsya vavṛdhe tataḥ |
yathā nṛpatisaukhyeṣu na babandha ratiṃ kvacit || 29 ||
[Analyze grammar]

mantribhiḥ saha saṃmantrya tataścākārayatsaraḥ |
sa rājā svamate kāntaṃ prāṇināṃ cābhayaṃ dadau || 30 ||
[Analyze grammar]

tataḥ kālena tau prāptau haṃsau rājā dadarśa saḥ |
viśvastau cāpi papraccha haime vapuṣi kāraṇam || 31 ||
[Analyze grammar]

vyaktavācau tatastau ca haṃsau rājānamūcatuḥ |
purā janmāntare kākāvāvāṃ jātau mahīpate || 32 ||
[Analyze grammar]

balyarthaṃ yudhyamānau ca puṇye śūnye śivālaye |
vinipatya vipannau svastatsthānadroṇikāntare || 33 ||
[Analyze grammar]

jātau jātismarāvāvāṃ haṃsau hemamayau tataḥ |
tacchrutvā tau yathākāmaṃ paśyanrājā tutoṣa saḥ || 34 ||
[Analyze grammar]

ato 'nanyādṛśādeva pitṛndānādavāpsyasi |
ityukto yajñadattena putrakastattathākarot || 35 ||
[Analyze grammar]

śrutvā pradānavārtāṃ tāmāyayuste dvijātayaḥ |
parijñātāḥ parāṃ lakṣmīṃ patnīśca saha lebhire || 36 ||
[Analyze grammar]

āścaryamaparityājyo dṛṣṭanaṣṭāpadāmapi |
avivekāndhabuddhīnāṃ svānubhāvo durātmanām || 37 ||
[Analyze grammar]

kālena rājyakāmāste putrakaṃ taṃ jighāṃsavaḥ |
ninyustaddarśanavyājāddvijā vindhyanivāsinīm || 38 ||
[Analyze grammar]

vadhakān sthāpayitvā ca devīgarbhagṛhāntare |
tam ūcuḥ pūrvam ekas tvaṃ paśya devīṃ vrajāntaram || 39 ||
[Analyze grammar]

tataḥ praviṣṭo viśvāsāt sa dṛṣṭvā hantum udyatān |
puruṣān putrako 'pṛcchat kasmān nihatha mām iti || 40 ||
[Analyze grammar]

pitṛbhiste prayuktāḥ smaḥ svarṇaṃ dattveti cābruvan |
tatas tān mohitān devyā buddhimān putrako 'vadat || 41 ||
[Analyze grammar]

dadāmyetadanarghaṃ vo ratnālaṃkaraṇaṃ nijam |
māṃ muñcata karomyatra nodbhedaṃ yāmi dūrataḥ || 42 ||
[Analyze grammar]

evamastviti tattasmādgṛhītvā vadhakā gatāḥ |
hataḥ putraka ityūcus tatpitṝṇāṃ puro mṛsā || 43 ||
[Analyze grammar]

tataḥ pratinivṛttāste hatā rājyārthino dvijāḥ |
mantribhirdrohiṇo buddhvā kṛtaghnānāṃ śivaṃ kutaḥ || 44 ||
[Analyze grammar]

atrāntare sa rājāpi putrakaḥ satyasaṃgaraḥ |
viveśa vindhyakāntāraṃ viraktaḥ sveṣu bandhuṣu || 45 ||
[Analyze grammar]

bhraman dadarśa tatrāsau bāhuyuddhaikatatparau |
puruṣau dvau tatastau sa pṛṣṭavān kau yuvām iti || 46 ||
[Analyze grammar]

mayāsurasutāvāvāṃ tadīyaṃ cāsti nau dhanam |
idaṃ bhājanameṣā ca yaṣṭirete ca pāduke || 47 ||
[Analyze grammar]

etan nimittaṃ yuddhaṃ nau yo balī sa hared iti |
etat tadvacanaṃ śrutvā hasan provāca putrakaḥ || 48 ||
[Analyze grammar]

kiyadetaddhanaṃ puṃsastatastau samavocatām |
pāduke paridhāyaite khecaratvamavāpyate || 49 ||
[Analyze grammar]

yaṣṭyā yallikhyate kiṃcitsatyaṃ saṃpadyate hi tat |
bhājane yo ya āhāraścintyate sa sa tiṣṭhati || 50 ||
[Analyze grammar]

tac chrutvā putrako 'vādīt kiṃ yuddhenāstv ayaṃ paṇaḥ |
dhāvan balādhiko yaḥ syāt sa evaitad dhared iti || 51 ||
[Analyze grammar]

evamastviti tau mūḍhau dhāvitau so 'pi pāduke |
adhyāsyodapatadvyoma gṛhītvā yaṣṭibhājane || 52 ||
[Analyze grammar]

atha dūraṃ kṣaṇādgatva dadarśa nagarīṃ śubhām |
ākarṣikākhyāṃ tasyāṃ ca nabhaso 'vatatāra saḥ || 53 ||
[Analyze grammar]

vañcanapravaṇā veśyā dvijā matpitaro yathā |
vaṇijo dhanalubdhāśca kasya gehe vasāmyaham || 54 ||
[Analyze grammar]

iti saṃcintayan prāpa sa rājā vijanaṃ gṛham |
jīrṇaṃ tadantare caikāṃ vṛddhāṃ yoṣitam aikṣata || 55 ||
[Analyze grammar]

pradānapūrvaṃ saṃtoṣya tāṃ vṛddhāmādṛtastayā |
uvāsālakṣitastatra putrakaḥ śīrṇasadmani || 56 ||
[Analyze grammar]

kadācitsātha saṃprītā vṛddhā putrakamabravīt |
cintā me putra yadbhāryā nānurūpā tava kvacit || 57 ||
[Analyze grammar]

iha rājñastu tanayā pāṭalītyasti kanyakā |
uparyantaḥpure sā ca ratnamityabhirakṣyate || 58 ||
[Analyze grammar]

etadvṛddhāvacastasya dattakarṇasya śṛṇvataḥ |
viveśa tenaiva pathā labdharandhro hṛdi smaraḥ || 59 ||
[Analyze grammar]

draṣṭavyā sā mayādyaiva kānteti kṛtaniścayaḥ |
niśāyāṃ nabhasā tatra pādukābhyāṃ jagāma saḥ || 60 ||
[Analyze grammar]

praviśya so 'driśṛṅgāgratuṅgavātāyanena tām |
antaḥpure dadarśārtha suptāṃ rahasi pāṭalīm || 61 ||
[Analyze grammar]

sevyamānāmavirataṃ candrakāntyāṅgalagnayā |
jitvā jagadidaṃ śrāntāṃ mūrtāṃ śaktiṃ manobhuvaḥ || 62 ||
[Analyze grammar]

kathaṃ prabodhayāmyetāmiti yābadacintayat |
ityakasmādvahistāvadyāmikaḥ puruṣo jagau || 63 ||
[Analyze grammar]

āliṅgya madhurahuṃkṛtimalasonmiṣadīkṣaṇāṃ rahaḥ kāntām |
yadbodhayanti suptāṃ janmani yūnāṃ tadeva phalam || 64 ||
[Analyze grammar]

śrutvaivaitadupoddhātamaṅgairutkampaviklavaiḥ |
āliliṅga sa tāṃ kāntāṃ prābudhyata tataśca sā || 65 ||
[Analyze grammar]

paśyantyāstaṃ nṛpaṃ tasyā lajjākautukayordṛśi |
abhūdanyonyasaṃmardo racayantyāṃ gatāgatam || 66 ||
[Analyze grammar]

athālāpe kṛte vṛtte gāndharmodvāhakarmaṇi |
avardhata tayoḥ prītirdaṃpatyorna tu yāminī || 67 ||
[Analyze grammar]

āmantryātha vadhūmutkāṃ tadgatenaiva cetasā |
āyayau paścime bhāge tadvṛddhāveśma putrakaḥ || 68 ||
[Analyze grammar]

itthaṃ pratiniśaṃ tatra kurvāṇe 'smin gatāgatam |
saṃbhogacihnaṃ pāṭalyā rakṣibhirdṛṣṭam ekadā || 69 ||
[Analyze grammar]

taistadāveditaṃ tasyāḥ pituḥ so 'pi niyuktavān |
gūḍhamantaḥpure tatra niśi nārimavekṣitum || 70 ||
[Analyze grammar]

tayā ca tasya prāptasya tatrābhijñānasiddhaye |
putrakasya prasuptasya nyastaṃ vāsasyalaktakam || 71 ||
[Analyze grammar]

prātastayā ca vijñapto rājā cārānvyasarjayat |
so 'bhijñānācca taiḥ prāptaḥ putrako jīrṇaveśmani || 72 ||
[Analyze grammar]

ānīto rājanikaṭaṃ kupitaṃ vīkṣya taṃ nṛpam |
pādukābhyāṃ khamutpatya pāṭalīmandire 'viśat || 73 ||
[Analyze grammar]

viditau svastaduttiṣṭha gacchāvaḥ pādukāvaśāt |
ityaṅke pāṭalīṃ kṛtvā jagāma nabhasā tataḥ || 74 ||
[Analyze grammar]

atha gaṅgātaṭanikaṭe gaganādavatīrya sa priyāṃ śrāntām |
pātraprabhāvajātairāhārairnandayāmāsa || 75 ||
[Analyze grammar]

ālokitaprabhāvaḥ pāṭalyā putrako 'rthitaśca tataḥ |
yaṣṭyā lilekha tatra sa nagaraṃ caturaṅgabalayuktam || 76 ||
[Analyze grammar]

tatra sa rājā bhūtvā mahāprabhāve ca satyatāṃ prāpte |
namayitvā taṃ śvaśuraṃ śaśākha pṛthvīṃ samudrāntām || 77 ||
[Analyze grammar]

tadidaṃ divyaṃ nagaraṃ māyāracitaṃ sapauramata eva |
nāmnā pāṭaliputraṃ kṣetraṃ lakṣmīsarasvatyoḥ || 78 ||
[Analyze grammar]

iti varṣamukhādimāmapūrvāṃ vayamākarṇya kathāmatīva citrām |
cirakālamabhūma kāṇabhūte vilasadvismayamodamānacittāḥ || 79 ||
[Analyze grammar]