Chapter 118

sūta uvāca |
ityevamāśvāsayato rājānaṃ janamejayam |
atītānāgataṃ vākyamṛṣeḥ pariṣadā śrutam || 1 ||
[Analyze grammar]

amṛtasyeva cāsvādaḥ prabhā candramaso yathā |
atarpayata tacchotraṃ maharṣervāṅmayo rasaḥ || 2 ||
[Analyze grammar]

dharmārthakāmasaṃyuktaṃ karuṇaṃ vīraharṣaṇam |
ramaṇīyaṃ tadākhyānaṃ kṛtsnaṃ pariṣadā śrutam || 3 ||
[Analyze grammar]

kecidaśrūṇi mumucuḥ śrutvā dadhyustathāpare |
itihāsaṃ tamṛṣiṇā pārāśaryeṇa darśitam || 4 ||
[Analyze grammar]

atītānāgataṃ yadvai muninoktaṃ dvijarṣabha || 4 ||
[Analyze grammar]

sadasyānto'bhyanujñāya kṛtvā cāpi pradakṣiṇam |
punardrakṣyāma ityuktvā jagāma bhagavānṛṣiḥ || 5 ||
[Analyze grammar]

anujagmustataḥ sarve prayāntamṛṣisattamam |
loke pravadatāṃ śreṣṭhaṃ śiṣṭāḥ sarve tapodhanāḥ || 6 ||
[Analyze grammar]

yāte bhagavati vyāse viprāḥ saha maharṣibhiḥ |
ṛtvijaḥ pārthivāścaiva pratijagmuryathāgatam || 7 ||
[Analyze grammar]

pannagānāṃ sughorāṇāṃ kṛtvā tāṃ vairayātanām |
jagāma roṣamutsṛtya rājā viṣamivoragaḥ || 8 ||
[Analyze grammar]

hotrāgnidīptaśirasaṃ paritrāya ca takṣakam |
āstīko'pyāśramapadaṃ jagāma ca mahāmuniḥ || 9 ||
[Analyze grammar]

rājāpi hāstinapuraṃ praviveśa janāvṛtaḥ |
anvaśāsacca muditastadā pramuditāḥ prajāḥ || 10 ||
[Analyze grammar]

kasyacittvatha kālasya sa rājā janamejayaḥ |
dīkṣito vājimedhāya vidhivadbhūridakṣiṇaḥ || 11 ||
[Analyze grammar]

saṃjñaptamaśvaṃ tatrāsya devī kāśyā vapuṣṭamā |
saṃviveśopagamyātha vidhidṛṣṭena karmaṇā || 12 ||
[Analyze grammar]

tāṃ tu sarvānavadyāṅgīṃ cakame vāsavastadā |
saṃjñaptamaśvaṃ āviśya tayā miśrībabhūva saḥ || 13 ||
[Analyze grammar]

tasminvikāre janite viditvā tattvataśca tat |
asaṃjñapto'yamaśvaste dhvaṃsetyadhvaryumabravīt || 14 ||
[Analyze grammar]

adhvaryurjñānasaṃpannastadindrasya viceṣṭitam |
kathayāmāsa rājarṣeḥ śaśāpa sa puraṃdaram || 15 ||
[Analyze grammar]

janamejaya uvāca |
yadyasti me yajñaphalaṃ tapo vā rakṣataḥ prajāḥ |
phalena tena sarveṇa bravīmi śrūyatāmidam || 16 ||
[Analyze grammar]

adyaprabhṛti devendramajitendriyamasthiram |
kṣatriyā vājimedhena na yakṣyantīti śaunaka || 17 ||
[Analyze grammar]

ṛtvijaścābravītkruddhaḥ sa rājā janamejayaḥ |
daurbalyaṃ bhavatāmetad yadayaṃ dharṣitaḥ kratuḥ || 18 ||
[Analyze grammar]

viṣaye me na vastavyaṃ dhvaṃsadhvaṃ saha bāndhavaiḥ |
ityuktāstatyajurviprāstaṃ nṛpaṃ jātamanyavaḥ || 19 ||
[Analyze grammar]

amarṣādanvaśāsacca patnīśālāgatāḥ striyaḥ |
rājā paramadharmajñastadāsau janamejayaḥ |
asatīṃ vapuṣṭamāmetāṃ nirvāsayata me gṛhāt |
yayā me caraṇo mūrdhni bhasmareṇūṣitaḥ kṛtaḥ || 20 ||
[Analyze grammar]

śauṇḍīryaṃ me'nayā bhagnaṃ yaśo mānaśca dūṣitaḥ |
naināṃ draṣṭumapīcchāmi parikliṣṭāmiva srajam || 21 ||
[Analyze grammar]

na svādu so'śnāti naraḥ sukhaṃ svapiti vā rahaḥ |
anvāste yaḥ priyāṃ bhāryāṃ pareṇa mṛditāmiha || 22 ||
[Analyze grammar]

punarnaivopabhuñjanti śvāvalīḍhaṃ haviryathā || 22 ||
[Analyze grammar]

evamuccaiḥ prabhāṣantaṃ kruddhaṃ pārikṣitaṃ nṛpam |
gandharvarājaḥ provāca viśvāvasuridaṃ vācaḥ || 23 ||
[Analyze grammar]

triyajñaśatayajvānaṃ vāsavastvāṃ na mṛṣyati |
na duṣyatīyaṃ patnī te vihiteyaṃ vapuṣṭamā || 24 ||
[Analyze grammar]

rambhā nāmāpsarā devī kāśirājasutā matā |
saiṣā yoṣidvarā rājan ratnabhūtānubhūyatām || 25 ||
[Analyze grammar]

yajñe vivaramāsādya vighnamindreṇa te kṛtam |
yajvā hyasi kuruśreṣṭha samṛddhyā vāsavopamaḥ || 26 ||
[Analyze grammar]

bibhetyabhibhavācchakrastava kratuphalairnṛpa |
tasmādāvartitaścaiva kraturindreṇa te vibho || 27 ||
[Analyze grammar]

māyaiṣā vāsaveneha prayuktā vighnamicchatā |
yajñe vivaramāsādya saṃjñaptaṃ dṛśya vājinam |
ratimindreṇa rambhāyāṃ manyase yāṃ vapuṣṭamām || 28 ||
[Analyze grammar]

atha te guravaḥ śaptāstriyajñaśatayājinaḥ |
bhraṃśitastvaṃ ca viprāśca phalādindrasamādiha |
tvattaścaiva sudurdharṣāttriyajñaśatayājinaḥ || 29 ||
[Analyze grammar]

bibheti hi sadā tvatto brāhmaṇebhyo'pi vāsavaḥ |
ekena vai tadubhayaṃ tīrṇaṃ śakreṇa māyayā || 30 ||
[Analyze grammar]

sa eṣa sumahātejā vijigīṣuḥ puraṃdaraḥ |
kathamanyairanācīrṇaṃ napturdārānatikramet || 31 ||
[Analyze grammar]

yathaiva hi parā buddhiḥ paro dharmaḥ paro damaḥ |
yathaiva paramaiśvaryaṃ kīrtiśca harivāhane |
tathaiva tava durdharṣa triyajñaśatayājinaḥ || 32 ||
[Analyze grammar]

mā vāsavaṃ mā ca gurumātmāṇaṃ mā vapuṣtamām |
gaccha doṣeṇa kālo hi sarvathā duratikramaḥ || 33 ||
[Analyze grammar]

aiśvaryeṇāśvamāviśya devendreṇābhiroṣitaḥ |
ānukūlyena devasya vartitavyaṃ sukhārthinā || 34 ||
[Analyze grammar]

dustaraṃ pratikūlaṃ hi pratisrota ivāmbhasaḥ |
strīratnamupabhuṅkṣvemāmapāpāṃ vigatajvaraḥ || 35 ||
[Analyze grammar]

apāpāstyajyamānā vai śapeyurapi yoṣitaḥ |
aduṣṭāstu striyo rājandivyāstu saviśeṣataḥ || 36 ||
[Analyze grammar]

bhānoḥ prabhā śikhā vahnervedīhotre tathāhutiḥ |
parāmṛṣṭāpyasaṃraktā nopaduṣyanti yoṣitaḥ || 37 ||
[Analyze grammar]

grāhyā lālayitavyāśca pūjyāśca satataṃ budhaiḥ |
śīlavatyo namaskāryāḥ pūjyāḥ striya iva striyaḥ || 38 ||
[Analyze grammar]

sūta uvāca |
evaṃ sa viśvāvasunānunītaḥ prasādamāgamya vapuṣṭamāyām |
cakāra mithyāvyatiśaṅkitātmā śāntiṃ parāṃ tatra sa dharmajuṣṭām || 39 ||
[Analyze grammar]

śramamabhivinivartya mānasaṃ sa samabhilaṣajjanamejayo yaśaḥ svam |
viṣayamanuśaśāsa dharmabuddhirmuditamanā ramayanvapuṣṭamāṃ tām || 40 ||
[Analyze grammar]

na ca viramati viprapūjanānna ca vinivartati yajñaśīlanāt |
na ca viṣayaparirakṣaṇāccyuto'sau na ca parigarhati vapuṣṭamāṃ ca || 41 ||
[Analyze grammar]

vidhivihitamaśakyamanyathā hi kartum yadṛṣiracintyatapāḥ purābravītsaḥ |
na ca tadaśakyamanyathā hi kartum |
iti narapatirātmavāṃstadāsau tadanuvicintya babhūva vītamanyuḥ || 42 ||
[Analyze grammar]

iti nṛpatiradīnavikramastadanuvicintya babhūva nirvṛtaḥ || 42 ||
[Analyze grammar]

idaṃ mahākāvyamṛṣermahātmanaḥ paṭhannṛṇāṃ pūjyatamo bhavennaraḥ |
prakṛṣṭamāyuḥ samavāpya durlabhaṃ labheta sarvajñaphalaṃ ca kevalam || 43 ||
[Analyze grammar]

śatakratoḥ kalmaṣavipramokṣaṇaṃ paṭhanidaṃ mucyati kalmaṣānnaraḥ |
tathaiva kāmānvividhān samaśnute samāptakāmaśca cirāya nandati || 44 ||
[Analyze grammar]

yathā hi puṣpaprabhavaṃ phalaṃ drumāttataḥ prajāyanti punaśca pādapāḥ |
tathā maharṣiprabhavā imā giraḥ pravardhayante tamṛṣiṃ pravartitāḥ || 45 ||
[Analyze grammar]

putrānaputro labhate suvarcasaścyutaḥ punarvindati cātmanaḥ sthitim |
vyādhiṃ na cāpnoti ciraṃ ca bandhanaṃ kriyāṃ ca puṇyāṃ labhate guṇānvitaḥ || 46 ||
[Analyze grammar]

patimupalabhate ca satsu kanyā śravaṇamupetya śubhā munestu vācaḥ |
janayati ca sutān guṇairupetān ripujanamardanavīryaśālinaśca || 47 ||
[Analyze grammar]

vijayati vasudhāṃ ca kṣatravṛttirdhanamatulaṃ labhate dviṣajjayaṃ ca |
vipulamapi dhanaṃ labhecca vaiśyaḥ sugatimiyācchravaṇācca śūdrajātiḥ || 48 ||
[Analyze grammar]

purāṇametaccaritaṃ mahātmanāmadhītya buddhiṃ labhate ca naiṣṭhikīm |
vihāya duḥkhāni vimuktasaṅgaḥ sa vītarāgo vicaredvasuṃdharām || 49 ||
[Analyze grammar]

ityetadākhyānamudāhṛtaṃ vaḥ pratismaranto dvijamaṇḍaleṣu |
sthairyeṇa jātena punaḥ smarantaḥ sukhaṃ bhavanto vicarantu lokam || 50 ||
[Analyze grammar]

iti caritamidaṃ mahātmanāmṛṣikṛtamadbhutavīryakarmaṇām |
kathitamidaṃ hi samāsavistaraiḥ kimaparamicchasi kiṃ bravīmi te || 51 ||
[Analyze grammar]