Chapter 116

janamejaya uvāca |
āsannaṃ viprakṛṣṭaṃ vā yadi kālaṃ na vidmahe |
tasmāddvāparavidhvaṃsād yugāntaṃ spṛhayāmyaham || 1 ||
[Analyze grammar]

prāptā vayaṃ hi taṃ kālamanayā dharmatṛṣṇayā |
prāptā vayaṃ ca dharmaṃ svaṃ sukhamalpena karmaṇā || 2 ||
[Analyze grammar]

prajāsamudvegakaraṃ yugāntaṃ samupasthitam |
tasmātsamudvegakare yugānte pratyupasthite |
pranaṣṭadharmaṃ dharmajña nimittairvaktumarhasi || 3 ||
[Analyze grammar]

sūta uvāca |
pṛṣṭa evaṃ bhaviṣyasya gatiṃ tattvena cintayan |
evaṃ bhaviṣye tu gatiṃ yogenaiva vicintayan |
yugānte pūrvarūpāṇi bhagavānabravīttadā || 4 ||
[Analyze grammar]

vyāsa uvāca |
arakṣitāro hartāro balibhāgasya pārthivāḥ |
yugānte prabhaviṣyanti svarakṣaṇaparāyaṇāḥ || 5 ||
[Analyze grammar]

akṣatriyāśca rājāno viprāḥ śūdropajīvinaḥ |
śūdrāśca brāhmaṇācārā bhaviṣyanti yugakṣaye || 6 ||
[Analyze grammar]

śūdrā dharmaṃ cariṣyanti yugānte janamejaya || 6 ||
[Analyze grammar]

kāṇḍapṛṣṭhāḥ śrotriyāśca havīṃṣi bharatarṣabha |
ekapaṅktyāmaśiṣyanti yugānte janamejaya || 7 ||
[Analyze grammar]

śilpavanto'nṛtaparāḥ narā madyāmiṣapriyāḥ |
paraṃ dharmaṃ haniṣyanti manuṣyā mandabuddhayaḥ |
bhāryāmitrā bhaviṣyanti yugānte janamejaya || 8 ||
[Analyze grammar]

alpodakāstathā meghā alpasasyā ca medinī || 8 ||
[Analyze grammar]

rājavṛtte sthitāścorā rākānaścoraśīlinaḥ |
bhṛtyā anirviṣṭabhujo bhaviṣyanti yugakṣaye || 9 ||
[Analyze grammar]

dhanāni ślāghanīyāni satāṃ vṛttamapūjitam |
nāryaścāpi kariṣyanti kṛṣimeva kalau yuge |
akutsanā ca patite bhaviṣyati yugakṣaye || 10 ||
[Analyze grammar]

aśāntāstāpasā nityaṃ bhaviṣyanti kalau yuge || 10 ||
[Analyze grammar]

pranaṣṭacetanā martyā muktakeśā vicūlinaḥ |
unaṣoḍaśavarṣāśca prajāsyanti narāstadā || 11 ||
[Analyze grammar]

aṭṭaśūlā janapadāḥ śivaśūlāścatuṣpathāḥ |
pramadāḥ keśaśūlāśca bhaviṣyanti yugakṣaye || 12 ||
[Analyze grammar]

aṭṭamannamiti proktaṃ śūlo vikraya ucyate || 12 ||
[Analyze grammar]

catuṣpathā brāhmaṇa iti śivo veda udāhṛtaḥ || 12 ||
[Analyze grammar]

keśo bhaga iti khyāto rājannaivātra saṃśayaḥ || 12 ||
[Analyze grammar]

sarve brahma vadiṣyanti sarve vājasaneyinaḥ |
śūdrā bhovādinaścaiva bhaviṣyanti yugakṣaye || 13 ||
[Analyze grammar]

tapoyajñārthavedānāṃ vikretāro dvijātayaḥ |
ṛtavaśca bhaviṣyanti viparītā yugakṣaye || 14 ||
[Analyze grammar]

śukladantājitākṣāśca muṇḍāḥ kāṣāyavāsasaḥ |
śūdrā dharmaṃ cariṣyanti śākyabuddhopajīvinaḥ || 15 ||
[Analyze grammar]

śvāpadapracuratvaṃ ca gavāṃ caiva parikṣayaḥ |
svādūnāṃ vinivṛttiśca vidyādantagate yuge || 16 ||
[Analyze grammar]

antyā madhye nivatsyanti madhyāścāntāvasāyinaḥ |
yathānimnaṃ prajāḥ sarvā gamiṣyanti yugakṣaye || 17 ||
[Analyze grammar]

tathā dvihāyanā damyāstathā palvalakarṣakāḥ |
citravarṣī ca parjanyo yuge kṣīṇe bhaviṣyati || 18 ||
[Analyze grammar]

sarve corakule jātāścorayānāḥ parasaram || 18 ||
[Analyze grammar]

svalpenāḍhyā bhaviṣyanti yatkiṃcitprāpya durgatāḥ || 18 ||
[Analyze grammar]

na te dharmaṃ cariṣyanti mānavā nirgate yuge |
ūṣarābahulā bhūmiḥ panthāno nagarāntarā |
sarve vāṇijakāścaiva bhaviṣyanti kalau yuge || 19 ||
[Analyze grammar]

pitṛkṛtyāni deyāni vidhamantaḥ sutāstadā |
haraṇāya prapatsyante lobhānṛtavirodhitāḥ || 20 ||
[Analyze grammar]

pitṛdattāni vittāni nighnantastanayāḥ sadā || 20 ||
[Analyze grammar]

grahaṇāya pravartante lobhādanṛtavādinaḥ || 20 ||
[Analyze grammar]

saukumārye tathā rūpe ratne copakṣayaṃ gate |
bhaviṣyanti yugasyānte nāryaḥ keśairalaṃkṛtāḥ || 21 ||
[Analyze grammar]

nirvihārasya bhītasya gṛhasthasya bhaviṣyati |
yugānte samanuprāpte nānyā bhāryāsamā ratiḥ || 22 ||
[Analyze grammar]

kuśīlānāryabhūyiṣṭhaṃ vṛthārūpasamāvṛtam |
puruṣālpaṃ bahustrīkaṃ tad yugāntasya lakṣaṇam || 23 ||
[Analyze grammar]

bahuyācanakā lokā dāsyante ca parasparam |
avicārya grahīṣyanti dānaṃ varṇāntarāttathā |
rājacorādidaṇḍārto janaḥ kṣayamupaiṣyati || 24 ||
[Analyze grammar]

sasyaniṣpattiraphalā taruṇā vṛddhaśīlinaḥ |
īhayāsukhino lokā bhaviṣyanti gate yuge || 25 ||
[Analyze grammar]

varṣāsu vātāḥ puruṣā nīcāḥ śarkaravarṣiṇaḥ |
saṃdigdhaḥ paralokaśca bhaviṣyati yugakṣaye || 26 ||
[Analyze grammar]

ātmanaśca durācārā brahmadūṣaṇatatparāḥ || 26 ||
[Analyze grammar]

ātmānaṃ bahu manyante manyurevābhyayāddvijān || 26 ||
[Analyze grammar]

vaiśyācārāśca rājanyā dhanadhānyopajīvinaḥ |
yugāpakramaṇe pūrvaṃ bhaviṣyanti dvijātayaḥ || 27 ||
[Analyze grammar]

apravṛttāḥ prapatsyante samayāḥ śapathāstathā |
ṛṇaṃ ca vinayabhraṃśo yuge kṣīṇe bhaviṣyati || 28 ||
[Analyze grammar]

bhaviṣyatyaphalo harṣaḥ krodhaśca saphalo nṛṇām |
ajāścaivopayokṣyante payaso'rthe yugakṣaye || 29 ||
[Analyze grammar]

aśāstravihitā prajñā evameva bhaviṣyati |
aśāstraviduṣāṃ puṃsāmevameva svabhāvataḥ |
apramāṇaṃ kariṣyanti nītiṃ paṇḍitamāninaḥ |
śāstroktasyāpravaktāro bhaviṣyanti yugakṣaye || 30 ||
[Analyze grammar]

sarvaḥ sarvaṃ vijānāti vṛddhānanupasevya ca |
na kaścidakavirnāma yugānte pratyupasthite || 31 ||
[Analyze grammar]

na kṣatrāṇi niyokṣyanti vikarmasthā dvijātayaḥ |
coraprāyāśca rājāno yugānte pratyupasthite || 32 ||
[Analyze grammar]

kuṇḍā vṛṣā naikṛtikāḥ surāpā brahmavādinaḥ |
aśvamedhena yakṣyanti yugānte janamejaya || 33 ||
[Analyze grammar]

ayājyānyājayiṣyanti tathābhakṣyasya bhakṣiṇaḥ |
brāhmaṇā dhanatṛṣṇārtā yugānte samupasthite || 34 ||
[Analyze grammar]

bhogārthamabhipatsyante na ca kaścitpaṭhiṣyati |
ekaśaṅkhāstathā nāryo gavedhukapinaddhakāḥ || 35 ||
[Analyze grammar]

nakṣatrāṇi vihīnāni viparītā diśastathā |
saṃdhyārāgo'tha digdāho bhaviṣyatyapare yuge || 36 ||
[Analyze grammar]

pitṝnputrā niyokṣyanti vadhvaḥ śvaśrūśca karmasu |
vākśaraistarjayiṣyanti gurūñchiṣyāstathaiva ca |
mukheṣu ca prayokṣyanti pramattāśca narāstadā |
viyoniṣu cariṣyanti pramadāsu narāstadā || 37 ||
[Analyze grammar]

akṛtāgrāṇi bhokṣyanti narāścaivāgnihotriṇaḥ |
bhikṣāṃ balimadattvā ca bhokṣyanti puruṣāḥ svayam || 38 ||
[Analyze grammar]

patīn suptānvañcayitvā gamiṣyanti striyo aṇyataḥ |
puruṣāśca prasuptāsu bhāryāsu ca parastriyam || 39 ||
[Analyze grammar]

nāvyadhito nāpyarujo janaḥ sarvo'bhyasūyakaḥ |
na kṛtapratikartā ca kāle kṣīṇe bhaviṣyati || 40 ||
[Analyze grammar]