Chapter 108

vaiśaṃpāyana uvāca |
tato dvāravatīmadhye prākārairupaśobhitam |
tato dvāravatīmadhye kāmasya bhavanaṃ śubham |
tatsamīpe'niruddhasya bhavanaṃ sā sma paśyati || sauvarṇavedikāstambhaṃ rukmavaidūryatoraṇam |
mālyadāmāvasaktaṃ ca pūrṇakumbhopaśobhitam || barhikaṇṭhānatagrīvaṃ prāsādairekasaṃcayaiḥ |
maṇipravālasaṃstīrṇaṃ divyagandharvanāditam |
dadarśa bhavanaṃ yatra prādyumniravasatsukham || 1 ||
[Analyze grammar]

tataḥ praviśya sahasā bhavanaṃ tasya tanmahat |
tatrāniruddhaṃ sāpaśyaccitralekhā varāpsarāḥ |
dadarśa madhye nārīṇāṃ tārāpatimivoditam || 2 ||
[Analyze grammar]

krīḍāvihāre nārībhiḥ sevyamānamitastataḥ |
pibantaṃ madhu mādhvīkaṃ śriyā paramayā yutam |
varāsanagataṃ tatra yathaivailavilaṃ tathā || 3 ||
[Analyze grammar]

vādyate samatālaṃ ca gīyate madhuraṃ tathā || 3 ||
[Analyze grammar]

na ca tasya manastatra tamevārthamacintayat || 3 ||
[Analyze grammar]

striyaḥ sarvaguṇopetā nṛtyante tatra tatra vai || 3 ||
[Analyze grammar]

na cāsya manasastuṣṭiṃ citralekhā prapaśyati || 3 ||
[Analyze grammar]

na cābhiramate bhogairna cāpi madhu sevate || 3 ||
[Analyze grammar]

vyaktamasya hi tatsvapnaṃ hṛdaye parivartate || 3 ||
[Analyze grammar]

iti tatraiva buddhyā ca niścitā gatasādhvasā || 3 ||
[Analyze grammar]

sā dṛṣṭvā paramastrīṇāṃ madhye śakradhvajopamam || 3 ||
[Analyze grammar]

priyāsu gīyamānāsu nṛtyamānāsu sarvaśaḥ || 3 ||
[Analyze grammar]

cintayāviṣṭadehā sā citralekhā manasvinī |
kathaṃ kāryamidaṃ kāryaṃ kathaṃ svasti bhavenmama || 4 ||
[Analyze grammar]

sāntarhitā cintayitvā citralekhā yaśasvinī |
tāmasyā chādayāmāsa vidyayā śubhalocanā || 5 ||
[Analyze grammar]

harmye strīgaṇamadhyasthaṃ kṛtvā cāntarhitaṃ tadā |
utpapāta gṛhītvā sā prādyumniṃ yuddhadurmadam || 6 ||
[Analyze grammar]

sā tamadhvānamāgamya siddhacāraṇasevitam |
sahasā śoṇitapuraṃ praviveśa manojavā || 7 ||
[Analyze grammar]

adarśanaṃ tamānīya māyayā kāmarūpiṇī || 7 ||
[Analyze grammar]

aniruddhaṃ mahābhāgā yatroṣā tatra gacchati || 7 ||
[Analyze grammar]

uṣāyādarśayaccainaṃ citrābharaṇabhūṣitam || 7 ||
[Analyze grammar]

citrāmbaradharaṃ vīraṃ kandarpasamarūpiṇam || 7 ||
[Analyze grammar]

tṛtīye tu muhūrte sā prāptā bāṇapuraṃ tadā || 7 ||
[Analyze grammar]

uṣāṃ tāṃ darśayāmāsa paśyainaṃ yadyasau bhavet || 7 ||
[Analyze grammar]

evamuktā tadā kanyā bāṇasya duhitā tataḥ || 7 ||
[Analyze grammar]

tatroṣā vismitā dṛṣṭvā harmyasthā sakhisaṃnidhau |
praveśayāmāsa tadā saṃprāptaṃ svagṛhaṃ tataḥ || 8 ||
[Analyze grammar]

praveśite'niruddhe tu prahṛṣṭā sahitā tayā || 8 ||
[Analyze grammar]

sakhījanasamāyuktā lajjamānā śucismitā || 8 ||
[Analyze grammar]

praharṣotphullanayanā priyaṃ dṛṣṭvārthakovidā |
sā harmyasthā tamarghyeṇa yādavaṃ samapūjayat |
citralekhāṃ pariṣvajya priyākhyānairayojayat |
tvaritā kāminī prāha citralekhāṃ bhayāturā || 9 ||
[Analyze grammar]

sakhīdaṃ vai kathaṃ guhyaṃ kāryaṃ kāryaviśārade |
guhye kṛte bhavetsvasti prakāśe jīvitakṣayaḥ || 10 ||
[Analyze grammar]

citralekhābravīdvākyaṃ śṛṇu tvaṃ niścayaṃ sakhi || 10 ||
[Analyze grammar]

kṛtaṃ puruṣakāraṃ hi daivaṃ nāśayate sakhi || 10 ||
[Analyze grammar]

na vai devyāḥ prasādaste anukūlo bhaviṣyati || 10 ||
[Analyze grammar]

apramādātkṛtaṃ guhyaṃ na kaścijjñāsyate naraḥ || 10 ||
[Analyze grammar]

sakhyā vai evamuktā sā paryavasthitacetanā || 10 ||
[Analyze grammar]

evametaditi prāha sāniruddhamidaṃ vacaḥ || 10 ||
[Analyze grammar]

diṣṭyā svapnagataścoro dṛśyate subhago janaḥ || 10 ||
[Analyze grammar]

yatkṛte tu vayaṃ khinnā durlabhapriyakāṅkṣayā || 10 ||
[Analyze grammar]

kaccittava mahābāho kuśalaṃ sarvatogatam || 10 ||
[Analyze grammar]

hṛdayaṃ hi mṛdu strīṇāṃ tena pṛcchāmyahaṃ tava || 10 ||
[Analyze grammar]

tasyāstadvacanaṃ śrutvā uṣāyāḥ ślakṣṇamarthavat || 10 ||
[Analyze grammar]

so'pyāha yaduśārdūlaḥ śubhākṣarataraṃ vacaḥ || 10 ||
[Analyze grammar]

harṣaviplutanetrāyāḥ pāṇināśru pramṛjya ca || 10 ||
[Analyze grammar]

prahasya sasmitaṃ prāha hṛdayagrāhakaṃ vacaḥ || 10 ||
[Analyze grammar]

kuśalaṃ me varārohe sarvatra mitabhāṣiṇi || 10 ||
[Analyze grammar]

tvatprasādena me devi priyamāvedayāmi te || 10 ||
[Analyze grammar]

adṛṣṭapūrvaśca mayā deśo'yaṃ śubhadarśane || 10 ||
[Analyze grammar]

niśi svapne mayā dṛṣṭaṃ sakṛtkanyāpuraṃ mahat || 10 ||
[Analyze grammar]

evamevamahaṃ bhīru tvatprasādādihāgataḥ || 10 ||
[Analyze grammar]

na ca tad rudrapatnyā vai mithyā vākyaṃ bhaviṣyati || 10 ||
[Analyze grammar]

devyāstu prītimājñāya tvatpriyārthaṃ ca bhāvini || 10 ||
[Analyze grammar]

anuprāpto'smi cādyaiva prasīda śaraṇaṃ gataḥ || 10 ||
[Analyze grammar]

ityuktvā ramayāmāsa so'niruddho mahāyaśāḥ || 10 ||
[Analyze grammar]

ityuktvā tvaramāṇā sā guhyadeśe svalaṃkṛtā |
kāntena saha saṃyuktā sthitā vai bhītabhītavat |
tataścodvāhadharmeṇa gāndharveṇa samīyatuḥ |
anyonyaṃ rematustau tu cakravākau yathā divā || patinā sāniruddhena mumude tu varāṅganā |
kāntena saha saṃyuktā divyasraganulepanā |
ekadeśe gṛhasyāsya pracchanno caiva bhāminī |
kareṇurdviradeneva varayāmāsa saṃgatā || papau tasya mukhaṃ sādhvī samāliṅgya yathākramam |
netre cucumba sā devī bāṇasya duhitā yadum || bhūyo bhūyaḥ samāśliṣya yatheṣṭaṃ madamohitā |
na tṛptimāyayau sā tu samāliṅgya yadūttamam || vaiśaṃpāyanaḥ tāmasyā vidyayā yuktaḥ prādyumniratha tatkṣaṇāt |
cintayāmāsa taṃ dṛṣṭvā gṛhe strījanamadbhutam || ko'yaṃ vidhirmama mahānna jāne tvasya kāraṇam |
svapno'yaṃ kiṃ mayā dṛṣṭa utāho vibhramo mama || jāgarmyahaṃ na me svapno na ca ma vibhramo mahān |
keyamagre sthitā subhrūrlateva ca supuṣpitā || udbhrāntahariṇāpaṅgī bhrūlatābhaṅgabhāṣiṇī |
pīnastanorujaghanā tāmrapādakarādharā || nīlakuñcitakeśāḍhyā madhurasmitabhāṣiṇī |
mama netrapathākrāntā candralekheva śāradī |
kimidaṃ nātra jānāmi kenedaṃ pratipāditam || dṛṣṭvāsya vavṛdhe kāmastāmuṣāṃ madamohitām |
sā ca tatpurataḥ sākṣātpānaṃ kartuṃ samudyatā || atha tāmiṅgitairjñātvā śrutvā caiva yathārthataḥ |
ramayāmāsa ramaṇīṃ kāmatastāṃ manoramām || sā cāpi taṃ samāsādya harṣabhītākulekṣaṇā |
kāmato ramayāmāsa romāñcodgatakarkaśā || līlāsaṃlāpalalitairlalanā taṃ samācarat |
kareṇuriva mātaṅgaṃ vāśitā girigahvare |
aniruddhaṃ mahābāhuṃ nidrāparavaśaṃ gataṃ |
tato niruddhaḥ svapne tu svapurāccitralekhayā |
nīto bāṇapuraṃ sadyaḥ saṃgataścoṣayā saha || dṛṣṭvaivaṃ svapnasaṃsargaṃ uṣayā svasya cādbhutam |
vacanena vimohitām || sa tataścitralekhāṃ tāmavekṣyovāca yādavaḥ |
dvārakānagarācchīgramānītaścitralekhayā || bāṇasya nagaraṃ prāpya saṃgato'smyuṣayā rahaḥ |
evaṃ svapno mayā dṛṣṭo vicitro'dṛṣṭapūrvakaḥ || ko'yaṃ vidhirmamāyātaḥ kā tvaṃ kaiṣā ca bhāminī |
keyaṃ purī gṛhaṃ kasya tattvamākhyātumarhasi || iti bruvantaṃ taṃ dṛṣṭvā citralekhā vaco'bravīt |
api te kuśalaṃ vīra sarvatra yadunandana |
ramamāṇāniruddhena avijñātā tu sā tadā || 11 ||
[Analyze grammar]

papau cāsyā mukhaṃ kāmī samāliṅgya dṛḍhaṃ yaduḥ || 11 ||
[Analyze grammar]

parasparaṃ samāśliṣya parasparamukhaṃ papuḥ || 11 ||
[Analyze grammar]

tayodyatāṃ tato mādhvīṃ papau śiṣṭāmapāyayat || 11 ||
[Analyze grammar]

tayorevaṃ tadā kāmo vavṛdhe janasaṃsadi || 11 ||
[Analyze grammar]

citralekhā tataḥ sādhvī bhūṣayāmāsa bhūṣaṇaiḥ || 11 ||
[Analyze grammar]

vastrairābharaṇaiścitrairmālyaiśca bahugandhibhiḥ || 11 ||
[Analyze grammar]

rarāja yaduvīrastu rohiṇyā candramā yathā || 11 ||
[Analyze grammar]

saudhamārge tatastau tu daṃpatī rematuściram || 11 ||
[Analyze grammar]

tāṃ tathā ramayāmāsa yatheṣṭaṃ yadunandanaḥ || 11 ||
[Analyze grammar]

parasparasya vadanaṃ papatustau parasparam || 11 ||
[Analyze grammar]

alaṃkṛtastayā tatra saṃgataścoṣayā rahaḥ || 11 ||
[Analyze grammar]

papau tasya mukhaṃ sādhvī samāliṅgya yathākramam || 11 ||
[Analyze grammar]

netre ca cumbito devī bāṇasya duhitā sakhī || 11 ||
[Analyze grammar]

tasminneva kṣaṇe prāpte yadūnāmṛṣabho hi saḥ |
divramālyāmbaradharo divyasraganulepanaḥ |
uṣayā saha saṃyukto vijñāto bāṇarakṣibhiḥ || 12 ||
[Analyze grammar]

damayantyā nalo yathā || 12e ||
[Analyze grammar]

vijahāra yathākāmaṃ ramayaṃstāmuṣāṃ śubhām || 12e ||
[Analyze grammar]

vaiśaṃpāyanaḥ |
atha tasyāmavasthāyāṃ sthavirā vetrapāṇayaḥ || 12e ||
[Analyze grammar]

āmuktakañcukā rājan kañcukīyāḥ samantataḥ || 12e ||
[Analyze grammar]

aniruddhaṃ tato jñātvā sārdhaṃ kanyāpure sthitam || 12e ||
[Analyze grammar]

uṣayā bāṇasutayā ramayantaṃ yatheṣṭataḥ || 12e ||
[Analyze grammar]

rakṣiṇaḥ sahasā gatvā bhītā bāṇāntikaṃ tadā || 12e ||
[Analyze grammar]

atha dīptāyudhodagrā nityaṃ suparirakṣakāḥ || 12e ||
[Analyze grammar]

te bhītāḥ kathayāmāsuraniruddhasya ceṣṭitam || 12e ||
[Analyze grammar]

eṣa kaścinmahārāja uṣayā saha saṃgataḥ || 12e ||
[Analyze grammar]

sthitaḥ kanyāpure rājan kaścāsau kuta ityapi || 12e ||
[Analyze grammar]

āyātaḥ sahasā rājanna vidmo'sya gatiṃ vibho || 12e ||
[Analyze grammar]

śrutvaitad roṣayuktastu balaṃ bāṇo nirīkṣya tat || 12e ||
[Analyze grammar]

tatastaiścārapuruṣairbāṇasyāveditaṃ tadā |
yathādṛṣṭamaśeṣeṇa kanyāyāstadvyatikramam || 13 ||
[Analyze grammar]

tataḥ kiṃkarasainyaṃ tu vyādiṣṭaṃ bhīmakarmaṇā |
baleḥ putreṇa bāṇena vīreṇāmitraghātinā || 14 ||
[Analyze grammar]

gacchadhvaṃ sahitāḥ sarve hanyatāmeṣa durmatiḥ |
yena naḥ kulacāritraṃ dūṣitaṃ dūṣitātmanā || 15 ||
[Analyze grammar]

uṣāyāṃ dharṣitāyāṃ hi kulaṃ no dharṣitaṃ mahat |
asaṃpradānādyo'smābhiḥ svayaṃgrāhamadharṣayat || 16 ||
[Analyze grammar]

aho vīryamaho dhairyamaho dhārṣṭyaṃ ca durmateḥ |
yaḥ puraṃ bhavanaṃ cedaṃ praviṣṭo naḥ subāliśaḥ || 17 ||
[Analyze grammar]

evamuktvā punastāṃstu kiṃkarāṃścodayadbhṛśam || 17 ||
[Analyze grammar]

te tasyājñāmatho gṛhya susaṃnaddhā viniryayuḥ || 17 ||
[Analyze grammar]

yatrāniruddho hyabhavattatrāgacchanmahābalāḥ || 17 ||
[Analyze grammar]

nānāśastrodyatakarā nānārūpadharāstu te |
dānavāḥ samabhikruddhāḥ prādyumnivadhakāṅkṣiṇaḥ || 18 ||
[Analyze grammar]

rudate tadbalaṃ dṛṣṭvā bāṣpeṇāvṛtalocanā || 18 ||
[Analyze grammar]

prādyumnivadhabhītā sā bāṇaputrī yaśasvinī || 18 ||
[Analyze grammar]

tatastu rudatīṃ dṛṣṭvā tāmuṣāṃ mṛgalocanām || 18 ||
[Analyze grammar]

hā hā kānteti vepantīmaniruddho'bhyabhāṣata || 18 ||
[Analyze grammar]

abhayaṃ te'stu saśroṇi mā bhaistvaṃ hi mayi sthite || 18 ||
[Analyze grammar]

saṃprāpto harṣakālaste na te'sti bhayakāraṇam || 18 ||
[Analyze grammar]

kṛtsno'yaṃ yadi bāṇasya bhṛṭyavargo yaśasvini || 18 ||
[Analyze grammar]

āgaccheta na me cintā bhīru paśyādya vikramam || 18 ||
[Analyze grammar]

tasya sainyasya ninadaṃ śrutvābhyāgacchatastataḥ || 18 ||
[Analyze grammar]

sahasaivotthitaḥ śrīmānprādyumniḥ kimiti bruvan || 18 ||
[Analyze grammar]

athāsyāpaśyata balaṃ nānāpraharaṇodyatam || 18 ||
[Analyze grammar]

sthitaṃ samantatastatra parivārya gṛhaṃ mahat || 18 ||
[Analyze grammar]

tato'bhyagacchattvarito yatra tadveṣṭitaṃ balam || 18 ||
[Analyze grammar]

kruddhaḥ svabalamāsthāya saṃdaśya daśanacchadam || 18 ||
[Analyze grammar]

tato yuddhamapoḍhānāṃ bāṇeyānāṃ niśamya tu || 18 ||
[Analyze grammar]

sā citralekhā sasmāra nāradaṃ devadarśanam || 18 ||
[Analyze grammar]

tato nimeṣamātreṇa saṃprāpto munipuṃgavaḥ || 18 ||
[Analyze grammar]

smṛto'tha citralekhāyāḥ puraṃ śoṇitasāhvayam || 18 ||
[Analyze grammar]

antarikṣe sthitastatra so'niruddhamathābravīt || 18 ||
[Analyze grammar]

mā bhayaṃ svasti te vīra prāpto'smyabhimatastava || 18 ||
[Analyze grammar]

tataśca nāradaṃ dṛṣṭvā so'bhivādya mahābalaḥ || 18 ||
[Analyze grammar]

prahṛṣṭaḥ sumanā bhūtvā yuddhārthamabhyavartata || 18 ||
[Analyze grammar]

vadhyatāṃ vadhyatāmeṣa gṛhyatāṃ gṛhyatāmayam || 18 ||
[Analyze grammar]

hanyatāṃ hanyatāṃ kṣipramityūcurdānavāstada || 18 ||
[Analyze grammar]

tatasteṣāṃ svanaṃ śrutvā sarveṣāmeva garjatām |
sahasaivotthitaḥ śūrastotrārdita iva dvipaḥ || 19 ||
[Analyze grammar]

niruddho'pi tayā tatra bahuśo yuddhadurmadaḥ || 19 ||
[Analyze grammar]

bhītayā bhīta evāsau dhāvati sma tathāsurān || 19 ||
[Analyze grammar]

tamāpatantaṃ dṛṣṭvaiva saṃdaṣṭauṣṭhaṃ mahābhujam |
prāsādāccāvarohantaṃ bhayārtā vipradudruvuḥ || 20 ||
[Analyze grammar]

nadantaṃ siṃhavattadā || 20c ||
[Analyze grammar]

tasya nādena vai rājan || 20c ||
[Analyze grammar]

antaḥpuradvāragataṃ parighaṃ gṛhya cātulam |
vadhāya teṣāṃ cikṣepa nānāyudhaviśāradaḥ || 21 ||
[Analyze grammar]

te sarve bāṇavarṣaiśca gadābhistomaraistathā |
asibhiḥ śaktibhiḥ śūlairnijaghnū raṇagocaram || 22 ||
[Analyze grammar]

sa hanyamāno nārācaiḥ parighaiśca samantataḥ |
dānavaiḥ samabhikruddhaiḥ prādyumniḥ śastrakovidaiḥ |
nākṣubhyatsarvabhūtātmā nadanmegha ivoṣṇage || 23 ||
[Analyze grammar]

āvidhya parighaṃ ghoraṃ teṣāṃ madhye vyavasthitaḥ |
sūryo divicaranmadhye meghānāmiva sarvataḥ || 24 ||
[Analyze grammar]

daṇḍakāṣṭhājinadharo nārado hraṣṭacetanaḥ || 24 ||
[Analyze grammar]

sādhu sādhviti vai tatra so'niruddhamabhāṣata || 24 ||
[Analyze grammar]

te hanyamānā raudreṇa parigheṇāmitaujasā |
prādravanta bhayātsarve megho vāteritā yathā || 25 ||
[Analyze grammar]

vidrāvya dānavānvīraḥ parigheṇāśuvikramaḥ || 25 ||
[Analyze grammar]

aniruddho nadan hṛṣṭaḥ siṃhanādaṃ vyarocata |
gharmānte toyado vyomni nadanniva mahāsvanaḥ || 26 ||
[Analyze grammar]

tiṣṭhadhvamiti cukrośa dānavānyuddhadurmadān |
prādyumnirvyahanaccāpi sarvaśatrunibarhaṇaḥ || 27 ||
[Analyze grammar]

tena te samare sarve hanyamānā mahātmanā |
yato bāṇastato bhītā yayuryuddhaparāṅmukhāḥ || 28 ||
[Analyze grammar]

tato bāṇasamīpasthāḥ śvasanto rudhirokṣitāḥ |
na śarma lebhire daityā bhayaviklavalocanāḥ || 29 ||
[Analyze grammar]

mā bhaiṣṭa mā bhaiṣṭa iti rājñā te tena coditāḥ |
trāsaṃ visṛjya caikasthā yudhyadhvaṃ dānavarṣabhāḥ || 30 ||
[Analyze grammar]

tānuvāca punarbāṇo bhayavitrastalocanān || 30 ||
[Analyze grammar]

kimidaṃ lokavikhyātaṃ yaśa utsṛjya dūrataḥ |
bhavanto yānti vaiklavyaṃ klībā iva vicetasaḥ || 31 ||
[Analyze grammar]

ko'yaṃ yasya bhayatrastā bhavanto yāntyanekaśaḥ |
kulāpadeśinaḥ sarve nānāyuddhaviśāradāḥ || 32 ||
[Analyze grammar]

bhavadbhirna hi me yuddhe kāryaṃ sāhāyyamadya vai |
abravīddhvaṃsatetyevaṃ matsamīpācca naśyata || 33 ||
[Analyze grammar]

atha tānvāgbhirugrābhistrāsayanbahudhā balī |
vyādideśa raṇe śūrān sarvānayutaśaḥ punaḥ || 34 ||
[Analyze grammar]

pramāthagaṇabhūyiṣṭhaṃ vyādiṣṭaṃ tasya nigrahe |
anīkaṃ sumahadrātrau nānāpraharaṇodyatam || 35 ||
[Analyze grammar]

tatrāntarikṣaṃ bahudhā vidyudvadbhirivāmbudaiḥ |
bāṇānīkaiḥ samabhavadvyāptaṃ saṃdīptalocanaiḥ || 36 ||
[Analyze grammar]

kecitkṣitisthāḥ prākrośan gajā iva samantataḥ |
athāntarikṣe vyanadan gharmānteṣviva toyadāḥ || 37 ||
[Analyze grammar]

tatastatsumahad yuddhaṃ sametamabhavatpunaḥ |
tiṣṭha tiṣṭheti ca tadā vāco'śrūyanta sarvaśaḥ || 38 ||
[Analyze grammar]

aniruddho raṇe vīraḥ sa ca tānabhyavartata || 38 ||
[Analyze grammar]

tadāścaryaṃ samabhavad yadekastaiḥ samāgataḥ |
ayudhyata mahāvīryairdānavaiḥ saha saṃyuge || 39 ||
[Analyze grammar]

teṣāmeva ca jagrāha parighāṃstomarānapi |
taireva ca mahāyuddhe nijaghāna mahābalaḥ || 40 ||
[Analyze grammar]

parigṛhya ca tāneva cāyudhairahanad raṇe || 40 ||
[Analyze grammar]

punaḥ sa parighaṃ ghoraṃ pragṛhya raṇamūrdhani |
sa daityasaṃghān samare nijaghāna mahābalān || 41 ||
[Analyze grammar]

aṣṭau trīṇi sahasrāṇi kiṃkarāṇāṃ tarasvinām || 41 ||
[Analyze grammar]

jaghāna samare caikaḥ sākṣātpautrastu śārṅgiṇaḥ || 41 ||
[Analyze grammar]

nanāda vividhaṃ nādaṃ rodasī ca sa kampayan || 41 ||
[Analyze grammar]

nistriṃśaṃ carma cotsṛṣṭaṃ jagrāha raṇamūrdhani |
sa tena vyacaranmārgānekaḥ śatrunibarhaṇaḥ || 42 ||
[Analyze grammar]

bhrāntamudbhrāntamāviddhamāplutaṃ viplutaṃ plutam |
iti prakārāndvātriṃśadvicarannabhyadṛśyata || 43 ||
[Analyze grammar]

ekaṃ sahasraśastatra dadṛśū raṇamūrdhani |
krīḍantaṃ bahudhā yuddhe vyāditāsyamivāntakam || 44 ||
[Analyze grammar]

tatastenābhisaṃtaptā rudhiraughapariplutāḥ |
punarbhagnāḥ prādravanta yatra bāṇaḥ sthito raṇe || 45 ||
[Analyze grammar]

gajavājirathaughaiste uhyamānāḥ samantataḥ |
kṛtvā cārtasvaraṃ ghoraṃ diśo jagmurhataujasaḥ || 46 ||
[Analyze grammar]

evaṃ bhayamabhūtteṣāṃ dānavānāṃ mahāraṇe || 46 ||
[Analyze grammar]

ekaikasyopari tadā te'nyonyaṃ bhayapīḍitāḥ |
vamantaḥ śoṇitaṃ jagmurviṣādādvimukhā raṇe || 47 ||
[Analyze grammar]

na babhūva bhayaṃ tādṛggānavānāṃ purā raṇe |
yādṛśaṃ yudhyamānānāmaniruddhena saṃyuge || 48 ||
[Analyze grammar]

yudhyatāmaniruddhena yathāvartata dāruṇam || 48cd ||
[Analyze grammar]

tādṛśaṃ na bhayaṃ teṣāmabhavaddevasaṃyuge || 48 ||
[Analyze grammar]

kecidvamanto rudhiramapatanvasudhātale |
dānavā giriśṛṅgābhā gadāśūlāsipāṇayaḥ || 49 ||
[Analyze grammar]

kecinmathitamastiṣkāḥ kecidbhinnagalāntarāḥ || 49 ||
[Analyze grammar]

te bāṇamutsṛjya raṇe jagmurbhayasamākulāḥ |
viśālamākāśatalaṃ dānavā nirjitāstadā || 50 ||
[Analyze grammar]

niḥsaṅgabhagnāṃ mahatīṃ dṛṣṭvā tāṃ vāhinīṃ tadā |
bāṇaḥ krodhātprajajvāla samiddho'gnirivādhvare || 51 ||
[Analyze grammar]

antarikṣacaro bhūtvā sādhuvādī samantataḥ || 51 ||
[Analyze grammar]

nārado nṛtyati prīto hyaniruddhasya saṃyuge || 51 ||
[Analyze grammar]

etasminnantare caiva bāṇaḥ paramakopana || 51 ||
[Analyze grammar]

kumbhāṇḍasaṃgṛhītaṃ tu rathamāsthāya vīryavān |
yayau yatrāniruddho vai so'simudyamya dāruṇam || 52 ||
[Analyze grammar]

paṭṭisāsigadāśūlānudyamya ca paraśvadhān |
babhau bāhusahasreṇa śakradhvajaśatairiva || 53 ||
[Analyze grammar]

baddhagodhāṅgulitraiśca bāhubhiḥ sa mahābhujaḥ |
nānāpraharaṇopetaḥ śuśubhe dānavottamaḥ || 54 ||
[Analyze grammar]

siṃhanādaṃ nadan kruddho visphāritamahādhanuḥ |
visṛjañchataśo bāṇāndānavo'tha mahābalaḥ |
abhyadravacca vegena prādyumniryatra saṃsthitaḥ |
abravīttiṣṭha tiṣṭheti krodhasaṃraktalocanaḥ || 55 ||
[Analyze grammar]

vacanaṃ tasya saṃśrutya prādyumniraparājitaḥ |
bāṇasya vadataḥ saṃkhye udaikṣata tato'hasat || 56 ||
[Analyze grammar]

uṣā ca pitaraṃ dṛṣṭvā bhayavihvalalocanā || 56 ||
[Analyze grammar]

prāsādamadhye saṃlīnā bhartāraṃ samudaikṣata || 56 ||
[Analyze grammar]

kartavyamūḍhā saṃbhrāntā citralekhā varāpsarāḥ || 56 ||
[Analyze grammar]

babhūva vimanā bhūtvā mṛtāsmīti vyacintayat || 56 ||
[Analyze grammar]

kiṃkiṇīśatanirghoṣaṃ raktadhvajapatākinam |
ṛkṣacarmāvanaddhāṅgaṃ daśanalvaṃ mahāratham || 57 ||
[Analyze grammar]

āruhya syandanaṃ vīro babhau bāhusahasravān || 57 ||
[Analyze grammar]

tasya vājisahasraṃ tu rathe yuktaṃ mahātmanā |
purā devāsure yuddhe hiraṇyakaśiporiva || tamāpatantaṃ dadṛśe dānavaṃ yadupuṃgavaḥ |
saṃprahṛṣṭastato yuddhe tejasā cāpyapūryata || asicarmadharo vīraḥ svasthaḥ saṃgrāmalālasaḥ |
narasiṃho yathā pūrvamādidaityavadhodyataḥ |
āpatantaṃ dadarśātha khaḍgacarmadharaṃ tadā || 58 ||
[Analyze grammar]

rāgiṇaṃ cihnitaṃ rājanpriyānakhapadaistathā || 59ab ||
[Analyze grammar]

khaḍgacarmadharaṃ taṃ tu dṛṣṭvā bāṇaḥ padātinam |
praharṣamatulaṃ lebhe prādyumnivadhakāṅkṣayā || 59 ||
[Analyze grammar]

tanutreṇa vihīnaśca khaḍgapāṇiśca yādavaḥ |
ajeyaśceti matvā taṃ yuddhāyābhimukhe sthitam || 60 ||
[Analyze grammar]

aniruddhaṃ raṇe bāṇo jitakāśī mahābalaḥ || 60 ||
[Analyze grammar]

vācaṃ covāca saṃkruddho gṛhyatāṃ hanyatāmiti || 60 ||
[Analyze grammar]

vācaṃ ca bruvatastasya śrutvā prādyumnirāhave || 60 ||
[Analyze grammar]

bāṇasya bruvataḥ krodhāddhasamāno'bhyudaikṣata || 60 ||
[Analyze grammar]

uṣā bhayaparitrastā rudatī tatra bhāminī || 60 ||
[Analyze grammar]

aniruddhaḥ prahasyātha samāśvāsya ca tāṃ sthitām || 60 ||
[Analyze grammar]

atha bāṇaḥ śaraughāṇi kṣudrakāṇāṃ samantataḥ || 60 ||
[Analyze grammar]

cikṣepa samare kruddho hyaniruddhavadhepsayā || 60 ||
[Analyze grammar]

aniruddhastu ciccheda kāṅkṣaṃstasya parājayam || 60 ||
[Analyze grammar]

vavarṣa śarajālāni kṣudrakāṇāṃ samantataḥ |
bāṇo'niruddhaśirasi kāṅkṣaṃstasya raṇe vadham || 61 ||
[Analyze grammar]

tāni bāṇasahasrāṇi carmaṇā vyavadhūya saḥ |
babhau pramukhatastasya sthitaḥ sūrya ivodaye || 62 ||
[Analyze grammar]

so'bhibhūya raṇe bāṇamāsthito yadunandanaḥ |
siṃhaḥ pramukhato dṛṣṭvā gajamekaṃ yathā vane || 63 ||
[Analyze grammar]

tato bāṇasahasraughairmarmabhedibhirāśugaiḥ |
vivyādha niśitaistīkṣṇaiḥ prādyumnimaparājitam || 64 ||
[Analyze grammar]

tato vivyādha niśitairbāṇaiḥ prādyumnimāsthitaḥ || 64cd ||
[Analyze grammar]

samāhatastato bāṇaiḥ khaḍgacarmadharo nṛpa || 64 ||
[Analyze grammar]

tamāpatantaṃ niśitairabhyaghnan sāyakaistadā || 64 ||
[Analyze grammar]

so'tividdho mahābāhurbāṇaiḥ saṃnataparvabhiḥ |
krodhenābhiprajajvāla cikīrṣuḥ karma duṣkaram || 65 ||
[Analyze grammar]

rudhiraughaplutairgātrairbāṇavarṣaiḥ samāhataḥ |
abhibhūtaḥ susaṃkruddho yayau bāṇarathaṃ prati || 66 ||
[Analyze grammar]

asibhirmusalaiḥ śūlaiḥ paṭṭisaistomaraistathā |
so'tividdhaḥ śaraughaistu prādyumnirnābhyakampata || 67 ||
[Analyze grammar]

āplutya sahasā kruddho ratheṣāṃ tasya so'cchinat |
jaghānāśvāṃśca khaḍgena bāṇasya rathamūrdhani || 68 ||
[Analyze grammar]

taṃ punaḥ śaravarṣeṇa tomaraiḥ paṭṭisaistathā |
cakārāntarhitaṃ bāṇo yuddhamārgaviśāradaḥ || 69 ||
[Analyze grammar]

hato'yamiti vijñāya prāṇadannairṛtā gaṇāḥ |
tato'vaplutya sahasā rathapārśve vyavasthitaḥ || 70 ||
[Analyze grammar]

śaktiṃ bāṇastataḥ kruddho ghorarūpāṃ bhayāvahām |
jagrāha jvalitāṃ dīptāṃ ghaṇṭāmālākulāṃ raṇe || 71 ||
[Analyze grammar]

jvalanādityasaṃkāśāṃ yamadaṇḍopamāṃ śubhām |
vārayantīṃ durādharṣāṃ cāmīkaravibhūṣitām |
gurvīṃ bhārasahasreṇa viśvakarmakṛtāṃ tadā |
prāhiṇottāmasaṅgena maholkāṃ jvalitāmiva || 72 ||
[Analyze grammar]

tāmāpatantīṃ saṃprekṣya jīvitāntakarīṃ tadā |
tāmeva prāhiṇocchaktiṃ sarvaśatrubhayaṃkarīm |
so'bhiplutya tadā śaktiṃ jagrāha puruṣottamaḥ || 73 ||
[Analyze grammar]

nirbibheda tato bāṇaṃ svaśaktyaiva mahābalaḥ |
sā bhittvā tasya dehaṃ tu jagāma vasudhātalam || 74 ||
[Analyze grammar]

vaiśaṃpāyanaḥ |
tato mūrchāṃ samāpede baliputraḥ pratāpavān || 74 ||
[Analyze grammar]

rudhirāplutagātrastu svaśakyā pīḍito bhṛśam || 74 ||
[Analyze grammar]

sa gāḍhaviddho vyathito dhvajayaṣṭiṃ samāśritaḥ || 74 ||
[Analyze grammar]

tato mūrchābhibhūtaṃ taṃ kumbhāṇḍo vākyamabravīt |
upekṣase dānavendra kimevaṃ śatrumudyatam || 75 ||
[Analyze grammar]

labdhalakṣyo hyayaṃ vīro nirvikāro'dya dṛśyate |
māyāmāśritya yudhyasva nāyaṃ vadhyo'nyathā bhavet || 76 ||
[Analyze grammar]

ātmānaṃ māṃ ca rakṣasva pramādātkimupekṣase |
vadhyatāmayamadyaiva na naḥ sarvānvināśayet || 77 ||
[Analyze grammar]

anyāṃśca śataśo hatvā uṣāṃ nītvā vrajiṣyati || 77 ||
[Analyze grammar]

kumbhāṇḍavacanairevaṃ dānavendraḥ pracoditaḥ |
vācaṃ rūkṣāmabhikruddhaḥ provāca vadatāṃ varaḥ || 78 ||
[Analyze grammar]

eṣo'hamasya vidadhe mṛtyuṃ prāṇaharaṃ raṇe |
ādāsyāmyahamenaṃ vai garutmāniva pannagam || 79 ||
[Analyze grammar]

ityevamuktvā sarathaḥ sāśvaḥ sadhvajasārathiḥ |
gandharvanagarākārastatraivāntaradhīyata || 80 ||
[Analyze grammar]

vijñāyāntarhitaṃ bāṇaṃ prādyumniraparājitaḥ |
pauruṣeṇa samāyuktaḥ sa praikṣata diśo daśa || 81 ||
[Analyze grammar]

āsthāya tāmasīṃ vidyāṃ tadā kruddho baleḥ sutaḥ |
mumoca viśikhāṃstīkṣṇāṃśchanno māyādharo balī || 82 ||
[Analyze grammar]

prādyumnirviśikhairbaddhaḥ sarpabhūtaiḥ samantataḥ |
veṣṭito bahudhā tasya dehaḥ pannagarāśibhiḥ || 83 ||
[Analyze grammar]

dehaḥ saṃveṣṭitastasya bahudhā śararāśibhiḥ || 83 ||
[Analyze grammar]

sa tu veṣṭitasarvāṅgo baddhaḥ prādyumnirāhave |
niṣprayatnaḥ sthitaḥ svastho maināka iva parvataḥ || 84 ||
[Analyze grammar]

jvālāvalīḍhavadanaiḥ sarpabhogairviveṣṭitaḥ |
abhītaḥ parvatākāraḥ prādyumnirabhavad raṇe || 85 ||
[Analyze grammar]

niṣprayatnaḥ sthitaścāpi sarpabhogamayaiḥ śaraiḥ |
na vivyathe sa bhūtātmā sarvataḥ pariveṣṭitaḥ || 86 ||
[Analyze grammar]

tatastaṃ vāgbhirugrābhiḥ saṃrabdhaḥ samatarjayat |
bāṇo dhvajaṃ samāśritya provācāmarṣito vacaḥ || 87 ||
[Analyze grammar]

kumbhāṇḍa vadhyatāṃ śīghramayaṃ vai kulapāṃsanaḥ |
cāritraṃ yena me loke dūṣitaṃ dūṣitātmanā || 88 ||
[Analyze grammar]

ityevamukte vacane kumbhāṇḍo vākyamabravīt |
rājanvakṣyāmyahaṃ kiṃcittanme śṛṇu yadīcchasi || 89 ||
[Analyze grammar]

ayaṃ vijñāyatāṃ kasya kuto vāyamihāgataḥ |
kena vāyamihānītaḥ śakratulyaparākramaḥ || 90 ||
[Analyze grammar]

mayāyaṃ bahuśo yuddhe dṛṣṭo rājanmahāraṇe |
krīḍanniva ca yuddheṣu dṛśyate devasūnuvat || 91 ||
[Analyze grammar]

kulaśīlatapovīryaiḥ sarvaireva samanvitaḥ || 91 ||
[Analyze grammar]

sarvayuddhe'pyasaṃhāryo bhavedvīryādhikastava || 91 ||
[Analyze grammar]

balavān sattvasaṃpannaḥ sarvaśāstraviśāradaḥ |
nāyaṃ vadhakṛtaṃ doṣamarhate daityasattama |
vijñāya ca vadhaṃ vāsya pūjāṃ vāpi kariṣyasi || 92 ||
[Analyze grammar]

gāndharveṇa vivāhena kanyeyaṃ tava saṃgatā || 92 ||
[Analyze grammar]

adeyā hyapratigrāhyā ataścintya vadhaṃ kuru || 92 ||
[Analyze grammar]

vadhe hyasya mahāndoṣo rakṣaṇe sumahān guṇaḥ |
ayaṃ hi puruṣotkarṣaḥ sarvathā mānamarhati || 93 ||
[Analyze grammar]

sarvato veṣṭitatanurna vyathatyeṣa bhogibhiḥ |
kulaśauṇḍīryavīryaiśca sattvena ca samanvitaḥ |
paśya rājanyaśovīryairanvitaṃ puruṣottamam |
na no gaṇayate sarvānvadhaṃ prāpto'pyayaṃ balī || 94 ||
[Analyze grammar]

yadi māyāprabhāvena nātra baddho bhavedayam || 94 ||
[Analyze grammar]

sarvāsuragaṇān saṃkhye yodhayennātra saṃśayaḥ || 94 ||
[Analyze grammar]

sarvayuddheṣu mārgajño bhavedvīryādhikastava || 94 ||
[Analyze grammar]

śoṇitaughaplutairgātrairnāgabhogaiśca veṣṭitaḥ |
triśikhāṃ bhrukuṭīṃ kṛtvā na cintayati naḥ sthitān || 95 ||
[Analyze grammar]

imāmavasthāṃ nīto'pi svabāhubalamāśritaḥ |
na cintayati rājaṃstvāṃ vīryavān ko'pyasau yuvā || 96 ||
[Analyze grammar]

sahasrabāhoḥ samare dvibāhuḥ samavasthitaḥ |
rucitaṃ yadi te rājañjñeyo vīryabalānvitaḥ || 97 ||
[Analyze grammar]

kanyā ceyaṃ na cānyasya niryātyānena saṃgatā || 97 ||
[Analyze grammar]

yadi ceṣṭatamaḥ kaścidayaṃ vaṃśe mahātmanaḥ || 97 ||
[Analyze grammar]

tataḥ pūjāmayaṃ vīraḥ prāpsyatyevāsurottamaḥ || 97 ||
[Analyze grammar]

rakṣyatāmiti coktvaiva tathāstviti ca tasthivān || 97 ||
[Analyze grammar]

bāḍhamityabravīdbāṇo hantuṃ vyavasitaḥ kila || 97 ||
[Analyze grammar]

uṣāṃ babandha nigaḍairdṛḍhaiḥ pāśaiśca saṃyataiḥ || 97 ||
[Analyze grammar]

vyādideśa tato bāṇo rakṣiṇaḥ kiṃkarānbahūn || 97 ||
[Analyze grammar]

rakṣyatāmeṣa duṣṭātmā sā ca rakṣyā kulādhamā || 97 ||
[Analyze grammar]

iti sarvān samādiśya bāṇo madabalānvitaḥ || 97 ||
[Analyze grammar]

kumbhāṇḍena yayau sārdhaṃ svameva bhavanaṃ balī || 97 ||
[Analyze grammar]

kumbhāṇḍasya vacaḥ śrutvā śuddhānte pannagairbhṛśam |
evamukte tu vacane kumbhāṇḍena mahātmanā |
tathetyāha ca kumbhāṇḍaṃ bāṇaḥ śatruniṣūdanaḥ || saṃrakṣiṇastato dattvā aniruddhasya dhīmataḥ |
aniruddhaṃ yodhayitvā bāṇaḥ svagṛhamāviśat || 98 ||
[Analyze grammar]

yayau svameva bhavanaṃ baleḥ putro mahāsuraḥ || 98cd ||
[Analyze grammar]

saṃyataṃ māyayā dṛṣṭvā aniruddhaṃ mahābalam || 98 ||
[Analyze grammar]

ṛṣīṇāṃ nāradaḥ śreṣṭho'brajaddvāravatīṃ prati || 98 ||
[Analyze grammar]

tato hyākāśamārgeṇa munirdvāravatīṃ gataḥ || 98 ||
[Analyze grammar]

gate ṛṣīṇāṃ pravare so'niruddho vyacintayat || 98 ||
[Analyze grammar]

naṣṭo'yaṃ dānavaḥ krūro yuddhaṃ prāpya na saṃśayaḥ || 98 ||
[Analyze grammar]

sa gatvā nāradastatra śaṅkhacakragadādharam || 98 ||
[Analyze grammar]

jñāpayiṣyati tattvena imamarthaṃ yathaiva tat || 98 ||
[Analyze grammar]

nāgairviveṣṭitaṃ dṛṣṭvā uṣā prādyumnimāturā || 98 ||
[Analyze grammar]

ruroda bāṣparaktākṣī tāmāha rudatīṃ punaḥ || 98 ||
[Analyze grammar]

kimidaṃ rudyeta bhīru mā bhaistvaṃ śubhalocane || 98 ||
[Analyze grammar]

paśya suśroṇi saṃprāptaṃ matkṛte madhusūdanam || 98 ||
[Analyze grammar]

yasya śaṅkhadhvaniṃ śrutvā bāhuśabdaṃ balasya ca || 98 ||
[Analyze grammar]

dānavā nāśameṣyanti garbhāścāsurayoṣitām || 98 ||
[Analyze grammar]

vaiśaṃpāyana uvāca |
evamuktā niruddhena uṣā viśrambhamāgatā || 98 ||
[Analyze grammar]

nṛśaṃsaṃ cāpi pitaraṃ śocate sā sumadhyamā || 98 ||
[Analyze grammar]

baddhaṃ nivedayāmāsa prādyumniṃ garuḍadhvaje || 98 ||
[Analyze grammar]