Chapter 89

vaiśaṃpāyana uvāca |
tataḥ kāle vyatīte tu rukmī mahati vīryavān |
duhituḥ kārayāmāsa svayaṃvaramariṃdamaḥ || 1 ||
[Analyze grammar]

tatrāhūtāśca rājāno rājaputrāśca rukmiṇā |
samājagmurmahāvīryā nānādigbhyaḥ śriyānvitāḥ || 2 ||
[Analyze grammar]

jagāma tatra pradyumnaḥ kumārairaparairvṛtaḥ |
sā hi taṃ cakame kanyā sa ca tāṃ śubhalocanām || 3 ||
[Analyze grammar]

śubhāṅgī nāma vaidarbhī kāntidyutisamanvitā |
pṛthivyāmabhavatkhyātā rukmiṇastanayā tadā || 4 ||
[Analyze grammar]

upaviṣṭeṣu sarveṣu pārthiveṣu mahātmasu |
vaidarbhī varayāmāsa pradyumnamarisūdanam || 5 ||
[Analyze grammar]

sa hi sarvāstrakuśalaḥ siṃhasaṃhanano yuvā |
rūpeṇāpratimo loke keśavasyātmajo'bhavat || 6 ||
[Analyze grammar]

vayorūpaguṇopetā rājaputrī ca sābhavat |
nārāyaṇī candrasenā jātakāmā ca taṃ prati || 7 ||
[Analyze grammar]

vṛtte svayaṃvare jagmū rājānaḥ svapurāṇi te |
upādāya tu vaidarbhīṃ pradyumno dvārakāṃ yayau || 8 ||
[Analyze grammar]

reme saha tayā vīro damayantyā nalo yathā || 8 ||
[Analyze grammar]

sa tasyāṃ janayāmāsa devagarbhopamaṃ sutam |
aniruddhamiti khyātaṃ karmaṇāpratimaṃ bhuvi |
dhanurvede ca vede ca nītiśāstre ca pāragam || 9 ||
[Analyze grammar]

abhavatsa yadā rājannaniruddho vayonvitaḥ |
tadāsya rukmiṇaḥ pautrīṃ rukmiṇī rukmasaṃnibhāṃ |
patnyarthaṃ varayāmāsa nāmnā rukmavatīti sā || 10 ||
[Analyze grammar]

aniruddhaṃ guṇairdātuṃ kṛtabuddhirnṛpastadā |
prītyā ca raukmiṇeyasya rukmiṇyāścāpyupagrahāt || 11 ||
[Analyze grammar]

vispardhannapi kṛṣṇena vairaṃ tadapahāya saḥ |
dadānītyabravīd rājā prītimāñjanamejaya || 12 ||
[Analyze grammar]

keśavaḥ saha rukmiṇyā putraiḥ saṃkarṣaṇena ca |
anyaiśca vṛṣṇibhiḥ sārdhaṃ vidarbhān sabalo yayau || 13 ||
[Analyze grammar]

saṃyuktā jñātayaścaiva rukmiṇaḥ suhṛdaśca ye |
āhūtā rukmiṇā te'pi tatrājagmurnarādhipāḥ || 14 ||
[Analyze grammar]

śubhe tithau mahārāja nakṣatre cābhipūjite |
vivāhāyāniruddhasya babhūva paramotsavaḥ || 15 ||
[Analyze grammar]

pāṇau gṛhīte vaidarbhyāstvaniruddhena bhārata |
vaidarbhayādavānāṃ ca babhūva paramotsavaḥ |
remire vṛṣṇayastatra pūjyamānā yathāmarāḥ || 16 ||
[Analyze grammar]

athāśmakānāmadhipo veṇudārirudāradhīḥ |
akṣaḥ śrutarvā cāṇūraḥ krāthaścaivāṃśumānapi || 17 ||
[Analyze grammar]

jayatsenaḥ kaliṅgānāmadhipaśca mahābalaḥ |
pāṇḍyaśca nṛpatiḥ śrīmānṛṣīkādhipatistathā || 18 ||
[Analyze grammar]

ete saṃmantrya rājāno dākṣiṇātyā maharddhayaḥ |
abhigamyābruvan sarve rukmiṇaṃ rahasi prabhum || 19 ||
[Analyze grammar]

bhavānakṣeṣu kuśalo vayaṃ cāpi riraṃsavaḥ |
priyadyūtaśca rāmo'sāvakṣeṣvanipuṇo'pi ca || 20 ||
[Analyze grammar]

te bhavantaṃ puraskṛtya jetumicchāma taṃ vayam |
ityukto rocayāmāsa dyūtaṃ rukmī mahārathaḥ || 21 ||
[Analyze grammar]

te śubhāṃ kāñcanastambhāṃ kusumairbhūṣitājirām |
sabhāmāviviśurhṛṣṭāḥ siktāṃ candanavāriṇā || 22 ||
[Analyze grammar]

tāṃ praviśya tataḥ sarve śubhrasraganulepanāḥ |
sauvarṇeṣvāsaneṣvāsāṃ cakrire vijigīṣavaḥ || 23 ||
[Analyze grammar]

āhūto baladevastu kitavairakṣakovidaiḥ |
bāḍhamityabravīdd hṛṣṭaḥ saha dīvyāma paṇyatām || 24 ||
[Analyze grammar]

nikṛtyā taṃ jigīṣanto dākṣiṇātyā narādhipāḥ |
maṇimuktāḥ suvarṇaṃ ca tatrāninyuḥ sahasraśaḥ || 25 ||
[Analyze grammar]

tataḥ prāvartata dyūtaṃ teṣāmaratināśanam |
kalahāyāspadaṃ ghoraṃ durmatīnāṃ kṣayāvaham || 26 ||
[Analyze grammar]

niṣkāṇāṃ tu sahasrāṇi suvarṇasya daśāditaḥ |
rukmiṇā saha saṃpāte baladevo glahaṃ dadau || 27 ||
[Analyze grammar]

taṃ jigāya tato rukmī yatamānaṃ mahāratham |
tāvadevāparaṃ bhūyo baladevaṃ jigāya saḥ || 28 ||
[Analyze grammar]

asakṛjjīyamānastu rukmiṇā keśavāgrajaḥ |
suvarṇakoṭiṃ jagrāha glahaṃ tasya mahātmanaḥ || 29 ||
[Analyze grammar]

jitamityeva hṛṣṭo'tha tamāhvṛtirabhāṣata |
ślāghamānaśca cikṣepa prahasanmusalāyudham || 30 ||
[Analyze grammar]

avidyo durbalaḥ śrīmān hiraṇyamamitaṃ mayā |
ajeyo baladevo'yamakṣadyūte parājitaḥ || 31 ||
[Analyze grammar]

kaliṅgarājastacchrutvā prajahāsa bhṛśaṃ tadā |
dantānvidarśayan hṛṣṭastatrākrudhyadd halāyudhaḥ || 32 ||
[Analyze grammar]

rukmiṇaśca vacaḥ śrutvā parājayanimittajam |
nigṛhyamāṇastīkṣṇābhirvāgbhirbhīṣmakasūnunā |
roṣamāhārayāmāsa jitaroṣo'pi dharmavit || 33 ||
[Analyze grammar]

saṃkruddho dharṣaṇāṃ prāpya rauhiṇeyo mahābalaḥ |
dhairyānmanaḥ saṃniyamya tato vacanamabravīt || 34 ||
[Analyze grammar]

daśakoṭisahasrāṇi glaha eko mamāparaḥ |
etaṃ saṃparigṛhṇīṣva pātayākṣānnarādhipa |
kṛṣṇākṣāṃl lohitākṣāṃśca deśe'smiṃstvamapāṃsule || 35 ||
[Analyze grammar]

ityevamāhvayāmāsa rukmiṇaṃ rohiṇīsutaḥ |
anuktvā vacanaṃ kiṃcidbāḍhamityabravītpunaḥ || 36 ||
[Analyze grammar]

akṣān rukmī tato hṛṣṭaḥ pātayāmāsa pārthivaḥ |
cāturakṣe nivṛtte tu nirjitaḥ sa narādhipaḥ || 37 ||
[Analyze grammar]

baladevena dharmeṇa netyuvāca tato balam |
dhairyānmanaḥ saṃniyamya sa na kiṃciduvāca ha |
ete bruvantu rājāno ye tathyavacanā iha |
baladevaṃ tato rukmī mayā jitamiti smayan || 38 ||
[Analyze grammar]

baladevastu tacchrutvā jihmaṃ vākyaṃ narādhipāt |
bhūyaḥ krodhasamāviṣṭo nottaraṃ vyājahāra ha || 39 ||
[Analyze grammar]

tato gambhīranirghoṣā vāguvācāśarīriṇī |
baladevasya taṃ kopaṃ vardhayantī mahātmanaḥ |
satyamāha balaḥ śrīmāndharmeṇaiṣa parājitaḥ || 40 ||
[Analyze grammar]

anuktvā vacanaṃ kiṃcitprāpto bhavati karmaṇā |
manasā samanujñātaṃ tatsyādityavagamyatām || 41 ||
[Analyze grammar]

iti śrutvā vacastathyamantarikṣātsubhāṣitam |
saṃkarṣaṇastadotthāya sauvarṇenoruṇā balī |
tāmanādṛtya vaidarbho duṣṭarājanyanoditaḥ |
saṃkarṣaṇaṃ parihasanbabhāṣe kālanoditaḥ || naivākṣakovidā yūyaṃ gopālā vanagocarāḥ |
akṣaiḥ krīḍanti rājāno bāṇaiśca na bhavādṛśāḥ || rukmiṇaivamadhikṣipto rājabhiścopahāsitaḥ |
rukmiṇyā bhrātaraṃ jyeṣṭhaṃ niṣpipeṣa mahītale || 42 ||
[Analyze grammar]

vivāde kupito rāmaḥ kṣeptāraṃ krūrabhāṣiṇam |
jaghānāṣṭāpadenaiva prasahya yadupuṃgavaḥ || 43 ||
[Analyze grammar]

tato'pasṛtya saṃkruddhaḥ kaliṅgādhipaterapi |
dantānbabhañja saṃrambhādunnanāda ca siṃhavat |
khaḍgamudyamya tāṃścāpi trāsayāmāsa pārthivān || 44 ||
[Analyze grammar]

raṅgamadhye haladharaḥ paribabhrāma siṃhavat || 44 ||
[Analyze grammar]

stambhaṃ sabhāyāḥ sauvarṇamutpāṭya balināṃ varaḥ |
gajendra iva taṃ stambhaṃ karṣan samkarṣaṇastataḥ |
tenaiva tu jaghānāśu tatrasthān krathakaiśikān |
nirjagāma sabhādvārāttrāsayan krathakaiśikān || 45 ||
[Analyze grammar]

keśeṣu rukmiṇaṃ gṛhya cakarṣa ca punaḥ punaḥ || 45 ||
[Analyze grammar]

tamādāya sabhādvārāccharapātaṃ sasarja ha || 45 ||
[Analyze grammar]

rukmiṇaṃ nikṛtiprajñaṃ sa hatvā yādavarṣabhaḥ |
vitrāsya dviṣataḥ sarvān siṃhaḥ kṣudramṛgāniva || 46 ||
[Analyze grammar]

jagāma śibiraṃ rāmaḥ svameva svajanāvṛtaḥ |
nyavedayata kṛṣṇāya tacca sarvaṃ yathābhavat || 47 ||
[Analyze grammar]

novāca sa tadā kiṃcitkṛṣṇo rāmaṃ mahādyutim |
rukmiṇī tu tataḥ śrutvā nihataṃ bhrātaraṃ priyam |
nigṛhya ca tadātmānaṃ krodhādaśrūṇyavartayat || 48 ||
[Analyze grammar]

na hato vāsudevena yaḥ pūrvaṃ paravīrahā |
jyeṣṭho bhrātātha rukmiṇyā rukmiṇīsnehakāraṇāt |
sa rāmakaramuktena nihato dyūtamaṇḍale |
aṣṭāpadena balavān rājā vajradharopamaḥ || 49 ||
[Analyze grammar]

tasmin hate mahāmātre nṛpatau bhīṣmakātmaje |
drumabhārgavatulye vai drumabhārgavaśikṣite || 50 ||
[Analyze grammar]

kṛtau ca yuddhakuśale nityayājini pātite |
vṛṣṇayaścāndhakāścaiva sarve vimanaso'bhavan || 51 ||
[Analyze grammar]

vaiśaṃpāyana uvāca |
rukmiṇī ca mahābhāgā vilapantyārtayā girā || 51 ||
[Analyze grammar]

vilapantīṃ tathā dṛṣṭvā sāntvayāmāsa keśavaḥ || 51 ||
[Analyze grammar]

etatte sarvamākhyātaṃ rukmiṇo nidhanaṃ yathā |
vairasya ca samutthānaṃ vṛṣṇibhirbharatarṣabha || 52 ||
[Analyze grammar]

vṛṣṇayo'pi mahārāja dhanānyādāya sarvaśaḥ |
rāmakṛṣṇau samāśritya yayurdvāravatīṃ purīm || 53 ||
[Analyze grammar]