Chapter 77

vaiśaṃpāyana uvāca |
bhartāraṃ patitaṃ dṛṣṭvā kṣīṇapuṇyamiva graham |
kaṃsapatnyo hataṃ kaṃsaṃ samantātparyavārayan || 1 ||
[Analyze grammar]

taṃ mahīśayane suptaṃ kṣitināthaṃ gatāyuṣam |
bhāryāḥ sma dṛṣṭvā śocanti mṛgyo mṛgavadhe yathā || 2 ||
[Analyze grammar]

hā hatāḥ sma mahābāho hatāṣā hatabāndhavāḥ |
vīraptnyo hate vīre tvayi vīravratapriye || 3 ||
[Analyze grammar]

imāmavasthāṃ paśyantyaḥ paścimāṃ tava naiṣṭhikīm |
kṛpaṇaṃ rājaśārdūla vilapāmaḥ sabāndhavāḥ || 4 ||
[Analyze grammar]

chinnamūlāḥ sma saṃvṛttāḥ parityaktāḥ sma śobhanaiḥ |
tvayi pañcatvamāpanne nāthe'smākaṃ mahābale || 5 ||
[Analyze grammar]

ko naḥ pāṃsuparītāṅgyo ratisaṃsargalālasāḥ |
latā iva viceṣṭantyaḥ śayanīyāni neṣyati || 6 ||
[Analyze grammar]

idaṃ te satataṃ saumya hṛdyaniḥśvāsamārutam |
dahatyarko mukhaṃ kāntaṃ nistoyamiva paṅkajam || 7 ||
[Analyze grammar]

imau te śravaṇau śūnyau na śobhete vikuṇḍalau |
śirodharāyāṃ saṃlīnau satataṃ kuṇḍalapriya || 8 ||
[Analyze grammar]

kva te sa mukuṭo vīra sarvaratnavibhūṣitaḥ |
atyantaṃ śiraso lakṣmīṃ yo dadhātyarkasaprabhaḥ || 9 ||
[Analyze grammar]

anena strīkalatreṇa tavāntaḥpuraśobhinā |
kathaṃ dīnena kartavyaṃ tvayi lokāntaraṃ gate || 10 ||
[Analyze grammar]

nanu nāma striyaḥ sādhvyaḥ priyabhogeṣvavañcitāḥ |
patīnāmaparityajyāstvaṃ tu nastyajya gacchasi || 11 ||
[Analyze grammar]

aho kālo mahāvīryo yena paryāyakarmaṇā |
asmāsu prekṣamāṇāsu tvamākṣipyāśu nīyase |
kālatulyaḥ sapatnānāṃ tvaṃ kṣipramapanīyase || 12 ||
[Analyze grammar]

vayaṃ duḥkheṣvanucitāḥ sukheṣveva tu yojitāḥ |
kathaṃ vatsyāma vidhavā nātha kārpaṇyamāśritāḥ || 13 ||
[Analyze grammar]

strīṇāṃ cāritralubdhānāṃ patirekaḥ parā gatiḥ |
tvaṃ hi naḥ sā gatiśchinnā kṛtāntena balīyasā || 14 ||
[Analyze grammar]

vaidhavyenābhibhūtāḥ smaḥ śokasaṃtaptamānasāḥ |
aho kṛtāntasya vaśaṃ gantavyaṃ sarvajantubhiḥ |
roditavye dhruve magnāḥ kva gacchāmastvayā vinā || 15 ||
[Analyze grammar]

saha tvayā gataḥ kālastvadaṅke krīḍitaṃ gatam |
kṣaṇena ca vihīnāḥ sma anityā hi nṛṇāṃ gatiḥ || 16 ||
[Analyze grammar]

aho bata vipannāḥ sma vipanne tvayi mānada |
ekaduṣkṛtakāriṇyaḥ sarvāḥ vaidhavyalakṣaṇāḥ || 17 ||
[Analyze grammar]

tvayā svargapraticchandairlālitāḥ sma ratipriyāḥ |
tvayi kāmavaśāḥ sarvāḥ sa nastyajya kva gacchasi || 18 ||
[Analyze grammar]

asmākaṃ tvamanāthānāṃ nātho hyasi suropama || 18 ||
[Analyze grammar]

āsāṃ vilapamānānāṃ kurarīṇāmiva prabho |
prativākyaṃ jagannātha dātumarhasi mānada || 19 ||
[Analyze grammar]

evamārtakalatrasya śrāmyamāṇeṣu bandhuṣu |
gamanaṃ te mahārāja dāruṇaṃ pratibhāti naḥ || 20 ||
[Analyze grammar]

nūnaṃ kāntatarāḥ kānta tasmiṃl loke varastriyaḥ |
tatastvaṃ prasthito vīra vihāyemaṃ gṛhe janam || 21 ||
[Analyze grammar]

kiṃ nu te karuṇaṃ vīra bhāryāsvetāsu bhūmipa |
ārtanādaṃ rudantīṣu yannehādyāvabudhyase || 22 ||
[Analyze grammar]

aho niṣkaruṇā yātrā narāṇāmaurdhvadehikī |
ye parityajya dārān svānnirapekṣā vrajanti ha || 23 ||
[Analyze grammar]

apatitvaṃ striyāḥ śreyo na tu śūraḥ striyāḥ patiḥ |
svargastrīṇāṃ priyāḥ śurāsteṣāmapi ca tāḥ priyāḥ || 24 ||
[Analyze grammar]

aho kṣipramadṛśyena nayatā tvayā raṇapriyam |
prahṛtaṃ naḥ kṛtāntena sarvāsāmantarātmasu || 25 ||
[Analyze grammar]

hatvā jarāsaṃdhabalaṃ jitvā yakṣāṃśca saṃyuge |
jarāsaṃdhabalaṃ jitvā hatvā rājñāṃ ca saṃyuge |
jitvā devagaṇaṃ yuddhe yakṣānapi ca saṃyuge |
kathaṃ mānuṣamātreṇa hatastvaṃ jagatīpate || 26 ||
[Analyze grammar]

indreṇa saha saṃgrāmaṃ kṛtvā sāyakavigraham |
amartyairajito yuddhe martyenāsi kathaṃ hataḥ || 27 ||
[Analyze grammar]

tvayā sāgaramakṣokhyaṃ vikṣobhya śaravṛṣṭibhiḥ |
ratnasarvasvaharaṇaṃ jitvā pāśadharaṃ kṛtam || 28 ||
[Analyze grammar]

tvayā paurajanāsyārthe mandaṃ varṣati vāsave |
sāyakairjaladānbhittvā balādvarṣaṃ pravartitam || 29 ||
[Analyze grammar]

pratāpāvanatāḥ sarve tava tiṣṭhanti pārthivāḥ |
preṣayāṇā varārhāṇi ratnānyācchādanāni ca || 30 ||
[Analyze grammar]

tavaivaṃ devakalpasya dṛṣṭavīryasya śatrubhiḥ |
kathaṃ prāṇāntikaṃ ghoramīdṛśaṃ bhayamāgatam || 31 ||
[Analyze grammar]

prāptāḥ smo vidhavāśabdaṃ tvayi nāthe nipātite |
apramattāḥ pramattāḥ sma kṛtāntena nirākṛtāḥ || 32 ||
[Analyze grammar]

yadyevaṃ nātha gantavyaṃ yadi vā vismṛtā vayam |
vākyamātreṇa yāsyeti kartavyo naḥ parigrahaḥ || 33 ||
[Analyze grammar]

prasīda nātha bhītāḥ sma pādau te yāma mūrdhabhiḥ |
alaṃ dūrapravāsena nivarta mathurādhipa || 34 ||
[Analyze grammar]

aho vīra kathaṃ śeṣe niṣaṇṇastṛṇapāṃsuṣu |
śayānasya hi te bhūmau kasmānnodvijate manaḥ || 35 ||
[Analyze grammar]

kena suptaprahāro'yaṃ datto'smākamatarkitaḥ |
prahṛtaṃ kena sarvāsu nārīsvevaṃ sudāruṇam || 36 ||
[Analyze grammar]

ruditānuśayo nāryā jīvantyāḥ paridevanam |
kiṃ vayaṃ sati gantavye saha bhartrā rudāmahe || 37 ||
[Analyze grammar]

etasminnantare dīnā kaṃsamātā pravepatī |
kva me vatsaḥ kva me putra iti rorūyate bhṛśam || 38 ||
[Analyze grammar]

sāpaśyattaṃ hataṃ putraṃ nipītaṃ śaśinaṃ yathā |
hṛdayena vidīrṇena śrāmyamāṇā punaḥ punaḥ || 39 ||
[Analyze grammar]

putraṃ samabhivīkṣantī hā hatāsmīti vāśatī |
hā hatāsmīti vāśantī papāta bhuvi duḥkhitā |
snuṣāṇāmārtanādena vilalāpa ruroda ca || 40 ||
[Analyze grammar]

sā tasya vadanaṃ dīnamutsaṅge putragṛddhinī |
kṛtvā putreti karuṇaṃ vilalāpārtayā girā || 41 ||
[Analyze grammar]

putra śūravrate yukta jñātīnāṃ nandivardhana |
kimidaṃ tvaritaṃ tāta prasthānaṃ kṛtavānasi || 42 ||
[Analyze grammar]

prasuptaścāsi vivṛte kiṃ putra śayanaṃ vinā |
tāta naivaṃvidhā bhūmau śerate kṛtalakṣaṇāḥ || 43 ||
[Analyze grammar]

rāvaṇena purā gītaḥ śloko'yaṃ sādhusaṃmataḥ |
balajyeṣṭhena lokeṣu rākṣasānāṃ samāgame || 44 ||
[Analyze grammar]

evamūrjitavīryasya mama devanighātinaḥ |
bāndhavebhyo bhayaṃ ghoramanivāryaṃ bhaviṣyati || 45 ||
[Analyze grammar]

tathaiva jñātilubdhasya mama putrasya dhīmataḥ |
jñātibhyo bhayamutpannaṃ śarīrāntakaraṃ mahat || 46 ||
[Analyze grammar]

vinamrasya hyanaukasya vakturvigrahamṛcchataḥ || 46 ||
[Analyze grammar]

jātivigrahabhūtasya nūnaṃ mṛtyurbhaviṣyati || 46 ||
[Analyze grammar]

sā patiṃ bhūpatiṃ vṛddhamugrasenaṃ vicetasam |
uvāca rudatī vākyaṃ vivatsā saurabhī yathā || 47 ||
[Analyze grammar]

ehyehi rājandharmātmanpaśya putraṃ janeśvaram |
śayānaṃ vīraśayane vajrāhatamivācalam || 48 ||
[Analyze grammar]

asya kurmo mahārāja niryāṇasadṛśīṃ kriyām |
pretatvamupapannasya gatasya yamasādanam || 49 ||
[Analyze grammar]

vīrabhojyāni rājyāni vayaṃ cāpi parājitāḥ |
gaccha vijñāpyatāṃ kṛṣṇaḥ kaṃsasaṃskārakāraṇāt || 50 ||
[Analyze grammar]

maraṇāntāni vairāṇi śānte śāntirbhaviṣyati |
pretakāryāṇi kāryāṇi mṛtaḥ kimaparādhyate || 51 ||
[Analyze grammar]

evamuktvā patiṃ bhojaṃ keśānārujya duḥkhitā |
putrasya mukhamīkṣantī vilalāpaiva sā bhṛśam || 52 ||
[Analyze grammar]

imāste kiṃ kariṣyanti bhāryā rājan sukhocitāḥ |
tvāṃ patiṃ supatiṃ prāpya yā vipannamanorathāḥ || 53 ||
[Analyze grammar]

imaṃ te pitaraṃ vṛddhaṃ kṛṣṇasya vaśavartinam |
kathaṃ drakṣyāmi śuṣyantaṃ kāsārasalilaṃ yathā || 54 ||
[Analyze grammar]

ahaṃ te jananī putra kimarthaṃ nābhibhāṣase |
prasthito dīrghamadhvānaṃ parityajyya priyaṃ janam || 55 ||
[Analyze grammar]

aho vīrālpabhāgyāyāḥ kṛtāntenānivartinā |
ācchidya mama mandāyā nīyase nayakovida || 56 ||
[Analyze grammar]

dānamānagṛhītāni tṛptānyetāni te guṇaiḥ |
nāmāni ca gṛhītāni samyagvṛttāni tairguṇaiḥ |
rudanti tava bhṛtyānāṃ kulāni kulayūthapa || 57 ||
[Analyze grammar]

uttiṣṭha naraśārdūla dīrghabāho mahābala |
trāhi dīnaṃ janaṃ sarvaṃ puramantaḥpuraṃ tathā || 58 ||
[Analyze grammar]

rudatīnām bhṛśārtānāṃ kaṃsastrīṇāṃ savistaram |
jagāmāstaṃ dinakaraḥ saṃdhyārāgeṇa rañjitaḥ || 59 ||
[Analyze grammar]