Chapter 73

vaiśaṃpāyana uvāca |
mahāmātraṃ tataḥ kaṃso babhāṣe hastijīvinam |
hastī kuvalayāpīḍaḥ samājadvāri tiṣṭhatu || 1 ||
[Analyze grammar]

balavānmadalolākṣaścapalaḥ krodhano nṛṣu |
dānotkaṭakaṭaścaṇḍaḥ prativāraṇaroṣaṇaḥ || 2 ||
[Analyze grammar]

sa saṃcodayitavyaste tāv uddiśya vanaukasau |
vasudevasutau nīcau yathā syātāṃ gatāyuṣau || 3 ||
[Analyze grammar]

tvayā caiva gajendreṇa yadi tau goṣu jīvinau |
bhavetāṃ ghātitau raṅge paśyeyamahamutkaṭau || 4 ||
[Analyze grammar]

tatastau patitau dṛṣṭvā vasudevaḥ sabāndhavaḥ |
chinnamūlo nirālambaḥ sabhāryo vinaśiṣyati || 5 ||
[Analyze grammar]

ye ceme yādavā mūrkhāḥ sarve kṛṣṇaparāyaṇāḥ |
vinaśiṣyanti chinnāśā dṛṣṭvā kṛṣṇaṃ nipātitam || 6 ||
[Analyze grammar]

etau hatvā gajendreṇa mallairvā svayameva vā |
purīṃ niryādavāṃ kṛtvā vicariṣyāmyahaṃ sukhī || 7 ||
[Analyze grammar]

pitāpi me parityakto yo yādavakulodvahaḥ |
śeṣāśca me parityaktā yādavāḥ kṛṣṇapakṣiṇaḥ || 8 ||
[Analyze grammar]

na cāhamugrasenena jātaḥ kila sutārthinā |
mānuṣeṇālpavīryeṇa yathā māmāha nāradaḥ || 9 ||
[Analyze grammar]

suyāmunaṃ nāma giriṃ mama mātā rajasvalā |
prekṣituṃ saha sā strībhirgatā vanakutūhalāt || 10 ||
[Analyze grammar]

sā tatra ramaṇīyeṣu ruciradrumasānuṣu |
cacāra nagaśṛṅgeṣu kandareṣu nadīṣu ca || 11 ||
[Analyze grammar]

kiṃnarodgītamadhurāḥ pratiśrutyānunāditāḥ |
śṛṇvantī kāmajananīrvācaḥ śrotrasukhāvahāḥ || 12 ||
[Analyze grammar]

barhiṇānāṃ ca virutaṃ khagānāṃ ca vikūjitam |
abhīkṣṇamabhiśṛṇvantī strīdharmamabhirocayat || 13 ||
[Analyze grammar]

etasminnantare vāyurvanarājiviniḥsṛtaḥ |
hṛdyaḥ kusumagandhāḍhyo vavau manmathabodhanaḥ || 14 ||
[Analyze grammar]

dvirephābharaṇāścaiva kadambā vāyughaṭṭitāḥ |
mumucurgandhamadhikaṃ saṃtatāsāramūrchitāḥ || 15 ||
[Analyze grammar]

kesarāḥ puṣpavarṣaiśca vavṛṣuḥ madabodhanāḥ |
nīpā dīpā ivābhānti puṣpakaṇṭakadhāriṇaḥ || 16 ||
[Analyze grammar]

mahī navatṛṇacchannā śakragopavibhūṣitā |
yauvanastheva vanitā khaṃ dadhārārtavaṃ vapuḥ || 17 ||
[Analyze grammar]

atha saubhapatiḥ śrīmāndrumilo nāma dānavaḥ |
ugrasenasya rūpeṇa mātaraṃ me pradharṣayat || 18 ||
[Analyze grammar]

sā patisnigdhahṛdayā bhāvenopasasarpa tam |
śaṅkitā cābhavatpaścāttasya gauravadarśanāt || 19 ||
[Analyze grammar]

sā tamāhotthitā bhītā na tvaṃ mama patirdhruvam |
kaśca tvaṃ vikṛtākāro yenāsmi malinīkṛtā || 20 ||
[Analyze grammar]

ekapatnīvratamidaṃ mama saṃdūṣitaṃ tvayā |
patyurme rūpamāsthāya nīca nīcena karmaṇā || 21 ||
[Analyze grammar]

kiṃ māṃ vakṣyanti ruṣitā bāndhavāḥ kulapāṃsanīm |
jugupsitā ca vatsyāmi patipakṣairnirākṛtā || 22 ||
[Analyze grammar]

dhiktvāmīdṛśamakṣāntaṃ dauṣkulaṃ vyutthitendriyam |
aviśvāsyamanāyuṣyaṃ paradārābhimarśanam || 23 ||
[Analyze grammar]

sa tāmāha prasajjantīṃ kṣiptaḥ krodhena dānavaḥ |
ahaṃ vai drumilo nāma saubhasya patirūrjitaḥ || 24 ||
[Analyze grammar]

kiṃ māṃ kṣipasi doṣeṇa mūḍhe paṇḍitamānini |
mānuṣaṃ patimāśritya hīnavīryaparākramam || 25 ||
[Analyze grammar]

vyabhicārānna duṣyanti striyaḥ strīmānagarvite |
ny hyāsīnniyatā buddhirmānuṣīṇāṃ viśeṣataḥ || 26 ||
[Analyze grammar]

śrūyante hi striyo bahvyo vyabhicāravyatikramaiḥ |
prasūtā devasaṃkāśānputrānamitavikramān || 27 ||
[Analyze grammar]

atīva tvaṃ hi loke'sminpatidharmavatī satī |
śuddhā keśānvidhunvantī bhāṣase yad yadicchasi || 28 ||
[Analyze grammar]

kasya tvamiti yaccāhaṃ tvayokto mattakāśinī |
kaṃso nāma ripudhvaṃśī tava putro bhaviṣyati || 29 ||
[Analyze grammar]

sā saroṣā punarbhūtvā nindatī tasya taṃ varam |
uvāca vyathitā devī dānavaṃ duṣṭavādinam || 30 ||
[Analyze grammar]

dhikte vṛttaṃ sudurvṛtta yaḥ sarvā nindase striyaḥ |
santi striyo nīcavṛttāḥ santi caiva pativratāḥ || 31 ||
[Analyze grammar]

yāstvekapatnyaḥ śrūyante'rundhatīpramukhāḥ striyaḥ |
dhṛtāstābhistrayo lokāḥ sarve vai kulapāṃsana || 32 ||
[Analyze grammar]

yastvayā mama putro vai datto vṛttavināśanaḥ |
na me bahumatastveṣa śṛṇu cāpi yaducyate || 33 ||
[Analyze grammar]

utpatsyati pumānnīca pativaṃśe mamāvyayaḥ |
bhaviṣyati sa te mṛtyuryaśca dattastvayā sutaḥ || 34 ||
[Analyze grammar]

drumilastvevamuktastu jagāmākāśameva tu |
tenaiva rathamukhyena divyenāpratigāminā |
jagāma ca purīṃ dīnā mātā tadahareva me || 35 ||
[Analyze grammar]

māmevamuktvā bhagavānnārado munisattamaḥ || 35 ||
[Analyze grammar]

dīpyamānastapovīryātsākṣādagniriva jvalan || 35 ||
[Analyze grammar]

vallakīṃ vādyamānastu saptasvaravimūrchitām || 35 ||
[Analyze grammar]

gāyano lakṣyavīthīṃ ca jagāma brahmaṇo'ntikam || 35 ||
[Analyze grammar]

śṛṇuṣvedaṃ mahāmātra nibodha vacanaṃ mama || 35 ||
[Analyze grammar]

tathyaṃ coktaṃ nāradena traikālajñena dhīmatā || 35 ||
[Analyze grammar]

ahaṃ balena vīryeṇa nayena vinayena ca || 35 ||
[Analyze grammar]

prabhāveṇaiva śauryeṇa tejasā vikrameṇa ca || 35 ||
[Analyze grammar]

satyena caiva dānena nānyo'sti sadṛśaḥ pumān || 35 ||
[Analyze grammar]

viditvā sarvamātmānaṃ vacanaṃ śraddadhāmyaham || 35 ||
[Analyze grammar]

kṣetrajo'haṃ sutastvevamugrasenasya hastipa |
mātāpitṛbhyāṃ saṃtyaktaḥ sthāpitaḥ svena tejasā || 36 ||
[Analyze grammar]

ubhābhyāṃ cāpi vidviṣṭo bāndhavaiśca viśeṣataḥ |
tadimau ghātayitvā tu hastinā gopakilbiṣau |
badhvā ca pitaraṃ rājye sthito'smi ca balīyasā |
etānapi haniṣyami hatvā gopālakāv ubhau || 37 ||
[Analyze grammar]

tadgaccha gajamāruhya sāṅkuśaprāsatomaraḥ |
sthiro bhava mahāmātra samājadvāri mā ciram || 38 ||
[Analyze grammar]

samāgatau ca tau dṛṣṭvā jahi gopālakāv ubhau || 38 ||
[Analyze grammar]