Chapter 67

vaiśaṃpāyana uvāca |
akrūro'pi yathājñaptaḥ kṛṣṇadarśanalālasaḥ |
jagāma rathamukhyena manasastulyagāminā || 1 ||
[Analyze grammar]

kṛṣṇasyāpi nimittāni śubhānyaṅgagatāni vai |
pitṛtulyena śaṃsanti bāndhavena samāgamam || 2 ||
[Analyze grammar]

prāgeva ca narendreṇa māthureṇaugraseninā |
keśinaḥ preṣito dūto vadhāyopendrakāraṇāt || 3 ||
[Analyze grammar]

sa tu dūtavacaḥ śrutvā keśī kleśakaro nṛṇām |
vṛndāvanagato gopānbādhate sma durāsadaḥ || 4 ||
[Analyze grammar]

mānuṣaṃ māṃsamaśnānaḥ kruddho duṣṭaparākramaḥ |
durdānto vājidaityo'sau karoti kadanaṃ mahat || 5 ||
[Analyze grammar]

nighnan gā vai sagopālā gavāṃ piśitabhojanaḥ |
durdamaḥ kāmacārī ca kesarī niravagrahaḥ || 6 ||
[Analyze grammar]

tadaraṇyaṃ śmaśānābhaṃ nṛṇāmasthibhirāvṛtam |
yatrāste sa hi duṣṭātmā keśī turagadānavaḥ || 7 ||
[Analyze grammar]

khurairdārayate bhūmim vegenārujate drumān |
heṣitaiḥ spardhate vāyum plutairlaṅghyate nabhaḥ || 8 ||
[Analyze grammar]

atipravṛddho mattaśca duṣṭāśvo vanagocaraḥ |
ākampitasaṭo raudraḥ kaṃsasya caritānugaḥ || 9 ||
[Analyze grammar]

iriṇaṃ tadvanaṃ sarvaṃ tena saudāsakarmaṇā |
kṛtaṃ turagadaityena sarvān gopāñjighāṃsatā || 10 ||
[Analyze grammar]

tena duṣṭapracāreṇa dūṣitaṃ tadvanaṃ mahat |
na nṛbhirgodhanairvāpi sevyate vanavṛttibhiḥ || 11 ||
[Analyze grammar]

niḥsaṃpātaḥ kṛtaḥ panthāstena tadviṣayāśrayaḥ |
madāccalitavṛttena nṛmāṃsānyaśnatā bhṛśam || 12 ||
[Analyze grammar]

nṛśabdānusaraḥ kruddhaḥ sa kadāciddināgame |
jagāma ghoṣasaṃvāsaṃ coditaḥ kāladharmaṇā || 13 ||
[Analyze grammar]

taṃ dṛṣṭvā dudruvurgopāḥ striyaśca śiśubhiḥ saha |
krandamānā jagannāthaṃ kṛṣṇaṃ nāthamupāśritāḥ || 14 ||
[Analyze grammar]

tāsāṃ ruditaśabdena gopānāṃ kranditena ca |
dattvābhayaṃ tu kṛṣṇo vai keśinaṃ so'bhidudruve || 15 ||
[Analyze grammar]

keśī cābhyudyata grīvaḥ prakāśadaśanekṣaṇaḥ |
heṣamāṇo javodagro govindābhimukho yayau || 16 ||
[Analyze grammar]

tamāpatantaṃ saṃprekṣya keśinaṃ hayadānavam |
pratyujjagāma govindastoyadaḥ śaśinaṃ yathā || 17 ||
[Analyze grammar]

keśinastu tamabhyāśe dṛṣṭvā kṛṣṇamavasthitam |
manuṣyabuddhayo gopāḥ kṛṣṇamūcurhitauṣiṇaḥ || 18 ||
[Analyze grammar]

kṛṣṇa kṛṣṇa mahābāho jñātīnāṃ nandivardhana || 18 ||
[Analyze grammar]

jagatāmabhayado'si tvaṃ trāyasvāsmānviśeṣataḥ || 18 ||
[Analyze grammar]

kṛṣṇa tāta na khalveṣa sahasā te hayādhamaḥ |
upasarpyo bhavānbālaḥ pāpaścaiṣa durāsadaḥ || 19 ||
[Analyze grammar]

eṣa kaṃsasya sahajaḥ prāṇastāta bahiścaraḥ |
uttamaśca hayendrāṇāṃ dānavo'pratimo yudhi || 20 ||
[Analyze grammar]

trāsanaḥ parasainyānāṃ turagāṇāṃ mahābalaḥ |
svadhyaḥ sarvasattvānāṃ prathamaḥ pāpakarmaṇām || 21 ||
[Analyze grammar]

gopānāṃ tadvacaḥ śrutvā vadatāṃ madhusūdanaḥ |
keśinā saha yuddhāya matiṃ cakre'risūdanaḥ || 22 ||
[Analyze grammar]

tataḥ savyaṃ dakṣiṇaṃ ca maṇḍalāni paribhraman |
padbhyāmubhābhyāṃ sa hayaḥ krodhenārujate drumān || 23 ||
[Analyze grammar]

mukhe lambasaṭe cāsya skandhadeśe ghanāvṛte |
valayo'bhrataraṃgābhāḥ susruvuḥ krodhajaṃ jalam || 24 ||
[Analyze grammar]

sa phenaṃ vaktrajaṃ caiva vavarṣa rajasāvṛtam |
himakāle yathā vyomni nīhāramiva candramāḥ || 25 ||
[Analyze grammar]

govindamaravindākṣaṃ heṣitogāraśīkaraiḥ |
sa phenairgātranirgīrṇaiḥ prokṣayāmāsa sarvataḥ || 26 ||
[Analyze grammar]

khuroddharaṇamuktena madhurakṣodapāṇḍunā |
rajasā sa hayaḥ kṛṣṇaṃ cakārāruṇamūrdhajam || 27 ||
[Analyze grammar]

plutavalgitapādastu takṣamāṇo dharāṃ khuraiḥ |
dantānnirdaśamānastu keśī kṛṣṇamupādravat || 28 ||
[Analyze grammar]

sa saṃsaktastu kṛṣṇena keśī turagasattamaḥ |
purvābhyāṃ caraṇābhyāṃ vai kṛṣṇaṃ vakṣasyatāḍayat || 29 ||
[Analyze grammar]

punaḥ punaśca sa balī prāhiṇotpārśvataḥ khurān |
kṛṣṇasya dānavo ghoraṃ prahāramamitaujasaḥ |
vaktreṇa cāsya ghoreṇa tīkṣṇadaṃṣṭrāyudhena vai |
adaśadbāhuvivaraṃ kṛṣṇasya ruṣito hayaḥ || 30 ||
[Analyze grammar]

sa lambakesarasaṭaḥ kṛṣṇena saha saṃgataḥ |
rarāja keśī meghena saṃsaktaḥ kha ivāṃśumān || 31 ||
[Analyze grammar]

uraścāsyorasā hantumiyeṣa balavān hayaḥ |
vegena vāsudevasya krodhāddviguṇavikramaḥ || 32 ||
[Analyze grammar]

tasyotsiktasya balavān kṛṣṇo'pyamitavikramaḥ |
bāhumābhoginaṃ kṛtvā mukhe kruddhaḥ samādadhat || 33 ||
[Analyze grammar]

sa taṃ bāhumaśakto vai khādituṃ bhoktumeva vā |
punarābhoginaṃ bāhuṃ tadvaktragatamañjasā |
kṛṣṇaḥ prasārayāmāsa līlayā dānavaṃ hasan |
daśanairmūlanirmuktaiḥ saphenaṃ rudhiraṃ vaman || 34 ||
[Analyze grammar]

vipāṭitābhyāmoṣṭhābhyāṃ kaṭābhyāṃ vidalīkṛtaḥ |
akṣiṇī vikṛte cakre visṛte muktabandhane || 35 ||
[Analyze grammar]

nirastahanurāviṣṭaḥ śoṇitāsrāvilekṣaṇaḥ |
utkarṇo naṣṭacetāstu sa keśī bahvaceṣṭata || 36 ||
[Analyze grammar]

utpatya cāsakṛtpādaiḥ sakṛnmūtraṃ samutsṛjan |
svinnārdralomā śrāntastu niryatnacaraṇo'bhavat || 37 ||
[Analyze grammar]

keśivaktravilagnastu kṛṣṇabāhuraśobhata |
vyābhugna iva gharmānte candrārdhakiraṇairghanaḥ || 38 ||
[Analyze grammar]

keśī ca kṛṣṇasaṃsaktaḥ śrāntagātro vyarocata |
prabhātāvanataścandraḥ śrānto merumivāśritaḥ || 39 ||
[Analyze grammar]

tasya kṛṣṇabhujoddhūtāḥ keśino daśanā mukhāt |
keśino vaktranirdhūtā vividhā daśanā bhuvi |
petuḥ śaradi nistoyāḥ sitābhrāvayavā iva || 40 ||
[Analyze grammar]

sa tu keśī bhṛśaṃ śrāntaḥ kṛṣṇenākliṣṭakarmaṇā || 40 ||
[Analyze grammar]

svabhujaṃ svāyataṃ kṛtvā pāṭito balavattadā || 40 ||
[Analyze grammar]

sa pāṭito bhujenājau kṛṣṇena vikṛtānanaḥ || 40 ||
[Analyze grammar]

keśī nadanmahānādaṃ dānavo vyathitastadā || 40 ||
[Analyze grammar]

vighūrṇamānaḥ srastāṅgo mukhād rudhiramudvaman || 40 ||
[Analyze grammar]

bhṛśaṃ vyaṅgīkṛtavapurnikṛttārdha ivācalaḥ || 40 ||
[Analyze grammar]

vyāditāsyo mahāraudraḥ so'suraḥ kṛṣṇabāhunā || 40 ||
[Analyze grammar]

nipapāta yathā kṛtto nāgo hi dvidalīkṛtaḥ || 40 ||
[Analyze grammar]

sa papātāśu vegena bhujāyāmena pāṭitaḥ || 40 ||
[Analyze grammar]

bāhunā kṛttadehasya keśino rūpamābabhau |
paśoriva mahāghoraṃ nihatasya pinākinā || 41 ||
[Analyze grammar]

droṇībhyāṃ māṃsapūrṇābhyāṃ pinākibhavane yathā || 41 ||
[Analyze grammar]

dvipādapṛṣṭhapucchārdhe sravaṇaikākṣināsike |
keśinaste dvidhā bhūte dve ardhe rejatuḥ kṣitau || 42 ||
[Analyze grammar]

vajreṇa vinikṛttārdhau parvatāviva bhūtale || 42 ||
[Analyze grammar]

keśidantakṣataścāpi kṛṣṇasya śuśubhe bhujaḥ |
vṛddhastāla ivāraṇye gajendradaśanāṅkitaḥ || 43 ||
[Analyze grammar]

taṃ hatvā keśinaṃ yuddhe kalpayitvā ca bhāgaśaḥ |
kṛṣṇaḥ padmapalāśākṣo hasaṃstatraiva tasthivān || 44 ||
[Analyze grammar]

taṃ hataṃ keśinaṃ dṛṣṭvā gopā gopastriyaśca tāḥ |
babhūvurmuditāḥ sarve hatavighnā hataklamāḥ || 45 ||
[Analyze grammar]

dāmodaraṃ ca śrīmantam yathāsthānaṃ yathāvayaḥ |
abhyanandanpriyairvākyaiḥ pūjayantaḥ punaḥ punaḥ || 46 ||
[Analyze grammar]

aho tāta kṛtaṃ karma hato'yaṃ lokakaṇṭakaḥ |
daityaḥ kṣiticaraḥ kṛṣṇa hayarūpaṃ samāsthitaḥ || 47 ||
[Analyze grammar]

kṛtaṃ vṛndāvanaṃ kṣemaṃ sevyaṃ sarvanṛpakṣiṇām |
ghnatā pāpamimaṃ tāta keśinaṃ hayamāhave || 48 ||
[Analyze grammar]

hatā no bahavo gopā gāvo vatsāśca vatsalāḥ |
naike cānye janapadā hatānena durātmanā || 49 ||
[Analyze grammar]

eṣa saṃvartakaṃ kartumudyataḥ kila pāpakṛt |
nṛlokaṃ nirnaraṃ kṛtvā cartukāmo yathāsukham || 50 ||
[Analyze grammar]

naitasya pramukhe sthātuṃ kaścicchakto jijīviṣuḥ |
api devasamūheṣu kiṃ punaḥ pṛthivītale || 51 ||
[Analyze grammar]

evaṃ te tuṣṭuvurgopāḥ kṛṣṇaṃ kamalalocanam || 51 ||
[Analyze grammar]

athāhāntarhito vipro nāradaḥ khagamo muniḥ |
prīto'smi viṣṇo deveśa kṛṣṇa kṛṣṇeti cāsakṛt || 52 ||
[Analyze grammar]

namastubhyaṃ jagannātha devadeva janārdana || 52 ||
[Analyze grammar]

namastubhyaṃ namastubhyaṃ śaṅkhacakragadādhara || 52 ||
[Analyze grammar]

namaste jñānarūpāya keśavāya ca cakriṇe || 52 ||
[Analyze grammar]

nama ādyāya bījāya nirguṇāya guṇātmane || 52 ||
[Analyze grammar]

namaḥ sahasraśirase tvāṃ nato'smi janārdana || 52 ||
[Analyze grammar]

namāmi lokanāthaṃ tvāṃ namaste devarūpiṇe || 52 ||
[Analyze grammar]

namaste'stu hṛṣīkeśa pāhi naḥ sarvato hare || 52 ||
[Analyze grammar]

iti stutvā jagannāthaṃ punarevābravīdvacaḥ || 52 ||
[Analyze grammar]

yadidaṃ duṣkaraṃ karma kṛtaṃ keśijighāṃsayā |
tvayyeva kevalaṃ yuktam tridive tryambake'pi vā || 53 ||
[Analyze grammar]

ahaṃ yuddhotsukastāta tarpitenāntarātmanā |
idaṃ narahayaṃ yuddham darṣṭuṃ svargādihāgataḥ || 54 ||
[Analyze grammar]

pūtanānidhanādīni karmāṇi tava dṛṣṭavān |
ahaṃ tvanena govinda karmaṇā paritoṣitaḥ || 55 ||
[Analyze grammar]

hayasyāsya mahendro'pi bibheti balasūdanaḥ |
kurvāṇasya vapurghoraṃ keśino duṣṭacetasaḥ || 56 ||
[Analyze grammar]

yattvayā pāṭito dvaidhaṃ bhujenāyataparvaṇā |
eṣo'sya mṛtyurantāya vihito viśvayoninā || 57 ||
[Analyze grammar]

yasmāttvayā hataḥ keśī tasmānmacchāsanaṃ śṛṇu |
keśavo nāma nāmnā tvaṃ khyāto loke bhaviṣyasi || 58 ||
[Analyze grammar]

svastyastu bhavato loke sādhayāmyahamāśugaḥ |
kṛtyaśeṣaṃ ca te kāryaṃ śaktastvamasi māciram || 59 ||
[Analyze grammar]

tvayi kāryāntaragate narā iva divaukasaḥ |
viḍambayantaḥ krīḍanti līlāṃ tvadbalamāśritāḥ || 60 ||
[Analyze grammar]

abhyāśe vartate kālo bhāratasyāhavodadheḥ |
hastaprāptāni yuddhāni rājñāṃ tridivagāminām || 61 ||
[Analyze grammar]

panthānaḥ śodhitā vyomni vimānārohiṇordhvagāḥ |
avakāśā vibhajyante śakraloke mahīkṣitām || 62 ||
[Analyze grammar]

ugrasenasute śānte padasthe tvayi keśava |
abhitastanmahadyuddhaṃ bhaviṣyati mahīkṣitām || 63 ||
[Analyze grammar]

tvāṃ cāpratimakarmāṇaṃ saṃśrayiṣyanti pārthivāḥ |
bhedakāle narendrāṇāṃ pakṣagrāho bhaviṣyasi || 64 ||
[Analyze grammar]

tvayi rājāsanasthe hi rājaśrīṃ vahati prabho |
śriyaṃ tyakṣyanti rājānastvatprabhāvānna saṃśayaḥ || 65 ||
[Analyze grammar]

eṣa me kṛṣṇa saṃdeśaḥ śrutibhiḥ khyātimeṣyasi |
devatānāṃ divisthānāṃ jagataśca jagatpate || 66 ||
[Analyze grammar]

dṛṣṭaṃ me bhavataḥ karma dṛṣṭaścāsi mayā prabho |
kaṃse bhūyaḥ sameṣyāmi śāsite sādhayāmyaham || 67 ||
[Analyze grammar]

bahunāpi kimuktena pāhi viprānyathāsukham || 67 ||
[Analyze grammar]

jānāmi tvāṃ mahābāho devānāmapi daivatam || 67 ||
[Analyze grammar]

vaiśaṃpāyana uvāca |
evamuktvā tu sa tadā nāradaḥ khaṃ jagāma ha || 68 ||
[Analyze grammar]

nāradasya vacaḥ śrutvā devasaṃgītayoginaḥ |
tatheti sa samābhāṣya punargopān samāsadat |
gopān kṛṣṇaḥ samāsādya vrajameva viveṣa ha || 68 ||
[Analyze grammar]