Chapter 53

vaiśaṃpāyana uvāca |
ītiṃ vṛkānāṃ dṛṣṭvā tu vardhamānāṃ durāsadām |
sastrīpuṃso'tha ghoṣo vai samasto'mantrayattadā || 1 ||
[Analyze grammar]

sthāneneha na naḥ kāryaṃ vrajāmo'nyanmahadvanam |
yannirbhayaṃ sukhakaraṃ sukhasaṃcāramārutam |
yacchivaṃ ca sukhāḍhyaṃ ca gavāṃ caiva sukhāvaham || 2 ||
[Analyze grammar]

adyaiva kiṃ cireṇa sma vrajāmaḥ saha godhanaiḥ |
yāvadvṛkairvadhaṃ ghoraṃ na naḥ sarvo vrajo vrajet || 3 ||
[Analyze grammar]

eṣāṃ dhūmrāruṇāṅgānāṃ daṃṣṭriṇāṃ mukhakarṣiṇām |
vṛkāṇāṃ kṛṣṇavaktrāṇāṃ bibhīmo niśi garjatām || 4 ||
[Analyze grammar]

mama putro mama bhrātā mama vatso'tha gaurmama |
vṛkairvyāpāditetyevaṃ krandanti sma gṛhe gṛhe || 5 ||
[Analyze grammar]

tāsāṃ ruditaśabdena gavāṃ hambhāraveṇa ca |
vrajasyotthāpanaṃ cakrurghoṣavṛddhāḥ samāgatāḥ || 6 ||
[Analyze grammar]

teṣāṃ matamathājñāya gantuṃ vṛndāvanaṃ prati |
vrajasya ca niveśāya gavāṃ caiva sukhāya ca || 7 ||
[Analyze grammar]

vṛndāvananiveśāya jñātvā tān kṛtaniścayān |
nandagopo bṛhadvākyaṃ bṛhaspatirivādade || 8 ||
[Analyze grammar]

adyaiva niścayaprāptiryadi gantavyameva naḥ |
śīghramājñāpyatāṃ ghoṣaḥ sajjībhavata māciram || 9 ||
[Analyze grammar]

tato'vaghuṣyata tadā ghoṣe tatprākṛtairnaraiḥ |
śīghraṃ gāvaḥ prakālyantāṃ yujyantāṃ śakaṭāni ca || 10 ||
[Analyze grammar]

vatsayūthāni kālyantāṃ bhāṇḍaṃ samadhiropayatām |
vṛndāvanamitaḥ sthānānniveśāya ca gamyatām || 11 ||
[Analyze grammar]

tacchrutvā nandagopasya vacanaṃ sādhu bhāṣitam |
tacchrutvā vacanaṃ tasya nandagopasya bhāṣitam |
udatiṣṭhadvrajaḥ sarvaḥ śīghraṃ gamanalālasaḥ || 12 ||
[Analyze grammar]

prayāhyuttiṣṭha gacchāmaḥ kiṃ śeṣe yāhi yojaya |
uttiṣṭhati vraje tasmin gopakolāhalo hyabhūt || 13 ||
[Analyze grammar]

uttiṣṭhamānaḥ śuśubhe śakaṭīsaṃkaṭastu saḥ |
vyāghraghoṣamahāghoṣo ghoṣaḥ sāgaraghoṣavān || 14 ||
[Analyze grammar]

gopīnāṃ gargarībhiśca mūrdhni cottaṃsitairghaṭaiḥ |
niṣpapāta vrajātpaṅktistārāpaṅktirivāmbarāt || 15 ||
[Analyze grammar]

nīlapītāruṇaistāsāṃ vastrairudgrathitocchritaiḥ |
śakracāpāyate paṅktirgopīnāṃ mārgagāminī || 16 ||
[Analyze grammar]

dāmanīdāmabhāraiśca kecitkāyāvalambibhiḥ |
gopā mārgagatā bhānti sāvarohā iva drumāḥ || 17 ||
[Analyze grammar]

sa vrajo vrajatā bhāti śakaṭaughena bhāsvatā |
oghaiḥ pavanavikṣiptairniṣpatadbhirivārṇavaḥ || 18 ||
[Analyze grammar]

kṣaṇena tadvrajasthānamiriṇaṃ samapadyata |
dravyāvayanirdhūtaṃ kīrṇaṃ vāyasamaṇḍalaiḥ || 19 ||
[Analyze grammar]

tataḥ krameṇa ghoṣaḥ sa prāpto vṛndāvanaṃ vanam |
niveśaṃ vipulaṃ cakre niveśāya gavāṃ hitam || 20 ||
[Analyze grammar]

śakaṭāvartaparyantaṃ candrārdhākārasaṃsthitam |
madhye yojanavistāraṃ tāvaddviguṇamāyatam || 21 ||
[Analyze grammar]

kaṇṭakībhiḥ pravṛddhābhistathā kaṇṭakitairdrumaiḥ |
nikhātocchritaśākhāgrairabhiguptaṃ samantataḥ || 22 ||
[Analyze grammar]

manthairāropyamānaiśca manthabandhānukarṣaṇaiḥ |
adbhiḥ prakṣālyamānābhirgargarībhistatastataḥ || 23 ||
[Analyze grammar]

kilairāropyamāṇaiśca dāmanīpāśapāśitaiḥ |
stambhanībhirdhṛtaiścāpi śakaṭaiḥ parivartitaiḥ || 24 ||
[Analyze grammar]

niyogapāśairāsaktairgargarīstambhamūrdhasu |
chādanārthaṃ prakīrṇaiśca kaṭaistṛṇagṛhaistathā || 25 ||
[Analyze grammar]

śākhāviṭaṅkairvṛkṣāṇāṃ kriyamāṇairitastataḥ |
śodhamānairgavāṃ sthānaiḥ sthāpyamānairudūkhalaiḥ || 26 ||
[Analyze grammar]

prāṅmukhaiḥ sicyamānaiśca saṃdīpyadbhiśca pāvakaiḥ |
savatsacarmāstaraṇaiḥ paryaṅkaiścāvaropitaiḥ || 27 ||
[Analyze grammar]

toyamuttārayantībhiḥ prokṣantībhiśca tadvanam |
śākhāścākarṣamāṇābhirgopībhiśca samantataḥ || 28 ||
[Analyze grammar]

yuvabhiḥ sthaviraiścaiva gopairvyagrakarairbhṛśam |
viśasadbhiḥ kuṭhāraiśca kāṣṭhānyapi tarūnapi || 29 ||
[Analyze grammar]

tadvrajasthānamadhikaṃ cakāśe kānanāvṛtam |
ramyaṃ vananiveśaṃ vai svabhivṛṣṭyāmṛtopamam || 30 ||
[Analyze grammar]

tāstu kāmadughā gāvaḥ sarvakālatṛṇaṃ vanam |
vṛndāvanamanuprāptā nandanopamakānanam || 31 ||
[Analyze grammar]

pūrvameva tu kṛṣṇena gavāṃ satkārakāriṇā |
śivena manasā dṛṣṭaṃ tadvanaṃ vanacāriṇā || 32 ||
[Analyze grammar]

paścime tu tataḥ pakṣe gharmamāsi nirāmaye |
varṣatīvāmṛtaṃ deve tṛṇaṃ tatravyavardhata || 33 ||
[Analyze grammar]

na tatra vatsāḥ sīdanti na gāvo netare janāḥ |
yatra tiṣṭhati lokānāṃ bhavāya madhusūdanaḥ || 34 ||
[Analyze grammar]

tāstu gāvaḥ sa ghoṣaśca sa ca saṃkarṣaṇo yuvā |
kṛṣṇena vihitaṃ vāsaṃ tamadhyāsanta nirvṛtāḥ || 35 ||
[Analyze grammar]

yatra tiṣṭhati deveśo devadevo janārdanaḥ || 35 ||
[Analyze grammar]

na tatra prāṇināṃ duḥkhaṃ sa ca sarvasukhāvahaḥ || 35 ||
[Analyze grammar]