Chapter 52

vaiśaṃpāyana uvāca |
evaṃ tau bālyamuttīrṇau kṛṣṇasaṃkarṣalṇāvubhau |
tasminneva vrajasthāne saptavarṣau babhūvatuḥ || 1 ||
[Analyze grammar]

nīlapītāmbaradharau pītaśvetānulepanau |
babhūvaturvatsapālau kākapakṣadharāv ubhau || 2 ||
[Analyze grammar]

parṇavādyaṃ śrutisukhaṃ vādayantau varānanau |
gopavīthyāṃ sumadhuraṃ gāyantau kāmarūpiṇau |
śuśubhāte vanagatau triśīrṣāviva pannagau || 3 ||
[Analyze grammar]

mayūrāṅgadabāhū tau ballavāpīḍadhāriṇau |
vanamālākṛtoraskau drumapotāvivodgatau || 4 ||
[Analyze grammar]

aravindakṛtāpīḍau rajjuyajñopavītinau |
saśikyatumbakarakau gopaveṇaupravādakau || 5 ||
[Analyze grammar]

parṇavādyasamāyuktau dadhyodanakarau kṛtī || 5 ||
[Analyze grammar]

kiṃkiṇījālasaṃbaddhakaṭideśavibhūṣitau || 5 ||
[Analyze grammar]

kakṣakūṭasamālambiśikyasthadhṛtapāyasau || 5 ||
[Analyze grammar]

kālayantau ca daṇḍena vatsānvatsau diśaṃ prati || 5 ||
[Analyze grammar]

gulmeṣu madhumādhvīkaṃ mārgamāṇāvitastataḥ || 5 ||
[Analyze grammar]

khādantau vanyamūlāni pibantau madhumākṣikam || 5 ||
[Analyze grammar]

dadatau madhumūlāni dārakebhyaḥ samantataḥ || 5 ||
[Analyze grammar]

khādantau khādayantau ca mūlāni ca phalāni ca || 5 ||
[Analyze grammar]

tindukaṃ bhakṣayantu ca gopairāpatya bhūtale || 5 ||
[Analyze grammar]

kīlairāpatya vṛkṣebhyaḥ khādayantu phalāni ca || 5 ||
[Analyze grammar]

kvaciddhasantāvanyonyaṃ krīḍamānau kvacitkvacit |
dadhyodanaṃ prabhuñjānau kvacitkakṣavilambitam |
kvacicca pānasaṃbhrāntau kvacitpāyasamoditau |
kvacidvṛkṣeṣu viśrāntau sthalīṣviva yathāsukham |
parṇaśayyāsu saṃsuptau kvacinnidrāntaraiṣiṇau || 6 ||
[Analyze grammar]

vatsānanu yathākāmaṃ carantau vatsapālakau || 6 ||
[Analyze grammar]

vatsapucchān samādhūya vikṣiptantau pṛthakpṛthak || 6 ||
[Analyze grammar]

evaṃ vatsānpālayantau śobhayantau mahāvanam |
evaṃ tu vatsapālau tau śobhayāmāsaturvanam |
cañcūryantau ramantau sma kiśorāviva cañcalau || 7 ||
[Analyze grammar]

gāyantu ca kvacidgeyān susvaraṃ madhurasvaram || 7 ||
[Analyze grammar]

utkarṇaṃ mṛgasaṃghaṃ ca kurvantau gītanisvanaiḥ || 7 ||
[Analyze grammar]

gajānparavaśān geyaiḥ kurvantau ca gahāvane || 7 ||
[Analyze grammar]

lokamitthaṃ carantau ca ramayantau ca ceṣṭitaiḥ || 7 ||
[Analyze grammar]

atha dāmodaraḥ śrīmān saṃkarṣaṇamuvāca ha |
ārya nāsminvane śakyaṃ gopālaiḥ saha krīḍitum || 8 ||
[Analyze grammar]

avagītamidaṃ sarvamāvābhyāṃ bhuktabhojanam |
prakṣīṇatṛṇakāṣṭhaṃ ca gopairmathitapādapam || 9 ||
[Analyze grammar]

gahanānīha yānyāsan kānanāni vanāni ca |
tānyākāśanikāśāni dṛśyante'dya yathāsukham || 10 ||
[Analyze grammar]

govāteṣvapi ye vṛkṣāḥ parivṛttārgaleṣu ca |
sarve goṣṭhāgniṣu gatāḥ kṣayamakṣayavarcasaḥ || 11 ||
[Analyze grammar]

saṃnikṛṣṭāni yānyāsan kāṣṭhāni ca tṛṇāni ca |
tāni dūrāvakṛṣṭāni mārgitavyāni bhūmiṣu || 12 ||
[Analyze grammar]

araṇyamidamalpodamalpakakṣaṃ nirāśrayam |
anveṣitavyaviśrāmaṃ dāruṇaṃ viraladrumam |
akarmaṇyeṣu vṛkṣeṣu sthitaviprasthitadvijam || 13 ||
[Analyze grammar]

saṃvāsasyāsya mahato janenotsāditadrumam || 13 ||
[Analyze grammar]

nirānandaṃ nirāsvādaṃ niṣprayojanamārutam |
nirvihaṃgamidaṃ śūnyaṃ nirvyañjanamivāśanam || 14 ||
[Analyze grammar]

vikrīyamāṇaiḥ kaṣṭhaiśca śākaiśca vanasaṃbhavaiḥ |
utsannasaṃcayatṛṇo ghoṣo'yaṃ nagarāyate || 15 ||
[Analyze grammar]

śailānāṃ bhūṣaṇaṃ ghoṣo ghoṣāṇāṃ bhūṣaṇaṃ vanam |
vanānāṃ bhūṣaṇaṃ gāvastāścāsmākaṃ parā gatiḥ |
tasmādanyadvanaṃ yāmaḥ pratyagravayasendhanam || 16 ||
[Analyze grammar]

icchantyanupabhuktāni bhoktuṃ gāvastṛṇāni ca |
tasmādvanaṃ navatṛṇaṃ gacchantu dhanino vrajāḥ || 17 ||
[Analyze grammar]

na dvārabandhāvaraṇā na gṛhakṣetriṇastathā |
praśastā vai vrajā loke yathā vai cakracāriṇaḥ || 18 ||
[Analyze grammar]

śakṛnmūtreṣu teṣveva jātaṃ kṣārarasāyanam |
na tṛṇaṃ bhuñjate gāvo nāpi tatpayaso hitam || 19 ||
[Analyze grammar]

sthalīprāyāsu ramyāsu navāsu vanarājiṣu |
carāmaḥ sahitā gobhiḥ kṣipraṃ saṃvāhyatāṃ vrajaḥ || 20 ||
[Analyze grammar]

śrūyate hi vanaṃ ramyaṃ paryāptatṛṇasaṃstaram |
nāmnā vṛndāvanaṃ nāma svāduvṛkṣaphalodakam || 21 ||
[Analyze grammar]

ajhillikaṇṭakavanaṃ sarvairvanaguṇairyutam |
kadambapādapaprāyaṃ yamunātīrasaṃśritam || 22 ||
[Analyze grammar]

snigdhaśītānilavanaṃ sarvartunilayaṃ śubham |
gopīnāṃ sukhasaṃcāraṃ cārucitravanāntaram || 23 ||
[Analyze grammar]

tasya govardhano nāma nātidūre girirmahān |
bhrājate dīrghaśikharo nandanasyeva mandaraḥ || 24 ||
[Analyze grammar]

madhye cāsya mahāśākho nyagrodho yojanocchritaḥ |
bhāṇḍīro nāma śuśubhe nīlamegha ivāmbare || 25 ||
[Analyze grammar]

madhyena cāsya kālindī sīmantamiva kurvatī |
prayātā nandanasyeva nalinī saritāṃ varā || 26 ||
[Analyze grammar]

tatra govardhanaṃ caiva bhāṇḍīraṃ ca vanaspatim |
kālindīṃ ca nadīṃ ramyāṃ drakṣyāvaścarataḥ sukham || 27 ||
[Analyze grammar]

sukhaṃ carantaṃ drakṣyāvaḥ kālindīṃ ca nadīṃ śubhām || 27 ||
[Analyze grammar]

tatrāyaṃ vasatāṃ ghoṣastyajyatāṃ nirguṇaṃ vanam |
saṃvāhayāma bhadraṃ te kiṃcidutpādya kāraṇam || 28 ||
[Analyze grammar]

evaṃ kathayatastasya vāsudevasya dhīmataḥ |
prādurbabhūvuḥ śataśo raktamāṃsavasāśanāḥ || 29 ||
[Analyze grammar]

ghorāścintayatastasya svatanūruhajāstadā |
viniṣpeturbhayakarāḥ sarvataḥ śataśo vṛkāḥ || 30 ||
[Analyze grammar]

niṣpatanti sma bahavo vrajasyotsādanāya vai || 30 ||
[Analyze grammar]

vṛkānniṣpatitāndṛṣṭvā goṣu vatseṣvatho nṛṣu |
gopīṣu ca yathākāmaṃ vraje trāso'bhavanmahān || 31 ||
[Analyze grammar]

te vṛkāḥ pancabaddhāśca daśabaddhāstathāpare |
triṃśadviṃśatibaddhāśca śatabaddhāstathāpare || 32 ||
[Analyze grammar]

pañcāśatṣaṣṭibaddhāśca catvāriṃśattathaiva ca || 32 ||
[Analyze grammar]

niścerustasya gātrāddhi śrīvatsakṛtalakṣaṇāḥ |
kṛṣṇasya kṛṣṇavadanā gopānāṃ bhayavardhanāḥ || 33 ||
[Analyze grammar]

bhakṣayadbhiśca tairvatsāṃstrāsayadbhiśca govrajān |
niśi bālān haradbhiśca vṛkairutsādyate vrajaḥ || 34 ||
[Analyze grammar]

na vanaṃ śakyate gantuṃ na gāśca parirakṣitum |
na vanātkiṃcidāhartuṃ na ca vā tarituṃ nadīm || 35 ||
[Analyze grammar]

trastā hyudvignamanaso gatāstasminvane'vasan || 35 ||
[Analyze grammar]

evaṃ vṛkairudīrṇaistu vyāghratilyaparākramaiḥ |
vrajo niṣpandaceṣṭaḥ sa ekasthānacaraḥ kṛtaḥ || 36 ||
[Analyze grammar]