Chapter 40

vaiśaṃpāyana uvāca |
ṛṣibhiḥ pūjitastaistu viveśa harirīśvaraḥ |
paurāṇaṃ brahmasadanaṃ divyaṃ nārāyaṇāśramam || 1 ||
[Analyze grammar]

sa tatra viviśe hṛṣṭastānāmantrya sadogatān |
praṇamya cādidevāya brahmaṇe padmayonaye || 2 ||
[Analyze grammar]

svena nāmnā parijñātaṃ sa taṃ nārāyaṇāśramam |
praviśanneva bhagavānāyudhāni vyasarjayat || 3 ||
[Analyze grammar]

sa tatrāmbupatiprakhyaṃ dadarśālayamātmanaḥ |
svadhiṣṭhitaṃ bhūtagaṇaiḥ śāśvataiśca maharṣibhiḥ || 4 ||
[Analyze grammar]

saṃvartakāmbudopetaṃ nakṣatrasthānasaṃkulam |
timiraughaparikṣiptamapradhṛṣyaṃ surāsuraiḥ || 5 ||
[Analyze grammar]

na tatra viṣayo vāyornendornāpi vivasvataḥ |
vapuṣā padmanābhasya sa deśastejasā vṛtaḥ || 6 ||
[Analyze grammar]

sa tatra praviśanneva jaṭābhāraṃ samudvahan |
sa sahasraśirā bhūtvā śayanāyopacakrame || 7 ||
[Analyze grammar]

lokānāmantakālajñā kālī nayanaśālinī |
upatasthe mahātmānaṃ nidrā taṃ kālarūpiṇī || 8 ||
[Analyze grammar]

viśvasya jagataḥ prabhum || 8c ||
[Analyze grammar]

nārāyaṇaṃ viśvabījam || 8c ||
[Analyze grammar]

sa śiśye śayane divye samudrāmbhodaśītale |
harirekārṇavoktena vratena vratināṃ varaḥ || 9 ||
[Analyze grammar]

taṃ śayānaṃ mahātmānaṃ bhavāya jagataḥ prabhum |
upāsāṃ cakrire viṣṇuṃ devāḥ sarṣigaṇāstadā || 10 ||
[Analyze grammar]

tasya suptasya śuśubhe nābhimadhyātsamutthitam |
ādyasya sadanaṃ padmaṃ brahmaṇaḥ sūryasaṃnibham || 11 ||
[Analyze grammar]

sahasrapatraṃ varṇāḍhyaṃ sukumāraṃ vibhūṣitam || 11 ||
[Analyze grammar]

brahmasūtrodyatakaraḥ svapanneva mahāmuniḥ |
āvartayati lokānāṃ sarveṣāṃ kālaparyayam || 12 ||
[Analyze grammar]

vivṛtāttasya vadanānniḥśvāsapavaneritāḥ |
prajānāṃ paṅktayo hyoghairniṣpatanti viśanti ca || 13 ||
[Analyze grammar]

te sṛṣṭāḥ prāṇināmoghā vibhaktā brahmaṇā svayam |
caturdhā svāṃ gatiṃ jagmuḥ kṛtāntoktena karmaṇā || 14 ||
[Analyze grammar]

na taṃ veda svayaṃ brahmā nāpi brahmarṣayo'vyayāḥ |
viṣṇuṃ nidrāmayaṃ yogaṃ praviṣṭaṃ tamasāvṛtam || 15 ||
[Analyze grammar]

te tu brahmarṣayaḥ sarve pitāmahapurogamāḥ |
na vidustaṃ kvacitsuptaṃ kvacidāsīnamāsane || 16 ||
[Analyze grammar]

jāgarti ko'tra kaḥ śete kaḥ śvasan kaśca neṅgate |
ko bhogavān ko dyutimān kṛṣṇātkṛṣṇataraśca kaḥ || 17 ||
[Analyze grammar]

vimṛśanti sma taṃ devaṃ divyābhirupapattibhiḥ |
vākyairbrahmapadaiścāpi pramāṇaiḥ sarvalakṣaṇaiḥ |
na cainaṃ śekuranveṣṭuṃ karmato janmato'pi vā || 18 ||
[Analyze grammar]

kathābhistatpradiṣṭābhirye tasya caritaṃ viduḥ |
purāṇaṃ taṃ purāṇeṣu ṛṣayaḥ saṃpracakṣate || 19 ||
[Analyze grammar]

śrūyate cāsya caritaṃ deveṣvapi purātanam |
mahāpurāṇātprabhṛti paraṃ tasya na vidyate || 20 ||
[Analyze grammar]

tatpurāṇādṛte tasya caritaṃ naiva vidyate || 20 ||
[Analyze grammar]

yaccāsya veda vedo'pi caritaṃ svaprabhāvajam |
tenemāḥ śrutayo vyāptā vaidikā laukikāśca yāḥ || 21 ||
[Analyze grammar]

bhavakāle bhavatyeṣa lokānāṃ bhūtabhāvanaḥ |
dānavānāmabhāvāya jāgarti madhusūdanaḥ || 22 ||
[Analyze grammar]

yadainaṃ vīkṣituṃ devā na śekuḥ suptamacyutam |
tataḥ svapiti gharmānte jāgarti jaladakṣaye || 23 ||
[Analyze grammar]

sa hi yajñāśca vedāśca yajñāṅgāni ca sarvaśaḥ || 23 ||
[Analyze grammar]

yā tu yajñagatiḥ proktā sa eṣa puruṣottamaḥ || 23 ||
[Analyze grammar]

tasmin supte na vartante mantrapūtāḥ kratukriyāḥ |
śaratpravṛttayajño hi jāgarti madhusūdanaḥ || 24 ||
[Analyze grammar]

śaratprabhṛti yajñā hi jāgrati śrīdhare harau || 24 ||
[Analyze grammar]

tadidaṃ vārṣikaṃ cakraṃ kārayatyambudeśvaraḥ |
vaiṣṇavaṃ karma kurvāṇaḥ supte viṣṇau puraṃdaraḥ || 25 ||
[Analyze grammar]

yā hyeṣā gahvarī māyā nidreti jagati sthitā |
akasmāddveṣiṇī ghorā kālarātrirmahīkṣitām || 26 ||
[Analyze grammar]

asyāstanustamodvārā niśādivasanāśinī |
jīvitārdhaharī ghorā sarvaprāṇabhṛtāṃ bhuvi || 27 ||
[Analyze grammar]

naitayā kaścidāviṣṭo jṛmbhamāṇo muhurmuhuḥ |
śaktaḥ prasahituṃ vegaṃ majjanniva mahārṇave || 28 ||
[Analyze grammar]

annajā bhuvi martyānāṃ śramajā vā kathaṃcana |
naiśā bhavati lokasya nidrā sarvasya laukikī || 29 ||
[Analyze grammar]

svapnānte kṣīyate hyeṣā prāyaśo bhuvi dehinām |
mṛtyukāle ca bhūtānāṃ prāṇānnāśayate bhṛśam || 30 ||
[Analyze grammar]

deveṣvapi dadhāraināṃ nānyo nārāyaṇādṛte |
sakhī sarvaharasyaiṣā māyā viṣṇuśarīrajā || 31 ||
[Analyze grammar]

saiṣā nārāyaṇamukhe dṛṣṭā kamalalocanā |
lokānalpena kālena bhajate bhūtamohinī || 32 ||
[Analyze grammar]

evameṣā hitārthāya lokānāṃ kṛṣṇavartmanā |
dhriyate sevanīyena patineva pativratā || 33 ||
[Analyze grammar]

sa tayā nidrayā channastasminnārāyaṇāśrame |
śete sma hi tadā viṣṇurmohayañjagadavyayaḥ || 34 ||
[Analyze grammar]

tasya varṣasahasrāṇi śayānasya mahātmanaḥ |
jagmuḥ kṛtayugaṃ caiva tretā caiva yugottamam || 35 ||
[Analyze grammar]

sa tu dvāparaparyante dṛṣṭvā lokān suduḥkhitān |
prābudhyata mahātejāḥ stūyamāno maharṣibhiḥ || 36 ||
[Analyze grammar]

ṛṣaya ūcuḥ |
jahīhi nidrāṃ sahajāṃ bhuktapūrvāmiva srajam |
ime te brahmaṇā sārdhaṃ devā darśanakāṅkṣiṇaḥ || 37 ||
[Analyze grammar]

ime tvāṃ brahmaviduṣo brahmasaṃstavavādinaḥ |
vardhayanti hṛṣīkeśa ṛṣayaḥ saṃśitavratāḥ || 38 ||
[Analyze grammar]

eteṣāmātmabhūtānāṃ bhūtānāṃ bhūtabhāvana |
śṛṇu viṣṇo śubhāṃ vācaṃ bhūvyomāgnyanilāmbhasām || 39 ||
[Analyze grammar]

ime tvā sapta munayaḥ sahitā munimaṇḍalaiḥ |
stuvanti deva divyābhirgeyābhirgīrbhirañjasā || 40 ||
[Analyze grammar]

uttiṣṭha śatapatrākṣa padmanābha mahādyute |
kāraṇaṃ kiṃcidutpannaṃ devānāṃ kāryagauravāt || 41 ||
[Analyze grammar]

jahi nidrāṃ jagaddhetoḥ keśaveśa janārdana || 41 ||
[Analyze grammar]

tvayi supte jagatsuptaṃ tvayi jāgrati jāgṛtam || 41 ||
[Analyze grammar]

mīlanaṃ kuru devānāṃ devadeva jagatpate || 41 ||
[Analyze grammar]

kiṃ tvaṃ svapiṣi govinda naṣṭe jagati sāṃpratam || 41 ||
[Analyze grammar]

naṣṭaprāyaṃ jagatpaśya sadevāsuramānuṣam || 41 ||
[Analyze grammar]

vaiśaṃpāyana uvāca |
sa saṃkṣipya jagatsarvaṃ timiraughaṃ vidārayan |
udatiṣṭhaddhṛṣīkeśaḥ śriyā paramayā jvalan || 42 ||
[Analyze grammar]

sa dadarśa surān sarvān sametān sapitāmahān |
vivakṣataḥ prakṣubhitāñjagadarthe samāgatān || 43 ||
[Analyze grammar]

tānuvāca harirdevānnidrāviśrāntalocanaḥ |
tattvadṛṣṭārthayā vācā dharmahetvarthayuktayā || 44 ||
[Analyze grammar]

kuto vo vigraho devāḥ kuto vo bhayamāgatam |
kasya vā kena vā kāryaṃ kiṃ vā mayi na vartate || 45 ||
[Analyze grammar]

na khalvakuśalaṃ loke vartate dānavotthitam |
nṛṇāmāyāsajananaṃ śīghramicchāmi veditum || 46 ||
[Analyze grammar]

eṣa brahmavidāṃ madhye vihāya śayanottamam |
śivāya bhavatāmarthe sthitaḥ kiṃ karavāṇi vaḥ || 47 ||
[Analyze grammar]