Chapter 33

vaiśaṃpāyana uvāca |
tato bhayaṃ viṣṇumayaṃ śrutvā daiteyadānavāḥ |
udyogaṃ vipulaṃ cakruryuddhāya yudhi durjayāḥ || 1 ||
[Analyze grammar]

mayastu kāñcanamayaṃ trinalvāntaramavyayam |
catuścakraṃ suvapuṣaṃ sukalpitamahāyudham || 2 ||
[Analyze grammar]

kiṃkiṇījālanirghoṣaṃ dvīpicarmapariṣkṛtam |
racitaṃ ratnajālaiśca hemajālaiśca śobhitam || 3 ||
[Analyze grammar]

īhāmṛgagaṇākīrṇaṃ pakṣibhiśca virājitam |
divyāstratūṇīradharaṃ payodharanināditam || 4 ||
[Analyze grammar]

svakṣaṃ rathavarodāraṃ sūpasthamagamopamam |
gadāparighasaṃpūrṇaṃ mūrtimantamivārṇavam || 5 ||
[Analyze grammar]

hemakeyūravalayaṃ svarṇakuṇḍalakūbaram |
sapatākadhvajodagraṃ sādityamiva mandaram || 6 ||
[Analyze grammar]

gajendrāmbhodavapuṣaṃ kvacitkesaravarcasam |
yuktamṛkṣasahasreṇa sahasrāmbudanāditam || 7 ||
[Analyze grammar]

dīptamākāśagaṃ divyaṃ rathaṃ pararathārujam |
atiṣṭhatsamarākāṅkṣī meruṃ dīpta ivāṃśumān || 8 ||
[Analyze grammar]

tārastu kroṣavistāramāyasaṃ vāhayan ratham |
śailotkarimasaṃkāśaṃ nīlāñjanacayopamam || 9 ||
[Analyze grammar]

kālalohāṣṭacaraṇaṃ loheṣāyugakūbaram |
timirodgārikiraṇaṃ garjantamiva toyadam || 10 ||
[Analyze grammar]

lohajālena mahatā sagavākṣeṇa daṃśitam |
āyasaiḥ parighaiḥ pūrṇaṃ kṣepaṇīyaiśca mudgaraiḥ || 11 ||
[Analyze grammar]

prāsaiḥ pāśaiśca vitatairavasaktaiśca mudgaraiḥ |
śobhitaṃ trāsanīyaiśca tomaraiḥ saparaśvadhaiḥ || 12 ||
[Analyze grammar]

udyataṃ dviṣatāṃ hetordvitīyamiva mandaram |
yuktaṃ kharasahasreṇa so'dhyārohad rathottamam || 13 ||
[Analyze grammar]

virocanastu saṃkruddho gadāpāṇiravasthitaḥ |
pramukhe tasya sainyasya dīptaśṛṅga ivācalaḥ || 14 ||
[Analyze grammar]

yuktaṃ hayasahasreṇa hayagrīvastu dānavaḥ |
syandanaṃ vāhayāmāsa sapatnānīkamardanam || 15 ||
[Analyze grammar]

vyāyataṃ bahusahasraṃ dhanurvisphārayanmahat |
varāhaḥ pramukhe tasthau sāvaroha ivācalaḥ || 16 ||
[Analyze grammar]

kṣarastu vikṣarandarpānnetrābhyāṃ roṣajaṃ jalam |
sphuraddantauṣṭhavadanaḥ saṃgrāmaṃ so'bhyakāṅkṣata || 17 ||
[Analyze grammar]

tvaṣṭā tvaṣṭādaśahayaṃ yānamāsthāya dānavaḥ |
vyūhito dānavairvyūhaiḥ paricakrāma vīryavān || 18 ||
[Analyze grammar]

vipracittisutaḥ śvetaḥ śvetakuṇḍalabhūṣaṇaḥ |
śvetaśailapratīkāśo yuddhāyābhimukhaḥ sthitaḥ || 19 ||
[Analyze grammar]

ariṣṭo baliputrastu variṣṭho'driśilāyudhaḥ |
yuddhāyātiṣṭhadāyasto dharādhara ivāparaḥ || 20 ||
[Analyze grammar]

kiśorastvatisaṃharṣātkiśora iva coditaḥ |
abhavaddaityasainyasya madhye ravirivoditaḥ || 21 ||
[Analyze grammar]

lambastu lambameghābhaḥ pralambāmbarabhūṣaṇaḥ |
daityavyūhagato bhāti sanīhāra ivāṃśumān || 22 ||
[Analyze grammar]

svarbhānurāsyayodhī tu daśanauṣṭhekṣaṇāyudhaḥ |
pramukhe devasenāya rarāja girisaṃnibhaḥ |
hasaṃstiṣṭhati daityānāṃ pramukhe sumukho grahaḥ || 23 ||
[Analyze grammar]

anye hayagatā bhānti nāgaskandhagatāḥ pare |
siṃhavyāghragatāścānye varāharkṣagatāḥ pare || 24 ||
[Analyze grammar]

kecitkharoṣṭrayātāraḥ kecittoyadavāhanāḥ |
nānāpakṣigatāḥ kecitkecitpavanavāhanāḥ || 25 ||
[Analyze grammar]

pattinastvapare daityā bhīṣaṇā vikṛtānanāḥ |
ekapādā dvipādāśca nanṛturyuddhakaṅkṣiṇaḥ || 26 ||
[Analyze grammar]

prakṣveḍamānā bahavaḥ sphoṭayantaśca dānavāḥ |
dṛptaśārdūlanirghoṣā nedurdānavapuṃgavāḥ || 27 ||
[Analyze grammar]

te gadāparighairugrairdhanurvyāyāmaśālinaḥ |
bāhubhiḥ parighākāraistarjayanti sma dānavāḥ || 28 ||
[Analyze grammar]

prāsaiḥ pāśaiśca khaḍgaiśca tomarāṅkuśapaṭṭisaiḥ |
cikrīḍuste śataghnībhiḥ śitadhāraiśca mudgaraiḥ || 29 ||
[Analyze grammar]

gaṇḍaśailaiśca śailaiśca parighaiścottamāyudhaiḥ |
cakraiśca daityapravarāścakrurānanditaṃ balam || 30 ||
[Analyze grammar]

kāṅkṣanto vijayaṃ yuddhe dānavā yuddhadurmadāḥ || 30 ||
[Analyze grammar]

evaṃ taddānavaṃ sainyaṃ sarvaṃ yuddhamadotkaṭam |
devānabhimukhaṃ tasthau meghānīkamivoddhatam || 31 ||
[Analyze grammar]

tadadbhutaṃ daityasahasragāḍhaṃ vāyvagnitoyāmbudaśailakalpam |
balaṃ raṇaughābhyudayābhyudīrṇaṃ yuyutsayonmattamivābabhāse || 32 ||
[Analyze grammar]