Chapter 15

mārkaṇḍeya uvāca |
tasminnantarhite deve vacanāttasya vai vibho |
cakṣurdivyaṃ savijñānaṃ prādurāsīnmamānagha || 1 ||
[Analyze grammar]

tato'haṃ tānapaśyaṃ vai brāhmaṇān kauśikātmajān |
āpageya kurukṣetre yānuvāca vibhurmama || 2 ||
[Analyze grammar]

brahmadatto'bhavad rājā yasteṣāṃ saptamo dvijaḥ |
pitṛvartīti vikhyāto nāmnā śīlena karmaṇā || 3 ||
[Analyze grammar]

śukasya kanyā kṛtvī taṃ janayāmāsa pārthivam |
aṇuhātpārthivaśreṣṭhātkāmpilye nagarottame || 4 ||
[Analyze grammar]

bhīṣma uvāca |
yathovāca mahābhāgo mārkaṇḍeyo mahātapāḥ || 4 ||
[Analyze grammar]

tasya vaṃśamahaṃ rājan kīrtayiṣyāmi tacchṛṇu || 4 ||
[Analyze grammar]

yudhiṣṭhira uvāca |
aṇuhaḥ kasya vai putraḥ kasmin kāle babhūva ha |
rājā dharmabhṛtāṃ śreṣṭho yasya putro mahāyaśāḥ || 5 ||
[Analyze grammar]

brahmadatto narapatiḥ kiṃvīryaśca babhūva ha |
kathaṃ ca saptamasteṣāṃ saṃbabhūva narādhipaḥ || 6 ||
[Analyze grammar]

na hyalpavīryāya śuko bhagavāṃl lokapūjitaḥ |
kanyāṃ pradadyād yogātmā kṛtvīṃ kīrtimatīṃ prabhuḥ || 7 ||
[Analyze grammar]

etadicchāmyahaṃ śrotuṃ vistareṇa mahādyute |
brahmadattasya caritaṃ tadbhavānvaktumarhati || 8 ||
[Analyze grammar]

yathā ca vartamānāste saṃsāreṣu dvijātayaḥ |
mārkaṇḍeyena kathitāstadbhavānprabravītu me || 9 ||
[Analyze grammar]

bhīṣma uvāca |
pratīpasya sa rājarṣe tulyakālo narādhipaḥ |
pitāmahasya me rājanbabhūveti mayā śrutam || 10 ||
[Analyze grammar]

brahmadatto mahārājo yogī rājarṣisattamaḥ |
rutajñaḥ sarvabhūtānāṃ sarvabhūtahite rataḥ || 11 ||
[Analyze grammar]

sakhā hi gālavo yasya yogācāryo mahāyaśāḥ |
śikṣāṃ utpādya tapasā kramo yena pravartitaḥ |
kaṇḍarīkaśca yogātmā tasyaiva sacivo'bhavat || 12 ||
[Analyze grammar]

jātyantareṣu sarveṣu sahāyāḥ sarva eva te |
saptajātiṣu saptaiva babhūvuramitaujasaḥ |
yathovāca mahātejā mārkaṇḍeyo mahātapāḥ || 13 ||
[Analyze grammar]

tasya vaṃśamahaṃ rājan kīrtayiṣyāmi tacchṛṇu |
brahmadattasya paurāṇaṃ pauravasya mahātmanaḥ || 14 ||
[Analyze grammar]

bṛhatkṣatrasya dāyādaḥ suhotro nāma dhārmikaḥ || 14 ||
[Analyze grammar]

suhotrasyāpi dāyādo hastī nāma babhūva ha || 14 ||
[Analyze grammar]

tenedaṃ nirmitaṃ pūrvaṃ puraṃ vai hastināpuram || 14 ||
[Analyze grammar]

hastinaścāpi dāyādāstrayaḥ paramadhārmikāḥ || 14 ||
[Analyze grammar]

ajamīḍho dvimīḍhaśca puramīḍhastathaiva ca || 14 ||
[Analyze grammar]

ajamīḍhasya dhūminyāṃ jajñe bṛhadiṣurnṛpa || 14 ||
[Analyze grammar]

purumitrasya dāyādo rājā bṛhadiṣurnṛpa |
bṛhaddhanurbṛhadiṣoḥ putrastasya mahāyaśāḥ |
āsīdbṛhadiṣoḥ putro bṛhaddharmeti viśrutaḥ |
bṛhaddharmeti vikhyāto rājā paramadhārmikaḥ || 15 ||
[Analyze grammar]

satyajittasya tanayo viśvajittasya cātmajaḥ |
putro viśvajitaścāpi senajitpṛthivīpatiḥ || 16 ||
[Analyze grammar]

putrāḥ senajitaścāsaṃścatvāro lokasaṃmatāḥ |
ruciraḥ śvetakāśyaśca mahimnārastathaiva ca |
vatsaścāvantako rājā yasyaite pari vatsakāḥ || 17 ||
[Analyze grammar]

rucirasya tu dāyādaḥ pṛthuṣeṇo mahāyaśāḥ |
pṛthuṣeṇasya pārastu pārānnīpo'tha jajñivān || 18 ||
[Analyze grammar]

pārasya tanayaḥ śrīmānnīpo nāma mahāyaśāḥ || 18 ||
[Analyze grammar]

nīpasyaikaśataṃ tāta putrāṇāmamitaujasām |
mahārathānāṃ rājendra śūrāṇāṃ bāhuśālinām |
nīpā iti samākhyātā rājānaḥ sarva eva te || 19 ||
[Analyze grammar]

teṣāṃ vaṃśakaro rājā nīpānāṃ kīrtivardhanaḥ |
kāmpilye samaro nāma sa ceṣṭasamaro'bhavat || 20 ||
[Analyze grammar]

samarasya puraḥ pāraḥ sadaśva iti te trayaḥ |
putrāḥ paramadharmajñāḥ pāraputraḥ pṛthurbabhau || 21 ||
[Analyze grammar]

pṛthostu sukṛto nāma sukṛteneha karmaṇā |
jajñe sarvaguṇopeto vibhrājastasya cātmajaḥ || 22 ||
[Analyze grammar]

vibhrājasya tu putro'bhūdaṇuho nāma pārthivaḥ |
babhau śukasya jāmātā kṛtvībhartā mahāyaśāḥ || 23 ||
[Analyze grammar]

putro'ṇuhasya rājarṣirbrahmadatto'bhavatprabhuḥ |
yogātmā tasya tanayo viṣvaksenaḥ paraṃtapaḥ || 24 ||
[Analyze grammar]

vibhrājaḥ punarājātaḥ sukṛteneha karmaṇā |
brahmadattasya tanayo viṣvaksena iti śrutaḥ || 25 ||
[Analyze grammar]

cakṣuṣī tasya nirbhinne pakṣiṇyā pūjanīyayā || 25 ||
[Analyze grammar]

suciroṣitayā rājanbrahmadattasya veśmani || 25 ||
[Analyze grammar]

athāsya putrastvaparo brahmadattasya jajñivān || 25 ||
[Analyze grammar]

viṣvaksena iti khyāto mahābalaparākramaḥ || 25 ||
[Analyze grammar]

viṣvaksenasya putro'bhūddaṇḍaseno mahīpatiḥ |
bhallāṭaśca kumāro'bhūd rādheyena hataḥ purā || 26 ||
[Analyze grammar]

daṇḍasenātmajaḥ śūro mahātmā kulavardhanaḥ |
bhallāṭaputro durbuddhirabhavajjanamejayaḥ || 27 ||
[Analyze grammar]

sa teṣāmabhavad rājā nīpānāmantakṛnnṛpaḥ |
ugrāyudhena yasyārthe sarve nīpā vināśitāḥ || 28 ||
[Analyze grammar]

ugrāyudhaḥ sa cotsikto mayā vinihato yudhi |
darpānvito darparuciḥ satataṃ cānaye rataḥ || 29 ||
[Analyze grammar]

yudhiṣṭhira uvāca |
ugrāyudhaḥ kasya sutaḥ kasminvaṃśe'tha jajñivān |
kimarthaṃ caiva bhavatā nihatastadbravīhi me || 30 ||
[Analyze grammar]

bhīṣma uvāca |
ajamīḍhasya dāyādo vidvān rājā yavīnaraḥ |
dhṛtimāṃstasya putrastu tasya satyadhṛtiḥ sutaḥ || 31 ||
[Analyze grammar]

jajñe satyadhṛteḥ putro dṛḍhanemiḥ pratāpavān |
dṛḍhanemisutaścāpi sudharmā nāma pārthivaḥ || 32 ||
[Analyze grammar]

āsītsudharmaṇaḥ putraḥ sārvabhaumaḥ prajeśvaraḥ |
sārvabhauma iti khyātaḥ pṛthivyāṃ ekarāṭ tadā || 33 ||
[Analyze grammar]

tasyānvavāye mahati mahānpauravanandanaḥ |
mahataścāpi putrastu nāmnā rukmarathaḥ smṛtaḥ || putro rukmarathasyāpi supārśvo nāma pārthivaḥ |
supārśvatanayaścāpi sumatirnāma dhārmikaḥ |
jajñe saṃnatimān rājā saṃnatirnāma vīryavān || 34 ||
[Analyze grammar]

tasya vai saṃnateḥ putraḥ kārto nāma mahābalaḥ |
śiṣyo hiraṇyanābhasya kausalyasya mahātmanaḥ |
caturviṃśatidhā tena proktāstāḥ sāmasaṃhitāḥ |
smṛtāste prācyasāmānaḥ kārtā nāmnā tu sāmagāḥ || kārtirugrāyudhaḥ so'tha vīraḥ pauravanandanaḥ |
babhūva yena vikramya pṛṣatasya pitāmahaḥ |
nīpo nāma mahārāja pāñcālādhipatirhataḥ || 35 ||
[Analyze grammar]

ugrāyudhasya dāyādaḥ kṣemyo nāma mahāyaśāḥ || 35 ||
[Analyze grammar]

kṣemyātsuvīro nṛpatiḥ suvīrāttu nṛpaṃjayaḥ || 35 ||
[Analyze grammar]

nṛpaṃjayādbahuratha ityete pauravāḥ smṛtāḥ || 35 ||
[Analyze grammar]

sa cāpyugrāyudhastāta durbuddhirvairakṛtsadā |
pradīptacakro balavānnīpāntakaraṇo'bhavat || 36 ||
[Analyze grammar]

ugrāyudhastu durbuddhiḥ straiṇo duṣṭaḥ sadābhavat || 36 ||
[Analyze grammar]

rājakanyāṃ jahārātha munipatnīpradharṣakaḥ || 36 ||
[Analyze grammar]

sa darpapūrṇo hatvājau nīpānanyāṃśca pārthivān |
pitaryuparate mahyaṃ śrāvayāmāsa kilbiṣam || 37 ||
[Analyze grammar]

māmamātyaiḥ parivṛtaṃ śayānaṃ dharaṇītale |
ugrāyudhasya rājendra dūto'bhyetya vayo'bravīt || 38 ||
[Analyze grammar]

adya tvaṃ jananīṃ bhīṣma gandhakālīṃ yaśasvinīṃ |
strīratnaṃ mama bhāryārthe prayaccha kurupuṃgava || 39 ||
[Analyze grammar]

evaṃ rājyaṃ ca te sphītaṃ balāni ca na saṃśayaḥ |
tvayā rājye ca te sthitim |
caturaṅgayutānyadya |
pradāsyāmi yathākāmamahaṃ vai ratnabhāgbhuvi || 40 ||
[Analyze grammar]

rāṣṭrasyecchasi cetsvasti prāṇānāṃ vā kulasya vā |
śāsane mama tiṣṭhasva na hi te śāntiranyathā || 41 ||
[Analyze grammar]

adhaḥ prastāraśayane śayānastena coditaḥ |
dūtāntaritametadvai vākyamagniśikhopamam || 42 ||
[Analyze grammar]

śarīraṃ me'dahattasya vākyaṃ caitaddurātmanaḥ || 42 ||
[Analyze grammar]

tato'haṃ tasya durbuddhervijñāya matamacyuta |
ājñaptavānvai saṃgrāme senādhyakṣāṃśca sarvaśaḥ || 43 ||
[Analyze grammar]

mama prajvalitaṃ cakraṃ niśāmyaitatsudurjayam |
śatravo vidravantyājau darśanādeva bhārata || 44 ||
[Analyze grammar]

vicitravīryaṃ bālaṃ ca madapāśrayameva ca |
dṛṣṭvā krodhaparītātmā yuddhāyaiva mano dadhe || 45 ||
[Analyze grammar]

nigṛhītastadāhaṃ tu sacivairmantrakovidaiḥ |
ṛtvigbhirdevakalpaiśca suhṛdbhirnarapuṃgava || 46 ||
[Analyze grammar]

snigdhaiśca śāstravidbhiśca saṃyugasya nivartane |
kāraṇaṃ śrāvitaścāsmi yuktarūpaṃ tadānagha || 47 ||
[Analyze grammar]

mantriṇa ūcuḥ |
pravṛttacakraḥ pāpo'sau tvaṃ cāśaucagataḥ prabho |
na caiṣa prathamaḥ kalpo yuddhaṃ nāma kadācana || 48 ||
[Analyze grammar]

te vayaṃ sāma pūrvaṃ vai dānaṃ bhedaṃ tathaiva ca |
prayokṣyāmastataḥ śuddho daivatānyabhivādya ca || 49 ||
[Analyze grammar]

kṛtasvastyayano viprairhutvāgnīnvācya ca dvijān |
brāhmaṇairabhyanujñātaḥ prayāsyasi jayāya vai || 50 ||
[Analyze grammar]

astrāṇi na prayojyāni na praveśyaśca saṃgaraḥ |
āśauce vartamānena vṛddhānāmiti śāsanam || 51 ||
[Analyze grammar]

sāmadānādibhiḥ pūrvamapi bhedena vā tataḥ |
taṃ haniṣyasi vikramya śambaraṃ maghavāniva || 52 ||
[Analyze grammar]

prājñānāṃ vacanaṃ kāle vṛddhānāṃ ca viśeṣataḥ |
śrotavyamiti tacchrutvā nivṛtto'smi narādhipa || 53 ||
[Analyze grammar]

tatastaiḥ sa kramaḥ sarvaḥ prayuktaḥ śāstrakovidaiḥ |
tasmin kāle kuruśreṣṭha karma cārabdhamuttamam || 54 ||
[Analyze grammar]

sa sāmādibhirapyādāv upāyaiḥ śāstracintakaiḥ |
anunīyamāno durbuddhiranunetuṃ na śakyate || 55 ||
[Analyze grammar]

pravṛttaṃ tasya taccakramadharmaniratasya vai |
paradārābhilāṣeṇa sadyastāta nivartitam || 56 ||
[Analyze grammar]

na hīdṛśamanāyuṣyaṃ loke kiṃcana vidyate || 56 ||
[Analyze grammar]

yādṛśaṃ puruṣasyeha paradāropasevanam || 56 ||
[Analyze grammar]

na tvahaṃ tasya jāne vai nivṛttaṃ cakramuttamam |
hataṃ svakarmaṇā tattu pūrvaṃ sadbhiśca ninditam || 57 ||
[Analyze grammar]

kṛtaśaucaḥ śarāvāpī rathī niṣkramya vai purāt |
kṛtasvastyayano vipraiḥ prāyodhayamahaṃ ripum || 58 ||
[Analyze grammar]

tataḥ saṃsargamāgamya balenāstrabalena ca |
tryahamunmattavad yuddhaṃ devāsuramivābhavat || 59 ||
[Analyze grammar]

sa mayāstrapratāpena nirdagdho raṇamūrdhani |
papātābhimukhaḥ śūrastyaktvā prāṇānariṃdama || 60 ||
[Analyze grammar]

etasminnantare tāta kāmpilyātpṛṣato'bhyayāt |
hate nīpeśvare caiva hate cogrāyudhe nṛpe || 61 ||
[Analyze grammar]

āhicchatraṃ svakaṃ rājyaṃ pitryaṃ prāpya mahādyutiḥ |
drupadasya pitā rājanmamaivānumate tadā || 62 ||
[Analyze grammar]

tato'bhūddrupado rājā droṇastena nirākṛtaḥ || 62 ||
[Analyze grammar]

tato'rjunena tarasā nirjitya drupadaṃ raṇe |
ahicchatraṃ sakāmpilyaṃ droṇāyāthāpavarjitam || 63 ||
[Analyze grammar]

pratigṛhya tato droṇa ubhayaṃ jayatāṃ varaḥ |
kāmpilyaṃ drupadāyaiva prāyacchadviditaṃ tava || 64 ||
[Analyze grammar]

eṣa te drupadasyādau brahmadattasya caiva ha |
vaṃśaḥ kārtsnyena vai prokto vīrasyogrāyudhasya ca || 65 ||
[Analyze grammar]

ataste vartayiṣye'hamitihāsaṃ purātanam |
gītaṃ sanatkumāreṇa mārkaṇḍeyāya pṛcchate || 66 ||
[Analyze grammar]

śrāddhasya phalamuddiśya niyataṃ sukṛtasya ca |
tannibodha mahārāja saptajātiṣu bhārata || 67 ||
[Analyze grammar]

sagālavasya caritaṃ kaṇḍarīkasya caiva ha |
brahmadattatṛtīyānāṃ yogināṃ brahmacāriṇām || 68 ||
[Analyze grammar]