Chapter 12

bhīṣma uvāca |
tato haṃ tasya vacanānmārkaṇḍeyaṃ samāhitaḥ |
praśnaṃ tamevānvapṛcchaṃ yanme pṛṣṭaḥ purā pitā || 1 ||
[Analyze grammar]

sa māmuvāca dharmātmā mārkaṇḍeyo mahātapāḥ |
bhīṣma vakṣyāmi tattvena śṛṇuṣva prayato nagha || 2 ||
[Analyze grammar]

mayāpi hi prasādādvai dīrghāyuṣṭvaṃ pituḥ prabho |
pitṛbhaktyaiva labdhaṃ ca prāgloke paramaṃ yaśaḥ || 3 ||
[Analyze grammar]

so haṃ yugasya paryante bahuvarṣasahasrike |
adhiruhya giriṃ meruṃ tapo tapyaṃ suduścaram || 4 ||
[Analyze grammar]

tataḥ kadācitpaśyāmi divaṃ prajvālya tejasā |
vimānaṃ mahadāyāntamuttareṇa girestadā || 5 ||
[Analyze grammar]

apaśyaṃ tatra caivāhaṃ śayānaṃ dīptatejasam |
aṅguṣṭhamātraṃ puruṣamagnāvagnimivāhitam || 6 ||
[Analyze grammar]

so haṃ tasmai namas kṛtvā praṇamya śirasā prabhum |
saṃniviṣṭaṃ vimānasthaṃ pādyārghyābhyāṃ apūjayam || 7 ||
[Analyze grammar]

apṛcchaṃ caiva durdharṣaṃ vidyāma tvāṃ kathaṃ prabho |
daivataṃ hyasi devānāmiti me vartate matiḥ || 8 ||
[Analyze grammar]

sa māmuvāca dharmātmā smayamāna ivānagha |
na te tapaḥ sucaritaṃ yena māṃ nāvabudhyase || 9 ||
[Analyze grammar]

kṣaṇenaiva pramāṇaṃ sa bibhradanyadanuttamam |
rūpeṇa na mayā kaściddṛṣṭapūrvaḥ pumān kvacit || 10 ||
[Analyze grammar]

sa māmuvāca tejasvī vācā madhurayā punaḥ || 10 ||
[Analyze grammar]

kautūhalaparijñāne yattadbrahmandadāmi te || 10 ||
[Analyze grammar]

sanatkumāra uvāca |
viddhi māṃ brahmaṇaḥ putraṃ mānasaṃ pūrvajaṃ prabho |
tapovīryātsamutpannaṃ nārāyaṇaguṇātmakam || 11 ||
[Analyze grammar]

sanatkumāra iti yaḥ śruto vedeṣu vai purā |
so smi bhārgava bhadraṃ te kaṃ kāmaṃ karavāṇi te || 12 ||
[Analyze grammar]

ye tvanye brahmaṇaḥ putrā yavīyāṃsastu te mama |
bhrātaraḥ sapta durdharṣā yeṣāṃ vaṃśāḥ pratiṣṭhitāḥ || 13 ||
[Analyze grammar]

marīciratrirbhagavānpulastyaḥ pulahaḥ kratuḥ || 13 ||
[Analyze grammar]

aṅgirāśca vasiṣṭhaśca saptaite brahmaṇaḥ sutāḥ || 13 ||
[Analyze grammar]

kraturvasiṣṭhaḥ pulahaḥ pulastyo tristathāṅgirāḥ |
marīcistu tathā vidvāndevagandharvasevitāḥ |
trīṃl lokāṇ dhārayantīmāndevadānavapūjitāḥ || 14 ||
[Analyze grammar]

vayaṃ tu yatidharmāṇa āropyātmānamātmani |
prajādharmaṃ ca kāmaṃ ca vartayāmo mahāmune || 15 ||
[Analyze grammar]

yathotpannastathaivāhaṃ kumāra iti viddhi mām |
tasmātsanatkumāreti nāmaitanme pratiṣṭhitam || 16 ||
[Analyze grammar]

madbhaktyā te tapaścīrṇaṃ mama darśanakāṅkṣayā |
eṣa dṛṣṭo si bhavatā kaṃ kāmaṃ karavāṇi te || 17 ||
[Analyze grammar]

ityuktavantaṃ tamahaṃ pratyavocaṃ sanātanam |
anujñāto bhagavatā prīyatā tena bhārata || 18 ||
[Analyze grammar]

tato hamarthametaṃ vai tamapṛcchaṃ sanātanam |
pṛṣṭaḥ pitṝṇāṃ sargaṃ ca phalaṃ śrāddhasya cānagha |
ciccheda saṃśayaṃ bhīṣma sa tu deveśvaro mama || 19 ||
[Analyze grammar]

sa māmuvāca prītātmā kathānte bahuvārṣike |
rame tvayāhaṃ viprarṣe śṛṇu sarvaṃ yathātatham || 20 ||
[Analyze grammar]

devānasṛjata brahmā māṃ yakṣyantīti bhārgava |
tamutsṛjya tadātmānamayajaṃste phalārthinaḥ || 21 ||
[Analyze grammar]

te śaptā brahmaṇā mūḍhā naṣṭasaṃjñā vicetasaḥ |
na sma kiṃcitprajānanti tato loko vyamuhyata || 22 ||
[Analyze grammar]

te bhūyaḥ praṇatāḥ sarve prāyācanta pitāmaham |
anugrahāya lokānāṃ tatastānabravītprabhuḥ || 23 ||
[Analyze grammar]

prāyaścittaṃ caradhvaṃ vai vyabhicāro hi vaḥ kṛtaḥ |
putrāṃśca paripṛcchadhvaṃ tato jñānamavāpsyatha || 24 ||
[Analyze grammar]

prāyaścittakriyārthaṃ te putrānpapracchurārtavat |
tebhyaste prayatātmānaḥ śaśaṃsur tanayāstadā || 25 ||
[Analyze grammar]

prāyaścittāni dharmajñā vāṅmanaḥkarmajāni vai |
śaṃsanti kuśalā nityaṃ cakṣuṣmanto hi tattvataḥ || 26 ||
[Analyze grammar]

prāyaścittārthatattvajñā labdhasaṃjñā divaukasaḥ |
gamyatāṃ putrakāśceti putrairuktāśca te tadā || 27 ||
[Analyze grammar]

abhiśaptāstu te devāḥ putravākyena tena vai |
pitāmahamupāgacchan saṃśayacchedanāya vai || 28 ||
[Analyze grammar]

tatastānabravīddevo yūyaṃ vai brahmavādinaḥ |
tasmād yaduktā yūyaṃ taistattathā na tadanyathā || 29 ||
[Analyze grammar]

yūyaṃ śarīrakartārasteṣāṃ devā bhaviṣyatha |
te tu jñānapradātāraḥ pitaro vo na saṃśayaḥ || 30 ||
[Analyze grammar]

anyonyapitaro yūyaṃ te caiveti nibodhata |
devāśca pitaraścaiva tadbudhyadhvaṃ divaukasaḥ || 31 ||
[Analyze grammar]

tataste punarāgamya putrānūcurdivaukasaḥ |
brahmaṇā chinnasaṃdehāḥ prītimantaḥ parasparam || 32 ||
[Analyze grammar]

yūyaṃ vai pitaro smākaṃ yairvayaṃ pratibodhitāḥ |
dharmajñāḥ kaśca vaḥ kāmaḥ ko varo vaḥ pradīyatām |
yaduktaṃ caiva yuṣmābhistattathā na tadanyathā || 33 ||
[Analyze grammar]

uktāśca yasmād yuṣmābhiḥ putrakā iti vai vayam |
tasmādbhavantaḥ pitaro bhaviṣyanti na saṃśayaḥ || 34 ||
[Analyze grammar]

yo niṣṭvā ca pitṝn śrāddhaiḥ kriyāḥ kāścitkariṣyati |
rākṣasā dānavā nāgāḥ phalaṃ prāpsyanti tasya tat || 35 ||
[Analyze grammar]

śrāddhairāpyāyitāścaiva pitaraḥ somamavyayam |
āpyāyyamānaṃ yuṣmābhirvardhayiṣyanti nityadā || 36 ||
[Analyze grammar]

śrāddhairāpyāyitaḥ somo lokamāpyāyayiṣyati |
samudraparvatavanaṃ jaṃgamājaṃgamairvṛtam || 37 ||
[Analyze grammar]

śrāddhāni puṣṭikāmāśca ye kariṣyanti mānavāḥ |
tebhyaḥ puṣṭiṃ prajāścaiva dāsyanti pitaraḥ sadā || 38 ||
[Analyze grammar]

śrāddhe ca ye pradāsyanti trīnpiṇḍānnāmagotrataḥ |
sarvatra vartamānāṃstānpitaraḥ sapitāmahāḥ |
bhāvayiṣyanti satataṃ śrāddhadānena pūjitāḥ || 39 ||
[Analyze grammar]

evamājñā kṛtā pūrvaṃ brahmaṇā parameṣṭhinā || 39 ||
[Analyze grammar]

iti tadvacanaṃ satyaṃ bhavatvadya divaukasaḥ |
putrāśca pitaraścaiva vayaṃ sarve parasparam || 40 ||
[Analyze grammar]

sanatkumāra uvāca |
ta ete pitaro devā devāśca pitarastathā |
anyonyapitaro hyete devāśca pitaraśca ha || 41 ||
[Analyze grammar]