Chapter 10 - Satsaṅgama-vilāsa

iti śrīgopālabhaṭṭavilikhite śrībhagavadbhaktivilāse mahāprasādo nāma navamo vilāsaḥ |
śrīkṛṣṇacaraṇāmbhojamadhupebhyo namo namaḥ |
kathañcid āśrayād yeṣāṃ śvāpi tadgandhabhāg bhavet || 1 ||
[Analyze grammar]

atha śrīkṛṣṇabhaktānāṃ sabhāṃ savinayaṃ śubhām |
gacched vaiṣṇavacihnāḍhyaḥ pātuṃ kṛṣṇakathāsudhām || 2 ||
[Analyze grammar]

tathā ca smṛtiḥ itihāsapurāṇābhyāṃ ṣaṣṭhasaptamakau nayet || 3 ||
[Analyze grammar]

atha śrībhagavadbhaktānāṃ lakṣaṇāni |
sāmānyataḥ laiṅge |
viṣṇur eva hi yasyaiṣa devatā vaiṣṇavaḥ smṛtaḥ || 4 ||
[Analyze grammar]

atra viśeṣaḥ |
vratakarmaguṇajñānabhogajanmādimatsv api |
śaiveṣv api ca kṛṣṇasya bhaktāḥ santi tathā tathā || 5 ||
[Analyze grammar]

tathā skānde śrīmārkaṇḍeyabhagīrathasaṃvāde |
daśamīśeṣasaṃyuktaṃ dinaṃ vaiṣṇavavallabham |
nopāsate mahīpāla te vai bhāgavatā narāḥ || 6 ||
[Analyze grammar]

prāṇātyaye na cāśnanti dinaṃ prāpya harer narāḥ |
kurvanti jāgaraṃ rātrau sadā bhāgavatā hi te || 7 ||
[Analyze grammar]

upoṣya dvādaśīṃ śuddhāṃ rātrau jāgaraṇānvitām |
alpāṃ tu sādhayed yas tu sa vai bhāgavato naraḥ || 8 ||
[Analyze grammar]

bhaktir na vicyutā yeṣāṃ na cyutāni vratāni ca |
supriyaḥ śrīpatir yeṣāṃ te syur bhāgavatā narāḥ || 9 ||
[Analyze grammar]

karmiṣu bhagavadarpaṇādinā tadājñābuddhyā vā bhaktihetuḥ sadācāraparatā |
dharmārthaṃ jīvitaṃ yeṣāṃ santānārthaṃ ca maithunam |
pacanaṃ vipramukhyārthaṃ jñeyās te vaiṣṇavā narāḥ || 10 ||
[Analyze grammar]

adhvagaṃ tu pathi śrāntaṃ kāle'tra gṛham āgatam |
yo 'tithiṃ pūjayed bhaktyā vaiṣṇavaḥ sa na saṃśayaḥ || 11 ||
[Analyze grammar]

sadācāraratāḥ śiṣṭāḥ sarvabhūtānukampakāḥ |
śucayas tyaktarāgā ye sadā bhāgavatā hi te || 12 ||
[Analyze grammar]

pādme vaiśākhamāhātmye śrīnāradāmbarīṣasaṃvāde |
jīvitaṃ yasya dharmārthaṃ dharmo haryartham eva ca |
ahorātrāṇi puṇyārthaṃ taṃ manye vaiṣṇavaṃ bhuvi || 13 ||
[Analyze grammar]

laiṅge ca |
viṣṇubhaktisamāyuktān śrautasmārtapravartakān |
prīto bhavati yo dṛṣṭvā vaiṣṇavo 'sau prakīrtitaḥ || 14 ||
[Analyze grammar]

guṇavatsu bhaktihetuḥ kṛpālutvādisadguṇaśīlatā |
skānde tatraiva |
paraduḥkhenātmaduḥkhaṃ manyante ye nṛpottama |
bhagavaddharmaniratās te narā vaiṣṇavā nṛpa || 15 ||
[Analyze grammar]

tṛtīyaskandhe śrīkapiladevahūtisaṃvāde |
titikṣavaḥ kāruṇikāḥ suhṛdaḥ sarvadehinām |
ajātaśatravaḥ śāntāḥ sādhavaḥ sādhubhūṣaṇāḥ || 16 ||
[Analyze grammar]

pañcamaskandhe ṛṣabhadevasya putrānuśāsane |
mahatsevāṃ dvāram āhur vimuktes tamodvāraṃ yoṣitāṃ saṅgisaṅgam |
mahāntas te samacittāḥ praśāntā vimanyavaḥ suhṛdaḥ sādhavo ye || 17 ||
[Analyze grammar]

ekādaśaskandhe bhagavatpradattoddhavapraśnottare |
kṛpālur akṛtadrohas titikṣuḥ sarvadehinām |
satyasāro 'navadyātmā samaḥ sarvopakārakaḥ || 18 ||
[Analyze grammar]

kāmair ahatadhīr dānto mṛduḥ śucir akiñcanaḥ |
anīho mitabhuk śāntaḥ sthiro maccharaṇo muniḥ || 19 ||
[Analyze grammar]

apramatto gabhīrātmā dhṛtimāñ jitaṣaḍguṇaḥ |
amānī mānadaḥ kalyo maitraḥ kāruṇikaḥ kaviḥ || 20 ||
[Analyze grammar]

viṣṇupurāṇe yamatadbhaṭasaṃvāde |
na calati nijavarṇadharmato yaḥ samamatir ātmasuhṛdvipakṣapakṣe |
na harati na hanti kiñcid uccaiḥ sthitamanasaṃ tam avehi viṣṇubhaktam || 21 ||
[Analyze grammar]

jñāniṣu bhaktihetur jñānavattā |
ekādaśe haviyogeśvarottare |
sarvabhūteṣu yaḥ paśyed bhagavadbhāvam ātmanaḥ |
bhūtāni bhagavaty ātmany eṣa bhāgavatottamaḥ || 22 ||
[Analyze grammar]

na yasya svaḥ para iti vitteṣv ātmani vā bhidā |
sarvabhūtasamaḥ śāntaḥ sa vai bhāgavatottamaḥ || 23 ||
[Analyze grammar]

ekādaśe śrībhagavaduktau |
jñātvājñātvātha ye vai māṃ yāvān yaś cāsmi yādṛśaḥ |
bhajanty ananyabhāvena te me bhaktatamā matāḥ || 24 ||
[Analyze grammar]

tatraiva haviyogeśvarottare īśvare tadadhīneṣu bāliśeṣu dviṣatsu ca |
premamaitrīkṛpopekṣā yaḥ karoti sa madhyamaḥ || 25 ||
[Analyze grammar]

arcāyām eva haraye pūjāṃ yaḥ śraddhayehate |
na tadbhakteṣu cānyeṣu sa bhaktaḥ prākṛtaḥ smṛtaḥ || 26 ||
[Analyze grammar]

bhogavatsu bhaktihetur bhogānāsaktatā |
haviyogeśvarottare gṛhītvāpīndriyair arthān yo na dveṣṭi na hṛṣyati |
viṣṇor māyām idaṃ paśyan sa vai bhāgavatottamaḥ || 27 ||
[Analyze grammar]

sajjanmavidyādimatsu bhaktihetur nirabhimānitā |
tatraiva |
na yasya janmakarmabhyāṃ na varṇāśramajātibhiḥ |
sajjate 'sminn ahambhāvo dehe vai sa hareḥ priyaḥ || 28 ||
[Analyze grammar]

bhāvāḥ kathañcid bhaktaiva jñānānāsaktyamānitā |
bhaktiniṣṭhāpakā jātās tato hy uttamatoditā || 29 ||
[Analyze grammar]

śaiveṣu śrīśivakṛṣṇabhedakāḥ |
bṛhannāradīye |
śive ca parameśāne viṣṇau ca paramātmani |
samabuddhyā pravarttante te vai bhāgavatottamāḥ || 30 ||
[Analyze grammar]

anyac ca teṣāṃ bhagavacchāstrārthaparatādikam |
sākṣādbhaktyātmakaṃ mukhyaṃ lakṣaṇaṃ likhyate'dhunā || 31 ||
[Analyze grammar]

skānde |
yeṣāṃ bhāgavataṃ śāstraṃ sadā tiṣṭhati sannidhau |
pūjayanti ca ye nityaṃ te syur bhāgavatā narāḥ || 32 ||
[Analyze grammar]

yeṣāṃ bhāgavataṃ śāstraṃ jīvitād adhikaṃ bhavet |
mahābhāgavatāḥ śreṣṭhā viṣṇunā kathitā narāḥ || 33 ||
[Analyze grammar]

vaiṣṇavasammānaniṣṭhā |
laiṅge |
viṣṇubhaktam athāyātaṃ yo dṛṣṭvā sumukhaḥ priyaḥ |
praṇāmādi karoty eva vāsudeve yathā tathā |
sa vai bhakta iti jñeyaḥ sa punāti jagat trayam || 34 ||
[Analyze grammar]

rukṣākṣarā giraḥ śṛṇvan tathā bhāgavateritāḥ |
praṇāmapūrvakaṃ kṣāntvā yo vaded vaiṣṇavo hi saḥ || 35 ||
[Analyze grammar]

bhojanācchādanaṃ sarvaṃ yathāśaktyā karoti yaḥ |
viṣṇubhaktasya satataṃ sa vai bhāgavataḥ smṛtaḥ || 36 ||
[Analyze grammar]

gāruḍe |
yena sarvātmanā viṣṇubhaktyā bhāvo niveśitaḥ |
vaiṣṇaveṣu kṛtātmatvān mahābhāgavato hi saḥ || 37 ||
[Analyze grammar]

śrītulasīsevāniṣṭhā |
tulasīkānanaṃ dṛṣṭvā ye namaskurvate narāḥ |
tatkāṣṭhāṅkitakarṇā ye te vai bhāgavatottamāḥ || 38 ||
[Analyze grammar]

tulasīgandham āghrāya santoṣaṃ kurvate tu ye |
tanmūlam ṛddhūtā yaiś ca te vai bhāgavatottamāḥ || 39 ||
[Analyze grammar]

bṛhannāradīye śrībhagavanmārkaṇḍeyasaṃvāde |
matkathāśravaṇe yeṣāṃ vartate sāttvikī matiḥ |
tadbhaktaviṣṇubhaktāś ca te vai bhāgavatottamāḥ || 40 ||
[Analyze grammar]

skānde śrībhagavadarjunasaṃvāde |
matkathāṃ kurute yas tu matkathāṃ ca śṛṇoti yaḥ |
hṛṣyate matkathāyāṃ ca sa vai bhāgavatottamaḥ || 41 ||
[Analyze grammar]

tṛtīyaskandhe tatraiva |
madāśrayāḥ kathā mṛṣṭāḥ śṛṇvanti kathayanti ca |
tapanti vividhās tāpā naitān madgatacetasaḥ || 42 ||
[Analyze grammar]

bṛhannāradīye tatraiva |
manmānasāś ca madbhaktā madbhaktajanalolupāḥ |
mannāmaśravaṇāsaktās te vai bhāgavatottamāḥ || 43 ||
[Analyze grammar]

ye'bhinandanti nāmāni hareḥ śrutvā'tiharṣitāḥ |
romāñcitaśarīrāśca te vai bhāgavatottamāḥ || 44 ||
[Analyze grammar]

tatraivānyatra |
anyeṣām udayaṃ dṛṣṭvā ye'bhinandanti mānavāḥ |
harināmaparā ye ca te vai bhāgavatottamāḥ || 45 ||
[Analyze grammar]

śrīviṣṇupurāṇe yamatadbhaṭasaṃvāde |
na calati ya uccaiḥ śrībhagavatpadāravinde |
sitamanās tam avehi viṣṇubhaktam || 46 ||
[Analyze grammar]

kalikaluṣamalena yasya nātmā vimalamater malinīkṛtas tam enam |
manasi kṛtajanārdanaṃ manuṣyaṃ satatam avehi harer atīvabhaktam || 47 ||
[Analyze grammar]

kanakam api rahasy avekṣya buddhyā tṛṇam iva yaḥ samavaiti parasvam |
bhavati ca bhagavaty ananyacetāḥ puruṣavaraṃ tam avehi viṣṇubhaktam || 48 ||
[Analyze grammar]

sphaṭikagiriśilāmalaḥ kva viṣṇur manasi nṝṇāṃ kva ca matsarādidoṣaḥ |
na hi tuhinamayūkharaśmipuñje bhavati hutāśanadīptijaḥ pratāpaḥ || 49 ||
[Analyze grammar]

vimalamatir amatsaraḥ praśāntaḥ śucicarito 'khilasattvamitrabhūtaḥ |
priyahitavacano 'stumānamāyo vasati sadā hṛdi tasya vāsudevaḥ || 50 ||
[Analyze grammar]

vasati hṛdi sanātane ca tasmin bhavati pumān jagato 'sya saukhyarūpaḥ |
kṣitirasam atiramyam ātmano 'ntaḥ kathayati cārutayaiva śālapotaḥ || 51 ||
[Analyze grammar]

ekādaśaskandhe haviyogeśvarottare dehSTARTriyaprāṇamanodhiyāṃ yo janmāpyayakṣudbhayatarṣakṛcchraiḥ |
saṃsāradharmair avimuhyamānaḥ smṛtyā harer bhāgavatapradhānaḥ || 52 ||
[Analyze grammar]

tribhuvanavibhavahetave 'py akuṇṭha |
smṛtir ajitātmasurādibhir vimṛgyāt |
na calati bhagavatpadāravindāl lavanimiṣārdham api yaḥ sa vaiṣṇavāgryaḥ || 53 ||
[Analyze grammar]

bhagavata uruvikramāṅghriśākhā |
nakhamaṇicandrikayā nirastatāpe |
hṛdi katham upasīdatāṃ punaḥ sa prabhavati candra ivodite 'rkatāpaḥ || 54 ||
[Analyze grammar]

skānde tatraiva |
ye'rcayanti sadā viṣṇuṃ yajñeśaṃ varadaṃ harim |
dehinaḥ puṇyakarmāṇaḥ sadā bhāgavatā hi te || 55 ||
[Analyze grammar]

laiṅge |
viṣṇukṣetre śubhāny eva karoti snehasaṃyutaḥ |
pratimāṃ ca harer nityaṃ pūjayet pratayāmavān || 56 ||
[Analyze grammar]

viṣṇubhaktaḥ sa vijñeyaḥ karmaṇā manasā girā |
nārāyaṇaparo nityaṃ bhūpa bhāgavato hi saḥ || 57 ||
[Analyze grammar]

pādmottarakhaṇḍe |
tāpādipañcasaṃskārī navejyākarmakārakaḥ |
arthapañcakavid vipro mahābhāgavataḥ smṛtaḥ || 58 ||
[Analyze grammar]

gāruḍe |
ekāntena sadā viṣṇau yasmād deve parāyaṇāḥ |
tasmād ekāntinaḥ proktās tadbhāgavatacetasaḥ || 59 ||
[Analyze grammar]

ekādaśe uddhavapraśnottare |
jñātvājñātvātha ye vai mām yāvān yaś cāsmi yādṛśaḥ |
bhajanty ananyabhāvena te vai bhāgavatā matāḥ || 60 ||
[Analyze grammar]

ekādaśaskandhe |
na kāmakarmabījānāṃ yasya cetasi sambhavaḥ |
vāsudevaikanilayaḥ sa vai bhāgavatottamaḥ || 61 ||
[Analyze grammar]

tatra dharmānādareṇa śrīmaduddhavapraśnottara eva |
ājñāyaivaṃ guṇān doṣān mayādiṣṭān api svakān |
dharmān santyajya yaḥ sarvān māṃ bhajeta sa tu sattamaḥ || 62 ||
[Analyze grammar]

śrībhagavadgītāyām |
sarvadharmān parityajya mām ekaṃ śaraṇaṃ vraja |
ahaṃ tvā sarvapāpebhyo mokṣayiṣyāmi mā śucaḥ || 63 ||
[Analyze grammar]

caturthaskandhe |
yadā yasyānugṛhṇāti bhagavān atmabhāvitaḥ |
na jahāti matiṃ loke vede ca pariniṣṭhitām || 64 ||
[Analyze grammar]

śrībhagavaduddhavasaṃvāde ailopākhyāne |
santo 'napekṣā maccittāḥ praśāntāḥ samadarśinaḥ |
nirmamā nirahaṅkārā nirdvandvā niṣparigrahāḥ || 65 ||
[Analyze grammar]

ataeva śrīkapiladevahūtisaṃvāde |
ta ete sādhavaḥ sādhvi sarvasaṅgavivarjitāḥ |
saṅgas teṣv atha te prārthyaḥ saṅgadoṣaharā hi te || 66 ||
[Analyze grammar]

vighnākulatve'pi manoratiparatā |
skānde tatraiva |
yasya kṛcchragatasyāpi keśave ramate manaḥ |
na vicyutā ca bhaktir vai sa vai bhāgavato naraḥ || 67 ||
[Analyze grammar]

āpadgatasya yasyeha bhakir avyabhicāriṇī |
nānyatra ramate cittaṃ sa vai bhāgavato naraḥ || 68 ||
[Analyze grammar]

premaikarasatā |
śrīṛṣabhadevasya putrānuśāsane |
ye vā mayīśe kṛtasauhṛdārthā; janeṣu dehambharavārtikeṣu |
gṛheṣu jāyātmajarātimatsu; na prītiyuktā yāvadarthāś ca loke || 69 ||
[Analyze grammar]

tridhā premaikaparatā premṇaḥ syāt tāratamyataḥ |
uttamā madhyamā cāsau kaniṣṭhā ceti bhedataḥ || 70 ||
[Analyze grammar]

tatrottamā |
yathā ekādaśe haviyogeśvarottare |
sarvabhūteṣu yaḥ paśyed bhagavadbhāvam ātmanaḥ |
bhūtāni bhagavaty ātmany eṣa bhāgavatottamaḥ || 71 ||
[Analyze grammar]

sveṣṭadevasya bhāvaṃ yaḥ sarvabhūteṣu paśyati |
bhāvayanti ca tāny asminn ity arthaḥ sammataḥ satām || 72 ||
[Analyze grammar]

śrīkapiladevahūtisaṃvāde |
mayy ananyena bhāvena bhaktiṃ kurvanti ye dṛḍhām |
matkṛte tyaktakarmāṇas tyaktasvajanabāndhavāḥ || 73 ||
[Analyze grammar]

śrīhaviyogeśvarottare |
visṛjati hṛdayaṃ na yasya sākṣād dharir avaśābhihito 'py aghaughanāśaḥ |
praṇayarasanayā dhṛtāṅghripadmaḥ sa bhavati bhāgavatapradhāna uktaḥ || 74 ||
[Analyze grammar]

tatra madhyamā |
śrīhaviyogeśvarottare |
īśvare tadadhīneṣu bāliśeṣu dviṣatsu ca |
premamaitrīkṛpopekṣā yaḥ karoti sa madhyamaḥ || 75 ||
[Analyze grammar]

tatra kaniṣṭhā |
tatraiva |
arcāyām eva haraye pūjāṃ yaḥ śraddhayehate |
na tadbhakteṣu cānyeṣu sa bhaktaḥ prākṛtaḥ smṛtaḥ || 76 ||
[Analyze grammar]

śraddhayā pūjanaṃ premabodhakaṃ bhakta ity api |
lakṣaṇāni ca yāny agre bhakter lekhyāni tāny api || 77 ||
[Analyze grammar]

vandanādīni vidyante yeṣu bhāgavatā hi te |
etāni lakṣaṇānītthaṃ gauṇamukhyādibhedataḥ || 78 ||
[Analyze grammar]

ūhyāni lakṣaṇāny evaṃ vivecyāni parāṇy api || 79 ||
[Analyze grammar]

īdṛglakṣaṇavantaḥ syur durlabhā bahavo janāḥ |
divyā hi maṇayo vyaktaṃ na varterann itas tataḥ || 80 ||
[Analyze grammar]

ataevoktaṃ mokṣadharme nārāyaṇīye |
jāyamānaṃ hi puruṣaṃ yaṃ paśyen madhusūdanaḥ |
sāttvikas tu sa vijñeyo bhaven mokṣe ca niścitaḥ || 81 ||
[Analyze grammar]

evaṃ saṅkṣipya likhitād vaiṣṇavānāṃ tu lakṣaṇāt |
māhātmyam api vijñeyaṃ likhyate'nyac ca tat kiyat || 82 ||
[Analyze grammar]

atha bhagavadbhaktānāṃ māhātmyam |
sauparṇe śrīśakroktau |
kalau bhāgavataṃ nāma yasya puṃsaḥ prajāyate |
jananī putriṇī tena pitṝṇāṃ tu dhurandharaḥ || 83 ||
[Analyze grammar]

kalau bhāgavataṃ nāma durlabhaṃ naiva labhyate |
brahmarudrapadotkṛṣṭaṃ guruṇā kathitaṃ mama || 84 ||
[Analyze grammar]

yasya bhāgavataṃ cihnaṃ dṛśyate tu harir mune |
gīyate ca kalau devā jñeyās te nāsti saṃśayaḥ || 85 ||
[Analyze grammar]

śrīmārkaṇḍeyoktau |
samīpe tiṣṭhate yasya ha antakāle'pi vaiṣṇavaḥ |
gacchate paramaṃ sthānaṃ yadyapi brahmahā bhavet || 86 ||
[Analyze grammar]

nāradīye śrīvāmadevarukmāṅgadasaṃvāde |
śvapaco 'pi mahīpāla viṣṇubhakto dvijādhikaḥ |
viṣṇubhaktivihīnas tu dvijo 'pi śvapacādhikaḥ || 87 ||
[Analyze grammar]

skānde revākhaṇḍe śrībrahmoktau |
indro maheśvaro brahmā paraṃ brahma tadaiva hi |
śvapaco 'pi bhavaty eva yadā tuṣṭā'si keśava || 88 ||
[Analyze grammar]

śvapacād api kaṣṭatvaṃ brahmeśānādayaḥ surāḥ |
tadaivācyuta yānty ete yadaiva tvaṃ parāṅmukhaḥ || 89 ||
[Analyze grammar]

sa kartā sarvadharmāṇāṃ bhakto yas tava keśava |
sa kartā sarvapāpānāṃ yo na bhaktas tavācyuta || 90 ||
[Analyze grammar]

dharmo bhavaty adharmo 'pi kṛto bhaktais tavācyuta |
pāpaṃ bhavati dharmo 'pi tavābhaktaiḥ kṛto hareḥ || 91 ||
[Analyze grammar]

niḥśeṣadharmakartā vāpy abhakto narake hare |
sadā tiṣṭhati bhaktas te brahmahāpi viśudhyati || 92 ||
[Analyze grammar]

niścalā tvayi bhaktir yā saiva muktir janārdana |
muktā eva hi bhaktās te tava viṣṇo yato hare || 93 ||
[Analyze grammar]

tatraiva durvāsonāradasaṃvāde |
nūnaṃ bhāgavatā loke lokarakṣāviśāradāḥ |
vrajanti viṣṇunādiṣṭā hṛdisthena mahāmune || 94 ||
[Analyze grammar]

bhagavān eva sarvatra bhūtānāṃ kṛpayā hariḥ |
rakṣaṇāya caran lokān bhaktarūpeṇa nārada || 95 ||
[Analyze grammar]

tatraiva śrībrahmanāradasaṃvāde |
yas tu viṣṇuparo nityaṃ dṛḍhabhaktir jitSTARTriyaḥ |
svagṛhe'pi vasan yāti tad viṣṇoḥ paramaṃ padam || 96 ||
[Analyze grammar]

aśvamedhasahasrāṇāṃ sahasraṃ yaḥ karoti vai |
nāsau tatphalam āpnoti tadbhaktair yad avāpyate || 97 ||
[Analyze grammar]

tatraivāmṛtasāroddhāre śrīyamatadbhaṭasaṃvāde |
sarvatra vaiṣṇavāḥ pūjyāḥ svarge martye rasātale |
devatānāṃ manuṣyāṇāṃ tathaivoragarakṣasām || 98 ||
[Analyze grammar]

yeṣāṃ smaraṇamātreṇa pāpalakṣaśatāni ca |
dahyante nātra sandeho vaiṣṇavānāṃ mahātmanām || 99 ||
[Analyze grammar]

yeṣāṃ pādarajenaiva prāpyate jāhnavījalam |
nārmadaṃ yāmunaṃ caiva kiṃ punaḥ pādayor jalam || 100 ||
[Analyze grammar]

yeṣāṃ vākyajalaughena vinā gaṅgājalair api |
vinā tīrthasahasreṇa snāto bhavati mānavaḥ || 101 ||
[Analyze grammar]

tatraiva cāturmāsyamāhātmye |
tāvad bhramanti saṃsāre pitaraḥ piṇḍatatparaḥ |
yāvat kule bhaktiyuktaḥ suto naiva prajāyate || 102 ||
[Analyze grammar]

sa eva jñānavān loke yogināṃ prathamo hi saḥ |
mahākratūnām āhartā haribhaktiyuto hi yaḥ || 103 ||
[Analyze grammar]

kāśīkhaṇḍe dhruvacarite |
na cyavante hi yadbhaktyā mahatyāṃ pralayāpadi |
ato 'cyuto 'khile loke sa ekaḥ sarvago 'vyayaḥ || 104 ||
[Analyze grammar]

na tasmād bhagavadbhaktād bhetavyaṃ kenacit kvacit |
niyataṃ viṣṇubhaktā yena te syuḥ paratāpinaḥ || 105 ||
[Analyze grammar]

tatraivāgre |
brāhmaṇaḥ kṣatriyaḥ vaiśyaḥ śūdro vā yadi vetaraḥ |
viṣṇubhaktisamāyukto jñeyaḥ sarvottamottamaḥ || 106 ||
[Analyze grammar]

śaṅkhacakrāṅkitatanuḥ śirasā mañjarīdharaḥ |
gopīcandanaliptāṅgo dṛṣṭaś ced tadaghaṃ kutaḥ || 107 ||
[Analyze grammar]

mahābhārate rājadharme |
īśvaraṃ sarvabhūtānāṃ jagataḥ prabhavāpyayam |
bhaktā nārāyaṇaṃ devaṃ durgāṇy atitaranti te || 108 ||
[Analyze grammar]

viṣṇudharmottare |
śayanād utthito yas tu kīrtayen madhusūdanam |
kīrtanāt tasya pāpāni nāśam āyānty aśeṣataḥ || 109 ||
[Analyze grammar]

tatraiva |
yasyāpy anante jagatām adhīśe bhaktiḥ parā yādavadevadeve |
tasmāt paraṃ nāparam asti kiñcit pātraṃ triloke puruṣapravīra || 110 ||
[Analyze grammar]

dvārakāmāhātmye śrīprahlādabalisaṃvāde |
nityaṃ ye prātar utthāya vaiṣṇavānāṃ tu kīrtanam |
kurvanti te bhāgavatāḥ kṛṣṇatulyāḥ kalau bale || 111 ||
[Analyze grammar]

haribhaktisudhodaye |
svadarśanasparśanapūjanaiḥ kṛtī tamāṃsi viṣṇupratimeva vaiṣṇavaḥ |
dhunvan vasaty atra janasya yan na tat svārthaṃ paraṃ lokahitāya dīpavat || 112 ||
[Analyze grammar]

itihāsasamuccaye śrīlomaśavākye |
ye bhajanti jagadyoniṃ vāsudevaṃ sanātanam |
na tebhyo vidyate tīrtham adhikaṃ rājasattama || 113 ||
[Analyze grammar]

yatra bhāgavatāḥ snānaṃ kurvanti vimalāśrayāḥ |
tattīrtham adhikaṃ viddhi sarvapāpaviśodhanam || 114 ||
[Analyze grammar]

yatra rāgādirahitā vāsudevaparāyaṇāḥ |
tatra sannihito viṣṇur nṛpate nātra saṃśayaḥ || 115 ||
[Analyze grammar]

na gandhair na tathā toyair na puṣpaiś ca manoharaiḥ |
sānnidhyaṃ kurute devo yatra santi na vaiṣṇavāḥ || 116 ||
[Analyze grammar]

balibhiś copavāsaiś ca nṛtyagītādibhis tathā |
nityam ārādhyamāno 'pi tatra viṣṇur na tṛpyati || 117 ||
[Analyze grammar]

tasmād ete mahābhāgā vaiṣṇavā vītakalmaṣāḥ |
punanti sakalān lokāṃs tat tīrtham adhikaṃ tataḥ || 118 ||
[Analyze grammar]

śūdraṃ vā bhagavadbhaktaṃ niṣādaṃ śvapacaṃ tathā |
vīkṣataṃ jātisāmānyāt sa yāti narakaṃ dhruvam || 119 ||
[Analyze grammar]

tasmād viṣṇuprasādāya vaiṣṇavān paritoṣayet |
prasādasumukho viṣṇus tenaiva syān na saṃśayaḥ || 120 ||
[Analyze grammar]

tatraiva śrīnāradapuṇḍarīkasaṃvāde |
ye nṛśaṃsā durātmānaḥ pāpācāraratāḥ sadā |
te'pi yānti paraṃ dhāma nārāyaṇaparāśrayāḥ || 121 ||
[Analyze grammar]

lipyante na ca pāpena vaiṣṇavā viṣṇutatparāḥ |
punanti sakalān lokān sahasrāṃśur ivoditaḥ || 122 ||
[Analyze grammar]

janmāntarasahasreṣu yasya syād buddhir īdṛśī |
dāso 'haṃ vāsudevasya sarvān lokān samuddharet || 123 ||
[Analyze grammar]

sa yāti viṣṇusālokyaṃ puruṣo nātra saṃśayaḥ |
kiṃ punas tadgataprāṇāḥ puruṣāḥ saṃyatSTARTriyāḥ || 124 ||
[Analyze grammar]

smṛtaḥ sambhāṣito vāpi pūjito vā dvijottamāḥ |
punāti bhagavadbhaktaś cāṇḍālo 'pi yadṛcchayā || 125 ||
[Analyze grammar]

śrīvyāsavākye |
janmāntarasahasreṣu viṣṇubhakto na lipyate |
yasya sandarśanād eva bhasmībhavati pātakam || 126 ||
[Analyze grammar]

itihāsasamuccaye śrībhagavadvākye |
na me priyaś caturvedī madbhaktaḥ śvapacaḥ priyaḥ |
tasmai deyaṃ tato grāhyaṃ sa ca pūjyo yathā hy aham || 127 ||
[Analyze grammar]

tatraiva brahmavākye |
sabhartṛkā vā vidhavā viṣṇubhaktiṃ karoti yā |
samuddharati cātmānaṃ kulam ekottaraṃ śatam || 128 ||
[Analyze grammar]

dvārakāmāhātmye prahlādabalisaṃvāde |
saṅkīrṇayonayaḥ pūtā ye bhaktā madhusūdane |
mlecchatulyāḥ kulīnās te ye na bhaktā janārdane || 129 ||
[Analyze grammar]

ādipurāṇe śrīkṛṣṇārjunasaṃvāde |
vaiṣṇavān bhaja kaunteya mā bhajasvānyadevatāḥ |
punanti vaiṣṇavāḥ sarve sarvadevam idaṃ jagat |
madbhakto durlabho yasya sa eva mama durlabhaḥ || 130 ||
[Analyze grammar]

tatparo durlabho nāsti satyaṃ satyaṃ dhanañjaya |
jagatāṃ guravo bhaktā bhaktānāṃ guravo vayam |
sarvatra guravo bhaktā vayaṃ ca guravo yathā |
asmākaṃ bāndhavā bhaktā bhaktānāṃ bāndhavā vayam || 131 ||
[Analyze grammar]

asmākaṃ guravo bhaktā bhaktānāṃ guravo vayam |
madbhaktā yatra gacchanti tatra gacchāmi pārthiva |
bhaktānām anugacchanti muktayaḥ śrutibhiḥ saha || 132 ||
[Analyze grammar]

ye me bhaktajanāḥ pārtha na me bhaktāś ca te janāḥ |
madbhaktānāṃ ca ye bhaktās te me bhaktatamā matāḥ || 133 ||
[Analyze grammar]

ye kecit prāṇino bhaktā madarthe tyaktabāndhavāḥ |
teṣām ahaṃ parikrīto nānyakrīto dhanañjaya || 134 ||
[Analyze grammar]

eṣāṃ bhakṣyaṃ sunirṇītaṃ śrūyatāṃ niścitaṃ mama |
ucchiṣṭam avaśiṣṭaṃ ca bhaktānāṃ bhojanadvayam || 135 ||
[Analyze grammar]

nāmayuktajanāḥ kecij jātyantarasamanvitāḥ |
kurvanti me yathā prītiṃ na tathā vedapāragāḥ || 136 ||
[Analyze grammar]

bṛhannāradīye mārkaṇḍeyaṃ prati śrībhagavaduktau |
viṣṇur bhaktakuṭumbīti vadanti vibudhāḥ sadā |
tad eva pālayiṣyāmi majjano nānṛtaṃ vadet || 137 ||
[Analyze grammar]

mama janma kule yasya tat kulaṃ mokṣagāmi vai |
mayi tuṣṭe muniśreṣṭha kim asādhyaṃ jagattraye || 138 ||
[Analyze grammar]

mayi bhaktiparo yas tu madyājī matkathāparaḥ |
maddhyānī svakulaṃ sarvaṃ nayaty acyutarūpatām || 139 ||
[Analyze grammar]

madarthaṃ karma kurvāṇo matpraṇāmaparo naraḥ |
manmanāḥ svakulaṃ sarvaṃ nayaty acyutarūpatām || 140 ||
[Analyze grammar]

aham eva dvijaśreṣṭha nityaṃ pracchannavigrahaḥ |
bhagavadbhaktarūpeṇa lokān rakṣāmi sarvadā || 141 ||
[Analyze grammar]

tatraivāditimāhātmye śrīsūtoktau |
viprāḥ śṛṇudhvaṃ māhātmyaṃ haribhaktiratātmanām |
haridhyānaparāṇāṃ tu kaḥ samarthaḥ prabādhitum || 142 ||
[Analyze grammar]

haribhaktiparo yatra tatra brahmā hariḥ śivaḥ |
tatra devāś ca siddhādyā nityaṃ tiṣṭhanti sattamāḥ || 143 ||
[Analyze grammar]

nimiṣaṃ nimṣārdhaṃ vā yatra tiṣṭhanti sattamāḥ |
tatraiva sarvaśreyāṃsi tat tīrthaṃ tat tapovanam || 144 ||
[Analyze grammar]

tatraivāditiṃ prati śrībhagavaduttare |
rāgadveṣavihīnā ye madbhaktā matparāyaṇāḥ |
vadanti satataṃ te māṃ gatāsūyā adāmbhikāḥ || 145 ||
[Analyze grammar]

paropatāpavimukhāḥ śivabhaktiparāyaṇāḥ |
matkathāśravaṇāsaktā vahanti satataṃ hi mām || 146 ||
[Analyze grammar]

tatraiva dhvajāropaṇamāhātmye śrīviṣṇudūtoktau |
yatīnāṃ viṣṇubhaktānāṃ paricaryāparāyaṇāḥ |
īkṣitā api gacchanti pāpino 'pi parāṃ gatim || 147 ||
[Analyze grammar]

tatraiva śrībhagavattoṣaprakārapraśnottare |
ripavas taṃ na hiṃsanti na bādhante grahāś ca tam |
rākṣasāś ca na cekṣante naraṃ viṣṇuparāyaṇam || 148 ||
[Analyze grammar]

bhaktir dṛḍhā bhaved yasya devadeve janārdane |
śreyāṃsi tasya sidhyanti bhaktimanto 'dhikās tataḥ || 149 ||
[Analyze grammar]

tatraivāgre |
adyāpi ca muniśreṣṭha brahmādyā api devatāḥ |
prabhāvaṃ na vijānanti viṣṇubhaktiratātmanām || 150 ||
[Analyze grammar]

kiṃ ca |
dharmārthakāmamokṣākhyāḥ puruṣārthā dvijottamāḥ |
haribhaktiparāṇāṃ vai sampadyante na saṃśayaḥ || 151 ||
[Analyze grammar]

tatraiva lubdhakopākhyānasyādau |
ye viṣṇuniratāḥ śāntā lokānugrahatatparāḥ |
sarvabhūtadayāyuktā viṣṇurūpāḥ parikīrtitāḥ || 152 ||
[Analyze grammar]

viṣṇubhaktivihīnā ye caṇḍālāḥ parikīrtitāḥ |
caṇḍālā api vai śreṣṭhā haribhaktiparāyaṇāḥ || 153 ||
[Analyze grammar]

tatraiva yajñadhvajopākhyānasyādau śrīsūtavākyam |
haribhaktirasāsvādamuditā ye narottamāḥ |
namaskaromy ahaṃ tebhyo yatsaṅgān muktibhāg naraḥ || 154 ||
[Analyze grammar]

haribhaktiparā ye tu harināmaparāyaṇāḥ |
durvṛttā vā suvṛttā vā tebhyo nityaṃ namo namaḥ || 155 ||
[Analyze grammar]

aho bhāgyam aho bhāgyaṃ viṣṇubhaktiratātmanām |
yasmān muktiḥ karasthaiva yoginām api durlabhā || 156 ||
[Analyze grammar]

tatraiva kaliprasaṅge ghore kaliyuge prāpte sarvadharmavivarjite |
vāsudevaparā martyāḥ kṛtārthā nātra saṃśayaḥ || 157 ||
[Analyze grammar]

asty antar durlabhā proktā haribhaktiḥ kalau yuge |
haribhaktiratānāṃ vai pāpabandho na jāyate || 158 ||
[Analyze grammar]

vedavādaratāḥ sarve tathā tīrthaniṣeviṇaḥ |
haribhaktirataiḥ sārdhaṃ kalāṃ nārhanti ṣoḍaśīm || 159 ||
[Analyze grammar]

ataevoktaṃ devais tatraiva bhāratavarṣaprasaṅge |
harikīrtanaśīlo vā tadbhaktānāṃ priyo 'pi vā |
śuśrūṣur vāpi mahatāṃ sa vandyo 'smābhir uttamaḥ || 160 ||
[Analyze grammar]

pādme śrībhagavadbrahmasaṃvāde |
darśanadhyānasaṃsparśair martyakūrmavihaṅgamāḥ |
puṣṇanti svāny apatyāni tathāham api padmaja || 161 ||
[Analyze grammar]

muhūrtenāpi saṃhartuṃ śaktau yadyapi dānavāt |
madbhaktānāṃ vinodārthaṃ karomi vividhāḥ kriyāḥ || 162 ||
[Analyze grammar]

tatraiva māghamāhātmye devadūtavikuṇḍalasaṃvāde |
na vayaṃ yamaṃ yamalokaṃ na na dūtān ghoradarśanāt |
paśyanti vaiṣṇavā nūnaṃ satyaṃ satyaṃ mayoditam || 163 ||
[Analyze grammar]

śvapākam iva nekṣeta loke vipram avaiṣṇavam |
vaiṣṇavo varṇabāhyo 'pi punāti bhuvanatrayam || 164 ||
[Analyze grammar]

na śūdrā bhagavadbhaktās te tu bhāvanā matāḥ |
sarvavarṇeṣu te śūdrā ye na bhaktā janārdana || 165 ||
[Analyze grammar]

viṣṇubhaktasya ye dāsā vaiṣṇavānnabhujaś ca ye |
te'pi kratubhujāṃ gvaiśya gatiṃ yānti nirākulāḥ || 166 ||
[Analyze grammar]

tatraiva vaiśākhamāhātmye pañcapuruṣāṇām uktau |
bhavyāni bhūtāni janārdanasya paropakārāya caranti viśvam || 167 ||
[Analyze grammar]

tathā |
santaḥ pratiṣṭhā dīnānāṃ daivād udbhūtapāpmanām |
ārtānām ārtihantāro darśanād eva sādhavaḥ || 168 ||
[Analyze grammar]

tatraivottarakhaṇḍe śivapārvatīsaṃvāde na karmabandhanaṃ janma vaiṣṇavānāṃ ca vidyate |
viṣṇor anucaratvaṃ hi mokṣayāhur manīṣiṇaḥ || 169 ||
[Analyze grammar]

na dāsyam amareśasya bandhanaṃ parikīrtitam |
sarvabandhananirmuktā haridāsā nirāmayāḥ || 170 ||
[Analyze grammar]

brahmāṇḍapurāṇe janmāṣṭamīvratamāhātmye śrīcitraguptoktau |
darśanasparśanālāpasahavāsādibhiḥ kṣaṇāt |
bhaktāḥ punanti kṛṣṇasya sākṣād api ca pukkaśam || 171 ||
[Analyze grammar]

tyaktasarvakulācāro mahāpātakavān api |
viṣṇor bhaktaṃ samāśritya naro nārhati yātanām || 172 ||
[Analyze grammar]

vāśiṣṭhe |
yasmin deśe marau tajjño nāsti sajjanapādapaḥ |
saphalaḥ śītalacchāyo na tatra divasaṃ vaset || 173 ||
[Analyze grammar]

sadā santo 'bhigantavyā yadyapy upadiśanti na |
yā hi svairakathās teṣām upadeśā bhavanti te || 174 ||
[Analyze grammar]

gāruḍe |
satrayājisahasrebhyaḥ sarvavedāntapāragaḥ |
sarvavedāntavitkoṭyā viṣṇubhakto viśiṣyate || 175 ||
[Analyze grammar]

vaiṣṇavānāṃ sahasrebhya ekānty eko viśiṣyate |
ekāntinas tu puruṣā gacchanti paramaṃ padam || 176 ||
[Analyze grammar]

śrībhagavadgītāsu |
api cet sudurācāro bhajate mām ananyabhāk |
sādhur eva sa mantavyaḥ samyag vyavasito hi saḥ || 177 ||
[Analyze grammar]

kṣipraṃ bhavati dharmātmā śaśvacchāntiṃ nigacchati |
kaunteya pratijānīhi na me bhaktaḥ praṇaśyati || 178 ||
[Analyze grammar]

māṃ hi pārtha vyapāśritya ye 'pi syuḥ pāpayonayaḥ |
striyo vaiśyās tathā śūdrās te 'pi yānti parāṃ gatim |
kiṃ punar brāhmaṇāḥ puṇyā bhaktā rājarṣayas tathā || 179 ||
[Analyze grammar]

kiṃ ca tatraiva |
yoginām api sarveṣāṃ madgatenāntarātmanā |
śraddhāvān bhajate yo māṃ sa me yuktatamo mataḥ || 180 ||
[Analyze grammar]

śrībhāgavatasya prathamaskandhe śrīparīkṣitoktau |
yeṣāṃ saṃsmaraṇāt puṃsāṃ sadyaḥ śuddhyanti vai gṛhāḥ |
kiṃ punar darśanasparśa pādaśaucāsanādibhiḥ || 181 ||
[Analyze grammar]

tṛtīyaskandhe śrīvidurasya |
śrutasya puṃsāṃ suciraśramasya nanv añjasā sūribhir īḍito 'rthaḥ |
tattadguṇānuśravaṇaṃ mukunda |
pādāravindaṃ hṛdayeṣu yeṣām || 182 ||
[Analyze grammar]

devahūtiṃ prati kapiladevasya |
na karhicin matparāḥ śāntarūpe naṅkṣyanti no me 'nimiṣo leḍhi hetiḥ |
yeṣām ahaṃ priya ātmā sutaś ca sakhā guruḥ suhṛdo daivam iṣṭam || 183 ||
[Analyze grammar]

caturthe śrīdhruvasya |
yā nirvṛtis tanubhṛtāṃ tava pādapadma |
dhyānād bhavajjanakathāśravaṇena vā syāt |
sā brahmaṇi svamahimany api nātha mā bhūt kiṃ tv antakāsilulitāt patatāṃ vimānāt || 184 ||
[Analyze grammar]

śrīrudrasya svadharmaniṣṭhaḥ śatajanmabhiḥ pumān viriñcatām eti tataḥ paraṃ hi mām |
avyākṛtaṃ bhāgavato 'tha vaiṣṇavaṃ padaṃ yathāhaṃ vibudhāḥ kalātyaye || 185 ||
[Analyze grammar]

pañcame śrījaḍabharatasya |
rahūgaṇaitat tapasā na yāti na cejyayā nirvapaṇād gṛhād vā |
na cchandasā naiva jalāgnisūryair vinā mahatpādarajo'bhiṣekam || 186 ||
[Analyze grammar]

ṣaṣṭhe śrīparīkṣitaḥ |
rajobhiḥ samasaṅkhyātāḥ pārthivair iha jantavaḥ |
teṣāṃ ye kecanehante śreyo vai manujādayaḥ || 187 ||
[Analyze grammar]

prāyo mumukṣavas teṣāṃ kecanaiva dvijottama |
mumukṣūṇāṃ sahasreṣu kaścin mucyeta sidhyati || 188 ||
[Analyze grammar]

muktānām api siddhānāṃ nārāyaṇaparāyaṇaḥ |
sudurlabhaḥ praśāntātmā koṭiṣv api mahāmune || 189 ||
[Analyze grammar]

śrīśivasya |
nārāyaṇaparāḥ sarve na kutaścana bibhyati |
svargāpavarganarakeṣv api tulyārthadarśinaḥ || 190 ||
[Analyze grammar]

saptame śrīprahlādasya |
naiṣāṃ matis tāvad urukramāṅghriṃ spṛśaty anarthāpagamo yadarthaḥ |
mahīyasāṃ pādarajo'bhiṣekaṃ niṣkiñcanānāṃ na vṛṇīta yāvat || 191 ||
[Analyze grammar]

kiṃ ca |
viprād dviṣaḍguṇayutād aravindanābha |
pādāravindavimukhāt śvapacaṃ variṣṭham |
manye tadarpitamanovacanehitārtha |
prāṇaṃ punāti sa kulaṃ na tu bhūrimānaḥ || 192 ||
[Analyze grammar]

aṣṭame śrīgajSTARTrasya |
ekāntino yasya na kañcanārthaṃ vāñchanti ye vai bhagavatprapannāḥ |
atyadbhutaṃ taccaritaṃ sumaṅgalaṃ gāyanta ānandasamudramagnāḥ || 193 ||
[Analyze grammar]

navame śrībhagavataḥ |
ahaṃ bhaktaparādhīno hy asvatantra iva dvija |
sādhubhir grastahṛdayo bhaktair bhaktajanapriyaḥ || 194 ||
[Analyze grammar]

nāham ātmānam āśāse madbhaktaiḥ sādhubhir vinā |
śriyaṃ cātyantikīṃ brahman yeṣāṃ gatir ahaṃ parā || 195 ||
[Analyze grammar]

ye dārāgāraputrāpta prāṇān vittam imaṃ param |
hitvā māṃ śaraṇaṃ yātāḥ kathaṃ tāṃs tyaktum utsahe || 196 ||
[Analyze grammar]

mayi nirbaddhahṛdayāḥ sādhavaḥ samadarśanāḥ |
vaśe kurvanti māṃ bhaktyā satstriyaḥ satpatiṃ yathā || 197 ||
[Analyze grammar]

sādhavo hṛdayaṃ mahyaṃ sādhūnāṃ hṛdayaṃ tv aham |
madanyat te na jānanti nāhaṃ tebhyo manāg api || 198 ||
[Analyze grammar]

tatraiva śrīdurvāsasaḥ |
duṣkaraḥ ko nu sādhūnāṃ dustyajo vā mahātmanām |
yaiḥ saṅgṛhīto bhagavān sātvatām ṛṣabho hariḥ || 199 ||
[Analyze grammar]

yannāmaśrutimātreṇa pumān bhavati nirmalaḥ |
tasya tīrthapadaḥ kiṃ vā dāsānām avaśiṣyate || 200 ||
[Analyze grammar]

daśame devastutau |
tathā na te mādhava tāvakāḥ kvacid bhraśyanti mārgāt tvayi baddhasauhṛdāḥ |
tvayābhiguptā vicaranti nirbhayā vināyakānīkapamūrdhasu prabho || 201 ||
[Analyze grammar]

śrībādarāyaṇeḥ |
nāyaṃ sukhāpo bhagavān dehināṃ gopikāsutaḥ |
jñānināṃ cātmabhūtānāṃ yathā bhaktimatām iha || 202 ||
[Analyze grammar]

tatraiva śrībhagavataḥ |
sādhūnāṃ samacittānāṃ mukundacaraṇaiṣiṇām |
upekṣyaiḥ kiṃ dhanastambhair asadbhir asadāśrayaiḥ || 203 ||
[Analyze grammar]

kiṃ ca |
na hy ammayāni tīrthāni na devā mṛcchilāmayāḥ |
te punanty urukālena darśanād eva sādhavaḥ || 204 ||
[Analyze grammar]

api ca |
nāgnir na sūryo na ca candratārakā na bhūr jalaṃ khaṃ śvasano 'tha vāṅ manaḥ |
upāsitā bhedakṛto haranty aghaṃ vipaścito ghnanti muhūrtasevayā || 205 ||
[Analyze grammar]

yasyātmabuddhiḥ kuṇape tridhātuke svadhīḥ kalatrādiṣu bhauma ijyadhīḥ |
yattīrthabuddhiḥ salile na karhicij janeṣv abhijñeṣu sa eva gokharaḥ || 206 ||
[Analyze grammar]

śrutistutau |
tava pari ye caranty akhilasattvaniketatayā ta uta padākramanty avigaṇayya śiro nirṛteḥ |
parivayase paśūn iva girā vibudhān api tāṃs tvayi kṛtasauhṛdāḥ khalu punanti na ye vimukhāḥ || 207 ||
[Analyze grammar]

ekādaśe śrīvasudevasya |
bhūtānāṃ devacaritaṃ duḥkhāya ca sukhāya ca |
sukhāyaiva hi sādhūnāṃ tvādṛśām acyutātmanām || 208 ||
[Analyze grammar]

bhajanti ye yathā devān devā api tathaiva tān |
chāyeva karmasacivāḥ sādhavo dīnavatsalāḥ || 209 ||
[Analyze grammar]

tatraiva śrībhagavataḥ |
na mayy ekāntabhaktānāṃ guṇadoṣodbhavā guṇāḥ |
sādhūnāṃ samacittānāṃ buddheḥ param upeyuṣām || 210 ||
[Analyze grammar]

evam etān mayā diṣṭān anutiṣṭhanti me pathaḥ |
kṣemaṃ vindanti matsthānaṃ yad brahma paramaṃ viduḥ || 211 ||
[Analyze grammar]

nimajjyonmajjatāṃ ghore bhavābdhau paramāyaṇam |
santo brahmavidaḥ śāntā nor dṛḍhevāpsu majjatām || 212 ||
[Analyze grammar]

annaṃ hi prāṇināṃ prāṇā ārtānāṃ śaraṇaṃ tv aham |
dharmā vittaṃ nṝṇāṃ pretya santo 'rvāgbibhyato 'raṇam || 213 ||
[Analyze grammar]

santo diśanti cakṣūṃṣi bahir arkaḥ samutthitaḥ |
devatā bāndhavāḥ santaḥ santa ātmāham eva ca || 214 ||
[Analyze grammar]

kiṃ ca |
na kiñcit sādhavo dhīrā bhaktā hy ekāntino mama |
vāñchanty api mayā dattaṃ kaivalyam apunarbhavam || 215 ||
[Analyze grammar]

dvādaśe ca śrīparīkṣitaḥ |
nātyadbhutam ahaṃ manye mahatām acyutātmanām |
ajñeṣu tāpatapteṣu bhūteṣu yad anugrahaḥ || 216 ||
[Analyze grammar]

śrīrudrasya ca mārkaṇḍeyam adhikṛtya |
śravaṇād darśanād vāpi mahāpātakino 'pi vaḥ |
śudhyerann antyajāś cāpi kim u sambhāṣaṇādibhiḥ || 217 ||
[Analyze grammar]

ataeva śrīdharmarājasya svadūtānuśāsane ṣaṣṭhaskandhe |
te devasiddhaparigītapavitragāthā ye sādhavaḥ samadṛśo bhagavatprapannāḥ |
tān nopasīdata harer gadayābhiguptān naiṣāṃ vayaṃ na ca vayaḥ prabhavāma daṇḍe || 218 ||
[Analyze grammar]

tathā śrīviṣṇupurāṇe yamaniyamavidhūtakalmaṣāṇām anudinam acyutasaktamānasānām |
apagatam adamānamatsarāṇāṃ vraja bhaṭa dūratareṇa mānavānām || 219 ||
[Analyze grammar]

sakalam idam ahaṃ ca vāsudevaḥ paramapumān parameśvaraḥ sa ekaḥ |
iti matir acalā bhavaty anante hṛdayagate vraja tān vihāya dūrāt || 220 ||
[Analyze grammar]

kamalanayana vāsudeva viṣṇo dharaṇidharācyuta śaṅkhacakrapāṇe |
bhava śaraṇam itīrayanti ye vai tyaja bhaṭa dūratareṇa tān apāpān || 221 ||
[Analyze grammar]

vasati manasi yasya so 'vyayātmā |
puruṣavarasya na tasya dṛṣṭipāte |
tava gatir atha vā mamāsti cakra |
pratihatavīryabalasya so 'nyalokyaḥ || 222 ||
[Analyze grammar]

nārasiṃhe viṣṇupurāṇe ca aham amarārcitena dhātrā yama iti lokahitāhite niyuktaḥ |
hariguruvaśago 'smi na svatantraḥ prabhavati saṃyamane mamāpi viṣṇuḥ || 223 ||
[Analyze grammar]

sugatim abhilaṣāmi vāsudevā |
vaham api bhāgavatasthitāntarātmā |
madhuvara vaśago 'smi na svatantraḥ prabhavati saṃyamane mamāpi kṛṣṇaḥ || 224 ||
[Analyze grammar]

na hi śaśakaluṣacchaviḥ kadācit timiraparābhavatām upaiti candraḥ |
bhagavati ca harāv ananyacetā bhṛśamalino 'pi virājate manuṣyaḥ || 225 ||
[Analyze grammar]

pādme devadyūtivikuṇḍalasaṃvāde |
prāhāsmān yamunā bhrātā sadaiva hi punaḥ punaḥ |
bhavadbhir vaiṣṇavās tyājyā na te syur mama gocarāḥ || 226 ||
[Analyze grammar]

durācāro duṣkṛto 'pi sadācārarato 'pi yaḥ |
bhavadbhiḥ sa sadā tyājyo viṣṇuṃ ca bhajate naraḥ || 227 ||
[Analyze grammar]

vaiṣṇavo yadgṛhe bhuṅkte yeṣāṃ vaiṣṇavasaṅgatiḥ |
te'pi vaḥ parivāryāḥ syus tatsaṅgahatakilbiṣāḥ || 228 ||
[Analyze grammar]

skānde amṛtasāroddhāre |
ekādaśyām abhuñjānā yuktāḥ pāpaśatair api |
bhavadbhiḥ parihartavyā hitā me yadi sarvadā || 229 ||
[Analyze grammar]

ye smaranti jagannāthaṃ mṛtyukāle janārdanam |
pāpakoṭiśatair yuktā na te grāhyā mamājñayā || 230 ||
[Analyze grammar]

na brahmā na śivāgnīndrā nāhaṃ nānye divaukasaḥ |
śaktā na nigrahaṃ kartuṃ vaiṣṇavānāṃ mahātmanām || 231 ||
[Analyze grammar]

ato 'haṃ sarvakālaṃ ca vaiṣṇavānāṃ bibhemi vai |
bhavadbhiḥ parihartavyā vaiṣṇavā ye sadaiva hi || 232 ||
[Analyze grammar]

vaiṣṇavā viṣṇuvat pūjyā mama mānyā viśeṣataḥ |
teṣāṃ kṛte'pamāne'pi vināśo jāyate dhruvam || 233 ||
[Analyze grammar]

kiṃ ca |
yeṣāṃ smaraṇamātreṇa pāpalakṣaśatāni ca |
dahyante nātra sandeho vaiṣṇavānāṃ mahātmanām || 234 ||
[Analyze grammar]

yeṣāṃ pādarajenaiva prāpyate jāhnavījalam |
nārmadaṃ yāmunaṃ caiva kiṃ punaḥ pādayor jalam || 235 ||
[Analyze grammar]

yeṣāṃ vākyajalaughena vinā gaṅgājalair api |
vinā tīrthasahasreṇa snāto bhavati mānavaḥ || 236 ||
[Analyze grammar]

kiṃ ca |
brahmaloke na me vāso na me vāso harālaye |
nālaye lokapālānāṃ vaiṣṇavānāṃ parābhave || 237 ||
[Analyze grammar]

na devā na ca gandharvā na yakṣoragarākṣasāḥ |
trātuṃ samarthā ṛṣayo vaiṣṇavānāṃ parābhave || 238 ||
[Analyze grammar]

karomi karmaṇā vācā manasāpi na vipriyam |
vaiṣṇavānāṃ mahābhāgāḥ sudarśanabhayād api || 239 ||
[Analyze grammar]

ekato dhāvate cakram ekato harivāhanam |
ekato viṣṇudūtāś ca vaiṣṇave cārdite mayā || 240 ||
[Analyze grammar]

bṛhannāradīye caikādaśīmāhātmye |
ye viṣṇupūjanaratāḥ prayatāḥ kṛtajñāś caikādaśīvrataparā vijitSTARTriyāś ca |
nārāyaṇācyuta hare śaraṇaṃ bhaveti śāntā vadanti satataṃ tarasā tyajadhvam || 241 ||
[Analyze grammar]

nārāyaṇārpitadhiyo haribhaktabhaktān svācāramārganiratān gurusevakāṃś ca |
satpātradānaniratān harikīrtibhaktān dūtās tyajadhvam aniśaṃ harināmasaktān || 242 ||
[Analyze grammar]

pāṣaṇḍasaṅgarahitān haribhaktituṣṭān satsaṅgalolupatarāṃś ca tathātipuṇyān |
śambhor hareś ca samabuddhimatas tathaiva dūtās tyajadhvam upakāraparāñ narāṇām || 243 ||
[Analyze grammar]

ye vīkṣitā harikathāmṛtasevakaiś ca nārāyaṇasmṛtiparāyaṇamānasaiś ca |
viprSTARTrapādajalasevanasamprahṛṣṭais tān pāpino 'pi ca bhaṭā satataṃ tyajadhvam || 244 ||
[Analyze grammar]

ataevoktaṃ śrīnāradena caturthaskandhaśeṣe śriyam anucaratīṃ tadarthinaś ca dvipadapatīn vibudhāṃś ca yat svapūrṇaḥ |
na bhajati nijabhṛtyavargatantraḥ katham amum udvisṛjet pumān kṛtajñaḥ || 245 ||
[Analyze grammar]

ataeva prārthanam |
nārāyaṇavyūhastave |
nāhaṃ brahmāpi bhuyāsaṃ tvadbhaktirahito hare |
tvayi bhaktas tu kīṭo 'pi bhūyāsaṃ janmajanmasu || 246 ||
[Analyze grammar]

śrībrahmastutau ca daśamaskandhe |
tad astu me nātha sa bhūribhāgo bhave'tra vānyatra tu vā tiraścām |
yenāham eko 'pi bhavajjanānāṃ bhūtvā niṣeve tava pādapallavam || 247 ||
[Analyze grammar]

ataevoktaṃ śrīnārāyaṇavyūhastave |
ye tyaktalokadharmārthā viṣṇubhaktivaśaṃ gatāḥ |
bhajanti paramātmānaṃ tebhyo nityaṃ namo namaḥ || 248 ||
[Analyze grammar]

evaṃ śrībhagavadbhaktamāhātmyāmṛtavāridheḥ |
vicitrabhaṅgalekhārho lobhalolaṃ vināsti kaḥ || 249 ||
[Analyze grammar]

ataḥ śrībhagavadbhaktajanānāṃ saṅgatiḥ sadā |
kāryā sarvaprayatnena dvau lokau vijigīṣubhiḥ || 250 ||
[Analyze grammar]

bhagavadbhaktapādābjapādukābhyo namo 'stu me |
yatsaṅgamaḥ sādhanaṃ ca sādhyaṃ cākhilam uttamam || 251 ||
[Analyze grammar]

bṛhannāradīye yajñamālyupākhyānānte |
haribhaktiparāṇāṃ tu saṅgināṃ saṅgamātrataḥ |
mucyate sarvapāpebhyo mahāpātakavān api || 252 ||
[Analyze grammar]

sāmānyato 'narthanivartakatāarthaprāpakatā ca |
pādme vaiśākhamāhātmye śrīmuniśarmāṇaṃ prati pretānām uktau |
vināśayaty apayaśo buddhiṃ viśadayaty api |
pratiṣṭhāpayati prāyo nṛṇāṃ vaiṣṇavadarśanam || 253 ||
[Analyze grammar]

tatra śrīyamabrāhmaṇasaṃvāde mahārathanṛpoktau |
yathā prapadyamānasya bhagavantaṃ vibhāvasum |
śītaṃ bhayaṃ tamo 'py eti sādhūn saṃsevataḥ sadā || 254 ||
[Analyze grammar]

tatraiva pretopākhyāne pretoktau |
apākaroti duritaṃ śreyaḥ saṃyojayaty api |
yaśo vistārayaty āśu nṝṇāṃ vaiṣṇavasaṅgamaḥ || 255 ||
[Analyze grammar]

tatraiva |
gaṅgādipuṇyatīrtheṣu yo naraḥ snātum icchati |
yaḥ karoti satāṃ saṅgāṃ tayoḥ satsaṅgamo varaḥ || 256 ||
[Analyze grammar]

tatraiva bhagīrathanṛpoktau |
yaḥ snātaḥ śāntisitayā sādhusaṅgatigaṅgayā |
kiṃ tasya dānaiḥ kiṃ tīrthaiḥ kiṃ tapobhiḥ kim adhvaraiḥ || 257 ||
[Analyze grammar]

yāni yāni durāpāṇi vāñchitāni mahītale |
prāpyante tāni tāny eva sādhūnām eva saṅgamāt || 258 ||
[Analyze grammar]

vāśiṣṭhe |
śūnyam āpūrṇatām eti mṛtir apy amṛtāyate |
āpat sampad iva bhāti vidvajjanasamāgame || 259 ||
[Analyze grammar]

tṛtīyaskandhe |
saṅgo yaḥ saṃsṛter hetur asatsu vihito 'dhiyā |
sa eva sādhuṣu kṛto niḥsaṅgatvāya kalpate || 260 ||
[Analyze grammar]

śrīkapiladevoktau |
prasaṅgam ajaraṃ pāśam ātmanaḥ kavayo viduḥ |
sa eva sādhuṣu kṛto mokṣadvāram apāvṛtam || 261 ||
[Analyze grammar]

yataḥ |
arir mitraṃ viṣaṃ pathyam adharmo dharmatāṃ vrajet |
prasanne puṇḍarīkākṣe viparīte viparyayaḥ || 262 ||
[Analyze grammar]

kiṃ ca śrībhagavadvākyaṃ |
mannimittaṃ kṛtaṃ pāpam api dharmāya kalpate |
mām anādṛtya dharmo 'pi pāpaṃ syān matprabhāvataḥ || 263 ||
[Analyze grammar]

caturthaskandhe śrīdhruvoktau |
te na smaranty atitarāṃ priyam īśa martyaṃ ye cānv adaḥ sutasuhṛdgṛhavittadārāḥ |
ye tv abjanābha bhavadīyapadāravinda |
saugandhyalubdhahṛdayeṣu kṛtaprasaṅgāḥ || 264 ||
[Analyze grammar]

pādme tatraiva pretoktau |
rasāyanamayī śītā paramānandadāyinī |
nānandayati kaṃ nāma vaiṣṇavāśrayacandrikā || 265 ||
[Analyze grammar]

atha mokṣadatvam |
daśamaskandhe śrīmucukundastutau |
bhavāpavargo bhramato yadā bhavej janasya tarhy acuta satsamāgamaḥ |
satsaṅgamo yarhi tadaiva sadgatau parāvareśe tvayi jāyate matiḥ || 266 ||
[Analyze grammar]

ataevoktaṃ śrīpracetobhiś caturthaskandhe yatreḍyante kathā mṛṣṭās tṛṣṇāyāḥ praśamo yataḥ |
nirvairaṃ yatra bhūteṣu nodvego yatra kaścana || 267 ||
[Analyze grammar]

yatra nārāyaṇaḥ sākṣād bhagavān nyāsināṃ gatiḥ |
saṃstūyate satkathāsu muktasaṅgaiḥ punaḥ punaḥ || 268 ||
[Analyze grammar]

teṣāṃ vicaratāṃ padbhyāṃ tīrthānāṃ pāvanecchayā |
bhītasya kiṃ na roceta tāvakānāṃ samāgamaḥ || 269 ||
[Analyze grammar]

atha sarvasāratā |
bṛhannāradīye śrīnāradasanatkumārasaṃvāde |
asārabhūte saṃsāre sāram etad ajātmaja |
bhagavadbhaktasaṅgaś ca haribhaktis titikṣutā || 270 ||
[Analyze grammar]

pādme tatraiva mahārathanṛpoktau |
asāgarotthaṃ pīyūṣam adravyaṃ vyasanauṣadham |
harṣaś cālokaparyantaḥ satāṃ kila samāgamaḥ || 271 ||
[Analyze grammar]

atha bhagavatkathāmṛtapānaikahetutā |
pādme vaiśākhamāhātmye śrīnāradoktau prasaṅgena satām ātmamanaḥ śrutirasāyanāḥ |
bhavanti kīrtanīyasya kathāḥ kṛṣṇasya nirmalāḥ || 272 ||
[Analyze grammar]

tṛtīyaskandhe śrīkapiladevoktau |
satāṃ prasaṅgān mama vīryasaṃvido bhavanti hṛtkarṇarasāyanāḥ kathāḥ |
tajjoṣaṇād āśv apavargavartmani śraddhā ratir bhaktir anukramiṣyati || 273 ||
[Analyze grammar]

caturthe śrīnāradoktau |
yatra bhāgavatā rājan sādhavo viśadāśayāḥ |
bhagavadguṇānukathana śravaṇavyagracetasaḥ || 274 ||
[Analyze grammar]

tasmin mahanmukharitā madhubhic |
caritrapīyūṣaśeṣasaritaḥ paritaḥ sravanti |
tā ye pibanty avitṛṣo nṛpa gāḍhakarṇais tān na spṛśanty aśanatṛḍbhayaśokamohāḥ || 275 ||
[Analyze grammar]

pañcame śrībrāhmaṇarahūgaṇasaṃvāde |
yatrottamaślokaguṇānuvādaḥ prastūyate grāmyakathāvighātaḥ |
niṣevyamāṇo 'nudinaṃ mumukṣor matiṃ satīṃ yacchati vāsudeve || 276 ||
[Analyze grammar]

ekādaśe śrībhagavaduddhavasaṃvāde śrīailopākhyānānte |
teṣu nityaṃ mahābhāga mahābhāgeṣu matkathāḥ |
sambhavanti hi tā n.ṇāṃ juṣatāṃ prapunanty agham || 277 ||
[Analyze grammar]

tā ye śṛṇvanti gāyanti hy anumodanti cādṛtāḥ |
matparāḥ śraddadhānāś ca bhaktiṃ vindanti te mayi || 278 ||
[Analyze grammar]

bṛhannāradīye tatraiva |
bhaktis tu bhagavadbhaktasaṅgena parijāyate |
satsaṅgaḥ prāpyate pumbhiḥ sukṛtaiḥ pūrvasañcitaiḥ || 279 ||
[Analyze grammar]

ekādaśe śrībhagavaduddhavasaṃvāde |
athaitat paramaṃ guhyaṃ śṛṇvato yadunandana sugopyam api vakṣyāmi tvaṃ me bhṛtyaḥ suhṛt sakhā || 280 ||
[Analyze grammar]

no rodhayati māṃ yogo na sāṅkhyaṃ dharma eva ca |
na svādhyāyas tapas tyāgo neṣṭāpūrtaṃ na dakṣiṇā || 281 ||
[Analyze grammar]

vratāni yajñaś chandāṃsi tīrthāni niyamā yamāḥ |
yathāvarundhe satsaṅgaḥ sarvasaṅgāpaho hi mām || 282 ||
[Analyze grammar]

ataevoktaṃ vidureṇa tṛtīyaskandhe |
yatsevayā bhagavataḥ kūṭasthasya madhudviṣaḥ |
ratirāso bhavet tīvraḥ pādayor vyasanārdanaḥ || 283 ||
[Analyze grammar]

prathamaskandhe śrīśaunakādīnāṃ caturthe ca śrīpracetasām uktau |
tulayāma lavenāpi na svargaṃ nāpunarbhavam |
bhagavatsaṅgisaṅgasya martyānāṃ kim utāśiṣaḥ || 284 ||
[Analyze grammar]

caturthe ca śrīpracetasaḥ prati śrīśivopadeśaḥ |
kṣaṇārdhenāpi tulaye na svargaṃ nāpunarbhavam |
bhagavatsaṅgisaṅgasya martyānāṃ kim utāśiṣaḥ || 285 ||
[Analyze grammar]

dvādaśe śrīmārkaṇḍeyopākhyāne śrīśivasya |
athāpi saṃvadiṣyāmo bhavāny etena sādhunā |
ayaṃ hi paramo lābho nṛṇāṃ sādhusamāgamaḥ || 286 ||
[Analyze grammar]

ataeva śrīprahlādaṃ prati śrīdharaṇyoktaṃ haribhaktisudhodaye |
akṣṇoḥ phalaṃ tvādṛśadarśanaṃ hi tanvāḥ phalaṃ tvādṛśagātrasaṅgaḥ |
jihvāphalaṃ tvādṛśakīrtanaṃ hi sudurlabhā bhāgavatā hi loke || 287 ||
[Analyze grammar]

ataeva vidureṇa tṛtīyaskandhe |
durāpā hy alpatapasaḥ sevā vaikuṇṭhavartmasu |
yatropagīyate nityaṃ devadevo janārdanaḥ || 288 ||
[Analyze grammar]

śrīvidehenāpy ekādaśaskandhe |
durlabho mānuṣo deho dehināṃ kṣaṇabhaṅguraḥ |
tatrāpi durlabhaṃ manye vaikuṇṭhapriyadarśanam || 289 ||
[Analyze grammar]

ataeva hi prārthitaṃ śrīdhruveṇa caturthaskandhe |
bhaktiṃ muhuḥ pravahatāṃ tvayi me prasaṅgo bhūyād ananta mahatām amalāśayānām |
yenāñjasolbaṇam uruvyasanaṃ bhavābdhiṃ neṣye bhavadguṇakathāmṛtapānamattaḥ || 290 ||
[Analyze grammar]

pracetasaḥ pratyupadeśe śrīśivena ca |
athānaghāṅghres tava kīrtitīrthayor antarbahiḥsnānavidhūtapāpmanām |
bhūteṣv anukrośasusattvaśīlināṃ syāt saṅgamo 'nugraha eṣa nas tava || 291 ||
[Analyze grammar]

śrīpracetobhiś ca |
yāvat te māyayā spṛṣṭā bhramāma iha karmabhiḥ |
tāvad bhavatprasaṅgānāṃ saṅgaḥ syān no bhave bhave || 292 ||
[Analyze grammar]

śrīprahlādenāpi saptamaskandhe tasmād amūs tanubhṛtām aham āśiṣo ajña āyuḥ śriyaṃ vibhavam aindriyam āviriñcyāt |
necchāmi te vilulitān uruvikrameṇa kālātmanopanaya māṃ nijabhṛtyapārśvam || 293 ||
[Analyze grammar]

iti |
athāsatsaṅgadoṣāḥ |
śrīkātyāyanavākye |
varaṃ hutavahajvālāpañjarāntarvyavasthitiḥ |
na śauricintāvimukhajanasaṃvāsavaiśasam || 295 ||
[Analyze grammar]

pādme uttarakhaṇḍe śrīumāmaheśvarasaṃvāde |
avaiṣṇavās tu ye viprāś cāṇḍālād adhamāḥ smṛtāḥ |
teṣāṃ sambhāṣaṇaṃ sparśaṃ somapānādi varjayet || 296 ||
[Analyze grammar]

tṛtīyaskandhe śrīkapiladevahūtisaṃvāde satyaṃ śaucaṃ dayā maunaṃ buddhiḥ śrīr hrīr yaśaḥ kṣamā |
śamo damo bhagaś ceti yatsaṅgād yāti saṅkṣayam || 297 ||
[Analyze grammar]

teṣv aśānteṣu mūḍheṣu khaṇḍitātmasv asādhuṣu |
saṅgaṃ na kuryāc chocyeṣu yoṣitkrīḍāmṛgeṣu ca || 298 ||
[Analyze grammar]

na tathāsya bhaven moho bandhaś cānyaprasaṅgataḥ |
yoṣitsaṅgād yathā puṃso yathā tatsaṅgisaṅgataḥ || 299 ||
[Analyze grammar]

ekādaśe ca śrībhagavaduddhavasaṃvāde |
saṅgaṃ na kuryād asatāṃ śiśnodaratṛpāṃ kvacit |
tasyānugas tamasy andhe pataty andhānugāndhavat || 300 ||
[Analyze grammar]

bhagavadbhaktihīnā ye mukhyā'santas ta eva hi |
teṣāṃ niṣṭhā śubhā kvāpi na syāt saccaritair api || 301 ||
[Analyze grammar]

bṛhannāradīye prāyaścittaprakaraṇānte |
kiṃ vedaiḥ kim u vā śāstraiḥ kim u tīrthaniṣevaṇaiḥ |
viṣṇubhaktivihīnānāṃ kiṃ tapobhiḥ kim adhvaraiḥ || 302 ||
[Analyze grammar]

śrīgāruḍe |
antaṃ gato 'pi vedānāṃ sarvaśāstrārthavedy api |
yo na sarveśvare bhaktas taṃ vidyāt puruṣādhamam || 303 ||
[Analyze grammar]

tṛtīyaskandhe |
ahny āpṛtārtakaraṇā niśi niḥśayānā nānāmanorathadhiyā kṣaṇabhagnanidrāḥ |
daivāhatārtharacanā ṛṣayo 'pi deva yuṣmatprasaṅgavimukhā iha saṃsaranti || 304 ||
[Analyze grammar]

ataevoktaṃ ṣaṣṭhe |
prāyaścittāni cīrṇāni nārāyaṇaparāṅmukham |
na niṣpunanti rājSTARTra surākumbham ivāpagāḥ || 305 ||
[Analyze grammar]

viṣṇudharmottare |
kutaḥ pāpakṣayas teṣāṃ kutas teṣāṃ ca maṅgalam |
yeṣāṃ naiva hṛdistho 'yaṃ maṅgalāyatano hariḥ || 306 ||
[Analyze grammar]

ataeva bṛhannāradīye lubdhakopākhyānārambhe |
haripūjāvihīnāś ca vedavidveṣiṇas tathā |
dvijagodveṣiṇaś cāpi rākṣasāḥ parikīrtitāḥ || 307 ||
[Analyze grammar]

ataeva nijadūtān prati dharmarājasyānuśāsanaṃ ṣaṣṭhaskandhe |
tān ānayadhvam asato vimukhān mukunda |
pādāravindamakarandarasād ajasram |
niṣkiñcanaiḥ paramahaṃsakulair asaṅgair juṣṭād gṛhe nirayavartmani baddhatṛṣṇān || 308 ||
[Analyze grammar]

jihvā na vakti bhagavadguṇanāmadheyaṃ cetaś ca na smarati taccaraṇāravindam |
kṛṣṇāya no namati yacchira ekadāpi tān ānayadhvam asato 'kṛtaviṣṇukṛtyān || 309 ||
[Analyze grammar]

skānde mārkaṇḍeyabhagīrathasaṃvāde |
yo hi bhāgavataṃ lokam upahāsaṃ nṛpottama |
karoti tasya naśyanti arthadharmayaśaḥsutā || 310 ||
[Analyze grammar]

nindāṃ kurvanti ye mūḍhā vaiṣṇavānāṃ mahātmanām |
patanti pitṛbhiḥ sārdhaṃ mahārauravasaṃjñite || 311 ||
[Analyze grammar]

hanti nindati vai dveṣṭi vaiṣṇavān nābhinandati |
krudhyate yāti no harṣaṃ darśane patanāni ṣaṭ || 312 ||
[Analyze grammar]

tatraivāmṛtasāroddhāre śrīyamoktau |
janmaprabhṛti yat kiñcit sukṛtaṃ samupārjitam |
nāśam āyāti tat sarvaṃ pīḍayed yadi vaiṣṇavān || 313 ||
[Analyze grammar]

dvārakāmāhātmye prahlādabalisaṃvāde |
karapatraiś ca phālyante sutīvrair yamaśāsanaiḥ |
nindāṃ kurvanti ye pāpā vaiṣṇavānāṃ mahātmanām || 314 ||
[Analyze grammar]

pūjito bhagavān viṣṇur janmāntaraśatair api |
prasīdati na viśvātmā vaiṣṇave cāpamānite || 315 ||
[Analyze grammar]

daśamaskandhe ca |
nindāṃ bhagavataḥ śṛṇvaṃs tatparasya janasya vā |
tato nāpaiti yaḥ so 'pi yāty adhaḥ sukṛtāc cyutaḥ || 316 ||
[Analyze grammar]

ataevoktaṃ viṣṇudharmottare |
jīvitaṃ viṣṇubhaktasya varaṃ pañcadināni ca |
na tu kalpasahasrāṇi bhaktihīnasya keśave || 317 ||
[Analyze grammar]

ataevoktaṃ śrībhāgavate ailopākhyānānte |
tato duḥsaṅgam utsṛjya satsu sajjeta buddhimān |
santa evāsya chindanti manovyāsaṅgam uktibhiḥ || 318 ||
[Analyze grammar]

atha śrībhagavadbhaktān sallakṣaṇavibhūṣitān |
gatvā tān dūrato dṛṣṭvā daṇḍavat praṇamen mudā || 319 ||
[Analyze grammar]

tejodraviṇapañcarātre |
vaiṣṇavo vaiṣṇavaṃ dṛṣṭvā daṇḍavat praṇamed bhuvi |
ubhayor antarā viṣṇuḥ śaṅkhacakragadādharaḥ || 320 ||
[Analyze grammar]

tatra ca viśeṣo bṛhannāradīye |
sabhāyāṃ yajñaśālāyāṃ devatāyataneṣv api |
pratyekaṃ tu namaskāro hanti puṇyaṃ purākṛtam || 321 ||
[Analyze grammar]

puṇyakṣetre puṇyatīrthe svādhyāyasamaye tathā |
pratyekaṃ tu namaskāro hanti puṇyaṃ purākṛtam || 322 ||
[Analyze grammar]

vaiṣṇavaṃ cāgataṃ vīkṣyābhigamyāliṅga vaiṣṇavam |
vaideśikaṃ prīṇayeyur darśayantaḥ svavaiṣṇavān || 323 ||
[Analyze grammar]

tathā coktaṃ śrībrahmaṇā tejodraviṇapañcarātre |
nārāyaṇāśrayaṃ bhaktaṃ deśāntarasamāgatam |
prīṇayed darśayaṃs tasya bhaktyā nārāyaṇāśrayān || 324 ||
[Analyze grammar]

tataś ca vaiṣṇavaḥ prāptaḥ santarpya vacanāmṛtaiḥ |
sadbandhur iva sammānyo 'nyathā doṣo mahān smṛtaḥ || 325 ||
[Analyze grammar]

skānde śrīmārkaṇḍeyabhagīrathasaṃvāde |
dṛṣṭvā bhāgavataṃ daivāt sammukhe yo na yāti hi |
na gṛhṇāti haris tasya pūjāṃ dvādaśavārṣikīm || 326 ||
[Analyze grammar]

yo na gṛhṇāti bhūpāla vaiṣṇavaṃ gṛham āgatam |
tadgṛhaṃ pitṛbhis tyaktaṃ śmaśānam iva bhīṣaṇam || 327 ||
[Analyze grammar]

athavābhyagataṃ dūrād yo nārcayanti vaiṣṇavam |
svaśaktyā nṛpaśārdūla nānyaḥ pāparatas tataḥ || 328 ||
[Analyze grammar]

śrāntaṃ bhāgavataṃ dṛṣṭvā kaṭhinaṃ yasya mānasam |
prasīdati na duṣṭātmā śvapacād adhiko hi saḥ || 329 ||
[Analyze grammar]

vipraṃ bhāgavataṃ dṛṣṭvā dīnam āturamānasam |
na karoti paritrāṇaṃ keśavo na prasīdati || 330 ||
[Analyze grammar]

dṛṣṭvā bhāgavataṃ vipraṃ namaskāreṇa nārcayet |
dehinas tasya pāpasya na ca vai kṣamate hariḥ || 331 ||
[Analyze grammar]

apūjito yadā gacchad vaiṣṇavo gṛhamedhinaḥ |
śatajanmārjitaṃ bhūpa puṇyam ādāya gacchati || 332 ||
[Analyze grammar]

anabhyarcya pitṝn devān bhuñjate harivāsare |
tat pāpaṃ jāyate bhūpa vaiṣṇavānām atikrame || 333 ||
[Analyze grammar]

pūrvaṃ kṛtvā tu sammānam avajñāṃ kurute tu yaḥ |
vaiṣṇavānāṃ mahīpāla sānvayo yāti saṅkṣayam || 334 ||
[Analyze grammar]

pādme vaiśākhamāhātmye yamabrāhmaṇasaṃvāde |
vaiṣṇavaṃ janam ālokya nābhyutthānaṃ karoti yaḥ |
praṇayādarato vipra sa naro narakātithiḥ || 335 ||
[Analyze grammar]

caturthaskandhe ca |
vyālālayadrumā vai teṣv ariktākhilasampadaḥ |
yadgṛhās tīrthapādīya pādatīrthavivarjitāḥ || 336 ||
[Analyze grammar]

skānde |
dahnyo 'haṃ kṛtakṛtyo 'haṃ yad yūyaṃ gṛham āgatāḥ |
durlabhaṃ darśanaṃ nūnaṃ vaiṣṇavānāṃ yathā hareḥ || 337 ||
[Analyze grammar]

merumandaratulyā vai puṇyapuñjā mayā kṛtāḥ |
samprāptaṃ darśanaṃ yad vai vaiṣṇavānāṃ mahātmanām || 338 ||
[Analyze grammar]

daśamaskandhe śrīgargācāryaṃ prati śrīnandasya vākyam |
mahadvicalanaṃ nṝṇāṃ gṛhiṇāṃ dīnacetasām |
niḥśreyasāya bhagavan kalpate nānyathā kvacit || 339 ||
[Analyze grammar]

caturthaskandhe |
aho ācaritaṃ kiṃ me maṅgalaṃ maṅgalāyanāḥ |
yasya vo darśanaṃ hy āsīd durdarśānāṃ ca yogibhiḥ || 340 ||
[Analyze grammar]

adhanā api te dhanyāḥ sādhavo gṛhamedhinaḥ |
yadgṛhā hy arhavaryāmbu tṛṇabhūmīśvarāvarāḥ || 341 ||
[Analyze grammar]

kaccin naḥ kuśalaṃ nāthā indriyārthārthavedinām |
vyasanāvāpa etasmin patitānāṃ svakarmabhiḥ || 342 ||
[Analyze grammar]

bhavatsu kuśalapraśna ātmārāmeṣu neṣyate |
kuśalākuśalā yatra na santi mativṛttayaḥ || 343 ||
[Analyze grammar]

skānde śrīmārkaṇḍeyabhagīrathasaṃvāde |
sammukhaṃ vrajamānasya vaiṣṇavānāṃ narādhipa |
pade pade yajñaphalaṃ prāhuḥ paurāṇikā dvijāḥ || 344 ||
[Analyze grammar]

atha vaiṣṇavastutimāhātmyam |
tatraiva |
pratyakṣaṃ vā parokṣaṃ vā yaḥ praśaṃsati vaiṣṇavam |
brahmahā madyapaḥ steyī gurugāmī sadā nṝṇām |
mucyate pātakāt sadyo viṣṇur āha nṛpottama || 345 ||
[Analyze grammar]

kiṃ ca |
pratyakṣaṃ vā parokṣaṃ vā ye praśaṃsanti vaiṣṇavam |
prasādād vāsudevasya te taranti bhavārṇavam || 346 ||
[Analyze grammar]

atha vaiṣṇavasammānamāhātmyam |
tatraivāmṛtasāroddhāre |
śraddhayā dattam annaṃ ca vaiṣṇavāgniṣu jīryati |
tadannaṃ meruṇā tulyaṃ bhavate ca dine dine || 347 ||
[Analyze grammar]

daive paitre ca yo dadyād vārimātraṃ tu vaiṣṇave |
saptodadhisamaṃ bhūtvā pitṝṇām upatiṣṭhati || 348 ||
[Analyze grammar]

viṣṇudharme |
kiṃ dānaiḥ kiṃ tapobhir vā yajñaiś ca vividhaiḥ kṛtaiḥ |
sarvaṃ sampadyate puṃsāṃ viṣṇubhaktābhipūjanāt || 349 ||
[Analyze grammar]

pūjayed vaiṣṇavān etān prayatnena vicakṣaṇaḥ |
svaśaktyā vaiṣṇavebhyo yad dattaṃ syād akṣayaṃ bhavet || 350 ||
[Analyze grammar]

bṛhannāradīye yajñamālyupākhyāne |
haribhaktiratān yas tu haribuddhyā prapūjayet |
tasya tuṣyanti viprSTARTra brahmaviṣṇumaheśvarāḥ || 351 ||
[Analyze grammar]

haripūjāparāṇāṃ ca harināmaratātmanām |
śuśrūṣāniratā yānti pāpino 'pi parāṃ gatim || 352 ||
[Analyze grammar]

tatraiva yajñadhvajopākhyānasyārambhe |
saṃsārasāgaraṃ tartuṃ ya icchen munipuṅgava |
sa bhajed dharibhaktānāṃ bhaktān vai pāpahāriṇaḥ || 353 ||
[Analyze grammar]

tadante ca |
yo viṣṇubhaktān niṣkāmān bhojayet śraddhayānvitaḥ |
triḥsaptakulasaṃyuktās te yānti harimandiram || 354 ||
[Analyze grammar]

viṣṇubhaktāya yo dadyān niṣkāmāya mahātmane |
pānīyaṃ vā phalaṃ vāpi sa eva bhagavatpriyaḥ || 355 ||
[Analyze grammar]

viṣṇubhaktiparāṇāṃ tu śuśrūṣāṃ kurvate tu ye |
te yānti viṣṇubhavanaṃ yāvadābhūtasamplavam || 356 ||
[Analyze grammar]

devapūjāparo yasya gṛhe vasati sarvadā |
tatraiva sarvadevāś ca tiṣṭhanti śrīharis tathā || 357 ||
[Analyze grammar]

laiṅge |
nārāyaṇaparo vidvān yasyānnaṃ prītamānasaḥ |
aśnāti taddharer āsyaṃ gatam annaṃ na saṃśayaḥ || 358 ||
[Analyze grammar]

sarvārcanād api viśvātmā prīto bhavati mādhavaḥ |
dṛṣṭvā bhāgavatasyānnaṃ sa bhuṅkte bhaktavatsalaḥ || 359 ||
[Analyze grammar]

brāhme śrībhagavadvākyam |
naivedyaṃ purato nyastaṃ dṛṣṭvaiva svīkṛtaṃ mayā |
bhaktasya rasanāgreṇa rasam aśnāmi padmaja || 360 ||
[Analyze grammar]

pādmottarakhaṇḍe śrīśivomāsaṃvāde |
ārādhanānāṃ sarveṣāṃ viṣṇor ārādhanaṃ param |
tasmāt parataraṃ devi tadīyānāṃ samarcanam || 361 ||
[Analyze grammar]

arcayitvāpi govindaṃ tadīyān nārcayet punaḥ |
na sa bhāgavato jñeyaḥ kevalaṃ dāmbhikaḥ smṛtaḥ || 362 ||
[Analyze grammar]

pumāṃs tasmāt prayatnena vaiṣṇavān pūjayet sadā |
sarvaṃ tarati duḥkhaughaṃ mahābhāgavatārcanāt || 363 ||
[Analyze grammar]

ekādaśe śrībhagavadvākyam vaiṣṇave bandhusatkṛtyā || 364 ||
[Analyze grammar]

madbhaktapūjābhyadhikā || 365 ||
[Analyze grammar]

kiṃ ca skānde śrīmārkaṇḍeyabhagīrathasaṃvāde |
karmaṇā manasā vācā ye'rcayanti sadā harim |
teṣāṃ vākyaṃ naraiḥ kāryaṃ te hi viṣṇusamā narāḥ || 366 ||
[Analyze grammar]

ity ādṛto 'nuśṛṇuyād bhaktiśāstrāṇi tatra ca |
śrībhāgavatam atrāpi kṛṣṇalīlākathāṃ muhuḥ || 367 ||
[Analyze grammar]

atha vaiṣṇavaśāstramāhātmyam |
skānde śrībrahmanāradasaṃvāde |
vaiṣṇavāni tu śāstrāṇī ye śṛṇvanti paṭhanti ca |
dhanyās te mānavā loke tesāṃ kṛṣṇaḥ prasīdati || 368 ||
[Analyze grammar]

vaiṣṇavāni tu śāstrāṇī ye arcayanti gṛhe narāḥ |
sarvapāpavinirmuktā bhavanti suravanditāḥ || 369 ||
[Analyze grammar]

sarvasvenāpi viprSTARTra kartavyaḥ śāstrasaṅgrahaḥ |
vaiṣṇavais tu mahābhaktyā tuṣṭyarthaṃ cakrapāṇinaḥ || 370 ||
[Analyze grammar]

tiṣṭhate vaiṣṇavaṃ śāstraṃ likhitaṃ yasya mandire |
tatra nārāyaṇo devaḥ svayaṃ vasati nārada || 371 ||
[Analyze grammar]

paurāṇaṃ vaiṣṇavaṃ ślokaṃ ślokārdham athavāpi ca |
ślokapādaṃ paṭhed yas tu gosahasraphalaṃ labhet || 372 ||
[Analyze grammar]

devatānām ṛṣīṇāṃ ca yoginām api durlabham |
viprSTARTra vaiṣṇavaṃ śāstraṃ manuṣyāṇāṃ ca kā kathā || 373 ||
[Analyze grammar]

tatraiva śrīkṛṣṇārjunasaṃvāde |
mama śāstrāṇi ye nityaṃ pūjayanti paṭhanti ca |
te narāḥ kuruśārdūla mamātithyaṃ gatāḥ sadā || 374 ||
[Analyze grammar]

mama śākhyapravaktāraṃ mama śāstrānucintakam |
cintayāmi na sandeho naraṃ taṃ cātmavat sadā || 375 ||
[Analyze grammar]

tatraiva |
jīvitād adhikaṃ yeṣāṃ śāstraṃ bhāgavataṃ kalau |
na teṣāṃ bhavati kleśo yāmyaḥ kalpaśatair api || 376 ||
[Analyze grammar]

dhārayanti gṛhe nityaṃ śāstraṃ bhāgavataṃ hi ye |
āsphoṭayanti valganti teṣāṃ prītāḥ pitāmahāḥ || 377 ||
[Analyze grammar]

yāvad dināni viprarṣe śāstraṃ bhāgavataṃ gṛhe |
tāvat pibanti pitaraḥ kṣīraṃ sarpir madhūdakam || 378 ||
[Analyze grammar]

ye'rcayanti sadā gehe śāstraṃ bhāgavataṃ narāḥ |
prīṇitās taiś ca vibudhā yāvad āhūtasamplavam || 379 ||
[Analyze grammar]

yaccanti vaiṣṇave bhaktyā śāstraṃ bhāgavataṃ hi ye |
kalpakoṭisahasrāṇi viṣṇuloke vasanti te || 380 ||
[Analyze grammar]

ślokārdhaṃ ślokapādaṃ vā varaṃ bhāgavataṃ gṛhe |
śataśo 'tha sahasraiś ca kim anyaiḥ śāstrasaṅgrahaiḥ || 381 ||
[Analyze grammar]

na yasya tiṣṭhate gehe śāstraṃ bhāgavataṃ kalau |
na tasya punar āvṛttir yāmyāt pāśāt kadācana || 382 ||
[Analyze grammar]

kathaṃ sa vaiṣṇavo jñeyaḥ śāstraṃ bhāgavataṃ kalau |
gṛhe na tiṣṭhate yasya sa vipraḥ śvapacādhamaḥ || 383 ||
[Analyze grammar]

yatra yatra bhaved vipra śāstraṃ bhāgavataṃ kalau |
tatra tatra harir yāti tridaśaiḥ saha nārada || 384 ||
[Analyze grammar]

tatra sarvāṇi tīrthāni nadīnadasarāṃsi ca |
yatra bhāgavataṃ śāstraṃ tiṣṭhate munisattama || 385 ||
[Analyze grammar]

tatra sarvāṇi tīrthāni sarve yajñāḥ sudakṣiṇāḥ |
yatra bhāgavataṃ śāstraṃ pūjitaṃ tiṣṭhate gṛhe || 386 ||
[Analyze grammar]

kiṃ ca |
nityaṃ bhāgavataṃ yas tu purāṇaṃ paṭhate naraḥ |
pratyakṣaraṃ bhavet tasya kapilādānajaṃ phalam || 387 ||
[Analyze grammar]

ślokārdhaṃ ślokapādaṃ vā nityaṃ bhāgavatodbhavam |
paṭhet śṛṇoti vā bhaktyā gosahasraṃ phalaṃ labhet || 388 ||
[Analyze grammar]

yaḥ paṭhet prayato nityaṃ ślokaṃ bhāgavataṃ mune |
aṣṭādaśapurāṇānāṃ phalaṃ prāpnoti mānavaḥ || 389 ||
[Analyze grammar]

tatraiva mārkaṇḍeyabhagīrathasaṃvāde |
yo hi bhāgavate śāstre vighnam ācarate pumān |
nābhinandati duṣṭātmā kulānāṃ pātayec chatam || 390 ||
[Analyze grammar]

pādme gautamāmbarīṣasaṃvāde |
ambarīṣa śukaproktaṃ nityaṃ bhāgavataṃ śṛṇu |
paṭhasva svamukhenāpi yadīcchasi bhavakṣayam || 391 ||
[Analyze grammar]

ślokaṃ bhāgavataṃ vāpi ślokardhapādam eva vā |
likhitaṃ tiṣṭhate yasya gṛhe tasya sadā hariḥ |
vasate nātra sandeho devadevo janārdanaḥ || 392 ||
[Analyze grammar]

dvārakāmāhātmye śrīmārkaṇḍeySTARTradyumnasaṃvāde |
śrīmadbhāgavataṃ śāstraṃ paṭhate kṛṣṇasannidhau |
kulakoṭiśatair yuktaḥ krīḍate yogibhiḥ saha || 393 ||
[Analyze grammar]

gāruḍe |
artho 'yaṃ brahmasūtrāṇāṃ bhāratārthavinirṇayaḥ |
gāyatrībhāṣyarūpo 'sau vedārthaparibṛṃhitaḥ || 394 ||
[Analyze grammar]

purāṇānāṃ sāmarūpaḥ sākṣādbhagavatoditaḥ |
dvādaśaskandhayukto 'yaṃ śatavicchedasaṃyutaḥ |
grantho 'ṣṭādaśasāhasraḥ śrīmadbhāgavatābhidhaḥ || 395 ||
[Analyze grammar]

tasminn eva śrībhāgavate prathamaskandhe dharmaḥ projjhitakaitavo 'tra paramo nirmatsarāṇāṃ satāṃ vedyaṃ vāstavam atra vastu śivadaṃ tāpatrayonmūlanam |
śrīmadbhāgavate mahāmunikṛte kiṃ vā parair īśvaraḥ sadyo hṛdy avarudhyate 'tra kṛtibhiḥ śuśrūṣubhis tatkṣaṇāt || 396 ||
[Analyze grammar]

idaṃ bhāgavataṃ nāma purāṇaṃ brahmasammitam |
uttamaślokacaritaṃ cakāra bhagavān ṛṣiḥ || 397 ||
[Analyze grammar]

niḥśreyasāya lokasya dhanyaṃ svastyayanaṃ mahat |
tad idaṃ grāhayām āsasutam ātmavatāṃ varam |
sarvavedetihāsānāṃ sāraṃ sāraṃ samuddhṛtam || 398 ||
[Analyze grammar]

kiṃ ca |
kṛṣṇe svadhāmopagate dharmajñānādibhiḥ saha |
kalau naṣṭadṛśām eṣa purāṇārko 'dhunoditaḥ || 399 ||
[Analyze grammar]

kiṃ ca anarthopaśamaṃ sākṣād bhaktiyogam adhokṣaje |
lokasyājānato vidvāṃś cakre sātvatasaṃhitām || 400 ||
[Analyze grammar]

yasyāṃ vai śrūyamāṇāyāṃ kṛṣṇe paramapūruṣe |
bhaktir utpadyate puṃsaḥ śokamohabhayāpahā || 401 ||
[Analyze grammar]

dvitīye śrīśukoktau |
pariniṣṭhito 'pi nairguṇya uttamaślokalīlayā |
gṛhītacetā rājarṣe ākhyānaṃ yad adhītavān || 402 ||
[Analyze grammar]

rājante tāvad anyāni purāṇāni satāṃ gaṇe |
yāvad bhāgavataṃ naiva śrūyate 'mṛtasāgaram || 403 ||
[Analyze grammar]

dvādaśe ca |
rājante tāvad anyāni purāṇāni satāṃ gaṇe |
yāvad bhāgavataṃ naiva śrūyate'mṛtasāgaraḥ || 404 ||
[Analyze grammar]

sarvavedāntasāraṃ hi śrībhāgavatam iṣyate |
tadrasāmṛtatṛptasya nānyatra syād ratiḥ kvacit || 405 ||
[Analyze grammar]

nimnagānāṃ yathā gaṅgā devānām acyuto yathā |
vaiṣṇavānāṃ yathā śambhuḥ purāṇānām idaṃ tathā || 406 ||
[Analyze grammar]

śrīmadbhāgavataṃ purāṇam amalaṃ yad vaiṣṇavānāṃ priyaṃ yasmin pāramahaṃsyam ekam amalaṃ jñānaṃ paraṃ gīyate |
tatra jñānavirāgabhaktisahitaṃ naiṣkarmyam āviṣkṛtaṃ tac chṛṇvan supaṭhan vicāraṇaparo bhaktyā vimucyen naraḥ || 407 ||
[Analyze grammar]

ataevoktaṃ |
nigamakalpataror galitaṃ phalaṃ śukamukhād amṛtadravasaṃyutam |
pibata bhāgavataṃ rasam ālayaṃ muhur aho rasikā bhuvi bhāvukāḥ || 408 ||
[Analyze grammar]

kiṃ ca |
yaḥ svānubhāvam akhilaśrutisāram ekam adhyātmadīpam atititīrṣatāṃ tamo 'ndham |
saṃsāriṇāṃ karuṇayāha purāṇaguhyaṃ taṃ vyāsasūnum upayāmi guruṃ munīnām || 409 ||
[Analyze grammar]

bhagavaddharmavaktāraṃ bhagavacchāstravācakam |
vaiṣṇavaṃ guruvad bhaktyā pūjayej jñānadāyakam || 410 ||
[Analyze grammar]

nāradapañcarātre ṛṣīn prati śrīśāṇḍilyoktau |
vaiṣṇavaṃ jñānavaktāraṃ yo vidyād viṣṇuvad gurum |
pūjayed vāṅmanaḥkāyaiḥ sa śāstrajñaḥ sa vaiṣṇavaḥ || 411 ||
[Analyze grammar]

ślokapādasya vaktāpi yaḥ pūjyaḥ sa sadaiva hi |
kiṃ punar bhagavadviṣṇoḥ svarūpaṃ vitanoti yaḥ || 412 ||
[Analyze grammar]

kiṃ ca |
nārāyaṇaḥ paraṃ brahma tajjñānenātha gamyate |
jñānasya sādhanaṃ śāstraṃ śāstraṃ ca guruvaktṛgam || 413 ||
[Analyze grammar]

brahma prāptir ato hetor gurvadhīnā sadaiva hi |
hetunānena vai viprā gurur gurutaraḥ smṛtaḥ || 414 ||
[Analyze grammar]

yasmād devo jagannāthaḥ kṛtvā maryamayīṃ tanum |
magnān uddharate lokān kāruṇyāc chāstrapāṇinā || 415 ||
[Analyze grammar]

tasmād bhaktir gurau kāryā saṃsārabhayabhīruṇā |
śāstrajñānena yo 'jñānaṃ timiraṃ vinipātayet || 416 ||
[Analyze grammar]

śāstraṃ pāpaharaṃ puṇyaṃ pavitraṃ bhogamokṣadam |
śāntidaṃ ca mahārthaṃ ca vakti yaḥ sa jagadguruḥ || 417 ||
[Analyze grammar]

skānde brahmanāradasaṃvāde |
teṣāṃ kṣīṇaṃ mahat pāpaṃ varṣakoṭiśatodbhavam |
viprSTARTra nāsti sandeho ye śṛṇvanti hareḥ kathām || 418 ||
[Analyze grammar]

tatraivānyatra |
sarvāśramābhigamanaṃ sarvatīrthāvagāhanam |
na tathā pāraṇaṃ nṝṇāṃ nārāyaṇakathā yathā || 419 ||
[Analyze grammar]

bṛhannāradīye yajñadhvajopākhyānānte |
aho harikathā loke pāpaghnī puṇyadāyinī |
śṛṇvatāṃ vadatāṃ caiva tadbhaktānāṃ viśeṣataḥ || 420 ||
[Analyze grammar]

prathamaskandhe |
śṛṇvatāṃ svakathāḥ kṛṣṇaḥ puṇyaśravaṇakīrtanaḥ |
hṛdy antaḥstho hy abhadrāṇi vidhunoti suhṛtsatām || 421 ||
[Analyze grammar]

ekādaśe ca devastutau |
śuddhir nṛṇāṃ na tu tatheḍya durāśayānāṃ vidyāśrutādhyayanadānatapaḥkriyābhiḥ |
sattvātmanām ṛṣabha te yaśasi pravṛddha |
sacchraddhayā śravaṇasambhṛtayā yathā syāt || 422 ||
[Analyze grammar]

daśame śrībādarāyaṇiṃ prati śrīparīkṣiduktau |
naiṣātiduḥsahā kṣun māṃ tyaktodam api bādhate |
pibantaṃ tvanmukhāmbhoja cyutaṃ harikathāmṛtam || 423 ||
[Analyze grammar]

skānde ca tatraiva |
śrīpradaṃ viṣṇucaritaṃ sarvopadravanāśanam |
sarvaduḥkhopaśamanaṃ duṣṭagrahanivāraṇam || 424 ||
[Analyze grammar]

tatraiva |
śrotavyaṃ sādhucaritaṃ yaśodharmajayārthibhiḥ |
pāpakṣayārthaṃ devarṣe svargārthaṃ dharmabuddhibhiḥ || 425 ||
[Analyze grammar]

āyuṣyāmārogyakaraṃ yaśasyaṃ puṇyavardhanam |
caritaṃ vaiṣṇavaṃ nityaṃ śrotavyaṃ sādhubuddhinā || 426 ||
[Analyze grammar]

kuṭumbavṛddhiṃ vijayaṃ śatrunāśaṃ balam |
karoti viṣṇucaritaṃ sarvakālaphalapradam || 427 ||
[Analyze grammar]

prathamaskandhe |
dharmaḥ svanuṣṭhitaḥ puṃsāṃ viṣvaksenakathāsu yaḥ |
notpādayed yadi ratiṃ śrama eva hi kevalam || 428 ||
[Analyze grammar]

tṛtīye śrīviduramaitreyasaṃvāde |
ekāntalābhaṃ vacaso nu puṃsāṃ suślokamauler guṇavādam āhuḥ |
śruteś ca vidvadbhir upākṛtāyāṃ kathāsudhāyām upasamprayogam || 429 ||
[Analyze grammar]

dvitīye śrīśaunakoktau āyur harati vai puṃsām udyann astaṃ ca yann asau |
tasyarte yatkṣaṇo nīta uttamaślokavārtayā || 430 ||
[Analyze grammar]

tṛtīye śrīviduroktau sā śraddadhānasya vivardhamānā viraktim anyatra karoti puṃsaḥ |
hareḥ padānusmṛtinirvṛtasya samastaduḥkhāpyayam āśu dhatte || 431 ||
[Analyze grammar]

caturthe śrīpṛthucaritānte śrīmaitreyoktau chinnānyadhīr adhigatātmagatir nirīhas tat tatyaje ñcchinad idaṃ vayunena yena |
tāvan na yogagatibhir yatir apramatto yāvad gadāgrajakathāsu ratiṃ na kuryāt || 432 ||
[Analyze grammar]

ekādaśe ca śrībhagavantaṃ praty uddhavavākye |
tava vikrīḍitaṃ kṛṣṇa nṛṇāṃ paramamaṅgalam |
karṇapīyūṣam āsādya tyajanty anyaspṛhāṃ janāḥ || 433 ||
[Analyze grammar]

caturthe pracetasaḥ prati śrībhagavaduktau |
gṛheṣv āviśatāṃ cāpi puṃsāṃ kuśalakarmaṇām |
madvārtāyātayāmānāṃ na bandhāya gṛhā matāḥ || 434 ||
[Analyze grammar]

skānde tatraiva |
dharmārthakāmamokṣāṇāṃ yad iṣṭaṃ ca nṝṇām iha |
tat sarvaṃ labhate vatsa kathāṃ śrutvā hareḥ sadā || 435 ||
[Analyze grammar]

dvādaśe ca śrīśukoktau |
saṃsārasindhum atidustaram uttitīrṣor nānyaḥ plavo bhagavato puruṣottamasya |
līlākathārasaniṣevanam antareṇa puṃso bhaved vividhaduḥkhadavārditasya || 436 ||
[Analyze grammar]

dvārakāmāhātmye |
nityaṃ kṛṣṇakathā yasya prāṇād api garīyasī |
na tasya durlabhaṃ kiñcid iha loke paratra ca || 437 ||
[Analyze grammar]

dvitīyaskandhe jñānaṃ yad āpratinivṛttaguṇormicakram ātmaprasāda uta yatra guṇeṣv asaṅgaḥ |
kaivalyasammatapathas tv atha bhaktiyogaḥ ko nirvṛto harikathāsu ratiṃ na kuryāt || 438 ||
[Analyze grammar]

daśamaskandhe śrutistutau |
duravagamātmatattvanigamāya tavāttatanoś caritamahāmṛtābdhiparivartapariśramaṇāḥ |
na parilaṣanti kecid apavargam apīśvara te caraṇasarojahaṃsakulasaṅgavisṛṣṭagṛhāḥ || 439 ||
[Analyze grammar]

tṛtīyaskandhe śrīkapiladevahūtisaṃvāde |
naikātmatāṃ me spṛhayanti kecin matpādasevābhiratā madīhāḥ |
ye 'nyonyato bhāgavatāḥ prasajya sabhājayante mama pauruṣāṇi || 440 ||
[Analyze grammar]

kathāmṛtaṃ śravaṇapuṭeṣu sambhṛtam punanti te viṣayavidūṣitāśayaṃ vrajanti taccaraṇasaroruhāntikam || 441 ||
[Analyze grammar]

tṛtīye kapiladevastutau |
pānena te deva kathāsudhāyāḥ pravṛddhabhaktyā viśadāśayā ye |
vairāgyasāraṃ pratilabhya bodhaṃ yathāñjasānvīyur akuṇṭhadhiṣṇyam || 442 ||
[Analyze grammar]

skānde amṛtasāroddhāre śrīyamasya dūtānuśāsane |
ye śṛṇvanti kathāṃ viṣṇor ye paṭhanti hareḥ kathām |
kalāyutaṃ nāvalokyaṃ gatās te brahma śāśvatam || 443 ||
[Analyze grammar]

yasya viṣṇukathālāpair nityaṃ pramuditaṃ manaḥ |
tasya na cyavate lakṣmīs tatpadaṃ ca kare sthitam || 444 ||
[Analyze grammar]

dvādaśe |
yat tūttamaḥślokaguṇānuvādaḥ saṅgīyate 'bhīkṣṇam amaṅgalaghnaḥ |
tam eva nityaṃ śṛṇuyād abhīkṣṇaṃ kṛṣṇe 'malāṃ bhaktim abhīpsamānaḥ || 445 ||
[Analyze grammar]

skānde |
yatra yatra mahīpāla vaiṣṇavī vartate kathā |
tatra tatra harir yāti gaur yathā sutavatsalā || 446 ||
[Analyze grammar]

śrīviṣṇudharme śrībhagavaduktau skānde ca śrībhagavadarjunasaṃvāde |
matkathāvācakaṃ nityaṃ matkathāśravaṇe ratam |
matkathāprītamanasaṃ nāham tyakṣyāmi taṃ naram || 447 ||
[Analyze grammar]

daśamaskandhe brahmastutau |
jñāne prayāsam udapāsya namanta eva jīvanti sanmukharitāṃ bhavadīyavārtām |
sthāne sthitāḥ śrutigatāṃ tanuvāṅmanobhir ye prāyaśo ñjita jito 'py asi tais trilokyām || 448 ||
[Analyze grammar]

tṛtīye śrīsanakādistutau |
nātyantikaṃ vigaṇayanty api te prasādaṃ kiṃ vānyad arpitabhayaṃ bhruva unnayais te |
ye 'ṅga tvadaṅghriśaraṇā bhavataḥ kathāyāḥ kīrtanyatīrthayaśasaḥ kuśalā rasajñāḥ || 449 ||
[Analyze grammar]

caturthe śrībhagavantaṃ prati siddhānāṃ stutau |
ayaṃ tvatkathāmṛṣṭapīyūṣanadyāṃ manovāraṇaḥ kleśadāvāgnidagdhaḥ |
tṛṣārto 'vagāḍho na sasmāra dāvaṃ na niṣkrāmati brahmasampannavan naḥ || 450 ||
[Analyze grammar]

ataevoktaṃ prathamaskandhe śrīśaunakādibhiḥ |
vayaṃ tu na vitṛpyāma uttamaślokavikrame |
yacchṛṇvatāṃ rasajñānāṃ svādu svādu pade pade || 451 ||
[Analyze grammar]

kiṃ ca |
ko nāma tṛpyed rasavit kathāyāṃ mahattamaikāntaparāyaṇasya |
nāntaṃ guṇānām aguṇasya jagmur yogeśvarā ye bhavapādmamukhyāḥ || 452 ||
[Analyze grammar]

tṛtīye śrīvidureṇa |
krīḍan vidhatte dvijagosurāṇāṃ kṣemāya karmāṇy avatārabhedaiḥ |
mano na tṛpyaty api śṛṇvatāṃ naḥ suślokamauleś caritāmṛtāni || 453 ||
[Analyze grammar]

daśamaskandhe ca śrīparīkṣitā |
brahman kṛṣṇakathāḥ puṇyā mādhvīr lokamalāpahāḥ |
ko nu tṛpyeta śṛṇvānaḥ śrutajño nityanūtanaḥ || 454 ||
[Analyze grammar]

ato hi śrīpṛthurājena prārthitaṃ |
na kāmaye nātha tad apy ahaṃ kvacin na yatra yuṣmaccaraṇāmbujāsavaḥ |
mahattamāntarhṛdayān mukhacyuto vidhatsva karṇāyutam eṣa me varaḥ || 455 ||
[Analyze grammar]

ataeva niścayoktaṃ pādme vaiśākhamāhātmye ambarīṣaṃ prati śrīnāradena |
nātaḥ paraṃ paramatoṣaviśeṣapoṣaṃ paśyāmi puṇyam ucitaṃ ca paraspareṇa |
santaḥ prasahya yad anantaguṇān ananta śreyonidhīn adhikabhāvabhujo bhajanti || 456 ||
[Analyze grammar]

prathamaskandhe śrīsūtena |
yā yāḥ kathā bhagavataḥ kathanīyorukarmaṇaḥ |
guṇakarmāśrayāḥ pumbhiḥ saṃsevyās tā bubhūṣubhiḥ || 457 ||
[Analyze grammar]

daśamaskandhaśeṣe ca śrībādarāyaṇinā |
itthaṃ parasya nijavartmarirakṣayātta |
līlātanos tadanurūpaviḍambanāni |
karmāṇi karmakaṣaṇāni yadūttamasya śrūyād amuṣya padayor anuvṛttim icchan || 458 ||
[Analyze grammar]

ataḥ kṛṣṇakathāyāṃ tu satyām anyakathāśrutim |
tad aśrutiṃ ca vaimukhyaṃ tasyāṃ tṛptim api tyajet || 459 ||
[Analyze grammar]

tṛtīyaskandhe kapiladevahūtisaṃvāde |
nūnaṃ daivena vihatā ye cācyutakathāsudhām |
hitvā śṛṇvanty asadgāthāḥ purīṣam iva viḍbhujaḥ || 460 ||
[Analyze grammar]

tatraiva śrīvaikuṇṭhavarṇane |
yan na vrajanty aghabhido racanānuvādāc chṛṇvanti ye 'nyaviṣayāḥ kukathā matighnīḥ |
yās tu śrutā hatabhagair nṛbhir āttasārās tāṃs tān kṣipanty aśaraṇeṣu tamaḥsu hanta || 461 ||
[Analyze grammar]

kiṃ ca skānde brahmanāradasaṃvāde |
vācyamānaṃ tu ye śāstraṃ vaiṣṇavaṃ puruṣādhamāḥ |
na śṛṇvanti muniśreṣṭha teṣāṃ svāmī sadā yamaḥ || 462 ||
[Analyze grammar]

na śṛṇvanti na hṛṣyanti vaiṣṇavīṃ prāpya ye kathām |
dhama āyur yaśo dharmaḥ santānaś caiva naśyati || 463 ||
[Analyze grammar]

na śṛṇoti harer yas tu kathāṃ pāpapraṇāśinīm |
acirād eva devarṣe samūlaṃ tu vinaśyati || 464 ||
[Analyze grammar]

dvitīyaskandhe śrīśaunakoktau |
bile batorukramavikramān ye na śṛṇvataḥ karṇapuṭe narasya |
jihvāsatī dārdurikeva sūta na copagāyaty urugāyagāthāḥ || 465 ||
[Analyze grammar]

tṛtīye śrībrahmastutau |
daivena te hatadhiyo bhavataḥ prasaṅgāt sarvāśubhopaśamanād vimukhSTARTriyā ye |
kurvanti kāmasukhaleśalavāya dīnā lobhābhibhūtamanaso 'kuśalāni śaśvat || 466 ||
[Analyze grammar]

tāñ chocyaśocyān avido 'nuśoce hareḥ kathāyāṃ vimukhān aghena |
kṣiṇoti devo 'nimiṣas tu yeṣām āyur vṛthāvādagatismṛtīnām || 467 ||
[Analyze grammar]

śrīmaitreyoktau ca |
ko nāma loke puruṣārthasāravit purākathānāṃ bhagavatkathāsudhām |
āpīya karṇāñjalibhir bhavāpahām aho virajyeta vinā naretaram || 468 ||
[Analyze grammar]

caturthe śrīpṛthustutau yaśaḥ śivaṃ suśrava āryasaṅgame yadṛcchayā copaśṛṇoti te sakṛt |
kathaṃ guṇajño viramed vinā paśuṃ śrīr yat pravavre guṇasaṅgrahecchayā || 469 ||
[Analyze grammar]

daśamārambhe śrīparīkṣitpraśne |
nivṛttatarṣair upagīyamānād bhavauṣadhāc chrotramano'bhirāmāt |
ka uttamaślokaguṇānuvādāt pumān virajyeta vinā paśughnāt || 470 ||
[Analyze grammar]

ataevoktaṃ devaiḥ pañcamaskandhe |
na yatra vaikuṇṭhakathāsudhāpagā na sādhavo bhāgavatās tadāśrayāḥ |
na yatra yajñeśamakhā mahotsavāḥ sureśaloko 'pi na vai sa sevyatām || 471 ||
[Analyze grammar]

ato niṣevyamāṇāṃ ca sarvathā bhagavatkathām |
muhus tadrasikān pṛcchen mitho modavivṛddhaye || 471 ||
[Analyze grammar]

daśamaskandhe |
satām ayaṃ sārabhṛtāṃ nisargo yadarthavāṇīśruticetasām api |
pratikṣaṇaṃ navyavad acyutasya yat striyā viṭānām iva sādhu vārtā || 473 ||
[Analyze grammar]

ataeva tatraiva tulyaśrutatapaḥśīlās tulyasvīyārimadhyamāḥ |
api cakruḥ pravacanam ekaṃ śuśrūṣavo 'pare || 474 ||
[Analyze grammar]

iti |
tathā vaiṣṇavadharmāṃś ca kriyamānām api svayam |
sampṛcchet tadvidaḥ sādhūn anyonyaprītivṛddhaye || 475 ||
[Analyze grammar]

śraddhayā bhagavaddharmān vaiṣṇavāyānupṛcchate |
avaśyaṃ kathayed vidvān anyathā doṣabhāg bhavet || 476 ||
[Analyze grammar]

tad uktam |
nākhyāti vaiṣṇavaṃ dharmaṃ viṣṇubhaktasya pṛcchataḥ |
kalau bhāgavato bhūtvā puṇyaṃ yāti śatābdikam || 477 ||
[Analyze grammar]

skānde brahmanāradasaṃvāde |
vaiṣṇave vaiṣṇavaṃ dharmaṃ yo dadāti dvijottamaḥ |
sasāgaramahīdāne yat phalaṃ labhate'dhikam || 478 ||
[Analyze grammar]

kiṃ ca tatraiva |
ajñānāya ca yo jñānaṃ dadyād dharmopadeśanam |
kṛtsnāṃ vā pṛthivīṃ dadyāt tena tulyaṃ hi tat smṛtam || 479 ||
[Analyze grammar]

viṣṇudharmottare |
tat kathāṃ śrāvayed yas tu tadbhaktān mānavottamaḥ |
godānaphalam āpnoti sa naras tena karmaṇā || 480 ||
[Analyze grammar]

pādme devadūtavikuṇḍalasaṃvāde |
jñānam ajñāya yo dadyād vedaśāstrasamudbhavam |
api devās tam arcanti bhavabandhavidārakam || 481 ||
[Analyze grammar]

bṛhannāradīye satsaṅgadevārcanasatkathāsu hitopadeśe nirato manuṣyaḥ |
prayāti viṣṇoḥ paramaṃ padaṃ yad dehāvasāne'cyutatulyatejāḥ || 482 ||
[Analyze grammar]

te ca śrībhagavaddharmā bhagavadbhaktalakṣaṇaiḥ |
vyañjitāḥ katicin mukhyā likhyante'tra pare'pi te || 483 ||
[Analyze grammar]

te tu yadyapi vikhyātāḥ śrīmadbhāgavatādiṣu |
tathāpi yatnād ekatra saṅgṛhyante samādhanāḥ || 484 ||
[Analyze grammar]

te coktāḥ kāśīkhaṇḍe dvārakāmāhātmye candraśarmaṇā |
adya prabhṛti kartavyaṃ yan mayā kṛṣṇa tac chṛṇu |
ekādaśyāṃ na bhoktavyaṃ kartavyo jāgaraḥ sadā || 485 ||
[Analyze grammar]

mahotsavaḥ prakartavyaḥ pratyahapūjanaṃ tava |
palārdhenāpi biddhaṃ tu bhoktavyaṃ vāsarāntare || 486 ||
[Analyze grammar]

tvatprītyāṣṭau mayā kāryā dvādaśyo vratasaṃyutā |
bhaktir bhāgavatī kāryā prāṇair api dhanair api || 487 ||
[Analyze grammar]

nityaṃ nāmasahasraṃ tu paṭhanīyaṃ tava priyam |
pūjā tu tulasīpatrair mayā kāryā sadaiva hi || 488 ||
[Analyze grammar]

tulasīkāṣṭhāsambhūtā mālā kāryā sadā mayā |
nṛtyagītaṃ prakartavyaṃ samprāpte jāgare tava || 489 ||
[Analyze grammar]

tulasīkāṣṭhāsambhūtacandanena vilepanam |
kariṣyāmi tavāgre ca guṇānāṃ tava kīrtanam || 490 ||
[Analyze grammar]

mathurāyāṃ prakartavyaṃ pratyabdaṃ gamanaṃ mayā |
tatkathāśravaṇaṃ kāryaṃ tathā pustakavācanam || 491 ||
[Analyze grammar]

nityaṃ pādodakaṃ mūrdhnā mayā dhāryaṃ prayatnataḥ |
naivedyabhakṣaṇaṃ cāpi kariṣyāmi yatavrataḥ || 492 ||
[Analyze grammar]

nirmālyaṃ śirasā dhāryaṃ tvadīyaṃ sādaraṃ mayā |
tava dattvā yad iṣṭaṃ tu bhakṣaṇīyaṃ mudā mayā || 493 ||
[Analyze grammar]

tathā tathā prakartavyaṃ tava tuṣṭiḥ prajāyate |
satyam etan mayā kṛṣṇa tavāgre parikīrtanam || 494 ||
[Analyze grammar]

saptamaskandhe śrīprahlādena |
guruśuśrūṣayā bhaktyā sarvalabdhārpaṇena ca |
śraddhayā tatkathāyāṃ ca kīrtanair guṇakarmaṇām |
tatpādāmburuhadhyānāt talliṅgekṣārhaṇādibhiḥ || 495 ||
[Analyze grammar]

hariḥ sarveṣu bhūteṣu bhagavān āsta īśvaraḥ |
iti bhūtāni manasā kāmais taiḥ sādhu mānayet || 496 ||
[Analyze grammar]

ekādaśe ca śrīkaviyogeśvareṇa ye vai bhagavatā proktā upāyā hy ātmalabdhaye |
añjaḥ puṃsām aviduṣāṃ viddhi bhāgavatān hi tān || 497 ||
[Analyze grammar]

tatraiva prabuddhayogeśvareṇa |
sarvato manaso 'saṅgam ādau saṅgaṃ ca sādhuṣu |
dayāṃ maitrīṃ praśrayaṃ ca bhūteṣv addhā yathocitam || 498 ||
[Analyze grammar]

śaucaṃ tapas titikṣāṃ ca maunaṃ svādhyāyam ārjavam |
brahmacaryam ahiṃsāṃ ca samatvaṃ dvandvasaṃjñayoḥ || 499 ||
[Analyze grammar]

sarvatrātmeśvarānvīkṣāṃ kaivalyam aniketatām |
viviktacīravasanaṃ santoṣaṃ yena kenacit || 500 ||
[Analyze grammar]

śraddhāṃ bhāgavate śāstre 'nindām anyatra cāpi hi |
manovākkarmadaṇḍaṃ ca satyaṃ śamadamāv api || 501 ||
[Analyze grammar]

śravaṇaṃ kīrtanaṃ dhyānaṃ harer adbhutakarmaṇaḥ |
janmakarmaguṇānāṃ ca tadarthe 'khilaceṣṭitam || 502 ||
[Analyze grammar]

iṣṭaṃ dattaṃ tapo japtaṃ vṛttaṃ yac cātmanaḥ priyam |
dārān sutān gṛhān prāṇān yat parasmai nivedanam || 503 ||
[Analyze grammar]

evaṃ kṛṣṇātmanātheṣu manuṣyeṣu ca sauhṛdam |
paricaryāṃ cobhayatra mahatsu nṛṣu sādhuṣu || 504 ||
[Analyze grammar]

parasparānukathanaṃ pāvanaṃ bhagavadyaśaḥ mitho ratir mithas tuṣṭir nivṛttir mitha ātmanaḥ || 505 ||
[Analyze grammar]

śrībhagavatā ca |
malliṅgamadbhaktajana darśanasparśanārcanam |
paricaryā stutiḥ prahva guṇakarmānukīrtanam || 506 ||
[Analyze grammar]

matkathāśravaṇe śraddhā madanudhyānam uddhava |
sarvalābhopaharaṇaṃ dāsyenātmanivedanam || 507 ||
[Analyze grammar]

majjanmakarmakathanaṃ mama parvānumodanam |
gītatāṇḍavavāditra goṣṭhībhir madgṛhotsavaḥ || 508 ||
[Analyze grammar]

yātrā balividhānaṃ ca sarvavārṣikaparvasu |
vaidikī tāntrikī dīkṣā madīyavratadhāraṇam || 509 ||
[Analyze grammar]

mamārcāsthāpane śraddhā svataḥ saṃhatya codyamaḥ |
udyānopavanākrīḍa puramandirakarmaṇi || 510 ||
[Analyze grammar]

sammārjanopalepābhyāṃ sekamaṇḍalavartanaiḥ |
gṛhaśuśrūṣaṇaṃ mahyaṃ dāsavad yad amāyayā || 511 ||
[Analyze grammar]

amānitvam adambhitvaṃ kṛtasyāparikīrtanam |
api dīpāvalokaṃ me nopayuñjyān niveditam || 512 ||
[Analyze grammar]

yad yad iṣṭatamaṃ loke yac cātipriyam ātmanaḥ |
tat tan nivedayen mahyaṃ tad ānantyāya kalpate || 513 ||
[Analyze grammar]

kiṃ ca śraddhāmṛtakathāyāṃ me śaśvan madanukīrtanam |
pariniṣṭhā ca pūjāyāṃ stutibhiḥ stavanaṃ mama || 514 ||
[Analyze grammar]

ādaraḥ paricaryāyāṃ sarvāṅgair abhivandanam |
madbhaktapūjābhyadhikā sarvabhūteṣu manmatiḥ || 515 ||
[Analyze grammar]

madartheṣv aṅgaceṣṭā ca vacasā madguṇeraṇam |
mayy arpaṇaṃ ca manasaḥ sarvakāmavivarjanam || 516 ||
[Analyze grammar]

madarthe 'rthaparityāgo bhogasya ca sukhasya ca |
iṣṭaṃ dattaṃ hutaṃ japtaṃ madarthaṃ yad vrataṃ tapaḥ || 517 ||
[Analyze grammar]

api cāgre |
kuryāt sarvāṇi karmāṇi madarthaṃ śanakaiḥ smaran |
mayy arpitamanaścitto maddharmātmamanoratiḥ || 518 ||
[Analyze grammar]

deśān puṇyān āśrayeta madbhaktaiḥ sādhubhiḥ śritān |
devāsuramanuṣyeṣu madbhaktācaritāni ca || 519 ||
[Analyze grammar]

pṛthak satreṇa vā mahyaṃ parvayātrāmahotsavān |
kārayed gītanṛtyādyair mahārājavibhūtibhiḥ || 520 ||
[Analyze grammar]

mām eva sarvabhūteṣu bahir antar apāvṛtam |
īkṣetātmani cātmānaṃ yathā kham amalāśayaḥ || 521 ||
[Analyze grammar]

uktaṃ ca saptamaskandhe śrīprahlādena |
evaṃ nirjitaṣaḍvargaiḥ kriyate bhaktir īśvare |
vāsudeve bhagavati yayā saṃlabhyate ratiḥ || 522 ||
[Analyze grammar]

ekādaśe śrīnāradena |
śruto 'nupaṭhito dhyāta ādṛto vānumoditaḥ sadyaḥ punāti saddharmo devaviśvadruho 'pi hi || 523 ||
[Analyze grammar]

tatraiva śrīkaviyogeśvareṇa |
yān āsthāya naro rājan na pramādyeta karhicit |
dhāvan nimīlya vā netre na skhalen na pated iha || 524 ||
[Analyze grammar]

śrīprabuddhayogeśvareṇa |
iti bhāgavatān dharmān śikṣan bhaktyā tadutthayā |
nārāyaṇaparo māyām añjas tarati dustarām || 525 ||
[Analyze grammar]

śrībhagavatā ca |
evaṃ dharmair manuṣyāṇām uddhavātmanivedinām |
mayi sañjāyate bhaktiḥ ko 'nyo 'rtho 'syāvaśiṣyate || 526 ||
[Analyze grammar]

kiṃ cāgre |
na hy aṅgopakrame dhvaṃso maddharmasyoddhavāṇv api mayā vyavasitaḥ samyaṅ nirguṇatvād anāśiṣaḥ || 527 ||
[Analyze grammar]

alābhe satsabhāyās tu śuśrūṣuṃ ca nijālaye |
devālaye vā śāstrajñaḥ kīrtayed bhagavatkathām || 528 ||
[Analyze grammar]

atha śrībhagavallīlākathākīrtanamāhātmyam |
uktaṃ ca skānde śrībhagavatā arjunaṃ prati |
matkathā kurute yas tu vaiṣṇavānāṃ sadāgrataḥ |
iha bhogān avāpnoti tathā mokṣaṃ na saṃśayaḥ || 529 ||
[Analyze grammar]

prathamaskandhe śrīnāradena |
idaṃ hi puṃsas tapasaḥ śrutasya vā sviṣṭasya sūktasya ca buddhidattayoḥ |
avicyuto 'rthaḥ kavibhir nirūpito yaduttamaślokaguṇānuvarṇanam || 530 ||
[Analyze grammar]

kiṃ ca |
etad dhy āturacittānāṃ mātrāsparśecchayā muhuḥ |
bhavasindhuplavo dṛṣṭo haricaryānuvarṇanam || 531 ||
[Analyze grammar]

ekādaśe śrīśukenāpi |
itthaṃ harer bhagavato rucirāvatāra |
vīryāṇi bālacaritāni ca śantamāni |
anyatra ceha ca śrutāni gṛṇan manuṣyo bhaktiṃ parāṃ paramahaṃsagatau labheta || 532 ||
[Analyze grammar]

ataeva śrīprahlādena nṛsiṃhastutāv uktam |
so 'haṃ priyasya suhṛdaḥ paradevatāyā līlākathās tava nṛsiṃha viriñcagītāḥ |
añjas titarmy anugṛṇan guṇavipramukto durgāṇi te padayugālayahaṃsasaṅgaḥ || 533 ||
[Analyze grammar]

gopikābhir api gītam |
tava kathāmṛtaṃ taptajīvanaṃ kavibhir īḍitaṃ kalmaṣāpaham |
śravaṇamaṅgalaṃ śrīmadātataṃ bhuvi grṇanti te bhuridā janāḥ || 534 ||
[Analyze grammar]

kirtane'py atra taj jñeyaṃ māhātmyaṃ śravaṇe'sya yat |
sidhyati śravaṇam nūnaṃ kīrtanāt svayam eva hi || 535 ||
[Analyze grammar]

śāstrābhyāsasya cābhāve pūrveṣāṃ lokaviśrutām |
satām ādhunikānāṃ ca kathāṃ bandhuṣu kīrtayet || 536 ||
[Analyze grammar]