Chapter 26

ityādikuṭilālāpakalāpagamitatrapām |
tāmāmantrya svamāvāsamagacchaṃ sahagomukhaḥ || 1 ||
[Analyze grammar]

ekadā punarāyātastayānuṣṭhitassatkriyaḥ |
vipaṇergṛhamāyātamapaśyaṃ priyadarśanam || 2 ||
[Analyze grammar]

kañcukaṃ muñcatastasya mayā dṛṣṭaḥ payodharaḥ |
payodharāntarālakṣyaḥ śaśīva parimaṇḍalaḥ || 3 ||
[Analyze grammar]

āsīcca mama yoṣaiṣā yatastuṅgapayodharā |
stanakeśivatītvaṃ hi prathamaṃ strītvalakṣaṇam || 4 ||
[Analyze grammar]

lokastu yadimāṃ sarvaḥ pratipannaḥ pumāniti |
bhrāntijñānamidaṃ tasya kiṃcitsādṛśyakāritam || 5 ||
[Analyze grammar]

atha vā kiṃ vikalpena mamātimiracakṣuṣaḥ |
na hi dṛṣṭena dṛṣṭārthe draṣṭurbhavati saṃśayaḥ || 6 ||
[Analyze grammar]

ityādi bahusaṃkalpamanimeṣavilocanam |
apaśyadṛṣidattā māṃ paśyantaṃ priyadarśanam || 7 ||
[Analyze grammar]

athāsau gadgadālāpā prītibāṣpāvṛtekṣaṇā |
ātmānaṃ cetayasveti priyadarśanamabravīt || 8 ||
[Analyze grammar]

asāvapi tamuddeśaṃ prakāśya jhagiti tviṣā |
taḍidguṇa ivāmbhodaṃ prāviśanmandirodaram || 9 ||
[Analyze grammar]

ṛṣidattāmathāpaśyaṃ krodhavisphāritekṣaṇaḥ |
yayāpakramitaḥ śreṣṭhī mama locanagocarāt || 10 ||
[Analyze grammar]

utthāya ca tataḥ sthānātsakāmakrodhagomukhaḥ |
punarvasugṛhaṃ prāpya paryaṅkaśaraṇo'bhavam || 11 ||
[Analyze grammar]

tataḥ kramaṃ parityajya kāmāvasthāparaṃparā |
tumulāyudhiseneva yugapadmāmabādhata || 12 ||
[Analyze grammar]

athācirāgataśrīko yathā bālaḥ pṛthagjanaḥ |
tathājñāpitavānasmi gomukhaṃ rūkṣayā girā || 13 ||
[Analyze grammar]

api pravrajitābhartaḥ priyā me priyadarśanā |
akṛtapratikarmaiva kṣipramānīyatāmiti || 14 ||
[Analyze grammar]

sa tu māmabravīttrastaḥ kā nāma priyadarśanā |
tyājitāḥ stha yayā sadyaścetasaḥ sthiratāmiti || 15 ||
[Analyze grammar]

mayoktaṃ tava yaḥ syālaḥ puruṣaḥ priyadarśanaḥ |
ayameva jagatsāraḥ pramadā priyadarśanā || 16 ||
[Analyze grammar]

yacca vakṣyasi sarvasyāṃ vārāṇasyāmayaṃ pumān |
bhavataḥ kathamekasya pramadeti taducyate || 17 ||
[Analyze grammar]

ṛṣidattā virakteti paricchinnā purā tayā |
adhunā bhavataḥ kāntā jātetyatra kimucyate || 18 ||
[Analyze grammar]

gatānugatiko lokaḥ pravṛtto hi yathā tathā |
paramārthaṃ punarveda sahasraikaḥ pumāniti || 19 ||
[Analyze grammar]

tenoktaṃ janatāsiddhaṃ viruddhamapi na tyajet |
kriyate chagalaḥ śvāpi saṃhatya bahubhirbalāt || 20 ||
[Analyze grammar]

tena yuṣmadvidhaiḥ prājñairna vācyaṃ sadapīdṛśam |
aśraddheyaṃ na vaktavyaṃ pratyakṣamapi yadbhavet || 21 ||
[Analyze grammar]

śrūyatāṃ ca kathā tāvadarthasyāsya prakāśikā |
pramāṇaṃ hi pramāṇajñaiḥ purākalpe'pi vartitam || 22 ||
[Analyze grammar]

babhūva kauśiko nāma vedavedāṅgaviddvijaḥ |
satyavratatayā loke prasiddhaḥ satyakauśikaḥ || 23 ||
[Analyze grammar]

kadācidabhiṣekāya tena yātena jāhnavīm |
saśiṣyaparivāreṇa tarantī prekṣitā śilā || 24 ||
[Analyze grammar]

mahatāsau prayatnena śiṣyānanvaśiṣattataḥ |
nāyamartho mahānarthaḥ prakāśyaḥ putrakairiti || 25 ||
[Analyze grammar]

athaikaścapalasteṣāṃ baṭuḥ piṅgalanāmakaḥ |
vipaṇau mantrayāṃ cakre kasyacidvaṇijaḥ puraḥ || 26 ||
[Analyze grammar]

śreṣṭhi kiṃ na śṛṇoṣyekamāścaryaṃ kathayāmi te |
tarantīṃ dṛṣṭavānasmi sopādhyāyaḥ śilāmiti || 27 ||
[Analyze grammar]

athāntaḥpurikā dāsī kimapi kretumāgatā |
etadālāpamākarṇya rājapatnyai nyavedayat || 28 ||
[Analyze grammar]

tayāpi kathitaṃ rajñe sa tāṃ pṛṣṭvā paraṃparām |
baṭunākhyātamāhvāyya pṛṣṭavān satyakauśikam || 29 ||
[Analyze grammar]

satyaṃ būhīti no vācyaḥ satyavādivrato bhavān |
mithyā brūhīti no vācyaḥ kāmī mithyāvrato hi saḥ || 30 ||
[Analyze grammar]

kiṃ tu yatpiṅgalenoktametad yuktaṃ parīkṣitum |
pramadātsatyamapyete vadanti baṭavo yataḥ || 31 ||
[Analyze grammar]

saśiṣyaiḥ kila yuṣmābhistarantī prekṣitā śilā |
kimetatsatyamāho svinmṛṣetyākhyāyatāmiti || 32 ||
[Analyze grammar]

āsīccāsya dhigetāṃ me ninditāṃ satyavāditām |
duḥśraddhānamaniṣṭaṃ ca yanmayā vācyamīdṛśam || 33 ||
[Analyze grammar]

na satyamapi tadvācyaṃ yaduktamasukhāvaham |
iti satyapravādo'yaṃ na tyājyaḥ satyavādibhiḥ || 34 ||
[Analyze grammar]

tasmātsatyamidaṃ tyaktvā mṛṣāvādaśatādhikam |
asatyamabhidhāsyāmi satyavādaśatādhikam || 35 ||
[Analyze grammar]

athāvocatsa rājānaṃ rājanmithyā baṭorvacaḥ |
agniṃ paśyati yaḥ śītaṃ plavamānāṃ śilāmasau || 36 ||
[Analyze grammar]

kaḥ śraddadhyādbaṭorvācaṃ nisargādhīracetasaḥ |
capalasyopamānaṃ hi prathamaṃ baṭumarkaṭāḥ || 37 ||
[Analyze grammar]

viṣaṇṇamiti viśvāsya rājānaṃ satyakauśikaḥ |
viruddhavādinaṃ kruddhaḥ piṅgalaṃ niravāsayat || 38 ||
[Analyze grammar]

tadevaṃ lokavidviṣṭamanuyukto'pi bhūbhṛtā |
satyaṃ satyapratijño'pi nāvadatsatyakauśikaḥ || 39 ||
[Analyze grammar]

yuṣmākaṃ punarajñātaśīlacāritrajanmanām |
viruddhamidamīdṛkkaḥ śraddadhyādvadatāmiti || 40 ||
[Analyze grammar]

sa mayokto bhavāneva duḥśraddhānasya bhāṣitā |
yasyāsminpramadāratne pumāniti viparyayaḥ || 41 ||
[Analyze grammar]

kiṃ cānena pralāpena strīratnaṃ priyadarśanām |
acirātsvīkariṣyāmi krośatāṃ tvādṛśāmiti || 42 ||
[Analyze grammar]

evaṃ ca mama vṛttāntaṃ vijānannapi gomukhaḥ |
vaidyarājaṃ samāhūya vaidyarājamupāgamat || 43 ||
[Analyze grammar]

sa mamālāpamākarṇya kāyacchāyāṃ vilokya ca |
pradhārya cāparairvaidyaiḥ śanakairidamabravīt || 44 ||
[Analyze grammar]

mānaso'sya vikāro'yamīpsitālābhahetukaḥ |
tenāsmai rucitaṃ yattadāśu saṃpādyatāmiti || 45 ||
[Analyze grammar]

atha nandopanandābhyāṃ saṃskāryāhāramādarāt |
māṃ punarvasuhastena gomukhaḥ prāgabhojayat || 46 ||
[Analyze grammar]

sa cāhāraḥ susaṃskāro lobhano'pyamṛtāśinām |
triphalākvāthavaddveṣānmamāṅgāni vyadhūnayat || 47 ||
[Analyze grammar]

tato nandopanandābhyāṃ bhojyamānaḥ krameṇa tau |
saviṣādau karomi sma viṣādāviva vairiṇau || 48 ||
[Analyze grammar]

teṣu vandhyaprayatneṣu gomukhaḥ priyadarśanam |
lajjāmandapadanyāsaṃ namitānanamānayat || 49 ||
[Analyze grammar]

sa māṃ samānaparyaṅkamadhyamadhyāsitastataḥ |
grāsānagrāsayat ṣaḍvā sapta vā gomukhājñayā || 50 ||
[Analyze grammar]

ye tatpāṇisarojasaṅgasubhagā grāsā mayā svāditāstaiḥ sadyastanutāmanīyata sa me saṃkalpajanmā jvaraḥ |
śailendrāḥ śuciśukrabhānudahanapluṣṭopalādhityakāmandairapyudabindubhirnavatarairujjhanti saṃtaptatām || 51 ||
[Analyze grammar]