Chapter 25

tatra nandādibhirmitrairārādhanaviśāradaiḥ |
akṛtrimasuhṛdbhāvaiḥ saṃgataḥ sukhamāsiṣi || 1 ||
[Analyze grammar]

ekadāhāravelāyāṃ dṛśyate sma na gomukhaḥ |
atha nītamanāhārairasmābhirapi taddinam || 2 ||
[Analyze grammar]

asau tu sāyamāgatya nātisvābhāvikākṛtiḥ |
tadanāthamatodvignaṃ māṃ vinītavaduktavān || 3 ||
[Analyze grammar]

rājamārge mayā dṛṣṭaḥ paurasaṃghātasaṃkaṭe |
bhṛtyo hariśikhasyaiva lokenāntaritaḥ sa ca || 4 ||
[Analyze grammar]

tadgaveṣayamāṇena mayādya gamitaṃ dinam |
kārye hi guruṇi vyagraṃ jighatsāpi na bādhate || 5 ||
[Analyze grammar]

sa cāvaśyaṃ mayānveṣyaḥ suhṛdvārttopalabdhaye |
tasmānmā māmapaśyantaḥ kṛdhvaṃ duḥkhāsikāmiti || 6 ||
[Analyze grammar]

mayā cāyamanujñātaḥ kṣiptasaptāṣṭavāsaraḥ |
madamantharasaṃcāro bahujalpannupāgamat || 7 ||
[Analyze grammar]

athainamahamālokya krodhakṣobhitamānasaḥ |
sthitvā kṣaṇamanālāpaḥ paruṣālāpamabravam || 8 ||
[Analyze grammar]

īdṛśastādṛśaḥ prājñaḥ prekṣākārī ca gomukhaḥ |
iti paṅgosturaṃgasya kṛtā garuḍavegatā || 9 ||
[Analyze grammar]

pūrvaṃ brāhmaṇamākhyāya samastāyāḥ puraḥ puraḥ |
adhunā madhunā mattaḥ kathaṃ paśyasi māmiti || 10 ||
[Analyze grammar]

atha māmayamāha sma na madaḥ pāramārthikaḥ |
sadoṣaṃ tu vaco vaktuṃ mayāyaṃ kṛtrimaḥ kṛtaḥ || 11 ||
[Analyze grammar]

mattasya kila vāgdoṣāḥ pāruṣyānṛtatādayaḥ |
dūṣayanti na vaktāramato'yaṃ kṛtrimo madaḥ || 12 ||
[Analyze grammar]

tatastamuktavānasmi saṃbhāvitaguṇasya te |
madapracchādanopāyaḥ kiṃ nvadoṣo'pi vidyate || 13 ||
[Analyze grammar]

athānenoktamastīti kathamityudite mayā |
ayamārabhatākhyātuṃ lajjāmantharitākṣaram || 14 ||
[Analyze grammar]

śrūyatāmṛṣidattā me yatra netrapathaṃ gatā |
ārabhya divasāttasmāccetoviṣayatāmiti || 15 ||
[Analyze grammar]

niravagrahatāṃ buddhvā cittasyātha mamābhavat |
kasmādaviṣaye cakṣuścetasā me prasāritam || 16 ||
[Analyze grammar]

jñātadharmārthaśāstratvātsthānātsādhusabhāsu ca |
rāgādhīnaṃ na me cakṣuḥ pravṛttaṃ gaṇikāsvapi || 17 ||
[Analyze grammar]

nūnameṣā parigrāhyā mama pravrajitā yataḥ |
saṃkalpena mamaitasyāṃ durdāntaturago'yataḥ || 18 ||
[Analyze grammar]

tasmādasyāmaniṣṭasya saṃkalpasya nibandhanam |
jijñāsye tāvadityenāmagacchaṃ draṣṭumanvaham || 19 ||
[Analyze grammar]

nānākārairvinodaiśca deśāntarakathādibhiḥ |
dvitraireva dinaistasyāviśvāsamudapādayam || 20 ||
[Analyze grammar]

ekadā prastutālāpaḥ pṛṣṭo'hamṛṣidattayā |
ke ke deśāstvayā dṛṣṭāḥ krāmatā pṛthivīmiti || 21 ||
[Analyze grammar]

samṛddhiḥ saśarīreva kauśāmbī yatra pattanam |
vatsadeśaḥ sa dṛṣṭaḥ prāṅ mameti kathite mayā || 22 ||
[Analyze grammar]

tayoktamalamālāpairaparaistava durbhagaiḥ |
kriyatāṃ vatsakauśāmbīsaṃbandhaiva punaḥ kathā || 23 ||
[Analyze grammar]

atha jānāsi kauśāmbyāymākārajitamanmatham |
gomukhaṃ nāma niṣṇātaṃ savidyāsu kalāsviti || 24 ||
[Analyze grammar]

athācintayamātmānametasyai kathayāmi kim |
atha vā dhigadhīraṃ māmevaṃ tāvadbhavatviti || 25 ||
[Analyze grammar]

tato'hamuktavānārye jānāsīti kimucyate |
ātmānaṃ ko na jānāti sa hi me paramaḥ suhṛt || 26 ||
[Analyze grammar]

atha vā na viśeṣo'sti sūkṣmo'pi mama gomukhāt |
tena māṃ paśyatā vyaktaṃ dṛṣṭo bhavati gomukhaḥ || 27 ||
[Analyze grammar]

athāsau locanāntena bāṣpastimitapakṣmaṇā |
sānurāgeva dṛṣṭvā māṃ ciraṃ mantharamabravīt || 28 ||
[Analyze grammar]

gomukhaḥ kila rūpeṇa kalākauśalacāriṇā |
vatsarājasutaṃ muktvā nānyena sadṛśaḥ kṣitau || 29 ||
[Analyze grammar]

yadi cāsau tvadākārastvatkalājālapeśalaḥ |
vidyādharakumāreṇa gomukhaḥ sadṛśastataḥ || 30 ||
[Analyze grammar]

yastvadākāravijñānaḥ sarvathā puṇyavānasau |
gandhaśailo'pi hi ślāghyastulyamānaḥ sumeruṇā || 31 ||
[Analyze grammar]

ityuktvā cīvarāntena mukhamāvṛtya nīcakaiḥ |
asau roditumārabdhā sotkamastanamaṇḍalā || 32 ||
[Analyze grammar]

ṛṣidattāmathāvocamārye kiṃ kāraṇaṃ tvayā |
rudyate mṛtapatyeva gomukhaśravaṇāditi || 33 ||
[Analyze grammar]

tayoktaṃ śrūyatāmasti vidvān rājagṛhe vaṇik |
padmo nāma dhanaṃ yasya padmasyeva mahānidheḥ || 34 ||
[Analyze grammar]

kuṭumbācāracature priye patyuḥ pativrate |
sumanā mahadinnā ca tasya bhārye babhūvatuḥ || 35 ||
[Analyze grammar]

tayorabhavatāṃ putrau mātṛnāmasanāmakau |
putrābhyāṃ dayite pitrostathā duhitarāvapi || 36 ||
[Analyze grammar]

tatra yā sumanā nāma tasyāḥ sumanasaḥ sutā |
nagaryāṃ pariṇītātra śreṣṭhinā kāliyena sā || 37 ||
[Analyze grammar]

duhitā mahadinnāyāyā ca mātuḥ sanāmikā |
cedivatseśamitreṇa pariṇītar1ṣabheṇa sā || 38 ||
[Analyze grammar]

ṛṣabhānmahadinnāyāmutpannaḥ kila gomukhaḥ |
na kutaścinna kasyāṃcitkaścijjagati yādṛśaḥ || 39 ||
[Analyze grammar]

ahaṃ tu mahadinnasya tanayā guṇaśālinaḥ |
himādrerapi niyānti saritaḥ kṣāravārayaḥ || 40 ||
[Analyze grammar]

sāhaṃ bālaiva gurubhirgomukhāya pratiśrutā |
kaṃ hi nāma na gacchanti kanyāpitrormanorathāḥ || 41 ||
[Analyze grammar]

kāle kvacidatīte tu taṃ guṇairjanavallabham |
himakāla ivāsādhuḥ kālaḥ padmamanāśayat || 42 ||
[Analyze grammar]

tatkuṭumbaṃ tatastena dhārakena vinā kṛtam |
unmūlitadṛḍhastambhamandirāvasthāṃ gatam || 43 ||
[Analyze grammar]

vārāṇasyāṃ tataḥ pitrā svasuḥ sumanaso gṛhe |
sthāpitāhaṃ pitṛṣvasrā duhiteva ca lālitā || 44 ||
[Analyze grammar]

saṃtatādyaiḥ krameṇātha jvaraiḥ pañcabhirapyaham |
pīḍyamānā babhūvāndhā pratyākhyātā cikitsakaiḥ || 45 ||
[Analyze grammar]

atra cāgādhajainendraśāstrasāgarapāragā |
asīcchrutadharā nāma śramaṇā karuṇāvatī || 46 ||
[Analyze grammar]

etaṃ vācā samānīya mantrāgadaviśāradā |
māmasāvacireṇaiva tasmādvyādheramocayat || 47 ||
[Analyze grammar]

svasthāvasthāṃ ca māṃ dṛṣṭvā sumanā gṛhamānayat |
atha krodhādivāgṛhṇātsaiva jvaraparaṃparā || 48 ||
[Analyze grammar]

tataḥ śrutadhārāyai māmarpayatsumanāḥ punaḥ |
sa ca yātaḥ punarvyādhirmantrāgadabhayādiva || 49 ||
[Analyze grammar]

śravaṇāmavadaddainyāddurmanāḥ sumanāstataḥ |
pravrajyāgrāhaṇeneyaṃ bālikā jīvyatāmiti || 50 ||
[Analyze grammar]

tathā cāgrāhayatsā māmarhatpravacanaṃ yathā |
sakalaḥ śramanāsaṃghaḥ siṣyatāmagamanmama || 51 ||
[Analyze grammar]

kevalajñānadīpena dṛṣṭvā saṃsāraphalgutām |
nirvāṇasya ca sāratvaṃ niṣṭhāṃ śrutadharāgamat || 52 ||
[Analyze grammar]

nirvṛttāyāṃ tatastasyāṃ saṃhatya śramaṇāgaṇaḥ |
gaṇanīmakarodasminvihāre māmanicchatīm || 53 ||
[Analyze grammar]

dhyānaṃ yad yatsamāpadya devatālambanaṃ niśi |
balādālambanaṃ tatra gomukhaḥ saṃnidhīyate || 54 ||
[Analyze grammar]

yadā yadā ca gośabdamadhīyānā vadāmyaham |
mukhottarapadastatra jāyate sa tadā tadā || 55 ||
[Analyze grammar]

jalpantī mukhaśabdaṃ ca prayuñje yadi kevalam |
gośabdapūrvapadatāṃ balāttatropagacchati || 56 ||
[Analyze grammar]

gomukhena parāmṛṣṭaṃ ślāghanīyaṃ tṛṇādyapi |
iti cintāparādhīnā mahāntaṃ kālamakṣipam || 57 ||
[Analyze grammar]

tāvacca na mayā tyaktā pratyāśā gomukhāśrayā |
āgatā yāvadanyaiva vārttā dattanirāśatā || 58 ||
[Analyze grammar]

campāsthasya prabhormūlaṃ prasthitaḥ sabalaḥ kila |
gomukhaḥ sasuhṛdvargaḥ pulindairantare hataḥ || 59 ||
[Analyze grammar]

yaccāsmi na mṛtā sadyaḥ śrutvā gomukhavaiśasam |
vicāraṇasamarthāyāḥ prajñāyāḥ sā samarthatā || 60 ||
[Analyze grammar]

āsīcca mama jīvantī jīvitasya mahatphalam |
ramyāmākarṇayiṣyāmi gomukhasya kathāmiti || 61 ||
[Analyze grammar]

api cāparamapyasti jīvitālambanaṃ mama |
hataḥ pravādamātreṇa gomukhaḥ śabarairiti || 62 ||
[Analyze grammar]

tena gomukhasaṃbandhāmākarṇya ruditaṃ mayā |
amṛtābhyadhikatve'pi duḥkhahetuṃ kathāmiti || 63 ||
[Analyze grammar]

mama tvāsīd yathāheyaṃ sarvaṃ tadupapadyate |
yuṣmaddāsāḥ kathaṃ kuryuḥ pāpasaṃkalpamanyathā || 64 ||
[Analyze grammar]

svairiyaṃ gurubhirdattā madīyairapi yārthitā |
kumārī sānurāgā ca tasmānna tyāgamarhati || 65 ||
[Analyze grammar]

ityādi bahu nirdhārya tatsvīkaraṇakāraṇam |
aduṣṭaṃ grahaṇopāyamahametaṃ prayuktavān || 66 ||
[Analyze grammar]

svādunā piṇḍapātena vandanena cikitsayā |
mardanābhyañjanādyaiśca laghu saṃghamatoṣayam || 67 ||
[Analyze grammar]

vyagreṇa cātra vṛttānte dattaṃ vaḥ kṛtakottaram |
mitravārtāvidāvyagraṃ pratīkṣadhvaṃ na māmiti || 68 ||
[Analyze grammar]

ṛṣidattāmathāvocaṃ svaśilpe labdhakauśalāḥ |
śrāvakaiḥ saṃnidhāryantāmannasaṃskārakārakāḥ || 69 ||
[Analyze grammar]

arhatāmarhaṇaṃ kṛtvā gandhavāsasragādibhiḥ |
ṛṣibhyaḥ śramaṇābhyaśca dātumicchāmi bhojanam || 70 ||
[Analyze grammar]

mithyādṛṣṭisahasrāṇi bhojayitvā yadarjyate |
tadekamarhataṃ bhaktyā sadyaḥ pāpaṃ pramārjyate || 71 ||
[Analyze grammar]

tena santīha yāvantaḥ priyasarvajñaśāsanāḥ |
saśrāvakagaṇānāryāṃstāṃstadāmantryatāmiti || 72 ||
[Analyze grammar]

sarvathā sādhitaḥ sūdairāhāraḥ sa tathā yathā |
jitajihvairapi prītaṃ jinaśāsanapāragaiḥ || 73 ||
[Analyze grammar]

athāhamṛṣidattāyāḥ puraḥ sakṛtakajvaraḥ |
patitastuṅgaromāñcaḥ savepathuvijṛmbhakaḥ || 74 ||
[Analyze grammar]

tādṛśī ca mayā vyaktā jvaritānukṛtiḥ kṛtā |
duṣkaraḥ paritāpo'pi yathā saṃbhāvitastayā || 75 ||
[Analyze grammar]

kimetaditi cāpṛcchatsā māmujjvalasaṃbhramā |
dantakūjitasaṃbhinnaṃ mayāpyetanniveditam || 76 ||
[Analyze grammar]

ṣaḍrātrābhakṣaṇakṣāmo gṛhīto vātahetunā |
jvareṇānubhavāmyetāmavasthāmīdṛśīmiti || 77 ||
[Analyze grammar]

tataḥ svasvapanāvāse śramaṇāgaṇasaṃkule |
māmasau karuṇāviṣṭā saṃvāhitavatī ciram || 78 ||
[Analyze grammar]

atha saṃghaṭṭayandantānuktavānasmi tāṃ śanaiḥ |
mahājanavivikto'yamāvāsaḥ kriyatāmiti || 79 ||
[Analyze grammar]

ṛṣidattākṛtānujñāstāśca pravrajitā gatāḥ |
tadabhiprāyajijñāsuratha tāmidamabravam || 80 ||
[Analyze grammar]

ārye virudhyate strīṇāṃ pitṛbhrātṛsutairapi |
vratasthānāṃ viśeṣeṇa sthātuṃ saha rahaściram || 81 ||
[Analyze grammar]

ahaṃ ca kitavaḥ pānthaḥ saṃbhāvyāvinayākrṭiḥ |
pṛthagjanā janāścaite tena nirgamyatāmiti || 82 ||
[Analyze grammar]

tayoktaṃ kṣaṇamapyekamaśaktā svasthamapyaham |
muktvā tvāṃ sthātumanyatra kiṃ punaḥ saṃtatajvaram || 83 ||
[Analyze grammar]

saṃbhāvanāpi ramyaiva mādṛśyāstvādṛśā saha |
ślāghyā kiṃśukaśākhāpi vasantasahacāriṇī || 84 ||
[Analyze grammar]

dhanyo jvaro'pi yenedaṃ tvadaṅgamupayujyate |
kālakūṭamapi ślāghyaṃ līḍhaśaṃkarakaṃdharam || 85 ||
[Analyze grammar]

evamādi bruvāṇaiva prakhalīkṛtasādhunā |
sā mahāgrahacaṇḍena gṛhītā bhāvajanmanā || 86 ||
[Analyze grammar]

mama tvāsīdiyaṃ cintā satyamāhuścikitsakāḥ |
sarve saṃkrāmiṇo rogāḥ spṛśatāṃ prāṇināmiti || 87 ||
[Analyze grammar]

madīyaḥ kṛtrimo'pyenaṃ yatra saṃkrāmati jvaraḥ |
kathaṃ nāma na saṃkramettatra yaḥ paramārthikaḥ || 88 ||
[Analyze grammar]

tathā hi svedaromāncabāṣpakampavijṛmbhikā |
jvarasya parivāro'yamaṅgamasyāḥ prabādhate || 89 ||
[Analyze grammar]

sarvathā smaraśāstreṣu yadiṅgitamudāhṛtam |
lāvaṇyamiva gātreṣu tadasyāḥ prāsphuratsphuṭam || 90 ||
[Analyze grammar]

tatastāmuktavānasmi dhiktvāṃ niṣkaruṇāśayām |
śītajvarārtamaṅgairyā na pīḍayasi māmiti || 91 ||
[Analyze grammar]

athāśliṣyaṃ tathā sā māṃ nādṛśyata yathā pṛthak |
viralevāruṇālokaṃ niśāntaśaśicandrikā || 92 ||
[Analyze grammar]

tatastāvāvayoścaṇḍau tathāśleṣacikitsayā |
apāyātāṃ muhūrtena kṛtrimākṛtrimau jvarau || 93 ||
[Analyze grammar]

yātāyāmatha yāminyāṃ buddhvā vṛttāntamīdṛśam |
saṃghaḥ saṃhatya tāṃ svasmānnivāsānniravāsayat || 94 ||
[Analyze grammar]

atha pravahaṇārūḍhāmṛṣidattāṃ mayā saha |
anayanmuditaḥ śreṣṭhī gṛhaṃ maṅgalasaṃkulam || 95 ||
[Analyze grammar]

tatrāvayoḥ sasumanāḥ sumanāḥ priyadarśanaḥ |
prītanāgarakānīkaṃ karagrahamakārayat || 96 ||
[Analyze grammar]

tadevamṛṣidattā vaḥ saṃvṛttā paricārikā |
atha vā kiṃ vikalpena svayamālokyatāmiti || 97 ||
[Analyze grammar]

tathāpi kathitaṃ tena naiva saṃśayamatyajam |
duḥśraddhānaṃ hi sahasā kākatālīyamīdṛśam || 98 ||
[Analyze grammar]

mālālaṃkāravastrādi gṛhopakaraṇāni ca |
prasthāpya prāktadārhāṇi tāṃ didṛkṣustato'gamam || 99 ||
[Analyze grammar]

tatra cāsau mayā dṛṣṭā citrāṃśukavibhūṣaṇā |
nānāpuṣpāṃ hasantīva vasantopavanaśriyam || 100 ||
[Analyze grammar]

pratimāḥ kāṣṭhamayyo'pi śobhante bhūṣitāstathā |
lajjitāsurakanyāsu tādṛśīṣu tu kā kathā || 101 ||
[Analyze grammar]

pravrajyāyāṃ punaryasyāḥ kāntiryāsīdakṛtrimā |
durlabhāṇi kvacittasyāvācakānyakṣarāṇyapi || 102 ||
[Analyze grammar]

āsīcca mama duḥśliṣṭaṃ kāntarūpavirūpayoḥ |
alaṃkārakalāpasya gurusārasya dhāraṇam || 103 ||
[Analyze grammar]

alaṃkārāvṛtā tāvatkāntarūpasya cārutā |
na śakyā sarvathā draṣṭuṃ janairlolekṣaṇairapi || 104 ||
[Analyze grammar]

virūpasya tu vairūpyaṃ yatpracchādanamarhati |
prakāśayati tal loke paṭumaṇḍanaḍiṇḍimaḥ || 105 ||
[Analyze grammar]

athādhiṣṭhitaparyaṅkamṛṣidattopagamya mām |
avandata prahṛṣṭāpi pravrajyātyāgalajjitā || 106 ||
[Analyze grammar]

tatastāmuktavānasmi sakhyāḥ kiṃ kāryamāśiṣā |
sarāgaiva satī yā tvaṃ vītarāgagatiṃ gatā || 107 ||
[Analyze grammar]

mokṣaḥ kāruṇikairuktaḥ siddhairduḥkhakṣayaḥ kila |
kṣīṇaduḥsahaduḥkhatvānmokṣaṃ prāptāsi sarvathā || 108 ||
[Analyze grammar]

sarvathā subhagatāmahoddhataḥ kiṃkaro bhavatu gomukhastava |
yo sito hi jitadṛṣṭabhartṛkāstoṣayanti jananīsakhījanam || 109 ||
[Analyze grammar]