Chapter 21

tatra mitraprakāṇḍena gomukhena vinoditaḥ |
māsamāsiṣi vipraiśca prasannaiḥ saprasannakaiḥ || 1 ||
[Analyze grammar]

ekadā gomukhenoktaṃ yojane grāmakāditaḥ |
avimuktāvimuktatvātpuṇyā vārāṇasī purī || 2 ||
[Analyze grammar]

āprāgjyotiṣakaśmīradvārakātāmraparṇi yat |
tatsarvaṃ sulabhaṃ tasyāṃ manohārivinodanam || 3 ||
[Analyze grammar]

kadāciccopalabhyeta tatra pānthātkutaścana |
vārttā hariśikhādīnāmataḥ sāgamyatāmiti || 4 ||
[Analyze grammar]

tamuktvā yuktamāttheti taṃ cāmantrya prasannakam |
sākrandātsaṃbhavagrāmātprati vārāṇasīmagām || 5 ||
[Analyze grammar]

atha stokāntarātītaṃ māmabhāṣata gomukhaḥ |
vahāni kimahaṃ yuṣmānyūyaṃ vahata māmiti || 6 ||
[Analyze grammar]

cintitaṃ ca mayā hanta vinaṣṭaḥ khalu gomukhaḥ |
yūyaṃ māṃ vahatetyeṣa no brūyātkathamanyathā || 7 ||
[Analyze grammar]

āsanasyāpi yaśchāyāṃ madīyasya namasyati |
ariṣṭāviṣṭatāṃ muktvā kathamitthaṃ sa vakṣyati || 8 ||
[Analyze grammar]

sa mayoktaḥ sadainyena bhavān gurupadaśramaḥ |
tanmadīyamaśaṅkena pṛṣṭhamāruhyatāmiti || 9 ||
[Analyze grammar]

tena coktaṃ vilakṣeṇa mā grahīta yathā śrutam |
neyaṃ saṃbhāvyate cintā jātāriṣṭe'pi mādṛśi || 10 ||
[Analyze grammar]

kiṃ tu yaḥ kiṃcidācaṣṭe pānthasya pathikaḥ pathi |
voḍhā bhavati tasyāsau khedavismaraṇāditi || 11 ||
[Analyze grammar]

sa mayokto bhavāneva sarvavṛttāntapeśalaḥ |
ākhyātuṃ ca vijānāti yattataḥ kathayatviti || 12 ||
[Analyze grammar]

tenoktaṃ pañca kathyante kathāvastūni kovidaiḥ |
dharmārthasukhanirvāṇacikitsāḥ sahavistarāḥ || 13 ||
[Analyze grammar]

tatra sattvopakārārthā kāyavāṅmānasakriyā |
prabhavaḥ sarvadharmāṇāṃ jagatī jagatāmiva || 14 ||
[Analyze grammar]

yenopāyena mitratvaṃ yānti madhyasthaśatravaḥ |
sarvārthānāmasau heturguṇānāmiva sajjanaḥ || 15 ||
[Analyze grammar]

parastrīgaṇikātyāgaḥ saṃtoṣo mandaroṣatā |
nātisaktiśca dāreṣu sukhaṃ duḥkhaṃ viparyayaḥ || 16 ||
[Analyze grammar]

sāṅgasya sukharāgāderanaṅgasya ca dehinaḥ |
saṃbandhābhāvamatyantaṃ nirvāṇaṃ vidurīśvarāḥ || 17 ||
[Analyze grammar]

ardharātre'pi bhuñjānaḥ paramārthabubhukṣitaḥ |
kūṭavaidyaparityāgī rogairdūreṇa varjyate || 18 ||
[Analyze grammar]

dṛṣṭasaṃsārasārāṇāmṛṣīṇāṃ ko hi mādṛśaḥ |
asāro gurusārāṇi darśanāni viḍambayet || 19 ||
[Analyze grammar]

tena yatkiṃciducchāstraṃ bālabhāvādudāhṛtam |
śukavāśitaniḥsāramidaṃ me mṛṣyatāmiti || 20 ||
[Analyze grammar]

idamādīḥ kathāḥ śṛṇvannirantarasurālayām |
gaṅgābharaṇamākhyātāṃ prāpaṃ vārāṇasīṃ tataḥ || 21 ||
[Analyze grammar]

tatra bāhyaniviṣṭasya śūnyasya purasadmanaḥ |
jaraddārusudhācitramadhyatiṣṭhāma maṇḍapam || 22 ||
[Analyze grammar]

gomukhastu kṣaṇaṃ sthitvā māmavocadgataśramam |
muhūrtakamanutkaṇṭhairiha yuṣmābhirāsyatām || 23 ||
[Analyze grammar]

yatra sthātavyamasmābhirupalabhya tamāśrayam |
āgacchāmīti māmuktvā calairuccalitaḥ padaiḥ || 24 ||
[Analyze grammar]

gatvā ṣoḍaśaviṃśāni padāni sahasā sthitaḥ |
tataḥ kimapi niścitya nivṛtto māmabhāṣata || 25 ||
[Analyze grammar]

yadidaṃ yuṣmadaṅgeṣu divyaṃ bhūṣaṇamāhitam |
idamādāya gacchāmi sthātuṃ nāsyeha yujyate || 26 ||
[Analyze grammar]

tridaṇḍipāṇḍarāṅgādipāṣaṇḍaiśchadmakaṅkaṭaiḥ |
vārāṇasī mahācauraistīrthadhvāṅkṣairadhiṣṭhitā || 27 ||
[Analyze grammar]

yuṣmānekākino dṛṣṭvā sālaṅkārānnirāyudhān |
teṣāṃ sāhasikaḥ kaścidanarthaṃ cintayediti || 28 ||
[Analyze grammar]

evaṃ bhavatu nāmeti mayāsāvanumoditaḥ |
tadābharaṇamādāya prāviśattvaritaḥ puram || 29 ||
[Analyze grammar]

athāciragate tasminparivrāḍbrahmacāriṇau |
paricaṅkramaṇaśrāntau tasminneva nyasīdatām || 30 ||
[Analyze grammar]

āsīcca mama tāvetau nūnaṃ pāṣaṇḍitaskarau |
nirāyudhāsahāyaṃ māṃ muṣituṃ kila vāñchataḥ || 31 ||
[Analyze grammar]

tadeteṣāṃ sahasreṣu sakṛpāṇakareṣvapi |
gavāmivodviṣāṇānāṃ matirme mantharādarā || 32 ||
[Analyze grammar]

ūrumūlasthaśastreṣu pravrajyākaṅkaṭeṣu yaḥ |
prayuṅkte nirghṛṇaḥ śastraṃ ko'nyaḥ klībatamastataḥ || 33 ||
[Analyze grammar]

evamādivikalpaṃ māmasāvālokya maskarī |
nirāśa iva vidrāṇo brahmacāriṇamuktavān || 34 ||
[Analyze grammar]

jalpākagrathitairgranthaiḥ sāṃkhyayogādibhirvayam |
vipralabdhāḥ sukhaṃ tyaktvā mokṣamārge kila sthitāḥ || 35 ||
[Analyze grammar]

yathā tṛṇamupādātumambarāmbhojameva vā |
kaścinmahattapaḥ kuryānmokṣārtho nastathā śramaḥ || 36 ||
[Analyze grammar]

tṛṇavatsulabho mokṣo yadi khedo'phalastataḥ |
atha khāmbojaduṣprāpastato naṣṭā mumukṣavaḥ || 37 ||
[Analyze grammar]

paralokasya sadbhāve hetuḥ sarvajñabhāṣitaḥ |
sarvajñasyāpi sadbhāvaḥ pañcadivyapramāṇakaḥ || 38 ||
[Analyze grammar]

yo'pyupādīyate hetuḥ sarvajñāstitvasiddhaye |
so'pyasiddhaviruddhādidoṣāśīviṣadūṣitaḥ || 39 ||
[Analyze grammar]

tadalaṃ viṭavācāṭaghaṭitaiḥ kāvyakarpaṭaiḥ |
sevamānā yathācchandamāsmahe viṣayāniti || 40 ||
[Analyze grammar]

brahmacārī tu sāvegaḥ parivrājakamuktavān |
prasāritastvayā kasmādasāro malladaṇḍakaḥ || 41 ||
[Analyze grammar]

pratijñāhetudṛṣṭāntāḥ sādhavastāvadāsatām |
sarvatantrāviruddhena siddhāntenaiva bādhyase || 42 ||
[Analyze grammar]

asattāṃ paralokasya śuṣkatarkeṇa sādhayan |
vitaṇḍāvādavārttārtaḥ sādhu śocyo bhaviṣyasi || 43 ||
[Analyze grammar]

atha vāstāmidaṃ tāvadidaṃ tāvannigadyatām |
smṛtīnāṃ viṭakāvyatvaṃ kathaṃ veda bhavāniti || 44 ||
[Analyze grammar]

tenoktaṃ mānuṣāṇāṃ ca prāyaḥ sarvaśarīriṇām |
nandīśapramukhairuktamahaṃ jānāmi lakṣaṇam || 45 ||
[Analyze grammar]

yaścaiṣa puruṣaḥ ko'pi pānthaḥ pāṃsulapādakaḥ |
eṣa vidyādharendrāṇāmindraḥ kila bhaviṣyati || 46 ||
[Analyze grammar]

enaṃ dṛṣṭvādhitiṣṭhantametaṃ jarjaramaṇḍapam |
malladaṇḍakaniḥsārānutprekṣe sakalāgamān || 47 ||
[Analyze grammar]

adṛṣṭārthāḥ kila granthādṛṣṭārthairgāruḍādibhiḥ |
arthavanto'numīyante yācakairiva dāyakāḥ || 48 ||
[Analyze grammar]

yathā ca viṭakāvyatvānmṛṣā puruṣalakṣaṇam |
śrutismṛtipurāṇādi tathā saṃbhāvyatāmiti || 49 ||
[Analyze grammar]

itarastamathāvocadatītabhavasaṃcitam |
iṣṭāniṣṭaphalaṃ karma daivamāhurvicakṣaṇāḥ || 50 ||
[Analyze grammar]

yaccedaṃ lakṣaṇaṃ nāma śarīreṣu śarīriṇām |
etaddaivābhidhānasya lakṣaṇaṃ pūrvakarmaṇaḥ || 51 ||
[Analyze grammar]

na cāpuruṣakārasya daivaṃ phalati kasyacit |
kālakāraṇasāmagrīmīśvaro'pi hyapekṣate || 52 ||
[Analyze grammar]

ayaṃ tu taruṇaḥ kalyaḥ kāntikṣiptasurāsuraḥ |
kuṇṭhayā gaṇḍamaṇḍānāṃ mandaceṣṭatayā samaḥ || 53 ||
[Analyze grammar]

yathā dhanuradhānuṣkaṃ yathā bījamavāpakam |
sattāmātraphalaṃ puṃsastathā daivamapauruṣam || 54 ||
[Analyze grammar]

parivrāḍabravīddaivaṃ pauruṣādbalavattaram |
jñāpakaṃ cāsya pakṣasya śrūyatāṃ yanmayā śrutam || 55 ||
[Analyze grammar]

asti sindhutaṭe grāmo brahmasthalakanāmakaḥ |
tatrāsīdvedaśarmeti caturvedo dvijottamaḥ || 56 ||
[Analyze grammar]

tasya yo'nyatamaḥ śiṣyaḥ pāṭhaṃ prati dṛḍhodyamaḥ |
tasmādeva ca sa chātrairāhūyata dṛḍhodyamaḥ || 57 ||
[Analyze grammar]

tamobhedakanāmnaśca gṛhasthasya gṛhe sadā |
dāpitaṃ bhojanaṃ tasya ācchādanaṃ vedaśarmaṇā || 58 ||
[Analyze grammar]

tatra bhinnatamā nāma parivrāṭ pāñcarātrikaḥ |
vāsamāvasathe tasya karoti sma dṛḍhodyamaḥ || 59 ||
[Analyze grammar]

anena ca prakāreṇa paṭuśraddhānamedhasā |
adhītaṃ daśabhirvarṣaistena vedacatuṣṭayam || 60 ||
[Analyze grammar]

atha bhinnatamāḥ kṛtvā varṇāśramakathāṃ ciram |
praśāntajanasaṃpāte pradoṣe tamabhāṣata || 61 ||
[Analyze grammar]

bahugomahiṣībhūmidāsīdāsamidaṃ mayā |
tantrasthānamupāntaṃ ca cāṭādibhyaśca rakṣitam || 62 ||
[Analyze grammar]

dhyānādhyāyapradhānaṃ ca vihitaṃ bhikṣukarma yat |
vaiśyakarmābhiyuktasya tasya nāmāpi nāsti me || 63 ||
[Analyze grammar]

adhunā tu vacaḥkāyaparispandāpahāriṇī |
paralokasamāsannā jarātandrīrivāgatā || 64 ||
[Analyze grammar]

gṛhamedhivratasthānāmalasānāṃ svakarmasu |
dharmasādhanamuddiṣṭamṛṣibhistīrthasevanam || 65 ||
[Analyze grammar]

āha vedāntavādaśca tārakaṃ brahma tantrayet |
etasmānna vimuñceyuravimuktaṃ mumukṣavaḥ || 66 ||
[Analyze grammar]

śvaḥ prasthātāsmahe tasmātprātarvārāṇasīṃ prati |
buddhadharme praśastā hi dharmasya tvaritā gatiḥ || 67 ||
[Analyze grammar]

bhavatāpi śrutismṛtyoḥ prāmāṇyamanujānatā |
niyogenaiva kartavyaḥ patnīputraparigrahaḥ || 68 ||
[Analyze grammar]

gṛhasthāśramadharmaśca gavādidhanasādhanaḥ |
na ca pratigrahādanyadviprasya dhanasādhanam || 69 ||
[Analyze grammar]

tatsukhopanataṃ caitadanindyamatibhūri ca |
sadāsīdāsamasmākaṃ dhanamādīyatāmiti || 70 ||
[Analyze grammar]

tenoktaṃ yuṣmadādiṣṭamakāryamapi mādṛśaḥ |
na vikalpayituṃ śaktaḥ kiṃ punarnyāyyamīdṛśam || 71 ||
[Analyze grammar]

kiṃ tvāmantrya pitṛsthānau vidyājīvitadāyinau |
kartāsmi bhavadādeśamativāhya niśāmiti || 72 ||
[Analyze grammar]

yātāyāṃ tu triyāmāyāṃ tamāmantrayituṃ gatam |
saṃpratiṣṭhāsamāno'pi ciraṃ bhikṣurudaikṣata || 73 ||
[Analyze grammar]

yadā tu divasārdhe'pi gate chāttraḥ sa nāgataḥ |
taṃ gaveṣayituṃ bhikṣuḥ svayameva tadā gataḥ || 74 ||
[Analyze grammar]

sa tu tenāṅgaṇe dṛṣṭastamobhedakaveśamanaḥ |
śanaiścaṅkramaṇaṃ kurvannīcaiścāmnāyamānasam || 75 ||
[Analyze grammar]

uktaṃ ca bhavatā kasmādiyacciramiha sthitam |
athārthenaiva tenārthastathā naḥ kathyatāmiti || 76 ||
[Analyze grammar]

tatastenoktametasmin gṛhe kenāpi hetunā |
vyagraḥ parijanaḥ sarvastatra tatrābhidhāvati || 77 ||
[Analyze grammar]

yāṃ yāmeva ca pṛcchāmi kimetaditi dārikām |
sā sā māmāha saṃrabdhā śivaṃ dhyātu bhavāniti || 78 ||
[Analyze grammar]

taṃ cādyāpi na pṛcchāmi tamobhedakamākulam |
tenāhaṃ nāgataḥ kṣipraṃ sakāśaṃ bhavatāmiti || 79 ||
[Analyze grammar]

atha bhinnatamāḥ smitvā dṛḍhodyamamabhāṣata |
yenāyamākulo lokastadahaṃ kathayāmi te || 80 ||
[Analyze grammar]

tamobhedakabhāryāyāḥ prasūtiḥ pratyupasthitā |
ayaṃ parijanastatra tatratatrākulākulaḥ || 81 ||
[Analyze grammar]

dārikā jāyate cāsya tāṃ ca tvaṃ pariṇeṣyasi |
sā ca rāgagrahāviṣṭā duṣṭaceṣṭā bhaviṣyati || 82 ||
[Analyze grammar]

iti tasmin kṛtādeśe gate svavivadhaṃ prati |
itaraścintayāmāsa śaṅkākampitamānasaḥ || 83 ||
[Analyze grammar]

brāhmaṇī brāhmaṇasyāsya yadi kanyāṃ vijāyate |
tato bhinnatamovākyamabhūtārthaṃ na jāyate || 84 ||
[Analyze grammar]

stobhāveśaviṣācchedakriyāsu vyaktaśaktibhiḥ |
śeṣāṇāmapi mantrāṇāṃ sāmarthyamanumīyate || 85 ||
[Analyze grammar]

iti cintayatastasya dīno gṛhapatirgṛhāt |
hā daivaṃ khalamityādi lapannīcairvinirgataḥ || 86 ||
[Analyze grammar]

kṣaṇācca śvagṛhītasya mārjārasyeva kūjataḥ |
antarbhavanamudbhūtaḥ śvāgāraparuṣaśrutiḥ || 87 ||
[Analyze grammar]

tataḥ prasādhitā nāryo lajjāprāvṛtamastakāḥ |
pakṣadvāreṇa nirjagmurnairāśyottānapāṇayaḥ || 88 ||
[Analyze grammar]

paricārakavargaśca śocadbandhukadambakam |
amantrayata vāmasya vidheḥ kiṃ kriyatāmiti || 89 ||
[Analyze grammar]

evaṃprāyaprapañce tu gṛhe tasmindṛḍhodyamaḥ |
siddhapravrajitādeśajātabhītiracintayat || 90 ||
[Analyze grammar]

parivrājakavākyena tathābhūtena sādhitam |
daivaṃ puruṣakāreṇa janāḥ paśyantu bādhitam || 91 ||
[Analyze grammar]

sindhudeśaṃ parityajya devāddeśaṃ parivrajan |
ayaṃ pariharāmyenāṃ dūrataḥ kardamāmiti || 92 ||
[Analyze grammar]

evamādi vimṛśyāsāvasaṃmantryaiva saṃskṛtān |
daśayojanamadhvānamekāhena palāyitaḥ || 93 ||
[Analyze grammar]

sadvīpāṃ ca parikramya varṣairdvādaśabhirmahīm |
gaṅgātaṭamupāgacchattīrthopāsanakāmyayā || 94 ||
[Analyze grammar]

athātapapipāsārtaśchāyāsalilavāñchayā |
kasmiṃścidbrāhmaṇagrāme kaṃcana prāviśadgṛham || 95 ||
[Analyze grammar]

tatra cālindakāsīnāmarkatūlābhamūrdhajām |
yayāce brāhmaṇīmamba pānīyaṃ dāpyatāmiti || 96 ||
[Analyze grammar]

sā tvabhāṣata saṃbhrāntā hale putri tamālike |
āsanodakamādāya laghu nirgamyatāmiti || 97 ||
[Analyze grammar]

tataḥ pīṭhālukāhastā vasitāsitakañcukā |
āpiṅgāpāntakeśāntā kanyakā niragādgṛhāt || 98 ||
[Analyze grammar]

diśastaralayā dṛṣṭyā paśyantī saṃtatasmitā |
paṅgubhaṅgurasaṃcārā cirātprāpaddṛḍhodyamam || 99 ||
[Analyze grammar]

āsyatāmatra mitreti vadantyā śūnyayā tayā |
pīṭhabuddhyā purastasya nikṣiptaṃ jalabhājanam || 100 ||
[Analyze grammar]

atha tāmabravīdvṛddhā muktvaitāmavinītatām |
apareṇodapātreṇa jalamāvarjyatāmiti || 101 ||
[Analyze grammar]

sā tu kṛtrimasaṃtrāsajanitotkaṭavepathuḥ |
antarhasitabhugnauṣṭhī vṛddhājñāṃ samapādayat || 102 ||
[Analyze grammar]

tato gataśramaṃ vṛddhā pṛcchati sma dṛḍhodyamam |
āgacchati kuto deśātkaṃ vā yāti bhavāniti || 103 ||
[Analyze grammar]

tenoktaṃ na sa deśo'sti nāgacchāmi yataḥ kṣitau |
yacca brūtha kva yāsīti tatra viñāpayāmi vaḥ || 104 ||
[Analyze grammar]

kasmiṃścidbrāhmaṇagrāme kurvanbaṭukapāṭhanām |
saṃtuṣṭo grāmavāsobhirninīṣe divasāniti || 105 ||
[Analyze grammar]

tatastamabravīdvṛddhā nītijñaiḥ satyamucyate |
na hyataptena lohena taptaṃ saṃdhīyate kvacit || 106 ||
[Analyze grammar]

mama dvau putranaptārāvadhunaivopanītakau |
tau ca saṃyojitau puṇyairarthināvarthinā tvayā || 107 ||
[Analyze grammar]

bhavānadhyāpanenārthī tau cādhyayanakāṅkṣiṇau |
naṣṭāśvadagdharathavadyogo'stu bhavatāmiti || 108 ||
[Analyze grammar]

tatastasyai pratijñāya tau baṭū pāṭhayannasau |
antevāsigaṇaṃ cānyamasthātsaṃvatsaradvayam || 109 ||
[Analyze grammar]

ekadā tāmabhāṣanta vṛddhāmāgatya bāndhavāḥ |
kasmāddṛḍhodyamāyeyaṃ dīyate na tamālikā || 110 ||
[Analyze grammar]

ye jāmātṛguṇāsteṣāṃ kaścidasti kvacidvare |
dṛḍhodyame punaḥ paśya yadi kaṃcinna paśyasi || 111 ||
[Analyze grammar]

durlabhaḥ sulabhībhūtastasmātsvīkriyatāmayam |
kena vanyaḥ karī vārīmāgataḥ svayamujjhitaḥ || 112 ||
[Analyze grammar]

iti tairbodhitā vṛddhā pratītā tānayācata |
yadyevaṃ svayamevāyaṃ pūjyairabhyarthyatāmiti || 113 ||
[Analyze grammar]

te tatastamabhāṣanta bhautika brahmacāriṇā |
āmnātāścāvabuddhāśca vedāḥ sasmṛtayastvayā || 114 ||
[Analyze grammar]

avaśyaṃ cādhunā kāryaḥ śuddhapatnīparigrahaḥ |
uraḥkaṇṭhauṣṭhaśoṣasya mā bhūdvaiphalyamanyathā || 115 ||
[Analyze grammar]

ataḥ pratīṣyatāmeṣā sarvaśuddhā tamālikā |
jyeṣṭhaṃ jyeṣṭhāśramasyāṅgaṃ trayī vidyeva dehinī || 116 ||
[Analyze grammar]

evamādi sa tairuktaḥ kṣaṇametadacintayat |
yuktaṃ yadbrāhmaṇairuktamatra tāvatkimucyate || 117 ||
[Analyze grammar]

yaścāsau sindhuviṣaye dūṣitaḥ kṛtyayā tayā |
pāre sāgaravatso'pi dūratvātsudurāgamaḥ || 118 ||
[Analyze grammar]

atha daivena saiveyamānītā sindhudeśataḥ |
sūcīsūtragate daivāttataḥ kaḥ kutra mokṣyate || 119 ||
[Analyze grammar]

evamādi sa niścitya pratiśrutya tatheti ca |
pariṇīya ca tāṃ kanyāṃ saṃvatsaramayāpayat || 120 ||
[Analyze grammar]

atha yātatriyāmāyāṃ triyāmāyāṃ dṛḍhodyamaḥ |
jṛmbhāveditanidrāntāṃ pṛcchati sma tamālikām || 121 ||
[Analyze grammar]

brūhi sundari paśyāma kuṭumbasyāsya kaḥ prabhuḥ |
keyaṃ bhavati te vṛddhā kāvetau baṭukāviti || 122 ||
[Analyze grammar]

tayā tvāyataniśvāsakathitāyataduḥkhayā |
srutāśrukaṇikāśreṇyā kathitaṃ skhaladakṣaram || 123 ||
[Analyze grammar]

asyā brāhmaṇavṛddhāyāḥ priyaḥ sādhurabhūtpatiḥ |
yasya vidyādhanaistṛptāḥ śiṣyayājakayācakāḥ || 124 ||
[Analyze grammar]

tena cāśeṣavedāya kṣamādiguṇaśāline |
duhitā gṛhajāmātre chāttrāya pratipāditā || 125 ||
[Analyze grammar]

tāḍitaścaraṇenāpi yaḥ kṣamāvānabhūtpurā |
sa jāmātṛtayā krodhādgamitaḥ kṛṣṇasarpatām || 126 ||
[Analyze grammar]

mahāntamapi saṃmānaṃ manyamāno vimānatām |
śvaśrūśvaśurayoḥ khedamātmanaścākarodvṛthā || 127 ||
[Analyze grammar]

ekadā parihāsena syālakastamabhāṣata |
durvāsaḥsadṛśastāta durārādho bhavāniti || 128 ||
[Analyze grammar]

yadyevaṃ durdurūḍhena kiṃ mayārādhitena vaḥ |
ityuktvā mantharālāpaḥ sadāro gata eva saḥ || 129 ||
[Analyze grammar]

śvaśrūśvaśuramitrāṇāmavakarṇya kadarthanām |
nirapekṣaṃ svadeśāya sindhudeśāya yātavān || 130 ||
[Analyze grammar]

tatra ca grāmamadhyāsya brahmasthalakanāmakam |
acirānnityakāmyāni karmāṇi niravartayat || 131 ||
[Analyze grammar]

tasya tasyāṃ ca bhāryāyāṃ kālarātrisamā sutā |
yamau ca tanayau jātau yamakālau kulasya yau || 132 ||
[Analyze grammar]

ahameva ca sā kanyā tau caitau kākatālukau |
yairmātāpitarāveva bālaireva samāhitau || 133 ||
[Analyze grammar]

sindhudeśaikadeśaśca sindhunā caṇḍaraṃhasā |
durvāragurupūreṇa sahasākṛṣya nīyate || 134 ||
[Analyze grammar]

atha mātāpitṛbhyāṃ nastadbhayādavadhāritam |
mātāmahagṛhaṃ yāntu bālā me niviśantviti || 135 ||
[Analyze grammar]

tataḥ śaṅkeṣubhinnastāmabhāṣata dṛḍhodyamaḥ |
śeṣaṃ sujñānamevāsyāḥ kathāyāḥ sthīyatāmiti || 136 ||
[Analyze grammar]

āsīccāsya sa sarvajñaḥ parivrājakabhāskaraḥ |
sphuṭaṃ bhinnatamā eva bhinnājñānatamā yataḥ || 137 ||
[Analyze grammar]

anubhūtau tathābhūtau tadādeśau mayādhunā |
tṛtīyaparihārāya tyajāmi pṛthivīmiti || 138 ||
[Analyze grammar]

atha dvādaśavarṣāni bhrāṃtvā dvīpāntarāṇi saḥ |
nirviṇṇaścintayāmāsa kiṃciddhavalamūrdhajaḥ || 139 ||
[Analyze grammar]

ādiṣṭaṃ yatparivrājā tattayonmādamattayā |
kālenaitāvatā nūnamakṛtyaṃ kṛtyayā kṛtam || 140 ||
[Analyze grammar]

asmābhiśca na vedoktaṃ na vedāntoktamohitam |
vraṇairiva visarpadbhiḥ kvāpītaṃ puruṣāyuṣam || 141 ||
[Analyze grammar]

tena vārāṇasīṃ gatvā tīrthopāsanahetukam |
puṇyaṃ svargaphalaṃ kurvannayāmi divasāniti || 142 ||
[Analyze grammar]

tataḥ sāgaramuttīrya gaṅgāsāgaramāgamat |
tato vārāṇasīṃ prāpadamuñcanneva jāhnavīm || 143 ||
[Analyze grammar]

pāviśanneva cāpaśyannaradhātuparicchadam |
skhaladālāpasaṃcāraṃ mahāpāśupataṃ puraḥ || 144 ||
[Analyze grammar]

taṃ cānu sphaṭikaprāyakarṇakaṇṭhavibhūṣaṇām |
madirātāmrajihmākṣāṃ vicitragalakaṇṭhikām || 145 ||
[Analyze grammar]

dviguṇīkurvatīṃ mārgaṃ vaṅkairgatinivartanaiḥ |
amuktanijanirmokāṃ bhujaṃgīmiva yoṣitam || 146 ||
[Analyze grammar]

sā tu kāpālikenoktā drutamehi kapālini |
na yāvadavimuktasya dhūpavelātivartate || 147 ||
[Analyze grammar]

huṃhuṃkārādibhiḥ stutvā saṃsthātrayaparaṃ dhruvam |
tataḥ śuṇḍikaśāleṣu mārgayāmi surāmiti || 148 ||
[Analyze grammar]

evaṃprāye ca vṛttānte ciraṃ dṛṣṭvā dṛḍhodyamam |
papāta pādayostasya tārākrandā kapālinī || 149 ||
[Analyze grammar]

punaḥ kāpāliknoktaṃ muñca brāhmaṇamadhvagam |
parihāsaściraṃ caṇḍi viruddhastyajyatāmiti || 150 ||
[Analyze grammar]

sābravīdeṣa me bhartā daivataiḥ pratipāditaḥ |
tvaṃ tu dhṛṣṭaviṭo bhūtvā kiṃ vyāharasi māmiti || 151 ||
[Analyze grammar]

taṃ ca prapañcamālokya sa pradeśaḥ sakautukaiḥ |
janairagaṇitairvyāptaḥ śramaṇabrāhmaṇādibhiḥ || 152 ||
[Analyze grammar]

sā cāvocaccaturveda riktavedo'si sarvathā |
savedaḥ ko hi nirvedaṃ vedoktaiḥ karmabhirvrajet || 153 ||
[Analyze grammar]

na tvayotpāditāḥ putrānāgnihotramupāsitam |
nārcitāḥ pitaraḥ piṇḍairvāyubhūtena hiṇḍitam || 154 ||
[Analyze grammar]

tvayā dṛḍhodyama tyaktā sāhaṃ mandā tamālikā |
kulātkulamaṭantīdaṃ carāmi kulaṭāvratam || 155 ||
[Analyze grammar]

avṛddhakulavāsinyastaruṇyaḥ pativarjitāḥ |
yairaduṣṭāḥ striyo dṛṣṭāste dṛṣṭāḥ kenacitkvacit || 156 ||
[Analyze grammar]

tena tyaktavatā dārānyattvayā pāpamarjitam |
tāneva bharamāṇena tatsamucchidyatāmiti || 157 ||
[Analyze grammar]

atha lajjāviṣādāndhamūcurviprā dṛḍhodyamam |
bhagavatyā yaduktaṃ tattattvataḥ kathyatāmiti || 158 ||
[Analyze grammar]

tenātmanaśca tasyāśca dvijādijanasaṃnidhau |
brahmasthalakavāsādi yadvṛttaṃ tanniveditam || 159 ||
[Analyze grammar]

athoktaṃ brāhmaṇairbrahmanbrāhmaṇī parigṛhyatām |
raktadāraparityāgamācaranti na sādhavaḥ || 160 ||
[Analyze grammar]

yacca kiṃcidakartavyamanāthyādanayā kṛtam |
tasya kṛcchratamaiḥ kṛcchrairviśuddhiḥ kriyatāmiti || 161 ||
[Analyze grammar]

tenoktaṃ yādṛśaṃ pāpaṃ prāyaścittairapohyate |
pūjyānāmeva tadbuddhamidaṃ budhyata yādṛśam || 162 ||
[Analyze grammar]

hīnavarṇābhigāminyaḥ pātakinyaḥ kila striyaḥ |
iyaṃ tvaśubhasāvarṇaṃ yamupāste sa dṛśyatām || 163 ||
[Analyze grammar]

tadupāstāmiyaṃ bhadrā yamupāsacchivaṃ dhruvam |
sukhānāṃ copahartāraṃ mahāpāśupataṃ patim || 164 ||
[Analyze grammar]

ityuktavati sā tasminnuvācopacitatrapā |
ā mṛtyostvatsamīpasthā nayāmi divasāniti || 165 ||
[Analyze grammar]

athaiko brāhmaṇasteṣu dṛḍhodyamamabhāṣata |
madīyā duhitā brahman rūpiṇī pariṇīyatām || 166 ||
[Analyze grammar]

dhanaṃ me dhanadasyeva saiva caikā sutā yataḥ |
tatastasya ca tasyāśca bhavedbhartā bhavāniti || 167 ||
[Analyze grammar]

āsīccāsya kimadyāpi syānna syāditi cintayā |
parivrājakavākyaṃ hi kṛtārthīkṛtametayā || 168 ||
[Analyze grammar]

pratijñāya ca tāṃ kanyāṃ dadānādbrāhmaṇātsvayam |
samahādraviṇaskandhāmupayeme dṛḍhodyamaḥ || 169 ||
[Analyze grammar]

tamālikāpi saṃhārya keśān kāṣāyacīvarā |
dṛḍhodyamagṛhāsannā vasatī kālamakṣipat || 170 ||
[Analyze grammar]

dṛḍhoyamo'pi saṃtataṃ dvijātikarma sādhayan |
harottamāṅgalālitāmupāsta jahnukanyakām || 171 ||
[Analyze grammar]

tattena yena kṛtaduṣkarapauruṣeṇa vākyaṃ na bhinnatamasaḥ kṛtamapramāṇam |
śūreṇa daivahariṇā prabhuṇā prasahya tasmājjitaḥ puruṣakāragajādhirājaḥ || 172 ||
[Analyze grammar]