Chapter 16

athāsau māmavanditvā nistriṃśakarakaṅkaṭaḥ |
ārohadambaraṃ kāle mandendugrahacandrike || 1 ||
[Analyze grammar]

taṃ cotpatantamākāśaṃ śaraṃ vālambitatvaram |
na pṛcchāmi sma panthānaṃ deśaṃ nagarameva vā || 2 ||
[Analyze grammar]

gāhamānaśca valmīkasthāṇukaṇṭakasaṃkaṭām |
aṭavīṃ siṃhamātaṅgapuṇḍarīkākulāmagām || 3 ||
[Analyze grammar]

athāmitagatikrodhavahnibhāseva bhāsitām |
apaśyaṃ lohitāyantīṃ prācīmaruṇaśociṣā || 4 ||
[Analyze grammar]

kaṃciccādhvānamākramya deśe nātighanadrume |
vivādidhvanighaṇṭānāmapaśyaṃ maṇḍalaṃ gavām || 5 ||
[Analyze grammar]

anumāya tatastena vasantaṃ deśamantike |
jātāśvāsamatirgacchan kṣaṇenāraṇyamatyajam || 6 ||
[Analyze grammar]

tuṣārasamayārambhabhīyeva kamalākarān |
apaśyaṃ dhūsaracchāyān gacchandinakarodaye || 7 ||
[Analyze grammar]

athālikulanīlāgravilasatkundakānanam |
ālavālaparikṣiptamūlamudyānamāsadam || 8 ||
[Analyze grammar]

tatra saṃmārjanavyagramudyānaparicārakam |
pṛṣṭavānasmi kasyedamudyānamiti so'bravīt || 9 ||
[Analyze grammar]

kiṃ ca devakumāro'pi divyajñānāmalāśayaḥ |
asmadādīnabodhāndhān saṃdihanniva pṛcchati || 10 ||
[Analyze grammar]

atha vā kiṃ na etena mahātmano hi mādṛśaiḥ |
krīḍanti tena devena svayaṃ vijñāyatāmiti || 11 ||
[Analyze grammar]

atha dvitīyamudyānaṃ ramaṇīyataraṃ tataḥ |
praviśyāpaśyamudyānamandiraṃ tuṅgatoraṇam || 12 ||
[Analyze grammar]

praviśāmi sma tatrāhameko dauvārikaśca mām |
antare vetramādhāya tiṣṭheti dvāryadhārayat || 13 ||
[Analyze grammar]

athāvocaddvitīyastaṃ dhiktvāṃ nirbuddhacakṣuṣam |
nivārayasi yo mohādenamambaracāriṇam || 14 ||
[Analyze grammar]

kiṃ kadācittvayā dṛṣṭaḥ śruto vā kaścidīdṛśaḥ |
evaṃ vā praviśandhīraṃ dharaṇīdhīradhīriti || 15 ||
[Analyze grammar]

tenoktamananujñātaṃ bhartrā nāradamapyaham |
viśantaṃ nānujānāmi kiṃ punaḥ saumyamīdṛśam || 16 ||
[Analyze grammar]

ayaṃ tu dhriyamāṇo'pi digdantigatidhīrataḥ |
praviśatyeva pāruṣyamātrasārā hi mādṛśāḥ || 17 ||
[Analyze grammar]

atha niṣkāraṇotkaṇṭhākaramudyānamandiram |
prāviśaṃ nisvanadvīnaṃ vinītāṇḍajavānaram || 18 ||
[Analyze grammar]

tatrāsīnaṃ śilāpaṭṭe citrapaṭṭopadhānake |
apaśyamamarākāraṃ naraṃ nāgarakeśvaram || 19 ||
[Analyze grammar]

upasṛtya tamābhāṣya bhoḥ sādho sukhamāsyate |
kaccidvā pratyavekṣyante bahukṛtvaḥ kalā iti || 20 ||
[Analyze grammar]

vīṇāvyāsaktacittatvātpaśyati sma na māmasau |
avakṣiptaṃ hi dṛśyāni manaḥ paśyati nekṣaṇe || 21 ||
[Analyze grammar]

mayā tu calitā vīṇā gṛhītvāgre yadā tadā |
vīṇātaścakṣurākṣipya mayi nikṣiptavānasau || 22 ||
[Analyze grammar]

tataḥ saṃbhrāntamutthāya sraṃsamānottarāmbaraḥ |
māmupāveśayatprītastasminneva śilāsane || 23 ||
[Analyze grammar]

pādacārapariśrāntamaṅgaṃ saṃvāhya māmakam |
prakṣālya ca svayaṃ pādau dattārghaḥ samupāviśat || 24 ||
[Analyze grammar]

anuyuktaśca sa mayā ko'yaṃ janapadastvayā |
bhūṣitaḥ katamaccedaṃ puraṃ saccaritairiti || 25 ||
[Analyze grammar]

atha tena vihasyoktaṃ saṃbhāvyā nabhasā gatiḥ |
tvādṛśāṃ devaputrāṇāmajñānaṃ tu na yujyate || 26 ||
[Analyze grammar]

yo hi deśāntaraṃ yāti mugdho'pi dharaṇīcaraḥ |
agrato bhāvitaṃ deśaṃ nābuddhvā saṃprapadyate || 27 ||
[Analyze grammar]

deśaścandraprakāśo'yaṃ candrikāprakaṭā purī |
na jñātā pathikeneti duḥśliṣṭamiva dṛśyate || 28 ||
[Analyze grammar]

tenāmarakumārastvamavatīrṇo vihāyasaḥ |
ajñānacchadmanā channaḥ krīḍituṃ madvidhairiti || 29 ||
[Analyze grammar]

athāhaṃ cintayitvedamuttarābhāsamuktavān |
dvijo'haṃ vatsaviṣaye vasataḥ pitarau mama || 30 ||
[Analyze grammar]

so'haṃ karṇasukhācāraḥ kadācinmantravādinām |
śrutvā dārairasaṃtuṣṭo yakṣīṃ kāṃcidasādhayam || 31 ||
[Analyze grammar]

sā cāhaṃ ca tataḥ prītau śaile śaile vane vane |
yadvā yad rucitaṃ tasyai tatra tatrāramāvahi || 32 ||
[Analyze grammar]

cintitaṃ ca mayā rātrau na me yakṣyā prayojanam |
pātālamantramārādhya ramayāmyasurīmiti || 33 ||
[Analyze grammar]

atherṣyādūṣitadhiyā tayāhaṃ yakṣakanyayā |
ānīya nabhasā nyastaḥ pure'sminbhavatāmiti || 34 ||
[Analyze grammar]

tenoktaṃ na na saṃbhāvyā yakṣarakṣaḥsu caṇḍatā |
paścāttāpagṛhītā tu na sā yusṃānvimokṣyati || 35 ||
[Analyze grammar]

ko'yaṃ janapadaḥ syātkā purīti ca yaducyate |
aṅgā janapadaḥ sphītaścampā ceyaṃ mahāpurī || 36 ||
[Analyze grammar]

ahaṃ ca dattako nāma vaṇikpaurapuraskṛtaḥ |
prasiddhaḥ priyavīṇatvādvīṇādattakanāmakaḥ || 37 ||
[Analyze grammar]

athāhūyābravīdekaṃ sa karṇe paricārakam |
gāḍhaṃ parikaraṃ badhnandhāvamānaḥ sa cāgamat || 38 ||
[Analyze grammar]

kṣaṇena ca parāvṛtya śvasitaspanditodaraḥ |
svāmipravahaṇaṃ prāptamiti dattakamabravīt || 39 ||
[Analyze grammar]

athāvatārya muditaḥ svāṅguleraṅgulīyakam |
dattavāndattakastasmai śīghrapreṣaṇakāriṇe || 40 ||
[Analyze grammar]

kṛtāñjalirathovāca yakṣīkāmuka dhāvyatām |
pāvanairdāsabhavanaṃ pādanikṣepaṇairiti || 41 ||
[Analyze grammar]

athāruhya pravahaṇaṃ vīṇādattakavāhakam |
gṛhītacārusaṃcāraṃ campāmabhimukho'gamam || 42 ||
[Analyze grammar]

śṛṇomi sma ca paurāṇāṃ jalpatāmitaretaram |
ciraṃjīvadbhirāścaryaṃ pṛthivyāṃ kiṃ na dṛśyate || 43 ||
[Analyze grammar]

kva nāgarakasenānīrdattakastuṅgamastakaḥ |
kva ca kasyāpi pānthasya rajjubhāge vyavasthitaḥ || 44 ||
[Analyze grammar]

athāpareṇa tatroktamata evāyumattamaḥ |
yena lokottamasyāsya rajjubhāge vyavasthitaḥ || 45 ||
[Analyze grammar]

ākārānumitaṃ caitadguṇasaṃbhārabhāriṇaḥ |
nanu cāsya vasanto'pi sārathyena vikathyate || 46 ||
[Analyze grammar]

dṛṣṭavānparitaścāhaṃ kvacidutsṛṣṭalāṅgalān |
hālikān halamūleṣu vīṇāvādanatatparān || 47 ||
[Analyze grammar]

kvaciduddāmagovargaṃ vaṭe gopālamaṇḍalam |
vitantrīstāḍayadvīṇāḥ karṇaśūlapradāyinīḥ || 48 ||
[Analyze grammar]

āsannaśca puradvāraṃ vikrayāya prasāritām |
vīṇāvayavasaṃpūrṇāmapaśyaṃ śakaṭāvalīm || 49 ||
[Analyze grammar]

vijarjaritakarṇaśca vitantrīdhvanimudgaraiḥ |
vyastapadmanidhānābhaṃ prāpnomi sma vaṇikpatham || 50 ||
[Analyze grammar]

kuṅkumaṃ kretumāyātaḥ kaścidvāṇijamabravīt |
vīṇāvikṣiptacetasko vīṇā me dīyatāmiti || 51 ||
[Analyze grammar]

cirādākarṇya tadvākyaṃ kupitaḥ sa tamabravīt |
vaṇijo'nye kimutsannāyena khādasi māmiti || 52 ||
[Analyze grammar]

evaṃ vardhakikarmārakulālavaruḍādayaḥ |
nikṛṣṭajanmakarmāṇaḥ saktā vīṇāmavādayan || 53 ||
[Analyze grammar]

atha prāyaṃ ciraṃ dvāraṃ vīṇādattakaveśmanaḥ |
śātakumbhamayaiḥ kumbhairambhogarbhaiḥ samaṅgalam || 54 ||
[Analyze grammar]

tatra yānādavaprutya prāviśaṃ gṛhamṛddhimat |
utthāsnuriva medhāvī viśālaṃ hṛdayaṃ śriyaḥ || 55 ||
[Analyze grammar]

dattakastu puro'smākaṃ dāsīdāsamabhāṣata |
adyārabhyāsya yuṣmābhirājñā saṃpādyatāmiti || 56 ||
[Analyze grammar]

atha vyajñāpayanprahvāḥ sūpakārāḥ sametya mām |
ājñāpayata yuṣmakāṃ kaḥ pākaḥ sādhyatāmiti || 57 ||
[Analyze grammar]

mama tvāsīnmayā tāvadbrāhmaṇatvaṃ prakāśitam |
brāhmaṇāśca ghṛtakṣīraguḍādimadhurapriyāḥ || 58 ||
[Analyze grammar]

tadidaṃ yuktamityetaccintayitvedamuktavān |
nanu hastapuṭagrāhyaṃ pāyasaṃ sādhyatāmiti || 59 ||
[Analyze grammar]

atha hastaṃ vidhūyoktaṃ sūpakāreṇa gacchatā |
annasaṃskāraśāstrajñāḥ kāṃ diśaṃ yāntu saṃprati || 60 ||
[Analyze grammar]

bhīmasenādibhiryāni sūdaśāstrāṇi cakrire |
karmakaryo'pi tānyasmin gṛhe prāyeṇa jānate || 61 ||
[Analyze grammar]

yakṣīkāmukamāsādya prabhuṃ bhojanakovidam |
anarthakāni jātāni caritārthāni pāyase || 62 ||
[Analyze grammar]

aho nāgarakaḥ svāmī svayaṃ pravahaṇena yaḥ |
ālekhyayakṣamādāya yakṣīkāmukamāgataḥ || 63 ||
[Analyze grammar]

sarvathā dhigakāryajñamaiśvaryajanitaṃ madam |
gamitaḥ preṣyatāṃ yena mādṛśo'pīdṛśāmiti || 64 ||
[Analyze grammar]

atha mardanaśāstrajñastaruṇaḥ paricārakaḥ |
mamāṅgaṃ gandhatailena mṛdnāti sma yathāsukham || 65 ||
[Analyze grammar]

paścādudvartanaṃ snānamahatāmbaradhāraṇam |
kṛtvā devapraṇāmaṃ ca prāyaṃ bhojanamaṇḍapam || 66 ||
[Analyze grammar]

tatra bhojanabhūmiṣṭhaṃ māṃ namaskṛtya dattakaḥ |
sabhrātṛbhāgineyādipaṅktimadhyae upāviśat || 67 ||
[Analyze grammar]

kulālacakrapātrī ca pātrī mama hiraṇmayī |
pāyasenenduvarṇena sūpakāreṇa pūritā || 68 ||
[Analyze grammar]

pārśve pāyasapātryāśca tejasvimaṇibhājane |
mahāsāramusārasthe sthāpite madhusarpiṣī || 69 ||
[Analyze grammar]

cintitaṃ ca mayā jāto mahānayamupadravaḥ |
madhumāṃsocitaḥ kvāhaṃ kva cedaṃ ghṛtapāyasam || 70 ||
[Analyze grammar]

kena nāma prakāreṇa tyajeyamidamityaham |
vicārya pāyasagrāsaṃ dagdho'smīti nirastavān || 71 ||
[Analyze grammar]

teṣāṃ saṃpratyayārthaṃ ca harandāharujaṃ kila |
śītapānīyagaṇḍūṣairmukhaṃ muhuraśītayam || 72 ||
[Analyze grammar]

ballavastu puraḥ sthitvā vīṇādattakamuktavān |
nāyaṃ vipraḥ kathaṃ vipraḥ pradviṣyādghṛtapāyasam || 73 ||
[Analyze grammar]

ācaṣṭa mardakaścedamāsavāmodavāsitaḥ |
niśvāso'sya mayā ghrātaḥ śanakairniścaranniti || 74 ||
[Analyze grammar]

dattako'pi karāgreṇa pidhāya mukhamātmanaḥ |
kampayitvottamāṅgaṃ ca taṃ bruvantaṃ nyavārayat || 75 ||
[Analyze grammar]

abravīcca payaḥpānaṃ yūyaṃ pibata pānakam |
pānakasyāpi pānena goṣṭhī saṃmānyatāmiti || 76 ||
[Analyze grammar]

mayā tu jātatarṣeṇa pāne pariṇatiṃ gate |
tatpītaṃ pānasādṛśyātpānabuddhyaiva pānakam || 77 ||
[Analyze grammar]

khaṇḍamāṃsaprakārādyaṃ nānādhiṣṭhānasaṃkulam |
sevitvāhāramagrāmyamudatiṣṭhaṃ sadattakaḥ || 78 ||
[Analyze grammar]

saṃmṛṣṭabhojanasthāne puṣpacchuritakuṭṭime |
kāntamadhyāsi paryaṅkaṃ nyastaṃ tatraiva maṇḍape || 79 ||
[Analyze grammar]

karpūratriphalānābhilavaṅgailāsugandhinā |
mukhasya gandharāgau ca tāmbulenodapādayam || 80 ||
[Analyze grammar]

evaṃ ca sukhamāsīno vīṇādattakamabravam |
vīnonmattiriyaṃ kasmāccampāyāṃ kathyatāmiti || 81 ||
[Analyze grammar]

tenoktamiha campāyāṃ sānudāso vaṇikpatiḥ |
tasya gandharvadatteti sutā trailokyasundarī || 82 ||
[Analyze grammar]

sa ca tāṃ dhriyamāṇo'pi varairvaraguṇākaraiḥ |
abhiprāyeṇa kenāpi na kasmaicitprayacchati || 83 ||
[Analyze grammar]

pratyākhyātumaśaktena yācitena kṣaṇe kṣaṇe |
tena śulkamupanyastaṃ duḥsaṃpādaṃ surairapi || 84 ||
[Analyze grammar]

apūrvaṃ kila gāyantyāstasyāḥ kimapi gītakam |
yo'nuvādayitā vīṇāṃ pariṇetā sa tāmiti || 85 ||
[Analyze grammar]

mayeyaṃ pariṇetavyā mayeyamiti nistrapaḥ |
na kaścid yo na campāyāṃ vīṇayonmattakaḥ kila || 86 ||
[Analyze grammar]

puro nāgarakāṇāṃ ca catuḥṣaṣṭestadarthinām |
ṣaṣṭhe ṣaṣṭhe gate māse sā tadgāyati gītakam || 87 ||
[Analyze grammar]

anena ca prakāreṇa yātaḥ kālo mahānayam |
na cāpi vīṇayā kaścidanugacchati tāmiti || 88 ||
[Analyze grammar]

etatkathāvasāne ca puruṣau śrotriyākṛtī |
vīṇādattakamabrūtāṃ sthavirau vetradhāriṇau || 89 ||
[Analyze grammar]

śreṣṭhinā preṣitāvāvāṃ saṃdeśena tvadantikam |
yadi sajjā suhṛdgoṣṭhī samasyā kriyatāmiti || 90 ||
[Analyze grammar]

tenoktaṃ suhṛdaḥ sajjāyadi vaḥ susthitā gṛhāḥ |
kalyā gandharvadattā vā sva eva kriyatāmiti || 91 ||
[Analyze grammar]

tatastaṃ pṛṣṭavānasmi mahotsāhena cetasā |
rūpaṃ gandharvadattāyākīdṛgityatha so'bravīt || 92 ||
[Analyze grammar]

tasyāḥ svakāntipariveṣapaṭāpidhānaṃ netraprabhāprakarasāritaharmyagarbham |
utkṛṣṭavismayavimohitamānasena rūpaṃ nirūpayitumeva mayā na śakyam || 93 ||
[Analyze grammar]