Chapter 10

atha saṃpāditaṃ tatra yātrāsthena rumaṇvatā |
aśitvodāramāhāraṃ yātrāyai gantumārabhe || 1 ||
[Analyze grammar]

ukṣavṛndārakairyuktamāsthāya syandanaṃ sukham |
haṃsairiva śaśāṅkābhairvimānaṃ yādasāṃ patiḥ || 2 ||
[Analyze grammar]

akhaṇḍaśaśibimbābhaṃ gomukhaśchatramagrahīt |
mṛṣṭahāṭakadaṇḍaṃ ca cāmaraṃ marubhūtikaḥ || 3 ||
[Analyze grammar]

rathāgrāvasthito raśmīnālambata tapantakaḥ |
ātatajyadhanuṣpāṇiḥ pārśvaṃ hariśikho'bhavat || 4 ||
[Analyze grammar]

āśitaṃ mṛdughāsānāṃ śeṣaṃ snāpitapāyitam |
mandaṃ mandaṃ ca naḥ sainyaṃ syandanaṃ parito'gamat || 5 ||
[Analyze grammar]

evaṃprāye ca vṛttānte cāmaraṃ calayanmanāk |
dṛṣṭvā hariśikhaṃ vākyamavocanmarubhūtikaḥ || 6 ||
[Analyze grammar]

caratā mṛgayākrīḍāmaryaputreṇa pāpikām |
pradāya prāṇinaḥ prāṇāndharmaḥ prāpto mahāniti || 7 ||
[Analyze grammar]

tenoktaṃ kimihāścaryamanupāsitasādhunā |
śramavyāyāmasāreṇa bhāṣitaṃ yattvayedṛśam || 8 ||
[Analyze grammar]

bhūmimitrahiraṇyānāṃ mitramevātiricyate |
tanmūlatvāditarayostasmānmitramupārjitam || 9 ||
[Analyze grammar]

tayoḥ saṃjalpatorevamahaṃ gomukhamabruvam |
dharmādīnāṃ pradhānaṃ yattadācaṣṭāṃ bhavāniti || 10 ||
[Analyze grammar]

tenoktaṃ dharmamitrārthāyataḥ kāmaprayojanāḥ |
prādhānyaṃ tena kāmasya kāmaścecchāsukhātmakaḥ || 11 ||
[Analyze grammar]

puline hi padaṃ dṛṣṭvā pūrvamicchā prabhorabhūt |
yenedamiha vinyastaṃ taṃ paśyeyaṃ kathaṃ nviti || 12 ||
[Analyze grammar]

taṃ ca dṛṣṭvāryaputreṇa sukhamāsāditaṃ yataḥ |
tanna mitraṃ na dharmārthau kiṃ tu kāmo'yamarjitaḥ || 13 ||
[Analyze grammar]

anyo'pyasti mahākāmaḥ sa yuṣmākaṃ na gocaraḥ |
yūyaṃ hi sarvakāmibhyo bāhyā dārumanuṣyakāḥ || 14 ||
[Analyze grammar]

nirdiṣṭāḥ kāmaśāstrajñaiḥ puruṣāstu caturvidhāḥ |
uttamā madhyamā hīnāścaturthāstu nakecana || 15 ||
[Analyze grammar]

uttamo gomukhasteṣāmaryaputrastu madhyamaḥ |
adhamān kathayiṣyāmi bhavantastu nakecana || 16 ||
[Analyze grammar]

tataḥ krodhādvihasyedamavocanmarubhūtikaḥ |
aho nāgarakatvaṃ te niṣpannamanujīvinaḥ || 17 ||
[Analyze grammar]

api bālabalīvarda satyamevāsi gomukhaḥ |
ko nāma mānuṣamukhaḥ sannaśuddhamudāharet || 18 ||
[Analyze grammar]

uttamo gomukhasteṣāmaryaputrastu madhyamaḥ |
prabhoradhikamātmānamitthaṃ kaḥ kathayediti || 19 ||
[Analyze grammar]

tenoktaṃ dṛḍhamūḍho'si na kiṃcidapi budhyase |
na hi prabhutvamātreṇa bhavatyuttamakāmukaḥ || 20 ||
[Analyze grammar]

yaḥ kāmyate ca kāmī ca sa pradhānamahaṃ yathā |
akāmī kāmyate yastu madhyo'sāvaryaputravat || 21 ||
[Analyze grammar]

yastu kāmayate kāṃcidakāmāṃ so'dhamaḥ smṛtaḥ |
te nakecana bhaṇyante ye na kāmyā na kāminaḥ || 22 ||
[Analyze grammar]

itīdaṃ lakṣaṇaṃ yeṣāṃ tānvijānīta kāminaḥ |
nakecana bhavantastu yena nirlakṣaṇā iti || 23 ||
[Analyze grammar]

atha cāmaramujjhitvā sphuṭanniva kutūhalāt |
apṛcchadgarjitamukhaṃ gomukhaṃ marubhūtikaḥ || 24 ||
[Analyze grammar]

yoṣinmadhukarī yāsāv upabhoktuṃ vyavasyati |
svāmino yauvanamadhu kvāsau kathaya tāmiti || 25 ||
[Analyze grammar]

tenoktamaryaputrāya bravīmi yadi pṛcchati |
na tubhyaṃ sthalamaṇḍūka na hi bhasmani hūyate || 26 ||
[Analyze grammar]

atha baddhāñjaliḥ prahvo māvocanmarubhūtikaḥ |
pṛcchyatāṃ sthiragarvo'yaṃ prasādaḥ kriyatāmiti || 27 ||
[Analyze grammar]

icchatāpi tamālāpaṃ lajjāṃ bhāvayatā mayā |
apratyākhyātakathitaṃ kathayetyanumoditam || 28 ||
[Analyze grammar]

athānandāśrutimire netre saṃmṛjya gomukhaḥ |
saṃkāsya śuddhakaṇṭhaśca ramyāmakathayatkathām || 29 ||
[Analyze grammar]

athāhamaryaputreṇa yauvarājye vibhūṣite |
abhivādayituṃ devyau narendrāntaḥpuraṃ gataḥ || 30 ||
[Analyze grammar]

tatra citraṃ mayā dṛṣṭamadṛṣṭaṃ divyamānuṣaiḥ |
varṇakramaviśuddhyā yad rājyamasyeva bhūpateḥ || 31 ||
[Analyze grammar]

padmāvatyā ca pṛṣṭo'haṃ kimasminputra gomukha |
paśyasīti tato devi trayamityahamuktavān || 32 ||
[Analyze grammar]

kiṃ punastrayamityukte devyai kathitavānaham |
ṛddhiṃ vaḥ śilpināṃ śilpaṃ bahuratnāṃ ca gāmiti || 33 ||
[Analyze grammar]

atha devyā vihasyoktaṃ cetasyaḥ khalu gomukhaḥ |
acetasyo hi puruṣaḥ kathamevaṃ vadediti || 34 ||
[Analyze grammar]

āsīcca mama tacchrutvā saṃdehādhyāsitaṃ manaḥ |
cetasyaḥ kiṃ nu guṇavānāho sviddoṣavāniti || 35 ||
[Analyze grammar]

na ca pṛṣṭā mayā devī sasaṃdehe'pi cetasi |
mā sma budhyata sā bālamacetasyaṃ ca māmiti || 36 ||
[Analyze grammar]

apṛṣṭaḥ ko nu kathayeccetasyamiti cintayan |
saṃcaranmandiraṃ ahaṃ nirgato rājaveśmanaḥ || 37 ||
[Analyze grammar]

paśyāmi sma rathaṃ yuktaṃ citracāmaramaṇḍanaiḥ |
nirantarakhuranyāsaiḥ pārasīkaisturaṃgamaiḥ || 38 ||
[Analyze grammar]

rathasya prājitā tasya puruṣo māṃ vinītavat |
pratodagarbhamādhāya mūrdhanyañjalimabravīt || 39 ||
[Analyze grammar]

bhartṛdāraka vijñāpyamasmin rājakule vayam |
kulakramāgatā bhṛtyārathavāhanajīvinaḥ || 40 ||
[Analyze grammar]

so'hamājñāpito rājñā yathaite pṛṣṭhavāhniaḥ |
acirādbhavatā rathyāḥ kriyantāṃ turagā iti || 41 ||
[Analyze grammar]

mayā caite yathāśakti skandhadāntāstvarāvatā |
na tu saṃbhāvayāmyetān kuśalairaparīkṣitān || 42 ||
[Analyze grammar]

tadevaṃ rathamāruhya parīkṣyantāmamī tvayā |
padavākyapramāṇārthacatureṇa āgamā iva || 43 ||
[Analyze grammar]

idamādi tataḥ śrutvā kṣaṇamānamitānanaḥ |
upacāro bhavedeṣa satyamevetyacintayam || 44 ||
[Analyze grammar]

lambakarṇamathāpaśyaṃ vinītaṃ lambaśāṭakam |
kāyasthaṃ samaṣīpātraṃ lekhanīkarṇapūrakam || 45 ||
[Analyze grammar]

so'bravīnmahati kleśe pātitāḥ prabhuṇā vayam |
sarvathā dhigimāṃ kṣudrāṃ śvavṛttimanujīvinaḥ || 46 ||
[Analyze grammar]

pṛthivyāṃ santi yāvantaścetasyāḥ puruṣottamāḥ |
acetasyāśca kartavyaṃ teṣāṃ lekhyaṃ mayā kila || 47 ||
[Analyze grammar]

na caikamapi paśyāmi yuktaṃ cetasyalakṣaṇaiḥ |
acetasyāstu sakalāṃ kṣobhayanti mahīmiti || 48 ||
[Analyze grammar]

pustakadvayahastena tatra caikena bhāṣitam |
prasāritāṅgulīkena māmuddiśya sakautukam || 49 ||
[Analyze grammar]

āgatyāryākṛtimamuṃ nirdākṣiṇyaṃ na paśyasi |
ājīvārthacikitsākaṃ cikitsakamivādhanam || 50 ||
[Analyze grammar]

ayaṃ tāvadacetasyapustakādau niveśyatām |
ya evamanunīto'pi rathaṃ nāroḍhumicchati || 51 ||
[Analyze grammar]

aprārthito'pi yaḥ kaścidārohati sa likhyatām |
cetasyapustakasyādau namaskārādanantaram || 52 ||
[Analyze grammar]

tataścetasyatālobhāddūramutplutya satvaraḥ |
mā smānyaḥ kaścidārohadityārohamahaṃ rathaṃ || 53 ||
[Analyze grammar]

tena vegavatā gacchannapaśyaṃ gajamagrataḥ |
sukhāyamānaṃ madhurairālāpair parikarmiṇām || 54 ||
[Analyze grammar]

hastyārohaṃ rathāroho vidhārya rathamuktavān |
anyato naya mātaṅgaṃ mā cetasyarathaṃ rudhaḥ || 55 ||
[Analyze grammar]

tenoktamanyato yātu cetasyādhyāsito rathaḥ |
vihantumahametasya necchāmicchāmi dantinaḥ || 56 ||
[Analyze grammar]

apravṛttamadasyāsya madaḥ sāntvaiḥ pravartate |
icchāyāścāvighātena tena naḥ kṣamyatāmiti || 57 ||
[Analyze grammar]

avocamatha yantāraṃ na nāma yadi necchati |
ādhoraṇaḥ pathānyena rathaḥ prasthāpyatāmiti || 58 ||
[Analyze grammar]

evaṃ nāmeti coktvā saḥ parivartitavān ratham |
cetasyāvāsamadhyena tvāṃ nayāmīti coktavān || 59 ||
[Analyze grammar]

āsīcca mama dīrghāyurayaṃ bhavatu kuñjaraḥ |
rundhatā yena me mārgaṃ cetasyā darśitā iti || 60 ||
[Analyze grammar]

paśyāmi sma ca vistīrṇaśilātaladharātalam |
mālyabhūṣaṇadhūpādiprāyapaṇyaṃ vaṇikpatham || 61 ||
[Analyze grammar]

tamatikramya ramyāgrāharmyamālāḥ saniṣkuṭāḥ |
saśarīrā iva nyastāvāstuvidyākṛtāṃ dhiyaḥ || 62 ||
[Analyze grammar]

utkaṭākāracaritāḥ samadāḥ pramadāḥ kvacit |
tādṛśāneva puruṣān sevamānāḥ parāṅmukhān || 63 ||
[Analyze grammar]

pṛṣṭhato'nunayantaṃ ca yuvānaṃ yuvatiṃ kvacit |
tayā nirbhartsyamānaṃ ca vākyairmadhuradāruṇaiḥ || 64 ||
[Analyze grammar]

ayi ballavakāpehi kiṃ mā chupasi durbhagām |
bahuballavakacchuptāṃ chupa ballavikāmiti || 65 ||
[Analyze grammar]

calayantīṃ kvacitkāṃcidvipañcīmañcitāṅgulim |
kāṃcitkoṇaparāmarśaśiñjānaparivādinīm || 66 ||
[Analyze grammar]

iti saṃcaramāṇo'haṃ rathena mṛdugāminā |
paṭhantīḥ paṭṭikā vyagrāḥ paśyāmi sma kumārikāḥ || 67 ||
[Analyze grammar]

kaḥ punaḥ syādayaṃ grantha iti śrotuṃ mayecchatā |
dūrātprahitakarṇena sphuṭamākarṇitaṃ yathā || 68 ||
[Analyze grammar]

sametya pūrvaṃ na svapyātsuptaṃ ca na parityajet |
prāṇāpānau ca yatnena samaṃ saṃdhārayediti || 69 ||
[Analyze grammar]

āsīcca mama kā etāviṭaśāstramadhīyate |
manye sārathinopāyairahaṃ veśaṃ praveśitaḥ || 70 ||
[Analyze grammar]

kāmadevālayaṃ cānyaḥ kurvan ko'pi pradakṣiṇam |
abhāṣata kṛtārtho'haṃ nidrāṃ prāpsyāmi saṃprati || 71 ||
[Analyze grammar]

yo'sau vinayagarveṇa duḥkhamāste sa gomukhaḥ |
avandhyaṃ yauvanaṃ kartumeṣa veśaṃ vigāhate || 72 ||
[Analyze grammar]

avocamatha yantāramaśobhanamanuṣṭhitam |
adhunā tu rathaḥ kṣipraṃ pratīpaṃ nīyatāmiti || 73 ||
[Analyze grammar]

tenoktaṃ mā trasīrveśānnedaṃ mātaṅgapakṣaṇam |
na ca darśanamātreṇa kaścidbhavati doṣavān || 74 ||
[Analyze grammar]

atītaśca mahānadhvā śiṣyate stokamantaram |
rathaḥ kiṃ pṛṣṭhato yātu kiṃ puraḥ preryatāmiti || 75 ||
[Analyze grammar]

mayā tu pura ityukte tvaritaḥ sārathī ratham |
prairayattatra cāpaśyaṃ mandiraṃ mandaronnatam || 76 ||
[Analyze grammar]

rājāvarodhanākāraṃ dvāsthādhyāsitatoraṇam |
yoṣidvarṣavaraprāyaṃ vinītajanasaṃkulam || 77 ||
[Analyze grammar]

tasmātkanyā viniryāya hārihārādibhūṣaṇāḥ |
kāntibādhitapadminyaḥ parivārya rathaṃ sthitāḥ || 78 ||
[Analyze grammar]

tāsāmekābravitprauḍhā śiroviracitāñjaliḥ |
bhartṛdāraka vijñāpyamāgacchata kileti mām || 79 ||
[Analyze grammar]

mama tvāsīdaho śaktirbata puṇyasya karmaṇaḥ |
jagataḥ prabhurapyeṣā yena praiṣyeva bhāṣate || 80 ||
[Analyze grammar]

acetanairalaṃ puṇyaiḥ kilaśabdaḥ pralīyatām |
yaiḥ kṛtā paratantreyaṃ lakṣmīryena ca sūcitā || 81 ||
[Analyze grammar]

kiṃ tu yāni na yānīti saṃśayāne kṣaṇaṃ mayi |
dainyamlānamukhāmbhojāstā niraikṣanta pṛṣṭhataḥ || 82 ||
[Analyze grammar]

anuyātā ca taddṛṣṭiṃ dṛṣṭamudghāṭitaṃ mayā |
vātāyanaṃ kavāṭasthamaṇijālāṃśubhāsuram || 83 ||
[Analyze grammar]

tena śṛṅgārasaṃcāraṃ tālavṛntatrayaṃ calat |
vibhrāntagrāhiṇīpāṇikaraprakarapiñjaram || 84 ||
[Analyze grammar]

tālavṛttāntarālīnaṃ mukhamunnatakaṇṭhakam |
sarastaraṃgarandhrasthamunnālamiva paṅkajam || 85 ||
[Analyze grammar]

cañcatpradeśinīkaṃ ca pāṇimuccaiḥ prasāritam |
sukumāramarutprāptamiva vidrumapallavam || 86 ||
[Analyze grammar]

keyamāhūyatītyetadavicāryaiva yānataḥ |
bhuvamāgatamātmānamāśu cetitavānaham || 87 ||
[Analyze grammar]

uktaḥ sārathinā cāsmi praṇayaṃ praṇayījanaḥ |
karotu saphalaṃ tena bhartṛputra praviśyatām || 88 ||
[Analyze grammar]

yāvatīṃ ca bhavānvelāmihāste tāvatīmaham |
dhuryānviśramayannāse jātatīvraśramāniti || 89 ||
[Analyze grammar]

gaṇikābhistvahaṃ tābhirāraṇyaka iva dvipaḥ |
vārīmiva dṛḍhadvārāmādyāṃ kakṣyāṃ praveśitaḥ || 90 ||
[Analyze grammar]

praśastairanvitāṃ tatra pradeśaiḥ puṣkarādibhiḥ |
adhīyamānavinayāmapaśyaṃ nāgakanyakām || 91 ||
[Analyze grammar]

dvitīyāyāṃ tu kakṣyāyāṃ śilpikauśalaśaṃsinī |
karṇīrathapravahaṇe śibikāṃ ca śivākṛtim || 92 ||
[Analyze grammar]

praśastalakṣaṇagaṇān raṇadābharaṇasrajaḥ |
nānādeśāṃstṛtīyāṇāṃ vājinaḥ sādhuvāhinaḥ || 93 ||
[Analyze grammar]

caturthyāṃ viruvatkekacakoraśukaśārikam |
sarāvakukkuṭavrātaṃ vayaḥpañjaramaṇḍalam || 94 ||
[Analyze grammar]

kalāvinyāsakuśalairnānākārāṇi śilpibhiḥ |
suvarṇatāratāmrāṇi kalpitāni tataḥ param || 95 ||
[Analyze grammar]

ṣaṣṭhyāṃ tu yojyamānāni gandhaśāstraviśāradaiḥ |
dhūpānulepanamlānavāsanāni tatastataḥ || 96 ||
[Analyze grammar]

saptamyāṃ racyamānāni raṅgadhūpanavāsanaiḥ |
vāsāṃsi paṭṭakauśeyadūkūlaprabhṛtīni tu || 97 ||
[Analyze grammar]

aṣṭamyāṃ maṇimuktasya prakīrṇabahalatviṣaḥ |
saṃskārāndṛṣṭavānasmi niśānavyadhanādikān || 98 ||
[Analyze grammar]

aṣṭasvapi ca kakṣyāsu mahāmātrādayaściram |
svakauśalāni śaṃsanto vighnanti sma gatiṃ mama || 99 ||
[Analyze grammar]

āgatyāgatya tāḥ kanyāḥ kāntarūpavibhūṣaṇāḥ |
abruvan kāraṇīmūlyādbhavanto mūḍhabuddhayaḥ || 100 ||
[Analyze grammar]

ayaṃ kenāpi kāryeṇa praviśanbhartṛdārakaḥ |
durbhagairdhāryate kasmātsvaśilpakathitairiti || 101 ||
[Analyze grammar]

hemakuṇḍaladhāriṇyaḥ pāṇḍarāmbaramūrdhajāḥ |
prayuktaratnapuṣpārghamavocanmāmatha striyaḥ || 102 ||
[Analyze grammar]

dīrghāyuṣā gṛhamidaṃ cintāmaṇisadharmaṇā |
alaṃkṛtaṃ ca guptaṃ ca gamitaṃ ca pavitratām || 103 ||
[Analyze grammar]

tataḥ saṃgatya cetasyaiścetasyagrāmaṇīrbhava |
guṇisaṅganimittā hi guṇā guṇavatāmiti || 104 ||
[Analyze grammar]

sūryakāntaśilākāntinirastatimirāṃ tataḥ |
kanyāyūthaparīvāraḥ prāptaḥ sopānapaddhatim || 105 ||
[Analyze grammar]

tayā prāsādamāruhya vākpraspanditavarjite |
prasuptae iva saṃsāre citre dṛṣṭiṃ nyaveśayam || 106 ||
[Analyze grammar]

kalābhiratha citrābhirbuddhiṃ sarvavidāmiva |
aprameyaguṇākārāṃ kanyāṃ kanyābhirāvṛtām || 107 ||
[Analyze grammar]

anumānopamāśabdau sudūre tāv upāsatām |
pratyakṣeṇāpi tadrūpaṃ durnirūpaṃ nirūpakaiḥ || 108 ||
[Analyze grammar]

cakṣurnirīkṣya tasyāṃ hi mūrchāmuṣitacetanaḥ |
pāṣāṇapuruṣākāraḥ pratyakṣeṇa kimīkṣate || 109 ||
[Analyze grammar]

neśvareṇa ca dharmeṇa na pradhānena nāṇubhiḥ |
na ca kālasvabhāvādyaistādṛśī sukarākṛtiḥ || 110 ||
[Analyze grammar]

alaṃ tadrūpakathayā tadguṇākhyānadīrghayā |
kariṣyatha svayaṃ tasyāguṇarūpavicāraṇām || 111 ||
[Analyze grammar]

tadahaṃ tāṃ namaskartumuttamāṅgāhitāñjaliḥ |
tadrūpaṃ vismitaḥ paśyaṃstūṣṇīmāsaṃ muhūrtakam || 112 ||
[Analyze grammar]

unnamayya mukhaṃ sāpi vikasallocanotpalam |
ciraṃ gomukha jīveti māṃ pūrvaṃ samabhāṣata || 113 ||
[Analyze grammar]

mama tvāsīdaho dhūrtā mugdhābhā cāpi khalviyam |
evaṃ nirabhimānā ca yayāhaṃ samayārthitaḥ || 114 ||
[Analyze grammar]

ninditā ca mayātmīyā buddhirvākca pramādinī |
hastau praśastau tābhyāṃ hi pūrvameva kṛtāñjaliḥ || 115 ||
[Analyze grammar]

sarvato hastamātro'hamacetanamukhādikaḥ |
apramattā hi jīvanti mṛtā eva pramādinaḥ || 116 ||
[Analyze grammar]

iti cintayate mahyaṃ tayā dāpitamānasam |
nikharvadantacaraṇaṃ tatra cāhamupāviśam || 117 ||
[Analyze grammar]

sā ha māṃ kṣaṇamāsīnamapṛcchadgomukhaḥ kutaḥ |
āgacchatīti kathitaṃ mayā rājakulāditi || 118 ||
[Analyze grammar]

tayoktaṃ kuśalī rājā devyau cāntaḥpurāṇi ca |
rumaṇvadādayo vāpi mantriṇaḥ saparigrahāḥ || 119 ||
[Analyze grammar]

kumāriti tataḥ kiṃcidullāpyāsphuṭarephakam |
tūṣṇīṃbhūtā kṣaṇaṃ dṛṣṭiṃ nāsāgre niścalāmadhāt || 120 ||
[Analyze grammar]

pṛṣṭe hariśikhādīnāṃ krameṇa kuśale tayā |
mayā kuśalamityuktaṃ māmapṛcchadasau punaḥ || 121 ||
[Analyze grammar]

jānāmyeva yathā buddhiḥ sarvaiḥ sarvā sukheditā |
prakarṣo yasya yasyāṃ vo vidyāṃ kathaya tāmiti || 122 ||
[Analyze grammar]

mayoktamaryaputrasya prāvīṇyaṃ gajanītiṣu |
mānuṣairavigahye ca gāndharvajñānasāgare || 123 ||
[Analyze grammar]

daṇḍanītau hariśikhaḥ śāstreṣu marubhūtikaḥ |
rathādiyānavidyāsu niṣṭhāyātastapantakaḥ || 124 ||
[Analyze grammar]

mayā tu karabheṇeva śamīnāmagrapallavāḥ |
gṛhītāḥ sarvavidyānāmekadeśā manīṣitāḥ || 125 ||
[Analyze grammar]

sābravīdatha vidyānāmāsāmāsevanasya kaḥ |
bhavatāmucitaḥ kālaḥ katamadvā vinodanam || 126 ||
[Analyze grammar]

mayoditaṃ triyāmānte prabuddhāḥ stutadevatāḥ |
maṅgalālaṃkṛtāḥ paścāditihāsamadhīmahe || 127 ||
[Analyze grammar]

anujñātāstato vaidyaiḥ sugandhisnehadhāriṇaḥ |
abhyasyāmaḥ sayānāni niyuddhānyāyudhāni ca || 128 ||
[Analyze grammar]

tataḥ snātvā ca bhuktvā ca muhūrtaṃ yāpitaśramāḥ |
arthaśāstrāṇi śaṃsanto mahākāvyāni cāsmahe || 129 ||
[Analyze grammar]

niśāmukhe tataḥ saudhe sāndracandraprabhājiti |
ramāmahe sukhaṃ kāntairveṇutantrīrutairiti || 130 ||
[Analyze grammar]

atha sā nayanāntena śravaṇāntavisāriṇā |
bālikāmantikāsīnāṃ dṛṣṭvāpaśyanmadantikam || 131 ||
[Analyze grammar]

tataḥ kṛcchrādivotthāya nitambabharamantharam |
mayāsanne niviṣṭā sā manāgapi na lakṣitā || 132 ||
[Analyze grammar]

evamanyāpi gaṇikā tṛṇavadgaṇitā mayā |
yadāparā tadāyātā rūpiṇī rūpadevatā || 133 ||
[Analyze grammar]

sābravītkaṣṭamāyātamito guru gurorvacaḥ |
itaścātithisatkāraḥ kimatra kriyatāmiti || 134 ||
[Analyze grammar]

mayoktaṃ devatābhyo'pi guravo guravo yataḥ |
tasmādgururgurorājñā saiva saṃpādyatāmiti || 135 ||
[Analyze grammar]

sābravīnna tvayotkaṇṭhā kāryā mitrāṇyapaśyatā |
kariṣyati nirutkaṇṭhamivaṃ tvā padmadevikā || 136 ||
[Analyze grammar]

mamābhiprāyamūhitvā lajjamāneva sābravīt |
na yuktamananujñātaiḥ preṣyairāsannamāsitum || 137 ||
[Analyze grammar]

idaṃ tvāstīrṇaparyaṅkaṃ śaraṇaṃ bhartṛdārakaḥ |
praviśya rathasaṃkṣobhakhedaṃ vinayatāmiti || 138 ||
[Analyze grammar]

tatpraviśya tadādeśādvikasadramaṇīyakam |
śayanaṃ hemaratnāṅgaṃ sāpāśrayamapāśrayam || 139 ||
[Analyze grammar]

pādasthāne tataḥ sthitvā sābravītkaḥ karotu vaḥ |
mandapuṇyairasaṃbhāvyāṃ pādasaṃvāhanāmiti || 140 ||
[Analyze grammar]

pādasaṃvāhanaṃ kāryaṃ bhadraṃ syād yena kenacit |
saṃvāhakaviśeṣeṇa kimatreti mayoditam || 141 ||
[Analyze grammar]

tayā tvālambite pāde pāṇibhyāmabhavanmama |
nirdoṣe mayi keneyaṃ prayuktā viṣakanyakā || 142 ||
[Analyze grammar]

karaṇānyasvatantrāṇi na jāne kīdṛśaṃ manaḥ |
viceṣṭāni ca me'ṅgāni dhiganāryāmimāmiti || 143 ||
[Analyze grammar]

sā tu saṃvāhya caraṇau muhūrtamidamabravīt |
kathaṃ dāsajano vakṣaḥ śrāntaṃ vaḥ sevatāmiti || 144 ||
[Analyze grammar]

mama tvāsītpragalbheyamanācārā ca yā mama |
spṛṣṭapādatalau hastāv urasyādhātumicchati || 145 ||
[Analyze grammar]

mamābhiprāyamūhitvā sābravīddarśitasmitā |
uraḥ spṛśati vaḥ ko vā karābhyāṃ mūḍhadhīriti || 146 ||
[Analyze grammar]

āsīcca mama kāpyeṣā devatā brahmavādinī |
paracittajñatā yasmānnāsti rāgavatāmiti || 147 ||
[Analyze grammar]

tayoktaṃ rathasaṃkṣobhajātakhedasya vakṣasaḥ |
stanotpīḍitakaṃ nāma saṃvāhanamaninditam || 148 ||
[Analyze grammar]

yadi vāhamanugrāhyā vakṣo vā prabalaśramam |
tato māmanujānīta bhartṛtantrā hi yoṣitaḥ || 149 ||
[Analyze grammar]

āsīcca mama dhīreyaṃ nirastakaruṇā ca yā |
anujñāṃ labhate yāvattāvadāste nirākulā || 150 ||
[Analyze grammar]

athaināmabruvaṃ bāle parāyattaṃ nibodha mām |
yaḥ saṃvāhanaśāstrajñaḥ sa svatantraḥ pravartatām || 151 ||
[Analyze grammar]

urasā stanasāreṇa sā madīyamurastataḥ |
saṃvāhayitumārabdhā sakampena savepathu || 152 ||
[Analyze grammar]

sarvathālaṃ visarpantyā prasaṅgakathayānayā |
saṃkṣiptavastu ramye'rthe na kadācidvirajyate || 153 ||
[Analyze grammar]

tataḥ krīḍāgṛhāttasmādbāhyāṃ tāmeva vīthikām |
upāgacchaṃ muhūrtācca tāmevāryasutāgatā || 154 ||
[Analyze grammar]

vanditvā prasthitaṃ sā māṃ kṣaṇamālokya vismitā |
ālapanmadhurālāpā smitapracchāditāratiḥ || 155 ||
[Analyze grammar]

idaṃ bhavanamātmīyaṃ pratyavekṣyaṃ sadā tvayā |
dṛśyamāno bhujaṃgo'pi kālena paricīyate || 156 ||
[Analyze grammar]

atha vastrāntamālambya madīyaṃ padmadevikā |
vijñāpyamasti me kiṃcittacca nādyetyabhāṣata || 157 ||
[Analyze grammar]

tato hṛdayavāsinyā padmadevikayā saha |
tameva rathamāruhya kumārāgāramāgamam || 158 ||
[Analyze grammar]

tatra yuṣmānabhuñjānānpaśyāmi sma mayā vinā |
upahāsaṃ ca kurvantaṃ taṃ tathā marubhūtikam || 159 ||
[Analyze grammar]

dine'nyatra ca sevitvā kṣaṇaṃ yuṣmānahaṃ punaḥ |
gatvāryaduhiturmūlamāseve padmadevikām || 160 ||
[Analyze grammar]

uktaścāryaduhitrāhamadhīrāḥ suhṛdastava |
vṛttānto'yamatasteṣāṃ mā gamatkarṇagocaram || 161 ||
[Analyze grammar]

tataḥ pratiṣṭhamānaṃ māmavocatpadmadevikā |
tadvaḥ kiṃ vismṛtaṃ kāryamiti meti mayoditam || 162 ||
[Analyze grammar]

tayoktaṃ kathayiṣyāmi punarapyāgatāya te |
dhatte saṃdhriyamāṇaṃ hi rahasyaṃ ramyatāmiti || 163 ||
[Analyze grammar]

athāparasmindivase gatvāryaduhiturgṛham |
śokamūkapravṛddhāsramapaśyamabalājanam || 164 ||
[Analyze grammar]

karadvayāvṛtamukhī stambhe lagnā parāṅmukhī |
mandaśabdaṃ mayā dṛṣṭā krandantī padmadevikā || 165 ||
[Analyze grammar]

tāmapṛcchaṃ mahārājye vatsarāje surājani |
jaṅgamasya kutaḥ śoko yuvarāje ca rājati || 166 ||
[Analyze grammar]

na kiṃcidapi sāvocanmayā pṛṣṭāsakṛd yadā |
tadā kila viṣaṇṇo'haṃ mumoha ca papāta ca || 167 ||
[Analyze grammar]

tatra caikā pramṛjyāsraṃ māmavocatsacetanam |
tvannāthāślāghanīyeyamaśocyā padmadevikā || 168 ||
[Analyze grammar]

asyāstu svāminīṃ paśya yuvarāje virājati |
yasyāḥ śokopataptāyāyato rakṣastato bhayam || 169 ||
[Analyze grammar]

atha vā paśya tāmeva paśyatāmeva pīḍyate |
tvādṛśāṃ suhṛdāṃ yasyāḥ samaduḥkhasajīvanam || 170 ||
[Analyze grammar]

tadāveditamārgeṇa gatvā pramadakānanam |
dṛṣṭā kamalinīkūle tatrāryaduhitā mayā || 171 ||
[Analyze grammar]

mṛṇālaśaivalāmbhojanalinīdalasaṃstaram |
śoṣayantī saniśvāsairmuhurviparivartanaiḥ || 172 ||
[Analyze grammar]

mudrikālatikā nāma dārikā hārikā dṛśaḥ |
tadaṅkanyastacaraṇā dhyāyantī puruṣottamam || 173 ||
[Analyze grammar]

athopagamya saṃbhrāntastāṃ kṛtāñjalirabravam |
devī duḥkhāṅgadānena saṃbhāvayatu māmiti || 174 ||
[Analyze grammar]

sābravīdalamākarṇya pravṛddhasukhabhāginaḥ |
tathā mamāpratīkārāṃ lajjāśokakarīṃ kathām || 175 ||
[Analyze grammar]

ko hi nandanasaṃcārikāminījanakāmukaḥ |
taranmakaragambhīrāṃ viśedvaitaraṇīmiti || 176 ||
[Analyze grammar]

tataḥ prasādayantī tāṃ mudrikālatikābravīt |
bhartṛdārikayā kaścitsmaryate na vimānitaḥ || 177 ||
[Analyze grammar]

yadi ca svayamākhyātumaśaktā bhartṛdārikā |
tato māmanujānātu dhṛṣṭo hi gaṇikājanaḥ || 178 ||
[Analyze grammar]

evamuktābravīdevamevaṃ nāma nigadyatām |
akṛtvā sāhasaṃ kairvā mahāl labdho manorathaḥ || 179 ||
[Analyze grammar]

na cemaṃ gomukhādanyaḥ śrotumālāpamarhati |
bhedasaṃdhānadakṣo hi dūtaḥ kārye niyujyate || 180 ||
[Analyze grammar]

athotsārya tato deśānmudrikālatikā kathām |
mahyamākhyātumārabdhā kṣaṇamadhīyatāṃ manaḥ || 181 ||
[Analyze grammar]

bharato nāma rājāsīttrivargāntaparāyaṇaḥ |
sa samāhṛtavān kāntāḥ kumārīrā mahodadheḥ || 182 ||
[Analyze grammar]

yugapatpariniyāhametāḥ sarvā rahogatāḥ |
sukhānyanubhaviṣyāmi saṃtatānītyacintayat || 183 ||
[Analyze grammar]

yasyāśca prathamaṃ tena gṛhītaḥ kampanaḥ karaḥ |
tasyāmeva sa saṃtuṣṭaḥ śuddhapuṇyārjitākṛtau || 184 ||
[Analyze grammar]

pariśeṣāstu yāstāsāṃ manonayanahāriṇaḥ |
manoruhakarākārānaṣṭau prākalpayadgaṇān || 185 ||
[Analyze grammar]

gaṇe gaṇe ca pramukhāṃ mukharābharaṇāvṛtām |
anujñātāsanacchatracāmarāmakaronnṛpaḥ || 186 ||
[Analyze grammar]

tā gaṇāntargatā yasmādanyāsāṃ ca mahattamāḥ |
taṃ mahāgaṇikāśabdamalabhanta narādhipāt || 187 ||
[Analyze grammar]

mahāguṇāstataścānyāstato'pyanyāstataḥ parāḥ |
yāvadghaṭakasaṃghaṭṭakaṭhorakaṭayaḥ khalāḥ || 188 ||
[Analyze grammar]

ya eṣa gaṇikābheda idānīmapi dṛśyate |
tataḥ kālātprabhṛtyeva bharatena pravartitaḥ || 189 ||
[Analyze grammar]

gaṇamukhyāstu yāstāsāmekasyāṃ kila saṃtatau |
jātā kaliṅgaseneyaṃ sarasyāmiva padminī || 190 ||
[Analyze grammar]

surāsuroragastrīṇāṃ nindantī rūpasaṃpadam |
anayā tanayā labdhā seyaṃ madanamañjukā || 191 ||
[Analyze grammar]

eṣā rājakulaṃ yāntīṃ dṛṣṭvā mātaramekadā |
ahamapyāci yāmīti punaḥ punarabhāṣata || 192 ||
[Analyze grammar]

jñātvā tu dṛḍhanirbandhāṃ sācī duhitaraṃ priyām |
gṛhītabālābharaṇāmanayannṛpasaṃsadam || 193 ||
[Analyze grammar]

atha rājakulādeṣā nivṛttā lakṣitā mayā |
savikāsaiḥ satoṣeva kapolanayanādharaiḥ || 194 ||
[Analyze grammar]

sthitā saṃprasthitāsīnā niṣīdantī ca saṃtatāḥ |
karoti sma sakhīmadhye rājāsthānagatāḥ kathāḥ || 195 ||
[Analyze grammar]

dinaśeṣamatiprerya kṣaṇadāṃ ca sajāgarā |
prātaḥ sādaramādatta citraṃ maṇḍanamātmanaḥ || 196 ||
[Analyze grammar]

prasthitā prasthitām dṛṣṭvā rājāsthānāya mātaram |
tayā pṛṣṭā kva yāsīti yatra tvamiti cābravīt || 197 ||
[Analyze grammar]

tayoktamananujñātaiḥ putri gantuṃ na labhyate |
rājāsthānaṃ tanusnehāḥ paruṣā hi narādhipāḥ || 198 ||
[Analyze grammar]

tena mātarnivartasva labdhānujñā gamiṣyasi |
dhṛṣṭā hi dveṣyatāṃ yānti praṇayinyo'pi yoṣitaḥ || 199 ||
[Analyze grammar]

madhurāścopapannāśca śrutvā māturimā giraḥ |
kaṭukā durghaṭāśceyaṃ manyamānā nyavartata || 200 ||
[Analyze grammar]

dṛṣṭanaṣṭanidhāneva daridravaṇigaṅganā |
muktanidrāśanālāpā śayyaikaśaraṇābhavat || 201 ||
[Analyze grammar]

ekadā prastutakathāḥ sakhīriyamabhāṣata |
svaptumicchāmyahaṃ sakhyastāvannirgamyatāmiti || 202 ||
[Analyze grammar]

yātāsu tāsu manasā yatsatyaṃ mama śaṅkitam |
etāḥ prasthāpitāḥ sakhyaḥ kimakāraṇametayā || 203 ||
[Analyze grammar]

yā sakhībhirvinā nidrāṃ naiva labdhavatī purā |
tasyāstā eva nighnanti nidrāmiti na badhyate || 204 ||
[Analyze grammar]

cintayitveti tiṣṭhantī jālavātāyanāvṛtā |
maṇḍanavyāpṛtāmetāṃ paśyāmi sma sadarpaṇā || 205 ||
[Analyze grammar]

abhirājakulaṃ sthitvā baddhāñjalirabhāṣata |
janmāntare'pi bhūyāsamahaṃ tasminvadhūriti || 206 ||
[Analyze grammar]

dukūlapāśamāsajya kaṃdharāyāmanantaram |
udalambayadātmānaṃ satvarā nāgadantake || 207 ||
[Analyze grammar]

vegādiṣurivāgatya prāṇāpaharaṇodyatam |
kaṇṭhapāśaṃ tametasyāḥ kālapāśamivākṣipam || 208 ||
[Analyze grammar]

śayanīyamathānīya sajalairvyajanānilaiḥ |
balātpratyānayaṃ saṃjñāṃ pretarājakulādaham || 209 ||
[Analyze grammar]

krameṇonmīlya nayane mantharā tāmratārake |
ninīya mayi mattaśca pratyāhṛtyedamabravīt || 210 ||
[Analyze grammar]

tadmitramatikaṣṭād yadvyasanātkila rakṣati |
vyasane praharantyā tu śatrutvaṃ darśitaṃ tvayā || 211 ||
[Analyze grammar]

ahaṃ hi sarvaduḥkānāmidamutpannamālayam |
tvayā jīvitamujjhantī vidhṛtā kimakāraṇam || 212 ||
[Analyze grammar]

ānukūlyena nirvāhya kālamekapade tvayā |
vighnantyā mama saṃkalpaṃ darśitā pratikūlatā || 213 ||
[Analyze grammar]

yadetaducyate loke sarvathā na tadanyathā |
aśeṣopāyaduḥsādhyo mitraṃ śatrurmahāniti || 214 ||
[Analyze grammar]

bruvāṇāmityasaṃbaddhamityenāmahamabruvam |
svāmini prabhurityasmānupālambhena takṣasi || 215 ||
[Analyze grammar]

idaṃ kathaya nastāvadvyasane'bhyudaye'pi vā |
svāminyā vayamāyāte kasminnābhyantarīkṛtāḥ || 216 ||
[Analyze grammar]

jātāsi kṛpaṇedānīṃ dāsavargamapāsya yā |
tanumekākinī tyaktvā sukhamāsitumicchasi || 217 ||
[Analyze grammar]

duḥkhahetumataḥ śaṃsa yadi sādhyaṃ bhaviṣyati |
jīviṣyāmastataḥ sarvāmariṣyāmo viparyaye || 218 ||
[Analyze grammar]

atha sthitvā kṣaṇaṃ tūṣṇīṃ śanakairidamabravīt |
ekajīvaśarīrāyai kiṃ tubhyamapi kathyate || 219 ||
[Analyze grammar]

atha jānantyapi tvaṃ māṃ nirlajjayitumicchasi |
idamākhyāya te ko vā strībhyaḥ sāhasikaḥ paraḥ || 220 ||
[Analyze grammar]

ahaṃ rājakulaṃ yātā devenāhūya sādaram |
dakṣiṇaṃ parighākāramūrumāropitā tadā || 221 ||
[Analyze grammar]

upaviṣṭastu nṛpaterūrau vāme nṛpātmajaḥ |
mayā dṛṣṭaḥ praviṣṭaśca hṛdayaṃ me anivāritaḥ || 222 ||
[Analyze grammar]

dahane'pi vasannantarna dahatyaraṇīṃ sa tu |
saumyo'pi puṇyavānasmānnirdhūmaṃ dagdhumicchati || 223 ||
[Analyze grammar]

sa heturasya duḥkhasya sakṛddarśanamāgataḥ |
adhunā śrūyamāṇo'pi kiṃ vā vilapitairiti || 224 ||
[Analyze grammar]

śrutvedamahamasyāstu jātā yatsatyamākulā |
upāyametamāśaṅkya samudrotsekaduṣkaram || 225 ||
[Analyze grammar]

hā heti hasitenoccairgūhamānā viṣaṇṇatām |
etāmāśvāsayāmi sma niḥsārairvacanairiti || 226 ||
[Analyze grammar]

muñca svāmini saṃtāpamapi vidyādhareśvaram |
vaśayeyaṃ tava prītyai kiṃ punaḥ puruṣeśvaram || 227 ||
[Analyze grammar]

kiṃ tu tvāravatā śakyaṃ na labdhaṃ phalamīpsitam |
rājāno'pi hi sāmādīn krameṇaiva prayuñjate || 228 ||
[Analyze grammar]

tena dhairyaprakarṣeṇa manaḥ saṃdhṛtya cañcalam |
lokenālakṣitā kāṃścitsahasva divasāniti || 229 ||
[Analyze grammar]

taṃ ceyaṃ siddhamevārthamarthibhāvādabudhyata |
antaścākathayattoṣaṃ vikasanmukhapaṅkajā || 230 ||
[Analyze grammar]

divase divase caitāṃ vacobhirmadhurānṛtaiḥ |
kāryasaṃsiddhasaṃbaddhairdarśitāśāmayāpayam || 231 ||
[Analyze grammar]

vandhyottarairyadātmānaṃ vañcyamānāmamanyata |
moktukāmā tadā prāṇānpunarutprekṣitā mayā || 232 ||
[Analyze grammar]

tataḥ saṃbhrāntayā gatvā mayāsyā māturantikam |
saṃpradhārya tayā sārdhamupāyo'yamanuṣṭhitaḥ || 233 ||
[Analyze grammar]

śarīraṃ rājaputrasya dvitīyamiva gomukhaḥ |
sa kenacidupāyena veśamāśu praveśyatām || 234 ||
[Analyze grammar]

sa eva sahacāritvādāneṣyati nṛpātmajam |
manaḥśrotraharālāpo vasantamiva kokilaḥ || 235 ||
[Analyze grammar]

kaliṅgasenayā cāyaṃ vṛttāntaḥ kathitastadā |
padmāvatyai tayā cāsi cetasya iti bhāṣitaḥ || 236 ||
[Analyze grammar]

tataḥ sārathikāyasthahastyārohādibhistathā |
dhūrtairasmatprayuktaistvaṃ veśametaṃ praveśitaḥ || 237 ||
[Analyze grammar]

tisṛṇāṃ ca prayuktānāmabhavadbhavataḥ priyā |
tantrīṇāṃ varṇatantrīva madhurā padmadevikā || 238 ||
[Analyze grammar]

sā tu nirvartitasvārthā suhṛdarthaparāṅmukhī |
na nivedayate tubhyaṃ svārthabhraṃśaviśaṅkayā || 239 ||
[Analyze grammar]

nopāyamaparaṃ dṛṣṭvā prayuktaṃ bhartṛdārikā |
asādhyāyataniśvāsā nirāśā dṛśyatāmiti || 240 ||
[Analyze grammar]

tadidaṃ duḥsahaṃ duḥkhaṃ yasmādasmākamāgatam |
tvadāyattaḥ sa śeṣaśca saṃvidhattāṃ bhavāniti || 241 ||
[Analyze grammar]

athāhamabruvaṃ kasmānnakhacchedyamupekṣayā |
kuṭhāracchedyatāṃ nītaṃ bhavatībhiridaṃ tṛṇam || 242 ||
[Analyze grammar]

svayameva tato gatvā devī vijñāpitā mayā |
mucyatāmeṣa saṃtāpaḥ siddhaṃ viddhi prayojanam || 243 ||
[Analyze grammar]

yuvarājārthinī devī sa caritaguṇavatsalaḥ |
saṃdhātā gomukhaśceti dhanyastrikasamāgamaḥ || 244 ||
[Analyze grammar]

nāstyeva ca mamāyāsaḥ śaratkāntyunmanā yataḥ |
rājahaṃso hi nalinīṃ svayamevopasarpati || 245 ||
[Analyze grammar]

alaṃ cālāpajālena sarvathāhaṃ nṛpātmajam |
svāminyai kārayiṣyāmi praṇāmamacirāditi || 246 ||
[Analyze grammar]

sābravīnna nasaṃbhāvyamidaṃ nāgarake tvayi |
kiṃ tu prastāvamāsādya yatethāḥ kāryasiddhaye || 247 ||
[Analyze grammar]

aprastāvaprayuktā hi yānti niṣphalatāṃ kriyāḥ |
aniṣṭaphalatāṃ vāpi kopayitvā prabhūniti || 248 ||
[Analyze grammar]

tatastasyai namaskṛtya kumāravaṭakāmagām |
ucchiṣṭānāgataścāsmi gṛhītvā modakādikān || 249 ||
[Analyze grammar]

tāṃ ca vijñāpayāmi sma rājaputreṇa modakaḥ |
svayamārabhya hastābhyāṃ yuṣmabhyaṃ prahitā iti || 250 ||
[Analyze grammar]

sābravījjālamapyetadāśvāsayati mādṛśam |
āśvāsanti kṣaṇaṃ dṛṣṭvā mṛgā hi mṛgatṛṣṇikām || 251 ||
[Analyze grammar]

mālyacandanatāmbūlavāsobhūṣaṇadhūpanaiḥ |
yuṣmābhiḥ preṣitānīti tāmāśvāsitavānaham || 252 ||
[Analyze grammar]

eṣa vijñāpayāmyadya śvo vijñāpayiteti ca |
alabdhāvasaraḥ kālametāvantamayāpayam || 253 ||
[Analyze grammar]

atha māmabravīddevyāḥ purato mudrikālatā |
aho saṃbhāvanā kāryā mahānāgarako bhavān || 254 ||
[Analyze grammar]

praṇāmaṃ kārayāmīti visphūrjya bhavatā tathā |
kimiyaṃ vañcyate mugdhā patrapuṣpaphalādibhiḥ || 255 ||
[Analyze grammar]

atha vā tiṣṭha tāvattvamahamevānayāmi tam |
viraktamapi saṃdhātumalaṃ kauśalamasti naḥ || 256 ||
[Analyze grammar]

evamuttejjitastasyāgurubhirvacanairaham |
phalena jñāsyasītyuktvā prastāvāvahito'bhavam || 257 ||
[Analyze grammar]

yātrāyāṃ tu pravṛttāyāmabhyāse'tra yadeva me |
tanmayā kāritā yūyaṃ kṣiptvā hariśikhādikān || 258 ||
[Analyze grammar]

yattatpravahaṇaṃ gacchatpathi yuṣmābhirīkṣitam |
tadaryaduhitādhyāsta vidyudabhramiva dhvanat || 259 ||
[Analyze grammar]

yatra yattanmukhasyārddhaṃ lalāṭanihitāṅguli |
yuṣmabhyaṃ darśitaṃ vandyaṃ tattayā vandamānayā || 260 ||
[Analyze grammar]

yacca vijñāpitā yūyamānataṃ mukuṭaṃ manāk |
unnamyatāmiti mayā tatrāpīdaṃ prayojanam || 261 ||
[Analyze grammar]

āsīdāsāṃ praṇāmo'yamaryaputreṇa nāgaraḥ |
kṛtastoṣayatā kāntāmasmākaṃ svāminīmiti || 262 ||
[Analyze grammar]

seyaṃ kāmayate devaṃ devī madanamañjukā |
prajñāparākramaprāṇaṃ lakṣmīriva narādhipam || 263 ||
[Analyze grammar]

ayatnopanatā ceyaṃ na pratyākhyātumarhati |
naveva mālatī mālā lobhanīyaguṇākṛtiḥ || 264 ||
[Analyze grammar]

daṣṭānaṅgabhujaṃgena laghu saṃbhāvyatāmasau |
na hyāśīviṣadagdhaantrāḥ kṣamante divasāniti || 265 ||
[Analyze grammar]

iti gomukhataḥ śrutvā kathāṃ navadaśapriyām |
tatkathāpahṛtavrīḍaḥ prakāśamahamabravam || 266 ||
[Analyze grammar]

tadaiva hṛdaye'smākaṃ rājotsaṅganiṣaṇṇayā |
aśīrṇaṃ manmathataroḥ prakīrṇaṃ bījametayā || 267 ||
[Analyze grammar]

tadguṇaśravaṇāmbhobhiḥ sicyamānaṃ tadā tadā |
bādhamānaṃ mano jātamucchvasatkarkaśāṅkuram || 268 ||
[Analyze grammar]

taddohadamivāsādya priyāṃ pravahaṇe sthitām |
kampaniḥśvāsajananānamuñjatpallavāniva || 269 ||
[Analyze grammar]

samāptāvayavo yāvanmanobhavamahātaruḥ |
na samākramya mṛdnāti tāvaddarśaya tāmiti || 270 ||
[Analyze grammar]

tenoktaṃ nartanācāryāvaspardhetāṃ parasparam |
tvatpravīṇo'hamityuktau tau ca bhūpatinā kila || 271 ||
[Analyze grammar]

alaṃ vāṃ kalahaṃ kṛtvā karmaśāstravidau yuvām |
yasya yā kuśalā śiṣyā sa nartayatu tāmiti || 272 ||
[Analyze grammar]

śvaḥ suyāmunadantāṃ ca tasmādaryasutāṃ ca naḥ |
nṛtyantīṃ nṛpatirdraṣṭā tatra draṣṭāstha tāmiti || 273 ||
[Analyze grammar]

yā svābhāvikarūpakhaṇḍitajagadrūpābhimānā priyā śṛṅgārādirasaprayogasubhagā jāyeta sā kīdṛśī |
ityadhyāsitacetasā kathamapi prakrāntayā cintayā paryaṅkāṅkavivartinārtatanunā nītā triyāmā mayā || 274 ||
[Analyze grammar]