Chapter 9

tato madāndhavanitākapolasthalakauśalam |
sarojapattraṃ karajaiśchettumārabdha gomukhaḥ || 1 ||
[Analyze grammar]

pattracchedyaṃ tatastasyāḥ saritastaradambhasi |
sajīvamiva saṃpannaṃ calatvātpaṭuraṃhasaḥ || 2 ||
[Analyze grammar]

anukūlaṃ prasarpantaṃ praśaṃsantaśca gomukham |
pattracchedyamapaśyāmo muktāvayavasaṃkaram || 3 ||
[Analyze grammar]

astmābhiranuyuktaśca kathayeti savistaram |
gomukho vyākaroti sma pattracchedasya lakṣaṇam || 4 ||
[Analyze grammar]

ihāryaputra vijñeyaṃ pattracchedyaṃ samāsataḥ |
tryasraṃ ca caturasraṃ ca dīrghaṃ vṛttaṃ ca bhedataḥ || 5 ||
[Analyze grammar]

tryasraiḥ catuṣpadaśailāniṣpadyante gṛhādi ca |
caturasraiḥ saśālāni purāṇi puruṣādi ca || 6 ||
[Analyze grammar]

dīrghe nadanadīmārgapratānabhujagādayaḥ |
vṛtte bhūṣaṇasaṃyogaśakuntamithunādayaḥ || 7 ||
[Analyze grammar]

gomukhe kathayatyevamāgatya marubhūtikaḥ |
aho nu mahadāścaryamāryaputretyabhāṣata || 8 ||
[Analyze grammar]

asau hariśikhenoktaḥ sarvameva bhavādṛśām |
kūpakacchapakalpānāmāścaryaṃ sthūlacakṣuṣām || 9 ||
[Analyze grammar]

paśya duḥśraddadhāneti tamuktvā marubhūtikaḥ |
idamāścaryamityuccaiḥ pulinaṃ no vyadarśayat || 10 ||
[Analyze grammar]

tato hariśikhenoktaṃ kṛtvā hasitamulbaṇam |
āścaryaṃ pulinaṃ paśya namastasmai sacakṣuṣe || 11 ||
[Analyze grammar]

nimnena salilaṃ yāti pulinaṃ sikatāsthalam |
āścaryaṃ yadi tanmūḍha dveṣaḥ kaḥ salile tava || 12 ||
[Analyze grammar]

so'bravītkena pulinamāścaryamiti bhāṣitam |
puline yattadāścaryamatha vā dṛśyatāmiti || 13 ||
[Analyze grammar]

tenoktaṃ puline santi sikatāḥ kiṃ tadadbhutam |
netyukte tena dṛṣṭvā tu pulinaṃ gomukho'bravīt || 14 ||
[Analyze grammar]

mā mā bhadramukhaṃ kaścitparibhūnmarubhūtikam |
mayā hi puline dṛṣṭaṃ saṃniviṣṭaṃ padadvayam || 15 ||
[Analyze grammar]

uktaṃ hariśikhenāpi yadyāścaryaṃ padadvayam |
atyāścaryamidaṃ paśya padakoṭīścaturdaśa || 16 ||
[Analyze grammar]

tenoktaṃ sānubandhāsu nāścaryaṃ padakoṭiṣu |
idaṃ vicchinnasaṃtānaṃ tenāścaryaṃ padadvayam || 17 ||
[Analyze grammar]

tenoktaṃ yadi śeṣāṇi parāmṛṣṭāni pāṇinā |
bhaveyuriti tenoktaṃ tataḥ syādeva vālukā || 18 ||
[Analyze grammar]

yeyaṃ tīrataroḥ śākhā pulinaṃ yāvadāgatā |
tayā gatvāvatīrṇaḥ syātkaścinnāgarako yadi || 19 ||
[Analyze grammar]

etāmeva samālambya dūramālambapallavām |
nivarteteti tenokte parṇākīrṇā mahī bhavet || 20 ||
[Analyze grammar]

kasya tarhīti tenokte divyasyetyabravītsa tam |
divyānāṃ katamasyeti sa vidyādharamādiśat || 21 ||
[Analyze grammar]

na spṛśanti bhuvaṃ devāḥ sthūlatvād yakṣarakṣasām |
dūraṃ padāni majjanti pulineṣu viśeṣataḥ || 22 ||
[Analyze grammar]

tapaḥkṣāmaśarīratvātsiddhānāmṛṣibhiḥ saha |
avyaktāṅgulipārṣṇyādinikṣepaṃ jāyate padam || 23 ||
[Analyze grammar]

anyeṣāṃ ca manuṣyāṇāmupapattyā niyujyate |
avagāḍhaṃ bhavatyagre viparītaṃ tu yoṣitaḥ || 24 ||
[Analyze grammar]

bhārākrāntaḥ sa cetyukte bhuyo hariśikho'bravīt |
śilāpādapaśatrūṇāṃ ko'sya bhāro bhavediti || 25 ||
[Analyze grammar]

śilāyāmavagāḍhaṃ syātparṇakīrṇaṃ ca pādape |
śatrau na śatruṃ puline ramaṇīye'vatārayet || 26 ||
[Analyze grammar]

tasmādasiddhavidyāsya bhāro vidyādharī yataḥ |
na vidyāsiddhimāptvāpi jāyante paṅguvṛttayaḥ || 27 ||
[Analyze grammar]

āropitaṃ ca tenāsyājaghanaṃ dakṣiṇaṃ bhujam |
nimagnaṃ yena tasyedaṃ dakṣiṇaṃ kāminaḥ padam || 28 ||
[Analyze grammar]

patitairuttamāṅgācca keśadhūpādhivāsitaiḥ |
mālatīkusumairvāsamavakīrṇaṃ na paśyasi || 29 ||
[Analyze grammar]

ramaṇīyatarāṃ caiṣāṃ na tyakṣyati sa nimagnām |
tenānyatrāpi dṛśyantāṃ padāni nipuṇairiti || 30 ||
[Analyze grammar]

tataḥ paurairmadīyaiśca vicinvadbhiritastataḥ |
strīpuṃsayoradṛśyanta padāni salilāntike || 31 ||
[Analyze grammar]

sahāsmābhistamuddeśaṃ gatvā dṛṣṭvā ca gomukhaḥ |
tena nāgarakenāpi bhāvyamityetaduktavān || 32 ||
[Analyze grammar]

kathaṃ vettheti pṛṣṭaśca sa vihasyedamuktavān |
jñeyaṃ kimatra durjñānamatha vā kathayāmi vaḥ || 33 ||
[Analyze grammar]

paracittānuvṛttiśca svacittasya ca nigrahaḥ |
yeyaṃ nāgarakairuktā sā nāgarakatā matā || 34 ||
[Analyze grammar]

mantharaṃ parisarpantīṃ kāminīmanugacchati |
ayaṃ nāgarako yasmādatikramya na gacchati || 35 ||
[Analyze grammar]

idānīmeva tau yātau padavī dṛśyatāmiyam |
tathā hi caraṇākrāntinatamadyāpi śādvalam || 36 ||
[Analyze grammar]

iti tāmanugacchanto navāṃ caraṇapaddhatim |
saptaparṇamapaśyāma pravṛttabhramarotsavam || 37 ||
[Analyze grammar]

tanmūle yāni vṛttāni raho viharamāṇayoḥ |
svayamācaritānīva gomukhastānyavarṇayat || 38 ||
[Analyze grammar]

iha sā kupitā tasmai tena ceha prasāditā |
ayaṃ sakusumaścātra kḹptaḥ pallavasaṃstaraḥ || 39 ||
[Analyze grammar]

śrāntā cātropaviṣṭā sā tathā cedaṃ nirūpyatām |
āsanaṃ jaghanākrāntijātajarjarapallavam || 40 ||
[Analyze grammar]

nidhāya jaghane hastau vinamayya gurutrikam |
iyaṃ vijṛmbhamāṇāyāmagnāgracaraṇā mahī || 41 ||
[Analyze grammar]

evaṃ nirūpayantaśca saptaparṇatalādvayam |
niryāntīmanvagacchāma tayoścaraṇapaddhatim || 42 ||
[Analyze grammar]

athāgamyamapaśyāma candrasūryānalānilaiḥ |
mādhavīgahanaṃ veśma kāmināmanivāritam || 43 ||
[Analyze grammar]

vāruṇīpānasaṃjātamadabhṛṅgaviluptayā |
puṣpavatyā pariṣvaktaṃ śyāmayā tannirantaram || 44 ||
[Analyze grammar]

dṛṣṭvā ca gomukhenoktamatraivāste sa kāmukaḥ |
pracchannaṃ ramaṇīyaṃ ca na hīdaṃ tyāgamarhati || 45 ||
[Analyze grammar]

na cāpi darśanaṃ yuktamāsīnasya yathāsukham |
tasmānmuhūrtamanyatra kvacidviśramyatāmiti || 46 ||
[Analyze grammar]

nīlaśītalamūlasya dūrvayā vaṭaśākhinaḥ |
chāyayā ca palāśānāmatiṣṭhāma tale tataḥ || 47 ||
[Analyze grammar]

gomukhastu tadālokya latāgṛhakamunmukhaḥ |
nāstyasāvatra kāmīti saśiraḥkampamuktavān || 48 ||
[Analyze grammar]

tato hariśikhenoktaṃ pūrvamastīti bhāṣase |
idānīmapi nāstīti sarvathonmattako bhavān || 49 ||
[Analyze grammar]

tenoktamidamatrastaṃ niṣkrāntaṃ mādhavīgṛhāt |
śikhaṇḍimithunaṃ kasmānmūkamandha na paśyasi || 50 ||
[Analyze grammar]

yadi kaścidbhavedatra trastametattatastataḥ |
muktārtakekamuḍḍīya vṛkṣadurgaṃ viśediti || 51 ||
[Analyze grammar]

tataḥ prasthāpayāmi sma vicetuṃ parivārakān |
calayantaś tu hastāṃste śūnyamākhyaṃl latāgṛham || 52 ||
[Analyze grammar]

svayaṃ tatrāpyapaśyāma racitaṃ prastaraṃ mahat |
prakīrṇapallavanyāsaṃ kiśoraluṭhitairiva || 53 ||
[Analyze grammar]

taruśākhāvasaktaṃ ca hāranūpuramekhalam |
anyatrānyatra ca kṣaumamambhoruhadalāruṇam || 54 ||
[Analyze grammar]

patitārkanikāśaṃ ca vidyādharadhanaṃ kvacit |
varmaratnaṃ sphuradratnaprabhākuñcitalocanam || 55 ||
[Analyze grammar]

sarvaṃ tadgrāhayāmi sma puruṣairbhūṣaṇādikam |
tasmai niryātayiṣyāmi dṛṣṭāyetyatha gomukhaḥ || 56 ||
[Analyze grammar]

abravīdvairiṇā nūnaṃ sa nītaḥ saha kāntayā |
tābhyāṃ hi paratantrābhyāṃ bhūṣaṇādīdamujjhitam || 57 ||
[Analyze grammar]

dīrghāyuṣkaṃ ca taṃ vitta snigdhāstasya śiroruhāḥ |
lagnāḥ pādapaśākhāyāmadyāpi hi sugandhayaḥ || 58 ||
[Analyze grammar]

evaṃ nirūpayantaśca samantāddattadṛṣṭayaḥ |
nātidūramatikramya kvacittuṅgatarau vane || 59 ||
[Analyze grammar]

baddhaṃ skandhe kadambasya pañcabhirlohaśaṅkubhiḥ |
vidyādharamapaśyāma lepavidyādharācalam || 60 ||
[Analyze grammar]

athāvatāryatāmeṣa skandhādityabhidhāya tān |
apasṛtya tataśchāyāmāśrayāmi sma śākhinaḥ || 61 ||
[Analyze grammar]

gomukhastvabravīnnaite kenacil lohaśaṅkavaḥ |
śakyāḥ kraṣṭumupayena sarvairapi surairiti || 62 ||
[Analyze grammar]

athāhamabruvaṃ smṛtvā rājājalpanmayā śrutam |
etā oṣadhayaḥ pañca sadāsthāḥ kila varmaṇi || 63 ||
[Analyze grammar]

viśalyakaraṇī kācitkācinmāṃsavivardhanī |
vraṇasaṃrohiṇī kācitkācidvarṇaprasādanī || 64 ||
[Analyze grammar]

mṛtasaṃjīvanī cāsāṃ pañcamī paramauṣadhiḥ |
yadi varmaṇi tāḥ santi tābhiḥ saṃjīvyatāmiti || 65 ||
[Analyze grammar]

muhūrtādiva cāgatya vismito gomukho'bravīt |
prasādādaryaputrasya jīvitaḥ sa nabhaścaraḥ || 66 ||
[Analyze grammar]

tā mahauṣadhayo dṛṣṭānihitāstasya varmaṇi |
śalyaprote ca hariṇe prayuktāḥ kramaśastataḥ || 67 ||
[Analyze grammar]

tatra dṛṣṭaprabhāvābhiḥ sa vidyādharasundaraḥ |
akṛtāṅgaḥ kṛtaḥ sadyaḥ samāśvasyeti bhāṣate || 68 ||
[Analyze grammar]

jīvitaḥ kena baddho'hamityathāhaṃ tamuktavān |
asmākamaryaputreṇa prakārais caturairiti || 69 ||
[Analyze grammar]

tenoktaṃ kiṃ ca yuṣmākamaryaputro'pi vidyate |
āmeti ca mayā prokte tenoktaṃ na sa mānuṣaḥ || 70 ||
[Analyze grammar]

asmākamaryaputro'pi devo vidyādharo'pi vā |
prasīdantu tamākhyāta prasādaṃ cakṣuṣāmiti || 71 ||
[Analyze grammar]

mayoktamaryaputreṇa vayamājñāpitā yathā |
jīvayitvābhyanujñeyo mā sma paśyatsa māmiti || 72 ||
[Analyze grammar]

kṛtopakārastvāṃ draṣṭuṃ nāyamicchati lajjayā |
punaḥsaṃdarśanāyātastāta prasthīyatāmiti || 73 ||
[Analyze grammar]

atha visrastahastena dattvā jānunipātanam |
viniśvasya ca tenoktaṃ dainyagadgadayā girā || 74 ||
[Analyze grammar]

idānīmasmi sumṛtaḥ prāṇadānopakāriṇam |
svāminaṃ yanna paśyāmi bhaviṣyacakravartinam || 75 ||
[Analyze grammar]

pradāya yadi me prāṇānpaścāttāpena khedyate |
evaṃ muñcāmi bhūyastānna cetpaśyatu māmiti || 76 ||
[Analyze grammar]

mayā datte'bhyanujñāne paśyatvevaṃ karotviti |
gāṃ spṛśañjānuśirasā sa māmidamabhāṣata || 77 ||
[Analyze grammar]

vidyādharo'mṛtagatiḥ kauśikasya muneḥ sutaḥ |
sarvavidyādhareśena praṇamandṛśyatāmiti || 78 ||
[Analyze grammar]

ehīha ca mayāhūya spṛṣṭaḥ pṛṣṭhe nirāmayaḥ |
suhṛddṛṣṭyā ca dṛṣṭaḥ sanprahṛṣṭaḥ samupāviśat || 79 ||
[Analyze grammar]

tato hariśikhenoktamuktaṃ vṛṣasutena yat |
satyaṃ tatpriyasaṃbhāṣo mahānāgarako hyayam || 80 ||
[Analyze grammar]

idaṃ śrutvāmitagatiridamasmānabhāṣata |
nedaṃ nāgarakatvaṃ me śrūyatāṃ ca kathā yathā || 81 ||
[Analyze grammar]

asti prāleyaśailasya manonayanahāriṇi |
śikhare kauśiko nāma munistulyāśmakāñcanaḥ || 82 ||
[Analyze grammar]

taṃ ca bindumatī nāma tyaktanandanakānanā |
ārādhitavatī yatnātsudīrghaṃ kālamapsarāḥ || 83 ||
[Analyze grammar]

ekadā kauśikenoktā varaṃ brūhīti sābravīt |
yadi me bhagavānprītaḥ tato'patyaṃ dadātviti || 84 ||
[Analyze grammar]

tena cotpāditaṃ tasyāmapatyayugalaṃ kramāt |
ahaṃ ca putraḥ putrī ca matsvasā matsanāmikā || 85 ||
[Analyze grammar]

so'haṃ saṃvardhitastena nāsti tad yanna śikṣitam |
dhārayāmi ca tadvidyāstena vidyādharo'bhavam || 86 ||
[Analyze grammar]

ekadā pitaraṃ dṛṣṭvā rudantamahamabruvam |
mādṛśaṃ putramutpādya kiṃ roditi bhavāniti || 87 ||
[Analyze grammar]

tenoktaṃ cakravartitvaṃ na te paśyāmi putraka |
aṅgādaṅgānmadīyāttu vṛthā jāto bhavāniti || 88 ||
[Analyze grammar]

mayoktaṃ mama yaḥ svāmī sa mahyaṃ kathyatāmiti |
tenoktaṃ cakracartī yaḥ sa cāpyanviṣyatāmiti || 89 ||
[Analyze grammar]

mayoktaṃ cakravartitvaṃ yaiścihnairavagamyate |
dṛṣṭvā tāni dhiyā mahyamācaṣṭāṃ bhagavāniti || 90 ||
[Analyze grammar]

tenoktaṃ śatruṇā baddhaṃ yastvāṃ śaṅkubhirāyasaiḥ |
jīvayiṣyati jānīyātsvāminaṃ taṃ bhavāniti || 91 ||
[Analyze grammar]

mama tvaṅgārako nāma vyālakaścābhavatsuhṛt |
saudaryo gamayāmi sma tābhyāṃ kālaṃ sukhaṃ saha || 92 ||
[Analyze grammar]

atha vāyupatho nāma rājā tena sahāgamam |
kāśyapasthalakaṃ nāma puraṃ mānasalobhanam || 93 ||
[Analyze grammar]

tatraikadā vicaratā mayopavanacariṇī |
dṛṣṭā kanyāparivārā kanyakā kusumālikā || 94 ||
[Analyze grammar]

praśasyavarṇasaṃsthānā sā me buddhau sthirā sthitā |
praśastiriva vinyastā bhittau vindhyaśilābhṛtaḥ || 95 ||
[Analyze grammar]

tāmādāya tayā sārdhaṃ suhṛdbhyāṃ ca manoharāḥ |
rataye saṃcarāmi sma saridgiritarusthalīḥ || 96 ||
[Analyze grammar]

aṅgārakamathāpaśyaṃ paśyantaṃ kusumālikām |
rāgādapatrapātrāsaṃ vakragrīvānirīkṣitam || 97 ||
[Analyze grammar]

lakṣito'hamaneneti lakṣayitvā sahānujaḥ |
anāmantryaiva māṃ nīco nīcairutthāya yātavān || 98 ||
[Analyze grammar]

ahaṃ tu jātavailakṣyātsaṃraktācca tatastrasan |
na jānāmi kva yāmīti cakitaḥ saha kāntayā || 99 ||
[Analyze grammar]

adya cemāṃ samāsādya ramaṇīyāṃ nagāpagām |
avatīrṇo'smi puline komalāmalavāluke || 100 ||
[Analyze grammar]

suratānubhave yogyaṃ dṛṣṭvā tacca susaṃvṛtam |
latāgṛhamahaṃ prāptaḥ phullaśyāmālatāvṛtam || 101 ||
[Analyze grammar]

yacca śeṣamaśeṣaṃ tatkathitaṃ gomukhena vaḥ |
tasmādāptopadeśo'yaṃ na nāgarakatā mama || 102 ||
[Analyze grammar]

ko hi vidyādharairbaddhamavidyādharasainyapaḥ |
mocayenmādṛśaṃ tasmāttathedamṛṣibhāṣitam || 103 ||
[Analyze grammar]

sevante sevakāḥ sevyānprajñāprāṇadhanādibhiḥ |
yena tenātmarakṣārthaṃ madvidyā gṛhyatāmiti || 104 ||
[Analyze grammar]

sadyaḥ kṛtopakāreṇa mayā mandādareṇa ca |
na gṛhītābruvaṃ cainamanugaccha priyāmiti || 105 ||
[Analyze grammar]

abravīcca dinādasmātpareṇāhamaharniśam |
apramatto bhaviṣyāmi bhavato deharakṣaṇe || 106 ||
[Analyze grammar]

smartavyaḥ saṃkaṭe cāhamityuktvā naḥ praṇamya ca |
vegenākāśamutpatya prāgādaṅgārakaṃ prati || 107 ||
[Analyze grammar]

ādityaśarmavacanaṃ vacanaṃ ca yakṣyāyānaṃ pradakṣiṇamiṣośca marunmṛgāṇām |
prahlādināmitagateḥ kathitena jātamutkhātasaṃśayakalaṅkatayā viśuddham || 108 ||
[Analyze grammar]